بقت ملغمة

في أوروبا وحتى في بعض البلدان العربية يسير الزوج وزوجته جنباً إلى جنب ، إذا تابعت إي زوجين يتمشيان في السوق أو الشارع (عندنا) سوف تلاحظ أننا نحن معشر الرجال (السودانيين) نتقدم زوجاتنا عندما (نكون ماشين) بخطوات عديدة ، من النادر أن تجد الزوج والزوجة في خط عرضي مستقيم ومن النادر جداَ والذي ربما يقع في خانة الإستحالة أن تتقدم المرأة على الزوج أي تمشي قدامو (غيب الشوم) ، ربما تكون هذه عادة توارثناها حتى صارت عرفاً وسلوكاً (دخل الجينات) حيث أصبح متلازمة لا فكاك منها .
وإذا تركنا مسألة أنو الراجل دايماً يتقدم المرأة (دي) نجد أن الرجل أيضاً (السوداني طبعن والشرقي عموماً) لا يعطي المرأة الفرصة في أن تتقدم عليه في كثير من الأشياء والمواقف أقلها التعبير عن العاطفة والذي يجب أن يكون الإفصاح عنه من (الرجل) أما (الإنثى) فتقطعوا في مصراينا وكده .
تقول القصة أن عاشقين إيطاليين (حبوا بعض كم سنة كده) وقالوا خلاس نتزوج ولكن كانت بين عائلتيهما عداء فتم رفض الموضوع (نوهايئ) فقرر العاشقان الانتحار حيث إختارا قمة أعلى جبل (في إيطاليا) وقررا أن يلقيا بنفسيهما من ذلك العلو الشاهق!
قال العاشق: يلا يا حبيبتي ننط سوا ونخلص من الحياة دي
فردت الحبيبة : أنا خائفة ! نط إنتا بالأول وأنا ح أنط وراك !
وعلى الفور (نط) العاشق المتهور ملقياً بنفسه من أعلى الجبل وأخذ يتخبط فوق الصخور وتقطع إلى أشلاء وهى تنظر إليه حتى أختفى في القاع .
العاشقة الايطالية لما شافت المنظر المرعب ده (ضربت حساباتا) و(فتحت للموضوع) وعلى بيتهم (عدل) وطبعن بعد شوية (نست ليك القصة) .. وبعد شوية تاني لقت ليها ود حلال وعرست وخلفت صبيان وبنات ومنذ ذلك اليوم صار الرجال يصرّون على أن تتقدم النساء أولاً ومن هنا جاءت المقولة (ليديز فيرست) !
الإخوة في الله (الأفغانستانيون) كانوا مثلنا نحن (السودانيون) حيث لاحظتْ منظمات المجتمع المدني الدولية أن الرجال هناك عندما يمشون يتقدمون على زوجاتهم بعدة خطوات فقررت المنظمات أن تتدخل بحسبان أن في هذا السلوك إجحافاُ بحقوق المرأة و(دونية) ، فبدأت في برامج توعية وإرشاد بين صفوف الأفغان كي يسير الأثنان جنبا إلى جنب وبعد سنوات من الجهود المضنية ذهبت لجنة إلى أفغانستان لمعرفة النتيجة وفيما إذا كانت البرامج التوعوية قد أتت أكلها وكانت المفاجأة المذهلة وهي ترى أن المرأة لا تسير بجانب الرجل (وبس) حسب ما كان متوقعا بل تتقدم أمامه بخطوات عديدة وبالطبع كان لابد لأعضاء اللجنة من الإستفسار فقامت (سيدة أميركية) بسؤال أحد الأزواج الأفغان عن سر هذا التغير في سلوكهم وكان رده :
– بعد دخول الأمريكان إلى أفغانستان الشوارع كووولها بقت ملغمة !

كسرة :
إلى أن تتلغم شوارعنا سوف نظل نسير أمام زوجاتنا !

كسرة ثابتة :
أخبار ملف خط هيثرو العند النائب العام شنو(ووو وووو ووو)؟ – (واوين ونتم سنة !)

Advertisements

43 تعليق

  1. وتر حسااااااااااس ياجبرا
    خليك قدام طوالى زى برنجيتى دى 🙂

    سلام ياللى تحت 🙂 اولهم شمباتى

    1. هههههههههههههههههههههه,,,والله يا طبنجة رصاصك ورشاشك نارو حية !
      مبروكة يا الحبيب

    1. لقيت الزاوية ولا شنو؟؟ 🙂

      1. ههههههههههههههههههههههههاااى,,حامضة منك ,,,
        انا ذااااتى استغرشت ليهو !! وى

  2. ح تجيب لى نفسك الهوا يا عمكـــ

  3. أهااااااااا وبعدين !!!!!!!!!!!!!

  4. سلام ياأستاذنا والله الاحسن الراجل ما يطلع ما مرتو من اصلوااااااااا من باب العربيه والى المقابر

    1. وده من شنو يا بلسم من الحمشنة

  5. 🙂 و لا تعليق يا بروف

  6. لا يخفى على أحد أن المرأة هي الأم والأخت والزوجة والبنت والحبوبة مش كده وبس وست الشاي كمان ،، فالحقيقة أن أغلب االرجال بيتصرفوا كده من واقع انهم استعجالهم ده بدأ من الزواج فلازم يمشي قدام المره بالذات لو كانت مورياهو نجم الضهر علشان ما تسألوا بتفكر فى شنو وسارح كدة مالك وهو اتاري بيفكر ويحدس نفسو يا الله الرماني فى الورطة دي شنو كان ما استعجل ويوم وراء يوم بتبقى عندو عادة .. الشئ الثاني لو راجل عينه زايقة بيمشي قدام علشان يشوف براحتو وكده ،، تالت حاجة طبيعة الرجال قلوبهم حارة والغيرة كاتلاهم فلازم يمشي قدام علشان لو واحد عاكس مرتو يعمل طناش وكده .. يعني هو براه مطنش هسع النايم العام ده ما مطنش جبره ليه كم شهر .. الحصل شنو يعني .. وتلقاهو فى سرو بيقول هه يازول كتر واواتك ساااااااااااكت ما فى زول شغال بيك شغله . وفى نوع آخر من الرجال وديل يمكن شوية يكون دبلوماسيين بياخدها من فلسفة انه لو جات حارة من قدام يقابله بي وشه بس واقع الحال بيكون بيفكر ويسال الله انو تجيه مصيبه تاخدو من الماشه وراه دي .. خلاف ذلك نجد النسوان براهن راضيات بالوضع عمرك شفت ليك مره قالت للراجل امشي وراي ما هي الموضوع مريحه شديد لاسباب عدة انو الراجل بيكون قدامها وفى زواية يصعب عليه يلف منها كدة ولا كدة لانو تحت المراقبة ، وثاني حاجة بتعاين للجيب الوراء ولا جيوب الجلابية وتعرف الجزلان مليان ولا فاضي ده لو فى جزلان من اصلو .. وبعدين لو ماشه فى السوق ولقت ليها حاجة عجبتها تقيف براحتها وتتفرج والراجل يكون سرح ولمن يرجع ليها تكون هي أخدت فرجتها ومشت تتقدل ،، وبعدين ما فى شمال يمين ،، شمال يمين ،، شمال يمين ودي براه بتسلي المره وتكسر الدقائق لحدىى ما تصل الحته الماشه ليها.. وممكن برضو المره تكون زكيه وخلتو يمشي قدامها علشان تلم فيه مصيبة تاخدو وتريحها من الراجل القاطع نفسها بالمشي الكداري شن فايدتو .. بس الأخوان الأفغان عرفو يلعبوها كويس خلوها قدام لحدي ما يجي لغم ياخدها ويريحهم منها .. كفى الله الشر أمهاتنا وأخواتنا وزوجاتنا وبناتنا وحبوباتنا هم فى حدقات عيونا ولهم كل الود والمحبه …وده مروان ود الجيران وده عثمان سيد الدكان .. وفى اتنين قرايب وين

    1. الحمدلله يا ابو غسان على الكسرة قبل الأخيرة دى ( كفى الله الشر … الخ) ، جزاك الله خير وتقبل الله الدعاء.

  7. حاج أحمد السلاوى | رد

    مسكينة المرة السودانية ..تعبانة محل ما تقبل .. قبل الزواج أبوها وأخوانها مطلعين عينها .. وبعد الزواج تلم ليها فى راجل يوريها النجوم عز الظهر ..
    رفقاً بالقوارير ..
    عارف فى جماعة تحت تحت قالوا ( كسير تلج تقيل .. )

    1. انتا عارف انو أنثى العنكبوت تقتل زوجها “ليلة الدخلة” قبل التزاوج شفت الكراهية دي
      والبت ف الكوتشينه بتاكل الولد
      الكان كده الواحد يعمل حسابو ساي

  8. حاج أحمد السلاوى | رد

    وأنا بقرا فى البوست .. إتذكرت نكتة ولازم احكيها ليكم .. راجل كبير فى السن وزوجته الهرمة برضو .. طالعين ماشين مشوار وفى السكة للمحطة الشمطة حصلت بينهم وقربوا يبطلوا المشوار .. المهم واصلو .. وركبوا البص (الراجل مسكين زى حالتنا كدا ما عندو عربية ) المرة ركبت قدام والراجل قعد فى المقاعد الخلفية .. جا الكمسارى يطقطق يلم الغلة من الركاب . المرة قالت ليهو الأجرة مع الحاج قاعد ورا .. الكمسارى وصل للزوج ( الزعلان من مرتو ) و ساله : ياحاج الحاجة القاعدة قدام دى معاك ؟ رد عليهو بكل عصبية : آى معاى .. اربعين سنة .. أربعين سنة ..

    1. ههههههههههههههههههااااى,,اربعين سنة ,, اربعين سنة ,,يوم ورا يوم بالصبر الجميل منتظرك انا,,,
      هبشة : قلت لى ما عندك,,,,عربية ؟
      ويكأن….

  9. واحد تاني يا حاج السلاوي قولوا صاحبو جاهو قال ليهو يلا نمشي لصحبنا حامد نعزيهو قالوا زوجتو إتوفت .. بعد كم يوم جاهو تاني وقال ليهو نمشي لإبراهيم نعزيهو برضو مرتو ماتت .. فرد صاحبنا .. ياخ أصحابك ديل بلقو النسوان البموتن ديل وين ؟؟؟!!

    كسرة:
    ربنا يحفظ نسوان جميع السمار ويكفيهم شر المصايب.

  10. واحد كتل مرتو, و فى التحقيق بيسالوهو: اسمك منو؟ قاليهم: فاعل خير !!!

    1. حدد اجابتك كتل مراتو ياتا الاولى والا الثانية والا الثالثة والا الرابعة

      1. حاج أحمد السلاوى

        أخونا الغلبان .. لا تغلب حالك كتير .. دا يعتبر مجاهد فى سبيل الله .
        ملاحظة سغيرووووونة .. النسوان بناتنا وأخواتنا الحرائر القاعدين تهاجموا فيهن ديل . ما فى واحدة إنبرت ( حلوة إنبرت دى ) عشان تدافع عنهن أو تقول أى حاجة ..حتى بت وراق الوحيدة الكانت معانا بيجاى إتسلطوا عليها وطفشتوها ..
        غايتو لاكين يا الرجال … شكيتكم على الله ..

      2. لاكين يا السلاوى كسير التلج بتاعك مااااا عينة – عملتا واضحة شدييييد غايتو !!

      3. تعرف يا الغلبان,, اى واحدة فيهن برضو يعتبر فعل خير ,, حتى لو بقت مرة الجيران !!!

  11. كله كوم رايكم شنو في اب اربعة اثنين وراء واثنين قدام كلهم قدام كاسحات الغام كلهم وراء اليوم كله بفكر فيها ما لقيت ليها حل ورونا شطارتكم ودا طبعا غير اب اربعة واب اربعة يعني ابو ثمانية اربعة حلال واربعة برضه بفقة السترة حلال يمكن سرايا يمكن فصائل يمكن كتائب يلا في انتظاركم كم كم

  12. اخي جبرا يعني لو هناك بقت ملغمة هنا بقت شنو مهببة

  13. اعتقد بان هذه العاده السودانيه ناجمه من انه زمان ما كان فى كهرباء عشان كده الرجل يتقدم حتى يطمئن على سلامه الطريق من الحفر والشوك والعقارب والله اعلم

    1. و المطلعم فى الليالى شنو؟؟ ما يتلموا فى بيوتهم و صباحت الله بخيرا !!!

    2. هههههه الكهرباء الكهرباء ياتا يا عبااااااااااااااااااااااااااااااااس

  14. التحيه للاستاز والاخوه
    عايزين لينا دراسه ف صرت الوش لدينا عندما نخرج مع زواجاتنا

    1. لسه ما عرفت الصرة حليييييييييييييييييلك

  15. دا شعرن ما عتدنا ليهو رقبة .

  16. تذكرت احد القصص انو فى واحد بنى لزوجته المتوفيه جامع كبير ،، قامت جارتها جات لراجلها قالت ليه شفت الرجال المخلصين لزوجاتهم بيعملوا كيف .. هسع جارتي بعد ما ماتت راجلها بنى ليها جامع .. قام الراجل قاليها والله انا من يوم ما عرستك اشتريت الأرض بس انتي براك المأخرة الموضوع..
    لا نقصد التقليل من شأن المرأة وأهميتها فى حياتنا ولولاهن لما كنا ولن نكون .. بس حبينا نتسامر من خلال البوست عسى ولعل أن ننفس من بعض ما نشعر به من ضيق خنقنا وكده .. التحيه لكل الأمهات والأخوات ..

    1. المسجد الثاني عاوزين نبنيهو لامنا الحكومة بس امتى امتى يا رب

  17. جبرا والسمار .
    سلامات .
    والله ياجماعه أنا قايل رقبتى براى فى وجع المصارين والفشفاش دة .
    ماتجو نعمل إتحاد ولا رابطة نسميها رابطة (الممغسين وصابرين )…

    1. احسن اسم يكون ( رابطة المقطعينها فى مصارينم )

      1. حاج أحمد السلاوى

        الأخ ابو غسان .. هو قالوا ليك الرابطة دى ما موجودة ؟ موجودة واسمها رابطة الأزواج المضطهدين .. وفيها برضو طرفة يمكن كتير من الأخوان ( اقصد زملاء المنتدى .. عشان بالكم ما يمشى بعيد ) لاكين أعيده لمن فاتهم الإستماع .. ذهب أحد الأزواج المضطهدين لرئيس الجمعية للتسجيل .. وبعد أخذ البيانات الشخصية والأولية الهامة سأله رئيس الجمعية : طيب أول حاجة بتعملها شنو لامن تصحا الصباح ؟ رد عليهو( المضطهد ) : بدخل المطبخ بغسل العدة .. طواااالى رئيس الجمعية خبط التربيزة بيده بشدة وزعل شديد وإنفعال .. فى زول بيخلى العدة تبيت للصباح ؟..

        كسرة سغيرونة.. تقول لى قال ليك ..؟

  18. هى البلد لسة مااتلغمت يابروف ؟ كدى النجرب نخليهن قدام كم شهر كدة
    بمناسبة سفر جماعتنا خارج السودان لمدة اسبوع واحد بس وافقنى صديق افليقا سيكبة (جماعتوفى النفاس ) على عمل اسبوع الرجل الحر والراجل اجتهد وعمل ملصقات ودعاية — اتوقع نجاح كبير للسبوع – لانو ناس اب احمد مقطعنو فى المصارين — الغريبة افليقا رفض الفكرة – تفتكر ليه رفض ياشمباتى ؟

    1. هههههههههههههههههههههههااااى,,
      صدقنى ما بقدر اقول يا بشبش !!
      قبل يومين اتهمونا بالشيوعية والتهريب والتخريب !
      وى وى وى

      1. تسلم يس بس الشيوعية واللي ما عارف ايه مو احسن من اللي بنشفه في عز الظهر ده ههههههه

      2. ههههههههههههههههه,دا انا غلبااااااان !!

  19. الحبيب جبرا..سلام…
    طبعا انا بستلف مقولة خالد مدنى _وهى كلمة حق اراد بيها باطل الجنا دا_ دا شعرا ما عندى ليهو رقبة !
    وانا برررررررررررررررررررا

    1. شكيتك وجازيتك … زح زح .

  20. بحاول في البرنجية ههههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: