قال أيه؟ أقل جودة !!

بعد أن (إنفقعت) المرارة وتورم (الفشفاش) وتليف (الكبد) .. وإنفجرت شعيرات المخ الدموية وتمت إصابتنا بالكساح الذهني جراء تصريحات بعض المسئولين المستفزة والغريبة والعجيبة زى تصريحات وزير ماليتنا التالية :
• لا توجد ضائقة مالية ومافي مواطن ما لاقي ياكل
• ح نقوم بتصدير النبق والدكاترة لسد العجز
• أرجعوا للكسرة والعواسة
• نسيتوا موية البراميل والحفاظات (مذكراً الشعب الفضل بأنه الآن يشرب موية صحة)
خرج علينا ذات الوزير قبل يومين وعلى صفحات الزميلة (السوداني) مطلقاً تصريحاً (يقول للفوق ديل إنتو شنو) .. تصريحا لا يمكن أن يصرح به مسئول .. لا في الأمم الغابرة ولا الحاضرة ولا القادمة ولا (القلتهم ديل كوووولهم) .. تصريح ينطوي على (إهانة) لم يتعرض لها شعب من شعوب العالم قاطبةً في الجهات الأربع .. ماذا قال السيد وزير ماليتنا ذو (الدفع الرباعي) لشعب يسير أغلب مواطنيه على (عجل الحديد) ؟
قال لا فض فوه (إن الدولة تتجه لتوفير خبز مدعوم بأسعار وجودة أقل يطرح إلى جانب الخبز الحالي) !!
الخبز .. أيوه (الرغيف) الذي هو المكون الأساسي للوجبة الغذائية لمعظم أهل السودان (لما كانت في وجبات) قبل أن تتضاعف أسعار مكونات الغموس (حتى موية الفول) وتصبح بعيده المنال …. هذا الخبز يا سادتي الأماجد نحن موعودون بتقليل جودته ، أما كيف سوف تتم تقليل جودته فأسألوا السيد الوزير؟ (يعني مايكروعيش وكمان دون قيمة غذائية) ! بالله ده إسمو كلام؟
• عزيزي القارئ قم بتركيب الفهامة حتى تساعدنا في الإجابه على هذا السؤال :
• هل الخبز الذي نتناوله (نحنا ديل طبعن) الآن مطابق للمواصفات القياسية؟ بمعنى هل هو خبز صحى وذو جوده عادية ؟ (نخلي قصة عالي الجودة دى) ؟ هل يستطيع أحد تحديد نسبة (العجين) إلى نسبة الأتربة، والحصى، والشوائب المعدنية، و الزجاجية و(الحشراتية) وقطع المسامير والأمواس والطين والتنباك والخشب هذا غير (عرق العمال) والمكروبات والجراثيم والشكل البائس (للرغيفة) والذي (يسد النفس) ؟
طيب والحال هكذا تري ما هو شكل ومكونات الرغيف (الأقل جوده) والذي يعدنا ويبشرنا به السيد الوزير من الرغيف (التعبان) القاعدين ناكلو هسه ده ؟ يا ربي ح يكون رغيف بالحصاص (مثلاً) ، حصاص بالرغيف رغيف بالزبالة ؟ رغيف بالزفت؟ زفت بالطين ؟ طين بالخرسانة ؟ ثم ماذا يا تري سوف تكون التأثيرات الصحية لهذا الرغيف (الأقل جودة) على أجساد الشعب السوداني الفضل ؟ و ما هي يا تري الأمراض التى سوف تصيبه جراء تناوله له؟ بعد أن أصابه الرغيف (عالي الجودة الحالي) بفقر الدم والشحوب والهزال والضعف والكساح والرجفة والطشاش؟
هل سيصاب بتيبس الفقرات العنقيه بعد أن تيبست فقرات (جيوبه) أم سيصاب بتمزق في الإمعاء بعد أن تمزقت (ميزانيته) أم سيصاب بطفح بالجلد بعذ أن طفح به الكيل !
القراء الأكارم : هل رأيتم مسئولاً واحداً على كوكب الأرض والمجرات المجاورة يعد مواطنيه بإنتاج سلعة غذائية (أياً كانت) أقل جودة خليك من إنها (أساسية) !!؟
لا أظن ذلك حتي وإن كانت تلك السلعة (عالية الجوده) وعاوز يخليها (عادية الجوده) فما بال وزيرنا وهو يعلم أن رغيفنا (نحنا ديل) خالي الجوده وهو يريد أن يجعلة (أقل جوده من الخليان ذاتووو) !
• يا سعادة الوزير إن البلدان التي تهمها صحة مواطنيها تحاول تحسين جودة الخبز وقيمته الغذائية حيث يفحصون القمح للتأكد من إحتوائه على الفايتمينات والألياف الغذائية التي تضمن تخلص الجسم من الدهون والكوليسترول كما إنهم يضيفون إلى عجينته البروتنينات النباتية مثل الصويا وكما يضعون على عجينته عنصر (الحديد) حتي لا تصاب شعوبهم بالأنيمياء !
فما بالك يا أخي عاوز تجيب لينا أنيميا ونحنا أصلاً عندنا أنيمياء بعد أن تركنا أكل اللحوم الحمراء والبيضاء والطماطم والفواكه والبيض …………………….ليكم !!

كسرة :
قال أيه رغيف (أقل جودة) .. ياخي عادي بقي الزول يلاقي ليهو (كلبين) بيتشاكلو ليهم في (عجورة) تقول ليا شنو وشنو وشنوووو.. !!

كسرة ثابتة :
أخبار ملف خط هيثرو العند النائب العام شنو(ووو وووو ووو)؟

Advertisements

48 تعليق

    1. مرحب بعودتك يا العبيد ,, لاكين هو يا تجى توووش كدة فى البرنجية يا ما تجى كلو كلو ؟؟ قيسس و اللاهى!!

      1. ههههه سرق منك البرنجية

    1. طيب لو ما عاوزين رغيف ما تاكلو جاتوه ….غايتو جنس غايتو !!!

      1. الجاتوه برضو حيكون فيو تصريحات عن مستوياتو,, بس ما من وزير المالية المرة دى ,, يمكن من وزارة التجارة الخارجية عشان داخليا ما عندنا مكونات جاتوه زاتو ,, و تقليل جودتو حتكون انو بدقيق الفتريتة و بدون كريمة او فواكه و النكهة بدل الفراولة تكون (بدقة القونقليس او النبق) و اهو منتج محلى و بنصدر منو كمان لو ما عاجبكم !!!

  1. كلبين في عجورة دي أشد من الكلام كلو !!!!

  2. قال لا فض فوه (إن الدولة تتجه لتوفير خبز مدعوم بأسعار وجودة أقل يطرح إلى جانب الخبز الحالي) !
    طيب لو الخبز جودتو اقل حيبقى مدعوم كيف…تلقائيا المفروض سعرو ينزل..ولا كيف؟؟؟؟!!!!!!

  3. يا بروف مُصاب السُودان و شعب السُودان كان في (لسان) و فعال مسئوليه و مُدعي السياسة و مُنتسبي الأحزاب و الحركات فيه !
    و لا حول و لا قوة إلا بالله
    فقد بُلينا بمثل هؤلاء القوم و لا ندري من أين أتوا أو أُسقِطُوا علينا !!
    فوالله الحمير في الفكر و التخطيط و (النهيق) أعقل و أحكم منهم

    1. وزراء جُهـَّل و حكومات تأتي لتذهب في جاهلية و ضلال
      و مُعارضات عينها على السُلطة و المنصب فقط
      و حركات تستبيح حرام الله في ظنها أنها ثورية
      و سبحان الله .. البلد يحتاجُ حقا (الرجال) و يفتقد (رجال) !!!
      لنا الله

      1. عارف يا بروف و الأحباب .. الشعب السوداني الفضـّل أثبت للجميع حكومة و معارضة و حركات تمرد و العالم أجمع أنه (أرجل) من الجميع عشان كدا كان الجميع و مازالوا بيحاولوا يضغطوا على (الشعب) و (كرامة الشعب) حسب نياتهم !
        و حتى في الحكومة في وزراء و مُنتسبين و مَحسوبين عليها هم في حقيقتهم (عليها) طابور خامس عاوزين و ساعين يفجروا البلد كلها و يخربوها !!

      2. حتى عملية (بتر السودان) و كا المفاوضات و الإتفاقيات الفبلها و البعدها و البعد بعدها كلها كانت بتتداخل فيها (مؤامرات مكشوفة) على السودان الأرض و الشعب لكن كان و مازال في ناس مننا في الحكومة و المعارضة و حركات التمرد بتسعى لمصالحها الشخصية و نزواتها الدنيوية بس لا همها على بلد و لا شعب فحصل فينا كل الحصل و لسه بيحصل !!!

      3. حقيقة يا بروف و الأحباب إنو السودان تعرض (لخيانة عظمى) من أبنائه و التاريخ يشهد على الجميع و والله يا بروف لو حكم البلد (راجل) فحلال ليهو أن يُنفذ (حكم الإعدامات الجماعية) لكل من شارك و تآمر من الساسة و المثقفين و المفكرين و المتمردين في كل الإتفاقيات و المفاوضات دون خوف أو شفقة أو حتى الرحمة.
        فخيانة الشعوب و الأوطان جريمة لا و لن تُغتفر ؛
        مش الحاصل علينا (مفاوضات) هنا و هناك و ضياع للوطن ومساومات تقسيم لأرض الوطن و شعبه بين ناس أكترهم منافقين و تجار حرب و مرتزقة و (خونة)!!!

      4. بس الله في ,, و السودان فيهو (رجال) لسه ما بتخاف في الحق إلا الخلقها
        و الأيام جايه

    2. اخي محمد حسن تعجبني حرقتك على البلد ولكن ما من يسمع

    3. الاخوه الافاضل والاخ محمد حسن كلنا امل علي المستقبل القريب والايام الجايه ربنا يقربها لشعب يسير أغلب مواطنيه على (عجل الحديد) ؟ والشمس حااااااره

  4. أخونا المندهش كلامك صاح طيب ما يخلوا الرغيف ده وياكلو جاتو / ممكن الكلام ده عادي يقولوه (المسعولين الزي وزير المالية ديل ) للشعب الفضل لكن المشكلة ما عندهم ( قصر فرساي)

    1. حليلك يا النايم علي حيلك ما عندهم قصر فرساي ياخي قصر فرساي شنو الخرابة ده

  5. السلام عليكم ، بالمناسبه كلما نقرا تصريح مسعوول من الريس وانت نازل ( زيادة الجمارك والضرائب اعلنها المشير بى نفسو وقال مافى ربيع عربى الفى صيف حااااار ) المهم كلما نسمع تصريح نكون نحنو و دفعاتنا مبسوطين و نضحك سنه سنه ، لانو قربنا نخليها ليهم ، ونشوف شكلها بى تحت كان الفوق ما فيهو فايده ………….. عجبى

    1. حمدالله على السلامة يا حبيب…

      1. د / شمباتى حبابك ، بقينا كل ما نكتب شوي نلقى النفس قام ، و على شنو حتة من فضل ربنا اللى نحنو طمعانين فيهو كلو ، خلينا ليهم و نتقابل بعدين ، سمعت بتاعت المتعافى راكب موتر …………………… عجبى

  6. الأخ العزيز / الفاتح
    السلام عليكم ورحمة الله
    هؤلاء اشخاص فقدوا الضمير لايهمهم الا انفسهم لذلك لايهم اذا اصيب كل الشعب السوداني بجميع الامراض بل غاية همهم ذلك ويتمنون أن يبلد كل الشعب بين عشية وضحاحها .
    اللهم يا قصم الجبابرة والظلمة اذق من اراد بالشعب السوداني سواً من عندك مايستاهلون .

  7. اعتقد ان مثل هذا التصاريح لايمكن ان تصدر من مندوب مبيعات او صاحب مؤسسه مش من وزير
    لاحول ولا قوة الا بالله كان الله فى عون وطنا السودان

  8. شحدت ربى يجود عليهو بى كلبين يخلوا العجورة ويتناهشوا لحمو العفن دا !
    الله لا يكسبو اجر لا عافية فى الدارين,,

  9. لافض الله فوك ،،،

  10. قال أيه رغيف (أقل جودة) .. ياخي عادي بقي الزول يلاقي ليهو (كلبين) بيتشاكلو ليهم في (عجورة) تقول ليا شنو وشنو وشنوووو.. !

    1. انا خايف نقوم نحنا الشعب الفضل بيقى كوري هع

  11. حاج أحمد السلاوى | رد

    اب احمد ..
    سؤال سغيروووووونى كدا .. بما إنك متواجد الأيام دى فى جيبوتى .. الرغيف كيف عندهم ..؟؟
    نفسى اشوف الرغيف الأقل جودة شكله كيف ؟

    1. انا كنت فى جيبوتى و الحبشة و تشاد و لفيت معظم دول المنطقة من خلال شغلنا, صدقنى حتى فى الصومال رغيفهم (لا يقل جودة) عن اللى عندنا,, و عجبى

      1. يبقى كده تمام ما نحنا ورانا الصومال في الفساد عادي نكون مثلهم في الرغيف هع (والفساد دي حسب تصنيف منظمة الشفافية العالمية)

    2. يا مواطن انت بتتكلم جد دا راح تشوفه هنا بس بعد الانتاج عاوزين رايك

      1. ما ياهو كلو محصل بعضو,, احمد و الحاج احمد (ما السلاوى)

  12. الأخ الفاتح جبرا
    السلام عليكم ورحمة الله، انت وكل من سطر ملاحظة أو تعليق أو تعقيب علي تعليق السيد وزير المالية الهمام، طبعن الملاحظ انكم كلكم فهمتو التصريح بطريقة مختلفة، ونظرتو للجانب الفارغ من الكوب، بس ما فيكم زول ولو واحد بس عاين من الجانب المافي من الكوب ( ودا الجانب الما موجود أصلاً في الكوب وهو المخصص لتصريحات المسعولين)، فاليكم اقول بس تابعوني بطولة بال وح اقنعكم بوجهة نظر طويل العمر المسعول المصرحاتي: أولاً:
    1. طبعاًانتو زي ما عارفين إنو أصحاب الأفران كانو بيعملوا لينا الرغيف المدور أبوطارة.
    2. لما تطورنا ظهروا ناس بابا كوستا، وطلعوا لينا الرغيف الطوست في السبعينات من القرن الماضي.
    3. بعدهم لما تدهورنا وكترت الأفرام (دي من الفرم البيحصل في الفرن مما ينتج العرق) وتنوع الرغيف.
    4. ثم تدهورنا ودخلوا لينا المحسنات اللونية والطعمية والوزنية واللبية، حتي التي تسهم بشكل فاعل في تخفيف المعاناة عن المواطن الفضل، وزمان كنا لما يرسلونا نجيب الرغيف بنشيل القفة أم أضانين، فصار الخبز من غير اللون المعهود لانو كانوا بيعملوا مسحة علي الوش بخلطة من البيض والزيت ويرشو عليهو شوية سمسم كمان، أما الطعم والوزن واللبة فأسالوا منها كباركم الفضلو.
    5. ظهر علينا بعض الفرامين بمحسن البوتاسيوم بروميد وأخوانو ودا طبعن غالي جداً جداً جداً لأنو مركب كيميائي مستورد للمساهمة في سرطنتنا وابادتنا من وجه البسيطة.
    ثانياً:
    طبعاً دي دايركم تركزوا معاي فيها شديد عشان تفهموها، ولما تفهموها، اشرحوها لي لأني أنا زاتي ما فاهمها، فالسيد المصرح بما أنو الزول المسعول من توفير النقد الأجنبي، وتحديد سعر الصرف، والحاجات البيستوردوها، والحاجات الما بيستوردوها، وياتو حاجات مفيدة لينا، وياتا الما مفيدة، وعشان كدة وبي جراءة نباهة منو قرر إنو:
    1. يصنع لينا خبز أقل جودة.
    2. خبز أقل سعر.
    وذلك بمنع استخدام المواد التالية في صناعة الخبز وهي: 1 محسنات صناعة الخبز كالبوتاسيوم بروميد وأخوانه، 2. زيت أولين والزيوت المصنعة المستوردة،لأنها تستورد بالدولار. 3. الزيوت المحلية: لأنها تصدر وتجلب الدولار. 4. الدقيق كسلعة مستوردة مستفذة، لأننا نستورد القمح ونقوم بطحنه وغربلته وعجنه وكل هذه العمليات تحتاج طاقة وعمالة وترحيل، مما يكلف الدولة مبالغ طائلة هي أحوج لها في حاجات تانية.
    شوفتو كيف كنتوا ظالمين الراجل وكيف هو قلبو عليكم؟
    يلا اشرحوا لي الفهمتوه.

  13. سلام راجع تعقيب ها أنا ذا، وادينا رأيك

    Date: Sat, 6 Oct 2012 07:20:54 +0000
    To: ahmedabuzeid2011@hotmail.com

  14. البروف والسمار .
    سلامات .
    ياجماعه إستهدوا بالله وماتظلموا الراجل ساكت الزول دة قاصد يصلح إقتصاد البلد بالاعتماد على المنتجات المحلية يعنى داير يخلى القمح وينتج رغيف من الفيتاريتة فأن نجح فلة أجران أجر النجاح وأجر الوطبية وإن فشل فلة أجر الوطبية غير مشكوك فيها .
    والله شنو …

    1. فتريته يكون الزول دا ما وزير مالية يمكن يكون فران

  15. عارفين يا جماعة انا عاوز اعمل فرن بلدي وي

  16. الحمد لله اننا هنا برانا يعني ما فينا مؤتمرنجي ونحمده كثير ما فيش فينا شعبنجي او هكذا احس بس لو دخل فيهم واحد وروني العدو واقيفوا فراجه ههههه وهي لله هي لله عجبي

  17. لاحول ولاقوة الا بالله —–
    ماكغانا الوزير الاقل جودة فى الدنيا كلها عاوز يأكلنا رغيف اقل جودة ؟ هو نحنا فضلت فينا مروة ولاصحة عشان يكملا لينا الله لايطرح فيهم بركة كلهم – اللهم سلط عليخم طياراتهم ولانكروزراتهم وزوجاتهم

  18. بعيدا عن السياسة … غاب العديد من الاحباب ولم يعلنوا ذلك … ولكن جنوبي وبت وراق اعلنا انسحابهما جهارا نهارا ولم يراضيهم سيد الدانقا ورب الدار البروف جبرا ولم يرد حتى عليهم … عليه يا امتن يطلب منهم البروف المواصلة وبعد ذلك يكون عداهو العيب او ان يتراجعا عن الانسحاب بطريقة او اخرى او اعلن اسفا انسحابي من جمعكم الكريم … وتبقى دوما معزتكم في القلب .

    1. حبيبنا ود مدنى .
      سلامات .
      لو مات لديك عزيز فليس معنى ذلك أن تتمنى الموت لأن الحياة بعدة لا تطاق لأن الدنيا خلقت لتعاش بحلوها ومرها فلذلك أدعوك أن تواصل ولو لوحدك حتى ترضى ضميرك وتنفس عن نفسك وهذا هو الجهاد بالقلب… والله أعلم …

    2. سلام ياقبيلة،،،
      صديقي العزيز خالد ودمدني،،
      صدقت فيما ذهبت أليه فقد غاب عنا أحبابنا وأصدقاءنا ونفر آخر كريم من هذا الجمع النفيس ولم يحرك فينا نحن أصحاب الوجعة ساكن، برغم نداءتنا المتكررة لأولئك الذين يعلمون مدي معزتنا لهم في قلوبنا ولكنهم آثروا الطناش، وذلك لأن صاحب الدار لم يراضيهم أو يسأل عنهم أو حتي يهببوا ليهم…
      فقد غابوا عنك يا عيوني وأنطوي عهد حبي والأماني والهوي…
      ويا سديقي خالد ود مدني وقف وقف وسوقني معاك!!!!!

      1. سلاااااام وحب شديد ود الخلا ،،
        ولما قد حان الفراق فاهديكم هذه الكلمات غفر الله لنا ولكم ولهم …
        يا لقلبي عاد من بعد النوي يطوي شراعا
        بالهوى يبعث في الروح حنينا واندفاعا
        مرحبا يا شوق أغمرني شجونا والتياعا
        فوداعا للذي شيدته بين الضلوع فتداعى .

  19. نخش طوالي علي النتائج:-
    – تفشي الأمراض بأنواعها المعدية والمستعصية وغير المعدية من ملاريا وتايفيود وأنيميا وسرطانات وأمراض الكلي (طبعا الموية ) وغيرها من الأمراض العجيبة .
    – تفشي الجريمة بأشكالها المنظمة وغير المنظمة والمركبة وغيرها من الجرائم .
    – تفشي الإنحلال والإنحطاط الأخلاقي والسفور بكل مناحيه في الفن في الرياضة في المجتمعات والجماعات المنظمة وغير المنظمة .
    – التفكك والفساد الإداري والمالي ونسف المؤسسية والمنهجة لكل أنواع الأعمال وفي كل أنواع المؤسسات المالية وغير المالية السلعية منها والخدمية الربحية منها وغير الربحية .
    – الوصول الي مستويات غير مسبوقة من نسب التضخم والكساد والبطالة وعدم إستقرار سعر الصرف وما تقولي التضخم 42% انا برضو بفهم آي شئ أضربوا في 2 بديك نسبة التضخم دا السوق بقول كدة .
    دا كلوا بس ياجماعة الخير وروني حصل متين وكيف والسبب منو والمسؤول منو والمشترك منو والحل شنو وأنا منتظر ياالجااااك

  20. البروف و الاخوة الكرام

    اعتقد انو البروف و نحن و كل الشعب الفضل زي ما بقولو اهلنا بننفخ في قربة مقدودة فالافضل نغير القبة لي واحدة جديدة

    1. بس الغيار يكون من الاصل (شعبي) بس مو شعبي القريبة شعبي انا جيل البطولات والتضحيات شعبي يعني نقيف الف احمر مش شعبي بي لون ترابي فيه حد بيحب اللون الترابي انا ما بحب الاحمر لكن بحب الرمادي

  21. كان اقل جودة هي هي هي حليل صفوف النميري

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: