أنتينـ وفيات

عندما يكون الحدث متكرراً يجب التحضير لكيفية التعامل معه ومن هنا جاءت هذه الإقتراحات
• بيان حكومي (جاهز للتعبئة) :
• تحطمت (صباح/مساء) اليوم …….. الموافق ……………….طائرة نقل أنتنوف 12 بعد (إقلاعها/هبوطها) بقليل (من/على) مطار ……………… (متوجهة/قادمة) (إلى/من) مدينة ……………… كان على متنها ………………… شخصاً إضافة إلى طاقمها المكون من ………… أشخاص توفي في الحال منهم …………… شخصاً ونقل …………. إلى المستشفي وقد كان سقوط الطائرة نتيجة لعطل فني في محركاتها .
• إستقالة مدير الطيران (جاهزة للتعبئة) :
• سيدي الرئيس :
• انطلاقاً من المسؤوليتين العامة والاخلاقية، ونسبة للحوادث المتكررة للطائرات والتي نفقد فيها عدداً من خيرة أبناء الوطن وبما أن هذه هي الحادثة رقم (……….) فإني أتقدم لسعادتكم بإستقالتي متحملاً كل ما يسفر عنه التحقيق .. (بعد رفض الإستقالة يتم شطب الرقم ليتم وضع ملء الخانة عند الحادث التالي)

• جمعية الحماية من الأنتينوف :
• وهي جمعية طوعية تعمل على تقليل حوادث الأتينوف عن طريق جلسات الدعاء والإبتهال ونصح المواطنين على عدم ركوبها وذلك عن طريق الإرشاد والتوعية وطباعة الملصقات التحذيرية من شاكلة (يا الأنتينوف منك خوف) !
• تخصيص عنبر بكل مستشفي يسمي (عنبر الأنتينوف) يكون مجهزاً بكل المعدات والأجهزة اللازمة للإصابات الناتجة من حوادث الطيران على أن يكون رئيس العنبر طبيب (روسي) عشان يشوف طياراتهم دي بتعمل فينا شنو؟
• تخصيص رقم 888 للإتصال والتبليغ الفورى عن حدوث إي سقوط لطائرة أنتينوف
• إنشاء (صندوق دعم ضحايا الأنتينوف)
• تشييد (هيئة الطيران المدنى) لكشك صغير فى كل مطار يكون فيهو موظف يستلم فيهو من المسافرين الشهداء بياناتهم ووصاياهم لأم العيال..!

• الطلب من شركة الأنتينوف الروسية بفتح مكتب في الخرطوم مزود بأجهزة قراءة الصندوق الأسود (عشان مافيش داعي للتكلفة وللتلتلة وكل يوم والتاني مرسلين صندوق)
• فتح باب عطاء سنوى لتجار الخردة لشراء مخلفات الطائرات التي تسقط كل عام على أن يتم تخصيص العائد لدعم (جامعة إبناء شهداء الأنتينوف) !
• تكوين لجنة تحقيق (دائمة) تكون في أهبة الإستعداد لشد الرحال إلى أي منطقة من مناطق السودان تسقط فيها طائرة إنتينوف ويمكن لهذه اللجنة أن تستعين بأي لجان مشابهه (لو الشغل كتر عليها وما قادرة تحصل)
• إنشاء مجسم في أحد تقاطعات الطرق الرئيسية بالعاصمة للطائرة أنتينوف يكتب عليه (إنها أسوأ من الملاريا)
• تخصيص قطعة أرض لتكون مقبرة للضحايا (مقابر الأنتينوف) !
• عمل دورة رياضية سنوية تشارك فيها كل فرق الممتاز تسمي (دورة الإنتينوف) يوزع دخلها لأسر ضحايا الطائرة في كل عام
• اصدار مجلة شهرية تسمي (إنتينوف) تعني برصد وتحليل حوادث سقوط هذه الطائرات شهرياً على أن تحتوي المجلة على مقابلات ولقاءآت مع أسر الضحايا (عل وعسي الدولة تحن وتوقف المهزلة دي) !

كسرة :
ما تستغرب لو لقيت ليك في كشك واحد كاتب (ودعمارى الإنتينوف .. سفة واحده وتسقط قبل الإقلاع)
كسرة ثابتة :
أخبار ملف خط هيثرو العند النائب العام شنو(ووو وووو ووو)؟

45 تعليق

  1. برنجييييييييية

    1. يا هناى عمليتك دى ما كويسة ! جد كدة

      1. إنت بركبوك الإنتينوف متين يا هناي ؟؟؟؟

    2. يا شمباتي انتا نوف ؟

      1. يا قوية و شمباتى و المندهش ,, ما لكم شانين حملة شعواء على طياراتنا دى,, غايتو اى طيارة اشتريتوها مننا كانت كويسة و اصلها ما وقعت قبل كدة و دى اول مرة تعملا !!! كع !

      2. المندهش…
        ابرا انا الصغير الما شفت شئ ! ان شاءالله تركبها فلانة !!

        قوية….
        امممممممم,,,لا انا ريتاج ! طاااااااااااااااااخ

      3. فلاديمير…
        اسه انا مالى !!؟ خشمى عندى

      4. شمباتى انتا ما معاهم؟؟ معليش حركات طيارات ,, تقول شنو بس !!!

      5. غادى غادى,,انا مع الخيانة !
        كع كرع رع

      6. شمباتى, ذكرتنى تعاشيق باصات الحلة الجديدة زمااااااان و هى طالعة كوبرى المسلمية !!!

      7. ههههههههههههههههه,,ألباضات الحمراء ام قدوما اخضر ؟؟
        ايييييه يا زمن

    3. الرفيق فلادمير ايليتش تقصد الهنقاري كع

  2. هى الانتنوف ما حركتهم يحركهم ملف هيثرو

    1. انتوا خط هيثرو دة كانت بتطير فيو الانتينوف دى يا ربى و الا كيف؟؟!!

  3. البروف العزيز
    لكن دي ما قووووية خااااالص 100 لايك

    1. و فوقهم 100 منى انا كمان !!!

  4. هههههههههههههههههههههههههههه,,,الانتنوف,,منك خوف,,, انت يا البروف,,
    واندروس,,ندوسو دوس ,, والحكومة تعوس !
    وجع

  5. والله مع وقوع الطيارات الكتييييييييييييره دي الواحد بقي الواحد يعاين فوق ويشوف السحب ويقول ليك الليله نازله طياره
    غايتو طيارات الخرطوم دي بقت اكتر من المطر

  6. انتينوفنا وقع انتينوفكم يقدر انتينوفكم يوقع انتينوفنا ذي ما انتينوفناااااا وقع انتينوفكممم- الكلام موجههه للبشوف الطياره البيتقع بالعيين المجرده “زي عين الجرادة” “البيشوف بالنظر”…

    1. تعرف انها مش طيارة مجرد درداقة طيران هههه

  7. البروف والرفاقة الطيبين
    ظهرت طائرات الأنتينوف في السودان لما كان السودان بخير وصحة جيدة وكان أهله بناء على أوضاعهم تلك ينامون (نوم العافية) فلم يعجب هذا الأمر دولة روسيا .. فإجتمع مجلس الشورى بتاعهم، وقرر إن يضعوا سرهم في طائرة يرسلوها للسودان لتحارب نوم العافية الذي كانوا ينعمون به … وسموها (في بادئ الأمر) أنتي نوم العافية – anti noam alafya – ولطول الإسم أشار الراسخين في العلم منهم بإختصار الإسم إلى (إنتي نوم) وأخيراً إستقر بهم الجدل إلى إسم (أنتي نوف) ليرمز لكلمات الإسم بالأحرف الأولي … ولما كان السودان في ذلك الوقت كما ذكرت بخير، فقد تمكن الميكانيكية الذين صاروا لاحقاً النواة الأولى لطائرات صافات السودانية .. بتوليف قطع غيار محلية أبطلت ذلك السر الروسي في تلك الطائرات اللعينة … وعندما حكم البلد جماعة اللمبي والتتار (وصار اللمبي وزيراً للدفاع) نكلوا بشعبهم .. وطردوا الميكانيكية من النقل الميكانيكي للصالح العام .. ونسوا حكاية السر الروسي الباتع .. فظهر في الآونة الأخيرة دباً ألمعياً يكشر عن أنيابه ويحصد الجند والساسة من بني سودان فرادى وجماعات .. مما جعل الروس يكرمون صاحب الفكرة بمركز راشد دياب بريجنيف الكائن جوار الكرملين.
    دي حاجة كدا من مشروع مذكرات كنت أنوي نشرها كشاهد على (العصر) – بكسر الصاد .. لكن ربنا ما طلق ..

    كسرة بموية:
    يا بروف أنت بالطريقة دي بحجزو ليك في الرحلة الجاية !!! … تبرى وتستبرى !!

    1. ههههههههههههههههههههههههههه,,,,الله يديك قدر نيتك السمحة دى,,,
      اسمح لى بالنشر فى اضابير الاسافير

    2. أب احمد,, كفيت و وفيت ,, كفو عليك و الله,, تسلم ايدك و كيبوردك

    3. بل مناسبه دي الانطونف ممنوعه للطيران في روسيا

    4. نحجز ليك يوم وللبروف يوم انت مبالغة عدييييييييييييييييل كده لا فض فوك

    5. اب احمد انتمتاكدعشاك كان فول بالجبنة بس ؟

  8. البروف والسادة الانتنوفاتية الحلوين .
    بعد كدة من حقنا نسأل عن كم بقى من الطائرات الانتينوف الماوقعت لسة لأنو فى أنتينوفات وقعت قبل كدة وماتو فيها ناس ورجعوها صافات تانى عشان يعيدو ترميما وتطيروتقع مرة تانية وتكتل ليها كم زول للمرة التانية .
    الله فى …

  9. بعد السلام …. تعرف يا أبو ناجي، بوصفي قانوني (مُضلع) يعني ما (ضليع) وكده، يا دووو ووو ووو ووو ب، وقع ليَّ ليه ناس وزارة العدل ما جايبين ليك أي خبر، من أخبار ملف خط هيثرو …. الواقع أنو هنالك تعديل أُدخل على قانون تنظيم وزارة العدل لسنة 1983م وذلك بموجب القانون رقم 39 لسنة 1996م، إستُعيض فيه عن إسم: النائب العام، بإسم: وزير العدل، شوف يا أبو ناجي ، نحن عارفين إنو علمك واسع وكده، بس في قاعدة فقهية قانونية بتقول: الجهل بالقانون ليس بعذر، “ولا يهمك واثقين منك” …. عليه أنصحك “تحرك كسرتك الثابته دي شوية”، بمعني إنو في المرة الجاية أكتب في الكسرة الثابتة: أخبار ملف خط هيثرو العند وزير العدل شنو؟ ولو ختيت كلمة “السيد” قبل وزير العدل، يكون كويس، وكمان لو خاطبتهم بصيغة الجماعة، يعني تكتب السادة/ وزارة العدل تكون تب ما قصرت، بعد داك عدد الواوات بعد كلمة “شنو” تعملها بعدد الأيام …. أو الشهور …أو السنوات ، إنت مُخير فيها…. بس بالله لو بعد داك “جابو ليك خبر” ولا “جابو خبرك”….. أدينا خبر وكده…. والسلام ختام….

    1. يعني علشان كده هم مصهينين

  10. بالانتينوف والحصل لي في مطار الخرطوم من قبل الطيارة اربعه ساعات ونحنا جواها بس الحق لله مش عارف ان كانت من انتي او نوف مش عارف بس خلاص اصابني الرهاب بس هسع قولولي ارجع كيف؟؟؟؟

  11. انتو رجال المرور ديل مالم ما بركبوا الانتينوف

  12. انت يا بروف تاعب نفسك مع الخط دا كدي وينا الطيارات البطيروها فيو
    لحدي ما يرجع الا نشغل فيو بصات الوالي
    هيثرو نفر هيثرو نفر

    1. و لو رجع, صدقنى يا ود الفريق الا يبيعوهو تانى,, مش لو باصات الوالى, و حيات نفيسة لو بقو ركشات ياهو البايعنو بايعنو!! – كع

      1. بصات الوالي طلع قرار بتمليكها للسواقين هع بس يا تو سواقين مش عارف ما اظن الغلابة السايقنها الان تاني هع

    2. ود الفريق
      يااااااااريت يكون السفرلهيثرو بالبصات فالوصول مضمون … لكن بالإينتينوف ؟؟؟
      د. شمباتي
      هناية مابتركب الطيارة
      هناية بتركب السيارة
      تقوم بينا العربية تودينا للسادة
      تقوم بينا الطيارة تودينا للآخرة …. ورا ورا ورا الصفقة يااااااااا

      1. و الما عندو ورا يرجع لينا ورا بالله !!! كب وجع كب وجع (مقتطفات من حفلة فى الديم) !!!

  13. يا جماعة الخير انا لحد حسه ما عرفت اسماء شهداء الأنتينوف الأخيرة . نشروها وين ؟
    ولا يعنى ما كان فيها ناس كبار ..وزراء وكدا زى ما حصل فى طيارة الأنتينوف قبل الأخيرة ..رقم كم يا ربى ..؟

    1. انا حزين على البركبو الانتي دي بس الكبار خاااااااااااااااااااالص مالم ما بركبو الانتي نو ففففففففففففففف

  14. الانتنوف موضه الإنقاذ

  15. لو يركب نوامنا الكرام مع السادة الدستوريين ويكون سايق الانتي الرييس الشيخ والطاقم الفني من سيدي وسيدي الثاني انتي نوفيا رايعه كده ويصدق الحلم ياااااااااااااااااااااااااااه تكون الضربة الفنية الرائعة سنة يا كلاي هع

  16. الطيارات دي ما بركبوها الكبار لكن بركبوها البزعلو الكبار(وما تقدر تحدد السبب شنو)……. لكنهم نسوا انو الكبير الله.

    1. كان كدي بنفضل 20% مش قالوا 80% اجانب ومش عارف ايه هع

  17. متعك الله بالصحة والعافية استاذ الفاتح والله العظيم اتحفتنا بكتاباتك الراقية , عسى ان تجد من يفهمها

  18. اهل المدونة سلام صراحة الناس كوووووووووووووولها مجمعة على عدم اهلية الناس ديل البشبهو الانتي نوفات البتقع دي بس كلهم بيقولوا البديل منو يومي الاسمع البديل نحنا بذبح خروف لانها بتكون دي النهاية وكمان برضه كان جات النهاية نزر لله تور اب جاعورة لله جد جد لله مش هي لله هع

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: