حصل خير

(الرسالة أدناه وصلتني عبر الإيميل)

الأستاذ الفاتح جبرا
سلامي وأحترامي
على الرغم من أعجابي ببعض ما تكتب لكن مقالك الاخير بعنوان (مش كدا وبس) دا دقست فيه اولا محاولتك الاخيرة بالظهور بمظهر رجل الشارع العادي المكافح،، دي فشلت فيها مش كدا وبس، بل ظاهر للعيان ان تحليلاتك كلها مبنيه على السماع من الناس الحولينك الكادحين ..البيركبوا الحافلات وبيمشوا المستشفيات العامة . لانه يظهر من صورتك الروقه والنعمه ومش كدا وبس بل يظهر انك ولفترة طويلة كنت تعيش في بلاد تنوم وتصحى على (مخدات الطرب).. و رجعت قريب لوطن يموت كل يوم من الفقر والضنك.. مش كدا وبس .. كمان يظهر أنك رجعت وبديت تبني في الضل وبقيت في التشطيبات الأخيرة.. مرحلة ادخال الكهرباء ..وناس الكهرباء دفعوك تمن عمود الكهرباء !!
يا حليلك وماعارف غيرك ما قادر يدفع حق عمود الملاح لمريضه الفي المستشفى .. مش كدا وبس .. بل ما بيقدر يشتري كهرباء ب10 جنيه في الشهر عشان اولاد يقدروا يذاكروا ،، دا لو اصلا قدر يوديهم المدارس .. هسع أنت بتدفع للكهرباء كم في الاسبوع؟ 50 ج ؟؟ طبعا من قرائن الاحوال يستشف من كلامك عن جارك العنده صينية دجاج بايته في التلاجه . انك ساكن في (حي راقي) وبالتالي بتصرف كهرباء تقيلة على المكيفات .لانه البيوت في الاحياء الكادحة تلاجاتهم ما بتبيت فيها صينية دجاج.. دا لو وجدت التلاجه من اصلها . مش كدا وبس .. أحيانا لمن يكتر عليهم الفقر، الجوع، الذل المر الطالع من جوف الاملاق .. يضطروا يدفنوا رؤسهم في الرمال . ويذبحوا كبريائهم .. وينتظروا بناتهم لساعة متأخرة من الليل عشمانين في كيس فيه شوية سندوتشات فول وطعمية ولا بيرقر حتى للأطفال الناموا من الجوع ويمكن لفطور بكره كمان في الحالة دي قانون الظبط والربط بتاعك ما بيشتغل هنا !!
نصيحتي ليك ما دام جئت البلد وقدمت أستقالتك من عضوية (أبطال الكي بورد) الفي الخارج خلي مسالب السلوك عند رجل الشارع العادي وكرس وقتك لمحاسبة الحراميه الفوق وأبتدئ بجارك وأسأله لماذا لم ينفق فضل زاده ( صينية الدجاج ) !!

اختك إلهام
عضوة قديمة في نادي المرارة المفقوعة

الرد :

الأخت العزيزة إلهام
التحايا والود وأرجو أن تكوني في أحسن حال

لم أضحك مؤخراً في حياتي كما ضحكت وأنا أقرأ في رسالتك التي ما أن أنتهيت من قراءتها حتى تنهدت في داخلي قائلاً (الما عارف يقول عدس) .. بداية العبد لله يعيش في بلاد تنوم وتصحى على مخدات (الكُرَّب) لم يخرج منها خلال ربع قرن من الزمان إلا لاسابيع قلائل ليس (للسياحة) بل (للسباكة) ولفتح شرايين قلبه المعطوب وفي مصر (القريبة دي) يعني ما (ألمانيا).. يعني يا ستي لا من (أبطال الكيبورد) الفي الخارج ولا من أبطال (النينجا) .. وعشان أختصر ليكي موضوع (صورتك المقلوبة الخاتاها لينا دي) وأجيكي من الآخر أقول ليكي (وما طالباني حليفة) والله ووالله ووالله وأقسم بالله الواحد الذي لا إله غيره أنا بكتب ليكي هسه في الرد ده والبيت مافيهو تعريفة … ما عندي ولا جنيه وااااحد أو ما يعادله بأي من أنواع العملات الحرة التي تسرق من منازل المسئولين .. لا في (دولاب) ولا في (بنك) لا عند (زول) … يعني (على الحديدة) والمشكلة ذااتو إنو الزول ما عندو حاجه يبيعها عشان يطلع من حالة الفلس المزمن دي لا (قطعة واطة) ولا (بيت) بى إسمو ولا (مزرعة) ولا متر واحد في أى حته (في العالم) حتى العربية الراكبنها دي شايلنها من البنك بالٌاقساط ومتعثر في دفع كم قسط وإحتمال كبير نرجعا ليهم ونخلص (ونركب الحافلات القلتيها دي) عشان القسط كبير وباقي الماهية بينتهي من يوم عشرة في الشهر، ده غير الجرورة المتراكمة (الطيب) سيد البقالة …(محمد) بتاع اللبن …(الهادي) سيد كشك الجرائد …(عثمان) بتاع المغلق ومدارس الأولاد عاوزين قسطين ليهم شهور .. وحتى المطابع عاوزة مننا قروش عشان قاعدين نطبع الكتب ونوزعها هدية للقراء والمعارف والأصدقاء والباقي ما بيكفي قيمة الطباعة .. !
ما عارفك جبتي حكاية الروقة والترطيب دي من وين؟ أقول ليكي حاجة ؟ مرات حبوب الضغط والسكري والقلب بتخلص بالأسابيع عشان ما قادر أشتريها .. (شفتي النعمة دى) .. واهو ماشين بي نظرية (الحاوى) وحامدين شاكرين وحتى أقرب الأصدقاء ما بعرفوا الحكاية دي !
طبعا إحتمال كبير ماتصدقي الكلام ده لكن دي الحقيقة (والله على ما أقول شهيد) وممكن تسجلي لينا زيارة حيث نسكن في حينا الشعبي (بيت المال) يعني ما في (المنشية) أو (كافوري) عشان تعرفينا عن قرب وتصححي الصورة المقلوبة بتاعتك عننا .
نحنا يا بتنا بنفتخر إنو من عامة الناس وإنو نشأنا في أسر فقيرة (لكنها عرفت تربينا) على القيم النبيلة والأخلاق الفاضلة والتي سوف نظل عليها حتى نلقى الله والحمدلله لم نكن يوماً نتطلع لمنصب أوجاه أو مال (ما لدنيا قد عملنا وكده) مع إنو كل النوافذ مشرعة لنا .. بل تكفينا (السترة) !
عشان العزومة ما تكون عزومة مراكبية ده التلفون .. أهااا بي قصة التلفون دي (أزيدك من الشعر بيت) العبدلله شريحتو الأساسية خط سوداني 0123650065 لكنو مقطوع فاتورة ليهو شهرين تلاته (بالله إتأكدي منو) وهسه بستخدم شريحة ساكت اللى هي بالرقم (………..) !! مرات نشحنها بي خمسة … مرات بى جنيهين (حسب التساهيل) ….. هسه يا بتنا في داعي لكشف الحال ده؟ عموماً أنا سعيد برسالتك دي عشان يعرف القراء إنو (الفاتح جبرا) ده زول (كحيان) ساكت ولو خاتين ليهو صورة غير كده أحسن يغيروها ، يلا في إنتظار مهاتفة ثم زيارة… وأكررأسعادتي برسالتك ودمتى في حفظ الله .. وعموما حصل خير!!

كسرة :
يقول المسيح عليه السلام (ماذا يكسب الإنسان إذا ربح العالم وخسر نفسه) .. الفلس ده أحسن لينا يا بتنا لأنو هذه الحياة أتفه من أن يخسر الإنسان فيها نفسه وبكرة القريبة دي ممكن تفتحي الجريدة تلاقي خبر يقول ليكي (وفاة الكاتب الساخر الفاتح جبرا إثر نوبة قلبية) !!

كسرة تانية :
المشفقون يمتنعون !!

كسرة ثابتة :
أخبار ملف خط هيثرو العند النائب العام شنو(ووو وووو ووو)؟

Advertisements

39 تعليق

  1. بعد أربعة

  2. البروف العزيز
    هنيئاً لك ، وتُحسد على ذلك

  3. تكلمت كأنك أمام الله يا بروف وصدقت في قولك انها اتفه من ان يخسر الانسان فيها نفسه .

  4. متعك الله يا بروف جبرا

    يا بتنا اي سؤال اي استفسار اي حبس اي لبس تاني ؟؟؟
    وارجي لكتابة البروف واقريهو بتاني – بالدارجي كدا انتي فهمتى السطرين الاوائل بس !!!!!!!!!

  5. بروفنا الغالي
    تعرف يا بروف البت دي أكرمتك من حيث دايرة تشكك في دعواك .. الله مش قال ( للفقراء الذين احصروا في سبيل الله لا يستطيعون ضربا في الارض يحسبهم الجاهل اغنياء من التعفف تعرفهم بسيماهم لا يسالون الناس الحافا وما تنفقوا من خير فان الله به عليم ) .. دي الشهادة ذاتا الكايسين ليها كلنا .. ربنا يديك العافية ويزيدك من فضلو .. قول آمين.

    1. لا فض فوك اخي اب احمد

  6. ﺍﺑﻮﻋﺒﺪﺍﻟﻠﻪ | رد

    ﺍﻟﻠﻪ ﻳﺪﻳﻚ ﺍﻟﻌﺎﻓﻴﺔ ﻳﺎ ﺍﻧﺴﺎﻥ ﻳﺎ ﺳﻮﺩﺍﻧﻲ ﻳﺎ ﺍﺻﻴﻞ ﻧﻌﻤﻪ ﺍﻻﺧﻼﻕ ﻭ ﻧﻌﻤﻪ ﺍﻟﺮﺩ ﻭ ﻛﻠﻚ ﺟﻤﺎﻝ

  7. رجلٌ والرجااااااااااااااااااااااااااااااااااااالُ قليلُ

  8. لكن بتنا دي ما خاتيا عليك لأنو صورتك دي شكلها مِنَدِيَــــــــــــــه وكده ولا ده فوتوشوب ساكت ،،،الله يديك الصحة والعافية”””

    1. ايوه شافت الكدووم دي وقالت دي كدووووم ناس مروقه وااامال هره وكده

    2. ههههههههههههههههههه,,ختفتها من كيبوردى !
      صورة مقلوبة ولازم تتعدل….

    3. افهموها بقى الصورة دي من الزمن الجميل زمن نميري وانت ماشي لي اقدم كلنا عندنا صورة مرطبة هع

  9. البروف الحبيب…
    سلام وشوق ومحبة….
    لم تكن محتاجا لان تشرح او تفسر , والما عارف اليقول فجل ذاتو !
    لكن بمناسبة التلفونات دى , كووولها مقفلة او مقطوعة !
    دا شنو دا !!؟
    كسرة : عشان كدة انا حبيتك….

  10. الحبيب جبرا
    زي ما قال اخونا شنباتي (عشان كدا انا حبيتك‏)‏
    بس لو دايرنا نعشقك ونموت في دباديبك
    عليك الله راضي لينا الجماعه اياهم بكلمتين _:: لانو المدونه مسيخه بدونهم (مع حبي لكل الموجودين‏)‏

  11. اخي الفاتح

    وكلمه اخي أعنيها هنا تمامأ فا المظاهر خدعه وصوت لوم وزم خير من صوت شكر وعرفان يشهد الله اني سعيد وأكاد ارقص من فرحه الشفافيه التي نطق بها لسانك هاهنا وبقول ليك بكل صدق سير واكتب وافرحنا تاره وابكينا تاره اخره وربنا يقطي عليك كما تدعو لى الولده دايمأ

  12. حاج أحمد السلاوى | رد

    اللُخت إلهام ( مقصودة ) .. قلتى إنك عضوة قديمة .. من أى مجموعة .. الكواشف ناس A ولا ما دون ذلك .؟
    وأحب اقول ليك الفاتح دا بنعرفو لينا زمن وحسة داخلين على السنة السابعة ما شفنا عليهو التكتح من أثر النعمة…وهو الزول أكان ما حسّا بأوجاع الآخرين وكان زيهم بيقدر يكتب زى الفاتح ..واقوله ليك بصراحة عدييييل كدا الساحة السودانية مليااااااااااااانة كُتاب ساخرين وكل يوم بيكتبوا لاكين زول قدر وشدّانا بكتابتو قدر الفاتح ما فى .. عاد أكضب عليك ؟
    وخلونا النشوف آخرتا شنو .. ّ!!

    رمية تماس .. وين بقية الكواشف .. سنكل .. نيام .. أبو عصمت ..بشاوى ..بن البرد .. وغيرهم من صفوة الخيار ..؟
    تعالوا يا جماعة إلى قواعدكم سالمين .. طولتو الغيبة

  13. حاج أحمد السلاوى | رد

    الفاتح جبرا .. صورتك الجابت ليك الهوا دى احسن تبدله ..لأنو انا قبال نتقابل قبل ستة سنوات كنت فاكرك زول طويل عريض المنكعين شلولخ .. فاكر المفلب العملتوهو فينى انت وود الخلا يوم العيد ؟؟ والسبب كان صورتك ( الخايف عليها ) …
    عشان كدا حقو نعمل رحلة فى العيد الكبير .. ونعزم اختنا إلهام عشان تشوفك عالطبيعة ..

    رمية تماس .. مصطفى ودالزبير ..المنسق العام للرحلات.. اظهر وبان عليك الأمان …

  14. البروف والسمار والكواشف .
    سلامات .
    التحية لأخونا جبرا وهو يستعرض عضلاتة المفتولة ويبرر أثر النعمه التى تبدو على محياة ويعمل (فرش متاع) لممتلكاتة من حطام هذة الفانية .
    أحيانا حين تستمع الى أحدهم وأنت تعلم صدقة وتعلم أن كثيرين ممن لا يعرفونة لأ يصدقون ما يقول تنتابك حالة قشعريرة تعجز أن تتخلص منها إلا أن تصرخ فى وجوههم وتقول (ياجماعه على الطلاق الزول دة صادق )…

    1. اخي حنين ما ممكن يكون فيه مرطب وما عاجبه الشين والكعب برضوا غناه بيطربنا بس يكون ترطيبته من كده وعرقه وكده مش عرق الغلابة تحياتي لك آل حنين

  15. سوداني يفوز بجائزة نوبل في الاقتصاد

    فاز المواطن محمد احمد…. بجائزة نوبل عن ورقته المقدمة للجنة ….بعنوان..كيف تعيش وانت ماهيتك اربعمائة جنيه..وتشتري خروف سماية وبعد اسبوع تشتري خروف ضحية..وبعد شهرين تتدفع حق المدارس….وبعد دا كلو تدفع للحكومة …. جمرة خبيثة…. ودمغ… ونفايات….وفي النهاية يقطعو رزقك……( منقول )

    1. تسلم المندهش لو ليك اتصال بالمواطن المذكور رجاء ارسال نسخة للاخت الهام هع

  16. ربنا يديك الصحه والعافيه ويليك للناس الديرنك لكن انا جد داير تلفونك

  17. الفاتح جبرا صراحة انت درستني تحليل نظم وماكنت اصلا فاكرك انت البتكتب في الجرايد وساخر سبيل لانو الصوره دي اصلا مابتشبه الفاتح جبرا دي صورة واحد اشتغل وزير زمن طويل وبعد ماعاس في الارض لفخ ولفح وبعدين انت الصوره دي اتها اتصورتها كيف بالله خت لينا صوره للفاتح جبرا ماتخت لينا صورة حسين خوجلي

  18. مش كنت تحكى احلام اصحابك الكحيانين اللى كلها مزازاة وهلاويس عشان كانت تعرف انكم من قوم يزازون فى صحوهم ومنامهم ولا يهناون بترطيبة حتى ولو بضا من حين

  19. تحية لكل السمار وفرضا ان كلامك يا الهام صحصح 100% الجابرو شنو يهبش الثعابين في جحورها ما زمان كان فيه مرطبين بس حاسين بالناس (مستشفى احمد قاسم اوقاف شروني مدارس عبد المنعم محمد ومراكزه الصحية) دي امثلة يا بنتي يعني ممكن يكون فيه مرطب وهمه برضه محمد احمد الغلبان مرطبين الانقاذ وينم عملوا شنو اي فرد من السمار هنا يقدر يقول ليك عملوا شنو وتحياتي للبروف كان مرطب وكان مكنب المهم بيلمس وتر الناس المغلوبين على امرهم وهم سواد الناس قالت مرطب يا بتي الناس في شنو وانتي في شنو شوفي الفيل وعايني ليهو ساكت وحاولي اطعني ظلة يمكن يكون ليك اجر المحاولة مرطب او غير مرطب لا تفرق كثير فقط الحقيقة هي المهمة وطريقة ايصالها بسخرية او توش عديل حتى يعرف محمد احمد او الشعب الفضل الحاصل تحياتي للجميع مرة ثانية

  20. كلمة لي الهام (عضوة قديمة في نادي المرارة المفقوعة ) اضربي معانا المرارة ساكت وخليك من حالت البروف مرطب او مكنب المهم كاتب في(العصب الحي)

  21. لا احصل واحد من السمار ولا احصل البرنجييييييييييييييييية ابيت كل يوم هنا والا ايه

  22. ايييييييييييييييييييييييييييييييييييه,,
    الصبر يا الغلبان اخوى…

  23. شكراّ للاخت الهام التي كتبت هذا الكلام وعدلت الصوره بالنسبه للجميع لانو انا برضو كنت خاتي عنك نفس الصوره انك انسان مرطب من الساكنين الفيلل والراكبين الهمر لانو انا متابع لي مقالاتك وفي كثير من الاحيان بجيني احساس انو انت زووول مرتاح وماجايب لينا نحنا المساكين الغلبانين ديل خبر ،،،لكن يااستاذ ربنا يديك الصحه والعافيه

  24. والله انا زعلت شديد لمن عرفت انو الاستاذ حالتو زي حالتنا ، لاني كنت مبسوط لانو في زول مرطب وحاسي بينا، للاسف نحنا طلعنا الما حاسين بيهو ،
    وزي ما قالوا: ” الما بعرفك بجهلك ( او اجهلو)”.

    ربنا يملا دولابـك.
    ويكمل اقـســـاطـك.
    ويسدد ديـونـــــك.
    ويكــفي مطابـــعك.
    ويعينك في حبوبك.
    ويوصـــل خطوطك.
    ويطـووو وووو ووول في عمرك.

  25. يعني الواحد لو اتصور صورة وعملوا ليها فوتوشوب وصلحو ليه الدشانة بتعاتو الناس برضو تحسدوا عليها ،، محرومين حتى من أن نعيش الترطيبة ولو فى الصور .. با ناس حرام عليكم خلونا فى حالنا .. الهام دي أظنها من الناس المرطبه وإلا ما اتكلمت بحرقة كدة يظهر راس السوط وصلها

  26. الصورة الحتجيب ليك العين دي وانت شكلك ماناقص حسد وعيون ونجيهة دي اصلووووووووووو ماتغيراااا كيتن في المنعمين ومرتاحين وتعبانين مسيح ونوم عشان يظهروا مروقين نووووهاااائي ماتغيرا خليها كدة عشان تعمل جووووو .

  27. اجى ياااااااخوانى !؟ دا اسمو شنو !!؟

  28. ربنا يديك الصحةوالعافية

  29. ربنا يديك الصحة والعافية

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: