خروف الوزير

في البلاد (المتقدمة) المسئول بيمسكوهو من لسانو بمعنى أن تصريح المسئول أو وعوده التي يقولها للمواطنين شئ (مقدس) يعني المسئول قال ح يعمل الحاجة الفلانية معناتو ح يعملا .. طيب إذا (ما عملاااا؟؟ (وده بالمناسبة ما بحصل عندهم كتير) .. الإجابة هي إنو إذا ما عملا طبعن ح يتقدم بإستقالتو ..
أما في البلاد (المتعسمة) زى حلاتنا فالمسئول ما عندو حاجة يمسكوهو منها .. فيمكن للمسئول أن يقول الحاجة وما يعملا .. وبرضو ممكن أنو يعمل الحاجة وما يقولا .. وكمان برضو ممكن لا يعمل الحاجة ولا يقولا .. الحاجة الوحيده الما ممكنة هي إنو المسئول عندنا يقول الحاجة ويعملا !!
لو عاوزين أمثلة .. على قفا من يشيل .. هنالك بعض الأمثلة (تودي في داهية) لكني أعطيكم مثالاً (خفيفاً) واحداً لذلك الوزير المبتسم الذي صرح قبل سنين عددا عندما كان والياً بأن الفراخ سوف يصبح في عهد ولايتة وجبة شعبية فإذا بالفول اليوم يخرج من كونه وجبة شعبية ليصبح سعر أقل طلب فول بخمسة ألف !! ويذهب التصريح أدراج الفراخ أقصد الرياح !!
أيه لزوم الرمية الفوق دي كما يقول (أستاذنا البوني) .. لزوم هذه الرمية أعزائي القراء هو التصريح الذي أدلى به السيد وزير التجارة الأستاذ عثمان عمر الشريف والذي يفيد فيه بأن خروف العيد لن يتجاوز سعره الـ 450 جنيه أي والله 450 جنيه بس ! على الرغم من أن الجميع يعلم بأن أسعار (الخرفان) طايرة في السماء وفاقت (المليون) وكل ما العيد يقرب المسألة بتمشي في زيادة .
طيب .. هل الكلام القالو الوزير ده ح يعملو؟ العبدلله يعتقد إعتقاداً جازما بإنو الكلام ده مش ح يحصل إلا في حالة واحدة وهي أن يختف السيد الوزير رجلو للصين ويطلب من الصينيين صنع خراف صينية 110 فولت تنتهي صلاحيتها عند (الباع) العاشرة !!
طيب .. إذا المواطن المسكين (زي حلاتنا) صدق كلام السيد الوزير وضبط ميزانيتو على إنو الخروف بي 450 جنيه .. والعيد جا .. والمواطن ما لقى ليهو خروف بالمبلغ ده وقام جاتو (جلطة) من نقة (المرا) وسؤال (الشفع) ووقع (كاضم) في الحالة دي مش السيد الوزير مسئول من (روح) المواطن دي؟ يعني المسئولين ديل يصرحو سااااي وناسين الأرواح دي؟
المسئولين عندنا للأسف الاسيف ممكن يقولوا أي حاجة وممكن يصرحوا أي تصريح .. يتحقق ما يتحقق مش مهم .. شفتوا ليكم مسئول إستقال عشان تصريح؟ كل يوم طيارة بتقع ومفيش حد بيستقيل تقولوا ليا تصريح .. صرح يا عم ولا يهمك !
من ناحيتي فالعبد لله ح (يحول) للسيد الوزير رصيد بي 450 جنية ومعاهو وصف البيت ومطلوب من السيد الوزير أن يختو في أي بوكس وأنا بحاسب السواق !

كسرة :
السنة الفاتت قالوا الاضحية تجوز بالتقسيط .. أها المرة دي بالتقسيط ذاااتو مافي طريقة .. تطير عيشتنا نحنا .. ندفع أقساط المدارس وللا أقساط العربية وللا ندفع أقساط الخروف ؟

كسرة ثابتة :
أخبار ملف خط هيثرو العند النائب العام شنو(ووو وووو ووو)؟

Advertisements

57 تعليق

  1. تاني برنجية
    الفضية ولا الطيش

    1. والله يالفاتح يا اخوي انا راضي بالطيش برونزية ولا الخروج من التصفيات مبروك يالعبيد

      1. هههههههههه إنت قصدك الطيش خليتو لي العوازل مافي داعي نجيب سيرتهم عاااااااااااااااااااااااااااااااارفين روحم

      2. المندهش – خروج من التصفيات بطعم الفوز ,,, وى

      3. هييييي ياالفاتح ,,شااااايفك انا !!

      4. ما طلعونا الحبش من نهايات افريقيا عادي

    2. السلام عليكم،، سأترك المجال للجميع ولمده ثلاثه أسابيع ، يعني بعد الضبيحه وكده

      1. مسافر البلد و الا شنو؟؟ قالوا الخرفان هناك ارخص ,, عليك الله لو صحى لقيتو ب450 جنيه, ورينى و انا احول ليك رصيد و انت رسلو و انا بستناو فى المحطة !! كل سنة و انت و كل الطيبين بالف خير و صحة و سلامة ,, و ان شاء الله الجاى احسن ,, قولوا امييين

      2. سلامات يا فلاديمير،، انا ماشي بلدا سمحه خلاص والناس كلها بتحبها والخروف تقريبا بخمسيه ريال وربنا يتقبل

  2. برنجية تانية ….وخد نفس

  3. هادا صديكا إيش هذا مافي فكر ليش إنت …….. إنت نفر ناس سوداني خروف كبير (غير مسؤول) كبير يقول باع

    1. فكري يا الفاتح مو خروف

  4. عزيزي البروف
    المسئول لو كان فعلاً مسئول كان حيعمل حساب لتصريحاتو
    لأنو مسئول عنها، لكن زي ما قلت وباعتبار بلدنا عضو فاعل
    في مجموعة البلاد المتعسمة، فالمسئول عندنا غير مسئول
    عن تصريحاتو، لأنو ما عندو حاجة يعملا غير التصريحات
    غير المسئولة، وكان الله في عون أمتنا المنكوبة.

    1. كدى يا طلحة يا اخوى ما نصبق الاحداس و كمان البروف يروق المنقة شوية,, يمكن الاسعار هسة عالية شوية لكن ليلة الوقفة أو العيد يمكن سيادة الوزير يعمل لينا حركة فى شكل وردة و الخروف فجأتن كدة يبقى ب450 جنيه ,, كلو جايز مااااا دى بلد الحواة !!!

      1. يسمع منك ربنا يا رفيق

  5. تموت الاسد في الغابات جوعا..ولحم الضأن تأكله الكلاب..
    وطبعا الشعب السوداني (الفضل)ليس من فصيله الكلاب ولا الأسود ولا الضأن.. من اي الفصائل هووو؟ والقائمين (المسؤليين)من فصيله الشنو ما عارفين ؟؟؟ سؤال اليوم والجايزة شنو؟ واذا تزاوجت الفصائل ماذا تنتج؟؟ خرووف بالزول..خرووف بالمسؤؤل.. زوول مسؤؤل … ^….الخ
    نسأل الله ان ينال منها الثواب..

    1. هههههههههههههههههههههههههههههههههههههههههه,,,,,لكن ما حقرت بينا شديد يا درداق انت !
      امكن غنم !!؟ وى وى وى

      1. والله قالوووو ليينا الغنم مسؤلية الراعييي… وكلكم مسؤل معناتو تاني مافي تصارييح(في الحله, البيت, في قلبك) تسكت سكووت جد.. وطبعا السكاتات حتبقي غالية وكدة.. اخوك حيخلي الدرداقه ويأجر السكاتات ويجيب الضحكات..

  6. سعادة البروف والقمرداينة
    وحياتكم بكرة يجوك الجماعة الهتيفة يحلفو ليك بالتقطعهم إشتروا الخروف بي 450 جنيه !!! .. وكمان حق الضباح على حساب سيد الخرفان .. وبقولوا ليك: إنت ما جيت محل زريبة البيع المخفض (المالية البلد) مالك؟ ويقسموا بربهم إنو الناس الجو بدري لقو خرفان ويدوك معاهم أنبوبة غاز بـ 350 جنيه !! .. ويطلعوك إنت الكذاب ناكر الجميل والمندس .. والوزير الرسالي قد أوفى بوعده .. وهو خير المحسنين .. !!
    يا حبايب بلدنا دي (إتبوجنت) بكل ما في هذه الكلمة من معنى .. (لمن ما زالوا يعرفون معنى “البوجين” طبعاً).

    1. و اللاهى كلامك صحى يا أب احمد,, و الغريبة انو الهتيفة ديل بتلاقيهم كتير حتى فى برامج التلفزيون الجماهيرية و اللى نحنا كلنا عارفين المشكلة اللى بيناقشوها شنو, الا انو يطلع واحد او واحدة و يقولوا ليك (الاسعار رخيييييسة و المواصلات فااااضية,, و كل مرة مرة يقولوا لينا فكوا الحزام فكوا الحزام) على قولة الفنان عادل امام !!! يا للا خموا و صروا

      1. فلاديمير….
        اووووووعك تفكو ! انا كلمممممتك

    2. الحبيب اب احمد.سلام…
      هل البوجين يقرب للكوجين !؟ وى وى وى

    3. يا اب احمد اتبوجنت بس وكمان اتكوجنت

      1. انت ياهناى مالك شفاف كدة !!؟

  7. البروف والسمار الكرام
    بشرى ساااااااارة
    أعلن مدير عام الاقتصاد بوزارة المالية وشؤون المستهلك، نائب المدير التنفيذي لمحفظة قوت العاملين ،الدكتورعادل عبدالعزيز، ان المحفظة بصدد توفير خراف الاضاحي لحوالي 20 الف عامل عبر اقساط تستقطع بين 9-12 شهرا ،وقال انه سيتم توفير الخروف الصغير زنة 35-40 كيلو بسعر يتراوح بين 795 – 810 جنيه، والمتوسط زنة 41-45 كيلو بسعر بين109- 918 جنيها، اما الخروف الذي يفوق وزنه 46 كيلو يتراح بسعر 7001-1026 جنيها، واضاف انه خلال الاسبوع القادم ستعلن اماكن البيع.

    1. يلا جهزوا القسط الأول والضامن لبقية الأقساط لمدة سنة يعني للعيد الجايّ ….. شفتوا كيف ؟؟؟

      1. و اللى ما بيكمل الاقساط و يتعثر فى النص بيعملوا ليهو شنو؟؟ العربات عرفناهم بيقلعوها و يبيعوها تانى,, الخروف حيقلعوا شنوووو؟؟؟

    2. بعااتي و ما فاضي | رد

      المقدم 40% ولا ناس بنك السودان غيرو ؟؟

    3. دي تبقى داهية يعني الخروف يخش في الخروف زي ما واوات البروف دخلت في بعض بعدين تكون مكوجنة جنس كوجين

  8. ﻳﻜﻔﻴﻨﺎ ﺫِﻟَّﺔ ﻭﻣﺴْﻜَﻨَﺔ ,,
    ﻛﺎﻧﺖ ﺯﻣﺎﻥ ﺍﻟﺴﺮﻗﺔ ﺩﺱْ ..
    ﺍﻟﻠﻴﻠِﺔ ﻋِﻴﻨﻚ ﻣُﻌْﻠَﻨﺔ
    ﻭﻓِﺮﺟﺎً ﻗِﺒﻴﻞْ ﺑِﻨَﺸﻮﻓﻪ ﻋِﻴﺐ ..
    ﻋﻴﻨﻚ ﻋِﻴﺎﻥ ﻭﻣَﻘَﻨَﻨَﺔ

    ﺑﺎﺳْﻢَ ﺍﻟﺮَﺻﻴﻒ ﻭﺍﻟﻤﺎﺭﺻﻴﻒ ..
    ﻛﻢ ﺑﻴﺖ ﻭﺻﺎﻟﻮﻥ ﺍِﻧﺒَﻨَﻰ
    ﻛﺎﻧﺖ ﺷﻌﺎﺭﺍﺗُﻦ ﻭﻋﻮﺩ ﺻﺎﺭﺕ ﻣُﺠﺮْﺩ ﻋَﻠْﻘَﻨَﺔ
    ﻭﺑﻴﻦ ﺍﻟﺪﻗﻮﻥ ﻭﺍﻟﺪﻟْﻘَﻨَﺔ ..
    ﻛﻞ ﺍﻟﺘﻘﻮﻝ ﻣﻮﺳﻲ ﺗﻘﻮﻡ ﺗﻠﻘﺎﻫﻮ ﺭﺏَّ ﺍﻟﻔﺮْﻋَﻨَﺔ
    (منقول )

    1. وانا ح انقل منك يا حبيب,,,
      تحياتى

  9. البروف والسمار
    سلامات .
    كل سنة وإنتو طيبين .
    ناس جمعيه حماية المستهلك قالو حايوفروا الفين خروف زنة 20 كيلو حى بمبلغ خمسمية الف جنية .
    أولا الفين خروف دى تحوق فى منو .
    ثانيا بالطريقة دى هم حايساهموا فى إرتفاع أسعار الخراف لأنو خروفم زنة 20 كيلو دة حايطلع ستة كيلو صافى .
    وناس مجمع الفقة الاسلامى تموا الناقصة وأصدروا فتوى بجواز إستلاف سعر الاضحية .
    يعنى العدو من خلفنا والبحر أمامنا .
    مخير علينا الله براهو …

  10. بلادي وان جارت علي كريمة وحكامنا ان كذبوا علينا عقلاء
    يالفاتح ياخوي كان الله في عوننا

  11. بعااتي و ما فاضي | رد

    الالفين خروف ديل حيوزنوهم كيف و من ياتو كيمان… هو زاتو الكيمان بقت ماف, اجمل ما في الموضوع انو المصريين بقو يعملو الخروف جائزة مسابقة… اجب و اربح خروف هدية (وين ترزية الدين من هذا القميص)

  12. ههههههههههههههههههه,,
    غايتو حكاية البلد المعسمة دى بسطتنى للباطوس !
    ههههههههههههههههههههههههه

  13. الدين اصلا ضاع من زمان يا رجالة ومن لم يملك قوت عامه ينسى الضحية يبقى الشعب الفضل ينساها خلوهم يودوها الهدي ويبلعوها وبعدين فوق الفوق لا حر لا سموم لا سوافي والايد الطايلة تجيب المافي ودقي يا مزيقة

  14. ما عارف اصحاب القمردينة الليله مالم انتوا زعلانين ليه راح يضحي عنكم امير المؤمنين وفي كافوري كمان يعني خروف اخر ترطيبة ويوم القيامة جلطوها فوقه

  15. يا جماعة الوزير كلامو صاح وانا هسي جاي من سوق الخرفان وقالوا الخروف بي 450
    …..

    ..

    هسي عليك الله يا جماعة الوزير دا البصدقو منو

  16. الموضوع اياهو موضوع خروف الوزير ،،.
    هل الخروف بقول باع ويجوز ذبحه ولا خروف اي كلام وعندو رياله وحاسبينو لينا خروف وهو ولا خروف ولا حاجه ومابفهم ومتخلف كمان وبرضو لازم نرضي بيهو ولا علي كيفنا واصلو مافي طريقه كده ولا كده

  17. الغريبه فى الموضوع وحسب جريدة الخرطوم يوم الاثنين ان فى واحد مسئول فى التجاره صرح با الخراف عليها 22 رسم وجبايه اكرر 22 رسم وجبايه الى ان تصل المستهلك …………… دى بلد فعلا معسمه ومجوبكه للاخر اللهم ارفع غضبك عنا

  18. الله اكون في عون الشعب السوداني من هذه العصابه الانقاذيه مجموعه صعاليك ليس لديهم اخلاق و لا دين

  19. الحبيب

    احسن حاجه تدفع فاتوره التلفون وتعمل ناااااايم

    كسره من عندى انا
    انت مسعول من الخير دحين الرسول مش ضحا لينا بكبش اقرن املح

  20. تانى جيت صادى

    البلد ما معسمه البلد مقمسه ومدقمس

  21. قالوا واحد ممكوون وعندو ديك واااااحد والله واحد
    مسك الديك خنقو قال ليهو والله ما بفكك إلا تقول بااااااع

  22. بس لو كان العنوان بدل خروف الوزير مقلوب ويبقى وزير الخروف كان تكون مبالغة يا سمار هع

  23. ههههههههههههههه,,حااااامضة منك يا ما غلبان انت !!

    1. يا اخوي يا شمباتي ممكن برضه الخروف دي من خرف يخرف خرفان يبقى وجتها كما قال ارخميدس يكون الوزير مخرف هع

      1. ههههههههه,وتكون خروف صيغة مبالغة من خرف ,, وى

  24. حاج أحمد السلاوى | رد

    والله يا الغلبان ياخوى .. وزير الخروف .. خروف الوزير ..وزير العريس ما أظنها بقت فارقة معانا كتير ..ولا شنو ؟
    شنباتى .. انا عاوزك لامن تجى تعرس ( بعد خرف إن شاء الله ) تتنازل عن فطور العريس ( البدعة الجديدة دى ) رفقاً بأهل العروس وما تكلفهم حق خروف الوزير دا .. إنتفقنا ؟؟؟؟؟؟؟؟؟؟؟؟
    وخلونا النشوف آخرتا شنو … مع خرفان الضحية البقت بالأقساط دى …!!!

    1. شمباتي عملتو شنباتي الحمد لله ما طلع دقناتي كان جمعناهو مع ناس هي لله هع

  25. هههههههههههههههههههههههههههاااااى,,
    شينة منك يا سلولو !!
    قصدك شنو يعنى ؟؟ بعيدا عن التنازل ,,
    هى لكن انا ال ح اتنازل عنو شوية !!؟
    احححححح من وجعى انا

  26. حاج أحمد السلاوى | رد

    شنباتى .. إنت كدى أبدأ وبعد ين نشوف موضوع التنازلات دى كيف ..يمكن تبقا زى تنازلات نيفاشا ..
    الله يستر
    الغلبان .. دا أسم الدلع بتاع دكتور يسن شمباتى ..آآى والله ..

  27. طااااااااااخ

  28. الله يكضب الشينة

  29. 450 حنيه = 90 دولار ،،، ومتوسط دخل الفرد في السودان 1800 دولار ،،،،، وسير سير ،،، والله اكبر ،،، والعزه للسودان ،،، ورقصنى يا جدع !!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: