مهندس نفط وإيسكريم

السلام عليكم يا أستاذنا ..أنا شاب سوداني من أسرة بسيطة تسكن مدينة بحرى قريت فى مدرسة بحرى النموذجية و منها دخلت كلية (هندسة و تكنلوجيا النفط) وهسي مهندس نفط ليا أكتر من سنة … لما دخلتا الجامعة كنتا متخيل إنى حاشبع رغبتى و إهتماتى بالكيمياء و المعادن والنفط والحاجات دي بس إنصدمتا بى واقع إنو الجامعة بتدرسنا مقررات من زمن ( حفروا البحر) الشئ الخلاني أقرأ براي عشان أواكب وأسد النقص الأكاديمي خاصة وإني طالب نشيط فى مجالات دراستى وما شغال ليك بالسياسة شغلة يعني ما كان عندى أى إنتماء سياسي كنتا بعمل معارض فى مجال النفط وبأقوم بتنظيم ورش و محاضرات من مهندسين كبار عشان نغطى الفجوة بين المادة العلمية الضارباها الانيميا و الحياة العملية فى الحقل
خلال سنوات الدراسة في الجامعة و تحديداً في عام م٢٠١٠ تم ترشيحي لأمثل السودان فى مؤتمر عالمي للبترول خارج السودان بى مشروع فى (الصناعة النفطية) فقدمتا للمؤتمر المقترح بتاع المشروع و وافقو بيهووإتكفلوا بى أى حاجة من تذاكر لى فندق لى فيزا.. لى شلاقتى قمتا إخترتا مشروع مهمل فى مجال البترول اللى هو(إنعدام المسؤلية الإجتماعية فى مجال الصناعة النفطية السوداينة) اللى هيا أهم صناعة .. و الله يا استاذ زول فهم العنوان مافي! .. الا راسلتا الشركات البره و أدتنى أنظمة من أنغولا و الإكوادور و الأمارات و الكويت حتين قدرتا أتم المشروع بتاعى و الحمد لله و سافرتا عرضتو بره و جيت و زول ركز معاى مافي .
فى السنة الاخيرة عملتا مشروع تخرج أكتر من ممتاز فى ٤ أبار مع شركة فرنسية بس للأسف لجنة مناقشة المشاريع المكونة من دكاترة الجامعة ما إتناقشو معاى فى المشاكل الأنا ناقشتها فى المشروع و الحلول الطرحتا بل ناقشونى فى (العنوان الجانبى دا خطو كم؟) و(الصفحة دي ليه ما عامل ليها جستفاى) و (العنوان الجانبي ده ليه ما تحتو خط ؟)
الحمد لله يا أستاذ إتخرجنا و دخلنا حياة العطالة و دخلنا فى دوامة التقديمات و الوظايف و نفتش مكان نقضى فيهو الخدمة الوطنية ! اها هسى بعد سنة من التخريج الوضع كالاتى:
– الزول العندو واسطة نزل الخدمة فى وزارة وللا شركة من الشركات .
– الزول الما عندو واسطة زينا كدا يا مباري الضلله يا ببيع فى بقالة وللا إشتغل بتاع هدف او خش السوق يبيع مسامير!!
– الزول الكان فى الجامعة تبع الاتحاد وقاعد يسك الناس بى (السيخ و الملتوف)هسى إتوظف فى أحسن شركة بترول سودانية!!
– الزول الكان مبارى (الكيزان) و مربت ٥ سنين هسى إتوظف بى أحسن راتب!!
أما أنا يا أستاذ فأنسانى .. فتشتا على أى شغل و فى أى مكان لما الاسبوع الفات دخلتا معاينة فى شركة بعيدة كل البعد عن مجالى وبعد ما خلصتا المعاينة قام ممثل( الموادر البشرية) قال لى بالنص: (بالنيابة عن اى زول ما مقدر مؤهلاتك وخلاك تصل لى مرحلة إنك تقدم لى شركتنا دى نحنا مقدرينك وبنشكرك على الاجتهادات بتاعك) !
ملحوظة : انا هسى ببيع ايسكريم فى مطعم و اى زول بحكى ليهو حكايتي ما بصدق!
(إبنك حسين)

كسرة :
يا ناس (وزارة النفط) ما عندكم تلاجة إيسكريم تشغلوا لينا فيها ولدنا ده ؟ إن شاء الله مهندس نفط وإيسكريم !!

كسرة ثابتة :
أخبار ملف هيثرو العند النائب العام شنو(ووو وووو ووو)؟

Advertisements

19 تعليق

    1. انتا ما بتنوم و الا شنو يا طبنجة؟

      1. ننوم وين مع سهر الجداد دا
        ياهو نستنى البروف دا يفشنا شوبة

  1. ده حال البلد وربك يكون في العون

  2. و انتا الخلاك تقرأ باجتهاد شنو و تعمل مؤتمرات و بحوث و معارض و مضيع وقتك و جهدك و قروش اهلك, ما كنت تعمل زينا كدة, يا تبارى الكيزان يا تسك زملانك الطلبة بالسيخ و الملتوف ,,,

    1. اموت واعرف انت عملت ايه يا فلادي

  3. ما براك يا حسين، البلد كلها حالها واقف بسبب المحاسيب
    وأهل الولاء

    1. اخونا حسين,, بحكم اجتهاداتك و مثابرتك فى القراية, كدى اجتهد لينا فى الايسكريم اللى بتبيع فيو دة, و شوف لو تقدر تطلع لينا منو بترول و الا حاجة تنفع بيو البلد !!!

      1. اقتراح اجمل يا رفيق يمشى يسأل في ام درمان بيعملوا ليك علامة الصلاة وكمان بنت كلب جدا في يوم واحد ويروح توووووووووووووش داخل في المعمعة ما كله هي لله هي لله (مسالة علامة الصلاة حقيقية)

    2. ضربت كبد الحقيقة وقلبها وكمان فشفاشها يا خي دي بقت خل على قول اولاد النيل ومتنيلة بنيلة ومدغمسه وغايتو سمبلة ساكت

  4. والله سبحان الله
    حسبنا الله ونعم الوكيل

  5. حبيبنا الغالي جداً الدكتور الفاتح جبرا حفظكم ورعاكم المولي عز شأنه وجل مقامه
    أنا من المكسرين جداً في كتاباتكم أنت و دكتور البوني و أبو الجعافر .. و متابع درجة أولي ….
    بقول للباشمهندس .. الله يكون في عونك .. فقدرك جعلك في بلد نفتخر بها ولا تفتخر بنا – بسبب السياسة طبعا ليس إلا –
    و أعرج لموضوع كده والله يا دكتور ماااااواقع لي وغلبني أفهمه عديل كده .. فحيث أننا – بالطبع – بلد الإستفهمات بلا منازع .. عاوزك تستورد لينا فهامه كاربة و تتفسح لينا شوية في تنويه ناس المرور في الشريط التلفزيوني بتاع كل القنوات الفضائية السودانية البقول ( قفل كبري القوات المسلحة للصيانة ثلاثين شهر ( سنتين ونصف السنة ) ؟!!!!!!! )) دي صيانة .. طيب لو كبري جديد ح يستغرق كم سنه ؟!! .. أرجو أن تحصلني سريع بإفادة أو فهامة أصليه عشان أنا بدأت أشك في نظري وفهمي وسمعي
    عصمت – السعودية – الرياض

  6. البروف وحسين والسمار .
    سلامات .
    ودى تكتبها إزاى ياحسين .ولا أأولك إكتبها بالحبر السرى ياحسين …
    ياهو دة حال البلد وحال سياستنا وحال إستراتيجيتنا عشان كدة نحن مع خصخصة شركات القطاع العام وتسليمها لإدارات أجنبية .وأقولليكم بصراحة السودانيين مابيعرفو يديروا …

  7. صراحة يا جماعة الوضع كلو بقى كوسا الشغال ما عاجبو الما شغال ما عاجبو على الاقل الما شغال عندو امل انو ربنا يرزقو شغالانة ترضيهو لكن الشغال بيلعن اليوم اللي خلاهو يشتغل في الوظيفة اللي ما قادر يثبت فيها نفسو ويطور من قدراتو .
    ياشباب اكييييييييييييد بكرا حيكون احلى بس خلونا متمسكين بحبة الاتقان والحماس اللي والحمدلله لسه ما ماتو مع العطلة واتهرسو مع الكوسا

  8. حاول يا حسين ان تتواصل مع الشركات خارج البلد خصوصاً الدول النفطيه لانو عندها أكيد وثم أكيد الفهم والدراية بحاجتهم إليك وعارفين كيف حا يستفيدوا من قدراتك ، واجتهادك إن شاء الله ما حيروح شمار فى مرقه ،، مش لك مجتهد نصيب ، ربنا حا يديك احسن من ما فى بلدك ،، لا نو بلدك لو بتقدرك كان عملوا ليك تعيين مبدئ من ما انت فى الكلية ،، لكن تقول شنو انحنا بلد ما في زول بشوف فيها الصالح علشان يستفيد منو ،، كلنا شغالين بالفارغة والمقدودة .. وده المضيع البلد ،، والله يا جماعة المحسوبية دي ليها من الأثار السلبية على كل القطاعات ما لا يعد ولا يحصى ، اجتماعياً وسياسياً واقتصادياً وتقنياً .. ولو فى زول واعي فى البلد دي يوجه المسئولين ويقول ليهم خشو الجامعات والمدارس وحتى ميادين الكورة فى الأحياء الفقيرة حا تطلعوا ليكم بشباب ينهض بالبلد اقتصادياً وفكرياً وسياسياً وكروياً .. والحاجات التانية خلوها ليكم .ز بس ادو الناس المتفوقه والمجتهدة فرصه ،، ولا يأس مع الحياة يا حسين وربنا يوفقك

  9. والله قطع قلبي ياريتني لو وزير الطاقة كان حليت مشكلتك الله كريم اخير ليك الايسكريم على الاقل معروف مصا\درة ومنصرفاته من بترول البلد المامعروف طالع من وين وماشي بي وين!!!!!!!!!!!!!!!!!!!!!!!!!!!!!!!

    1. العزيزة سلمي ما بلاش اللحم الحي والعصب الحي هو فضل شئ ما اتسرق ما كله لله يعني ما البترول وبس

  10. الابن الشاب
    خطأك الاساسي هو انهماكك في واجبك الدراسي واهمال قراءة الميدان وانك في السودان. لن تنفعك الكفاءة مهما بلغت في الحصول على وظيفة حكومية، عليك بالاتي:-
    الثقة في الله والصبر والبحث عن مخارجة للعمل في الخارج او حتى تقدم للهجرة او اللوتري
    لا تيأس وسوف تجد الفرصة المناسبة ولو بعد حين ولو في مجال آخر مناسب انشاء الله
    بالرغم من انني شخصياً اكبر منك سناً بكثير الا ان حالي كان اشبه بحالك في يوم من الايام

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: