صابر و العيد

لم يعرف النوم إلى عيني (صابر) سبيلاً حيث قضي ليلته يفكر في ما عساه ان يفعل حين يطل فجر الغد .. فجر العيد الذي من المفترض أن يكون سعيداً لولا أنه لم يستطع الإستعداد لقدومه إذ لم تسمح جيوبه الخاوية من شراء ملابس العيد لاطفاله الصغار ولا حتي (الخروف) الذي دأب على شرائه منذ أن تزوج قبل أعوام طويلة .. ومع إنبثاق الفجر وهو على هذى الحال أتاه صوت من بعيد
– أنا العيد !
– إتشرفنا وأنا (صابر)
– لا ما أقصد .. أنا العيد الوااحد ده البيفرحو فيهو الناس ويضبحو فيهو الخروف ويلبسو فيهو جديد
– ياخي بالله الواطه صباح أدينا عرض أكتافك من غير مطرود .. اصلو راسنا مسخن من الفلس
– ياخي معقولة ؟ تطردني؟ في زول بيطرد العيد !
– والله أطرد ليك الوقفة ذاااتا
– مالك إنتا زعلان ياخ هون عليك
– أها شفتا أنا جني وجن ناس (هون عليك) و(أحسب أن) دي
– ودي دخلها بالعيد شنو؟
– عندها دخل ما عندها دخل أنا مما أسمعا بتعمل ليا عصبي ! أنتا عاوز تصاحبني شكلك كده ؟
– لا والله الحكاية بسيطة أنا قلتا بس أجيك عشان تفرح بيا وكده
– أفرح بيك؟ إنتا من زمن المواطن بيفرح بيك؟
– كيف؟
– ده كان زمان يا عيد .. أيام الخروف كان (عشر) المرتب .. هسه المرتب (عشر) الخروف
– يعني هسه إنتا ما فرحان بيا ؟
– عاوز النصيحة وللا حاجه تانية ؟ هسه والله مما تقرب (تجهجه باكاتنا) ذااتا وتخلينا في حالة (شرود ذهني) وسيحان في المفاصل !
– بالله أنا كعب كده؟
– ياخي ما تفهمني غلط أنا ما قلتا إنتا كعب .. نحنا الكعبين !
– ما فهمتا
– ما فهمتا كيف؟ إنتا العيد بتاع (كوريا) وللا اليابان ؟ مش عيدنا القاعد معانا هنا ده !
– لا ما قاعد … بغيب عنكم سنة كاملة وبعدين بجيكم !
– أها شفتا السنة الإنتا بتغيبا دي هي المشكلة
– كيف؟ لو عاوزنني أجيكم كل أسبوع ما مشكلة !
– ياخي عليك الله ما تهظر هو أنحنا كل سنة قادرين عليك .. إنتا قايل نفسك براك ؟
– أنا عارف نفسي ما براي معاي أخوي (عيد الفطر) !
– عيد الفطر بس؟ وعيد المدارس وعيد الجامعات وعيد العلاج وعيد المواصلات وعيد الدواء وعيد الكهرباء وعيد الموية وعيد (القفة) !
– (مقاطعاً) : بالله دي كووولها اعياد عندكم (ثم) وبرضو بتضبحو فيها؟
– لا بننضبح !
– بي مناسبة ننضبح دي .. ما سامع ليا صوت خروف عندك !
– يجيبوهو بي شنو؟ أجيب ليا ملايين من وين؟
– كيفن يا صابر ما تشوف ليك يسلفك ؟ أو يديك ليهو بالأقساط؟
– إنتا عاوز تبقى ليا زى (الجماعة) وللا شنو؟ قول إستلفتا وللا أشتريتو بالأقساط أسدد قروشو دي من وين؟ الناس دي يا (عيد) بتتكلم سااااكت
– كيف؟ ما قالو ليك المسألة دي جايزه
– القضية ما جايزة وللا مكروها .. القضية هي إنو ظروفي ما بتسمح ليا أدفع أي اقساط !
– طيب إن شاء الله تكون فرحتا الأطفال وإشتريت ليهم ملابس عشان يقابلوني بيها !
– والله إنتا ما عارف حاجه ساكت .. تغيب ليكا سنة وتجي وما عارف ملابس الأطفال أخير منها الخرفان !
– يعني شنو؟ إنتا السنة دي ما معيد بيا ؟
– بلاش إستفزاز معاك .. أمشي شوف ناس (أحسب أن) المعيدين .. الساعة بقت تسعة .. خلينى أمشي أجازف ليا (فول ورغيف) أفطر بيهم الأولاد ديل !!

كسرة :
(خروف) مافي .. . (رادار) مافي … الله في !!

كسرة ثلبتة :
أخبار ملغ هيثرو العند النائب العام شنو(ووو وووو ووو)؟

15 تعليق

  1. 🙂 و نعم بالله

    1. ونعم بالله نعم بس قال واعدوا لهم ما استطعتم من قوة – وبعدين امنا الغولة او الحكومة كان ما قادرة على الشغلانية دي ممكن تقول اقيلوني مثل سيدنا عثمان بن عفان مش هو برضه صحابي وبيحاف (اظن) من الله اكثر من امنا الغولة دي والا رايك شنو

  2. الليلة القمردينة فاااضية لحدى بعد نص النهار, دة معناه ان الناس مشغولة لسة بالخرفان و الشيات و المرارة و الشربوت,, يعنى ما كل الناس زى اخونا صابر دة يا بروف, و الا شنو!! بس ان شاء الله يكون قدر جازف ليو فول لفطور اولادو ديل !!

    1. انت بتهزر كمان يا ما فيه صابرين انا راح اذبح بس بطريقة الحاوي وهي والله العظيم مش لله ولا شئ خلي الطابق مستور يا فلادمير

    2. الناس مشغولة بالعيد صح بس بالخرفان ما اظنش الناس هايمة ومش عارفه تعمل ايه في يوم العيد لانه اجمل شئ يكون قدامك صحن لحمه والكيبورد كان بتكون فيه كتابة مشبعة بس خليها على الله

  3. الخرف مع الشربوت خلا ملف هيثرو ملغ ؛-)
    انتو اخبار الرادار بي النظر شنو الخروف طشش بيو ؟؟؟؟
    عيد سعيد

    1. ود الفريق عارف ان الكل شمتان مش حاجة غريبة؟؟ حاولت اجد تفسير لم اجد غير الظلم له تفسيرا وهي لله وعجبي وتعيش زرقاء اليمامة هع

  4. والله قصه الخروف بقت هينه تب لمن بهناك الزول بتصرف لكن القصه بتاعت سو التخزين وتانى قالو عامل لحام وتانى قالو طيرة زات مهارات عاليه زى سادمبا كده طيب النائب النام عرفناهو اها الزول ده بتاع الدفاع الناس ماتمشي بعيد بقصد بارى دبما كان زمااااااااان تبريرو كلتشي جاء باليل ومن غير اضاء اها تبرير شنو وحات الله اموت على سو الخاتمه احسن طل واحد يجازف ليه كم طم اسمنت وسيخ ويبني غرفه فى بيتو تحت الارض والجايات كتاااااااااااااار لسه مالنا نحن ومال الجماعه ديل قدره ما عندنا ليهم احسن الوحد يحترم نفسو ويمد كرعينا قدر لحافه قصتنا يابروف بقت زي قصه الزول دااااااااااك العريان فى ٠٠٠٠٠٠٠٠٠٠٠ ويفتش لي صديريه خلونا المقصه شقانا

    وكل عام وانتم الخير

    1. يا خي الاعتماد على التكبير والتهليل يعني اعدو لهم ما استطعتم دي ما فيشه كمان لو جات الطامة الكبرى هم بتخارجو سريعا بنفضل نحنا ناس قريعتي راحت ودقي يا مزيكة

  5. ياجبرا وين صندوق دعم الرادار (ص د ر)؟

  6. الاخ جبرا و السمار
    اولا كل عام و انتم بخير ويعود علينا و على الشعب الفضل بالخير و اليمن و البركات و يلقى امنا الحكومة المتوفية اكلينيكيا متوفية بحق و حقيقة. الشيى الملاحظ من الضربة الاخيرة و عاوز اليصححني لو كنت غلط
    1- انو التسألو كولو متكيف و مبسوط و شمتان من الضربة و دة مؤشر خطيييييييييييييييييير جدا لازم الجهات المسؤلة تاخد بالة منو.

    1. كلامك صحيح في مسألة الشمتان وصراحة دا موضوع من المفترض يطرح للنقاش ليه الناس مبسوطة وفرحانة من ضربة اسرائيل للمصنع ؟ دا يعني فيه حاجة غلط ويعني ايضا ان الناس ديل مش خيارات العامة يعني الانتخابات الحصلت واللي راح تحصل مش راي الناس وبرضه مش معناها الناس مش بتحب بلدها بس الواحد عن جد بيتحسر على شئ اسمه الحركة الاسلامية كان لها شأن وافكار ومبادي بس راحة وين وهناك امر اخر والله يكذب الشينة يعني لو جانا اي نظام اخر يقدر يرجع باراته عادي وقنصلية لاسرائيل في بورسودان وسفارة في الخرطوم عادي ياخي الجوع كافر والظلم بخيلي الناس تعمل كده واكثر اظن كده وبرضه مش معناها الناس اصبحت بتحب اسرائيل عموما بدات في البحث عن الفهامات بس في سوق ليبيا ما في

  7. 2-الضربة كشفت و بي و ضوح انو الميزانية العسكرية( 80% من ميزانية الدولة عسكرية) موجهة لتأمين النظام من الداخل فقط طيب و البجي من برة؟.
    3-اللمبي بعد الضربات دي كولها ما يقدم اعتذار ساكت و لا ينصس في عينو و يستقيل.
    4- و اخيرا اموت و اعرف حق الرد دة شنو و حيكون كيف.
    كسرة: م
    ن التسعينات بنسمع امريكا و اسرائيل دنا عذابها ياربي العذاب دة بي قسيم السودان زي المرارة

    1. اخي شرقاوي ليس هناك طامة كبرى ولا شي الناس بتحب السودان جدا بس بتكره اسباب الظلم خاصة لما يكون ظلم باسم الدين بتبقى الطامة اكبر ونقول لهم اذهبوا انتم وربكم فقاتلوا عن جد لان الله الذي نعرفه حرم الظلم على نفسه في الحديث القدسي يعني مجرد اجتهاد من العبد لله كده وكل سنة وانت بخير والبلد بخير والناس بخير وان شاء الله وطن بالفيهو نتساوى نحلم نقرأ نداوى وان شاء الله كمان لما يطل في فجرنا ظالم ……امل ان اكون ادليت بدلوي

  8. الدلاء الاكبر ……

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: