عندما يهل شهر رمضان الكريم تقوم الإذاعة بنفض الغبار عن شريط أغنية (هلا هلالك يا رمضان شهر التوبة والغفران) ثم ما أن يشارف الشهر الكريم على الإنتهاء حتي ياتيك صوت (ميرغني المأمون وأحمد حسن جمعة) وهما يصدحان (أوحشتنا شهر الصيام من بعد ما شرفتنا شهر الصيام) ثم يأتي العيد فتقوم بفتح المذياع صباحاً لتشنف اذنيك ذات الأغنية التي تسمعها صباح كل عيد والتي يتغني بها الفنان الذري ابراهيم عوض برائعة الشاعر عبدالرحمن الريح (يا عيد تعود يا عيد بالخير علينا سعيد) !
العبد لله يعتقد بأنه كما أن هنالك أغنيات تذاع سنوياً عند المناسبات والأعياد فإن لديه عدد من (مقالات المناسبات) التي تصلح للنشر عند كل مناسبة كما هي دون إضافة أو تجديد .
فعندما يأتي الخريف (كل عام) ما على العبد لله إلا أن يخرج من أرشيف مقالاته ذلك المقال الذي بعنوان (وجاء الخريف فجأتن) .. والذي يوضح فيه الكاتب كيف أن تصريحات المسئولين عن جاهزيتهم لإستقبال الأمطار لا تقل عن جاهزية فريقنا القومي لدخول تصفيات كاس العالم !
وعندما تسقط إحدى طائرات (الأنتينوف) ما على العبد لله إلا أن يقوم بنفض الغبار عن مقاله الذي درج على نشره كلما مرت هذه المناسبة (غير السعيدة) والذي يوجد به هذا (الفورم – البيان) المعد ليقوم المسئولون بملئه :
• تحطمت (صباح/مساء) اليوم …….. الموافق ……………….طائرة نقل أنتنوف 12 بعد (إقلاعها/هبوطها) بقليل (من/على) مطار ……………… (متوجهة/قادمة) (إلى/من) مدينة ……………… كان على متنها ………………… شخصاً إضافة إلى طاقمها المكون من ………… أشخاص توفي في الحال منهم …………… شخصاً ونقل …………. إلى المستشفي وقد كان سقوط الطائرة نتيجة لعطل فني في محركاتها .
أما عندما تخترق الطائرات الحربية الإسرائلية أجواء بلادنا وتصيب أهدافها بدقة متناهية (وعلى مهل) وتعود إلى قواعدها سالمة وهى تخلف وراءها عدداً من المواطنين القتلى (المتفحمين) فما على العبدلله إلا أن يقوم بفتح درج مكتبه وإخراج مقاله الذي بعنوان (صندوق دعم الرادار) والذي يتحدث فيه الكاتب عن الغبن والأسى والمهانة التي يحس بها كمواطن وهو يري أجواء بلاده تستباح والذي يخاطب فيه المسئولين (كلما جاتنا ضربة) قائلاً :
يا جماعة الخير لو ما عندكم (رادارات) أو راداراتنا (موديل قديم) كلمونا عشان الناس ديل إستباحوا أجواءنا وبقو يدخلو ويكتلوا ويمرقو زى ما عايزين .. ما مشكلة الشعب عارف إنو (الحكومة) مفلسة والقروش بتاعتا كوووولها صارفاها علينا وعلى اللى خلفونا فى التعليم والصحة والعلاج والشنو ما عارف .. عشان كده أنا بقترح على (الشعب الفضل) يعمل ليهو صندوق يحل بيهو المشكلة دى عشان ما نبقى (ملطشة) ويسميهو (صندوق دعم الرادار)
نعم .. بصراحة، لم نعد بحاجة إلى الكتابة وتنوير المسئولين عن مكامن السلبيات املا فى إصلاح الحال وإيقاف هذا السيل من البلايا والرزايا والكوارث والمحن التي نعيشها.. ما أهو قاعدين كل خريف بنكتب مقال (جاء الخريف فجأتن) والحال ياهو نفس الحال وكل سقوط طائرة قاعدين نكتب (أنتوفيات) والحال ياهو نفس الحال وكل ضربة (إسرائلية) قاعدين نكتب (صندوق دعم الرادار) والحكاية بتتكرر والمسئولين سادين دي بي (طينة) ودي بي (عجينة) !
نعم للأسف الاسيف انه لا حياة لمن تنادى وأن القافلة تسير دون أن تلتفت إلى (نباحنا) المتكرر لتلافى أوجه النقص والقصور عشان كده أالعبدلله ببفتكر إنو ما على هذا الشعب المؤمن الصابر (المحتار) إلا الدعاء نعم (فقط الدعاء) بأن يقي الله هذه البلاد شر الفتن والكوارث وأن يقينا تصريحات المسؤولين التى أصبحت (تحرق الدم) وتصيب المواطن (بالغبينة) بعد أن إنفقعت (مرارتنا) من زماااااان !
كسرة :
مجرد رجاء أن يقوم المسئولون عن أمن (البلاد والعباد) بإزالة مجسم تلك (الطائرة) من أعلى مبني براج (القوات الجوية) بوزارة الدفاع وكذلك مجسم (السفينة) من أعلى برج (القوات البحرية) عشان (الصهاينة ) ديل بدون (مجسمات) مطلعين عين أبو أهلنا وما ناقصين اليوريهم وكده !!
كسرة ثابتة :
أخبار ملف خط هيثرو العند النائب العام شنو(ووو وووو ووو)؟
الفاتح جبرا 
برنجييييييييه ههههههههههه
وبطعم الشربوت والمراره القبال كم يوم
شربوت بس ,, لكن المرارة دى كل ما نكون معزومين نوصل متأخرين نلاقيهم جازفوها ,, 3 عزايم و ما لحقت لى فيهم (مراراية) واحدة ,, و الغريبة الجماعة كلهم تقريبا يقولو لى : لما اتأخرت ما كنا قايلنك جاى بعد دة…
تقصد مرارتنا والا مرارت الضحية هع
ما انت ذاتك الخيانة …. أقصد الضحية
السلام عليكم ، البرف و الاخوان ، كل سنه و انتو طيبين ، وبى عوده ، اصلو فى مذيعات سحسوحات كده بيقولو لينا بينعاد عليكم ، نحنو زلمات حتى يخاطبونا بهذه اللغه ، نحنو كلنا زول و حتى الحريم عندنا زول ، ونحنو عاملين عنتر فى الفارغه و المقدوده ، تلاته انفار بس كان جهجهوا ليك اسرائيل فى اى مكان فى العالم ، و خصوصا خصوصا فى حدودنا الجنوبيه ، لاكين اخخخ اسد علينا و فى الحروب نعامه ……………. عجبى
يعني الحكومة تجيب ليك قروش رادارات من وين؟ مش كفاية بدفعوا لكل فرد من الشعب السوداني 1800 دولار شهريا؟ ده غير العلاج والدراسة والمواصلات وكله مجاني، ما تبقوا ناس جاحدين كده
و ما تنسى كمان خروف العيد الوفروهو لينا ب450 جنيه بس !!
الاخ فلادمير خروف منو يا زول انت خرفت والا شنو
🙂 معاك يا بروف حتى لو بديت الصناديق دي كلها أخوك الصغير معاك 🙂
خلونا هسع في النظر بعدين الرادارات لانها كانت منظورة حسب شهود العيان يعني بالهاتف كان ممكن تقع لو في شئ برميها من سماها خليكم مع كلام اللمبي قال بالنظر والناس كلها شافت ما تعصلجها لينا وتخلي امنا الحكومة تصدق وتدخلنا في الصناديق دي غصب مش كفاية الصناديق المدخلانا ليها
والله نحن بنخسر كتير في تبرير القصور الحاصل ده شان حقو نشترى لي كل زول نبله ونعمل منجانيق يضرب اى طياره يعني اى شي طائر حتى لو كان ابوالدبرك وكده نشكل قوه ضاربه
يابروف الدعاء ده عاوز يساعدو بجكه
ياخي بدل كده قول للحكومة تجك وتتخارج قبل ما الحكاية تجيبب ليها جري
الحاجه المتاكد منها انو كان في مجموعه من عيال الحكومه مبتعثه في ايران لموضوع المراقبه الجويه دي بالذات و رجعوا السودان بعد عيد رمضان يا ربي تكون شحنه الاجهزه لسه ما وصلتهم ؟؟؟؟؟؟؟؟؟؟؟؟
ما في حد فى الحكومة بيقدر يحاسب التاني لأنو كل واحد مقصر فى شغله وماسكين عليه حاجه ملجماهو ، بس العجب العجاب التصريح الأول أنو الحصل بفعل حريق بسبب لحام ، يا جماعة الناس ديل قايلين الناس لسه فى زمن يسمعوا بس إذاعة أمدرمان وبي بي سي ، ناسين العالم اصبح مفتوح والحاصل جوه البلد وداسنوا من الناس بنعرفوا من بره ، هسع كان وزير الدفاع قلبو حار مفروض يقدم استقالتو بجانب قائد سلاح الطيران وكل قادة الوحدات العسكرية ، لانو الوضع أصبح ماسوفاً عليه بقينا مكشوفين وكده يعني عضلات تبش ، وهم ما خايفين على روحهم ما ممكن تجي طيارة وتاخد أي واحد منهم من خشم بابو ويطلع لينا مسئول غير مسئول بتصريح مضحك ويقول الراجل خطفوه ناس الأطباق الطائرة علشان عاوزين يحللوا مخو العبقري !!!!!.. الله يسلم البلد من كل شر وبلا
وزير الدفاع بقي وزير اشغال بدلا من دفاع عمارة في شكل طيارة وواحدة تانية في شكل سفينة وواحدة تالتة في شكل حمار وحصان انضرب مواطن في بورتسودان بل مواطنين عمل نايم الجنوبيون احتلو هجليج فلاحتو كل القدر عليهو تلاوة بيان تحرير هلجيح بصورة هزيلة انا ما عارف العلاقة بينو وبين الرئيس والله لو كان نسيبو ما كان خلاهو برطع كدة دا
اقترح انشاء دمغه اسمها دمغة الرادار
وااااا أسفااااااي
ده زي حالي يوم الوقفه وانا في السوق: الشبط دا بي كم
البياع : بي 95
انا: !!!!!
البياع: اها كلامك كم
انا: احتفظ بحق الرد
الاخوىة السمار والبروف .
كل سنة وإنتو طيبين .
الضربة دى ورتنا إنو دفاعاتنا راقدة واطة وبلدنا مكشوفة وأرضنا مستباحة .
مخير الله علينا
ربنا يغتينا ويحفظنا ويأمن بلادنا .
كله كوم والشماتة الحاصلة وظاهرة عديل من الشعب الفضل كوم براهو يا ربي الناس ديل حاسين والا استخبارات داخلية ما عندهم اها هم مقتنعين برضه يحكمونا والا بتفكفكو مننا يا خي دي مصيبة دي يا ربي ال 80% الاجانب هم الشمتانين والا شنو
بعدين فيه حاجة مهمة هي فعلا طيارات والا كروز والا توما هوك ؟ حتى الان لا اجابة شافية يا مثبت العقل والدين