ده يكون من شنو؟

تقول القصة أن سيدة كانت تنتظر طائرتها في مطار دولي، اشترت كتابا من مكتبة المطار لتقرأه (كعادة الخواجات) كما قامت بشراء علبة بسكويت معه ، جلست وبدأت تقرأ كتابها ، وكان يجلس بجانبها رجل يمسك بصحيفة يقرأ فيها ، عندما بدأت السيدة فى أكل أول قطعة بسكويت من العلبة التي كانت موضوعة على الكرسي الذي بينها وبين الرجل فوجئت بأن الرجل بدأ في أكل قطعة بسكويت من نفس العلبة التي كانت هي تأكل منها ، بدأت السيدة تفكر بعصبية لدرجة أنها فكرت أن توجه له صفعة قوية على وجهه لرزالته وقلة ذوقه … عندما تبقت علبة البسكويت قطعة واحدة فقط نظرت إليها وقالت في نفسها “ماذا سيفعل هذا الرجل قليل الذوق الآن”؟ لدهشتها قام الرجل بقسمة قطعة البسكويت إلى نصفين ثم أكل النصف وترك لها النصف .. كظمت السيدة غيظها وأخذت كتابها وبدأت بالصعود إلى الطائرة وعندما جلست في مقعدها بالطائرة فتحت حقيبتها ،وفوجئت بوجود علبة البسكويت الخاصة بها كما هي مغلفة بالحقيبة ، وحينها أدركت أنها كانت تأكل مع الرجل من علبته، وقاسمها فى علبة البسكويت الخاصة به بدون أن يتذمر أو يشتكى !!!
من القصة (الفوق دي) يتضح أن التريث نعمة .. جاء في كتاب لسان العرب لإبن منظور .. الرَّيْثُ: الإِبْطاءُ؛ راثَ يَرِيثُ رَيْثاً: أَبْطَأَ ورَاثَ علينا خَبَرُهُ يَريثُ رَيْثاً: أَبْطأَ. وما أَراثكَ علينا؟ أَي ما أَبْطَأَ بك عنا ، ورجل رَيِّثٌ، بالتشديد، أَي بَطِيءٌ؛ وتَرَيَّثَ فلانٌ علينا أَي أَبطأَ؛ وقيل: كلُّ بَطيء رَيِّثٌ؛ والاسْتِرَاثةُ: الاسْتِبْطاء. واسْتَراثه: استبطَأَه. واسْتَرْيَثْتُه اسْتَبْطأْتُه.
المسئولون لدينا (التريث ده ما بعرفوهو) فما أن تنزل علينا نازلة أو يقع علينا خطب من الخطوب (وما أكثرها) إلا ويبادر أحدهم (والموضوع حار من نارو) ويلقي بالتصريحات هنا وهنالك وما أن تمضي ساعة واحدة إلا وتكون تلك التصريحات التي ألقى بها ذلك المسئول مغايرة تماماً للواقع ، والسؤال الذي يفرض نفسه هنا هو : ما هو السبب الذي يجعل أمثال هؤلاء المسئولين يسارعون بالتصريح والحديث وبهذه السرعة؟ هل يغتقدون بان ذلك السلوك سوف يكتب لهم في ميزان حسناتهم (الوظيفية) ؟ أم يعتقدون بأنهم بتصريحاتهم تلك يبعثون الإطمئنان في قلوب المواطنين على أساس أن (الحكومة متابعة وعارفة أى حاجة) ؟
بالطبع عزيزي القارئ أنت لا تحتاج إلى أي أمثلة فكل الأحداث والكوارث والنوازل التي مرت على هذا البلد كانت التصريحات التي أدلي بها المسئولين بعد حدوثها مباشرة لا تمت للحقيقة بصلة .. (وهي في واد والحاصل في وادي تاني)
وآخر هذه التصريحات المتعجلة تصريح السيد والي الخرطوم الذي أدلى به عقب (تفجير مصنع اليرموك) والذي أكد فيه نافياً وجود ضحايا في الوقت الذي فاضت فيها أرواح بعض المواطنين إلى بارئها وإحتشدت المشافي بالجرحي !
وحيث أن إنفجاراً هائلاً مثل هذا الإنفجار الذي وصل لهيبه إلى عنان السماء وإقتلع دويه الأبواب والنوافذ وطارت على إثره السقوف وأهتزت من فرط قوته المباني ليس بالشئ السهل التوصل إلى مسبباته في غضون سويعات ولا حتى الـ FBI إلا أن السيد الوالي أفاد وصرح (على طول) وفي عجالة يحسد عليها بما معناه أنه (لا يوجد مؤثر خارجي) معطياً الجهة المعتدية شهادة خلو طرف رسمية وكمان (مختومة) !
كسرة:
ده كلو كوم والإفتاء بغير علم كوم تاااني .. كذلك المستشار الذي صلته باالطيران والطائرات كصلة العبدلله باللغة (الأوزبكستانية) والذي صرح في عدد من الصحف اليومية عند سقوط طائرة (تلودي) بان أسباب السقوط تعود إلى (الطيار الروسي) ! … ده يكون من شنو؟
كسرة ثابتة :
أخبار ملف خط هيثرو العند النائب العام شنو(ووو وووو ووو)؟

43 تعليق

  1. ما منك من العليك….
    ما اراثك علينا؟ زكرتني السؤال ما اراسك علينا؟ و البشبهو ما ولاك علينا؟

  2. ده الحاصل في البلد

  3. مسؤول سريع اللهجة كان يعمل موقع زي الكاتب سريع اللهجة ويسميهو ساخر وزير

  4. عزيزي البروف
    في الدول التي تحترم شعوبها
    يتقدم المسئول باستقالته فور وقوعه في خطأ يسبب الاحراج
    لحكومته
    أما عندنا فالصورة مقلوبة تماماً

  5. وا أسفاً على بلد صارت أضحوكة العرب والعجم

  6. والله ياجماعة الخير الله يجازي الصوارمي الحرمنا من تصريحات اللمبي

    1. انت وين؟ قالو اللمبى عامل ليهم كمين بالنظر في الشرق. يا جماعة عاوزين واحد يمشي يقول ليه الجماعة جو بالغرب

  7. اولا برنجييييييييييييييييييييييييييية !

    1. حرام عليك انا كنت مرتاح وعاوز البرنجية سبقتني عليها وكله من اللي فوق وما تفتكر اللي فوق خالص يعني انت فاهم وانا فاهم اللي فوق ليك في القمردينة ومبروك عليك البرنجية المرمية ساكت سمبلة دي

    2. معلومه التدخين السلبي من اخطر انواع التدخين ….عجبني ليك












      احتفظ بحق الرد

      1. الغلبان…
        هههههههههههههههههههههه,,هو الرقدوا سمبلة شوية ؟؟ وى …
        نبارك ليك سمحك وجديدك…

        قويه…
        يعجبك سمح وليداتك ,, وما تحتفظ بى شئ كتر لمن يعفن ! وى..

      2. يس شمباتي سلام ديل ما رقدتهم السمبلة ديل رقدتهم عين ساكت نظره وكده

  8. ثانيا يا احباب دا بسموهو (تصريح الصدمة الاولى) ,, بس ,,
    ياخ الامريكان فى ضربة سبتمبر قعدوا كم يوم حتى اتهموا جهة , تقول لى قال ليك ,,

  9. بطانة كلو تمام يا سعادتك هي الودتنا في ستين داهية وبرضو تقول لينا الرد في الزمان والمكان ، ابشر بطول سلامة يا مربع

  10. امنا الغولة الغلبان بيقول ليك اللهم لا شماته

  11. دا من “الأمانة” يا بروف ؛
    الحاصل حصل من “تضييع الأمانة” حتى “التصريحات الجُزافِـيَّة” من ضياع الأمانة !
    و سبحان الله في قوله تعالى: ﴿ إِنَّا عَرَضْنَا الْأَمَانَةَ عَلَى السَّمَاوَاتِ وَالْأَرْضِ وَالْجِبَالِ فَأَبَيْنَ أَنْ يَحْمِلْنَهَا وَأَشْفَقْنَ مِنْهَا وَحَمَلَهَا الْأِنْسَانُ إِنَّهُ كَانَ ظَلُومًا جَهُولًا ﴾.

    1. و ضياع الأمانة شُرحهُ “هنا ” .. :
      عن أبي هريرة رضي الله عنه قال: بينما النَّبيُّ صلى الله عليه وسلم في مجلس يُحدِّث القوم، جاءه أعرابيٌّ فقال: متى الساعة؟ فمضى رسول الله صلى الله عليه وسلم يُحدِّث، فقال بعضُ القوم: سمع ما قال فكره ما قال، وقال بعضُهم: بل لم يسمع، حتى إذا قضى حديثه قال: أين أراه السائل عن الساعة؟ قال: ها أنا يا رسول الله، قال: فإذا ضُيِّعت الأمانة فانتظر الساعة، قال: كيف إضاعتُها؟ قال: إذا وُسِّد الأمرُ إلى غير أهله فانتظر الساعة.
      رواه البخاري

      1. =========================================
        قال: كيف إضاعتُها؟ قال: “إذا وُسِّد الأمرُ إلى غير أهله” فانتظر الساعة
        ========================================
        ؛

      2. لا حول ولا قوة الا بالله يا حبيب ,,
        جبتها فى التمنيات ,,

    2. حسع يا بروف و الأحباب مرَّه عليكم أو حتى “فِضل” مسئول مناسب ” ما قاعد” في المكان الما مناسب ؟!!
      🙂 ..

    3. بعدين نرجع لقصة “الخواجيَّه” يا بروف و أنا أقطع شك إنو “زول الصحيفه و البسكويت” جارها الطيب دا هو أكيد و حتما “سوداني”
      🙂 ..

      1. بس ده يكون من شنو؟!

      2. مااصلو سوداني حتي عازمين اسرائيل وايران شكله ف بيتو كمان شفتا الكرم الفياض

  12. الحبيب

    قالو في حكم فى ارجواى اد ١٧ لاعب كرت احمر وها هنا حا اكتب من الرقم واحد الي سبعتاشر وانتو ختو الاسماء مع العلم ان كل شخص يخت اسم علي ماسؤليته الشخصيه وليس للعبد لله اي مسعوليه

    ١ /
    ٢/
    ٣/
    ٤/
    ٥/
    ٦/
    ٧/
    ٨/
    ٩/
    ١٠/
    ١١/
    ١٢/
    ١٣/
    ١٤/
    ١٥/
    ١٦/
    ١٧/

    ولو ممكن مع الكرت تكون في طلقه عفواء اقصد حله ملاح او عامل لحام او سو تخزين

    قصه سو التخزين دى حلو والله طمام هي ؟!؟!؟!؟!؟!؟!؟!؟!؟؟؟

    1. هناك كان الحكم ارجنتيني ولو جا هنا بدي ليهو 3كروت حمر وبكرت الشيوخ الف الاحتياطي
      لكن بكل اسف التحكيم هنا افريقي يعني الا ياخد جلكسي

    2. انت بتقصد اللعيبة الكبار والا شنو

    3. ثلاثه منو انا ما جبت اسم زول وكل زول يجيب سيره عمك والاتنين المعاهو يتحمل ميعلتو براو

    4. كبار سنا ولا مقامأ ولا سنو افصح ابن

      1. والله شدة ما كبار ديل بياكلو شوارع عديل كده
        ومش كده وبس وكباري ومطارات كمان

  13. غايتو للضمان من واحد لى خمسه ديل زى صوريخ البتاع داااااااااك

    والله يسترنا

  14. واحد من البلد ديييك | رد

    ياجماعة الخير… سعال …. الدخل والى الخرتوم شنو …. الظاهر عامل فيها عمدة نيويورك !!!!!

  15. السمار !!
    غايتو جنس غايتو

    1. هههههههههههههههه,,اندهش وسكت الخشامة يا حبيب….

  16. يا ناس الجماعة كانوا عارفين الحاصل بس حبو يخدروا الناس شوية حتى لا يستعجلون باتهام إسرائيل وتبقى عملية سوء ظن وكدة والناس ديل موحدين وبخافوا الله ما شايفين علامات الصلاة زي صقر الجديان فى طاقية العسكري ، بس المحير الناس حا يردوا كيف على إسرائيل بضربات موجعة وهم ما قادرين يحموا نفسهم ، باقية زي قصة المكسر ومجبص ويقول للراجل والله لو وصلت عندك أكسر ليك رأسك وهو لا قادر ينش ولا يعش ،،،. قويييييييية بجد ( نحتفظ بحق الرد دي ) ممكن يكونوا قاصدين يحتفظوا بيه ويدخرونه ليوم القيامة ،،، تقوم قيامتهم أن شاء الله ،،، قولوا امين

  17. لا تستعجلوا سوف يردوا الصاع صاعين بس في محمد احمد

    1. وهو لسه ما ردو اكتر من كده الله زاتو بحسبم

  18. معتزمحمد الحسن | رد

    ده كلو هين بس كلام سفيرنا في لندن لو طلع صاح تبقي كارثه قال ايه ( نمتلك أرقام الصواريخ التى ضربتنا) الزول ده كان شارب شنو ولا ناس المرور بتاعيننا متطورين للدرجه دي؟؟؟؟؟؟!!!!!!!!!!!!!!!!!!!!!

  19. غايتو نحمد نحمد الله اخونا الفرس جو بورسودان وقالو الراجل تانى يجي بجاى والله مشكورين احفاد منو ما عارف بقينا تجينا الحراسه من بره وده في حد زاتو تطور وشى ايجابي

  20. رادار للايجار
    حضر س برنامج عن الاستثمار الناجح و شروطه علي شاشة احدي القنوات العربية و استخلص منه أن الاستثمار يجب ان يكون في حاجة محتاجة ليها البلد و ما فيها منافسة كبيرة، فكر و نظر في الامر و (فجأتن) خطرت له فكرة فتح محل لايجار الرادارات ( عادي ما الناس دي بتأجر صيوانات و كراسي و حاجات كتييرة كمان، طيب المانع شنو انو الناس تأجر رادارات طالما انها غير موجودة و لو فرضنا انها موجودة اكيد صلاحيتها انتهت من زمان و بقت متخلفة جدا).
    قام بدراسة الجدوي الاقتصادية للمشروع بعد أن حسب كل الحسابات مثل الضرائب والجمارك و الزكاة و دمغة الجريح و دعم الشهيد و رسوم المحلية و النفايات و الكهرباء و الايجار و الرخصة الصحية و تصريح المرور باعتبار ان الرادار ممكن يتأجر في الولايات و كدة.
    تم استيراد الرادار بمواصفات عالمية و بدا الترويج و الاعلان عنه علي صفحات الصحف اليومية و التلفزيون كمان : الان في السودان عرض محلي جنن العالم رادار للايجار باسعار لا تنافس و الترحيل و التركيب مجانا تغطية كاملة لمساحات شاسعة انذار مبكر جدا.
    المهم سرت الشائعات كالنار في الهشيم و بدا الناس في الايجار و اصبح امر اكتشاف طائرات العدو امر سهل بدلا من ان يقول احد المسؤلين انو دا التماس كهربائي بقت الشغلانة واااضحة اي هجوم يتم رصده عبر هذا الرادار و ما في طريقة للكذب فاصبح الخبر كالاتي : طائرات تخترق المجال الجوي للولاية الفلانية ظهرت في وقت صلاة العشاء عبر رادار السيد س
    و بعد ان مل الناس من مثل هذا الخبر فكر السيد س في فكرة اخري لتوسعة استثماراته الرادارية لتصبح اوسع فقال في نفسه الرادار يكتشف الطائرة و نحن ننقل خبر اختراق الطائرة لوسائل الاعلام و تنشره علي الشعب السوداني الفضل ولكن يجب ان تكون هناك مضادات تجبر هذه الطائرة فور اكتشافها علي مغادرة الاجواء و عدم تفكير ربانها بالمغامرة مرة اخري فما كان منه الا ان جلس الي صديقه اللمبي الذي كان يشغل وزارة غاية في الاهمية و عرض عليه ان يستثمر في هذا المجال بعد ان اغري الوزير بكومشن يسيل له لعاب الكثيرين، وافق الوزير و اقنع الرئيس ومجلس الوزراء و البرلمان و اللجان و اللجان المنبثقة و غير المنبثقة وولاة الولايات و المجالس التشريعية بالولايات و الوزراء الولائيين ( و أنا أعيط).
    تم ابرام العقد بين السيد س و الحكومة علي ان يتولي السيد س امر اكتشاف الطائرات المغيرة و اطلاق المضادات عليها مقابل ان تدفع الحكومة للسيد س مبلغ كبير من الدولارات يكفي لشراء منظومة متطورة من الرادارت و المضادات للطائرات و منذ ذلك الحين تعتمد
    الحكومة اعتمادا كليا علي السيد س وهي نائمة ملء جفونها ( اجتماعات وهمية و تصريحات لا تدري تضحك ام تبكي)
    كسرة :
    ياريت لو ادو السيد س الفرصة دي

  21. الاخوه الاعزاء
    ماتستعجلوا اكيد ح يلحسوا اسرائيل كوعها شذاذ الافاق الصهاينه بس انتوا استمتعوا بالنظر زي الدفاع بالنظر ياحليلنا

  22. يكونوا قاصدين نظره منك نظره مني هع احب اللمبي ههههههه غايتو قرود وبتنطط ومحمد احمد بيتفرج بس ما اظنها المرة الجاية بتكون عفى الله عما سلف ما اظن وربك يكذب الشينه

  23. يا ناس الحكومة اول مرة افهم اغنية حمد الريح انتو في وادي ونحنا في وادي اتاريها ما كانت غزل نظرة مستقبل ساكت

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: