إذا سرق فيه (الشريف)!!!

أيها الإخوة والاخوات والأبناء والبنات السودانيين والسودانيات داخل وخارج الوطن اليوم تبلغ (واوات كسرتكم الثابتة) حداشر (واو) .. نعم حداشر شهر (وكم يوم كده) منذ أن إعترفت الدولة رسمياً بأن هنالك من قام ببيع خط لندن أو الخط المعروف بخط هيثرو؟ وبعد أن استقصت اللجنة البرلمانية التي تم تشكيلها في الوصول إلى الحقيقة الأمر ومن ثم دفعت بملف (القضية) إلى النائب العام أو هكذا يعتقد!!
ولأننا دولة إسلامية رسالية ذات مشروع حضاري لا ياتيها الفساد من أمامها ولا من خلفها مسئوليها غر الجباة بيض الايادي من كثرة الوضوء وكل دقيقة والتانية يقولو ليك (العندو ادلة على الفساد اليجيبا) فقد ظننا وليس كل الظن إثم إن (قصة الخط دي) ح تعامل بالشدة المعروفة في شرعنا الحنيف تجاة تنفيذ العقوبة على السارق والذي لن يكون باي حال أفضل من (فاطمة بنت محمد) التي لو سرقت لقطع (صلي الله عليه وسلم) يدها ، كما أننا كنا نعتقد بأن (شركاء الجريمة) لن يفلتوا من العقاب عملاً بقول نبينا الكريم صلى الله عليه وسلم في الحديث الذي رواه البخاري والذي جاء فيه : «إنما أهلك الذين قبلكم، أنهم كانوا إذا سرق فيهم (الشريف) تركوه، وإذا سرق فيهم الضعيف أقاموا عليه الحد» !….
ولكن للاسف الاسيف يبدو انو (الإسلام) وتعاليمه (حاجة) وما يحدث على (الأرض) عندنا حاجة تانية خالص رغم الشعارات المرفوعة و(ما لدنيا قد عملنا) وبقية الهتافات التي ما أن تسمعها حتي تعتقد أنك جالس في احدي سوح (قريش) .
عموماً لن نكل ولن نمل من السؤال ونحن على أعتاب الإحتفال قريباً بالذكري السنوية للكسرة الثابتة عند بلوغ (واواتها) 12 لن نكل ولن نمل من السؤال حول الكيفية التي تم بها بيع (الخط) وكم قبض (شركاء الجريمة) من ثمن؟ وفي حساب من وضعت (الفلوس) ومن الذي إستلم (الكومشن) وكيف تم التخطيط لهذه (السرقة العبقرية) ! هذه التساؤلات المشروعة الحائرة التي نحتاج إلى سماعها من أجهزتنا العدلية التي قالت بأنها قد تمكنت من فك شفرتها وكشف خفاياها .
وختاماً إن كان لابد من نصح فهو إن الصمت و(الطناش) والإعتماد على نعمة (النسيان) حيال هذه القضية (وأي قضايا فساد مجمدة أخرى) لن يجدي بل يهز مصداقية المواطن في أجهزته العدلية وفي قادته الذين ما فتئوا يرددوا بان (تمسكهم بالإسلام) هو (الجاب ليهم الكلام) !

كسرة :
أها المرة دي الكسرة الثابتة عاوزنها كيف .. كده (ووووو و ووووو) وللا كده (وووو ووو وووو) ولا أحسن كده (ووو ووووو ووو) وللا كده (وو ووووووو وو) وللا أقول ليكم كده أحسن (و ووووووووو و) ؟؟
كسرة ثابتة :
أخبار ملف خط هيثرو العند النائب العام شنو؟ (إختار واحدة من الفوق ديل) !!

Advertisements

54 تعليق

  1. برنجية !!!!

      1. هو في عيد يا هناي !! ؟؟؟

    1. مبروك البرنجية يظهر طبنجة نام

      1. طبنجة ما نام لكن مشى مأمورية !!!!!!!!!!!

  2. سلامات….

  3. قسمها على كده ووو ووو ووو وو

    1. وووو ووو ووو.. بشكل خطة 4-3-3 البتلعب بيها فرقنا القومية الظافرة دوماً.. وبعد صفارة البداية بتتحول إلى 1-10… ما كلو دافوري في دافوري.. من الكورة للسياسة لما يسمى بفن الغناء ووو.. إلخ.

  4. معاك في البرنجية
    بس يا الفاتح الواوات حتستمر ما استمر النظام الفاسد دة و للاختصار ممكن تكون واو للقوة 11 زي بتاعت الرياضيات

    1. تف من خشمك واو اس حداشر دي معناها بسلموها عيسى يا راجل نخليها مع المنطق الرياضي للاختصار واو تكعيب زايد واحد ما تهرينا بي اس حداشر دي والا شنو تحياتي

  5. ههههههههههههههههههههههههه,, دا كلام زعل منك ساى يا بروف ,,
    بعدين الجماعة ديل عندهم حديث برااااااهم !
    آيييي من ايام الشريف عمر بدر كان والى لولاية الجزيرة ونشف دمها !
    فنقلوهو للخرطوم وعملوا ليهو وزارة الاستثمار !
    فصار الحديث عندهم (اذا سرق فيهم الشريف انشأوا له وزارة لللبع والجغمى) !!

    1. 🙂 الحبيب ياسين ؛
      عارف أستاذنا الفاتح لمن بدأ “أيها الإخوة والاخوات ” و قبل ما يتم أخزك الباقي طوالي قلت في نفسي خلاص ارتحنا و البروف معاهو “البيان الأول”
      ؛)

      1. للتصويب 🙂 .. و قبل ما يتم “أخوك” الباقي
        و العتب على الكيبورد

      2. ههههههههههههههههههههههههه,,وانا كنت قايلو ح يستولى على الاتصالات اللاسلكية ويعلن انفصالو عنها ! وى

      3. حاج أحمد السلاوى

        والله ياخواننا انتو متفائلين شدييييييييييييد ..

    2. صح وهذا واحد من مجموعة وربك يستر

  6. عزيزنا البروف
    في تقديري المعركة ضد الفساد تحتاج إلى سياسة النفس الطويل
    ونسأل الله أن يجنب البلد شر الفساد والمفسدين
    ووفقك الله في متابعة ما يهم أمر المواطن المغلوب على أمره

    1. يا سيدي لا نفس طويل ولا شئ الرويحه حااااااااااارة يجي طبنجة والثابته عليهو في ميدان عام وطاخ في المخيخ وبعدها اعلان اي زول سرق يرجع القروش وقبل ما يجي بكرة وراح تشوف جنس تشدير مارق زي المطر

  7. يا أخوي يالفاتح جبرا يعني هي بقت على خط هيثرو يا ما في سرقات وسرقات خليها على الله هسع إنت ليك سنة بتكووووووووووووووووووووورك ولا حياة لمن تنادي

    Dr. Ammar Mhagoub Mohammed Zaki

    ________________________________

  8. د. بدرالدين حسن جادالله | رد

    أستاذنا العزيز الفاتح
    نقول شنو والله حار بينا الدليل…….. سنة كاملة ونحن منتظرين….. الحقيقة أحنا إنتظرنا اكثر من عشرين سنة و ياهو الحال غير الغلاء والمرض والخوف والجوع عندنا شنو
    الحكاية بتاعت مصنع اليرموك متل حكاية الكديس والفار وعبارة ما تكتح القالها الكديس للفار ولما الفار إحتج على العبارة هجم عليه الكديس واكله وهو يردد غير فصاحتك دى الخلانى اعمل كده شنو
    نحن لانملك طريقة للدفاع عن أنفسنا مالنا ومال حماس وحزب الله وايران وسوريا ولو ما السلاح الذى نرسله لحماس ما كان ده الحال
    مع تحياتى
    أخوكم
    د. بدرالدين حسن جادالله

  9. كل سنة وانت طيب يابروف وعقبال الواووووووووو الالف

    1. ليس لي من رد عليك سوى صحيح انت صابر

  10. “حكايات سودانية” ـ التحية للمسلسل الرائع ـ الحال بقى يا بروف ؛
    البلد حكومة على معارضاتها و حركاتها كلها “بتغلي” في الحرام
    و البتحرق بس السودان و شعب السودان !!
    الكل داير ياخد نصيبو من الحقو و الما حقو ؛
    و سبحان الله مافي زول داير يتعلم و لا حتى بس يتعظ بزول !!!

    1. في حلقة من المسلسل “حكايات سودانية” كان مضمونها عميق و بسيط و رسالة واضحة .. الحلقة عن مواطن بسيط فكر يحرق نفسو من قهرو و زلو و عجزوو “فكرة” خاطر قدام صديق ؛ فجأة بقى بسبب الفكرة دي أو الخاطر هدف و محور صراع لقوى حاكمة و معارضة و “متفرجة” ..
      حلقة صراحة “رسالة” و مرت على الرقابة و الما رقابة لأنها بسيطة شديد و واضحة
      أدعو الأحباب للبحث عنها في النت و مشاهداتها

      1. بالمناسبة يا بروف كتاباتك “حكايات سودانية” بحالها 🙂
        لك كل الود و التحية أستاذنا الفاتح
        بس ما تحرق أعصابك و ما تنسى “وصية” أخوك الصغير يا بروف 🙂

  11. مستشفي امبدة النموذجي تم اغلاقه،آيل للسقوط،المقاول نسي السيخ بتاع البيم.هههاي

  12. مستشفي امبدة النموذجي تم اغلاقه،آيل للسقوط،المقاول نسي السيخ

  13. البروف والسمار .
    سلامات .
    أقترح أن تكتب (( أخبارملف خط هيثرو العند النائب العام شنو+ سنة؟)) ودة بعد ماتتم السنة ونحتفل بالزكرى السنوية للملف العندالراجل دة …

    1. انا كمان بقترح يعملوا عليهو رسائل في الماجستير والدكتوراه عن طرق الزوعان والهروب من القضية وووووو بس بعد نتفكفك

    2. اختراح اجمل نجتمع نحن سمار القمردينة وندعوا كافة وكالات الانباء العالمية ونحمل نعش مكتوب عليه خط هيثرو ونمشي من الغرب للشرق عبر القصر الجمهوري وندفن الجنازة قرب قبر الفرشي وخلااااااااااااااااااص حلوة والا لا؟

  14. الاخ محمد حسن بحلم ولاشنو

    1. من حقه ان يحلم حلم المظلوم عدل (على وزن حلم الجعان عيش ) واهو الحلمين عنده يختار واحد هع

  15. عن جد اصبحنا نحلم بالعدالة في عهد الشنو ما عارف الحضاري دا وكثير بسال نفسي يا ربي ديل مسلمين

  16. يا بروف يا ود جبرا (غر الجباة بيض الايادي من كثرة الوضوء ) انت برضه عاوز تغشنا بيض الايادي من النعمة الفانية اما غر الجباه فالشغلانة قلنا ليكم بيعملوها في ام درمان وصناعة ميد ان سودان في يوم واحد والعلامة بتكلف 500 الف بس وبعدها امطرت لؤلا وذهب ودولار اخضر وبلاوي زرقة

  17. وختاماً إن كان لابد من نصح فهو إن الصمت و(الطناش) والإعتماد على نعمة (النسيان) حيال هذه القضية (وأي قضايا فساد مجمدة أخرى) لن يجدي بل يهز مصداقية المواطن في أجهزته العدلية وفي قادته الذين ما فتئوا يرددوا بان (تمسكهم بالإسلام)

    البروف اسف اقتبست كلامك وبقول بالفم المليان لو ده فهمك وعندك امل في ناس ديل نكون اخدنا اكبر قلم (كف) في حياتنا لانو نحنا فقدنا المصدقيه فى الراس زاتو لمن تجي تقول لى عدليه وبطيخ
    والل المستعان

    1. راس الجيفة والا الجيفة

  18. مدخل ما محلو :- منذ صغرى وانا بحب العمل الاذاعى بشقيه المرئى والمسموع وبقدرو جدا بل وشرعت فى التفكير جدية فى التقدم للعمل باحدى القنوات الفضائية فى زمن مضى , لكن ارجع واحمد ربى انى ما ارتكبت الحماقة دى لانو حتما كنت ح اتداوس وارقد وطا مع احد المسئولين بالحكومة السودانية ! ياخ ديل سلاقين وفقاعين بصورة ما طبيعية !
    المدخل الجد جد :- فى برنامج (المحطة الوسطى) بقناة الشروق السودانية استضافت المذيعة الطيبانة وزير الاعلام السودانى الناطق الرسمى باسم الحكومة , طبعا كلمة (الرسمى) دى مهمة لانو فى ناطقين تانى غيرو بنمش ليهم فى محلهم ! اها اول سؤال وجهتو ليهو : انتو المخول رسميا بالتصريح منو فى الحكومة ؟ لانو الوالى طلع صرّح والوزير الفلانى طلع صرّح وعلانة الحنانة طلعت صرحت ّ! اجاب : احنا فى دولة منظمة ولها الحق فى اعطاء التصريح لمن شاءت ! خُد …
    اها وقالت ليهو : انتو اتاخرتوا فى التصريح وتطمين الشعب , اجاب : ما اتاخرنا ولا شئ , فعلا طلعنا بتصريح رسمى بعد عشرة ساعات لكن اصلا الوالى طلع وصرح وطمّن الشعب ! بعدين الشعب ح يستفيد شنو لمن نطلع نصر الساعة واحدة صباحا ونقول ليهو انو فى طيارات ضربت !!؟ طبعا هنا انا ذهلت وشهقت لمن مثانتى طارت فى حلقى ! هى اسه قوووووول طبقوا لينا الكية بعد ساعتين ! تودى وشك وين يا المغسلو بى بو….. لا لا لا ختتتتتتتتتير يا بشكة ..
    بعدين قدر ما قالت وصدحت بى انو الجيش تعبااان وما عندنا قوة حلف وقسم انو الجيش دا الاقوى منو ياتوة جيش فى العالم ! وقال اصلو العالم دا كوووووولو مافيهو زى جيشنا جيش الهنا ! وطبق الوسم وقال انو الضربة دى اثبتت انو السودان دولة قوية ودولة مواجهة عشان كدة اسرائيل ضربتنا ! ايووووووووى ايووووووى ايووووووووووى ..
    اها لما جات فى حتة الرد بدت الطربقة : احنا نحتفظ بحق الرد فى الزمان والمكان المناسبين وعندنا المقدرات والشجاعة والرجالة الكافية اننا نرد ! انا لو محلها كنت قلت ليهو : احتفظوا بيهو وخللوهو واتمسحوا بيهو , الاحتفاظ دا حدو وين ؟ وقدر ما زنقتو وقالت ليهو انو الرد دا من سنة 2009م ما حصل لكن اصلو ابى يجيها فى الميس , وما فضل الا يقول ليها : ابيييييييييت , ما بنرد , ردى انتى !!
    بعدين ذكرت المذيعة نقطة حيوية ومهمة : كيف مصنع تصنيع حربى يكون وسط منطقة سكنية تكتظ بالسكان ؟ اجاب : خلاص صدر قرار بنقله من مكانو , قالت ليهو : متى ؟؟ قال ليها : تاااانى جينا لى حتة متى دى !!؟ انتى عايزاهو بكرة مش ؟؟ هههههههههههههههههههههههه , والله خفت عليها يقوم يعضيها …
    خاتمة : حقو يغيروا اسم المصنع دا لانو بيذكرنا بى موقعة اليرموك !!! اللى كان فيها الصحابى / خالد بن الوليد رضى الله عنه مش الصرمة خالد سعد …
    ونلتقى …….

    1. يعني انت تاني عاوز تزنق الجماعة ديل في القمردينة دي ديل ما بحسو واجمل ما في القمردينة غير معكننة بخميرة موتمر خلينا نتفشه هنا ساكت

      1. ياخى والله الهارد فشفاشى اكتر وهي بتسال فهو مديها قفا وشو وبعاين في الاستديو … ماعرفناها دي عدم مبالاة ولا زعلة

      2. ههههههههههههههههههههههههههههههههه,,زعلة وحرنة زى حرنة الحمار يا صابر ! وى وى وى

  19. ههههههههههه,,خميرتى جايبها براااااى ! كع

    1. تحيتي شمباتي الجماعة اصلا ما قادرين يقولوا بغم بس اصبحوا يتسابقوا في السرقة يظهر انه النهاية قاربت وعلى العموم هي ما فضل فيها شئ بكرة كلهم يكونوا راكبين طيارة واحدة ومتخارجين ويخلوا ليك محمد احمد فاتح فاه ومندهش وبالمناسبة اين المندهش ليس له وجود عسى المانع خير

    2. وبيني وبينك اخاف يسرقوا قمردينتنا زاتها

      1. هههههههه,,لا دى محصنة ومحمية بسيوف وقواطع الشايقية !
        كااااااااااااااااااااااااك

  20. الاستاز والسمار
    لكم التحايا
    وعندي ليكم واقع اليم وحصل ع انسان بسيط من المغلوبين علي امرهم ف البلد دي
    واليكم الحكايه:وجدته صباح اليوم ” الخميس ” وهو يدعو بصوت عالي ” انشاء الله بشه يجيهو سرطان في مؤخرته ”
    تعجبت منه وبهدو شديد اقتربت منه بعد ان ادركت ان له مشكلة في الوزراة ” التعليم العالي ” ومن شهاداته الجامعية في يده والتي ” كرفسها ” أدركت انه يريد التوثيق ،، بهدوء اقتربت منه وبالقرب منه افراد أمن الوزارة يراقبونه بعد ان اخرجوه بالقوة من الوزارة ،،،،سالته ” يا ابو الشباب لو سمحت توثيق الشهادات وين ؟؟ ” نظر لي بقرف شديد ،، وقال لي يازول اقنع ديل تافهين جدا ،،، لو شهادتك قبل 2007 أمشي غيرها وتعال ،،،، وواصل انا خريج العام 2003 وقد قمت بتوثيق شهادتي في التعليم العالي في 2003 ذاتها ،، وحضرت صباح اليوم لتوثيقها في الخارجية بعد حصولي على عمل في ” الكويت ” التي كنت اعمل بها” عامل طرمبه وقود ” تقدمت
    لوظيفة بشهادتي الجامعية وتم قبولي مع اشتراط التوثيق من الخارجية ،، في السفارة ذكروا بان لهم توثيق السفارة فقط توثيق الخارجية من السودان ،،، اتيت يوم الخميس ع
    لى ان اعود يوم الثلاثاء للكويت واستلام الوظيفة حسب الموعد الاخير معهم ،، عند دخولي للخارجية وشهادتي ” الموثقة من التعليم العالي في 2003 ” 1كروا لي بان اذهب لتغيير الختم ،،، ” ياجماعة ما ياهو ختم وتوثيق التعليم العالي ” يازول وزير التعليم العالي الحالي اصدر قرار بعدم توثيق شهاده بالتوقيع القديم والختم القديم ،،!!!!
    طيب كويس ده مفروض يكون للناس الما وثقت … يازول للجميع ماتضيع وقتك امشي اختم الشهاده بالختم الجديد ..!!!
    توكل على الله حسب حديثه وتوجه للتعليم العالي ،،،، وبكل برود ارجعت له الشهاده مطالبين بتغييرها ،،، لانها تحتوي الختم القديم والختم الجديد ما ” بثبت ” في الشهاده القديمة ،،!!!
    بكل هدوء طالب مقابله المدير ،،، ووجده ” طفل صغير ” مع ” دقن طويلة تدل على كوزنته ” ذكر له بكل عجرفة ،،، بان يخرج ولاتوجد طريقة له الا تغيير الشهاده لان الوزير قال كده ،، طيب ياجماعة دي شهاده دفعتا رسوم عليها ووثقتها في التعليم العالي ” نفس الشباك ” ودفعت رسوم عليها ،،، الوزير ده حنكو شنو يعمل كده ،،،،
    المهم وصل به الامر ” معسكرا امام مكتب الوزير ” رافضا الخروج تم جمعه ب المدير التنفيذيي الذي ذكر له ظروفه وان الشهاده سبق اعتمادها من التعليم العالي وان فرصته قد تضيع اذا لم يتم التوثيق اليوم ،،،،، كرر المدير ذات الحديث عن ان هذا قرار دوله ممثله في الوزير ،،، وهنا طالبه صاحبنا بورقه تفيد بانهم لن يقوموا باعتماد شهادته للاتجاه للقضاء والقانون وهنا ضحك المدير العام واستدعى افراد الامن الذين القوه في الشارع حيث وجدته يكرر بصوت عالي ” انشاء الله بشه يجيهو سرطان في مؤخرته ” و” طظ في السودان ” وما الى ذلك ،،،

    1. صراحة ليس امامي الا ان اقول له قلبي معك مع انه الواحد عايش ببقايا قلب يعني بقايا قلبي معك واااااااااااااااااااااااا فشفاشااااااااااااه

      1. سرطان اكتر من الهو فيهو دا ؟؟
        الله لا يوفقهم ولا يمسيهم

  21. أخوي الفاتح ما تحرق دمك ، الجماعة بقروا كلامك وبضجكوا عليك وبقولوا اعلى ما في خيلك أركبو ، البلد بلدنا ونحن سيادها ولو البنسوي دا ما عجبك شوف ليك بلد غير بلدنا والنصوص البتعرضها دي علينا بلها وأشربها مويتها وافهم يا غشيم نحنا لسع في مرحلة التمكين وشد حيلك لما بعد التمكين ، ماسك لينا في خط هيثرو والله نبيعك والسودان الباقي وما فرد يقول بغم

    1. لسه راح يبيعوا الله يبقوا شنو تاني حيرتنا

    2. لسه راح يبيعوا الله يبيعوا شنو تاني حيرتنا

  22. د. شمباتي
    منك لله إنت لسه بتشوف تليفزيون ؟؟؟ ومنتظر حق الرد في الزمان والمكان المحددين
    الغلبان
    تحياتي أنا موجود في سجلات أمازونيا فقط و منتظر ارد على مسئوليها في الزمان والمكان المحددين
    قوية
    عندي شهادات قديمة من جمهورية امازونيا ( يا ربي سيد العدة ما بشتريهم مني ) على كل هذه الشهادات معروضة للبيع
    مطلوب على وجه السرعة……..
    جنسية تشادية ، صومالية ، حبشية ، واق واق أو أي حاجة بس السرعة مطلوبة

    1. تسلم اخي كلنا قررنا الخروج بدون عودة من جمهورية الخرتيت التي يحكمها اب تكو وجماعته

  23. المندهش الحبيب..
    سلام وبركة بالطلة ,, عارف انا بس بفتح التلفزيون لى فقع المرارة دا !
    الحمدلله بس

  24. بصراحة يا بروف انا شفقت عليك من اول واوا لأنو متأكد واواتك دى زى الفورة الف .. الناس ديل روحهم سلبة و راح يسلوا روحك والله يعينك ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: