الكهرماء

إستخدام سلعة ضرورية في حياة المواطن وربط الحصول عليها بسلعة أخري فكرة ليست وليدة اليوم بل هي فكرة قديمة كان يستخدمها أصحاب (الدكاكين) في الأحياء قبل زمان بعيد .. وكانت سلعة السكر هي السلعة (الضرورية) التي يستخدمها صاحب (الدكان) للتخلص من السلع الراكده لديه .
– بالله أديني رطل سكر؟
– لازم تشتري معاهو وقية شاي النجمتين
وبما إنك ما عاوز شاي النجمتين ولا النجمة الواحدة فإما تجازف وتشتريهو وتختصر الموضوع أو لو عندك وكت تمشي دكان تاني
– بالله أديني رطل سكر لو سمحتا
– لازم تشتري معاهو لوح صابون الهدهد
وهكذا .. مرات شاي .. مرات بن .. مرات كبريت .. مرات أمواس !!
الآن .. في ظل صعوبة وعلو تكلفة تحصيل (رسوم) وقيمة الخدمات بدأت الشركات والهيئات تفكر في حلول حيث قامت شركة الكهرباء بتركيب عدادات الدفع المقدم أو ما يعرف بالجمرة الخبيثة وبذلك إرتاحت شركة الكهرباء من مشكلة التحصيل وتكلفته كما تخلصت تماماً من الطاقة المهدرة في عمليات سرقة (التيار) والتي كانت تتم بتعطيل أو إبطاء العدادات (القديمة) عبر طرق كثيرة أشهرها ما يعرف بطريقة (الكبري) !
لم تقف شركة المياه مكتوفة الأيدي وهي ترى (زميلتها) قد (إرتاحت) من رهق التحصيل فقامت هي الأخري بتركيب عدادات دفع مقدم (جمرة مويه) وعممتها على الشركات والمصانع والمؤسسات وكادت أن تعممها على منازل المواطنين لولا إرتفاع الأصوات أن (إتقوا الله يا هؤلاء) !
طيب ماذا عسى هيئة المياه أن تفعل من أجل تحصيل (فلوسها) ومديونياتها التي لدي المواطنين ؟ إهتدت الهيئة إلى طريقة سهلة ومضمونة وهي أن تربط فاتورة الماء إلى فاتورة الكهرباء .. يعني عاوز تشتري (رطل سكر) لازم تشتري (صابون الهدهد) !
بغض النظر عن بعض الإيجابيات في عمومية الفكرة من حيث توفير الأموال بالنسبة لهيئة المياه مما يساعد على تقديم خدمات أفضل إلا أن العبد لله يري ان الضيق والفقر والمسغبة التي يعيشها معظم المواطنين الذين (ما فضلت ليهم حاجة غير الموية) تجعل من تنفيذ هذه الفكرة في هذا الوقت بالذات نوعاً من الإنتحار (إنتحار المواطن طبعن) الذي سوف تضاف (الموية) إلى قائمة المشقات التي يواجهها في حياته التي تزدادً بؤساً يوماً بعد يوم .
لقد كان على (ولاة أمرنا) قبل تنفيذ هذا (الربط) بين الفاتورتين أن يقوموا بعمل (دراسات اجتماعية) من أجل تصنف الاسر التي تستطيع دفع (المتأخرات المتراكمة عليها) ولديها المقدرة على دفع الفاتورتين معاً والأسر التي لا تستطيع وذلك حتي لايحرم (مواطن) من شربة ماء بسبب عجزه عن الدفع بينما يقول الحبيب المصطفي صلي الله عليه وسلم 😦 الناس شركاء في الماء والكلأ و النار) ونحنا دولة رسالية وكده !

كسرة :
لو الأمور مشت بالطريقة دي ح تمشي تشتري كهرباء ح يقولو ليك أدفع (العوائد) بالاول !! ده لو ما قالو ليك إشتري (صابون الهدهد) !!

كسرة ثابتة :
أخبار ملف خط هيثرو العند النائب العام شنو(ووو ووووو ووو)؟ – قريباً الإحتفال بالذكرى السنوية – !!

Advertisements

26 تعليق

  1. دور المويه قرب كلوووو بييييي 100

    1. الرجاء تعرييف التالي:
      – تجديد ايجار الحكر بعد مرووور 30 عام من التمليك “من المحليه-تتراوح ما بين( 500 جنيه الي 100 ألف بالجديد).كل بيت!! استراتيجيه للهمبته الثلاثينيه؟
      – رسوم دمغات الشرطة عند تجديد (رخصه-جواز-جنسيه-….) بين 10 الي 40 جنيه. كل مواطن!!!
      – ضريبه الدخل والجمارك (اصلا لا يوجد في الاسلام – الفي جزيه و غنيمه). اي بضاعه+زول شغال…!!!!!
      – اكمل الباقي …!!!! اخوك تعب وكده..

  2. برنجيييييييييييييييه
    حلوه من الصباح

      1. كله من درداقة العيش البنسى البرنجية يا راجل

      2. يا راااجل احتمال بنسف وكده والبرنجي بيخلينا نقححقحقححح

    1. تحياتي قوية عارف انك لقيت البرنجية بايته انت ما بتنامش والا ايه

  3. البروف العزيز والسمار سلام
    ياااااااريت تطبق عاجلاً وليس آجلاً
    عسى ولعل العطش يصحي الناس عشان تقوم تشرب

  4. يا بروف حديث الرسول صلى الله عليه وسلم بيشمل الناااااااس !
    احنا ناس ؟؟؟
    وطييييييييييييييييييييييييييب

    1. طيب انا وانت واهل القمردينة وكثار زينا ما ناس لكن هم شايفين فيه ناس نعمل ايه ادي الله وادي حكمته (يا خي عمرك ما سمعت بي حكم اب تكو) ما هم اب تكو ونحنا والله خليها على الله

  5. البروف والسمار .
    سلامات .
    المشكلة الكبيرة إنو الناس قرفانة مستائة من الوضع الاقتصادى ومع كدة صابرة وبعد دة كلو يطلعوا ليك قرار يزيد ليك الطين بلة . يعنى ضاقت ولما إستحكمت حلقاتها ضاقت تانى …
    الله فى …..

    1. انت ما سمعت بتاع الازيار والا شنو هو في طين

    2. يظهر عليك ما سمعت تصريحات الحكومة انو الهدف من الإجراءات رفع عن كاهل المواطن ( يقصد الرفع على كاهل المواطن ) لحدى ما الكاهل يدشدش ونرتاح منهم ويشوفوا ليهم بعد كده كاهل يرفع عليه

  6. سلامات ،،، قصدك يا بروف الموية بايرة يعني ،،،
    عكرانة – ملوثة – متاخرة – وعايزة شغل اوفر تايم عشان نللاقيها ممكن في الاسبوع مرة ..
    بعدين علاقة الاسنهلاك حا يضبطوها كيف ؟؟؟ العندو قصر وحدائق وطوابق ،، والعندو غرفة وحمام بلدي ؟؟؟ وديل ساكنين في نفس المحلية … عالم غريبة …
    النقطة التانية ::: مممكن اشترى كهربا وما اشتري موية ؟؟ واشرب من الجيران ؟؟؟ او العكس ؟؟

    1. هم ما من زمان قالوا لينا اشربوا من البحر (والا ايه)

  7. نستاهل كل البحصل فينا لأنك وانت العالم النابة جاي تقول لينا الدولة الرسالية ، مينو من الابالسة غشاك وقال ليك دولتنا دولة رسالية ، نحن دولة عسروا وتيسروا ، والقادم أعظم واخطر

    1. الرسالية يعني ايه تقصد الرسالة الثانية الجزو صاحبها والا ايه انا بقيت اخربط والا ايه ديل يا خوي (سبق الكبار والقدريو) وكموكمان الحوار السبق شيخو كنا بنسمع بيها مثل بس بقت حقيقة والا شنو والا انا مالي والا الحاصل شنو بسم الله الرحمن الرحيم يا مثبت العقل والدين

  8. دولة عسروا ولا تيسروا

    1. تسلم للتصحيح تحياتي ابوصفوان

  9. ايام المرحوم نميرى و ايام ازمة العيش كان لازم تشترى فول ب2 جنيه عشان يدوك عيشتين زيادة!!!
    قريباً الإحتفال بالذكرى السنوية (لسطر الواوات) !! ياترى كيف الاحتفال بتاعا ؟؟ عموما اتصلوا بينا من بدرى عشان نمشى نجهز ليكم الصيوانات و الساوندسيستم و بتاع الاورغن و صبارات الموية الباردة (للبروتاريا و الهتيفة) اللى بيكونوا واقفين و تلاجات التلج للبارد بتاع (الصفوة) اللى بيقعدوا فى الضل تحت الصيوان, و الكراسى و الباصات اللى حننقل ليكم بيها الهتيفة و البروتاريا اياهم, و ما تنسوا المنصة عشان (قطع الرحط) !!! و كل عام و انتم بخير

    1. كل عام وانت بخير والقمردينة هناك اقتراح من العبد لله بس لاصحاب القمردينة فقط والما قلبه قوي ما يجي معانا وعازرنه نعش صوري عليه جنازة مكتوب عليها خط هيثرو تمر من الغرب الى الشرق عبر القصر الجمهوري وتدفن في المقابر جوار قبر القرشي واهو اهل القمردينة يقولوا عملنا حاجة عموما انا اول واحد هل من مثني

    2. تحياتي حلوة كثير من بقك المرحوم جعفر نميري صدق ما عندو اي ارض سكنية في جمهورية الخرتيت وكان صاحب ليل زي ما بقولوا وصاحب كاس وبعد دا ما عندو ارض سكنية مش حاجة تخلي الواحد يقول عجبي!!!!!!

  10. فقط في كلمتين ديل شنو الما ربطوه بالما عارف شنو؟!

  11. والله ياناس القمردينه اسي دا حاصل بتاع الدكان مايديك فول كان كسرت رقبتك بدون عيش او جبنه هههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: