عندما حرد عنترة الليمون

كانت الساعة تشير إلى الثانية عشر منتصف النهار .. الهدؤ يعم الحي عندما دق باب الشارع بعنف .. خرجت مسرعاً لأفتح الباب .. وجدته شخصاً فارع الطول ضخم الجثة يرتدى ثياباً غريبة ذو شارب كثيف
– الله كريم …والله يا حاج طالعين من عيد و(فلس شديد) إلا غايتو أجيب ليك أكل !! نظر لي نظرة غضب وهو يخاطبني :
– (أما عرفتني يا هذا)؟
– شنو كمان جابت ليها لغة فصحى؟ لا والله يا حاج؟
– ( وهو يمسح شاربه الكثيف) : أنا عنترة بن عمرو بن شداد بن عمرو بن معاوية بن قراد بن وقبيلتى تنسب إلى عبس بن بغيض بن ريث بن غطفان !!
– عنترة الوااااحد ده؟ لا حولة ولا قوة إلا بالله .. والجابك لينا شنو؟
– جئت لأحمي حمي الديار وأرد الغزاة !!
– كدي طيب إتفضل أدخل جوه نكرمك وبعدين نشوف الحاصل
– (يجلس على أحد الكراسي وهو يتلفت ناظراً في إندهاش ثم ) : لقد قطعت قرابة الألفي عام لأصل إليكم بعد أن علمت إن الأعداء قد إستباحوا أرضكم؟
– بالله هي القصة وصلت ليكم !
– نعم ما أن علمت بأنكم تتعرضون إلى غارات من الأعداء حتى إمتشقت سيفي وتمنقت درعي وحملت رمحي بيميني وإعتليت صهوة حصاني الأدهم فأنتم أيها السودانيون (أخوالى) لأنكم من صلب (حام) ألم أنشد فيكم شعراً من قبل :
إنّي لتعرف في الحروب مواطني *** في آل عبس مشهدي وفعالي
منهم أبي حقّـــــــــاً فهم لي والـــدٌ *** والاُمّ من (حــام) فهم أخوالي
ثم مواصلاً :
– (والشرر يتطاير من عينيه) : أين هؤلاء الأوغاد .. إين هم
– كدي يا عنتر يا خوي أشرب (كباية الليمون) دي وروق شوية .. الأعداء ديل بعيدين جنس بعد
– إذن كيف قطعو تلك المسافات الطويلة كما تقول لينالوا منكم !
– يا زول إنتا بتهظر .. الإف 16 دي معاها كلام والله القصة كووولها ما تاخد ليها دقايق !
– وما سلالة هذه الخيل 16 !
– لا لا .. دي سلالة أمريكية ومحسنة كمان
– أهي أقوي من فرسي الأدهم ؟
– أدهم مين يا عمي ..إنتا من زمن (الحصين) والسيوف والكر والفر ؟ والله هسه يضربوك الضربك ذاتو ما تعرفو !
– أحقاً لا تعلمون أي القبائل قد غارت عليكم وضربتكم؟
– بلى .. أجل يا عنترة نحنا بنعرف الضربنا منو بس بعد ما هو يصرح وكان ما صرح تبقى القصة (مكنة لحام) !
– ألم تأسروا بعضاً منهم ؟ ألم تنظرو إلى وجوه قتلاهم؟ لتعلموا من أى القبائل هم !
– قتلاهم؟ جرحاهم؟ أسراهم؟ والله تتخيل الكلام ده ما حصل ؟ مع إنو لينا ربع قرن بنقول ليهم (ليكم تسلحنا) !
– وأين سلاحكم يا رجل !
– قاعد وموجود .. لكن إنتا يا عنترة ما عارف الحكاية !
– عرفني بها أيها الرجل
– الحكاية إنو الحصين أقصد الطيارات بتاعتهم بتجي (طافية النور) !!
– أيغيرون عليكم بالليل
– بالليل بالنهار بالصباح .. أي وكت .. ما خلاس بقينا ملطشة
– (في غضب) : دلوني عليهم لأبيدنهم جميعا
– ياخي ما تباااالغ .. تبيد ليهم شنو؟ الأمة العربية كوووولها ما قادرة تعمل ليهم حاجة
– (في لهجة صارمة) : لن أعود إلى قبيلتي أن لم أقتص لكم منهم
– كان كده ياكا الطلعتا ليك (رقم وطني) وقعدت معانا !

كسرة :
من الزعل عنتر (حرد) كباية الليمون وطلع ركب حاصنو ثم إختفى !!

كسرة ثابتة :
أخبار ملف خط هيثرو العند النائب العام شنو(ووو ووووو ووو)؟ – قريبا الإحتفال بالذكري السنوية

36 تعليق

  1. برنجية !!!

    1. برنجية الهنا و السرور يا ابو الاندهاشات انتا,, وين من زمان !!!

      1. ود بوتين سلام كيمان كيمان
        كنت قاعد جنب البحر خايف من اسرائيل ترسل لينا طيارات تاني
        البحر أمامكم والعدو من فوقكم أحححححييييا نحن نطير وين ؟؟؟
        عبيد
        يباركوليك السمح يا أبو كمال …. ويييين الزول ده ؟؟

    2. عاد لقيتها يتيمة الليلة !!

    1. مشتركة كده شربكه انت ود امنا الحكومة والا ايه قال مشتركة قال

  2. برنجيه بعد غيبه

    1. ههههههههههههههههههههه’’تانى بتجى !!؟

      1. obeid ما يجي الا ياخذ البرنجية حكاية غي
        غريبة انت نايم وين

  3. نحنا نعاني من المؤتمرجيه يوميا تحت سياط فسادهم الامبالي ..شايف الفاتح ع قول البوني ما ذكر اسم المعتدي صراحه . و سياسه الحكومه( دقه تفوت و لا حد اموت)

  4. رايكم شنو نكون فريق للبحث عن عنترة بعد ما نعمل ص.د.م.ى.(صندوق دعم متضررى اليرموك)!!!!

    1. الصناديق كترت خلاااااس يا ام ايمان, شى (ص.د.م) و شى (ص.د.ر) و شى (BMW) و شى ما بعرفو شتو داك,, غايتو جنس غايتو !!!

      1. خلاص…من الااااخر كده نعمل ص.د.ق.ر. (صندوق دعم القالوا الروووووووووب) وانا اول زول يسجل فيهو!!!!

      2. صناديقكم كترت
        ادوني الصرفه الاولى

    2. وكمان ما تنسوا تضيفوا الصناديق السودا بتاعه الطيارات اللي وقعت وكده عدد الصناديق بقي كتيبير خلاص

    3. ستي ام ايمان من ضربة اليرموك عنترة في قبره في ديار عبس رجف قال نشوف عنترة قال نحن نعمل الازم ونطلع كووووووووووووولنا غير كده ولا الف عنترة بيعمل شئ

  5. و الله بعد دا اي سوداني محتاج صندوق دعم لحاله…و الغريبه الحكومه بتشحد في القروش الخارجيه!!!

    1. طبعا يا shadow اذا كان هم لحدى هسة فى التلفزيون القومى بيشحدوا لشهداء طيارة تلودى !!!

      1. أرجوكم ما تفتحوا لينا سيرة صناديق شهداء الطيارات لأنها بقت كتيرة ومسيخة من الداخل والخارج
        عشان كده عاوزين صندوق الما إستشهدو من الطيارات

  6. البروف سلامات
    يا أخي ماكنت تديهو باقي الشربوت ولا شامبيون عشان يكون عندو حركات … ونقعد لينا سنة سنتين مفاوضات
    بدل الليمون ده هو مرارتو ناقصة حوامض ؟؟

  7. يا حليلك يا عنترة يا عشا البايتات

  8. هههههههههههههههههههههههههه,,والله دى الليلة جبتها ضقلها يكركب !
    انا اخوك يا عنترة العبووووس ,,,
    الله لا كسبهم عافية , ويارب يلقوه فى سماعاتهم ودماعاتهم ..

  9. وأنا بقول ريسنا الوداهو السعودية شنو … أتاري مشى (يحنس) عنترة قال عملية جراحية قال …. صناديقكم فاتت صتاديق ضحايا أعصار (سالي)

  10. قولوا خيرا أو أصمتواا

    1. عمك تنقو كثير موجعة ان يضرب السودان عديييييييل كده ومفيش حد بيقبلها بس الشماته يا اخ تنقو ظاهرة في وجوه الجميلع يعني من المفترض الناس الشمتانين فيهم الناس يشوفوا دا من شنو ويبدأوا في حلول للمسالة الشماتة ليست للوطن وانت سيد العارفين بس شوف سبب الشماته شنو ونحن في انتظار تواصلك مع كل احترامي وتقديري لك

      1. و الله يا الغالبان انا شخصيا من الشمتانيييييييين جدا و التناقشو كلو في موضوع الرموك مش شمتان بس و متكيف كمان و مبسوط و يزيد عليها دعوة ياريت لو غشو وزارة الدفاع او القصر الجمهوري او شنو ما بعرف و قبل كدة كتبت انو السوها الكيزان في الناس تخليهم لو جات اسرائيل في ادرمان يقولو ليهم اذهبو انتم و رهطكم فقاتلو انا هاهنا قاعدون و دة كولو نتيجة الظلم البخلي الناس تخلط ما بين انو الظلم دة ما من البلد لكن من النظام الحاكم و اخيرا احب اقول انو السودان اجمل و اعظم بلد ممكن تكون فيهو.

    2. يا عمك تنقو بالغت عديل كده وين قاطع الأخبار ومن طرفنا تقبل تحيات محمد المنسي

  11. دخل الينا عمك تنقو برأي ارجوا من الجميع الانتباه الى ان الوطن فوق الجميع وكلامه صح مية بالمية والا شنو يا جماعة القمردينة والا القمردينة راح تحلو جميع السمار بالقمردينة يحيون عمك تنقو وجميع الصبيان

  12. اخي شرقاوي كل المسالة كنا عاوزين نعرف عمك تنقو دا فصيلته شنو اما مرارات الظلم حدث ولا حرج وجماعتنا ديل ما سائلين ي االيهود ديل ابليس استعاذ من طريقتهم في الحكم وربك يكون في عون محمد احمد الناس بتقول اسوأ نظام حكم السودان وانا بقول اسوأ نظام منذ تاريخ الخليقة

  13. يا عم جيبلي واحد بس مش شمتان بس كنا عاوزين نسبر غور صاحبنا عمك تنقو

  14. والله يا بروف المرة دى البرنجية كانت قوية وفاتت الكمونية بى مسافات

  15. كان عنترة حرد أكثر و أكثر لو عرف أن زمان عنتر و عبلة انتهى ، وما صار فيه حب ولا خرابيط هالأيام ، وصرنا نعيش في حرب مع حرب و أن الذين يغيرون علينا هم أولاد عمنا و أولاد خالنا ! قبل أن يغير علينا أعداء بلاد الإفرنج يا رجل

  16. عنتر علي الاقل عربي ندرس تايخه ولكن يا اخ العرب الم ترا الفرس الذين جاو بعد الضربه لحمينتا والله قصه

  17. الخبر الأكيد … عنتر بقى مؤتمر وطني

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: