طب الزمن الأغبر

عزيزي القارئ الكريم .. ربما يكون قد طرأ إلى علمك في يوم من الأيام أن إدارة أحدى المستشفيات قد قامت بفصل (طبيب) عن العمل لتقاعسه أو إهمالة في نجدة مريض تستدعي حالته التدخل السريع ولكن هل نما إلى علمك أن إدارة مستشفي قد قامت بفصل طبيب لأنه تسبب في إنقاذ مريض من الموت ؟
هذا ما حدث في هذا الزمان الاغبر الذي تحولت فيه هذه المهنة الإنسانية إلى تجارة وشطارة همها الأوحد جمع (الفلوس) .. تعالو معاً لنتعرف إلى القصة والتي جاءتني عبر رسالة ثم مهاتفة من إحدي بناتنا الطبيبات ..
أستاذي الكريم الفاتح جبرا
تحية وسلاماً
الدهشه كلمه لا استخدمها كثيرا.. لأن الواقع فات حد الدهشه.. و لكن ما سأقصه عليكم اليوم وسع نطاق الواقع المدهش فى نظرى.. و غير بعض موازنات الانسانية التى أراها فى ربوع بلادى.. ليقف (التاجر) لا (الانسان) على حيثيات هذا الحدث..
فى زاوية فى صالة الطوارئ بإحدي مستشفيات الأطفال (الخاصة) .. كانت (تجبد) فى نفسها بصعوبه.. بت خلينا نقول كبيره (عشان حتة الكبر دى فيها فهم نشوفو بعدين).. جاءت للمستشفي مرافقه لواحد من الأطفال المرضى.. زاد عليها ضيق النفس.. كانت فيما يبدو تعاني من أزمة (ربو) حادة .. كان ليها وافر الحظ فى النجاة منها.. لأنها قد جاءتها فى المكان المناسب (مستشفى) على الرغم من إنو في ناس شافوهو ما مناسب..
قامت إحدى زميلاتي (الطبيبات) مسرعه لنجدة البت الكبيره (نشدد على الكبيره دى تانى).. مستحضرة الواجب المهنى و الأخلاقى تجاه كل مريض.. بعيد عن حسابات الماده.. و برتوكولات التخصصيه وكان أن قامت بإسعاف المريضة على الوجه الأكمل غير أن (مدير المستشفي) كان عندو فهم تاااني
– يا دكتوره انتي ما ينفع تشتغلى معانا خلاص..
– ليه؟ حصل شنو انا ما فاهمه؟
– نحنا أخلينا طرفك و حتاخدى مستحقاتك كلها .. ربنا يسهل ليك فى مكان تانى
– انا ما سألتا عن مستحقاتى .. انا بسأل المشكله شنو؟
– بصراحه كدا إنت أخليتى بسياسة المستشفى وعالجتي ليكي حالة ما تبع المستشفى
– الواحد لما يعالج ليهو مريض بين الحياه و الموت بكون اخل بسياستكم!!
– خليكي (إسبيسيفك) يا دكتوره.. انتى أيوه عالجتى عيانه لكن العيانه دى ما تبعنا..
– الحالات الطارئه مافيها تبعنا و ما تبعنا!!..
– اها دى (اللخبته) البقول ليكي عليها.. مريضه كبيره تمشى تتعالج فى مستشفى كبار..
(بااااااااااااس – عزيزي القارئ- دى قصة الكبر البنقول عليها من قبيل.. كبرك يحدد مصيرك فى حضرة مستشفى ………………… للأطفال/ الخاص )
– ما كان حتصل إنتا عارف الأزمه براك!!..
– أيوه عارف خطورة الأزمة و أى حاجه لكن اللوائح لوائح.. انتي يا دكتورة اخدتي من زمن الاطفال العيانيين..
– كان أخليها تموت يعنى!!
– يا دكتوره البكتل اليوم.. عيانينك أولى بإهتمامك.. إتفضلي أمشي أخدي مستحقاتك ربنا يسهل عليكي
أستاذي العزيز :
ماذا أنت قائل ؟
إبنتك الدكتورة (س)

الرد :
نقول شنو؟ حسبنا الله ونعم الوكيل

كسرة :
ألم أقل لكم أنه زمان اغبر؟

كسرة ثابتة :
أخبار ملف خط هيثرو العند النائب العام شنو(ووو ووووو ووو)؟ – قريبا الإحتفال بالذكرى السنوية-

Advertisements

44 تعليق

  1. برنجيييييييييييييييييييية

    1. الليله عاد اتقدّل فيها ،، الموضوع عشان بخسك وكده آآآي

      1. هههههههههههههههههههههههه,,,قدلة يا مولاى حافى حالق ,,
        وجع,
        والله دخل تبالصدفة ولقيتلك البلد خلا , قبال اقرا اخدت انفاسى وريحت احساسى ! وى

    2. برنجية الهنا يا دكتور شنباتى,, بس انتا رايك شنو فى افلام الدكنور دة !!!

      1. عاد دى عايزالا راى !!

    3. شمباتي انا جارك وفي نفس الخط وعلى شارع المعونة(المعونة الامريكية ها) تخميسه بس الله يخليك يعني ما ممكن كده برنجيات على طول

  2. الله لا كسبو عافية المدير دا ,
    لكن والله فى اصعب وازفت من كدة ,,
    لو انت انقذت حياة انسان وصرفت ليهو دوا من الصيدلية عن طريق الطوارئ وما كان ضمن قائمة الادوية بدفعوك القروش انت !
    ووالله بعرف مسشتفى بمنعك انك تدخل عملية زائدة او كحت (ودى عمليات مستعجلة) لو ما العيان دفع القروش والا ح يدفعها الطبيب الغلبان !
    حيكومة الكضب والصهينة..

  3. يا أخوي الفاتح جبرا أنت كان جيت للجد الطبيية دي الوداها تعالج المرة الكبيرة في مستشفى الأطفال شنو مالها ومال المشاكل أهو دلوقت فقدت وظيفتها

    Dr. Ammar Mhagoub Mohammed Zaki

    1. يا دكتور عمااااار ،،
      أكيد إنت بتهظّر !!! صاح ؟

      1. امكن بهظر او يكون هناى !

      2. او يمكن هو الدكتور زااااتو اللى فصل اختنا و بتنا (س) !!!

      3. هههههههههه,,طبعا اكتشفت انو الاخت (س) هى زميلة وصديقة !!!

    2. طبعا يا ياسين عجبتني كلمت هناي شديد يديك العافييه والله

  4. حسبنا الله ونعم الوكيل

  5. خلينا من الظرف الأخلاقي والقسم الطبي وين ذهبت المروءة السودانية
    الزمن انقلب وشفنا المآسي عيان ‏

    1. آآآآآآآآآالطيب ود بخيت امانة ما انت طيب والا كنت بره البلد

  6. السؤال اللي بطرح نفسو ، هل المدير عندو صلاحيه الفصل والله صحي زمن أكحل واكثر من أغبر والواحد بس يعمل شنو وإذا كتب الله له أن يمرض،تعالوا شوفوا الشفقه والرحمة في هذا البلد الذي قدر لي الله بان اعمل فيه طبيبا وليس أعمالا حره، طبيبا خارج بلادي وأعمال حره في بلادي،، صحي زمن مهبب

  7. الرد يا بروف في أول رسالة أختنا الطبيبة : “الدهشه كلمه لا استخدمها كثيرا.. لأن الواقع فات حد الدهشه.. ”
    … عارف يا بروف و الأحباب و أختنا الدكتورة و زميلتها : حقيقه “في ناس و ناس” ؛ و عكس القصة في قصص إنسانية نبيلة شديد بس “مجهولة” لأنو أصحابها من الأطباء همهم العند الله و بينهم و بين ربهم و بس .. اختصاصيين و عموميين و امتياز أخلاق و مواقف واجب و ضمير و نبل و انسانية و أمانة.
    فالخير موجود بحمد الله .. و البشر فيهم و منهم حتى الأطباء
    و تصرف مدير المشفى الخاص خاطيء انسانيا و قانونيا قبل الصحة ذاتها .. فالحالات الحرجه داع للتدخل الاسعافي إن توفر دون أي تمييز بأي شكل كان.
    و ما قامت به الطبيبه هو واجبها و الأمانة و عند الله خير الجزاء

    1. يا بروف في دول “بس قليلة” الصحة و التعليم فيها “مجان” ..و دا الصحيح لأنها دول عارفه إن المواطن هو “راس مالها”
      و في دول “و نحن منها” التعليم و الصحة تجارة و شطارة !!
      و سبحان الله .. كأننا نحن من يهبُ الشفاء حتى نتاجر في الدواء !!!

      1. حسع يا بروف و الأحباب “السودان الفضل” فيهو كم “وزير صحة”؟!!

      2. اخي محمد حسن دول كثيرة اغلب الدول العلاج والتعليم مجان وقليييييييييييييييلة عكس كده والا انت قاصد برضه عكس كده نحنا ما الصحة والتعليم كل حاجة مفيش مجان ولو رجعت لاقتراح البروف جبرا هناك دراسات تعد لبيع الهواء بمساحة المنزل وربي يكذب الشينة

    2. امشى يا اشعث يا اغبر !
      بس اوعك تدعى على ,, ههههههههه..

      1. ياسين الحبيب 🙂 بدعي بس “ليك” يا طيب 🙂

      2. لا خلاس ,,, طمنتنى اي حبيب ,,,
        والله يشهد انى احبك فيه ..

      3. يدعو عليك ليه هو انت عملت حاجة يدعو على امنا الغولة

  8. يروى “الله ينصر الدولة العادلة وإن كانت كافرة، ولا ينصر الدولة
    الظالمة وإن كانت مؤمنة”
    وجاء في فصل “الظلم مؤذن بخراب العمران” في مقدمة
    ابن خلدون: أن الظلم وتضييع الأمانة وإهدار الحقوق هي معالم
    الخراب والهزيمة
    والطيرات التي تأتي وهي طافية أنوارها خير دليل على ما
    آلت إليه دولتنا المؤمنة

    1. ياخي قال الطيرات هم ديل اقل من ابرهة بي شنو

  9. طبيب، مدير مستشفى والبكتل اليوم؟

  10. دكتور عمار زكي كلامه صاااااااااح مليون في الميه، والدكتورة غلطانة مليون في الميه، خلي المريضة تموت وخلي الشعب كله يموت والله يحفظك يا البشير انت وشلتك وللامام يا بلد المشروع الحضاري

  11. اها البشير ما شافه فى نفسو .. واحسن حاجة عملها انو لحق نفسو واتخارج من البلد وجرى للسعودية .. بالله لو سألنا ده ما اعتراف واضح من أكبر راس فى البلد انو بلدنا دي مفروض يقفلوا وزارة الصحة ويلغوها وان ما فيها علاج ولا مستشفيات زي الناس ، اهو الراجل عندو امكانيات وسافر للسعودية لا محتاج تأشيرة ولا عمرة ولا حجة وزوغة ، ومال الناس الغلابة تعمل شنو تموت بحسرتها قبل مرضاها ..
    تاني حاجة مفروض وبالأصح أنو الوزارة المحلية تفتح تحقيق مع مدير المستشفي الحلف قسم أبقراط ( يمكن يكون مدير ساكت لكن ما طبيب – بتحصل وكده فى الزمن ده ) علشان يعرفوا الخطأ المرتكب من الطبيبة شنو ، هل الحالات الإنسانية عاوزه ليها لوائح وقوانين .. المفروض المدير يستغل الإجراء القامت بيه الطبيبة – لو النظرة مادية زي ما بيعتقد – يقوم يعمل منو دعاية مجانية أو خبر فى صحيفة (( مستشفى أطفال ينقذ واحدة ما طفلة من الموت )) والغبي فكر بمنظور ضيق زي ما كل المسئولين بيفكروا وهذا دليل على انو فاقد لأبسط اساسيات الإدارة وده مفروض مجلس ادارة المستشفى لو ناس بيهما القرش زي ما بيقولوا تكرش المدير لانو ضيع عليها فرصة كان ممكن يستغلها لصالح المستشفى ، لكن ما الزمن ده الناس بقت تعاين لللوائح كانها قرآن منزل وغير قابلة للإختراق .. يا جماعة أصحوا شوية وفكروا قبل ما تقرروا أي قرار …. ومدير غبي زي ده والله افصله من العمل بدون مستحقات ، بس المشكلة ممكن يكون هو زاتو صاحب المستشفى وتبقى المصيبة مصيبتين. جزاءك الله خيراً يا دكتورة وربنا حا يعوضك وأصلو ما حتندمي وهل جزاء الإحسان إلا الإحسان

    1. بس يا خوي البشير ما بركبوا ليهو الدرب وقافي ودي شاهدتها في حوادث مستشفى بحري

  12. القضية ليست قضية الدكتور .. الكثيرمن المهن تتجنب شيء مهم ,وهو عدم إضافة برامج تدريبية تختص بخصوصية المهنة ..فلابد من علم الإدارة .. الإدارة التنفيذية تطوير المهارات القيادية , هي تتناساها وزارة الصحة ,ووزارة الحكم المحلي ,ووزارة الرياضة والشباب ..لو كان هذا المدير الذي أخذ هذه الوظيفة بقدراته المهنية في الطب ,أو بشهاداته كدراسات عليا كان الأجدى على المجلس الأعلى للشئون الطبية أن يدعم الأطباء بمهارات علم الإدارة ,وإدارة الوقت ,والجودة الشاملة ..حتى يكون الطبيب مكتمل في كل زوايا المهنة .. هي القضية الأساسية التي نخفي ورائها العطن الطبي .. لهذا تظهر علامات الشد والجذب وندور حول تراجع مهنة الطب , وتظهر قضايا تتجاذبها الحمية والإستقطاب … ه يا بروف .حتى لا تضيع الحقيقة وراء الصراع السياسي سواء السلطة أو المعارضة والجميع يذهب بعيداً ..في مناقشته للمشكلة .. OFF POINT مع تحياتي

    1. طيب لو كان المدير ده صاحب المستشفى وما طبيب ؟؟ كما ذكر أبو غسان يعني رجل ما مناسب في المكان المناسب …. عادي جداً
      من هذه المعطيات ياأخ حمد النيل أذكر لنا رجل واحد مناسب في المكان المناسب في طول البلاد وعرضها

      1. ههههه انا اعرف صاحب مغالق عنده مدارس

  13. أنا جديدة معاكم وصراحة مامصدقة البحصل
    دا وإحتمال يكون فيهو تهويل لأنو السودان لسة بخير والأخلاق الفاضلة لسة موجودة وهي عنوانا نحنا السودانيين – يا جماعة الخير ممكن يكون حصل؟

  14. فى احدى زياراتنا لاحدى دول الخليج, واحد من الشباب العزابة اللى معانا اتسمم بمكرونة باللحمة المفرومة (من طفاستو) جرينا بيهو لاقرب مستشفى و كان مستشفى خاص, و هناك فى الاستقبال سألونا عندكم تأمين؟ قلنا ليهم لا. قالوا يبقى لازم تدفعوا مقدما و بعدين نشوف ليكم الدكتور,, قلنا ليهم مافى مانع بس دخلوهوا الان الشاب قاعد يستفرغ و بطنو ماشة,, فرد الموظف بأنه لا يستطيع و ممنوع دخولكم قبل الدفع, فانفعل احد الاخوان اللى معانا رفع صوتو و راح رامى ليهم محفظتو كلها قاليهم شيلوا العايزينو بس اسعفوا لينا الزول دة. و على الاصوات العالية جاء المدير المسئول و عرف الحاصل, و لدهشتنا وجدناه يأنب موظف الاستقبال و شوية كان حيديهو كف, و ورجع لينا المحفظة و وبنفسو دخل معانا للدكتور و وصى علينا, و جانا راجع تانى بعد مدة و اطمن على مريضنا.. و اخر شئ لما زولنا اتعافى قالينا بعد دة ممكن تمشوا الحسابات و تشوفوا حسابكم كم.. مغزى القصة انو و مع وجود لوائح بالدفع المقدم لغير حملة التأمين, الا انو الحالات الانسانية و المستعجلة مستثناة و للمدير او الموظف المسئول حرية اتخاذ القرار لانقاذ و اسعاف المرض,, مش فصل الدكتور اللى بيقوم بواجبو الانسانى.. و للامانة كل البلدان اللى لفيناها فى شغلنا, ما قاعدين نتعب غير فى بلدنا الحبيب دة ,,, و عجبى !!!

  15. محمد الخضر (برسسر دوم ) | رد

    تحياتنا الحارة واشواقنا …
    اولا …
    للبروف جبرا قائد الاسطول وانشاء الله الصحة عال العال …
    ثانيا …
    لرواد القمردينة القدامي ونذكر منهم افليقا و د. شمباتي , عزت بقي ريتش , ود الزبير , عبدوش , سمسمة ,سترايكر , حاج احمد السلاوي , وكل من لاقيناهم في رحلة الجريف التي لا ولن تنسي ابدا ومن لم نلاقيهم ولم نذكرهم فلهم العتبي حتي يرضوا …
    وكذلك لكل الاعضاء الجدد …
    لنا عودة …

    1. وعليكم السلاااام ورحمة الله يا بروسيسور….
      ما عافين ليك كلو كلو !!

      1. محمد الخضر ( بروسسر دوم )

        ليه كده يا دكتور شمباتي ….والله في البال والخاطر
        لكن الحكاية صعبة جدا وفي بلدنا بلد العجايب دي اصبحنا عايشين وما عايشين والسنين جارية شديد والحياة راكضة جدا والماسي كثيرة وربنا يعيننا …
        وانشاء الله بنحاول ما ننقطع كتير ….

  16. الاخوة السمار الشغلانة والله وسعت زي ما بيقولوا اولاد بمبه اوي ودايرا ليها ميدان تحرير

  17. أصدرت وزارة الصحة السعودية ممثلة بالمديرية العامة للشؤون الصحية بمنطقة الرياض اليوم الأحد قرارات بمعاقبة عدة منشآت صحية بمدينة الرياض تضمنت الإغلاق لمستوصف رفض استقبال المراجعين بالطوارئ

  18. لا لا ما تجامل يابروف الدكتوره غلطااااااااااااان من ساسه لى راسه كانت تسيب البت تموت وخلاص والله كريم عليها ده كلام غريب دحين ممكن جات تعليمات انو اى حاله زى دى يودهو الزيتونه ( زيتونه عمك دااااااااك )

    زمان ابوي الله يرحمو لمن يحتار في شى يقول ليك دى حاجه تحير السفها عجبي

    1. اخي ابراهيم عوض لوالدكم الرحمة بس لو طال بيهو الزمن للوقت دا ما كان قال حاجة تحير السفها كان قال حكم كثيرة ويمكن ربنا لطف بيهو قبال ما هم يجو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: