الإختشو

تنبيه :
عزيزي القارئ : لو كنت ممن يعانون أي مشكلات لها علاقة بالقلب أو البنكرياس أو الفشفاش أو المرارة (أخد الحبوب بتاعتك) ثم إقرأ معي هذا الخبر الذي جاء بالأمس :
• عاد إلى الخرطوم الإثنين 12 نوفمبر السيد رئيس البرلمان السوداني أحمد إبراهيم الطاهر بعد لمشاركته في أعمال المؤتمر الخامس عشر لمحاربة الفساد والذي عقد في العاصمة البرازيلية برازيليا في الفترة من 7 -10 نوفمبر الجاري وفي مداخلته أوضخ السيد رئيس البرلمان كيفية السبل وخلق الآليات التي إتبعها السودان في القضاء على الفساد والتلاعب بالمال العام .
إذاً لا تندهش عزيزي القارئ لو أنه قد جاء في الأخبار :
• عاد إلى الخرطوم السيد رئيس الهيئة العامة لمواصلات العاصمة بعد مشاركته في أعمال الندوة العالمية التي نظمتها الهيئة العالمية للمواصلات الداخلية في المدن والتي عقدت في العاصمة البلجيكية (بروكسل) وفي مداخلته أوضح السيد رئيس الهيئة العامة لمواصلات العاصمة (كيفية السبل وخلق الآليات المتبعة في السودان) في مجال المواصلات الداخلية مما جعل العاصمة السودانية ترشح كأفضل عاصمة في درجة إنسياب وسهولة حركة الباصات والحافلات والأمجا(دات) .
• عاد إلى الخرطوم المدير العام لشركة مياه الخرطوم بعد مشاركته في أعمال المؤتمر العاشر (عن صحة مياة الشرب) والذي عقد في العاصمة النرويجية (أوسلو) وفي مداخلته أوضح السيد المدير العام لشركة مياه الخرطوم (كيفية السبل وخلق الآليات المتبعة في السودان) في مجال تنقية مياه الشرب وتحديث الشبكات وإستدامة وتوفر المياه النقية للمواطنين .
• عاد إلى الخرطوم وزير الصحة السوداني بعد مشاركته في أعمال الندوة العالمية لوزراء الصحة في العالم والتي عقدت في العاصمة الفنلندية (هلسنكي) والتي جاءت بعنوان (إدارة المستشفيات العامة) وفي مداخلته أوضح السيد وزير الصحة (كيفية السبل وخلق الآليات المتبعة في السودان) والتي جعلت من المستشفيات العامة السودانية مثالاً عالمياً يحتذى به من حيث توفر الخدمات الصحية وجودتها الشئ الذي جعل دور المستشفيات الخاصة يقل لدرجة الإنعدام .
• عادت إلى الخرطوم وزيرة الرعاية الإجتماعية بعد مشاركتها في أعمال الندوة العالمية لوزراء الرعاية الإجتماعية في العالم والتي عقدت في العاصمة النمساوية (فيينا) والتي جاءت بعنوان (الضمان الإجتماعي للمواطنين) وفي مداخلتها أوضحت السيدة الوزيرة (كيفية السبل وخلق الآليات المتبعة في السودان) والتي جعلت المواطن السوداني لا يخشى الكبر أو المرض أوالعطالة أو الخروج إلى المعاش !
• عاد إلى الخرطوم وزير الطرق والكباري السوداني بعد مشاركته في أعمال الندوة العالمية لوزراء الطرق والتي عقدت في العاصمة السويدية (إستكهولم) والتي جاءت بعنوان (نحو طرق آمنة) وفي مداخلته أوضح السيد وزير الطرق والكباري (كيفية السبل وخلق الآليات المتبعة في السودان) والتي جعلت من الطرق الداخلية وطرق المرور السريع تتفوق على جميع الطرق في أنحاء العالم من حيث الجودة العالية والإلتزام بالمواصفات العالمية .
• عاد إلى الخرطوم، وزير الزراعة السوداني بعد مشاركته في أعمال المؤتمر الثالث عشر لمنظمة الأغذية والزراعة العالمية والذي عقد بالعاصمة الإيطالية (روما) لمناقشة المشكلات الزراعية في العالم الثالث وفي مداخلته أوضح السيد وزير الزراعة (كيفية السبل وخلق الآليات المتبعة في السودان) والتي جعلت من البلاد ( سلة غذاء العالم) .
• عاد إلى الخرطوم رئيس الإتحاد العام لكرة القدم بعد مشاركته في أعمال الندوة العالمية للإتحاد الدولي لكرة القدم والتي عقدت في العاصمة السويسرية (جنيف) والتي خصصت لمناقشة ظاهرة (شغب الملاعب) وفي مداخلته أوضح السيد رئيس الإتحاد (كيفية السبل وخلق الآليات المتبعة في السودان) لمحاربة هذه الظاهرة مما جعل الجمهور السوداني يرشح لجائزة (السلوك الراقي) للعام 2012م .
• عاد إلى الخرطوم، وزير الأوقاف والشئون الدينية بعد مشاركته في أعمال المؤتمر التاسع عشر للمجمع الإسلامي العالمي والذي خصص في دورته هذه لمناقشة (التسهيلات التي تقوم بها الحكومات الإسلامية لحجاج بيت الله الحرام) وفي مداخلته أوضح السيد وزير الأوقاف والشئون الدينية أن وزارته لا تتاجر بهذه الشعيرة الدينية وأنها وزارة خدمية تنشد الثواب من رب العالمين !!

كسرة :
عليكم الله الناس دي مش بتبااااالغ !! هسه لو البرازيليين ديل سألوهو (مثلاً) عن أخبار (الخط) وللا (الأقطان) وللا الشنو ما عارف .. يقول ليهم شنو؟ صحيح الإختشوا ماتوا !!

كسرة ثابتة :
أخبار ملف خط هيثرو العند النائب العام شنو(ووو ووووو ووو)؟ – قريبا الإحتفال بالذكرى السنوية-

Advertisements

31 تعليق

  1. ههههههه لاول مره اكون محظوظ

    1. إن شاء الله ديمننن

      1. دايمن لع !!

    2. لاول مرة و ان شاء الله ما اخر مرة ,, بس ما تكتر منها عشان الادمان و كدة !!!

    3. ماعرفنا نصاقر البرنجية والا نصاقر المعايش على العموم مبروك عليك البرنجية من قلبي

  2. shadow لكن ما بالغت عديييييييييل

  3. اعمامنا الليله شكلهم انصرفوا لمواضيع اشد اهميه هههههههههههه

    1. ما فى مواضيع اهم من اللى عايشنو فى بلدنا دة,, بس و عملا بتنبيه البروف مشينا نكوس حبوب الضغط و السكرى و الفشفاش و البنكرياس ,, و تصدق بعد دة كلو ما نفع !!!

  4. البروف الحبيب
    الله إسالك نحن شاركنا في مؤتمر مكافحة الفسااااد !!!! وكمان زاعوهو خبر عديييييييييل

    ياناس ألحقووووووووني أنا عاوز أموت من الضحك

    1. يمكن شاركنا كعينة يا المندهش وطبعا رئيس البرلمان ده يمثل الفساد احسن من الفساد ذاته

      1. عينة يا جنوبي ؟ نحن ما أهل الساس والرأس في زول زينا ولا بلحقنا ؟ أشييييييشششش
        لكن تصدق احتمال كبير يكون المؤتمر ده إسمو ( تعلم فن الفساد واللعب بالعباد ) عملناهو نحن عشان نعلم الدول التانية

    2. بعض المسئولين يحبوا يظهروا فى الاعلام باى حاجة, و هناى دة لو كان عارف البروف و الزيكم انتوا يا ناس القمردينة قاعدين ليو بالمرصاد, ما كان ابدا خلاهم يعلنوها ,,

      1. المهم كبير اخوانو (ما بتاع الضحيه) بدون حلقوم يعني ثاني ما راح نسمع جوعير ولا رفع عصاية كده ممكن الحبوب بتاعت الحاجات الفوق تنفع

  5. عادي ممكن كمان ناس الحكومه اشاركوا في مؤتمر العفه و الاخلاق خصوصا كل يومين قابضين واحد شيخ في شقه مع بنيه(او اتنين -تلاته) قدر بناتو!!!!

    1. قدر عمر والا قدر عدد الحقوني بالفهامة

  6. عاد الوزير اللي متزوج أربعه بعد مشاركته في مؤتمر تعدد الزوجات،،.. دي صحي موجوده

  7. كلامك ده كلام الطاير في الباقير وكلو حام في حلم والله كريم علينا

  8. عزيزي البروف
    إحدى حلقات الفساد التي يجب التركيز عليها هي المشاركات
    التي يقوم بها المسئولين، وهي مشاركات مكلفة لخزينة الدولة
    التي تشتكي أصلاً من شح العملات الصعبة، أضف إلى ذلك
    المؤتمرات التي تتم بشكل يومي وأتحدى أي اتحاد مهني
    أو مؤسسة حكومية لم تعقد مؤتمراً تدعو له العباد من مشارق
    الأرض ومغاربها وعلى حساب خزينة الدولة أيضاً

  9. يعني الشهر الفات البلد ماكان فيها مسؤولين ولا شنو

      1. مسعول كبير فى الحلة غير الله انعدم….

  10. يا شباب الرئيس قال العندو اثبات و دليل على الفساد اليقدمو طيب مافي زول قدم دليل و النعمة الهم فيها تحت عنوان هذا من فضل ربي طيب الفسااااااااااااااااااااااااااااااد وييييييييييييييييييييين يا ناس (العندو دليل اليقدمو)

    1. يا شرقاوي قول ليهو وفي أنفسكم افلاتنظرون ¡

      1. نظر ساكت زي الطيارات هع

  11. كلو معروف لكن معلومات غنية عن عواصم الدول

  12. نحن الحمدلله ما عندنا حاجة من الامراض الذكرتها دي…….لكن اسي انا حاسي بي حاجة كدة مااااااا طبيعية في قلبي بعد مقالك دة …انت يااستاذ عايز تقضح الناس ديل ا و عايز اقلاه تصحي ضميرهم المات..لكن انت ما عارف قاعد تعذب فينا وتبكينا علي الحال البقينا فيه والوصلت ليهو البلد …..سبحان الله..!!!!!سؤال برئ:اسي ناس الحكومة ونحن واااااحد يعني زينا كدة ناس عادية؟؟والا في حاجة تميزنا نحن ماااااعارفينا عشان ما نشيل كمان حق الناس المسكينة دي؟؟؟؟؟؟؟؟؟!!!!!!!!!

  13. بيان هام يا جماعة الخير انحنا اهل القمردينة دي نطالب زي كل الحركات بقطعت ارض صغيرة قدر لبنان او قطر او اي دولة صغيرة وننادي كل القمردينية وندخل في تحدي مع امنا الغولة اننا راح نطوره وبعد ما يتم نسلمو ليهم ونمسك واحد جديد لحد ما نصل حدود 56 وبعد كده نشاور الجنوبيين يمكن يغيروا رايهم في نيفاشا وكمان الحركات الثانية لما تشوفنا عملنا ايه في قطعة الارض يمكن ربي يهدي بالهم والحكاية كده تسلك يعني بعد كام سنة كده واهو احلام في ظل الواقع الوهم البنعيشوا ده

  14. وعاد الي البلد السيد مدير الهيئه العامه للطيران المدنيمن العاصمه الالمانيه برلين بعد مشاركته ف ندوه تحت عنوان السلامه الارضيه ووسائل الامان وكيفيه حماية الطائرات من المواطنين الماشين ساي وبدقشو ف الطائرات ديل…
    اغرب حاجه ف البلد دي إنو الطيارات السودانيه بتقع؟
    والفرق السودانيه بتطير!!

    1. قوية جد جد حلوة الطيارت بتقع والفرق بطير بس مناي اشوف الحكومة بتزحف يبقى كملت هع

  15. ا ثناء قراءني للقران و في سورة يونس الاية (21) قابلتني هذه الاية . بسم الله الرحمن الرحيم (واذا اذقنا الناس رحمة من بعد ضراء مستهم اذا لهم مكر في اياتنا فل الله اسرع مكرا ان رسلنا يكتبون ما تمكرون ) صدق الله العظىم . وانا اقول لهولاء اذا قابلتكم هذه الاية ووب واذا لم تقابلكم فووبين.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: