البرنامج الأوتوماتيكي (من الأرشيف)

دأبت الحكومة على إجراء بعض التعديلات الوزارية بين الحين والآخر والتي لا تعدو إلا أن تكون مجرد (تنقلات) – من هنا لى هنا- منفقة فى ذلك بعض الجهد والوقت و(المساحات الخبرية) والتهاني والتبريكات على صفحات الصحف والأثير ، ولان (العبدلله) مقتنع تماما إلى أن المسألة غير محتاجه و(مش بدها) كما يقول إخواننا (الشوام) فقد تفتق ذهن العبد لله عن إقتراح بسيط يعفي أولى الأمر عن مسألة الجهد دى ويقوم بحسم المسألة بدون أى (تعب) أو إهدار وقت يحتاج إليه (الوطن) من أجل بلوغ ذرى المجد !!
والإقتراح وما فيهو هو ان تضع (الحكومة) طالما انو شايفه نفسها قاعدة ومتوهطة (والزارعنا غير الله يجي يقلعنا) أن تضع جدولاً دائرياً (سنويا) على مدى (الثلاثين سنة القادمة) يتم بموجبه (تنقل) الوزراء فيه (أتوماتيكياً) يعنى وزير (الزراعه) السنة الجايه يمشى وزير (داخليه) والسنة اللى بعدها وزير (خارجية) واللى بعدها وزير ( ثقافة) وهكذا على أن يذهب وزير (الثقافة) إلى (الخارجية) والسنة اللى بعديها وزير (داخلية) واللى بعديها وزير (إعلام) وهكذا .. ولا غبار أن يرتاح الوزير بعد تنقله عبر كل (تلاته وزارات) وياخد ليهو (إستراحة محارب) إسبوعين تلاته يرتاح فيها من (وعثاء السفر) ، ولا شك أن وضع هذا (البرنامج الأتوماتيكى) له من الفوائد التى تجنيها الدولة والمواطن على حد سوا الكثير على الأقل فإن الوزير الفلانى ح يكون عارف روحو (فى السنة الفلانية) ح يكون وزير شنو!! وعلاوة على عدم إهدار الوقت فى التشاور و(التناصح) والتحنيس واللازم منو وإصدار المراسيم عند كل تعديل ففى هذا البرنامج يتم إصدار (مرسوم واحد) فى بداية البرنامج يحدد لكل وزير (جدول بإسم الوزارة التى سوف يعتليها فى بداية كل عام خلال الثلاثين سنة القادمة) .
ومن إيجابيات هذا البرنامج أنه سوف يتيح (للوزراء الأماجد) التنقل بين كل بقاع الدنيا والأخذ من تجاربها مما سوف يكون له بالغ الأثر فى إثراء تجربتهم فالمسئول عن وزارة (الصناعة) لابد أنه سوف يقوم بزيارة البلاد الصناعية كاليابان والصين وسينغافورة ولكن بعد توليه فى العام التالى لزمام وزارة الطاقه فسوف يشمل جدول زياراته أمريكا وكندا وفنزويلا وكافة الدول المصدرة للبترول أما عند تقلده (للحج والأوقاف) فهو بلا شك إلى (البيت الحرام) سائر وبإسرته معتمر !!
ولعل من أبرز فوائد هذا التنقل الأوتوماتيكى هو قلة الأخطاء التى يرتكبها الوزير وهو يضطلع بمهام الوزارة المعنية (فى سنة واحدة) إذ انها بلا شك سوف تكون أقل كثيرا ما إذا كان وزيراً لتلك الوزارة لأعوام طويلة ..
يعنى كل وزير ممكن (يجلط) جلطه جلطتين تلاته فى السنة ومفيش حد يحس بيهم لحدت ما يروح يمسك الوزارة التانية !!
ومن أبرز فوائد ومميزات هذا البرنامج الأتوماتيكى لتنقل السادة الوزراء هو إتاحة الفرصة كاملة لمعرفة فى أى وزارة يجد السيد الوزير نفسو … فالوزير بلا شك (بشر) .. والبشر لديهم ميول ومواهب ومقدرات لا يمكن التعرف عليها إلا عن طريق (الممارسة) الشئ الذى يقوم به هذا البرنامج (الأتوماتيكى) فبعد أن يقوم (السيد الوزير) باللف على جميع الوزارات (التلاتين) يمكن أن يحدد (لقى نفسو فى ياتو وزارة) ويقول :
– بس خلاص … انا لقيت نفسى فى (المالية) دى !!
ولأن إنتقال الوزير (لدينا) يواكبة إنتقال لكل (الطاقم المساعد) لديه إبتداء من (السائقين) مروراً (بالسكرتارية) وإنتهاء بمدراء المكاتب فإن هذا البرنامج الأتوماتيكى من شأنه إنعاش سوق (الأثاث) فسكرتارية وزير (الخارجية) ستعمل فوراً على تغيير ألوان مكتب (سكرتارية وزير النقل) فور إنتقالها إليه لأن (أثاث النقل) ياعينى إندونيسى بينما هى تموت فى (الإيطالى) !!
كما أن مدير مكتب (وزير الغابات) الذى غادر ليتولى وزارة (السياحه) سوف يقوم فور إنتقاله للوزارة الجديده بتغيير العربة (الكامرى الزرقاء) موديل السنة التى كانت مخصصة لمدير مكتب وزير السياحه بأخرى (بيضاء) لأن سعادتو ما بحبش (اللون الأزرق) لأنو ما لون سياحى وكدا !!
بعد أن تكتمل دورة البرنامج بعد (تلاتين سنة) هى عدد الوزارات التى قام الوزراء باللف عليها يتم إصدار قرار بجعل ذلك اليوم (عطلة رسمية) تسمى عطلة إنتهاء (البرنامج الأتـوماتيكى لتنقلات الوزراء) ويقام على شرف ذلك إحتفال ضخم يتم فيها تكريم الوزراء على أنجازاتهم إبان توليهم لتلك الوزارات ومنح كل وزير (تلاتين) نجمة ( إنجاز) هى عدد الوزارات التى تولاها إبان برنامج التنقلات الأتوماتيكى

كسرة :
…. ثم يعلن فى نهاية الحفل بداية (البرنامج) من أول وجديد !!!

كسرة ثابتة :
أخبار مبف خط هيثرو العند النائب العام شنو(ووو ووووو ووو)؟ – قريباً الإحتفال بالذكرى السنوية –

Advertisements

51 تعليق

  1. برنجييييييييييييييييييييية

    1. دي كيتا فينا كلنا انت لابد ليها والا شنو عموما مبروك عليك البرنجية

      1. ههههههههههههههه,, اى والله لبدت ليها لبدة الجماعة للمصنع !
        اها لمن خليت شغلى والعملاء ذاتهم !
        هههههههههههههههه

    2. لاكين يا الشنباتى عملتا واضحة عديييل كدة ,, دة فى ناس من امبارح سهرانة و قامت الليل كمان عشان تلاقى فرصة فيها و جيت انتا جازفتها – لكن برافو عليك و بالهنا ,, و كيتن فى المابينا !!!

      1. هههههههههه,,دا بس عشان اوريكم بعضا من مقدراتى ! نيهااااااع هاااااع آآآآآآع

    3. البرنجيه دي غير شرعيه بطعن ف صحه امتلاك البرنجيه للشمباتي لعدم تطابق عدد اليائات ف برنجيه 20ياء والواوت ف هيثرو 10واوات

  2. كيتا فيك يا البروف ( ما جبرا طبعا) ,, ويييييييييييييييييييييي

    1. مبروك جبتها ليك من تحت الشدره

      1. هههههههههههههههههه,,يتباركن ايامك انت با الاخدر..

      2. خليها بالبمبي ياخ عشان اقول ليك مبروك انا برضو

      3. بالبمبييييي بالمبي ووب على انا ,,
        بالبمبى والجيش نقلوا من جنبى وووب على انا !!
        بارك سااااى يا الحبيب..
        هههههههههههههههههههههههههههه

      4. ياتو (شدرة) يا Obeid؟ لانو فى انواع كتيرة من الشدر,, اولا الشدرة الرمز بتاع ناس هناى, و فى الشدرة الجنب (اليرموك) و فى الشدرة البتقعد تحتها ست الشاى,, اهااااا انت قصدك شنو فيهن؟؟ و ما تقول لى قصدك شريف !!!

    2. لعبتها مووزة ،،،، ماشي الحال المرة دي بدون تصريحات

      1. هاها الاخدر الإبراهيمي بتاع الاماال الهره،تقول شربناها معااااااك هههههههج

      2. يا prof, المرة دى و المرات الجاية كمان لازم بدون تصريح خالس,, اصلو نحنا الجاينا اخر الصف شنو بلا التصاريح الكتيرة دة ,, احسن ليك اشتغل من سكات سااااى !!!

    3. خليتو الواااحد بدل يقرا المقال ويشوف الحاصل فيهو شنو يفتش للبرنجيات بتاعتكم دي ،،، هو دي المقالات الوحيدة البنفهما في السياسة دايرين تطفشونا منها

      1. ههههههههههههههههههههههههههههههههاااى,,ألرقدوا قش !

    4. الشالو ما يتني وما يشيل خلافه

      1. جنوبى….
        هيييييييي ,, انا ما شلت شئ!!!

        عبيد…
        هههههههههههههههههههههههه,,,اها سووها فوقى !! تشربوها هناك ترموها هنا

    5. عارف ان كيتا تتفهم مع المقال بالسياقين ههههه هع

  3. هي لله هي لله
    لا للسلطة ولا للجاه

    1. هي لله هي لله (ياخي قول هي للكنكنشة) وخليك واضح يا جميل تحياتي

  4. يا هوووووووووو الجنونى عملها و شرد ، زى ناس ياسر يا الشمباتى …………… عجبى

    1. كوكو لم يكن إلا فراق والتقينا انتو حاج السلاوي وود الخلا وخالد مدني وينم ?

      1. الحبيب كوكو….
        عجبا تلاقينا توائم فى رنين الاسم والذات الغريبة ,,,
        والعملوها كتاااار بس بقدروا يقيفوا ؟؟ وى..

        جنوبى….
        حاج السلاوى كان معيد فى امازونيا ورجع ونصييييييح علا لسانو بقى اطول !
        وود الخلا هنااااااااااااااااااك فى الخلا !
        وخالد مدنى مشغول مع عمو ابكرون بعد رجعتو من الحج ….
        تسال منك العافية انت….

      2. مرحب بيك جنونى و تانى بطل الغيبه فى دار البرف الشايلنا كلنا من زمن بيقوفتش الببطيخه و ابكرون محايات و كوكو بخرات عجبى و ق.م . البرف برنجى و شمباتى ووى يديك العافيه و حاج السلاوى Gut Geschmak تانى منو ق.م. غايتو جنس غايتو و الذى منو و تعابير ما انزل الله بها من سلطان …………………. عجبى.

      3. سلام ياقبيلة،،،،
        صديقي العزيز جنوبي، والإخوة الآخرين دوت كوم…
        شكرا” علي سؤالك عنا ونحن يوم تغيّبنا غبنا وفي الحلق غُصة وفي القلب حسرة، وإليك وإلي صديقي العزيز خالد ودمدني أقول لك وله ولكم أجمعين بما فيكم أولئك الغائيبين
        أنا ليتني أنتم
        في عالم الحس
        أشتاق في صمت
        وأحب في همس
        وأعود ان عدتم
        للمعبد القدس
        وتحياتي مجددا” لكم وأرجو التواصل

      4. ويحلو تلاقينا ويرف وادينا ويغني مزماري…..
        ترااالام…. ترمرم…

    2. كوكو…
      ههههههههههههههههههههههههههه,,وما تنسى ناس (ق*ش) ! آيييييييي

  5. وتبقي حكومه الكترونيه بحق و حقيقه بس شوف لينا طريقه في البرنامج ده توري الشعب متين ح يصاب بالضغط ومتين ح يصاب بالشلل يعني تكون زي الابراج والبرنامج يقول عندما يكون هناي وزير تجارة وعلان وزير ماليه ستصاب بالفلس الرعاشي وظبعا يوم عطلة اكتمال التنقلات ح يكون يوم السعد الوحيد

    1. ومتين ح يصاب بالقنبلة دي اهم حاجة نسيتا هع

  6. اهي… اهي…. تخلوني امشي الدوام و تنزلوا البوست؟؟؟
    ما ننوم نهنا يعني؟؟

  7. و اذا لم يرضي الشعب بهولاء الانذال . فعلي هولاء الانذال تغيير الشعب. بمعني نرجع الي مقال استيراد العرسان من الصين.وعليه ننتخب الخرطوم عاصمه للثقافه الاسيويه!!!

  8. يااااخ نحن كمان الوزرا بتاعونا سوبرمانات من وزاره لوزاره والسبب انو حوا السودانيه ما ولدت سوبرمانات زي ديل..
    وكمان الواحد علي الأقل بكون عندو اكتر من مرا.. وحوا السودانيه ما ولدت ارجل منهم.. وكمان أي واحد عندو اكتر من بيت ومن عمل شئ دولار وشي يورو وشي ين يونق.. لأنو حوا السودانيه ما ولدت ………. منهم.
    وزرا عجايز ومكلوجيييين وشينيييين شنا مورا

    1. ما والداهم امنا الحكومة هي سمحة ما الشين بلد شين عمرك شفت قردين ولدو ليهم ريم وي

      1. اولا مبروك ياالشمباتى
        للكن البروف ده مانسى قصة الطيارات البتكتل المسعولين ؟؟؟؟ فى الحاله دى الاوتو ما تك بشتقل كيف؟

      2. ابوعمر….سلام..
        يباركوا ليك سمحك وجديدك…

      3. يا راجل الحكومه ما قاعده تلد ، لو بتلد كان ده حصل لينا.؟؟؟؟؟؟؟؟؟؟؟؟……………. عجبى

      4. كوكو يا بتاع الولادة انت , هاك دى :-
        الليلة شفت الدعاية حقت (عشبة بن على) !
        فعليه اقترح انو يدوها لى (فلانة) تلبخها فى حلقها كان تنفع !
        واااااااااااااااااااااااااااااى,,
        حامضة حامضة حااااامضة ,, ههههههههههههههههههههههههه,,,
        مسا الاعشاب والبتاب وقطع الرقاب !!

  9. نقلا عن بروف الفاتح 🙂
    ====
    ومن أبرز فوائد ومميزات هذا البرنامج الأتوماتيكى لتنقل السادة الوزراء هو إتاحة الفرصة كاملة لمعرفة فى أى وزارة يجد السيد الوزير نفسو … فالوزير بلا شك (بشر) .. والبشر لديهم ميول ومواهب ومقدرات لا يمكن التعرف عليها إلا عن طريق (الممارسة)
    الشئ الذى يقوم به هذا البرنامج (الأتوماتيكى) فبعد أن يقوم (السيد الوزير) باللف على جميع الوزارات (التلاتين) يمكن أن يحدد (لقى نفسو فى ياتو وزارة) ويقول :
    – بس خلاص … انا لقيت نفسى فى (المالية) دى !!
    =======
    🙂 إبداع المضحك المبكي يا بروف و الله

    1. عارف يا بروف و الأحباب ما بعيد في (دورة تبادل الوزارات) و الأوزار دي يكون في وزراء (بشبكو) و يشبّكو : انا ما داير غير الوزاره الفلانيه و العلانية و لن أرتضي عنها بدلا !!!
      🙂
      و دا حصل حقيقة أيام (الشريكين) و شكلتهم على وزارات (السيادة) و الأسرار ديك ؛)
      .. “دايرين دي و ما بناخد دي” و “هاكم دي و ما تحلمو بدي”!!

      1. حسه يا بروف البرنامج الأوتوماتيكي ما (دورة إمتياز وزاري) عديل كده 🙂 🙂

      2. و طبعا في وزراء (بحردو) 🙂

      3. لكن عشان ما نظلم الوزراء يكفي ظلمهم لينا .. نختم القول : أن هنالك و طبعا (مواهب وزارية) مدفونه ما لقت فرصة تظهر تجلياتها علينا أو لمن جات تظهرها (جلُّوها) لينا 🙂 !!

      4. التحية للبروف و كل (الأرشيف) الساخر الموجع المضحك المبكي و التحايا لجميع الأحباب 🙂

      5. يا بروف الناس ديل ما بلقو لينا (فرقه) نتشنكـَّل فيها في (دورة المناصب) دي و نعلِّق فيها ؛)
        ما ياهو يمكن نلقى نفسنا في وزارة صحة و لا شباب و لا (الدفاع) ذاتها 🙂

      6. محمد حسن
        يا أخوي دي قسمة الحلال والدلال وبالتوالي كمان ( حردان ) ما معنا البروف قال ليك كل واحد بياخد فرصتو والعاوز ياخد فرصة وزير تاني يلحس كوعو

    2. انتو قايلين التنقل التوماتيكي ده ساي !!! الناس دي دايره كورسات ف الصين

  10. وما تنسو الاخوه السمار انو حكومتنا تكلمنا انو الضربه او الطياره الجايه حتقع وين ومتين وبرضو يحاولو يدخلوها مع البرمجه التوماتيكيه….والبركبو الطياره المره الجايه منو؟ والبمشي العلاج ف الخارج منو وووو

    1. اخي قوية انت ما شفت وسمعت انو اللمبي قال الطيارات دي جات من هناك واشار بيده للفراغ الله

      1. انتا عارف يالغالبان نحنا تلفزيونا مافيهو صوت
        وانا كنتا قايلو بغني ف مسرح الاوبرا …..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: