إذا توقف !

• إذا توقف العمل بما يعرف بالصراف اللآلي يكون كويس .. (صراف واحد شغال وعشرين ما شغالين )
• إذا توقفت مشاركاتنا الخارجية في كرة القدم ربما نحفظ ماء وجهنا بعد أن اصبحنا ملطشة بين الامم
• إذا توقفت تعيينات الخريجين على (الواسطة) و(حامل هذا الكارت يهمنى أمره) فأعلم أن أمر البلاد لا يهم أحداً
• إذا توقف قضاء المصلحة على الرشوة في دواويننا الحكومية فالإثم (قطع شك) على المرتشي دون الراشي (يعني الناس تعمل شنو؟)
• إذا توقفت (نقة) زوجتك فأعلم انها تعاني من إلتهاب في الحنجرة
• إذا توقفت كشات المرور فسوف يستقيل الجنود (تاني ياكلو سمك عند عوضية وين؟)
• إذا توقفت الحركة في الطريق وتكدست العربات على الجانبين وتصبب الناس عرقاً وتأخرو عن أعمالهم فده معناتو إنو في (موكب مسئول) جاي ماري !
• إذا توقفت (علوية باغات) عن الغناء فلن تتأثر خريطة السودان الفنية
• إذا توقف المسئولون عن التصريحات إذن لسلمت مرارتنا من الإنفقاع
• إذاتوقفت تقارير النائب العام عن إيراد الإختلاسات والفساد المالي عندها أعلم أننا قد بدانا في تطبيق الشريعة !
• إذا توقفت عربات حمل النفايات عن العمل فالحكاية واااحدة إذ أنها تنفض (نفاياتها) وهى تسير
• إذا توقف التنقيب عن الذهب فلن يحدث أي شئ (هو يعني عامل لينا شنو؟)
• إذا توقف الدعاء بهلاك اليهود والأمريكان يكون كويس عشان برضو فيهم ناس كويسين وكده وإحتمال كمان يكون فيهم امريكان مسلمين !
• إذا توقف السؤال عن ملف خط هيثرو العند النائب العام أو لم يتوقف
تظل الأوراق (حبيسة الأدراج) لنقدمها يوم الموقف العظيم !
• إذا توقف إستيراد العربات قليلاً فلن تتصاعد أختناقات المرور أكثر مما
هو عليه الآن
• إذا توقف ذلك الفنان العجوز عن الغناء (يكون كويس) فحباله الصوتيه قد شارفت على الإنتهاء بعد (الإرتخاء)
• إذا توقفت الجبايات عن الطرق والأسواق فسوف تجد أن اسر كثيرة ما لاقية عيش …(حرام)
• إذا توقفت طائرات الأنتينوف عن التحليق في سماواتنا سوف يحرم عدد غير يسير من (الشهادة)
• إذا توقف سعر صرف الدولار عند الستة جنيهات وشوية (أكون طيرة ومباري السيرة) !
• إذا توقفت الصحافة الرياضية عن المهاترات والكلام الفاضي (تبيع كيف؟)
• إذا توقفت عربة لشابه تقف في شارع (عبيد ختم) الساعة عشرة بالليل فده أكيد (ما فضل ظهر) بل فضل حاجات تانية وكده
• إذا توقفت الإعلانات التي تقوم الشركات بصياغتها عبر لهجات مصرية وشامية ومش عارف ايه .. يكون وزير الإعلام شايف شغلو
• إذا توقف القصف الإسرائيلي لمنشأآتنا فحقو في الفترة دي نعمل لينا دفاعات عشان المرة الجاية نفاجئو وكده !
• إذا توقفت دعوة الحركة الإسلامية السودانية عند (منظمة الدول الإسلامية) فده ممكن .. لكن الحديث عن بديل (إسلامي) للأمم المتحدة (فدي واسعة شوية)
• إذا توقف ذلك المعلق الرياضي الذي يحاول أن يتشبه بذلك المعلق العربي المشهور لكان جهاز التلفزيون خاصتى حي يرزق !
• إذا توقف (الشيخ حبيساً) عن التعليق على الاحداث يكون كويس لأنو هو الزول الوحيد الفي العالم الما مفروض يفتح خشمو
• إذا توقف (الإمام) برضو يكون أحسن لأنو دخل موسوعة (جينيس) للزمن المخصص لمسك العصاية (من النص) !
• إذا لم يتوقف (أبوهاشم) عن الصمت يكون احسن عشان ما معقول الزول يكون ساكت خير .. شر
• إذا توقف المسئولون (قليلا) وتريثوا عن التصريح إبان الفواجع لما دخلت (ماكينات اللحام) القاموس السياسي .. (هم لاحقين شنو) ما يصبرو لحدت الحاجات تنكشف والناس تعرف الحاصل بالضبط
• إذا توقفت لك (حافلة ركاب) حتى تعبر الطريق يجب مراجعة القوى العقلية للسائق
• إذا توقف ضخ مياه الشرب في المواسير أكيد (العلة) تكون في (النيل)
• إذا توقف السودانيون عن أكل (اللحمة) بعد أن وصل كيلو الضان إلى 60 ألف فليهم الف حق !! (مع باقي المكونات يعني الحلة عايزه ليها 100 ألف) !!

كسرة :
• إذا توقف قلبك عن النبض أكيد تكون سمعتا بتصريح (السواطير) بتاع (هم الإسرائليين ديل كان رجال ما ينزلو لينا بي تحت) !!
• كسرة ثابتة :
• أخبار ملف خط هيثرو العند النائب العام شنو(ووو ووووو ووو)؟ – قريبا الإحتفال بالذكرى السنوية-

Advertisements

52 تعليق

    1. اخر نفس بس …..عليـــــــــــــــــــــــــــــك الله نفس واحـــــــــــــــــد بس

    1. ده شنو ؟؟؟ بعد تمانية دقايق يا مفتري ؟؟ على العموم مبرك يا العبيد اخوي

      1. كلامك صاح يا أخوي المندهش لأنو حتي ولو افترضنا خمسناها ما بتاخد تمانيه دقايق،، الشيشه ممكن ولكن برنجيه ما اعتقد،، ولو توقفت البرنجيه ماذا سيحدث لمقالات ساخر سبيل

      2. المندهش..
        ما حلوة منك كلو كلو ! بارك ياخى بعداك شوف الزمن ,, وى..
        عبيد…
        ههههههههههههههههه,,,مبروكة عليك وخفيفة على صدرك يا حبيب…

    2. شمباتي مبروك البرنجيه 😛
      اها لقيتني كيف ?
      واااي

      1. جنوبى..
        انت مااا حبيبى حبيب قساى ,
        نبارك ليك سمحك وجديدك انت بس ! وى وى وى

    3. يا احوانا عليكم الله ما تهاجموا الراجل ساى,, اكيد فرق الزمن دة من توقيت الكمبيوتر بتاعو او مكان تواجده ,, و حصلت معاى (هاااك السلبطة دى) ,, عشان كدة يا شنباتى يا اخوى مبروكة و سعيدة عليك ,, و ان شاء الله تتهنا بيها لحدى المبسم !!!

      1. انت من ناس الحكومة والا شنو تبريراتك مثلهم هع

      2. لا و حياتك بس من كتر ما سمعنا من تصريحات و مجابدات هنا و هناك اتعلمنا لينا شوية تبريرات ,, و بعدين ما بعيد علينا نبقى منهم ,, قول اميييين – صدقنى ما بنساك كلو كلو و بنلاقى ليك موقع يسرك جدا !!!

      3. فلاديمير…
        يبتراكن ايامك يا حبيب ,,, وصدقنى ح اكون اول المهنيئن بالبرنجية الجاية ! وى

  1. ولو توقف فقه اللبع ماذا سيحدث…..(يلبعون).
    ولو توقف فقه الري بيع ماذا سيحدث(يربي عون).

  2. كفانا يا جبرا كفاااااااااااااااااية
    ننتحر ولا نعمل شنووووووووو
    عليك الله بس مقال واحد يخلينا نقول بركة البقيت سوداني
    خايفك مااااا تقدر

    1. اهم شي كان نوت تحقق الحلم دا:
      1- ما تجيب لك كلام من غير دليل جنس نحن احسن ناس و تسكت
      2- قصص من التاريخ ما تنفع نظام جدودنا زمان
      3- زي ما حكيت عن وقائع كلنا عارفنها فوق تجيب لينا وقائع في المقال التشجيعي

    2. و لو افترضنا انو البروف اجتهد و بحث و حقق ليك حلمك دة,, انتا من وين تجيب فهامة عشان عشان تستوعب انو الكلام دة صحيح و فعلا حاصل,, لانو جيلنا دة من ما قام ما شاف غير اللبع و اللغف و اللهطى و الشنو ما بعرفو داك,, عشان كدة يا علاء يا اخوى خليك معانا على ارض الواقع و بلاش من الاحلام دى,, كويس !!!

      1. يا خوي الاخ علا ماشايف احلام بيكون كوابيييييييييس ساكت لان حتى الاحلام ممنوعة والا انت ما عارف كدي كان راجل احلم شوف ناس البتاع ديك ما يجوك والعجيبة كان الحلم كان فيه قروش عاد خم وصر

  3. الحاجه الغريبه يا خ نحنا كشعب من احسن شعوب الارض انسانيه لكن ك حكومه يا ريت لو ما بقيت سوداني . و دي ما محتاجه عمك جبرا …

    1. الاغرب يا شدو إنو كشعب ذااااتو كنا !!
      وكان جنوبيا هواها وكان اسمها ام درمان وكان بلدك دخل فوكا البوت شيلي إيالك فوت

      1. نفوت وين؟؟ ما كل البلدان فوكا بوت !!!

  4. بعدين لو توقف جلد و تعذيب و حلق شعر بناتنا اكون احسن. لانو ما ممكن الهند تحلق شعر النسوان و تبيعوا ل اميركا و جهاز الامن ح يبيع لمنو يعني؟؟؟

  5. منو قال التهاب الحنجره بحمي الكلام هو امراض الزمن دي امراض كمان ! لو سرطان الحنجرة بقي باطل وغالبو يسكت الناس ! بس .. سب عليهو سرطان الحنجرة ده !

    1. هو المعلم سرطان في الحنجرة و نائبو سرطان في الدم و داك عندو ما بعرفو شنو و برضو ما خايفين الله فينا طيب ربنا يعمليهم شنو علشان يختنعو و لا عمى البصيرة عندهم حاد لدرجة الجنون

      1. لاحظت معا ىيا جنوبى انو البروف فى حتتيييين جابت سيرة (الحنجرة) !
        حتة المرا لو خلت النقة ,, وحتة (إذا توقف ذلك الفنان العجوز عن الغناء (يكون كويس) فحباله الصوتيه قد شارفت على الإنتهاء بعد الارتخاء) ,,
        يكون من شنو دا ياربى !!؟

      2. من عمايلم يا شرقاوي والامراض علي اشكالها تقع
        شمباتي ” هو غير تلميحات البروف دي ويقعد يدس لينا الكلام جوه الكلام المجهجهنا شنو ?

      3. بغض الناظر عن الحاصل والممارسات ! الشماتة خلق ٌ رذيل ولا يصدر من علية القوم ،،،

    2. احب سرطان الحنجرة سنة يا بوب مارلي هع

    3. المرأة النقاقة والفنان العجوز بس الحنجرة الذهبية والعصا المرفوعة والعرضة شمال ما اظن تقيف يوقفا الخلقا هع

  6. جميل كالعادة

  7. سلامى لك الاخ / الفاتح
    وماتبسى إذا توفقت القنواتالسودانية عن البث فتأكد انو هناك خير
    والسلام

  8. اجمل شي (أكون طيرة ومباري السيرة) !

  9. السلام عليكم ، البرف و الاخوان ، اليكم نوع من مسكنتنا و كل من هب ودب يلطش فينا :
    كشف حال
    زمان لما كنا بنكتب ، شديدى الانتقاد للحكومه ثائرين على الاوضاع
    المقلوبه ، نبغى التغيير بشتى الطرق و الوسائل ، حربا على طبقات الموظفين العليا و حواشيهم و المنتفعين والمندسين و شرازم السماسره الذين فاض بهم البر و البحر وجو السماء ، نصحونى يوما ببيع عمارتى ذات الثلاثه طوابق و التى قضيت ثلاث ارباع عمرى ما بين السعوديه ، حين كان الاغتراب عيب فى عرفنا ، و ابى ظبى ، وحرمت نفسى من كل نفيس لافوز بتلك العماره ، وقد حسبت نفسى من المليونيرات ، وفعلا صرت واحدا منهم لكن هذا المليون ذو المائه و ستون دولارا لا يكفى لمصاريف اسبوع ناهيك عن شهر ، و عند ما بدانا الاغتراب كان المليون يساوى ثلاثه مليون و ثلاثمائة الف دولار ، لكن لنرجع الى سم سار الذى نصحنى ببيع العماره ، و هى التى تمدنى بمبلغ يكاد يكون كافيا شهريا للعيال و المدام وتسديد فواتير الدراسه والمصاريف اليوميه ، الكهرباء ، الماء ، النفايات ، الشغاله ، المناسبات ، المجاملات ، ففى كل جمعه فطور مناسبه و عقد بعد الجمعه و غداء وكشف ، ويقولون ان نسبة العزوبيه كبير ، و على الاقل هناك عزاء واحد فى الاسبوع ، و يقولون ايضا ان هناك انفجار سكانى ، وكشف العزاء اهم من الافراح ، وقد قامت جمعيه ندفع لها بانتظام لمن ولدت مجامله لها ، ولمن اصابته جائحه ، ولكن صندوق الجمعيه دائما ما يكون صفرى الرصيد مع ان الدفعيات مستمره .
    المهم ان السم السارى لم يالو جهدا فى اقناعى بالبيع حتى انى فى مرتان او ثلاثه ضعفت امام وعودهم و اخذت عربون الا انى فى اللحظات الاخيره ارفض البيع و يستردون عربونهم .
    فى الشهور الاخيره صار المستاجرون ينذرونى بالاخلاء ، فاقول لنفسى حسنا ربما استطيع ان اضاغف الايجار بعد عمل صيانه طفيفه لكن بعد الاخلاء و الصيانه لا اجد مستاجرا ، حتى انى اضطررت ان اعلن فى السيارات ، اقصد الوسيط و اخواتها ، عن خلو شقق و اقصد سم سار فى احياء اخرى عسى و لعل…. ثم انى خفضت الايجارات مما كان بنسبه مقدره لكن هيهات هيهات…. ثم توالت احداث بسرعه ، اذ جاء لفيف من السم سار لمحاولة اقناعى للمره الاخيره بالبيع ، لكن و فى اثناء النقاش قال احدهم : العماره المايله دى و قربت تقع دايرين بيها شنو ؟؟؟؟؟؟؟؟؟؟؟؟؟
    …………………………………………عجبى

    1. صديقي كوكو.
      اوعك تبيع، السم الهاري ده ابعد منو بعيد،،
      توكل علي الله والفرج قريب

      1. كوكو…
        سلام وشوق ومحبة…
        قلبى معاك , قلبى معك ,, قلبى معاك

    2. كوكو : لا تبيع لا تصين اقع الحبوش مايله بيسكنو آيله بيسكنوا قسما لغرف وفي كل غرفه خت خمستاشر سرير واجرا مفروش وكمان كان إضايقتا ممكن تنوم معاهم لاكين اوعك تبيع تعرف البيت في السكن الشعبي الثورات بقي باكتر من مية مليون !?
      هسع بدل مؤتمر الحركة الاسلاميه اللمو ليهو منبوذين العالم ده لو كان عملو مؤتمر لحل اذمة السكن او اذمة المواصلات المجهجة الناس دي مش كنا استفدنا أقلو كنا عرفنا المشكلة وين.

  10. اخوى كوكو – و الله اثرتنى شديد و وجعت لى قلبى ,, فبعد كل سنين الغربة دى يجى السم السارى دة و يقول العمارة المايلة دى!! الله يميل بختهم و يسلط عليهم هناى داك اللى يلحقهم امات طه ,, بالمناسبة هم امات طه الحصل ليهم شنو؟؟؟

    1. مجرد معلومة من حبوبة امات طه حلقن صلع ودقن القرع لان طه اب سدر كان من اعيان (الشايقية) واسف للجهوية بحلفاية الملوك وبفعل الحكومة (التركية – عقلك ما يروح بعيد) تم تاليبه وقام بتاليب الناس من حلفاية الملوك الى قري (التي كانت تاريخ – عمارة تدنقس وعبد الله جماع) فجمع الناس وساند الحكومة واتجه مع الجيش التركي الى قدير وهناك عدمهم المهدي نفاخ النار فحلقن اماته وخالاته والنساء من اهله المقربين او المقربون واعذرنا للغة لاننا في الاصل افرو عرب فضرب اهل المنطقة بهذا الحدث المثل الذي تسال عنه مع كل تقديرنا لك اخي فلادمير ولا عدمانك وتسقط الامبريالية وانا ما لي لا في الشمال ولا في الوسط نحنا ناس صوفيه هع تحياتي ثانية

      1. تصدق من و انا صغير قاعد عن الموضوع دة, و اول مرة واحد يدينى المعلومة دى ,, الف شكر عزيزى الماغلبان ابدا !!!

  11. ما فيش ولا واحد حى السابع عشر من نوفمر حليل اكتوبر هع

  12. اذ توقفت انت عن يعنى على الدنيا السلام

    لك خلص مودتي يا من صرت منفس لنا

  13. ازا توقف موظفين الحكومه عن المماطله ف الاجراءات
    اكيد ماحيكون ف زحمه ف الشبابيك…
    وازا توقف حالنا
    اكيد حتكون حكومتنا شغاله كويس

  14. عاااااااااجل
    مبروك للشباب السوداني الصامد الصابر

    اي واحد ما عرس ما يستعجل
    والخاطب يفسخ ساي

    والمتزوج يطلق
    اخيرا الشعب السوداني حيستضيف الشعب السوري في مطلع 2013
    تمت اتفاقيه بين البلدين لتزويج السوريات + تكفل الدوله بمصاريف الزواج
    والمقصد الستر علي الاخوات السوريات
    يعني..
    الناس العسل جآين
    ناس تؤبرني جآيين
    ناس اشتئت لك حبيبي جآيين
    ناس بتئتلني هي الابتسامه جآيين
    بدي ياك تحضني حبيبي جآيين
    شو بدك اعملك اليم جآيين

    وداعا لمسببات هجرة الشباب من السودان
    وداعا للشناه المره
    وداعا للمهور الغاليه
    وآخر حاجه قالو حيصدرو بناتنا تشاد لتحسين النسل التشادي وتقويه اواصر العلاقات السودانيه التشاديه
    الليله سجمكن

    1. هذا كما وردني من احد الأصدقاء وعليه لكي تعم الفائدة
      Copied and pasted

    2. يا عبيد القلتهن ديل بيطبقن البوخه ? بقولن سجم خشمي ? بقولن حبيب قساي ? بتفدعن ويملخن ايديهن في المشي ?
      اموت ليك = مليون تأبرني ! حفرة دخان + طلح ابروف ! انسي بس

      1. آآآآآآآآآآجنوبي اخير ماعونا البناكل فيهو بانا هع (انحت الفهامة) او خلي امنا الغولة تعمل ليك توصية في الصين لفاهامت اكبر واكثر عمل وي وتحياتي

      2. آآآآآآآآآآجنوبي اخير ماعونا البناكل فيهو برانا هع (انحت الفهامة) او خلي امنا الغولة تعمل ليك توصية في الصين لفاهامت اكبر واكثر عمل وي وتحياتي

      3. ههههههه والله ياجنوبي الحركات دي ناس كتاااااااااااااار بعملوها
        عل نحنا بندور كرم الضيافه ……وهو كمان اسمو ما عونا

  15. انت يا بتاع البوخه للمره التانيه(ليه هي اصداره كتاب ناجح كانت) و نحنا نقول المصبرك علي اكل البليله بحصحاصه شنو؟؟ مولع برنجيتك و راجي (الهندي) البوخه ههههههههههههه

  16. ياخ انتو سبب التصحر في السودان و انعدام الغابات!!!

  17. و إذا توقفت (قوّات الشعب المسلحة) مُنهكة من إرهاقات نكبات الساسة و السياسة فالسلام عليك يا السُودان
    ؛

  18. السودان سلة غذاء العالم … من القال انو سلة الغذاء مملوءة بالغذاء؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: