مواطن 5 أمبير

لعلكم أعزائي القراء قد لاحظتم في السنوات الاخيرة إن شعبنا لم يعد ذلك الشعب الهمام الذي يعج نشاطاً وحيوية فترى الطلاب والعمال والموظفين يسيرون في الشوارع صباحاً نحو أعمالهم كما الاسود مقارنة بهم اليوم وقد أصبحوا (ضبلانين) و(حيلهم ميت) لا يقوون على بذل أي مجهود ، العبدلله عزي هذه الظاهرة الشاملة إلى عده عوامل منها تناول أفراد هذا الشعب (الفضل) للمواد منتهية الصلاحية كما وايضاً إستخدامه مكرهاً للمياه (ذات الطحالب) والخبز ذو (البروميد) ولحوم ذوات (الاضلاف) .
إلا ان العبدلله أكتشف مؤخراً السبب الرئيس لهذه الحالة الغريبة وهو أنو الشعب ما قاعد يمشي محلات (البنشر) عشان يشحن (روحو) الشئ الخلى (بطاريتو نازلة)
وعشان تعرفوا التفاصيل تعالوا نقرأ هذه الخبر الذي ورد مؤخراً بإحدي الصحف اليومية والذي جاء فيه :
افاد البروفيسور عمر محمد صالح اخصائي إنتاج الخضر والفاكهة بمركز بحوث الاغذية بشمبات بأن معظم ثلاجات الموز والبرتقال التجارية تستخدم حامض الكبرتيك الحارق ” موية النار ” لأنضاج الفواكه منذ أربعين عاماً دون ان تتحرك السلطات المختصة . وقال انهم يحصلون على موية النار من محلات بيع وشحن البطاريات نسبة لثمنها الزهيد ، مؤكداً ان حامض الكبرتيك يسبب الفشل الكلوي والسلطان وتليف الكبد ، مبيناً انهم ظلوا يتابعون هذا الامر منذ عام 1975م وانهم كانوا ينبهون الجهات المختصة دون فائدة ، واوضح ان اصحاب الثلاجات يضعون حامض الكبرتيك في درجة حرارة تصل الى 140 درجة فهرنهايت ، واشار الى انهم حصروا حوالي 30 ثلاجة في الخرطوم ويوجد العديد منها في امدرمان وبحري والمدن الاخرى .
إنتهي الخبر … وأنا أقول لنفسي من زمااااان والشعب بطاريتو نازلة وما ماسكة (نار) أتاريهو علشان مش قاعد يشحنها؟ يعني القصة بقت واضحة .. الشعب زمان كان شغال (تش) بفعل (موية النار) التى كان يأكلها مع (الفواكه) التى كانت في متناول اليد ولكن بعد أن ساد الغلاء وإرتفع سعر الفواكه وبقية الضروريات وما عاد الشعب يتناولها فقد أصبحت (بطارية الشعب) ما بتمسك (كهرباء) و(مويتا ناقصة) على طول والمواطن بعد أن كان (50 أمبير) أصبح مواطن 5 أمبير .
بالله ده إسمو كلام؟ وفي ياتو دولة من دول العالم (الرابع عشر) ممكن يحصل الحاصل لينا ده؟ يعني أيه انحنا ناقصين (كهرباء) وللا ناقصين (أحماض) وللا ناقصين (كبريت) بعدين المواطن ده ما قاعد ياكل ليهو مية الف سنة قاعد )ياكل في خاطرو) كمان بقت فيها (موية نار) … لا وايه شوف معاي إهتمام الدولة بصحة المواطن .. من سنة 1975 وناس مركز البحوث بيتابعوا في المسالة دي وبينبهوا المسئولين .. سبعة وتلاتين سنة والمسئولين ما قادرين يعملو حاجة والشعب بياكل (موية نار) .. والعنابر في المستشفيات بتستقبل في المرضى الذين تراكم عليهم (حامض الكبريتيك) وتعدت بطارياتهم حاجز الـ 12 فولت !!

كسرة :
أتاريهو معظم المواطنين أصبحوا ما يقوموا إلا (دفرة) !!

كسرة ثابتة :
أخبار ملف خط هيثرو العند النائب العام شنو(ووو ووووو ووو)؟ – قريباً الإحتفال بالذكرى السنوية- !!

46 تعليق

  1. برنجيييييييييييييات !!

    1. مبروك عليك يا المندهش ولو فضل نفس الحقنا بيهو

      1. يوسف
        بلحقك يا أخوي عشان البروف قال بعضمة لسانو (معظم المواطنين أصبحوا ما يقوموا إلا (دفرة) هئ هئ هئ
        ناس بورتسودان !!! تعالو بي جاي … وخسوسا الصامو رمضان عشان ديل أخدو موية النار دي طاااااازجة من جوه الجوه للتلاجات … أحسن لييييييكم ،، أمشو أفحصوا

      2. بس ان شاء الله جماعتنا التجار ديل ما ينتبهوا لموضوع موية النار دى و يلحقوها لينا السكر و الرغيف و البنزين و اللقيمات (لانو مؤخرا برضو سعرها زاد) !!!

    2. اخوى المندهش مبروكة عليك مجموعة البرنجيات دى كلها ,, الظاهر عليك مرابط ليها من نهاية الاسبوع ,, ربنا يهنيك بيها !!!

      1. والله لو عرفت مواعيد البرنجي دي ما اخلي ليكم برنجية واحدة ما تقول عاطل عن العمل في جمهورية الخرتيت دي

    3. المندهش ايه الحلاوه دي . الظاهر عليك امبارح واكل كيلو موز لوحدك

      1. ههههههه,وانا اؤيد ما ذهب اليه الرفيق جنوبى ! كاااااااااااااااااااااااك..
        مبروكة عليك يا حبيب ,,تستاهلهن كوووولهن..

    4. مبروكة ، نحن بس فاقدين حبه فيتامينات وانت قالوا ضارب ليك كيلو موز براك،،

      1. طوالي عندي حيرقان ………دي موية النار يعني و لا شنو. ..طيب الزول ال نفسه حااار .. و الزول الزعلان و عينه حمرا .. بيكون بطاريتو ضاربه و عيونا فايره ؟؟
        ياخي .. انحنا ناقصين ؟ ..كتاحه ..سخانه…غلاء ..اختلاسات .. نهب مسلح و مصلح ..احقاد ..واسطات .. محسوبيات ..دكاتره فاشلين .. لاعبين كوره خايبين .. سياسيين عملاء .. فلسفه و جدل و تنظير …كرهتونا الحياة .. قلنا الروووووووب.

    5. حيرت البرنجي يا ربي جورج حجار راح يوقف مصنع متين

    6. لكل من أرسل بالتهنئة للبرنجيات ، يتباركن أيامكم
      خلوهو الموز وأقعو المورينجا
      عمك تنقو براااااحه وخلي بالك من صحتك ، يا عمو إنت أساسنا وإنت تراثنا
      جنوبي الموز ماعندك لكن ، إنسليت مرقتّ ولا لسّه مناضل

      1. لسه يا المندهش لاكين ايام معدودات ونلقي صاحبك شمباتي إن كتب الله لنا . انت منسل ولا مناضل شان لو في فرقة لقيا

  2. حسع نقول شنو يا بروف !!

    1. هوي يا عمك تنقو بان وليك الأمان ومن هجليج جيب حبوب الحيرقان كان اوميبرازول كان لانسوبرازول وكمان

    2. لو كنا رجال نقول البغلة في الابريق يا محمد حسن يا خوي

    3. محمد حسن ، تاني في قواله ؟ قطعو في مصارينك وراقب الموقف

  3. ناس بحوث الاغذيه وحماية المستهلك وكل كيانات اصدقاء المواطن ليه ما يكون عندهم محاكم خاصه اسوة باعداء المواطن ناس الكهربا و الوساخه الوسخين ديل !

    1. جنونى سلام ، تقصد كل واحد ، كل هيئه كل وزاره كل شعبه كل نقابه اتحاد الكوره ( ماتعمل لينا حاجه عن اتحاد الكوره يا برف ) كل واحد يعمل ليهو محاكم ، اسوه بى سوداتل وموبيتل و زينتل و امتنتل وهلمجرا ………….. عجبى

    2. ناس بحوث الاغذية ما بكونو كلموا امنا الحكومة لانها ما اظن امنا ما تكون شفقانا علينا هع

    3. هوووووي يا جنوبي وكوكو والغلبان ، مالكم عاوزين تجيبو لينا الهوا ؟ الكلام ده أدفنو في بكانو ده ، محاكم شنو كمان البعملوها يعني عاوزين نص الشعب الفضل يشتغل في المحاكم ؟ والنص التاني فنانين ؟ طيب البزرع ليكم الموز منو ؟؟؟؟؟

      1. يزرعوه المساجين هع زي دق الطوب وي

  4. السلام عليكم ، البرف و الاخوان ، بالمناسبه يقول لك واحد قاعد فى بيت لعبه ( حفله ، بى الجديد ) فى حى الظ …. فجاه موية النار شدت عليه فراح مستفرغ ، بعد ما وعى بشويه راح مولع ليك قشة كبريت و جادعها ، بق راح الاستفراغ مولع ليك نار خدره زى بتاعت البتجاز زمان ، شايفين نحنا بنشرب نار ، قال ليهم ، مش موية نار ، تانيا الفاكهه بقت سلع استفزازيه بالنسه لينا رمان و كيوى و عنب و تين طازجه و تفاح انواع اخدر و احمر و اصفر و زيتون اخدر و اخخخخدر و اسود ( وبمناسبة الاسود يقول لك ، كما شاهدت فى برنامج تلفزيونى ، انو المصاروه بيضربوه ورنيش اسود ، كل واحد اكل زيتون اسود يفتش بطنه ، ويبقى جوه و بره بيلمع ) و دى كوووولها ما لازمانا و خليناها زمان و الناس البتاكلها حتفور ليهم عين و لا اتنين ………………..عجبى

    1. كوكو ! الله يسألك انت من زمن بيت اللعبه في فريق ريد ? ونار البتوجاز خضره يعني بي حسابات الخريف انت عاصرت ليك بالميت كده خمسين ام جركم ? ما بنلقي عندك شوية صمغ .
      هسع بالله عينة البيأكلونا ثاني اكسيد موية النار ديل ما اخير منهم سوات اليهود في يوم السبت وسواتم في ناقة صالح ?
      عندي احساس انو مقال الليله جاي لي ودالخلا في جرح

      1. وسواتم في الخرطوم القريبة دي حد سالهم يا عمك ديل شعب الله المختار وناسنا خلونا شعبه المحتار

      2. ههههههههههههههههههههههههههههههههههههههاااى,,حامضة يا جنوبى ,,
        وشينة منك,,,

      3. الغلبان سوات الحكومة بالخرطوم والبلد بس ياها سوات العاصفه بي ساق الشتيل الني ..
        شمباتي هوووي ما تشبكني مع كوكو ده انا بس لقيتو دفعه وقلت نتعرف ! إنت بت وراق وينا ? ما تكون مسكوها مع ناس قوش اصلها من زمان عينا علي وزارة التعاون الدولي ولا اسما شنو حقت اشراقه ديك ?

      4. ههههههههههههههههههههههههههههه,,تسالنى انا !؟
        انا ذاتى قربت اختفى مع المحاولة التخريبية دى لنيل شرف نطمح اليه ! كع

      5. جنونى سلام ، الدنيا سقط شديد ، كانت الحبوبه تملح ليك شرموط خروف الضحيه و تبهره و تعلقه فى حبل صغير خاصة الشرموط و تلفه بى شاشه من الضبان و الحديه ( ما كان عندنا ثلاجه ) و حسسه ( زاد الضبان و بقى مافى حديه ) المهم نقوم الضباح ماشين المدرسه كل واحد يخت ليه كراع شرموط فى جيبه ، المدرس يكورك ياولد ماتاكل لبان فى الفصل ، و كل ماا تلوك قطعة الشرموط حلاوتها تزيد ، يا استاذ ده ما لبان ده شرموط فى واحد يقدر يقول كده ؟ ………… عجبى

  5. أخبار ملف خط هيثرو العند النائب العام شنو(ووو ووووو ووو)؟ – قريباً الإحتفال بالذكرى السنوية- !! يا ربي النائم العام ده ما سامع الكواريك دي كلها

    1. يظهر عليه ما بياكل موز ويمكن بطاريتو فاضية

  6. دفره زاااااتو مابقومو في ثلاثه عيون من البطاريه ضاربه تقول دفره عليه العوض ومنو العوض !!!!!!!!!!

    كسره ملف النائم العام برضك بطريتو نامت ولا ماتت حسب الله

  7. يا وجعى على بلدى ,,
    ونارو ما بتمسك دى حلوة شدييييد ,,
    بس حتة القيام دى صعبة خلاص !! ههههههههههههه

    1. ” اتاريهو معظم المواطنين اصبحو ما يقومو إلا دفره ” شوووف بالله وانا قايل الاولاد الواقفين في شارع النيل وعبيد ختم وشارع المطار باليل ديل قصدهم شي تاني وهو اتاريهم كايسين اشتراك ? إن بعض الظن إثم !

      1. مدخل:
        برنجية بتاعت رد على تعليق ……….
        رأيكم شنو في التسمية دي عشان ندي الناس فرصة كمان في خلق أطر جديدة ومسميات تنعش الطموحات لهذا الشعب ….. لاب لاب لاب بلابلاب بلابلاب ….
        مخرج:
        هوي ياجنوبي إنت عينك في الشفع الواقفين في الشارع ؟!!! كدي ركز شوية وشوف أعمامك الراكبين الفارهات وبطارياتم نازلة ..
        ياربي السبب شنو

      2. هوووي يا الفاتح بلا السبب شنو معاك انت شايف قاعدة جمبي مذيعه ولا جمبي د. سارة أبو ? ما من امس قعد نتكلم عن ( موية النار ) هسع في زول قال ركوب العجلة مابتنسي ? أجي ! كمان جابت ليها رباع وسديس !

      3. اشتراك بطاطير ساكت هع

    2. د/شمباتى سلام ، جنونى ده ما غلطان مذيعة شنو ؟ ديل لمعه من بره ساكت و اثار كلير تون ، لكن د/ ساره انا ذاتى بريده لكن من بعيد لى بعيد ، احسن نجيب لى رقبتنا هوا ، واليوم يوم العنف ضد النساء ، و العنف ده بيمارسه منو ، البقر و لا الكلاب ما قاصدين الراجل عديل و جيبو طيب ما يفصحوا و يقولوا الماهيه يشتغلها الراجل و تصرفها المره و لا احسن يرسلوها بى D H L ………… عجبى

      1. جنوبى..
        هههههههههههههههههههههههههههههههه,,,يعنى اشيل (اشتراكى) معاى من هنا ؟؟ سُب عليهم الهنايين .. بعدين يا تجى يا نجى ! آيييييييييييييييي…

        كوكو…
        خلتان وستين خلتان , بعدين الحريم ديل كا نقاصدات معانا شئ اليقولنو عدييييييييييييييييييل , بالله انتو مقصرين ليهن فى شئ !؟ بس اليقولن وانحنا نرد , ردت الموية فى زور فلانة ! وى وى وى

      2. دوك ياسين ، عليييك الله إحتفظ بحق الرد في المكان والزمان المناسبين ،، علي رااااااحتك وأوعك تتهور

      3. كوكو وهل يتبقي لنا شئ بعد حرماننا من اجر مناولة الماهيه? عجبي .. (هذه بضاعتكم ردت اليكم )
        شمباتي : ما تتعب روحك شايلينك لشئ أكبر ! ههههه
        قت ليك .. هو يعني انت ما قاعد تشيلو معاك طوالي !? وي
        المندهش ! اوع يكون زي حق الرد بتاع اللمبي ? هو صحي اللمبي ما باين مالو ? ولا آآآ الضل بختفي مع سيدو 😀

      4. المندهش…
        طبعا ح ارلد الصاع صاعين ,, صاع تمر وصاع شعير ! وااااااااااااااااااى…

        جنوبى…
        اممممممممم,,شيل ما معانا , انما حمل آآآهـ !

  8. طيب يا جماعة ناس الأبحاث ديل كان وين من زمان (37 سنة ) لو قلنا كانو خايفين من ناس هي لله ديل ، ما فى السنوات المرت دي كان فى حكومة الصادق 1986 ما لم ما نشروا أخبار زي دي ومطلعينها لينا فى الأيام دي … القصد شنو . هل هناك قرار سياسي أم حرب على تجار الفواكه .. وأسكت ساي حا يجيك فى اليومين ديل إعلان من واحد من ناس هي لله ويطلب شراء الفواكه فقط من هو لانو فواكه ظازجة وما مستوية بموية نار .. وصج زمان كنت بسأل ما لو موزنا طاعم كده اتاريه ما خد ليه بوخه بوختين ، ومنظر الدلكة

    1. بيقول ليك سنة 1975 يعني من زمن ابعاج اخوي بس ما اظن زمن ابعاج كان فيه حد من النعاج دييييييييييييل بيقول هي لله هي لله كان لحقم ليك ناس الرفيق هاشم المات (برضه راجل) او ناس الاختفاء تحت الارض لانه كان بيقول انا قلت ما زي هناي ده البيقول نحنا قلنا هع اب عاج اخوي

      1. تحت الأرض مره واحده، ديل ناس تابرني اللي جايين لي ناس بطاطيرهم نازله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: