حاجة تغيظ

– عندما يتغيب الموظف أكثر من ساعة زمن بينما المواطنون يجلسون في إنتظاره ثم يجيب على تساؤل أحدهم (ياخي إنتا كنتا وين من قبيل منتظرنك) بأنو كان قاعد يصلي الضهر .. (يا خي ما قلنا ليك ما تصلي لكن سااااعة
– عندما يتحدث أحد المسئولين عن الإسلام و الله قال والرسول قال وهو يمتلك فيلتين تلاتة في ارقي احياء العاصمة وعدداً من (العربات والزوجات) الفارهة والزوجات مع إنو قبل كم سنة كان ساكن إيجار
– عندما تستمع إلى مذيع وهو يخاطب ضيفه بدكتور فلان وهم يعلم تمام العلم بأنه يحمل دكتوراة فخرية
– عندما تشاهد رجل مرور وهو (سايق ليهو) موتر بلا (لوحات)
– تشاهد رسماً كاريكاتورياً وقد أشار فيه الرسام بسهم إلى رجل مريض ويكتب (الحركة الشعبية) ثم (سهم) يشير إلى (مسدس) ويكتب (إتفاقية نيفاشا) ثم (سهم) يشير إلى (قنبلة) ويكتب (قطاع الشمال) ثم (سهم) يشير إلى (خرطوش النفط) ويكتب مش عارف أيه … ياخى طيب ما تكتبو مقال الله يهدينا ويهديك
– عندما يتشنج مشجعي الكرة لدينا ويثورون ويتظاهرون بينما يتفاعلون ببرود شديد تجاه الإرتفاع (اليومياتي) لأسعار الضروريات
– عندما تتلعثم المذيعة في نطق إسم الضيف الذي تستضيفه
– عندما تجد (منقبة) وهي تشير إلى (سائقي الملاكي) ليقفوا لها (فضل ظهر وكده) !
– عندما يقوم المصور باخذ صورة من الخلف لضيف البرنامج مظهراً صلعته كاملة الدسم (هسه ده لزومو شنو ؟ بالمناسبة بتحصل ليا طوااالي)
– عندما يعظك الطبيب عن مضار التدخين وهو يضع علبة السجائر في جيبه الأمامي .
– عندما يتحدث (مسئول) عن (تداول السلطة) وهو قاعد في كرسيهو ليهو ستين حول
– عندما يكون هم الناس هو تشجيع (الكورة) وليس سعر (البندورة)
– عندما ترى شخص يرتدي (قوق الخمسين) قميص (مشجر) … طبعاً غير (الصبغة) !
– عندما تري شخص يمتطي برادو 2012 وهو يرمي (الفاضي) في قارعة الطريق !
– عندما يكون ثلاثة أرباع الصفحة الأولى لصحيفة (إعلان) .
– عندما تستمع إلي صوت مطربة تتحدث عن التربية والاخلاق والالتزام وهي أمبارح (جاية من نيجيريا)

كسرة:
عندما تسمى الاشياء بغير اسمائها .. محاولة (إنقلايبة) يقولوا ليك (تخريبية)

كسرة ثابتة :
أخبار ملف خط هيثرو العند النائب العان شنو(ووو ووووو ووو)؟ – قريباً الإحتفال بالذكرى السنوية –

37 تعليق

  1. نص برنجية والنص التاني لي الجاي بعدي

    1. مبروكة عليك كلها. بطلنا الله عفانا

    2. يوسف ،،
      صبرت ونلّت ،، مبروووك

      1. الحمد لله بس مافي زول داير النص التاني.
        شكرا ليكم عبيد و ابوعمر نبارك ليكم في الأفراح ان شاء الله

    3. يوسف مبروك . انت عملت بي لا يؤمن احدكم حتي يحب لأخيه برضو المنقبه عملت بي اذا بليتم فأستترو والجايه من نيجيريا بتتكلم عن تجارب شخصيه وكده

      1. هى الجات من نيجيريا دى منو ،، رياله سايلة وكده

    4. لله درك من رجل اشتراكى ,,,
      مباركة مباركة,,,

  2. دكتور دي بسيطه وحسه أي زول بستضيفوهوا بقولوا ليهو بروفسور ومع العلم بانو لقب بروفسور ده يعطي بعد نشر كذا بحث عالمي، بلد المليون فنان و أكثر من مليون بروف،
    أما القميص المشجر فما فيهو مشكله ما دام الجوهر صافي وما مشجر،،
    بس قصه الواحد همو كلو بان يكون لديه أكثر من كذا زوجه دي حاجه ما ماتشينق مع ما قبل السفسفه والسلطه ،،
    وما قلنا ليكم من زمان اصبروا واتفقعوا واتغاظوا كمان

  3. البروف و السمار الكرام . . . .
    تحية و سلام . . .
    المحاوله الانقلابيه بنسميها نحن في أدب ( أحسب أن )،بأسم الدلع بتاعها ( محاوله تخريبيه ) ، لأنها كانت حتخرب علينا الرصه بتاعت الحاجات.

    1. والسفسه واللهط بيسمى ( تعديل وضع ) وكثرة الزيجات ( تحسين نسل ) والعربية الفارهة ( كان ما عجبكم أركبوا هنا ) والفلل والثلاثة ( سترة حال ) اما العمارات ( صمام أمان ) والسفر للعلاج ( ان لنفس حق ) وعلامة الصلاه الصناعية ( شغل مخك )..

    2. الحبيب سنكل..
      سلام وشوق ومحبة ,, لم املك دمعة حرى ذرفت عند رؤية اسمك فى التعليق..

      1. دوك شمباتي تحياتي . . .
        و الله متابع معاكم يوميا ، لكن يا حصل الكبر يا الحكومه عملت اليوم 12 ساعه. بقينا ما بنلحق نعمل الحاجات كوووولها ذي زمان لكن طبعاً الخرمه لكتابات البروف ما بتخلينا نغيب عنكم.
        سلامي و احترامي لكل الجيل الجديد من المدونين.

      2. تسلم يا سعادتك,,,
        وانا واثق من متابعتك , وحااااسى بى نفسك ,,
        وخليك دايما كما العهد قريب يا حبيب….

  4. وعندما تدخل ليك مصلحة حكومية وتلقا اي واحد فاتح كمبيوترو وشغال يا Game يا فيسبوك

    غايتو يابروف بالله انسب نوع حبوب بتاعت ضغت شنو؟؟

  5. السلام عليكم ، البرف و الاخوان ، انا مصر على كتابة حاجات عن الكوره و سنينه ، تلاته فيلات ما حاجه جنب السرقو منو مليارات و عفاهم لوجه الله تعالى ، ولا البنى عمارات القياده و السور ، وانت عاوزنا نلم لى الرادار ، طيب نحنا بندفع للجيش عشان ياكل احسن الماكولات و يتدرب و يشترى سلاح ولا يصنعوا ،…………….. عجبى

  6. الحاجة البتغيظ فى تأخر الموظف انه يقول كان بيصلي وتلقى صلاة الظهر لسة وقتها ما جاء ، لكن يقول ليك كان بيصلي الضحى يعني خلاص مكمل الدين كله وباقي السنن وبس ، نقول ليه ياخي ان العمل وقضاء حوائج الناس عبادات واجب أداءها قبل السنن والممكن يخليها لنهاية يوم العمل
    حاجة تغيظ عندما يمر عضو محلس وطني فى طريق سفري وما يدفع رسوم العبور ليه عربيتو ما بتمشي فى الظلط ولا شنو
    حاجة تغيظ لمن تسافر بره البلد وتلقى دول كثيرة مواردنا أكثر من مواردهم وامكانياتنا أكبر منهم وتلقاهم مهتمين بنظافة وتجميل عاصمة بلادهم ومتطورين فى معاملاتهم مع البشر بصورة حضارية
    حاجة تغيظ لمن تلقى الحكومة صرفت المبالغ الفلانية ( طبعاً بعد خصم اللهط ) على تشجير العاصمة وتجميلها بس جودة المواد تجعلها حاجة مؤقته ومش دائمة لفترة طويلة
    حاجة تغيط لمن تلقى الناس جيعانة ومرضانه ومسئول يصرح ليك فى وسائل الإعلام انو حا نجمل العاصمة ونبني جداريات ( ثقافة وكده )
    حاجة تغيظ لمن تعاين للنيل وتلقى بعده مناطق غير مشجرة
    حاجة تغيط لمن تكون مغيوظ شديده من القرارات الغير مسئولة ، وبعدها يجيبوا المسئولين يرقصوا على شنو ما بعرف
    اكثر حاجة تغيظ الواحد انو يكون مغيوظ والغايظوا ما شغال بيه شغله

    1. آآآآي والله يا ابو غسان الاخيره دي غياظه شديييد وقعد تديني إحساس بالكلوبيه وهم الجمل والجمل ما بشوف عوجة حكمه وكان شافا بعمل ما شايف وتأبي المعارضه اذا اجتمعن تكسرا واذا اصبحوا مستشارين تكسروا للرئاسه

      1. صدقت يا جنوبي …. هم قال ليك ناس المعارضة ديل بعارضوا عشانا .. كلها حركات علشان يقعدوا فى المكيفات الباردة ويركبوا العربات الفارهه عمرك شفت ليك معارض ما مرتاح .. وما تنسي الأفلام البتطلع لينا بيها المعارضة كلها مرتبة ومدروسة مع ناس الحكومة لجس نبض الشارع وعلشان يثبتوا للناس انو الزرعنا يجي يقلعنا وأهو الخطبة العصماء الكانت يوم الجمعة فى مسجد الأنصار ما فيها دعوة وكده للتظاهر كل المصلين شالوا شابشبهم وركبوا الظلط والتسألوا يقول ليك لاحق الغداء أو عندي ضيوف وكده

      2. أأيدكم انتوا الاتنين و الله يا ابو غسان و يا سديقى اللدود جنوبى,, لانو الغايظنى عارفنى انا متغاظ منو و عارف الغايظنى شنو و بعد كدة مطنشنى ,, دى مش تغيظ, دى تفقع المرارة عديييييل كدة !!!

      3. ياتو مرارة يا فيلاديمير المرارة أتفقعت زمان

    2. آآآآي والله يا ابو غسان الاخيره دي غياظه شديييد وقعد تديني إحساس بالكلوبيه وهم الجمل والجمل ما بشوف عوجة حكمه

      1. سجمنا .. الكبر حصل بقينا نعيد الكلام !
        الليله في سوق ام درمان لقيت واحد قدري لابس قميص مشجر ومصبغ عاينت ليهو عاين لي شدييد غايتو يافهمني غلط يا انا فهمتو غلط :$

      2. جنوبي
        يجازي محنك قلت لي عاين ليك وكمان مشجر ؟ لا أكيد إنت فهمته غلط

      3. في سوق امدرمان ولابس قميص مشجر ده ما انا ذاتو ، لاكيني ما مصبغ شعري ولانو أخوك موضه خالص وصلعه بالوراثة ومش زي بتاعه الفاتح الا تتصور ،
        بنلبس مشجر ولكن ما في اللسته بتاعه الغياظيين

  7. جنوبى…
    هههههههههههههههههههههههههههههاااى,,غايتو انا فهمتكم غلط الاتنين ! طاااااااااااااااااااخ

    1. هو المشجر دا حلو يا خوي يا شمباتي؟؟؟

      1. امممممم,والله ما عارف ! ما لبستو ,
        اسال البروف جبرا قعد يلبسن ! وى وى وى

      2. سمح بشنف ماااالو ?

      3. ههههههه,,فقه سترة وكدة يا حبيبنا ! وى

      4. ههههه والله انت بتاع مشاكل . داير تشبكني مع سيد البيت وانا لسه جداد خلا ! بمناسبة الخلا ياخي ودالخلا وين ? وبمناسبة الجداد قالو واحد عازم ضيف المره جابت ليهم فتة سخينه قعدو ياكلوا شويتين المره نادت من جوه اجيب الجداد ? قال ليها لسه (الضيف سمع خفف الاكل ) تاني بعد شويه نادت : اجيب الجداد ? الضيف رفع يدو . سيد البيت شال الصحن ختاهو في الواطه وقال ليها جيبيهو . المره جات كاشه الجداد هش كر . كر . هش

      5. ههههههههههههههههههههههههههههههههههههههههههههااااو,,
        حلوة يا حلوة يا (الحلو) انت ! ويكأن

  8. حاجة تعيظ؟انا ما عارف البروف جابها من وين!وهو فيه حاجة ما بتعيظ؟

  9. السلام عليكم ورحمة الله وبركاته ؟؟ غايتو انا الحمدلله لا عندي صلعه ولا حاجة لكن والله بشكركم كل الشكر علي التعليقات الموجودة وحقيقة لولا كتاباتكم لمتنا كمداً

  10. ايها الشعب السودانى الفضل (استعار ه من البروف وكده ) بكل وضوح قوم نوم او كمل نومك لمن ربنا يفرجه والسلام عليكم ورحمه الله وبركاته

    1. اتيقنت من تالاك إتيقنت ! يا ابو خليل ديل حتي نومنا سرقوا منه ساعه ( آل بكور آل ) الحبش مؤخرين تاريخم ستة سنه ونحنا نجري لا قدام وخطانا عدمانة الهداي ! ننجض الموز قبل اوانه ونجيب اليوم قبل اوانه

      1. ونوم عيني البقى لي سهر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: