حظك

برج الحمل :لا تقلق يا عزيزى لتحويل ملفك إلى النائب العام فهنالك تنتظر الكثير من الملفات التي لم ينظر فيها يعني لو كل ملف أخد ليهو كم سنة زى بتاع هيثرو ده فملفك عاوز ليهو كم وتسعين سنة .. لا تقلق يا عزيزي حصل شفتا ليك زول إتحاكم؟
الثور : سوف ينتهي مرتبك يوم خمسة في الشهر .. ستجد أن سعر صرف الدولار إرتفع وبذلك إرتفعت معه إسعار السلع .. لا تهتم لذلك كثيراً فكل شئ من الله (إنتا ما مسلم ولا شنو) ؟
الجوزاء : التوتر الذي تشعر به سببه سماعك وقراءتك لـ(تصريحات المسئولين) من خلال الصحف وقنواتنا وإذاعاتنا المحلية ننصحك بالابتعاد عن المنبهات مثل القهوة والشاي وكذلك ننصحك ببيع التلفزيون (أهو تتخلص من سماع التصريحات دى وتطلع ليك بي قرشين حلوين) برضو مع الفلس الحاصل ده .
الحوت: أجعل بينك وبين رؤوسائك مساحة ولا تحاول أن تكون قريباً منهم حتى إذا ما ثارت (شبهات الفساد) حولهم وعرفت الناس (الفلل والعمارات) والمزارع و(الحسابات) لم يتهموك بأنو أنت الزول الطلع (البلاوى دى)!
الدلو : سوف يمر عليك هذا الأسبوع بتاع العوائد وبتاع الموية وبتاع اللبن وبتاع النفايات كما إن (الجزار) سوف يطالبك بما عليك من مديونية متراكمة .. أقترح عليك )تعمل نائم(
الجدي : أخيراً سوف يتم تعيينك بعقد سري .. لا تنسي بدل العيدين وبدل اللبس وبدل العربية وبدل السفرية وبدل الدواليب وبدل التخصص وبدل التلصص !
القوس: حاول بقدر الإمكان أن تتجنب القيادة في الجزء الأيسر من الشارع فتدهسك إحدى عربات المسئولين المسرعة أو إحدي عربات الإسعاف (فارغة المحتوى)
العقرب : انت محظوظ حقا لأنك بعد الآن لا تحتاج إلى خارطة طريق عند خروجك من المنزل … (محمد سيد الدكان) تعيش إنتا !
الاسد : بختك يا عم .. أمورك كووولها محلولة بإذن الله .. ح تصاب (بالصمم) وتركب عربية ع الزيرو وآخر موديل وح يكون مرتبك الشئ الفلاني وح يكون عندك دولاب مليان بدل وعمم وجلاليب و ومكتب تكييف مركزي وآخر أبهه .. ح تعين نائب في البرلمان
العذراء : سوف يطرد إبنك من المدرسة لعدم سداد الرسوم .. لا تسأل عن مجانية التعليم لأنه ليس هنالك مجانية تعليم بل هنالك شئ إسمه مجانية الحديث عن مجانية التعليم
السرطان : أخيرا سوف تودع الفلس والعطالة إذ صرح وزير المالية بوجود 30 الف فرصة عمل في الموازنة الجديدة … (هي واسعة شوية) لكن عليك التمسك بالقشة !
الميزان : لا تتفاءل بالتغيير كثيرا .. يبقى الحال كما هو عليه وعلى المتضرر أن يرفع كفيه نحو السماء

كسرة :
قال أيه حظك .. هو فضل فيها حظ ؟

كسرة ثابتة :
أخبار ملف خط هيثرو العند النائب العام شنو(وووو وووو وووو)؟ – قريبا الإحتفال بالذكرى السنوية-

Advertisements

54 تعليق

  1. بعااتي و ما فاضي | رد

    برنجية جديدة لنج

      1. بعااتي و ما فاضي

        الله يبارك فيك, غايتو قلنا نضايقكم شوية ف البرنجي

    1. حتي انت شغلوك !? وشوف نحنا امبارح نتكلم عن اب شنب واسرتو .
      دخلتك صحي دخلة بعاعيت كف نق . مبروكه عليك .

    2. البعاتي ….. مبروووك البرنجية

    3. تمشي المقابر تختفي تظهر تختف البرنجية شكيتك لابيدا قوية على العموم مبروكه عليك انا ود عماري ساكت

    4. الله لينا من البعاتي بتاع النهار ده
      مبروكه عليك

    5. البعاتى,, انتا وكتين ما فاضى, بتضايق فى الفاضيين ليه فى برنجيتم؟؟ ,, يخسى عليك يا دا !!!

      1. لو الزبير وابراهيم شمس الدين وبيويو كوان قاموا بعاعين يا ربي اللمبي والراقص راح يعملوا شنو اموت واعرف انت تعرف يا خوي يا فلادمير

  2. مفروض بتاعين الابراج ديل يعملو ليهم امتحانات في الشخصيه السودانيه واي واحد فيهم يجيب واحد من ميه يدوهو رخصه دوليه

    1. جنونى سلام ، فى ناس جيجيبوا 100من 100 لانو الحكايه شخخخخخخخخخخخخخخختك بخخخخخخخخخخخخختك …………….. عجبى

  3. اول مرة اعرف انو الأبراج دى كلها بتنطبق علينا !!
    نشوف لينا برج كهربا نتلب منو..

    ******************
    ياجنوبى شايفك عملت رايح من البرنجية كلو كلو اليلة
    زى الماعارفا شنو ههههههههههه

    1. ههههههه .
      لو تضمن لي الموت انا بتلب قبالك إلا الخوف من التكسر و جهجة المستشفيات وفتيش القطن في شارع العناقريب والجبس عن بتاعين المغالق !
      تعرف يا طبنجه الحصل ليا مع برنجية الليله زي حكاية التمتام البسأل عن قطر كريمه !

      1. احببت ان احيك اخي جنوبي وعارف ناس فقه السترة ديل بعد شوية بفتو ليك بجواز الانتحار طالما تحمل جنسية جمهورية الخرتيت وبضمنوا ليك الجنة كمان عشان يكنسوا البلد من المواطنين ويبرطعوا في تلها براهم تحياتي لك

      2. التمتام البسأل عن قطر كريمه,, مالو و قصتو شنو؟؟؟

      3. يا جنوبي فلادمير وطبنجة ثبتو عليك الحكاية والليلة والليلة أنا مالي غرض …. وشيل شيلتك دايرين يلحقوك هيثم مصطفى

      4. يا فيلاديمير انا قاصد حقت التمتام القعد يتمتم في السؤال لحدي ما قطر كريمه اتحرك لاكين ناس الفاتح و الغلبان وطبنجه قايلني قاصد قطر كريمه الما فيهو النور ! امشو يا سيئين . ههههه
        هسه يعني الشعب السوداني ده كلو برج الدلو ? مخير الله
        طيب ناس 1/1 الزينا ديل تابعين لياتو برج ?
        عشان نعرف حظنا وكده . ماعارف ليييه بقيت احب برج السرطان !

      5. انت لو عاوز المضمون انا بديك ليهو تطلع البرج وتخش جوه شوال معاهو حجار من اللهم تمسك سلك الكهرباء الضغط العالي بيدك يدك تكون بره الشوال تحتك بحر عميق ويلا انت والشوال ولومني لو حييت

    2. اخي طبنجة انت ما من البلد دي والا شنوووووووووووو ما عاوز اقلل من ابراج البروف بس ياهو دا زاتو هع الحاصل

      1. دنا غلباااااااااااااااااااااااااااااااااااان

    3. يا طبنجة يا حبيب …
      جنوبي يا أخوى بقي يعمل رايح من حاجات كتيرة الظاهر عليه بقى مستقطب
      ولا يكون ياربي مساهر حارس سمانا بالعين المجردة
      ياتو واحد فى الخيارين ديل با جنبة !!!!!
      زنقة زنقة…….
      كسرة وإستهداف ودعاية :
      جنوبي يا ناس برج الأسد
      خلو بالكم

      1. هههههههه الخيارين ومعاهم خيارات تانية من باب وماخُفى اعظم
        ناس برج الاسد ديل لو كان جونا بى تحت بى سواطير ساكت كان وريناهم ههههههههه

      2. هووووى – اوووعكم من ناس الاسد ديل ,, ناس مدعومة و مسنودة و ما بتجيهم الحبة ,, لا سواطير و لا غيرو ,, احسن لينا و ليكم انتمسح فوفم يمكن يرموا لينا معاهم وظيفة نائب عضو برلمان (كان فى) , و الا بدلة و الا عمة و جلابية من دواليبم ,, لانو جربنا المواجهة لقيناها ما نافعة, قلنا نجرب المداهنة يمكن لعل و عسى !!!!

      3. حلوة مستقطب دي بس (تو ليت) ما تقوم تفهمها تواليت تحياتي لك

      4. ههههههههههههههههههههههههههههههاااى,,,
        حلوة وملعوبة فى التمنيات يا الفاتح,,,
        اضرب الحمام دا وجيب لى شوربتو ! آييييييييي

      5. تصدق يا الفاتح انا في زمنن ما كنت بستقطب ليهم الناس !
        يا ربي تغفر لي وتهدي الباقين ,
        آآآآي عارف نفسي وسخ تايب , واعترف اني كنت مغفل نافع

    4. لكم التحية كل احباب القمردينه وكل السمار ساخرون واصبح كل الشعب ساخر يا ربي زي سخرية اولاد بمبة الجابت عرش الفرعون يتهادى ناااااااااااااااااااااااااامل ذلك

  4. اشمعنا تعليقي في انتظار الموافقة والناس الجات بعدنا تعليقاتها منشورة ،،، تاني ما نعلق ولا شنو

  5. السلام عليكم ، البرف و الاخوان ، نحنو من ناس الجدى ، وكنا فى امان ت الله الا ابو جضوم باقان قفل البترول و فكانا عكس الهواء و لا عكس الهوى ، وشايفو جه راجع تانى ، عندو شنو ؟ عايز يقفل شنو تانى ……………. عجبى

    1. آآآآآآآآكوكو قال جدي قال عاوز تخم والله الا تخم الرماد هع غلبان يحيك وعارفك ما بتعملها

    2. ياكوكو باقان جا الخرطوم وقال نحنا جينا عشان ننفسو خطه…..هههههه قول وانحنا بنجيكم ف السمايه

    3. اب جضوم ده عامل زي الكديس الضكر بيسمن بالراس الله يعكسا عليهو زي ما عكسا علينا شاحد الله يجيهو حبس بول زي ما حبس علينا البترول .
      يا هناي ماااالك مابي الحمام وتكوس في الشوربه ?
      كوكو ! يعني يتفزعو فوقي كده وما تدافع عني يا حليل ودالخلا

      1. هههههههههههههههههههههههههههههههههه,,
        الشوربة خفيفة على المعدة ,,
        والحمام بى عضامو دا لازماهو …. امممممممم ,,
        قلت شنو ؟؟

      2. سلام ياقبيلة،،،
        صديقي جنوبي والله ليك وحشة، ودايمن عليك بتسأل عن صحابك وإن شاء الله ربنا يجمعنا بيكم جميعا” في الفردوس الأعلي إنه وليُّ ذلك والقادر عليه آميين يارب…
        ومسئول من الخير ياصديقي أين أسدقائي الأعزاء سهيل وخالد ودمدني وبت وراق وآخرين دوت كوم؟؟؟
        أنا ما نسيتكم .. يا الليّ ناسين.. يا ريت يا ريتكم تعطفوا تآسو.. مانعنّي قربكم وقربكم منايا .. وحارمنّي حبّكُم
        وحبّكم دوايا…
        هييييع!!!!!!!!
        أتمني التواصل عبر البريد
        korokoro102@gmail.com

      3. سلام ياقبيلة،،،
        صديقي جنوبي والله ليك وحشة، ودايمن عليك بتسأل عن صحابك وإن شاء الله ربنا يجمعنا بيكم جميعا” في الفردوس الأعلي إنه وليُّ ذلك والقادر عليه آميين يارب…
        ومسئول من الخير ياصديقي أين أسدقائي الأعزاء سهيل وخالد ودمدني وبت وراق وآخرين دوت كوم؟؟؟
        أنا ما نسيتكم .. يا الليّ ناسين.. يا ريت يا ريتكم تعطفوا تآسو.. مانعنّي قربكم وقربكم منايا .. وحارمنّي حبّكُم
        وحبّكم دوايا…
        هييييع!!!!!!!!
        أتمني التواصل عبر البريد
        korokoro102atgmail.com

      4. سلام من تاني،،،
        طبعا” يا أخوة كلمة (at) الظهرت ليكم في الإيميل دي زغت بيها من عدم النشر لأن التعليق بتاعي ده معلق في إنتظار الموافقة وأظنو ما حا يطول كتير لكنني أستعجلت وعملت الحركة دي علشان أجيكم بٍسراااع، وطبعا” مفترض تكون العلامة الحقيقية (@) بدل هذه الكلمة…
        وكولكم نظر ومفهومية، وعذرا” أخي وصديقي الفاتح جبرا علي الزوغة والدخول من تحت الباب، وطبعا” دي نحن فيها غواصات وما بنحتاج لكثير عناء…
        تحياتي مجددا”لكم جميعا” وخاصة الصديق البروف وله العتبي حتي يرضي…

      5. سديقنا اللدودو ود الخلا,, حمد لله بالشوفة و الرجعة ,, كويس الخليت طششان الخلا دة ,, و بعدين مالو لو زوغتا بى تحت الباب ,, دى اقل حاجة تتعمل, لانو غيرك بيجينا زايغ عينى عينك و مش بى تحت الباب, بل بالسماء و فوووووق عيون الاشهاد , بس غلتتم انو بيجونا بالليل و الانوار طافية و نحنا فى الصلاة ,, الله لينا بس !!!

  6. اندب حظي ام امالي على البرنجية وعلى الابراج

  7. انواع الابراج
    برج القطة
    لا تقلقي على بشرتك سيضفي عليها الكريم واللبان القاً وبريقا يحسدك عليه صاحب البرادو ستقفي في ظلمه داكنة ويتم اجهار نور العربه مما يعطيك فرصة عظيمة لتظهري مفاتنك اثناء محاولة الركوب (فقهه فضل الظهر)
    برج البركة
    ستزهب للحج ع حساب الوزاره او الموسسه (ودي دايره ليها فقه كمان )
    برج العتود
    يتجه اليك اشباه التيوس طمعا في شئ عندك(بفقهه المسلم اخو المسلم)
    برج الحمار
    يصعب عليك دخول القصر لأغراض الصيانة ، ولكن لا تقلق ، ستلتقي الرئيس وتعجبك بشاشته وتنسى همومك وتحتضنه ، سيعدم كل من معك ليلاً وتحصل ع العفو (بفقهه العفو عند المقدره)
    وكم من زئب برجه الحمل وكم من عاهره برجها العزراء

    1. صح لسانك و صح بدنك يا قوية ,,, جبتا التايهة !!!

      1. والله يافلاديمير حياتنا بقت كلها ابراج وحتي منتخبنا بقي عندو برج (برج الحمام)

      2. قوية….
        قوى الله ايمانك يا رجل,,,
        تحياتى ومحبتى,,,,

  8. لكم التحية كل احباب القمردينه وكل السمار ساخرون واصبح كل الشعب ساخر يا ربي زي سخرية اولاد بمبة الجابت عرش الفرعون يتهادى ناااااااااااااااااااااااااامل ذلك

  9. الذي يحز في نفسي ان هذا اصدق برج (الميزان : لا تتفاءل بالتغيير كثيرا .. يبقى الحال كما هو عليه وعلى المتضرر أن يرفع كفيه نحو السماء )

  10. البروف والسمار . سلامات .
    الثور : سوف ينتهي مرتبك يوم خمسة في الشهر .. ستجد أن سعر صرف الدولار إرتفع وبذلك إرتفعت معه إسعار السلع .. لا تهتم لذلك كثيراً فكل شئ من الله (إنتا ما مسلم ولا شنو) ؟
    أنا برجى الثور .
    ونعم بالله .
    يازول الله كريم …

  11. المحيرني يابروف النائب النام ده اخرو شنو ولا حايظل نائم كده لمن يجي عامل لحام يحرق العمار ه السمحه دي

  12. الأبراج دي ناقصه فين برج مطار هيثرو اللي عند النائم العام وفين برج التمساح وفين برج دبي،

  13. السلام عليكم.ممم
    وين برج الضرائب.؟
    برج الزكاه.؟
    برج المعلم.؟
    برج الجمارك.؟
    برج الاتصالات.؟
    برج الضمان الاجتماعي.؟
    برج الفاتححح.؟
    ياناس الابراج كتتيييره كتره شديده والحمد لله-
    ابرجونا وكده – الما ليقا برجو مستريح في قصرو…
    “سبحان الله وبحمده سبحان الله العظيم”

    1. هلا درداقة ليك وحشة ما تشفش وحش كل البرنجيات اجازفت تظهر وتختفي

      1. يمكن كان (بيضرى) فى عيشو !!!

    2. و ابراج القيادة وييييين؟؟؟

      1. هل تاكصد يا سديقي برج الرادارات ويبين وكدا

  14. البروف الغالي والسمار, معليش الكومنت بره النص شوية, بس قريت لي خبر في بي بي سي ياريت بس تطلعوا عليه عشلن نعرف نحن وين والعالم وين
    http://www.bbc.co.uk/arabic/worldnews/2012/12/121204_japan_police_tunnel.shtml

  15. النبي فيك حظك ده شكلو من الحلال تاني كلو يوم جيبو لينا علشان نقراهووووووووووووو

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: