بدلاً عن الإحتجاب

جاء في الصفحة الأولى بصحيفة (القرار ) عدد اليوم الأربعاء الموافق 5 ديسمبر 2012م بعنوان (دراسة : 7% فقط هي المتوفر من مجانية العلاج
) الخبر التالي :

كشفت نتائج دراسة مسحسة لتقييم برنامج العلاج المجاني أجرتها وزارة لصحة الإتحادية أن المتوفر فعلياً من ميزانية العلاج المجاني لا يتجاوز 7% وأن المواطن يساهم بـ 64% في تمويل الصحة وعزت الدراسة القصور لضعف ونقص الميزانيات المخصصة للمستشفيات .

تعليق :
وكت أصلو المواطن بيتعالج براهو .. وبيتعلم براهو .. وبيدافع بالنظر .. الحكومة شن فايدتا ؟

كسرة ثابتة :

12/12/2012م ترقبوا الإحتفال بالذكري السنوية للكسرة الثابتة بإذن الله تعالى

43 تعليق

  1. برنجية بدلاً عن البرنجية
    لكن ما خطييييييييييييير والله حارسا جنس حرسان
    حقو الواحد يشتغل رادار

    1. يا اخي رادار شنو؟ وكلام فارغ شنو؟ والبزار لزومو شنو ؟ بالنظر يالفاتح بالنظر ،،، مبرووووكة عليك

      1. هههههههههههههههههههههههه,,شحدت ربى يفصلوكم كلكم كان مخلين اشغالكم ومبارين السجاير !!

      2. لا بالله يا المنهدهش يا مفتح إنت
        النظر ما بقى كعب يا أخوي وبعدين مش يمكن البرنجية تجي طافية النور
        أمشي وين أنا بعدين …
        ألعب غيرا…

      3. تصحيح :
        (المندهش) و العزيز كمان ..

    2. وماااااالك بتصحح اسم المندهش ده وانت صاري كده ?
      اها عشان جنس عمايلك دي ما ببارك ليكا B-)

      1. بارك أخير لييييييييييييييييييييك
        ولاَ بستقطبك

      2. هههههههههههههههههههههه,انت شفتو ؟
        انا حالتى عملت رايح يا جنوبى يا مقطوب انت !

    3. مبروكة – عفيت منك ااااا الرادار ,, و حالتو دى مش من بورتسودان مش كدة !!!!!!!

      1. يباركو ليك السمح إنشاالله
        بورتسودان شنو يا مان أنا راداري خاتيهو في إيلات عديل ( بنلقطا وهي يادوب دايرة تطير )

    4. يا الفاتح سلام لقيت البعاتي مشغول بالنظر هههههههه

  2. بعد كدة ( برنجية بين قوسين عشان ما يغالطو الواحد الناس دي بقت ما مضمونة )….
    إزيكم يا إخوانا كيف أصبحتو
    شفتو الفرحة دي كيف الواحد ما طول يا ناس

  3. يا إخوانا الحكومة ماليها دعوة بالحاجات ( التعليم والصحة والدفاع والأخيرة دي أخير منها دفاع منتخبنا بتاع الكورة هي أصلاً دي ليها ( دعوة بالدعوة)

  4. برنجيه بعد برنجيه الفاتح

  5. أنا لأنو عندي إحتجاب ،، مبروكة عليكما

  6. السلام عليكم..
    عليكم الله احنا ما شعب بقي سلبي ومنظراتيي”وباهت ” الا من رحم ربي- كدي عليكم الله اتلفتوا وشوفوا الحاجات الكويسه العملتوها ولا قولتوها من اصبحت ولا من امبارح- وكدي النشوف بلدنا بقت ملااانه شنو :
    – زنا بقا كتييير (نظري وعملي).. ابشنب
    -كذب (كبيير وصغير)..
    – ربا (تراب وغبار)..
    – رشوه (مدير وغفيير)
    – انتهازيه (حقك و ما حقك)..
    – استهتار (مسؤل وعوام)..
    – واسطه (صف عيش ولا وظيفه)..
    كدي الباقي تمو في سرك- لو كلو زول قال بسم الله في اكل التسالي والله كان حالنا اتصلح مع الله في الاول-
    جايييكم تان بي مفاجــ…. انتظرو مع السنويه.. وكدي نحاول نتصلح ونعمل صح ونصبر حببه..

    1. درداقة عيش بن ودالخلا بن علي بن عثمان بن حسن الترابي !
      بسم الله في التسالي ? بري يا ده لسه ما وصلنا الايمانيات القدر دي !
      يقول 7% تقول لينا بسم الله في التسالي ! بسسسسسم اللاااااهي

      1. تسلم يا جنوبي يا نسابة دا النسب الصحيح والا شنو يا درداقة

    2. صح لا فض الله فوك الشعب زي الحكومة اكثر حكومة منظراتيه في الكون منذ حلق الخليقة وباسم الدين والدين واضح بس وينه تنظيرهم على ارض الوااااااااااااااااااااااقع اقع انا معقولة

  7. سلام بالجملة البروف وكل اهلي الحنااااااان ( الاول برنجية … الطيش شنو)

  8. هى لكن تسالنا احنا يا بروف !!؟ آآآهـ ؟؟
    وشن فايدة مديدة الحلبة ….

    1. شن فايدة مديدة الحلبه مادام السمؤال بلخبط مديدة الدخن بالباسطه .. وي
      الحكومة فايدتا شنو كيفن يعني ومال نبذغ في منو ? ولا ده كمان دايرننا نحبسو جوانا !
      لما لميمنا لما لميمنا ..

      1. هههههههههههههههههههه,,انت قعد ترتاد الاماكن دى !؟ امممممم , طيب مااا تجى اعزمك الاسبوع الجاى ؟؟
        ونمرا فى النمور كمبودووووى…

  9. علاج شنو وابر شنو؟ اقعو المورينقا
    اما الحكومه داخرنها للتقيله لي قدام ههههههه

  10. كما ورد الآن
    خبر عاجل
    سقوط طائره من غير طيار في الثورة الحاره 17
    مافي خسائر في الأرواح

    1. ايران قبل فترة اسقطت طائرة استطلاع امريكية بدون طيار,, و امريكا قعدت تجقلب طالبت باسترجاع الطائرة. و قبل كم يوم سيطروا كمان على طائرة تانية, و امريكا نفت حدوث هذا الشئ,,, طيب لما هم فنانين و نياشين كدة و (راداراتهم) فل و 100%, ليه ما يدعمونا برادار رادارين كدة و الا على الاقل يأهلو لينا العندنا ديل بدل ما يقعدو يرسلو لينا فى سفن لبورتسودان ما وراها غير الهوا و القلق,, و بسببا بقينا ملطشة للبعيد و القريب !!!

      1. ممكن طيارة عيش على وزن درداقة عيش

      2. يا شنباتى, نورها كان والع,, بس الناس كانوا فى الصلاة ,,,,, وى

    2. من غير طيار ؟ تكون طيارة شنو دي يا ربي

      1. ههههههههههه,,,اهم شئ نورها كان طافى ولا والع ؟؟ كع

  11. البروف والسمار .
    سلامات .
    نسأل الله السلامة .
    عندنا صف دكاكين ببيعو اللبن وكلهم ببيعو بى طريقة فيها تطفيف يعنى يشيل الرطل (العبوة ) ويغمسوا فى الحلة أو الجردل أو ماعون اللبن ويكبوا ليك فى البسلة أو الكيس وبعد كدة مابزيدك ولا نقطة بل مرات العبوة بتجى ناقصة نتيجة لبعد الماعون من الماعون أو لقلة اللبن فى المصدر ولو سألت عشان يتموهو ليك يقول ليك بيفرق معانا وبعد داك سعرو الفين ونص .
    سألنى قريبى صاحب أحد دكاكين بيع اللبن :أنت بطلت تشترى منى أنا لية . رديت عليهو :كلكم مطففين لكن إنت بتتميز عليهم بأنو لبنك مقطع …
    ياجماعه نحن كعبييييييييييييييييييين.

    1. حنين & درداقة عيش ليه بقينا كعبين ومنو البقانا كعبين ?
      زماااان كنا نكون ماشين في شوارع العرضه ونشوف بتاعين اللبن بجو يشيلو فاضي القزاز من قدام الباب ويختو المليان ويمشو يكل زول لمن يصحي يفتح بابو ويشيل لبنو ?
      كنا بنمشي مركز صحي الضو حجوج او عبد المنعم او عوض حسين ونتعالج مجااااني ويوم واحد الحكومه ما قالت لينا انا موفره ليكم العلاج وكان ابهاتنا ما عليهم الا يشترو لينا لبس المدرسة ويعلقو لينا شنطه فاضيه في الكتف ونمشي المدرسه الحكومه تملاها لينا كتب وكراسات واقلام حبر ورصاص ومصطرة واستيكه ولااا كانت الحكومه بتقول لينا انا عملت ثورة تعليم
      ( اللهم اعوذ بك من ارذل العمر ) وبالمره أرذل الحكومات .
      انا معاكم في ضرورة صلاح حالنا لاكين كيف ينصلح مع حكومة تكافح الصلاح ?

      1. سلام ياقبيلة،،،،
        حكومتنا السُنية الرشيدة لقت هواها ( وضرت عيشها)، وكلام أخوكم درداقة عيش ده ما تدوهو الواطة، ونحن أصلنا الزول البمرق ليكم النصيحة لا زماه عكازته بقربه،،
        عليكم الله هسي الحكومة دي مش نحن الوصلناها لما هي فيهو الآن، ونحن السبب أولن وأخيرا” في كل ما نحن فيهو وبعد ده كلو ومن غيبوبتنا نلعن في أنفسنا أو بالأصح فيمن كان السبب وهمن نحن أنفسنا، بالله عليكم في جهالة وضياع أكثر من كدا وبعد ده كلو تجو تتشكوا وتتبكوا ومن أنفسكم ، وعلي أنفسكم!!!
        ولا كيف الكلام ده؟؟؟؟

      2. يا ود الخلا جيدن جيت تدي قلوبنا طله ..
        سنيه ومصاحبه ايران جهاديه وتحتفظ بحق الرد تأمرنا بالمعروف ولا تنهي نفسها عن المنكر وتصلي بينا وهي مامتوضيه بس زي الشعراء يقولون ما لا يفعلون ونحنا نتبعهم عشان لو كتبت الوكر المهجور يستحيل نحنا نغني قنبله راجل المره حلو حلا ..

  12. وجاءات ف الدراسات ان السودان احتل المركز رقم 173من 176 دوله الاكثر فساد ف العالم والثانيه عربيا
    والله لكن دفاعات زي الدفاعات

    1. استنا عليها شوية, بكرة بيطلع ليك وزير و الا متحدث رسمى باسم الحيكومة (يدافع) عن مركز السودان بين دول الفساد, و يقول ليك بأن هذا مقصود بيو زرع الفتنة و اشغالنا عن توجهنا الحضارى,, و نحنا ما هامينا شئ منهم,, لان هذا الاستهداف نتيجة التنمية اللى احنا ماشين فيها , و النجاحات التى حققناها,, و هؤلاء هم اعداء النجاح ,, و القافلة تمشى و الكلاب تنبح ,, و اللى يلحسوا كوعهم ,, و الزارعنا غير الله اللى يجىى يقلعنا ,, و و و و و الى اخر الهتافات اللى تعودما عليها و حفظناها !!!!

    2. قالو يا قوية يوم توزيع النتايج الشافع جا البيت متأخر ومغبرن ‘ امو سألتو ماااالك مغبرن كدي ? قال ليها ماكنا زاكين الطيش ‘ قالت وإنت جيت الكم ? قال ليها تاني الطيش !
      باقي ليك الحكومه بتكون فرحانه زي الشافع ده ?
      عجبني ليهم ! حتي في الفساد ما جابو البرنجي !
      ياربي الناس الحكومتنا سكت حكومتن ديل عايشين كيف ?

    3. هع مع انها شرعية وبالشريعة والمشروع الحضاري حاله تجنن

    4. ثاني الطيش يعني والرادي يلعلع فينا بالله شوف هع

  13. الزارعنا وألحس كوعك وأشرب مويتا وتحت (……) هذه هي الأقوال المأثوره والباقية وبعدين أرذل العمر وأرذل الحكومات ربنا قدرهم الأثنين واللهم لا إعتراض ؟؟؟؟؟؟؟؟؟؟؟؟؟؟؟؟؟؟

    1. فعلا اللي اختشوا ماتوا
      رسوب ميه في الميه ومكنكشين في الطيش وكمان فساد ولبع ومحسوبيه ، بس الله يكون في العون

  14. كيف يا استاذ الفاتح حكومتنا شن فايدتها؟ ده كلام ده؟ انتي ما عارف انه المؤمن مصاب؟ طيب منو حيسبب للمواطن السودان الاذى والهم والغم وكمية الامراض المزمنة غير الحكومة؟ ما تقول كده تاني

  15. عاااااااااااجل : وظائف شاغره في وزارة الدفاع ( بالنظر طبعا “) مطلوب عدد 5 ردارين و5 رادارت للغمل عل طول مدن الساحل
    المؤهلات المطلوبه : أن يكون النظر 6/6 وأن يكون لا يتجاوز عمر الرادار 30 سنه والراداره 28 سنه وأن يكون مقدم عبيط ولا بلاش عبيط دي لانو كلنا عبطا … أن يكون مقدم الطلب لمبي برياله
    من يحس في نفسه هذه الكفاات المتميزه يجب عليه تقديم الطلب في مستشفي العيون مش الباعتا الحكومه طبعا” لأ المغربي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: