بدون طيار

والله اني لأعجب.. وأندهش.. لتلك العبقرية التي تتعامل بها حكومتنا مع الأخطاء والكوارث والمصائب التي اصبحت تأتينا من كل فج عميق .. تلك الطريقة الفذة التي لا يمكن بحال من الأحوال أن تتميز بها اي حكومة على ظهر الكرة الأرضية (والكور المجاورة) فحكومتنا الرشيدة لا تعترف بأي قصور أو خطأ ليس ذلك لبرود في دمها ـ لا سمح الله ـ وإنما سلوك (استخفافى) ليس له ما يبرره ينظر إلى المصائب والأخطاء وكأنها شئياً عادياً حتى وإن ادت هذه الكوارث إلى فقدان الأنفس وتدمير الممتلكات وإن شئتم مثالاً واحداً يكفي لما أوردته فهاكم هذه المقولة التي وردت على لسان السيد وزير )الدفاع بالنظر) عند دخول قوات خليل إلى أم درمان إذ قال وقتها مصرحاً (لقد إستدرجناهم) !! ولك أن تعلم أن عزيزي القارئ أن هذا الإستدراج قد بلغ حي (العرضة) وشارع (الأربعين) وما جاورهما من أحياء سكنية !
طيب أيه لزوم المقدمة دي؟ لزوم هذه المقدمة ما جاء في الأخبار مؤخراً عن سقوط طائرة إستكشاف (بدون طيار) أمام أحد المنازل بمدينة الثورة والتي كان من الممكن أن يتسبب سقوطها (هكذا) في كارثه لا يعلم مداها إلا الله .. كان من الممكن أن تسقط في مدرسة .. محطة وقود .. موقف مواصلات .. إلخ ويموت العشرات لكن القصة (جات سلامة) وربنا قدر ولطف بهؤلاء المواطنين (الما عارفين يلاقوها منين) !
ليست هذه أول (الطبظات) المهددة لحياة وارواح المواطنين فقبل أشهر قلائل فوجئ مواطنو حي عووضة وحي المنيرة بمدينة ود مدني بهبوط طائرة هليكوبتر عسكرية في ميدان شعبي يعج بالأطفال والشباب اثناء أدائهم مراناً في كرة القدم وأثار الهبوط المفاجئ الذي لم يكن يخطر على بال سكان الحي الآمن الهادئ حالة من الذهول والدهشة لدى المواطنين والمارة من هول المفاجأة وقد شاهد الحاضرون أفراداً يهبطون من الطائرة ثم يستقلون ركشة لتكملة مشوارهم (وكأنو ما حصلت حاجة) !!
هل يمكن أن يحدث مثل هذا الأمر في أي بلد في العالم؟ طبعن لا .. لسبب بسيط وهو عشان الزول يتعلم (السواقه) وما يقوم يعوق ليهو زول بيقوم يمشي حته (خلا) حتين بعد ما يتعلم كويس بيجي يسوق داخل المدينة .. من الواضح ومن الحاجات الما عايزه ليها إتنين تلاته هي إنو (أنحنا جديدين) في حكاية (السواقة البدون سواق دي) فكان العقل والمنطق بيقول إنو المسالة تتم فى حتة (خلا) بعيداً عن المواقع السكنية حتى لا تحدث كارثة !
طيب السؤال البيفرض نفسو هو ماذا لو أن سقوط هذه الطائرة قد تسبب في موت وجرح عدد من المواطنين؟ الجواب يا عزيزي للأسف الأسيف (ولا حاجة) يعني دي أول مرة تخطئ فيها (جهة) والموضوع يمشي وكأنو ما حصلت حاجة؟ الطيارات الوقعت ذي (المطرة) دي حصل يوم قريت ليك (تقرير لجنة تقصى)؟
بعدين هو ذااااتو طيارات شنو البدون طيار العاوزين نصنعا ونحنا (بندافع بالنظر) مش مفروض (قريشات) المشروع ده (نوفرا) عشان نشتري بيها (رادارات) ومنصات صواريخ (دفاع جوي) عشان نأمن بيها اجواءنا البقت (ملطشة) دى … وللا ما كده ؟

كسرة :
يا جماعة الخير خلونا أول (نظبط) طياراتنا (أم طيار) وبعدين نشوف قصة (أم بدون طيار) !!

كسرة ثابتة :
12/12/2012م بإذن الله تعالى الإحتفال بالذكري السنوية للكسرة الثابتة (أخبار خط هيثرو) .. ترقبونا

Advertisements

43 تعليق

  1. برنجيييييييييه

    1. برنجيه ومن غير اي رادار وكمان الأول وما تاني الطيش

      1. مبروكة يا حبيب ما مشت بعيد لقيتني طلعت برة بس واحد من سببين :
        1- حصل تشويش متعمد على البث
        2- أو جيت طافى النور

        هنيئاً مريئأ وباردة على صدرك بس أهم حاجة فيها إنها برنجية ما مستقطبة

      2. عبيد .. الاول و التاني .! أممم يعني برنجيه من غير سبارس .
        الفاتح يا مستقطب شايفك بقيت زي تلفزيون السودان تشويش وما تشويش .
        عجبني ليك

      3. يا العبيد بالطريقة دى الناس كلها حتقلب عمارى سااااااى – خلى لينا معاك نفس نفسين كدة ,, بس برضو مبروكة و بالهناء

    2. والله كرهتنا البرنجي زاتو مبروكه عليك

      1. ما تزعل قوية برنجي بريحة الكيروسين مش هو وقود الطيارات والا انا غلطان هع

      2. ياغلبان بي نكهه الjet

  2. ههههههههههه والله دي حكايه الناس عيانه &مفلسه&عندهاقروش &علاج مافي

  3. حرام عليكم تظلموا قواتنا الباسلة – الطيارة بدون طيار النزلت فوق راس احد الحمامات دي مقصودة – قالوا في واحد من الحركة التخريبية كان في الحمام والطيارة بتجمع صور واحداثيات خاصة بذلك الشخص

    1. هههههههههههههههههههههه,اها واحداثياتو كانت شنو !؟؟
      (خ , ق 65 درجة مئوية) , وى وى وى

      1. ههههه
        خ ق ديل ما ياهن القعد ندخلهن الحمام ? نان 65 دي ي شنو ?
        لاكين نعيم ولأ نايم بتاع الاحداثيات ده قطع شك بضرب الشديده ?

      2. سجمنا يا ديل,, هو لسة فى ناس بيضربوا الشديدة؟؟ غايتو جنس غايتو ,, مخير الله !!!

      3. الحبيب جنوبى..
        هههههههههههههههههههههههههه,,ياخ انتن صعب خالس خالس ! و(65) دى احداثيات الرمية فى ظل الظروف (الممسكة) دى ! وى..

        فيلاديمير…
        هو بلا جنوبى دا البيضربها منو تانى !!؟ وااااااااااااااااااااى

      4. الناس بسمو طياراته حاجات كثيرة يا ربي طيارتنا دي ام قيردون هههههه

  4. سلامات. أم بدون طيار ما يا ها ذاتها المشروع الحضاري ونضيف ليها السواطير عشان نرد الصاع صاعين للجماعة البيضربوا فينا ساكت. أهههها ممكن تكون ضمن حق الرد في الزمان المناسب والمكان المناسب ما هي قاعدة في الثورة الحارة 17

    1. قالوا يجربوها فينا بالاول,, ان طلع فيها عمار و نفعت , بعدييين يختوا فيها طيار و يردوا بيها فى الوقت المناسب !!!

      1. كلامك صحي ما الحاجات الخربانة كلها جربوها ينا يعني شنو تسقط طيارة في ام راسك عادي وبرضه مش فارقة بي طيار والا بدونه ربنا يسلط عليهم ابابيل

      2. يعني علتنا فيران تجارب يا فلادمير

  5. غايتو جنس فلهمه هي طياراتنا بي سواقا ومساعد السواق وكل مره داقة الدلجه كمان دايرين يطيرو بالريش الدقاق !
    هو ذاااتو كان ما حكاية المابتعرف تتدخن بتحرق شنو كده ! طياره بدون طيار المطيره جوه المدينه شنو ?
    غايتو يا ناس الثوره بس ياها الجايه من السما تتحملا الواطه ! يعني حتي بتاعين الركشه ما استفادو ?

    1. بتاعين الرقشة ما استفادوا بس استفادوا بتاعين الخردة وبيدعو عند صلاة الضحى يا رب كل يوم زي ده

    2. و بالمناسبة هل انتوا متأكدين انو دى طيارتنا و طيروها ناسنا زاتم؟؟ ما يمكن طيارة ناس هناى ديلاك جاية من كدة (و أشار نحو الفراغ) و جاية ليها زيارة لمصنع بس طشت طريقا ,, كدى نفحصا بالاول و بعدين نشوف احداثيات المنطقة المحيطة لمعرفة المصانع الفيها ,, يمكن يكون مصنع لبان البيطرقع داك !!! ويكأن ……..

      1. ياخي طيارة شنو دي طيارة ورق كان جاري بيها اللمبي

  6. دا استدراااااااااااااااااااااااااج يا جماعة ,,
    استدراج واستنكاح واستهزاء واست اى حاجة ذاتو !
    طااااااااااااااااااااااخ

    1. واست ايه يا شمباتي يا خوي وباي لغة هع است هع تاني

      1. ههههههههههههههههههههههههه,,بلغة الضاد يا رفيق ! وى وى وى

    2. عارف يا الحبيب بس ريحه الكلمة عفنه ههههههه

  7. يا استاذ الفاتح انت ظالم الناس شديد، ابو رياله بتاع الدفاع قال ليكم مليون مره انه استراتيجيات الدفاع عندنا متطورة جدا والوحيدة من نوعها في العالم (بالنظررررررر) ، دايره يشوف ليك ناس خليل ابراهيم كيف كان ما دخلوا مدى النظر (انت قايله زرقاء اليمامة) وموضوع الطيارات البتجي بالليل وطافية انوارها، دايره يشوفها ليك كيف؟ انت ما شايف عيون وزيرنا الهمام بقت معمشه كيف؟ ما ده كله من كترة المراقبة والنظر ،، اتق الله يا استاذ وخليهم في نظرهم وخلينا احنا نموت، مش في واحد دكتور قال يومك البقتلك

    1. خلاص يفحصوا النظر (اجلي النظر يا صاحي) واي واحد يلقوهو من سلالة زرقاء اليمامة يشغلوهو في الدفاع الجوي بعدين اوقات الصلاة لازم تكون فيه وردية علشان ما يجونا وقت الصلاة وبالليل ببطاطيرهم علشان النملة ما تدخل رايك ايه يا ود انغولا

  8. يا جماعة الخير الجو دا خلوهووووووو (حلوة الجو) واطات الله دي كدي امش السوق واشتري ليك شوية خضار وشيلوا في درداقة لو ما دفعوك ايصال ما بتودي خضار البيت يا نااااااااااااااااااس خضار البيت البوابة الشرقية والغربية والادهي قالوا دي رسوم من المحلية وتحت تحت قالوا البوابات واقعه لي زول من اياهم في عطاء ابشركم بنبوءة جبرا داموس بعد كام اسبوع قطع شك بتدخل في نفس الله الداخل ومارق يعملوا ليهو حساب مع الكهرباء او مع اي داهية ثانية سدقوني يا شباب والبرف حيله انهد وكثرت الكواريك بي خط هيثرو ومالمش عارف اي والمديدة حرقتني وانا مستغرب من الشعب الفضل خلاص الحكومة كملت كل الناقصة بس ويييييييييييين محمد احمد والعصيان المدني

    1. قبل كم يوم صاحبي مشي يشتري كهربا دفعوهو 15 جنيه حق المويه ناس الصيدليه مؤجرين منو مشو يشترو كهربا برضو قالو ليهم تدفعو حق المويه ( ام بدون عداد ) مشت البت بتاعة البوتيك المؤجره من صاحبي ده زااااتو في نفس البيت عشان تشتري كهربه برررضو قالو ليها تدفعي حق المويه نديكي كهربه وبرضو مشي المؤجر الدكان التالت وده ببيع جداد مجمد وبيض برررضو دفعوهو حق المويه !! يعني كل عداد كهربه عندو مويه ما عندو يدفع مويه !
      يعني الناس البتحتج في مكاتب الكهربه وتشتم في الموظفات المسكينات المحكومات بسستم ادخال المعلومات ديل ماعارفه مفروض تشتم منو وتحتج ل منو ?

  9. يابروف النظره الانصرافيه دى خلتنا نرجع خلف الناس ديل فكو الطياره دى عشان تشوف حاله الناس ومنو محتاج ولي شنو بعده طوالى تجي طياره ترمى سكر ودقيق وبيتزاء وعصير وكده لكن الزول بتاع الكنترول لمن صور الناس بطنو طمت وجلت منو الطياره وبردولب فوق حمام عمك المبني من الجالوظ دى كل القصه

    كسره من عندي انا
    قالو طايره جات فوق دار تضرب الخرطوم ضربت حمام عمك

    1. زي ما غنى مصطفى سيد احمد بديت احلم

  10. دحين جيت صادي تانى

    الناس ديل الله يسترنا معاهم شان لو قمنا والله كعبين حقو يستحو شويه (حبيبه من الاختشاء)

    1. وحات الله يا ود عوض نحنا تاني ( قومة الصباح ) ما نقوما !!
      ( شمباتي ممنوع من التعليق .)

      1. جنوبي !!!! ( قومة الصباح )يااااااتا ؟؟؟؟؟؟
        ما تقول لي عشان نقول نشيد العلم

      2. تل أبيب بالاشاره يفهم

      3. منعونى الوصال والحب الحلال !!
        اهئ اهئ اهئ

      4. المندهش .. انت ذاااتك ممنوع .
        عبيد .. انت زول كويس.
        شمباتي .. الليله واقف في الشهداء لمدة خمسه دقايق استمع لذلك الصوت الجهوري يردد اسماء امراض تعالجها المورينغا ولااااا في جهة رسمية جات قالت ليهو اثباتك شنو كده ومن ضمن الامراض القومه يا المندهش ولاااا قعد يخجل ..

  11. طيارة
    جات بي فوق
    يا حاج أنا
    اتْضَرّعت
    واتبخترت
    زي ( جقهّ )
    خاشّه السوق
    يا حاج أنا
    ——
    طيارة
    جات بي فوق
    خشّت سمانا
    تحوم
    كسرت
    علي اليرموك
    حرقت
    حشا الخرطوم
    بعد الرغيف
    والسوق
    واللقمه
    ما بتحوق
    صبح الهوان
    مطلوق
    ( اسرائيل ) هنا
    يا حاج أنا
    —–
    ما أروعك يا هاشم

    1. ما اروع اقتباساتك من هاشم يا المندهش

  12. GOD keep sudan in peace .. AAmeeeeeen

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: