لماذا ماتت الدجاجة؟

جاء في تفاصيل الاعترافات التي أدلى بها المتهمون في المحاولة (التخريقلابية) الأخيرة التي تم نشرها مؤخراً بالصحف مشاركة (فكي) ليقوم بأعمال الدجل والشعوذة، حيث أقرَّ (الفكي) بأن ضابطاً برتبة اللواء لجأ إليه للقيام بعمل يمنع تحركات قيادات متنفذة في الحكومة وجهاز الأمن وذكر (الفكي) في إفاداته أنه طلب من المتهمين إحضار (دجاجة) ، وعندما جاء بها أحدهم في (ضهرية) عربته وجدها (ميتة) …. ترى لماذا ماتت الدجاجة :
• ميكانيكي : شوف يا معلم الجدادة دي ختوها في ضهرية العربية والعربية الظاهر المساعدين الوراء بتاعنها خفاف ومع الحفر والمطبات الجدادة ما إستحملت ولحقت أمات طه
• جزار : هو ذاتو ده إنقلاب وللا (دقة ظار) جدادة شنو كانو يكلمونى كنتا جبت ليهم خروف عمبلوك لو ختوهو في الفرن ما يموت مش ضهرية عربية
• معالج بالأعشاب : مفروض كان قبل ما يدخلوها ضهرية العربية يدوها شوية من بذر الكتان ويخلطوا معاها فنجان محريب وشوية حبة سوداء عشان المشروب ده بيعالج السخانة والكتمة بتاعت الضهرية
• حماية المستهلك : نحن دائماً ننبه المواطنين إلى ضرورة التأكد من صلاحية المنتج والحفظ والتخزين السليم له ومن الواضح أن هذه الدجاجة لم تحفظ في درجة حرارة مناسبة مما أدي إلى نفوقها
• طبيب بيطري : القصة ما عاوزة ليها أي نقاش الدجاجة دى ماتت بي أبوفرار (السحائي يعني) .. خاتينها في ضهرية العربية في الشمس الحارة دي ولافين بيها لحدت ما حصل ليها الحصل ليها
• ريئس تحرير : لو ماتت ما تموت الأهم من ده كولو المانشيت : (دجاجة تقرر مصير امة) !
• خضرجي : كان لازم تموت .. الجدادة دي تكون ماتت بالأنيمياء .. الجداد زمان أيام الدنيا بي خيرا كان بيدوهو في البيوت باقي الرجلة وباقي الخدرة هسه البيوت بقت ناشفة وما فيها حاجة يرموها للجداد
• تاجر إسبيرات : شوف يا معلم واضح جداً إنو الجدادة دي ما (أصلية) وتجارية ساكت .. لانو لو أصلية كانت إتحملت السخانة وكده .. السوق كلو بقى مضروب
• عالم نفسي : ليس الأمر هو في موت الدجاجة بل في رد الفعل النفسي والحالة العصبية للشخص الذي قام بفتح الضهرية ووجدها ميتة
• إداري فريق قمة : غايتو أنحنا الفكي لمن يقول لينا جيبو جدادة وللا ديك قاعدين نوديهو ليهو بي (ركشة) عشان جنس الحاجات دي
• سمسار عربات : كان يكلموني والله وعلي بالطلاق بالتلاتة كنتا جبتا ليهم جدادة (كرت) موديل السنة وكمان (فل أوبشن) بدل البتكتلا السخانة دي
• خطيب : لقد قدر الله سبخانه وتعالي أن تموت هذه الدجاجة قبل ذبحها لأنها كانت ستقدم قرباناً للشيطان وفي هذا إثم وشرك عظيم
• عجلاتي : شوف يا اسطي السخانة دي مش تكتل ليها جدادة دي ترخي (الجنزير) وتفتل (الميزان) ذاااتو لو ما نفست اللساتك
• مهندس كمبيوتر : 2 مروحة (بروسيسور) في الضهرية وكانت المشكلة إتحلت والجداده كان وصلت (للفكي)
• شرطي مرور : والله أنا بفتكر القصة كووولها من (كترت الأستوبات) الجدادة دي مما إشتروها من السوق وختوها في الضهرية يكونوا وقفوا بيها في ستمية إستوب لحدت ما السخانو قرضتا
• كاتب رياضى : والله نحنا بنعرف (حمام ميت) لكن جداد ميت دي ما أدونا ليها
• سياسي معارض : عرفنا الجماعة ديل ما بيعرفو يختو الرجل المناسب في المكان المناسب كمان (الجداد المناسب ) في المكان المناسب ما بعرفو يختوهو؟

• كسرة (إعلان مكيفات) :

الكامير في سوق الدجاج .. مواطن يشتري من بائع الدجاج (دجاجة) يفتح ضهرية العربة ويضعها ثم يحكم أغلاقها وينطلق .. يصل إلى منزله .. يترجل من العربة ويفتح الضهرية .. يمسك بإحدي يديه بالدجاجة ويرفعها في الهواء وهي تصيح وباليد الأخري مروحة وهو يقول :
– إنها لا زالت حية لأنها كانت تستمتع بهواء مراوح (تي أم تي) .. مراوح (تي أم تي) تقوم بتلبطيف الجو حتى لو كان في سخونة هذه الضهرية !

كسرة ثابتة :
الأربعاء 12/12/2012م الإحتفال بالذكرى السنوية للكسرة الثابتة بإذن الله تعالى – تابعونا –

Advertisements

26 تعليق

  1. برنجية مشترك مع يوسف

    1. مبروكة مع انها زي جداده الفاتح

      1. يعني بتاعين فطيس مش ?

      2. كااااااااك

  2. البركة الماتت أصلو البباري الجداد بوديهو الكوش ، وكوش قوش ما دايرين

    1. هو ذاتو ده شنو اللا خطه بديله لا جدادة بديله صحي تخريبيه !
      يعني لو نجحت كان عملو مؤتمر الدجل العالمي تحت رعاية مستشار الرئيس الفكي أبكر !
      لاكين الحكومه كضابه ياخ

      1. الفكي أبكر زااتو طلع ماسورة وما عارف حاجة ، سمعنا بالديك الأحمر لكن بالجدادة دي والله أول مرة
        تباً لحكم يُزال بجدادة

    2. حلوة ومبلعوبة وانا من عندي ولا كوشة الشيخ وزيادة كمان ولا اي كوشة من الكوش الحولنا دي هع شوفي لينا الجديد الجديد شديد هع

  3. نقول لأهل الحكم
    إن الفجور في الخصومة
    خلة من النفاق
    فإذا كان أصحاب المحاولة الانقلابية أو التخريبية هم من صفوة
    الجناح العسكري لحركة الإسلاميين ويستعينون بالجن لانجاح
    محاولتهم، فعلى الحركة الإسلامية إعادة النظر في أمر المنتسبين
    لها وتكثيق دورات دروس التربية الإسلامية

    1. آآآآطلحه دين يصنعوا ليهو علامة الصلاة في سوق ليبيا دا مو دين

  4. والله نحن بقينا عايزين نتخارج بس بي جدادة بي فروجة أن شاء الله بي فأر ,,,,,الرووووووووووووووووووووووب!

    1. بسسس انت جيتني في بكاني . مش انت ابو ملك ? ياخي انا عندي بت اسمها ( ملك ) واهلي كل يوم ناطي لي واحد يقول لي الشيوخ قالو مابجوز يسمو البت ملك ما عرفتهم قرمانين لحمه ولأ صادقين ! اها انت عندك سند ديني ولآ زيي من المؤلفه قلوبهم ولآ انت ما ابو ملك ولآ هي الجدادة دي ماتت كيتا فينا ولأ الجدادة دي مؤتمر وطني لأنو جداد الزمن ده كلو ماعندو اصل جداد فقاسات ساااااكت هم الشيوخ ديل زاااتهم يعني خلاااااص

      1. ههههههههههههههههههههههههههههههه,,يا مؤلف انت , كيف الوصول ليك ؟؟
        انا خلااااص بقيت جاى !!!

      2. شمباتي يا حبيب جيتك لو بعد 22 يبقي هناك ولو قبل يبقي هنا .
        لكن تلاقت الارواح .
        قت ليك شفت الخضرجي وسواتو فيكم ! ههههه ياخي سواقين الحفلات لمن يقعدو مع بعض بيعرفو منو السواق ومنو الجوكي ساااكت ! فرضنا الجهات المسعوره ما عرفتو انتو ماااالكم !

      3. اها انا جيت قبل 22 دا !!

    2. والله الزول ده بيض ساي كان يشيل لي بشه حمامه ده كان سلمن ليها قبال ماتتقلب

      ناس الفيس بوك:مسطول مشي لي ست شاي قامت قالت ليهو اديك جبنه !!قال ليها:لا الجداد نزل الطوب ههههه
      28لايك و97تعليق و6مشاركه

  5. …غايتو ربنا ستر يعني الحكايه لو نجحت إحتمال شعارنا بدل صقر الجديان يكون جداده و في الغالب يكون نشيد العلم:
    نحن جند الله جداد الوطن…الي أن نقول هذه الارض لنا قفصا بين الامم ….الخ
    و أظرف حاجه الجماعه الحاكمننا بيكونوا مجموعه من ديوك العده و الجماعه الوراهم كميات من البيض.

    1. انت مالك جاري لشعارنا ونشيد العلم يعني طله طير طيارات تقع خط طير يبعوه طير يذبحوه الناس ديل ما يلزموا الجابره هم لسه ما عارفين الناس مش عاوزاهم والا شنو عجبي

  6. طبعا الجدادة مستوردة وكدة طالما ما اتحملت السخانه ولو كان الموضوع نجح كنا حا نقول جداد الحلة تطرد جداد البيت

    1. الدجاجة الصغيرة الحمراء هع

  7. لعله تم تصفيتها استكمالا لمسلسل الفتنة والمؤامرة الكونية التي تتعرض لها امتنا

  8. يعني حكومة دجل وشعوذه(باسم الدين) والعاوزين يقلبوها برضه دجل وشعوذه (انا مش فاهم يعني شنو)

  9. ربنا لاتجعل الكرسى اكبر همنا

  10. الجدادة ماتت غبينة سااااااااااااااكت من الشايلنها لانهم شبهينا واتلاقينا ومن القاعدين رحمها الله واسكنها اعلى منزلة للدجاج ماتت زي محمد احمد غبينة غبينة أأأأأأأأأناس

  11. ربنا لا تجعل الكرسى اكبر همنا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: