الذكرى السنوية للكسرة الثابتة (FAQ’s)

بمناسبة الإحتفال بالذكرى السنوية للكسرة الثابتة يسرني أن أقوم بالرد على الإسئلة التى كان يسألنى لها القراء خلال هذا العام

س : ما هي قصة خط هيثرو والكسرة الثابتة التى تذيل بها مقالاتك منذ عام؟
ج : عشان تعرف اصل الحكاية أضغط على اللنك ده
https://alfatihgabra.wordpress.com/2011/06/29/%D8%A7%D9%84%D8%AE%D8%B7-%D8%A5%D8%AA%D8%B3%D8%B1%D9%82-%D9%8A%D8%A7-%D8%B1%D8%AC%D8%A7%D8%A7%D8%A7%D9%84%D8%A9/
س : طيب ومافيش مسئول هببوا ليك؟
ج : برضو عشان تعرف الإجابه أضغط على اللنك ده
https://alfatihgabra.wordpress.com/2012/02/13/%D9%86%D8%B4%D9%88%D9%81-%D8%A2%D8%AE%D8%B1%D8%AA%D8%A7/
س : وهل تمت الإستجابه بعد مقالك ده ؟
ج : عشان تعرف كدي أضغط على اللنك ده
https://alfatihgabra.wordpress.com/2012/05/16/%D9%85%D8%A7-%D8%B7%D9%86%D8%B4%D9%88%D9%86%D8%A7-%D9%88%D9%83%D8%AF%D9%87/
س: طيب ممكن تورينا بالتقريب كده الخط ده إتباع متين؟ وبى كم كده؟
ج : قبل حوالي ستة سبعة سنوات … يعني حوالى 50 مليون يورو !! لو ما أكتر
س: وهل الحكومة على علم بذلك؟
ج : والله (حمدو في بطنو) لكن هى أقرت بسرقة الخط قبل حوالي 3 سنوات من الآن
س : والحكومة عملت شنو؟
ج : قام البرلمان بإستجواب السيد وزير الدولة للنقل والذي قام بتشكيل لجنة تحقيق حول الموضوع
س : ولجنة التحقبق توصلت لشنو؟
ج : لجنة التحقيق توصلت إنو فعلاً الخط تم بيعه وتم تحديد الضالعين في مسألة البيع وكمان معاهم (السماسرة) وقد صرح حينها وزير الدولة للنقل عن اكتمال التحقيقات وتحويل الضالعين الي القضاء
(أضغط على هذا اللنك)
http://www.alsahafa.sd/details.php?articleid=47259
س : طيب والحصل بعد داك شنو؟
ج : القصة نامت .. ذيها ذي (الأقطان) ..ذيها ذي تجاوزات (المدينة الرياضية ) ذيها ذي أي ملف فساد
س : تفتكر نامت ليه؟
ج : عشان الناس طبعن تنسى الموضوع وكده .. ما نحنا شعب (زهايمر) وكده
س: يعني إنتا هسه الكسرة بتاعتك دى عشان توريهم إنو الشعب متذكر وقاعد منتظر محاكمة الناس السرقو خطو؟
ج : طبعن … بالضبط كده
س : طيب ليه إنتا إخترتا (خط هيثرو) ده وما إخترتا أي ملف فساد تاني؟
ج : لأنو دي سرقة واااااضحة وما عاوزة ليها أي كلام … يعني ما تفاوى فاسدة عشان واحد يجي يقول ليك نسبة الإنبات صحيحة أو ما فيها فطريات وللا شنو ما بعرف .. خط وإتسرق وإتباع لى شركة تانية وقاعدة تقدل بيهو !! يعني القصة ما عاوزة ليها المحقق كونان ممكن ضابط صف (يظبطا) وكده !
س : إلى ماذا تعزى تأخر تقديم المتهمين إلى محاكمة؟
ج : فقه السترة (طبعن) !
س : هل إذا تمت محاكمتهم سوف يسترد المواطن السوداني (خطو) وللا ح يسترد (قروشو)؟
ج : أفتكر دي مسألة قانون ….. (ده لو فضل فيها قانون) وكده
س : هل تعتقد أن الإحتفال بمرور عام على الكسرة الثابتة سوف يجعل المسئولين يقومون بتقديم المتهمين إلى العدالة؟
ج : عدالة مين ؟ يااااخ ديل عليهم تخانة جلد …. ما عادية؟
س : ليه مش المسئولين ديل بيطبقوا الشريعة؟
ج : أيوه بيطبقوها …………………….. ويختوها يقعدوا عليها !
كسرة :
نشكر كل الصحف اليومية والإخوة الزملاء كتاب الأعمدة والمواقع الأسفيرية التى إحتفلت (حزنا) معنا بالذكري السنوية للكسرة الثابتة .. وسوف نشكر لها إحتفالها معنا بالذكرى (المئوية) إذا إستمر الحال كما هو عليه !!
كسرة ثابتة (نيو لوك) :
أخبار ملف خط هيثرو العند النائب العام شنــ(12+1)ــــو؟ ….. شكلها حلو مش كدة؟

44 تعليق

    1. بس التدخين في الخط ما ممنوع زي التدخين في الطيارات نتمبك ساكت

  1. ايه رأيكم ،، بس اشان تعامنوا
    احتفالا بالذكري السنويه وكده مساهرين وكده يعني

  2. يا الحبيب الفاتح انتا ما بتنوم ولا شنو
    اها ما تعمل لينا كسره كمان لي قصه الأقطان و العماره الوقعت وأوقاف البلد الموجوده في الاراضي المقدسه والعرس الكتير من قبل المسعولييين وبالظروف بتاعه البلد دي والتي فعلا تستفز شعور المواطن وعشان نوريك نحن ما بننسي أبدا وأي حاجه ما ناسينها ومش خط هيثرو بس.
    انت بالمناسبه قصه العماره الحصل فيها شنو ووالله العظيم غايظاني جنس غيظ

    1. بدل كده لانها متعبة يقول بس كسرة كوكتيل هع

  3. لكن المره دي عشان الذكري بس سماح

    1. تحيتي (ظل) شايفك خاتي ليك قطعه سوداء بدبوسة العزاء لنا جميعا في بلد صارت هايصه

  4. السلام عليكم…. الاستاذ الفاتح شكلو كدة حا نحتفل باليوبيل الفضي وبرضو بدون إجابة !!!

  5. انا مش عاوز برنجيات انا حداد اليوم ووآحداداه عليك بلد

    1. الزلمات فى الحداد بتاعهم بيوزعوا سجاير مارلبورو احمر مش برنجى,, تقول لى حادى ,, خلى عنك يا زول و بارك لاخوك العبيد …

      1. الأخ فلاديمير
        الزلمات ديل ما ناس تابورني ولكن نحن ناس البرنجي و تل أبيب بالاشارتو يفهموا.
        كسره:
        أنتو الحصل شنو في موضوع العماره الوقعت زماااان وما مشت للنائب العام وعييييييك ليها سينييييين

  6. الغلبان حداد من شنو ولا شنو ولا شنو ولا شنو….

    1. كوكتيل يا خوي يا المندهش كووووووووووووكتييييييييييييييييييل الله غالب

  7. البروف العزيز تعيش وتفتكر يا اخوي
    والظاهر حنقول ليك عقبال مية شمعة

    1. كسرة ثابتة (نيو لوك) :
      أخبار ملف خط هيثرو العند النائب العام شنــ(12+1)ــــو؟ ….. شكلها حلو مش كدة؟

      سيادة البروف,, بالنيولوك دى ذكرتنى بورقة الالف جنيه بتاعتنا اللى شالو التلاتة اصفار منها و عملوها (جنيه) !!!

  8. المتواجدون الآن في الساعة 8 وربع 129 شخص !!!!!!

    1. كلنا قاعدين و حارسين الالعاب النارية و المفرقعات بهذه المناسبة المؤسفة !!!

  9. كما وردني عن الدجاجه اليوم في يوم ألجداد اقصد الحداد

    لماذا عبرت الدجاجة الطريق ؟‏
    الأجــوبــــة :
    أفلاطون :
    بالنسبة لها الحقيقة موجودة في الطرف الآخر. وربما كانت ذاهبة إلى العالم الفاضل !!
    أرسطو :
    إنها طبيعة الدجاج … وبما أنها دجاجة وكان الطريق مفتوحاً فإن العبور
    نتيجة منطقية !!
    كارل ماركس :
    هذه حتمية تاريخية تحددت منذ الأزل.
    سيغموند فرويد :
    إن الاهتمام بعبور الدجاجة للطريق يدل على وجود اضطراب في المشاعر الدفينة.
    آينشتاين : هل كانت الدجاجة هي التي عبرت الطريق ،أم أن الطريق هو الذي
    تحرك تحت أقدام الدجاجة ؟ … فهذا يتعلق بنسبية الأشياء !!
    الإمام الصادق المهدي :
    نحنُ ندين و نستنكر أن تعبر الدجاجة الطريق دون ميثاق عبور و نلخصه في
    النقاط الثلاثة التالية ، واحد : الدجاجة حسب قوانين اللغة العربية هي
    أنثى و العادات و التقاليد و الاعراف الدولية تسمح للمرأة عبور الطريق.
    ثانياً : الدجاجة لابد أن تكون على علم مسبق بأحوال الطقس و هذا يعتمد
    على أربع نقاط ، النقطة الاولى : أن يكون هنالك إرصاد جوي يقوم على أسس
    علمية سليمة ، النقطة الثانية : لابد من توفر وسائل نقل معلومات الطقس
    للأفراد خصوصاً في الاقاليم و وسائل نقل المعلومات ستة ، الوسيلة رقم
    واحد : التلفزيون ، و التلفزيون هو أحد وسائل نقل المعلومات السريعة في
    العالم و هو المتوفر لدى قطاع عريض من الشعب. و لكي يكون التلفزيون وسيلة
    فعالة يجب توفر ثلاث عوامل ، العامل الاول : الكهرباء ، و نعلم أن
    الكهرباء في العالم هي من أفضل وسائل الطاقة للأسباب التالية ، السبب
    الاول : الكهرباء أكثر مصادر الطاقة صداقة للبيئة ، و كما نعلم أن
    السودان يجب أن يقوم بإستهلاك مياه النيل للزيادة من إنتاج الكهرباء ، و
    إتفاقية مياه النيل القائمة منذ العام 1952 بين أربع دول من حوض النيل ،
    الدولة الاولى : مصر ، و مصر هي الدولة العربية
    ……………………………………. و ذلك يعزى لخمس مقاييس ،
    ………………………………………………….. النقطة
    السابعة …………………………………………………………..ثالثاً

    الله أكبر ولله الحمد.
    الدكتور حسن الترابي:
    كما تعلمون ، الدجاجة ، هاهاها ، يمكن أن تكون ذاهبة للعمل أو لتبيض في
    مكان آمن هاهاها .. و لا يمكن بطبيعة الحال أن نفصل عبور الدجاجة للطريق
    عن الغاية العليا من وجود الدجاجة نفسها ، و هي إرجاع الدجاجة إلى الله ،
    كلُ هذا ، كل هذا يرجع هههه إنشاءالله توحيداً لله رب العالمين ، و يجب
    على بقية القفص أن يقرأوا تاريخ الدجاج و الاستفادة من أي طريق أو شارع
    حتى ياخذوا العبرة تمدهم توجيها و تجديداً لشريعة الدجاج و على واقع
    الطريق و إنزال أمر الله في القفص إنشالله ماشاءالله تعالى ههه
    السيد الحسيب النسيب الميرغني:
    الدجاجة ، شردت من مزرعة ابوي … رجعوها لي ، و ليس لدي ما أقوله الآن

    1. العبيد ,, الليلة عاد بمناسبة الذكرى المئوية برنجيتك دى ما (قوية جدا) و بالحيل, و فوق الوصف ,, و يا ربى مزود عليها بعض الرتوش و الا (ايسكتو) سااااى ؟؟

      1. فيلاديمير
        أقول ليك قولا ،اها ح احردها لمده أسبوعين وذلك بمناسبه راس السنه وانشالله برضو بعد دا تلقي ليك نفس

  10. كل كسرة و انتو سالمين .
    قف .
    ما ضاع حق وراءه مطالب وعاش ابو الدقيق حرا مستقلا .

    1. دا لو فضل واحد من اصحاب الحق انت ما عارف انهم عاوزين يرحلوا المواطنين كووووووووولهم من البلد شكلك ما بتقرأ جرايد وما متابع اخبار

  11. كده احلى خ ه / ن ع / ١٢ / ١

  12. هابي بيرث دى تو يو
    سنة حلوة يا جميل
    سنة حلوة يا خط هيثرو
    سنة حلوة يا جميل
    و أوووووووووووووف نطفي شمعة سنة مليئة بالفساد و المفسدين في ظل مشروعنا الحضاري العظيم
    و نوجز اهمها في الاتي: (تحليل الربا – الرشوة – محاسبة المواطن للحاكم او مطالبته بحقوقه كفر بواح – اجازة فقه السترة)
    و اخيرا يضحك مواطنو دولة المشروع من مسرحية الانقلاب
    و يصفقون بحرارة لكل الممثلين
    و لكن غصة و سط الضجكات لدماء اربعة من ابنائها و قد القو مقتولين على طرف احدى الترع
    و السنة القابلة و المائة القادمة سيكون نفس الممثلين ولكن باختلاف ادوارهم
    (ما اصلو مسرحهم و كدة)
    كسرة:
    الملفات كووووووولها العند النائب العام ممكن نمشي نشيعا لي احمد شرفي و ندفنا و يقام العزاء بوزارة العدل.

    1. عزيزي شرقاوي سلام والله انا في الجوقة دي كوووووووووولها ما محيرني الا ابو ريالة

  13. وزير الدفاع
    ليس لدينا أي معلومات حول الاحتفال .. ولكن نحتفظ بحق الرد في المكان والزمان المناسبين!

    *وزير الخارجية
    الاحتفال بالكسره يساهم بصورة كبيرة في تقدم اتجاهاتنا لتطبيع العلاقات بين الخرطوم وهيثرو .. لمصلحة الدوله التي تتوق لنشر الاسلام .. ونؤكد على موقفنا الرافض لبريطانيا وسياساتها المتآمرة ضد السودان! .

    *وزيري المالية و السياحة
    بيع الخط فيه مصلحة كبيرة للسودان حيث يقل عدد الشهداء وهذا الأهم .. ويوجه انظار العالم للسودان مما يعكس الجانب المشرق لهذا البلد ويشجع السياحة؟.. ويدر كميات كبيرة من الدولار الناتج عن التعويضات البريطانية للسودان .. مما يساهم في حلحلة مشاكل السودان الاقتصادية ويعفيه من الدخول في القروض الربوية الشيطانية .؟

    *هيئة علماء السودان
    الخط الناقل بين بريطانيا و السودان حرام شرعاً ياجماع الأمة وعلماءها ..ويودي الي زياده عدد المشركين الي السودان

    اسحق محمد فصل الله تحت عنوان “حرب الخطوط”*
    وحرب الخطوط تبدا الآن .. حروب كلها ضد السودان والاسلام!
    وأمس الأول وبعد تسرب خبر التعويضات الهائلة نتيجة بيع خط هيثرو ، نحدث عن العربة رقم (ح خ235…) و (خ ج 258 ..) وسائقهما الذي هاتفه يبدأ ب (+2499) يدخل الى السودان اجهزة حديثة جدا عن طريق منظمة فرنسية تتبع للمخابرات الامريكية .. مهمتها ابعاد المشتري عن السودان حتى لا ينعم بمليم احمر .. والماسونيون وقائدهم في السودان (ا.ف) و .. و .. ينظرون الى اسفل الارض بعد تحول مشروعهم لتحطيم السودان الى اكبر مشروع لدعم السودان .. واحد قادة المعارضة واحد قادة التمرد هم الان على متن الخط مع المشتري يحاولون توجيهه نحو القصر والقيام بانقلاب عسكري . . واوكامبو يجهز ورقته لاتهام البشير بتهمة الابادة الجماعية ..و..و .. وهذا ما نستطيع نشره

    1. قوية ,,
      قوية منك والله !
      تحياتى

  14. ارمي قدام وهي لله حد فاهم حاجة يا مثبت العقل والدين

  15. لك التحية وكمان التحية القوية (اسحق محمد فصل الله تحت عنوان “حرب الخطوط) وين مقطوع الطاري ده

  16. خط هيثرو مفقود مفقود
    حتي النيل فقد شنباتو
    غير قادر علي اطعام اهله
    مرتخيا تماما و غير قادر علي الانتصاب!!!

    1. هييييييييييييييييييي !!

  17. سؤال برئ جدا و ياريت ما تفهمونى غلط يا اخوان ,, لو افترضنا انو لقينا الخط و اللى سرقوهوا و قدمناهم للمحاكمة و رجعوا لينا الخط و التعويض عن الفترة اللى كان غيرنا بيقدلوا فيهو,, يا ترى وين طياراتنا و وين امكانياتنا اللى تسمح لينا بان نرجع نستخدمو مرة تانية و نشوف شعارنا يحلق فى اجواء هيثرو و اوربا عموما ؟؟؟؟؟

    1. والله فعلا سؤال برئ
      كدي الخط يرجع انشاء نطير فيهو طيارات ورق
      او طياره بدون طيار وتقع لينا ف فرنسا ويدونا عليها تعويض كويس ……وبعدين الخط ده ليهو كم؟ والبرجعو منو؟ والبعوضك منو؟ وحالتك فلاديمير لو كنتا غلبان كنتا بتحلم كبف؟

    2. الخط آبرجع دي معروفة بس يحاكموهم وانا انفشششششششششششه

  18. الخوف بدل يحاكموهم يحااااكووهم ونتغشششششه ..
    هسع الخط موجووود و المشتري موجود البخلي البايع مبهم شنو ?
    هسي الاشتري الخط ده يقول علينا شنو ? ياربي مستوعب الحاصل ولأ متحير !

    1. اكيد قبلوا برجف وعارف اننا بندق ياي في البيعه بس على بال مانق الياي بيكون استفاد لانه اكيد اشتراه بتراب الفلوس

  19. هيييي انا جيت !
    سلام يا احباب ,,
    الحمدلله وصلنا ارض التعب وشظف العيش لنشارك فى الاحتفالية من الداخل ,,
    ويا جنوبى اظهر وبطل دغالة , كع كرع رع

    1. جيدا جيت – مرحب يا شنباتى, جيت مع احتفالات الكريسماس و رأس السنة و احتفالية الكسرة الثابتة؟

      1. مرحب بيك دكتور شمباتي …..شكلك جيت تحضر حفل طيور الجنه !!!
        ولا انتا تبع الفرقه

      2. فلاديمير..
        تسلم يا الحبيب ,, اصلى بجى مع الحاجات السمحة ,, عندك شنو سمح الحقو ليك ؟؟

        قوية..
        هههههههههههههههههههههههههههه,,فعلا تبع الفرقة , تطير ما ترك انت ….

  20. (( بدون تعليق – NO COMMENT)
    استقالة ليبرمان
    المصدر: القدس المحتلة ــ رويترز التاريخ: 15 ديسمبر 2012
    قال وزير الخارجية الإسرائيلي أفيغدور ليبرمان، أمس، إنه قرر الاستقالة بعد اتهامه بالاحتيال وخيانة الأمانة، في خطوة يمكن أن تكون لها تداعيات على الانتخابات العامة المقبلة. وقال ليبرمان في بيان عبر البريد الالكتروني «رغم أني أعلم أنني لم أرتكب أي جريمة، فقد قررت الاستقالة من منصبي وزيراً للخارجية ونائباً لرئيس الوزراء». وعبر عن أمله في تبرئة ساحته دون إبطاء. وتوقعت استطلاعات للرأي فوز الحزب اليميني الذي ينتمي إليه ليبرمان ورئيس الوزراء بنيامين نتنياهو في الانتخابات المقررة في ‬22 يناير المقبل، ولم يتضح ما إذا كان خروجه من السباق سيضر بفرص الحزب.

  21. وآاسلاماه لا يستطيع المتمرجية ان يكونوا مثل لبرمان هع امانه ما مان لكن هع ثاني

  22. يا عم جبرة أنا عندي ليك اقتراح مفيد بخصوص الكسرة، عليك الله المرة دي شرفني بي ردك عليو.
    اها.. حقو (للفايدة العامة يعني) الكسرة الثابتة لمن تتم سنة طوالي تفتح تحتا كسرة جديدة (كسرة ثابتة 2) ويكون فيها قضية جديدة (ودي طبعا رااااقدة أشكال وأنواع). والحسابة بتحسب ليهم الاتنين

    رجاء اديني رأيك في الحتة دي، تسلم يا عمنا

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: