الله في

الأستاذ الجليل / الفاتح جبرا
كيف الحال والاحوال عساك بخير وصحه
أنا إبنتك الطبيبة (سارة) .. في ذات اليوم الذي شهدت الخرطوم مظاهرات على خلفية مقتل أربعه طلاب بجامعة الجزيره.. توقفت الحركة تماماً في وسط الخرطوم .. وكنت أود العودة للمنزل بأم درمان وبعد وقت طويل من الإنتظار توقفت إحدى الحافلات وقد رأيت أن أنقل لقرائك الكرام السيناريو :

بدأ الكمساري في النداء .. أررررح .. يلا ..حركو .. حركو .. أم در
مان الشهداء.. الناس لمت ومكابسه شديده.. النفر جنييهين.. الناس اتراجعت حبه.. جنيهين أخير من خمسه أحسن الناس تركب دا ماوقت حساب.. وبتاع الحافله عارف وضاغط على إحتياج الناس.. وركبنا الحافلة وبدأت الحوارات بين الركاب

(1)
الطلبه ديل ماعندهم موضوع.. فى شنو هسى بطلعهم مظاهرات..
والله دايرين يجوطو علينا البلد دى..
يجوطو ليها شنو ياحاج هى جايطه طبيعى..
لا لا ماكدى هسى ياولدى نحنا من المغرب مالاقين مواصلات..
يعنى الجديد شنو ما يومى بعد المغرب ما بنلقى مواصلات..
اى صحى لكن برضو..
برضو شنو .. برضو شنو.. والله ياحاج الحكومه دى معتمدا على برضو بتاعتنا دى..

(2)

ياولدى الشعب فى وادى والطلبه ديل فى واااااادى تانى..
هسى بس قول لى الجدا شنو الليله قامو كسرو الواطه..
ليه يا ابوى انتا ماسمعتا بالطلبه الإتقتلو فى الجزيره..
يابتى الطلبه ديل السمعنا غرقو ولا شنو ؟؟
ياأبوى الطلبه ديل كانوا فى ركن اعتقلوهم.. إختفوا كم يوم ظهرو فى الترعه يبقو غرقو كيف؟؟
لا حول ولا قوة الا بالله.. والله قرينا فى الجريده قالو غرقو.. هو الكلام وراهو كلام..
آى الكلام وراهو كلامات ما كلام واحد البلد دى بقى مافيها كبير غير صوت العسكر..

(3)

والله ياولدى نفسك حار اخير تبقى عشره على روحك بكره نلقاك فى ترعه..
يا خاله ماتخلينى اهتف هنا دا بالروح بالدم نفديك يا سودان..
هو لسه فى ناس بتهتف..
اى وما براى الطلبه الشفتيهم الليله ديل كلهم بهتفو.. بس دايرينكم تهتفوا معانا..
والله ياولدى أنا شايفه كان شفتا قرايتك أخير ليك…
ياخاله أنا هسى بقرا.. اتخرج بكره ما اشتغل.. الساكتيين ليها شنو..

(4)

نحنا ما دايرين نسكت لكن الله غالب..
يا أبوى مشكلتنا اننا رمينا طوبة مشاكلنا…
يا بتى انتو ما بتقدرو على الحكومه دى أرجعو لأشغالكم وقرايتكم وشوفو درب المطار بي وين..
درب المطار معروف لكن البلد دى ماحقت الحكومه عشان نخليا ليهم..
امشو وتعالو تلقوها اتصلحت..
يا حاج البصلحا منو كن كلنا مرقنا..
انت ياولدى راسك يابس..
ماراسو يابس يا أبوى لكن كلامنا أعوج لو كلنا مرقنا نجى نلقاها اتصلحت كيفن؟؟
الله فى ..
ونعم بالله..

كسرة :
نعم يا بتي .. الله في

كسرة ثابتة:
أخبار ملف خط هيثرو العند النائب العام شنــ(12+1)ــــو؟

35 تعليق

  1. برنجييييييييييية

    1. بلدا مافيها شمباتى تقدل فيها انت..
      ههههههههههه..
      مبروكة يا الحبيب

    2. لاكين مااا ادهشتنا يا المندهش ,, قايلنك اقلعت عن الانفاس خلاس ,, مباركة و سعيدة عليك

      1. انا عماري ساكت وكفاية علي النفس الطالع ونازل في البلد ديييييييييييييييييييييييييييه

    3. جيت لينا جيت لينا …
      طيرت عبيد ? عقبال كل مكنكش .
      اعتقال في ركن النقاش!! عجبي !
      انتو كوكو وييينو ?
      شمباتي .. جيت ? شان الليله انا مقيل حداكم

      1. اعتقال في كل مكان زي القذافي اللجان في كل مكان لحد ما لحق امات طه كلما زاد البطش تاكد ان النهاية قربت

      2. اى والله جيت يا حبيب لكن كنت ملخوم لى جنس لخمة !
        يادوووووب الكراع وقفت !
        لكن بقبضك تب

  2. كباية قهوة كااااربة (ممنوع التدخين !!!!!!)

    1. تعليقك بأنتظار الموافقة بالنشر.???????????

  3. البروف والسمار …. سلام
    وإنتهى ركن النقاش هذا عند نزول ركاب الحافلة كلٌ لمحطته
    ولك الله يا سودان

    1. لا والله ما انتهى ومش راح ينتهي ولما الليل الظالم طول وفجر النور من عينا اتحول لا تيأس من الشعب الابي بس البتمناه ما يكونش عفى الله عما سلف اتمنى وكمان اتمنى ان يكون اصحاب (الثورة) هم من يحكمون مش ناس جناح ام جكوا وتيس ست نفيسه والثعلب المكار (الثعلب المكار بين قوسين يا المندهش)

  4. اممممممم..زى الما متاكدين كدة مالكم!؟

    1. المهم إنت
      متأكد ؟؟؟؟؟

      1. السلام عليكم الاخوة السمار بعد غيبه .كلوا اول ليه أأأأأخر.

      2. المندهش…
        امممممممم,ما تعصر لى ياخ ! انا ما بحمل جنس دا

    2. كلنا متأكدين,, بس منو البيقنع لينا الديك ؟؟؟

      1. ود بوتين
        الديك بتقنعو جدادة فكي أبكر المشاركة في المحاولة الأخيرة

      2. بل خليها وين ما ترسي ترسي هيلمانه ساكت ماشه سمبله

      3. المندهش – الجدادة ما ماتت قبل ما توصل للفكى, و التحقيقات فى سبب موتا لسة ما انتهت,, و هسة قاعدين يشكلوا فى لجان مشتركة عشان تسريع التحقيق , و بعدين يحولو ملفها للنايب العام !!!

  5. شعب ما مفهوم خايف ؟ ولا ساذج ؟

  6. شوية والاعتقالات تطال القمردينة

  7. والله الملف ده لحق امهات طه زي قصه الجماعه ديك الدخلو الخرتوم مستدرجين اسي في سجن كوبر فى نعيم واولااد الناس الماتو زى الطير ماتفهموما غلط ما قاصد العساكر ابو طيره المهم الماتو ديل دمهم راح سااااااااااى فى اعتقادى حلوه اعتقادى دى الدم اغلا من من خط هيثرو والخط انباع دى اخت الباع بتاعت الخروف مش فى العيد بقول وبرضك بدرى بنضبح خلاص نطالب بالدم بدل هيثرو ونشوف الحيكومه دى قصته شنو

  8. اها جيت صادى تانى اذيدك من الشعر قصيده واحد تاجر استورد ثلاثه حاويات اى والله حاويه ور حاويه اسبيرات الموصفات قالت غير مطابقه وعمك استعوض الكريم فيهن بعد شهرين انبعو فى مزاد والمستندات موجوده والرجل موجود وكان في زول بحاسب ده تلفوني يتصل على واديه المستندات والزول يحكي ليه بالتفصيل الممل ٠٩١٢٣٠٣٠١٠ وتقول لى خط هيثرو برضك

    1. وي عفشي عند ناس الجمارك وانا طالع راجع بلدي بدون عودة 0يا ريتني ما عملتها) كانوا اثنين وثلاثين كرتونة كبيرة صدق يا دا لقيتهم ليك زياده من كم واربعين وما بتسمع غير يا زول دا عفشك يا زول دا عفشك ياناس الكراتين زايده خليك من زايده عفشك والا لا النصيحه خفت اقول كلام كثير ياهو عفشي زاتو يلا وقع وروح جيب ليك لوري وهناك اكتشفت ضياع (برضه بين قوسين ضياع) اكثره هههههه والان بجابد للمخارجة تاني يعني شخصيه والشخصيات كثيرة وبالمستندات عندنا وبي الحنك كثيره والله ما عارفين نقول شنو والا شنو

  9. كتمت كتمت كتمت كتمت …

  10. الوجع رااااااااااااااااااااااااااااااااقد

  11. ان الله لا يغير ما بقوم ..

    1. مغصه اكثر من كده

  12. السلام عليكم ورحمة الله وبركاته استاذ الفاتح

    اولاً نشكرك على كل ما تكتبه لنا فى مدونتكم ساخر سبيل … عندى موضوع مهم جداً كلي امل أن ينشر فى المدونه وتعميمه للمساعدة لوصول الخبر غلى حكومتنا
    يوجد يا استاذي الفاضل كثير من السودانيين مسجونين فى السجون العراقية ابان الحرب مع امريكا بعد هزيمة صدام حسين حاول أهاليهم بشتى الطرق أن يتواصلوا مع الحكومة حتى تضع حد لسجنهم دون جدوى ، وانت زي ما عارفين فى الأوضاع الزي دي بتلقى كثير من الناس تستغل الظروف ، حاول بعض الأهالي التواصل مع افراد عراقيين لتمكينهم من توكيل محامين للدفاع عن أبنائهم ومن ثم اخراجهم وترحيلهم للسودان ، وكثير منهم نُصب عليه وحولوا المبالغ للنصابين بدون فائدة ، تم الاتصال بالسفارة بالأردن قبل ما تفتح السفارة فى بغداد وكل القائمين بأعمال السفارة هناك حدث ولا حرج كعادة الحكومة التسويف وتضييع الوقت والوعود الزائفة ، أخيراً وصلت معلومات مفادها أن جزء من هولاء المساجين قد صدرت بحقهم أحكام قسرية بإعدامهم دون ان توفر لهم محاكمة عادلة ومن المحتمل فى القريب العاجل أن يتم اعدامهم دون أن يدري أهاليهم بذلك .. تواصل بعض الأهالي مع السفارة فى بغداد وقد تحرك بالفعل السفير أو القائم بالأعمال ( مشكوراً ) وتواصل مع السلطات العراقية وأفاد أهالي المسجونين بأن الحكومة العراقية أجلت تنفيذ الأحكام بالإعدام ليس فقط على السودانيين بل من جنسيات عربية أخرى. وإذا لم يتم التحرك الحكومي والاتصال الدبلوماسي عبر القنوات الرسمية واهتمام وزارة العدل السودانية والخارجية بهذا الأمر فإن السلطات العراقية قد تنفذ الأحكام باعدامهم دون حتى أن تدري السفارة هناك فالأمور فى العراق جايطة وتعتمد على الطائفيه والتحزب ، بعض الجهات طلبت الحراك المدني لحث الحكومة السودانية على التحرك إلى العراق للوصول إلى اتفاق بشأن هؤلاء السودانيين ، صراحة بعض الأهالي محتارين كيف يوصلوا للمسئولين ، لذا وأن أناشد الجميع عبر مدونتكم بنشر الخبر بأوسع صورة حتى تلتفت الحكومة لهؤلاء وتهتم بهم وعسى ولعل ان تتمكن من انقاذهم من الموت المحقق على أيد الطائفية العراقية ، أملي فيكم النشر والاهتمام بالأمر وأعلم أنك لن تتوانى فى ذلك.

    1. جماعتنا ديل أسي مشغولين في اعدام سودانين الداخل لمن ينتهوا منهم حتى يقبلو على الفي الخارج

      الله في

      1. صح لسانك والاغلبية من الشعب الفضل بيعدموا فيها بالبطي

    2. الله يكون في عونهم لكن لو راجي ليك رجا من امنا الغولة انسى الموضوع وربي ثانية يكون في عونهم

  13. الله في وفي ناس لابده للبرنجية اشوف فيكم يوم

  14. الله في وهنالك جند من جنود الله (طائرات الانتنوف)بس انشاء الله ماتكمل حتي تكمل الجماعة

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: