التجنيب لغة

التجنيب : هو أن يجنب (المسئول) جزءاً من إيرادات (المصلحة) ويضعها في حساب شخصي يتصرف فيها بمعرفته دون أن تخضع لمراجعة او يحزنون وهذا فساد لم يعرفه السابقون ولا اللاحقون ولا يقره شرع ولا دين ، ده التجنيب (سرقة) فتعالو معاً نشوف التجنيب (لغة) من معجم لسان العرب :
الجنب والجنبة والجانب : شق الإنسان وغيره . كقولك : وقفت إلى جنب المسئول في صف الصلاة (بتحلم طبعن) ، والجمع جنوب وجوانب وجنائب , والأخيرة نادرة ، وشكا الرجل جانبه (يعني قال جنبتي بتوجعني) وضرب الشرطي المتظاهر في جنبه ؛ أي : (إنتهى منو) . ورجل جنيب كأنه يمشي في جانب . وجانبه مجانبة وجنابا : صار إلى جنبه والجنب : معظم الشيء وأكثره والجار الجنب أي : اللازق بك إلى جنبك (الحيطة بالحيطة) والمجنبتان من الجيش : الميمنة والميسرة (ده لمن كانت الحرب بالسواطير) وفرس طوع الجناب – بكسر الجيم – إذا كان سلس القياد .
والجنيبة : الدابة تقاد ، واحدة الجنائب ، وكل طائع منقاد جنيب (زينا كده يعني) . والأجنب : الذي لا ينقاد . وجناب الرجل : الذي يسير معه إلى جنبه (يعني وزير الدفاع جناب الرئيس) . وجنيبتا البعير : ما حمل على جنبيه . والجنب : القطعة من الشيء تكون معظمه أو شيئا كثيرا منه . وجنب الرجل : دفعه (يعني دفرو) . ورجل جانب وجنب : غريب ، والجمع أجناب وكذلك الجانب والأجنبي والأجنب والجنيب : الغريب . وجنب فلان في بني فلان يجنب جنابة ويجنب إذا نزل فيهم غريبا ، فهو جانب ، والجمع جناب ، ومن ثم قيل : رجل جانب ؛ أي : غريب ، ورجل جنب بمعنى غريب ، والجمع أجناب .
ويقال : جنبته الشر وأجنبته وجنبته ، بمعنى واحد ورجل جنب : يتجنب قارعة الطريق مخافة الأضياف . والجنبة – بسكون النون – : الناحية . ورجل ذو جنبة ؛ أي : اعتزال عن الناس متجنب لهم . ورجل لين الجانب والجنب ؛ أي : سهل القرب . والجانب : الناحية ، وكذلك الجنبة . كقولهم (نوم على الجنب البريحك) والجانب المجتنب : المحقور . وجار جنب : ذو جنابة من قوم آخرين لا قرابة لهم والجنابة : المني . وفي التنزيل العزيز : وإن كنتم جنبا فاطهروا . وقد أجنب الرجل وجنب أيضا – بالضم – وجنب وتجنب .
وطعام مجنب : كثير . والجنب : مصدر قولك : جنب البعير – بالكسر – يجنب جنبا إذا ظلع من جنبه . والجنب : أن يعطش البعير عطشا شديدا حتى تلصق رئته بجنبه من شدة العطش ، وقد جنب جنبا وقيل الجنب في الدابة : شبه الظلع ، وليس بظلع ، يقال : حمار جنب . وجنب البعير : أصابه وجع في جنبه من شدة العطش . والجنب : الذئب لتظالعه كيدا ومكرا من ذلك . والجناب : ذات الجنب في أي الشقين كان .
وجنب – بالضم – : أصابه ذات الجنب . والمجنوب : الذي به ذات الجنب ، تقول منه : رجل مجنوب ; وهي قرحة تصيب الإنسان داخل جنبه ، وهي علة صعبة تأخذ في الجنب. يقال : جنب فهو مجنوب ، وصدر فهو مصدور . ويقال : جنب جنبا إذا اشتكى جنبه ، فهو جنب ، كما يقال : رجل فقر وظهر إذا اشتكى ظهره وفقاره . وقيل : أراد بالمجنوب الذي يشتكي جنبه مطلقا . وتقول : جنبت الريح إذا تحولت جنوبا . وسحابة مجنوبة إذا هبت بها الجنوب .
كسرة :
كده عرفنا كلمة (جنابو) جات من وين !!
كسرة ثابتة :
أخبار ملف خط هيثرو العند النائب العام شنــ(12+1)ــــو؟

89 تعليق

  1. التدخين مضر بي الصحه

    1. تشموها قدحه الليله مافي سجائر ولا تمباك

    2. و لما انتا عارفو مضر مالك قاعد تتفسح فيها يمين و شمال ؟؟ لاكين برضو بالبركة ,, يديك خيرا و يكفيك شرا …

  2. ورجل المرور بقول لك جنب… جنب ()ع شان يقطع لك ايصال

  3. جنابو جات من جنابه
    فا حبايبنا ديل كلهم جُنُب ما عشان لحسهم كلب ولا نسوا يغتسلوا
    ديل صافحوا ثم عانقوا ثم غاصوا ثم غرقوا في
    ..
    ..



    ….
    …..
    ……..
    دم و أموال الشعب
    P.S.
    ديل لمن غاصوا ليه ما لاقتهم برده ؟؟؟

    1. هههه
      البرده لاقتم يا ود الفريق ويقال إنو دفعوها ايجار عداد .
      لاكين الله في و الفولت العالي راجيهم قدام

      1. هههههههههههههه,,حامضة منك يا ود الفريق المامون على جاراتك ,,
        وعلى قول جنوبى الحبيب ,, قدام بلاقوهو بمبى !

    2. اخ انا منك بس مبروكه عليك ان شاء الله ناشفة او عطرونة كثير تسلم ود الفريق

  4. مبروكه عليك الافتتاحيه يامفتح مدام قلتوا الليله امتناع عن الكييف .
    بس يابروف حرب السواطير لسه مابقت من الماضى انا نسيبى مشا سوق فى غرب امدرمان قبل كم جمعه كده على ما ازكر اسموا سوق حلايب ولموا ليك فيه جماعه السواطير(النقرز) لو ما اكتشف انو ينفع فى سباق 100 متر يعنى كرعينو لو ما مرقوه كان يكون فى خبر كان (على فكره ياشمباتى نسيبى شمباتى.

    1. شمباتى من اى شمباتة يا ابا عمر !!؟
      مرحب بيك كتير..

  5. و عندما يقول ليك شرطى المرور: جنب, اى بمعنى اطلع على جنب الطريق, هنا يجب ان تكون مجنبا لمبلغ 20 جنيه مما جنبته سابقا لجنابات مفاجئة و تغمتا لصاحبنا دة, و الذى بدوره سيجبنها فى احد جنوبه اقصد جيوبه بسرعة, و يقول ياللا اتحرك بسرعة و تانى ما تعمل كدة و الا حيجنبوك تانى لقدام !!!

    1. والجنبات مسمي يطلق ع المحلات التي يشرب فيها القهوه و………..والحبش داخل الجنبه ع مسئولية صاحبه

  6. الزول الجاب فكرة التجنيب ده اظنو هو نفس الشخص الذي أتي لشيوخ قريش بفكرة قتل النبي ليتفرق دمه بين القبائل !
    يعني هسي عمر ده شايف نفسه أتقي من عمر ! ولأ علي أعلم من علي عشان يعملو في بيت مال المسلمين كده ?

    1. تقصد ابليس هههههه بس ابليس شرد من عمايلهم ديل قالوا ليهو انت بتعرف شنو في الابلسه

  7. انت يا جبرا بتجيبو من وين التجنيب دا اسالك بالله توريني

  8. هسغ ميزانية 2013 دي جنبوا فيها شنو .. والوزير الساذج كما قال شنو لمن سألوه عن قانون ضرائب المركبات وانو ده التفاف حول رفع الدعم عن المحروقات .. بكل سذاجة قال الدعم للمحروقات بـ 4 مليار ، والإيراد العائد من ضريبة المركبات 250 مليون بس .. طيب لو المبلغ ده بسيط كده كاتل فى البرلمان وهدد بأنو لو ما فى ضريبة مركبات ما حيكون فى دعم للسلع .. لا وجه للمقارنه وسذاجة الوزير واضحه وضوح الشمس كمان قال شنو فرضنا الضريبة دي لانو المواطن المسكين الغلبان من حقو يتمتع ببيئة نظيفة وهواء نقي .. كدى هم اول حاجة ياوزير نظفوا نفسكم بعدين اتكلموا عن نظافة البيئة ،، لمتين ياناس الاستخفاف بالشعب لمتين الضحك على الذقون .. كمان سمعته من مصادر ببنك السودان أن الوالي مصاريفو النثرية للولاية يومياً 100 مليون جنية بس والله ما عارفها قديم ولا جديد … الله المنتقم الجبار

    1. تحت تحت سمعنا كدة انو فى مقترح لضرايب جديدة على التلاجات و التلفزيونات و البوتاجازات (عينين و فوق) و المكيفات (مش العمارى و البرنجى) و حافلات العدة و بنابر التكل (اذا كانوا اكتر من 2) و عناقريب الحوش (اذا كانوا اكتر من 4) بس ما متأكد ليه تحديد العدد فى البنابر و العناقريب ,, ان شاء الله يا يابا (بالضريب شقاق العناقريب) !!!

      1. ياخي قلنا على الهواء ودي من البنود السرية اللي مش راح يناقشونها في البرلمان الانت عارفه وانا عارفه والله عارفه وهي لله

      2. انت طابور خامس على الشعب عرفت المعلومات دي كلها ازاي يعني الواحد يمش ام فكو ويركب الصينية علشان ما يكون عاوزين منه التكتح

      3. تمشى ام قكو ما مشكلة,, بس الخوف يكونو عايزين منك ضرايب (الشنو ما بعرفو داك) !!! اوعا منو

    2. السؤال الما جنبوهو شنو هع

  9. جبراوالسمار .
    سلامات .
    بالطريقة دى وكل مسؤول وزيرا كان أو واليا أو معتمد أو حتى رئيس محلية حايكون عندو مال مجنبو من الخزيبة ليتصرف فية كيف يشاء ولا يتجراء أحد فى سؤوالة أو مراجعتة . وأنا أقول الجماعه ديل أقروا فرض ضريبة على المركبات وصفقوا ليها بالاجماع لية …
    الله فى …

    1. والجديد كمان قالو ماف زيادة مرتبات ف الميزانيه الجديده

      1. قوووووووووووووول زادوها

    2. ياخي ديل خلوا الكمساري يجنب ايراد الحافلة هههههه صاحب حافلة بعد الغبة وعاوز يتغرب ثاني دانا غلبان

  10. البروف العزيز والسمار الكرام …سلام
    جاءنا الآتي
    ذكرت منظمة النزاهة العالمية أن السودان خسر (8.58) مليار دولار في عام 2010 ، ورغم إقتصاده الضعيف ، كان في قائمة الدول الخاسرة الكبرى وقال ريموند بيكر مدير المنظمة (مبالغ فلكية من الاموال القذرة مازالت تتدفق من العالم النامي الي ملاذات ضريبية في الخارج وبنوك في الدول المتقدمة). جديربالذكر ان تقرير منظمة الشفافية العالمية عن مستويات الفساد في العالم لهذا العام صنف السودان كرابع اكثر دولة فساداً فى العالم ، في المركز رقم (173) ، من 176 دولة تشملها القائمة .
    وبس خلاص ……….

    1. لااااااااااااااااااااا تندهش ,,,

    2. احسن شوية مش ثاني الطيش زي السنة اللي فاتت اهو فيه تحسن انتوا ظالمينهم ليه ما اهو الناس راميه لي قدام هع

    3. فعلا يا جماعة الخير, اهو مرة من نفسنا كدة نتقدم على الاخرين فى حاجة, يعنى لو كنا فى كورة , كنا الان فى ربع النهائى و بشوية اجتهاد بسيط كدة ممكن نتأهل لنصف النهائى, و ما بعيد لو كربنا جرديتنا كمان نفوز بالكاس زاتو ,, بس ياربى تكون عايزا ليها فكى كااااارب كدة زى بتاع ناس هناى و جدادتو عشان نضمن الفوز !!!

      1. نهائ شنو يا بتاع الفكي انت برضو عاوز تكون زي ناس الجدادة الفطست وبي سببها فطس الانقلاب

  11. البروف والاحباب …
    اها والجنابة دى يتخارجوا منها كيف ؟؟؟
    آآآهـ؟ قلتو شنو !؟ تطهر ؟؟ امممممممممم

    1. هو إنت لحدوت هسي ما هناي !
      الله يرحم اسماعيل مجذوب طهر ام درمان دي كلللها .

      1. هههههههههههه والله يرحم حليمه ماضي طهرت عطبره كلها

      2. ههههههههههههههه,,اسماعيل وعرفناهو ,, كمان حليمة شنو الشغلة ليها !!؟ وى وى وى

    2. حليمه ماضي الداية الدااااااااااااية القابلة والقابلة عندكم في المسرات اخي

      1. ههههههههه..قبلكم وحدكم ياخوى

      2. وربطو ليكم كرعيكم ?
        ال عجاجه .. حديد و نار و الدايه طهار

      3. يا شمباتى وياجنوبى ماتفضحونا قوية دى مرا. مرا . مرااااااااااا.
        طرش الطرش….

      4. هههههه
        كان كدي اقيفو لي الننزل إلا يا حنين شمباتي ادفرو دفر خلي يقع . هو الساقني معاهو

      5. ههههههههههههه,,عشان يتيم جاي تدفرنى يا جنوبى ؟؟ شينة منك ياخ,,
        اهئ اهئ اهئ

  12. البرنجيه الفوق دي شايف خليتوها و اليوم مطره و الجو بارد جدا و انا وحيد سيف الليله و الدنيا نهايه اسبوع و بصراحه محتاج ادخن ابو اهلها ذاتو و سلامات يا صحه!!!!!!!!!

    1. آآآآآآآآآآزول ود الفريق قال ليك التدخين مضر بالصحه وانت لاحقها عاوز تجنبها برضه

      1. بقى زي جماعتنا مافي حاجه بوفروها اول بي اول شفط ))))

  13. اها دحين احيكومه دى مجنبنا الى العيد الكبير ولا شنو لكن باقي ليكم فضل فينا شى للضبح ماخلاص لحقنا امهات طه

    1. عيد الاستقلال والا شنو جنك اعياد

  14. غايتو ما عارف لكن البروف عنده جنس تجنيب بس سرال صعب شوية الما جنبوهوا شنو يا بروف افيدنا افادك الله

  15. إن شاء الله بالساحق والماحق والبلاء المتلاحق ، مكان ما يسري يهري، يا جنب وعايشين في الجنابة وإن شاء الله حا تموتوا علي جنب وجنابة، وإن شاء الله حا تبعثوا جنب، وحقنا خليناهو لي الله،إن شاء الله يظهر في الشرايين والمصارين وفي الدم والحلاقيم وفي الذرية والنساوين، والكلام ده كلو ينطبق علي كل من جغم ليهو لقمة وجنب ليهو جنبة ما من حقو،أو من أموال الشعب .سبحانك إنك تمهل ولا تهمل.

  16. كتمت وجابت ريحه (قصيده)

    كتمت كتمت
    كتمت كتمت وجابت ريحه
    وفيها بشاير عاصفة قوية
    ماها غبار ولا تلقيحه
    كان قلبوها
    أو خلوها
    خلاص اتفتحت ودفق قيحه
    جرحها نوسر
    دِمِّلْ ينزف ريحته كريهه
    والناس الغافله
    النايمه تحت من خط الفقر
    صحت من نومها بقت تفتيحه
    وصاحت تعلن
    صيحه صريحه
    كتمت كتمت وجابت ريحه
    كتمت كتمت وراجيه الهبشه
    وظهرها ما بيتحمل قشه
    بترولها هرب في الغابه وطشَّ
    ودولارها ركب طياره وطار
    وجنيهنا وارهو راكب ركشه
    والركشه تطقطق
    كتمت كتمت راجيه الهبشه
    كتمت كتمت وناسها اختلفوا
    عَدْ ما اتعاهدوا عَدْ ما حلفوا
    قدر ما كبروا فوقنا وهتفوا
    مَعَطوا
    أكلوا
    شالوا ولغفوا
    جغموا
    ولحسوا
    وشربوا ورشفوا
    وغنوا وذكروا
    وبرجوا رقصوا
    مدحوا ووصفوا
    كتمت كتمت وتاني اختلفوا
    كتمت كتمت واصله الحد
    كتمت كتمت يا ناس بالجد
    لا بنفع فيها طريق لا سد
    لا اسرائيل
    لا حق الرد
    ما دايره أحزاب مليانه مرض
    دايره رجال للأمه سند
    يتحزموا قِدا يد باليد
    ياخدوهو الحق يبنوها بلد
    كتمت كتمت دايره ولد
    د. علي ابو وضاح

    1. ولد السرور الكتب الكلام دا يا مندهش ياخوى

    2. هي لاكين كتمة نصاح !
      الركشه ذاااتا منعوها تقطع الكبري و الجنيه هداااكا ليهو ماشي كداري !
      تصدقو امس صرفت الريال بي 1800 !
      انتو هناي بطل الرقيص مااالو ! حس و اندسا ولأ الهناي إتفشا

      1. النقزي بيوجع حلقه والكواريك بتورم رجلينو

    3. كلامك صحي والله وقصيده من امها وصراحه ضربة كوارييييييييك ساكت من سبعة عساكر قدام القيادة تلقى المطار يعج بالمسافرين الى ماليزيا هع

    4. الكتمة دى لو شفطوا ليها كويس, بتفتح صاح و زول بيلحقا مافى !!!

      1. الكتمة عاوزه الناس كلها تشفط شفطة رجل واحد هع

  17. الساعة الثانية بعد منتصف الليل واثنين في القمردينة يظهر لابدين للبرنجية زي الحرامية وانا الثالث اراقب الموقف

    1. هههههههههههههههههههه,,انتو ماسكين زمن غلت ! طاااااخ

      1. حبيبنا الدوك
        أها لقيت البلد كيف ؟؟
        بس أخاتا جنوبي ده وماعندك مشكلة
        ده بصرف لحدي هسع في الريالات … ما قالو الغلا شديد ممممممممممم

      2. الحبيب المندهش…
        سلام وشوق ومحبة…
        والله البلد عصا نايمة وعصا عايمة ! آيييييي..
        وكمان الليلة طمبجناها انا وجنوبى بلقاء غريييييب , وطلعنا معارف كمان ! اححححححح..
        لكن ريال واحد ما عندو ! بوبار وبطارية فى بيت الايجار ! وى وى وى

      3. هههههه
        أريتا معرقة السواد و الرماد ..
        ياخي أقلو استني لحدي ما ناس البيت يغسلو الكبابي الشربنا فيها دي ! آآآآي يا المندهش الشربنا فيها !

      4. هى لا !!!
        شربتوا شنو !!؟؟

      5. يعنى حيكونوا شربا شنو؟ شوربة حمام مثلا؟ – اكيد شربوا شاى بلبن ,, مش لسة معاو باقى ريالات !!!

      6. ادينا السر والزمن الصاح وساعة الصفر كان تشموها تاني البرنجية فاضي بس مش بعاتي وعامل فاضي هع وبالمناسبة وين البعاتي من زمن اب شنب وغاب

      7. وريني الزمن الما غلط لاني غلبان وعاطل ومصاقر النت كان تاني واحد يشم البرنجية

  18. يا جماعة الخير شوفو لينا طريقة نقدر نتداخل معاكم … الموقع حالف ما يسمح لينا .. ودي عاملة تجربة يمكن تصدق ويمكن لا … نحنا مالنا يعني ؟

  19. ههههههههههههههههههههههه,,انتو ما مواظبين ! آيييييي

    1. ليه هي صلاة ههههه هي لله هي لله

  20. يا عم جبرة أنا عندي ليك اقتراح مفيد بخصوص الكسرة، عليك الله المرة دي شرفني بي ردك عليو.
    اها.. حقو (للفايدة العامة يعني) الكسرة الثابتة لمن تتم سنة طوالي تفتح تحتا كسرة جديدة (كسرة ثابتة 2) ويكون فيها قضية جديدة (وديل طبعا رااااقدة أشكال وأنواع). واحسابة بتحسب ليهم الاتنين

    رجاء اديني رأيك في الحتة دي، تسلم يا عمنا

  21. يا عم جبرة أنا عندي ليك اقتراح مفيد بخصوص الكسرة، عليك الله المرة دي شرفني بي ردك عليو.
    اها.. حقو (للفايدة العامة يعني) الكسرة الثابتة لمن تتم سنة طوالي تفتح تحتا كسرة جديدة (كسرة ثابتة 2) ويكون فيها قضية جديدة (ودي طبعا رااااقدة أشكال وأنواع). والحسابة بتحسب ليهم الاتنين

    رجاء اديني رأيك في الحتة دي، تسلم يا عمنا

  22. ود الضو القبض الجو | رد

    يا بروف
    من يوم مقال التجنيب داك ما سمعنا صوتك
    الله يستر ما يكون جنبوك بي جنبة من جنبات جنابوهاتهم

    بالجد شفقتتا

  23. سلامات يا قبيلة
    البرجنية جنبناها وقلبنا ال ام ابو ستة ريال
    البلد غرقانة والتجديد ابو 6000
    اللهم يسر ولا تعسر

      1. اكيد ابو سبعة دا الما بيجيبوا اسمه هع

      2. قول ليهم زيدو سااكت نحن متعوديييين …
        صحي طلعت ميتينا يا عمر لاكين وييي ولاااااا عندنا سرطان ( مع بسط كف اليد اليسري ووضع كف اليمني مغلقة فوقها وتحريكها باتجاه عقارب الساعه )

      3. هههههههههههههههههههههههاااى,
        طلعت ديامى يا جنوبى ! وى وى وى

      4. ديم سلك ,,, جنب رشا ست الشاى ,, مش كدة !!!

  24. اللهم جنبانا المجنبين بعد المحاضرة دى وجنبنا ان الا نجانبهم

  25. يا منتظري البرنجية وقتها قالوا لسه

  26. اشوف فيك يوم يا حارس البرنجية معاي

    1. المرابطين و الحارسنا كتار خلاس ,, لو كنا بنرابط قدر دة (بالنظر) فى بورتسودان ما كان فى ضبانة خشت علينا ,,, وى !!!!

      1. انتو في البرنجيه ولأ البروف ذااااتو وينو ?
        شمباتي ماتشوف البروف ده مجنب مالو

      2. البروف كان فى مؤتمر فى البحرين ورجع صباح الاربعاء ,,
        فتوقعوهو قريبا ,
        لكن برنجية واحدة ماف يا غلبان ولابد !!

      3. انت ما قريت الاعلان ما طالبين نظاراتيه (مش بي نظارات) امهم الزرقاء راح يشغلوهم في الدفاع الهناي عشان ما تجي طيارات الفراغ يشوفوا الجو بالليل وكمان بالليل ماتخاف راح يدوهم بطاريات ميد ان جاينا وبعد كده راح تشوف الرد طاااااااخ هع

  27. سلام لكل الحبان البروف وصحبه الكرام
    ياجماعه من يومي التجنبته جانب وانا دخلته حاله قريبه من الحردان حردانه من جميع المواقع الاسفيريه وحردانه من الشغل وقاعده في البيت وحردانه من ناس البيت من البنات وابوهم وحردانه من الجيران ومن الجزار ومن البقال وبتاع الخضار وحردانه من بت النفايات ومن بصات الوالى والحفر والمطبات وحردته الكهرباء لقيت نفسي حردانه المويه كمان
    لقيت نفسي دخلته حزمه كبيره من الحردي مشيت لى اخر دكتور نفساوي (قاصداها ) مستف شنطته وهاجي من البلد حكيت ليهو قصة المتلازمه الحرديه البعيشه هذه الايام فقم سالني انتى كنتى بتتعملى شنو قبل الحاله قلت ليهو كنت بتعاطه برنجيه من مستشار شئون التنفيس مرتين فى الاسبوع فنصحنى ان اتعاطاها مرتين فى اليوم
    كسره
    الكلام الفوق دا ليه عشان اخد منكم الاذن فى البرنجيه الجايه اصلها وصفه طبيه (يعني ما تعملوا لى حركات )

    1. الاف التحمدات بالعودة السالمة الى حظيرة قمردينتنا المتواضعة و ان شاء الله دايمة – و نداء الى كل المرابطين الرجاء التكرم باستضافة بتنا بت وراق فى البرنجية القادمة ,, و انا شخصيا متنازل عنها ليها المرة دى (يعنى التقول انا كتا بلاقى فيها فرقة) !!!

      1. شكرا ليك ياالكلك زوق ساهموا معي في العلاج لا عندى تامين صحي ولا يحزنون برنجيه بس

      2. والله يا فلادمير يا رفيق بت وراق دي طلعت بتاعت محن وشداااااااااايد هع

    2. سلام بت وراق حردتك دي لو عمت تبقي اكتوبر هع يا ريتنا كل الشعب الفضل يحرد ثلاثه يوم عشان نشوف اخرتا شنووووووووووووو

    3. اووووووووووووو,,مرحب مرحب بالاحرار ,,
      عودا حميدا يا طيبة ,,
      والله والله كنت عارفك راجعة !
      لكن برنجية واحدة ماف ليك !

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: