توقعات 2012

عزيزي القارئ .. كل عام وأنت بخير .. في مثل هذا اليوم من العام الماضى كتبت مقالاً عن توقعاتي للعام الجديد حينها (2012) فتعال معي نستعرض تلك التوقعات وما تحقق منها وها هو العام قد إنقضى :
• أن يتم العثور على خط (هيثرو – الخرطوم) ويوضع كمعروضات في القضية لحين إكتمال التحري (الما ح ينتهي)
• للأسف الأسيف يبدو أن التحري (ما ح ينتهي) وها هو العام قد مضي وها نحن نستقبل عاماً جديدا والموضوع (حمدو في بطنو) والكسرة لا زالت ثابتة
• أن يتم إستعادة مبلغ الـ 50 ألف دولار الذي سبق أن تبرع به ديوان الزكاة لقناة فضائية وهمية قبل أربع سنوات (من صاحب القناة المزعومة) ويعود إلى خزائن بيت مال (المسلمين) مع إعتذار (سغيروني كده) من ناس الديوان !
• طبعاً ده لا حصل لا يحزنون .. خلاس الموضوع ده نخليهو (ليوم القيامة) ذى ما قال الأمين العام السابق للديوان والذي قام بتصديق المبلغ .
• أن تختفي من تقرير المراجع العام كل حالات التعدي على المال العام وذلك بسبب (الوازع الدينى وكده)
• أهو ده توقع كان ما في محلو أذ تزايدت حالات التعدي على المال العام فى تقرير هذا العام .. يبدو أن الوازع الديني ماشي في النازل وكده
• أن تزداد نسبة البطالة في البلاد بحيث يصل متوسطها إلى 3 (أبطال) لكل أسرة !
• هذا التوقع كان في مكانو .. ويبدو أن اعداد (الأبطال) سيزداد بعد أن أعلنت الحكومة عدم وجود وظائف في ميزانية 2013
• أن تتم زيادة المرتبات بنسبة تصل إلى%0.0002
• للأسف الاسيف هذا التوقع لم يحدث مما يوضح مدي تفاؤلنا حينها ( إحتمال نسبة الزيادة التوقعناها كانت كبيرة)
• أن يتم ارتفاع معدل صادراتنا من طائرات (سافات 2) وسافات 3 وذلك يعد إشتداد الطلب (عالمياً) عليها .

• هذا التوقع أيضاً لم يحدث وذلك بسبب توقف التصنيع وإنشغالنا بتطبيق نظرية (الدفاع بالنظر)
• أن تقوم الدولة بتوفير 24 فرصة عمل للخريجين
• هذا التوقع كان في محله فقد تم خلال العام الحالي توفير عدد 24 فرصة عمل للخريجين لكنهم جميغاً اصيبوا بلوثة عقلية إثر تلقيهم الخبر مما أدي لفقدهم للوظيفة
• أن ينتقل عدد مقدر من المواطنين إلى الرفيق الأعلي جراء تصريحات بعض المسؤولين (فقعان مرارة وكده)
• هذا التوقع كان في محله تماماً إذ ان هذا العام قد شهد عدداً مهولاً من تصريحات المسئولين (الأقل حاجة تفقع المرارة) ومافيش داعي نجيب امثلة و(خلوها مستورة)
• أن تنخفض أسعار السلع الغذائية .. (طبعن عشان مافي زول قادر يشتريها)
• العبد لله عندما وضع هذا التوقع كان يستند على قانون العرض والطلب
لكن يبدو أنه كان ساذجاً بعد أن وصل كيلو اللحم إلى 60 ألف وربع البصل غلى 30 ألف والبقية في حياتكم
• أن يحدث تحسن في مياه الشرب حيث يتم القضاء على البكتريا و(تفضل الطحالب) بس
• هذا التوقع لم يكن موفقاً حيث حدث العكس فتم القضاء على الطحالب وتبقت البكتريا وكده
• أن ننال جائزة السعفة الذهبية في مهرجان (كان) عن فيلم أبي فوق الشجرة ( شانق نفسو طبعن)
• هذا التوقع كان في مكانه تماما غير ان الفلم الفائز كان بعنوان (تزوير في أوراق رسمية) والذي تم تصويره بالمدينة الرياضية
• أن ندخل موسوعة جنيس للأرقام القياسية بإنتاجنا لأصغر عيشة في العالم (لا ترى بالعين المجردة)
• هذا التوقع حدث ولكن عندما حمل المواطن (العيشة) وذهب بها غلى المسئولين عن الموسوعة لإختبارها وجدوها لا تري حتى بالعين (الما) مجردة فلم يتم إدراجها (طبعن)
• أن تنتشر المخدرات بين طلاب المدارس بحيث يتم تطبيق شعار : (دفتر) لكل تلميذ
• هذا التوقع حدث والعبدلله يقترح أن يكون شعار العام 2013 .. فنجان قهوة وليمونة لكل طالب
• أن تصبح الفراخ الوجبة الشعبية للشعب السوداني الفضل مما يقوى من بنياته الأساسية ويجعله (يتعافى) من كل الأمراض !
• هذا التوقع إستند فيه العبدلله إلى تصريح أحد الولاة السابقين والذي للأسف اصبح أحد الوزراء الحاليين .. والببارى الجداد بيوديهو وين كده ما عارف كده
• أن نحرز المركز الأول في الشفافية بعد أن يتم إرتفاع البث في قضايا الفساد إلى خمسة حالات من أصل ألف وخمسمية !
• نعم أرتفعت معدلات البت في قضايا الفساد مش طلعنا (التواني) في تقرير هذا العام في منظمة الشفافية؟ عشان تعرفو إنو العبدلله توقعاتو ما بتخرش المية .. (أقلب التقرير لو سمحتا)
• أن تتوقف الغارات الإسرائلية على شرق البلاد خوفاً من (حق الرد)
• هذا التوقع لم يكن صحيحاً إذ أن العبدلله لم يكن يعلم أن إسرائيل غبيانة وما خايفة من (حق الرد) وح تكرر القصة تااااني
كسرة :
2013 صدقوني عام بدون ملامح كضاب البقول ممكن يتنبأ بالح يحصل فيهو
كسرة ثابتة :
أخبار ملف خط هيثرو العند النائب العام شنــ(12+1)ــــو؟

Advertisements

76 تعليق

  1. برنجيييييييييييييييييييييييييييييييييييييييييييييييييييية

    1. ما عندك زوق خالص ما قلنا ليكم وصفه طبيه

      1. بت وراق
        بركة الجيتي
        التحانيس ديك كووووولها ما جابتك يا هو حالكم ياناس نيفاشا تقولو ما عاوزين تتحاورو وتاني تقعدو تفتشو للزول البيتوسط ليكم هههههههه

      2. المندهش,, حتى وصفة الفكى بتاعت اختك بت وراق كف ختفتا ؟؟

      3. انتي من ما وصفوها ليك زادو سعر البرنجي وتعيس الحظ يلقى العظم في الفشفاش ارجي دبرسي احسن ليك

    2. ههههههههههههههههههههههههه
      لا والله الحنيس ما قريته لاني دخلت فورا فى حالة الحردي
      والاب توب لقيتو ملان غبار والله صدقني

      1. ههههههههههههههههههههههههه,,والله بايخ جدا المندهش دا !
        وانا لو محلك افك فيهو صاروخ ارض جو او استعين باسرائيل !

    3. انا حرستها ومبروكه عليك وكل ما تلقى ليك برنجية جازفها وانا خلاص خليته بقينا في الاكل والشراب ما زادوهو البرنجي زي الاكل والشراب والخيار صعب يا خوي طلقتت البرنجي طلاق ثلاثه حرمان ما يدخل جيبي ثاني

    4. بعد ما البرنجي بقي بي 6او مرات 7
      والعماري بقي الوقيه بي 1 الواحد عامل تغشف

  2. سلام عليكم
    عودا حميدا سبحان الله سبحان الله العظيم

    1. وعليكم السلام سبحان الله
      الحوت قال عدت سنه
      وزيدان قال عدت وراحت كم سنه
      والطيب عبدالله قال السنين
      كسره:
      ناس العقد قالو لاتحلمو بعالم سعيد

  3. البروف الحبيب ،،،، حمدا لله بالسلامة
    طبعا توقعاتك كووووولها طلعت فشنك
    إنت وزير المالية ده ببقى ليك شنو ؟؟؟؟

    1. ببقى ليهو ابو دليبه

  4. الاخ جبرا والاخوه الاعزاء
    كسرتك الما ثابته والبتقول فيها ان عام 2013 دون ملامح غير صحيح بالعكس الملامح واضحه وضوح الشمس وهي ان العام القادم ستقوم فيه الدنيا ولن تقعد (وما تسالوني كيف )

    1. بت وراق
      البروف قال ( كضاب البقول ممكن يتنبأ بالح يحصل فيهو ) ( إنتي كضابة ؟؟؟؟؟ ) وإذا كان غير ذلك
      عليييييييييك الله الحيحصل شنو !!!!

      1. انا ما كضابه نامن تقوم بوريك

      2. والله يمكن يكون كلامها صاح لانها كتمت

    2. قاعده ترمى الودع و لا بتضربى رمل …………. عجبى

      1. لا لا يا كوكو انا بقراء النجوم
        (نجوم الغد ) بالجد بالجد

      2. شايفه الكتمه يا كوكو وكلنا شايفنها والله كاتمه كتمه

    3. بت وراق انتى كنتى حردانة وين عليك الله ؟؟ نيجيريا و الا تشاد و الا المغرب ؟؟ جايانا و متأكدة من الح يحصل سنة 2013…
      و بالمناسبة قبل ما تحردى و فى سنة 2012 كنتى بتجيبى ربع كيلو لحمة كل شهر,, ياربى هسة الحال كيفن؟ ربع كيلو كل 6 شهور و الا الفطور لحمة محمرة و الغدا بطاطس بلحمة مفرومة و العشاء بيرجر ؟؟؟!!!

      1. بتاعين نيجيريا وتشاد والمغرب ما بدخلوا البرنجية وما بحردواااااا ااااااااااااااازول انت اختلط عليك البقر والا شنو وكمان ما بيدخلوا النت ياخ ديل ارباع تعليم ان وجد هع اسف ليس دفاعا عن بت وراق ولكن والله غبينه ساكت

    4. احب القيامة ويوم القيامة لانه كل واحد راح يشوف حالهم كيف وانا اول المنتفضين بس بعدين يا اخوانا عليكم الله ما فيش داعي لعفى الله عما سلف

    5. الحمد لله انو كتب 2013 ساي لانو
      الفرق بين سنه وعام … لاحظوآ : قال تعآلى : “ولقد أرسلنا نوحا إلى قومه فلبث فيهم ألف سنة إلا خمسين عاما” (سورة العنكبوت) آية 14 كان من الممكن أن يقول رب العزة : تسعمائة وخمسون سنه ..! فلماذا ألف سنه إلا خمسين عاما – أن لفظ سنه : تطلق على الأيام الشديدة الصعبة..!! عندما قال تعآلى: “تزرعون سبع سنين” (سورة يوسف) ايه 47 – ولفظ عام : يطلق على الأيام السهلة أيام الرخاء والنعيم قال تعآلى : “ثم يأتي من بعد ذلك عام فيه يغاث الناس” (سورة يوسف) آية 49 – وبذلك يكون سيدنا نوح قد لبث ألف سنه شقاء إلا خمسين عاما ..!! – لذا من الأفضل أن نقول .. ” كل عام وأنتم بخير………وده برضو توقع من الاستاز لانو كتبا 2013 سااااااااااي

  5. 2013 عام بدون ملامح ؟؟ يازووول .. الكتاب بيبان من عنوانه .. سياسياً واضح وضوح الشمس ماعاوز ليهو كلام .. مناخياً يتوقع هطول طائرات بالهبل .. رياضياً حنشوف شلاليت لايعلم بيها الى الله .. أقتصادياً سخانة شديدة في الجيب ..

    1. مدد يا مهاب والله مكشوف منك تلحقنا يا صاحب الكشوف

  6. البروف العزيز..
    الف حمدا لله على السلامة..

  7. 2013 حتحصل فيهو الانتفاضة إن شاء الله .. ونغني كلنا … بلا وإنجلا .. حمدلا ألف علي السلامة .. !!! قولوا آمين … !!

    1. والله يا أب احمد مع الهجرات الجماعيه الحاصله دي انا خايف الحكومه هي التغني لينا !
      ماشفت هناي امبارح بيرقص في دارفور مااااااا 13 وكده .

      1. سبحان الله يا جنوبى يا سديقى,, انا كمان عندى نفس الاحساس بالغناء علينا ,, لا و يكسروا قلل و ازيار ورانا كمان زى حركات اخوانا المصاروة !!!!

      2. لكن والله جنس رتعي حمل خريف والله (انت صحي ما بقى خروف لسه) نع كع

    2. حليل وردي الكان بغني تفتكر انه مات غبينه ساااااااكت

  8. من اهم التوقعات انو لم تتم محاسبه المختلسين وأتوقع بعدم محاسبتهم في الأعوام القادمه ولأنهم سوبرمانات زمانهم ومافي ارجل منهم وغصبن علينا قاعدين وبصراحة ده اللي ح
    يحصل
    مره عماره وقعت،مرات طيارات بتقع، الجنيه واقع وقعه شديده وطبعا الحكومه بتحاول توصلو لي عشره عشان تقدر تدفع المرتبات وهذا للمعلوميه

    1. قالوا ليك الزارعنا غير الله اليجي يقلنعنا عدييييييل يعني ما فيش لا انتفاضه ولا غيره ديل بحاسبه الزارعهم هع الله

  9. المندهش .. مبروك البرنجييييه .
    بما إنو 13 ده رقم سمعتو ما كويسه بين الارقام انا اتوقع ح نكون سندوتش بين قرارات الجوازات السعوديه ووساخة الحكومه السودانيه !
    ياربي نحنا سوينا شنو اكتر من البسوهو الناس ا

    1. جنوبي
      تحياتي لكن زعلانه منك تبارك للمندهش وانت عارفني لى يومين بحنس فيكم (ما قايلاك كده )

      1. لاكين انا اسوي شنو يا بت وراق هو ما قعد البرنجيه قعاد !
        هسع امبارح مش لومت ليكي عبيد ? اكاله و نكاره إنتي !

      2. و اللاهى يا بت وراق انا من اول المتضامنين ,, و لو لاحظتى اصلو ما حاولت اتشالق فيها الليلة على امل ان تجازفيها ,, لكن نقول شنو للمندهش ديمة ,, خاستن انو السمار جميعا كانوا حارسنها ليهم 7 ايام قبل ما يرجع البروف بالسلامة !!

    2. وهو العام بداء من اوله كل الحبان بقوا كيزان
      هئ هئ هئ هئ

    3. انا ما اكاله ونكاره دي الحركات القلت ليكم ما تعملوها انا دايره تضامن حقيقى
      موش تطلعوا في التحرير تقولوا لا وفى صناديق الاقتراع تقولوا نعم

      1. حمد الله بالسلامة يا بت وراق وما عزمتونا السماية…..انشاء يربي في عز الجميع

      2. هههههههههههه,حلوة تضامن حقيقى دى ,, انا ذاتى عايز كدة !!

  10. عام 2013 يقوم الاخوة عبدالحي يوسف ،وعصام احمد البشير ، بعمل نصائح مؤثرة عن جرائم استقلال المال العام من قبل المسئولين وخطورته على صحتهم وصحة ابنائهم ، وباسلوب عصام احمد البشير المميز والمؤثر بان هذا المسلك يقود الى تفتيت المجتمع باشاعته للفقر ، وتفشي جميع الامراض الاجتماعية من دعارة ،وسرقة،واحتيال، وبؤس في حياة الناس، وتاثيره في حياة ابناء اللصوص بتناول المخدرات ، وعدم طاعة ابائهم ، وفشل في حياتهم بالرغم من توفر كل ظروف النجاح ، لان هنالك رب يرى كيف تم الحصول على تلك الاموال ، واتوقع ان يقوم السادة اللصوص باسترداد ذلك المال المنهوب المودع في ماليزيا ودبي وقطر ، ومن ثم تكون مشكلة النقد الاجنبي تم حلها ، وتصافت النفوس ، ياربي الكلام دا ممكن احصل ؟؟؟؟ عصام وعبدالحي بقدروا علي هذه النصيحة؟؟؟ السادة اللصوص يستطيعون استرجاع مانهبوه؟؟؟؟ الله اعلم –هذا مانتمناه ، انك لاتهدي من تحب ان الله يهدي من يشاء

    1. يادوب انا فهمت ليه الناس دي اشترت شقق وعمارات في دول الخليج و ماليزيا
      والله العظيم ده حرام
      وحرام اللي بيحصل ده
      وانا ومن منبر ساخر سبيل اطلب وكلي رجا بان يقوم السيد ريس الجمهورية عمر حسن البشير في التحقيق شخصيا في كل ما ورد من نهب وسرقه واختلاسات وان ترد كل هذه الأموال لهذا الشعب ،سيسال الله عز وجل ويحاسب كل مذنب. ياتري هل يعلم هولا بان هناك احد صمد،اللهم قد بلغت اللهم فاشهد

      1. عبيد ! قت السيد منو ?

      2. جنوبى.
        ما تقيف للزول فى حلقو ياخ !

      3. السيد ركس الجمهوريه

    2. لمحتك (الحرية) قلت ضل آمن بقيت احلم

      1. لا تحلموا بعالم سعيد ……..الحريه ياتا ف كبري الحريه و فريق الحريه وميدان الحريه!!!!!!!!واجراس الحريه

    3. آآآآآآآآآآآزول شقق ساكت ديل ما خلو الرماده بس معضيين جلاليبهم المرة دي لانها كتمت كتمت كتمت وسوف تقرأ مرة ثانية الهروب الكبير

  11. يا جماعه الخير انتو نحنا ما عندنا غاز ولا بترول زي الناس في البحار وهل تم البحث في البحر الأحمر عن الغاز بالله فيدونا و عندي إحساس انو عندنا غاز كتير في البحر الأحمر
    وهو إحساس وكدي رأي أبو نظر شنو

    1. لتر الجازولين والله بـربع ريال سعودي اي 25 هلله
      تقول لي غاز وبرضو قالو السعودية بقت غالية

      1. ولتر الماء بكم وجعلنا من الماء كل شئ حي بس جماعتنا ديل يختوا الرحمن في قلبهم وبدل يحفروا لينا الدنيا كلها بحث عن البترول ومشاريع وهمية جياد وصافات وهلم جرا اليوفروا الموية في اراضينا الشاسعه وعمر الاستثمار في الارض لا يزيد عن 3 شهور ما فيش محصل بيكون في الارض اكثر من كده والا شنو رايك يعني نصدر مويه واكل سبيك من الحفير

      2. يا المكتول و حي وين اختفيت ! السعوديه عندها فائض ميزانيه تلتميه كم و تمانين مليار ريال وبعد ده تعاين للفي يد الاجانب !
        الغلبان انت قايل المويه دي حقتنا ! ياخوي نحنا إبل رحيل سااااكت يمين تهبشا اولاد بمبا يمسكو ليك الصاجات و رجال تكبر اللاااا ه اكبر و الستات تزغرد و العيال تجي تعمل حاجات و تجري
        كسرة :
        كوكو مداخلاتك مالا بقت مسدكول
        كسرة ثابتة :
        حاج احمد السلاوي و خالد مدني و ودالخلا اخبارم شنو ?

    2. يوجد البترول باعالي تندلتي وفي جهات النيل الازرق هناك بعض المعادن في دارفور وكلها ولعت والنار ولعت ياخي ديل خلوها خل خل تعرف يعني شنو خل وانحنا شربنا زيت

    3. عبيد البحر الاحمر يقال انو فيهو غاز لا يكفي تكلفة الانتاجيه لكن اسي فيهو مهرجان الصياعه وكفي… راس السنه ف البحر الاحمر ولو ماشي جده بالبحر الاحمر وده كلو تفكيرنا لكن غاز وشنو شنو كده ده نحتسبو بس

  12. مسؤليين من الخير ,, اخونا الشمباتى ود الاشلاق وينو الليلة ؟؟؟ يا ربى بيجهز لاحتفالات رأس السنة ؟؟؟

    1. شمباتي قعد يفتش في عروس وزمنو ضييق خلوهو ما تشاغلوهو محتاج يركز .

      1. الحبيب فلاديمير…
        تسالك من العافية ,, والله انا فى السودان وجرى وطيران وبقيت طرزان ! اححححححححح..

        جنوبى..
        بطل اشاعات مغرضة !! عملت ليك شنو انا ؟؟ يخسي عليك يا اكال ونكار ! اهئ اهئ اهئ

      2. عروسة ايه شمباتي مؤتمر والا ايه هي ملحقه هع تحياتي جنوبي

  13. البروف الحبيب…سلام وشوق ومحبة..
    حمدالله على السلامة…
    التعافى درجات ! انتو خليكم تحت فى الدرك الاسفل من الوطن !
    وااااااا المى انا على بلدى….

    1. المتعافي ماله هع اها التعافي

      1. هههههههههههههههه,,,
        هووووووى يا غلبان وماك ندمان ,, اسه انا جبت سيرة عفن هنا !؟
        وليييه الناس تقول لى لا ,,,,

    2. الف حمدالله على السلامه ياود شمباتي اتاري انا اقول السودان منور ماله
      اجازه سعيده لكن اوعك تتهور فى موضوع العرس السنه دي (فيها بلاوي ) وعشان ما يربطه سيرت عرسك بيها افضل ان تترك الموضوع للسنه الجايه

      1. هههههههههههههه,,,
        الله يسلمك يا ملكة ,,,
        وانا ذااااتى لا جبت سيرة عرس لا شئ , لكن جنوبى دا بهااات ,,
        شديتو بى سيدى الحسن اب قبتا لبنية…

  14. طائرات صافات اللي بيجرها اللمبي وراه بالخيط والا ايه البروف بيقصد

  15. ظلام,,,,,رعد,,,,,,,,,,,,,,,,برق,,,,,,,,,,,مجهول مجهول مجهول ,,,,,,,,,,,الجوع والفقر والمرض بنوعيه مرض النفوس ومرض الجسد,,,,,,,,,,,الله يستر

  16. لكن توقع أن تصبح الفراخ الوجبة الشعبية للشعب السوداني الفضل مما يقوى من بنياته الأساسية ويجعله (يتعافى) من كل الأمراض …ده فعلا توقع حصل لانو الشعب كلو ف السعوديه والوجبه الاندومي خير دليل

    1. هههههه
      و الفراخ إن لاح لافايده في الملاح

  17. و الله انا عايز اكتب في هايسي… لايؤمن باليوم الاخر من ياكل المال العام…يا تري ممكن يتم ترخيص العربية…ومافي ايصالات و كدا يعني…..لا يمكن لانسان ياكل مال الناس بالحرام و يبرطع و يثمن اولادو من الحرم و يكون بيؤمن انو يوجد اله و يوجد حساب يوم القيامة…اقسم علي ذلك انو الحاصل دا ما ميتة قلب و ضعف في الوازع الديني اقسم انه عدم دين مطلق…اما الدولة فهي فاكة للاخر و اخو الرئيس عبدالله حسن احمد البشير اكبر حرامي مافي مستثمر اخش البلد الا يديهو اوكي و العجب مرتو نور الهدي قالت دكتورة نفسية كمان و هي اكبر حرامية…يا جماعة السرقة بنط الحيطة و الله اكرم..انت تسرق خروف سماية و الكيزان واااحد بس يسرق ولاية..ههه اللهم سلط عليهم شر بعضهم و افنهم و شمتنا فيهم

  18. طبعاً انا أكثر المتفائلين بالعام الجديد ففيه يغاث الناس وفيه يعصرون .. بس الجلد راجيكم .. والعصر حا يكون اشد من الأول .. وما حتلقوا حته تربطوا فيها الحزام لان الناس حاتكون خيال وأشباح .. بس أكثر حاجة اتوقعها فى هذا العام ودي مضمونه أنو الناس ديل مكنكشين والراجل يقلعنا .. اللهم إلا ينفذ قدر الله … وكل عام وانتم بالف خير

    1. يا زول والله كتمت وحرم ينقلعوا لو رصاصة يلعلع وما داير اقول لو زارعهم الله زاتو لانه التوشح باسم الدين العاملينه دا والله ما عندنا بنعرف ربنا ولو جبت ليك صيني ولبسته فنله وبنطلون زي البكتب الشباب فيهم باللغة اللاتينة بس كتب عليهم باسم الله واية الكرسي والشنو ما عارف من صحيح البخاري برضه بيكون صيني وكاااااااااااافر ملحد هم ديل كده من جوة ما بعرفوا الله وما بعرفوا الاسلام بس الجلاليب والعمم كلها تكبير وتخهلليل كانه ربنا لا يعرف واقسم اني اول ثائر

  19. العام ٢٠١٣ لن عن يقل عن سابقه في اى شى الا بالاتي
    ١/ اقاله السيد وزير الدفاع (ومحكمته)
    ٢/ اقاف صادر اللحوم فورا( الذاد لو ما كفي ناس …………)
    ٣/ توقيف الاستيراد للسلع المستفذه ( تونه لبن دكوه تفاح عنب كمثري الخ )
    ٤/ تقليص عدد الوزارت الى اقل عدد يمكنه من تسير دولاب الدوله
    ٥/ رفع الضريب القيمه المضافه الى ٣٠٪ وارباح الاعمال ٢٠٪ وتحصل مع الجمارك ويحلو ديون الضريب ونكون وفرنا خرتمه عربيه وديشلون موظف غير عزاب الناس ماعندهم شغله
    ٦/ بيع جميع العربات الحكوميه وناس الحكومه يشفو ليهم عجلات دبل
    ٧/ تطبيع العلاقات مع كافه الدول بدون فرز
    ٨ / نسمع كلام ماما امريكا ونبطل شعارت جوفا
    ٩ / نبني جامع جنبو كنيسه بينهم بار وكل زول مخير
    ١٠/ تكوين لجنه من الشباب ليس لديهم اى ميول سياسيه لمعرفه اين ذهب خط هيثرو ( شان البروف يرتاح اها قصرت معاك )
    ١١/ اغلاق جميع المدارس الخاص فورأ وكمان المستشفيات
    ١٢/ الاعتماد الكامل يكون على الذراعه ناس الضريب ديل يودهم الخلاء البعيد داااااااك ويدهم معدات متطوره للزراعه
    ١٣/ حل شركه نظافه الولايه وندى العطاء ده لى جهه اجنبيه

    والسلام عليكم ورحمه الله وبركاته

    1. كلمة وغتايته نقفل باب اللغفي يعني

  20. الاستاذ العزيز الفاتح جبرا
    تحية ود واحترام ……

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: