سنة حلوة يا جميل

والعالم يستقبل عامه الجديد .. أبت (أمنا الحكومة) إلا أن تهدي المواطن (ميزانيتها) لهذا العام المقبل 2013 وهي تغني له كعادتها ” سنة حلوة يا جميل ” !
بالفعل هو مواطن (جميل) بل هو أجمل مواطن عرفته (الأوطان) منذ أن خلق الله الأرض وما عليها فهو أى المواطن من (جمالو) فهو لا يتعب نفسه بمعرفة أن كانت هنالك (ميزانية) من أصلو .. بل ويعتقد جازما (من شدة سذاجته) أن الحكومة شغالة بدون (ميزانية) بل بدون (أقلام ودفاتر) وإنو المسالة ماشة ساااااكت .. فالمواطن (الجميل) يسأل نفسه في غباء يحسد عليه .. كيف يمكن لدولة أن تضع ميزانية وكل مسئول فيها (مجنب) ليهو (كوم قروش) وقاعد عليهو ؟ شئ بالعملات المحلية وشئ بالعملات الأجنبية وشئ بالما عارف شنو؟ كبف يتم وضع ميزانية وهذه الأموال (الما معروفه) خارج الميزانية؟
بالطبع سؤال (المواطن الجميل ده) لا يمكن أن يرد عليه مسئول (أياً كان) كما لا يمكن أن يرد عليه أي من نواب البرلمان الذين (صفقوا) من قبل عند زيادة أسعار (السكر والوقود) ! بالمناسبة من باب التغيير وكده المرة الجاية عاوزين نواب (يزغردوا) !
سنة حلوة يا جميل … سنه حلوة يا مواطن .. فالموازنة العامة (أم تجنيب) يا مواطن تشير إلى أن معدلات (النمو الإقتصادى) فى إزدياد .. ليس بالضرورة أن يظهر لك ذلك على تفاصيل حياتك المعيشية .. وإن كنت تظن أن معدلات النمو الإقتصادى من الضرورة أن تظهر على مستوى حياتك المعيشية فأنت لا محالة جاهل (وعاوز ليك درس عصر) ولا تفقه في قوانين الإقتصاد فمعدلات النمو الإقتصادى (يا جميل) حسب قوانين (مندل) لا تظهر إلا بعد الجيل السادس على أقل تقدير ، ومسألة إنو المسئولين ديل (يوروك) إزدياد معدلات النمو المسألة دي الغرض منها إنك تكون فى الصورة وتطمئن على أنو المسألة (ماشة كويس) وأنو (حفيدك) السادس عشر سوف تظهر عليه علامات الثراء (غير المفاجئ) إذا مد الله في ايامك و(قرونك) .
سنة حلوة يا جميل .. فقد فاقت المصروفات (كالعادة) إجمالى الإيرادات مما جعل هنالك عجزاً مليارياً سوف تقوم الحكومة (يا عينى) بسد هذا العجز .. طبعاً شئ إستدانه وشئ قروض وشئ شنو ما عارف وأنت يا (جميل) قاعد متهنى ومستريح ولا عليك والحكومة مشلهته تستدين من هنا وتخش فى (صناديق) من هناك وتتعب تعب السنين وترهق روحا علشان تسد عجزك وعجز اللى خلفوك !!
سنة حلوة ياجميل … فقد ركزت الميزانية (كعادتها) فى الصرف على الأمن والدفاع (بالنظر) على حساب الصحة والتعليم .. تعليم بتاع أيه؟ وصحة بتاعت أيه؟ أفرض إنك بقيت (عالم ذرات) وصحتك ذى (الحصان) شنو يعني لو ما كنتا (آمن) ؟ ما لازم (أمنا الحكومة) تضمن ليك وتضمن (ليها) إستتباب الأمن وتوفر ليك (آليات) الدفاع عنك يا جميل ضد أى (غزو خارجى) حتى لو يتطلب منا (إسبوعين) لمعرفة أن كان (بالطيارات) الطافية لمبة وللا (بالصواريخ) ماركة (أبولمعة) !
سنة حلوة يا جميل .. فقد ضمنت لك الموازنة الجديدة بأن راتبك سوف ينفذ من يوم خمسة فى الشهر بعد أن جاء فيها عدم وجود أى زياده فى مرتبات العاملين بالمؤسسات الحكومية .. يعني كل يوم الأسعار زايده (وربع البصل حصل 30 ألف) ومرتبك في (محلو) .. نصيحتي ليكا (أربط الحزام) .. معليش مفيش حته يربطوهو فيها بس (إنتا أربط) !
سنة حلوة يا جميل .. والميزانية لا توجد فيها فرص (وظيفية) .. معليش (أمنا الحكومة) عملت ليها ستمية ألف جامعة لكن (ما ختت بالا) من حكاية (التوظيف دي) .. إحتمال كانت مفتكرة المسألة (تثقيف) ساااكت .. معليش يا (جميل) صرفتا دم قلبك في تعليم الأولاد و(بعتا) الوراك والقدامك لحدت ما إتخرجو لكن ما مشكلة إشتري لكل واحد منهم (درداقة) وخليهو يخش السوق .. وللا أقول ليك بلاش عشان مافي ليهم طريقة .. (المحليات إستولت على الدرداقات وكده) !
سنة حلوة يا جميل .. عموما يا (جميل) .. خليك متفائل .. أمنا الحكومة دي عارفه ربنا كويس .. وما بتعمل إلا بما يمليه عليها ضميرها ، والناس العملو الميزانية دى أكيد عارفين أكتر منى ومنك إنو المسألة دى ح تصب فى النهايه فى مسألة إزدياد (معدلات النمو) والتى سوف (تصب) فى النهاية فى مصلحتك ومصلحة أحفاد أهل الخلفوك يا جميل !!
يا جميل حقو تحمد الله وتبوس إيدك وش وضهر علشان (حكومتك) حكومة (إسلامية) وبنعمل بما يرضي الله ورسوله .. هسه لو كانت (حاجة تانية) كان موقفك يكون شنووووووو؟ ياخ إستهدي بالله وخليك متفائل .. وسنة حلوة يا جميل !!

كسرة :
لا بصحيح .. أموال التجنيب دي بره (الميزانية) وللا جوه (البنوك) وللا وضعها كيف؟
كسرة ثابتة :
أخبار ملف خط هيثرو العند النائب العام شنــ(12+1)ــــو؟

57 تعليق

  1. برنجيييييييييييييييييييييييييييييييييييييييييييييييييييييييييية .. جاتي طائرة من السماء .. وكل سنة وأنتم طيبين .. مع انو مكنه استاندر وما بدخن ..

    1. بختك و الله يا Abu Ghassan محظوظ جنس حظ,, الناس ترابض ليها و تحاحيها من بالليل و انتا جاتك باردة مبردة ,, عموما دة فال كويس انو 2013 معاك حتكون بنفس المستوى ان شاء الله ,, تصحى من نومك تلقى كومك ,, وهابى نيو يير يا sweet

      1. صدقني ما كنت حاريها ولا طاريها بس بردلب جاتني واقعة براها .. واتمني أن عام 2013 يكون كويس مع الناس كلها ونغني نزل المطر وبرد الجو ونط الحمل .. والكلام الكنا بنقراه فى المطالعة زمان ،، أتاريه كان كلام جرايد سااااااكت عمرنا لا شفنا يوم نزل المطر وبرد الجو دي .. كلها نزل المطر وغرق الحي وكثر البعوض والضبان والناموس والحاجات التانية الناس عارفاها

    2. بمناسبة السنة الجديدة ان شاء الله منها وعادمك شغال طوالي ما تقيف اصلك من السجاير انت ما عارف انه زادوه واالله انا لو كنت مكانك كان طفيتها مولعه هههههه

    3. برنجية جاتك طايرة من السماء وبرضه شفتها شيل شيلتك راح يفتشوا عليك لانهم عاوزين بتاعين النظر ديل عشان الدفاع وكده

  2. واحد من البلد ديييك | رد

    ياجماعة لازم تعرفوا انجازات الحكومة … عليكم الله اختراع الدفاع بالنظر ده يغطى على كل اختراعات القرن العشرين والواحد العشرين و يمكن الاتنين و عشرين …. أحمدو الله …. كلكم بقيتوا طماعين !!!!

    1. هسة ناس جماعة الدفاع بالنظر قالوا عايزين (ابراج) عالية شوية عشان يقدروا ينظروا لبعيد , و عايزين بطاطين عشان الدنيا بتبرد عليهم بالليل و هم بينظروا , و عايزين جوامع قريبة عشان ما كلهم يمشوا يصلوا بعيد و يخلوا البلد بدون حراسة ,, و المسئول بتاعهم طالب بنظارات شمسية بالنهار و عدسات ملونة بالليل لتحسين جودة النظر ,, و لكن المشكلة تكمن فى عدم وجود البند دة فى الميزانية ,, اها العمل شنو و الفهم كيييف ؟؟؟؟

      1. ونسيت البطاطير يا فلادمير علشان لو جات طافيه نور يشوفوها برضه

  3. اخونا جبرة
    سلامتك وان شاء اللله تبرا وتستجبرا … الميزانية حقو يسموها (الما انسانية) السودانية..
    على كل نحنا قنعنا من اى زيادات فى الروتب واللى هى فى الواقع ماشه كل يوم ناقصة ، طبعً الدولار وكده…غايتو الله فى
    تحياتى يا مبدع

    1. لا ما تقنعوا من زيادة الرواتب,, فى كلام تحت تحت كدة انو الزيادات دى قاعدين (يحوشوها) لينا للحفيد السادس عشر (ق م) و بعدين يصرفوها لينا بأثر رجعى ,, و فى قول اخر (بالدولار) كمان ,, عشان تكون الصدمة مؤثرة تمام كدة !!!

    2. خلونا من الزيادة .. مافي نقصان أصلوا ولا شنو .. المفروض ينقصوا سعر الحاجات لانو القصة بتاعت زيادة المرتبات دي ما نافعة وثبت ذلك من واقع التجربة .. لو هم رجال حارة زي ما بقولوا ينقصوا الأسعار وما دايرين زيادة نوهائي

  4. الوظائف متوفرة بس الناس براها ما عاوزة تشتغل ,, الميزانية ما لها عمروا فى تاريخ البلد ما جات ميزانية زي دي .. الرواتب ما اهو مكفيه الناس لحدي يوم 10 من الشهر الثاني .. الموصلات راقده ومدفقه وكمان مكندشة … والإيجارات رخصت رخص السنين وهسع عندهم فكره يعملوا تأجر بيت يدوك البيت الثاني مجاني . فى أحسن من كده .. والعلاج برضو حا يصرفوا ليك دبل ، حقنة واحدة والثانية هدية من الحكومة بمناسبة عام 2013 ،، الأمن ما لو ما بنوم ومطمئنين الناس بتعاين بعيونها مش بألات ورادارات يمكن أن تخطي أو تصيب بس العين عمرها ما بتغلط ولا شنو ياناس التكنلوجيا .. كل حاجة تمام .. هسع كان فتح عينك كويس وطلعت بره الشارع ما بتلقى مراح البهائم قدام البيت تعزل الخروف الدايرو علشان تفكه بيه ريقك .ز عاوزين شنو أكتر من كده .. وروني بلد فى العالم فيها رخاء زي البلد دي أي حاجة فى متناول اليد .. وما فاضل إلا يأكلونا فى خشومنا .. هيه هيه هيه أصح من النوم انت بتحلم ولا شنو .. لا ده كان كابوس … ودمتم سالمين

    1. تعرف يا ابو غسان,, لو ما كنتا صحيت من النوم , قربت اصدق !!!

      1. ياخي انا صدقته نفسي . .. اصلوا البرنجية نفسها الأول بتحلق بيك حيث لا أمنيات ولا كائنات تمر ..

      2. انا قرات لابو غسان افتكرت اني في المصحه (مصحة كوبر) بالله شوف الاسم زاتو مصحة كوبر فيه حد منكم عارف كوبر؟؟؟؟؟ حليلهم ناس كوبر خلو دولارنا يذاع في البي بي سي وخلو لينا خدمة مدنية وخلو لينا اضخم مشروع في العالم وراحو بشويش من غير مشاكل وهملونا جونا المننا وفينا وكمان بالدين تقول اصلهم ما شافوا خلاوينا ماله دين الخلاوي عمل ليهم شنو ظاهر وواضح وما مبشتن جنس دا الموضع وسع ووالله كتمت كتمت كتمت

  5. كل عام وأنتم بألف خير أستاذنا البروف الفاتح ومتعكم الله بالصحة
    والعافية وأنتم تنافحون بالكلمة من أجل بناء “البنحلم بيهو يوماتي،
    وطن شامخ وطن عاتي وطن خيّر ديمقراطي، وطن غالي نجومو
    تلالي في العالي، وطن حدادي مدادي ما بنبنيهو فرادي ولا في
    الضجة في الرادي ولا الخطب الحماسية، وطن بالفيهو نتساوى
    نحلم نقرا نتداوى”
    ودمتم للخير والمحبة

    1. (طه سيد احمد) مصطفى سيد احمد محجوب شريف محمد وردي

  6. لا حوله هى بتين اصبحت

    1. خلال فترة احتجابك دى فى حاجات كتيرة اتغيرت ,, من ضمنها انو السمار بقوا بيساهروا للصباح بيراقبوا البرنجية (بالنظر) و يجازفوها بعدين الشغال يمشى شغلو و العواطلى يخش ينوم ,, بس تعرفى انو نظرية (النظر) دى طلعت كويسة ,, بدليل اهو الختف و المجازفات البحصل دة !!

      1. هههههههههههه,
        انت زعلت يا حبيب ؟؟؟
        ههههههههههههههههههههههههههههه

    2. يا بت وراق انتي ما عارفه بلدنا دي زي ما بقولوا عنها فى الخليج البصحى بدري بيحكم .. الحكم ما عاوزينوا لانو القاعدين فيها بيقيموا الليل ومطبقين السنة وكده وما في أي فرصة معاهم لانهم صاحين .. والحمد لله ما ليهم فى البنرنجية كان ما شميتو ريحتها

  7. مجرد ملاحظة
    هل التعليق على كتابات الرائع البروف الفاتح تجعلنا نتخفى
    ولا نفصح عن أسمائنا الحقيقية
    أفيدونا أفادكم الله؟؟؟

    1. الأخ طلحه
      ملاحظتك في محلها ولاكين انت باراك عارف قصه حكوك النشر وكدا والجماعة وكدا و بعدين يقوموا يختوك تمامه للمحاوله إياها ونحن ما ناقصين
      وعلي العموم قت اسمك ولا ما قتو برضو النايم ال ااام
      مطنش طناش و ما داير يصحي..
      وعلي العموم كلامك صاح

      1. الاخ عبيد سلامات
        موضوع المحاوله الانقلابيه دى بتشبه لى زول لابس ليهو شراب وطلعه خته اليمين فى ا(لجزمه )الشمال والشمال في ا(لجزمه )اليمين ورجع لبسهم تاني عمل شنو يعني الشراب ياهو الشراب واللون ياهو اللون والريحه ا(لنتنه )ياها الريحه

    2. الاخ طلحه سلامات
      دحين هسع لو كتبت اسمى حتى الجيل السادس بيقير من الواقع والله لو بيقير اكتب اسمي حتى ابونا ادم ذاتو

      1. ما حا يغير أي حاجة .. بس لو لوموا فيك حا يغيروا ملامحك

      2. هههههههههههههه,,
        الله يجازى محنك يا ابوغسان,,,
        نعم للتغيير لا للديكتاتورية !
        وى

    3. تسأل بعد شنو؟؟ بعد ما ختيت اسمك ؟؟ الليلة شيل شيلتك ,, انا برررررة !!!

      1. حا نغني ليه .. ضيعوك ،، ودروك .. انت ما بتعرف صليحك من عدوك .. والعملتو كان بإيدك .. صابر وعند الله جزاك

    4. لا بس البروف بسوي المديدة حرقتني

  8. الاخ جبرا (الجميل ) والاخوه الحلوين
    ناس الحكومه عاملين حمله علي تجار العمله وقالوا هم سبب تدهور الاقتصاد (عشان يقبضوهم صرف عربات وبنزين للحملات وحوافز وميزانيه مفتوحه لهذه الحله ) انا المحيرني هم عارقين الموسسات المجنبه المال العام والمدراء العامين ومدراء الاداراة الماليه ما يطلعوا قرار ومن غير حملات بفصلهم
    اخخخخخ نسيت فى زول بيفصل نفسه

    1. اشمعنا جبرا (الجميل) و نحنا (الحلوين) ؟؟ يا هو يبقى حلو زينا,, يا نحنا نبقى جميلين زيو !!! كع

    2. ما ده يا بت وراق التجنيب زااااااااتو والله ما ماخده بالك

    3. هههه تستاهلي يا بت وراق هم ديل شبه الدلع ! انتي ذاااتك البذار الليك شنو تحلي في الناس كدي !

      1. ههههههههههه,,
        دى ما ظرافة الرجعة للبيت القديم !
        لووووووووووول

      2. اعمل شنو ياجنوبي موضوع المقال سنه (حلوه يا جميل ) قلت اوزعه اديت الجمال لاخونا جبرا والحلا لناس القمردينه
        لكن نعمل شنو فى ناس شمباتى ديل

      3. ياخي سكرها كثير ممكن مؤتمرجية هههه ما تفهما تمرجية انا بخاف من الحقن هع

  9. تصحيح الصحيح
    (لهذه الحله) لهذه الحمله ولكنها صحيح الحوافز فعلا ليصلحوا الحله ههههههههههههههههههههههه

    1. الأخت أو الابنه بت وراق
      انتي مصدقه الحكومه عاوزه تظبط الدولار..
      الحكومه دايره الدولار يكون بعشره ألف عشان تقدر تدفع المرتبات،
      يا بت وراق السودان أكبر دوله في استقطاب غسيل الأموال وفي ناس في الحكومه دي شغاليييين غسيل وخاصه بتاع الكوره دااك

      1. و انا اقووول,, ليه الصابون غلا كدة مع انو عندنا (عشرطاشر) مصنع صابون دة غير البجينا من سوريا !!!

      2. اتاريني !!!!!!!!!!!!!!!
        قبل ايام مشيت اشتري طشت لقيتو خفييييييف قلت لى بتاع العده سجمى طشطك دا مالوه خفيف كده قال انو الطشاطه التقيله اشتروها ناس الحكومه انا يادوب كده فهمته

      3. ياخي بتاع الكورة ده بغسل بغسالة فل اوتوماتيك .. اهو ده الغسيل ولا بلاش

      4. الأخ أبو غسان
        بتاع الكوره اللي بغسل السودان كلو بعرفو
        بس فول اتوماتيك دي عرفتها هي بتطلع منو
        ما دي اللي بتغسل معاهو يا رااجل،
        كلو عارفينو

    2. ديل حلتهم مصلحه اصلا والعجيبة ناس المرور واكل السمك ما عارف علاقة المرور شنو باكل السمك هع

  10. بنسأل عن جنوبي وكوكو وين ،، صحي مشيتو تحجزو فى الصف لحفلة راس السنة ،، قالوا الصفوف زحمة شديده ما تنسو يا جماعة تربطوا الحزام كويس وتخلوا البنطلون لحدي السرة وكده وإحذروا من لبس الجلاليب لانها ساااااهلة فى النشل والذي منو

    1. هههههه
      كوكو ما بعرفو السنه دي مروس وين لاكين كان بقول ماشي دبي .
      سرة شنو و جلاليب شنو ! نحنا بنقلع السنه الفاتت وكل ما يخصها ونستقبل الجديده بكل شفافيه .
      لاكين حتة النواب البزغردو دي كتلتني من الضحك !
      بي طاري التجنيب انا مشيت اجازتي دي ومن وصلت سواكن لحدي ما رجعت مادفعت قروش للحكومه بأورنيك 15 كله كيري سااااكت من رسوم الميناء للعربيه لحدي رسوم المغادره
      هسع بير بليله والتاني الاسمو نجمه شنو داك الجابوهم يومتا في التلفزيون داخلين في الموازنه ولأ للمشاهده فقط

      1. ارنيك منو؟يا راجل مال يسموهو نهب كيفن ؟بعدين ديل مجنبين اورنيك خمستاشر قال شيل اور بس

      2. هههه الله يجازيك يا الغلبان ! ده صباح شنو الصبحتنا بيهو ده . لاكين ديل ( كانو ) افكارنا ياخ .
        العجيب إنو ابوي رجع استقر في السودان سنة 58 بسبب الاست ق لال والليله نحنا اولاده كووولنا بره برضو بسبب الاست غ لال .
        يا بشييير يلا لي بلدك

  11. استاذنا العزيز جبرة
    كل سنة وانت طيب ، بالرغم من سردك لكل الالام الناتجة عن حكومتنا الرشيدة وتصرفاتها الفريدة لكنك نسيت اخر تقليعاتها وهى تسليف الطالب ودة مشروع ما ساهل ولا لانه ما ورد فى الميزانية .؟… السؤال المهم الطالب لما يستلف من الحكومة عشان يسدد ليها رسومها (دى مش تنفع اغنية للمبدعة انصاف مدني في حفلة راس السنة ) نرجع للسؤال المهم لما يستلف الطالب عشان يتعلم ويتخرج ويكون اتعلم مع علمه الجامعى علم جديد وهو ثقافة الاستلاف والدين بعد دة كله حيشتغل وين عشان يسدد دين الحكومة ؟

  12. موجع جد هذا المقال ,,,
    وسنة حلوة عليكم يا احباب…

    1. للاسف موجع وكله حقائق والحقيقة موجعة ومرة

  13. والمواطن الجميل صدق تمثيلية شكلة وزير المالية ورئيس اتحاد العمال وقال ايه هدد انو العمال ح ينزلوا الشارع و قال ايه مشى يشتكى للريس والريس حل المشكلة وقال يزيدوا الاجور للمواطنين الجميلين و هو عليك الله فضل شارع المواطنين ينزلوا فيهو ما كلها حفر مواسير مكسرة وعايمة مويات وخواضة

    1. يا بت وراق كدي خلي رئيس العمال دا يكون بي حق وحقيقي ونقابات منتخبة احلق شنبي كان ما لحسو كوعهم ديل شطار من زمن الجامعات

  14. سلامات .. وكل عام والجميع بخير
    اخوووووووووووكم فى الله جديد لنج (ماتقولو كووووووووووووووز)

  15. الجميل ده انهد من التتبير تانى يادبرو شنو وكيف !!!!!!!!!!!!!!!!!!!!!!!!!!!!!!!!!!!!!!!!!

  16. انتو تتكلموا عن التجنيب فى الدفاع والمالية وغيرها ومافى زول يوم هبش القضائية رغم أنها كلها تجنيب وقالوا مارقناها من الهيكل الراتبى ” كده سمعتها ” ليه ؟ يبدو أن القضائية إحدى سفارات الدول الكبرى . أو جبرا خايف من السجن البلا إستئناف …

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: