هل تعتقد؟

– هل تعتقد بأن الغناء سوف يعود سيرته الأولي وسوف نستمع لأغنيات مثل ضنين الوعد والطير المهاجر والوكر المهجور؟
– هل تعتقد أنه يمكن إعادة الهيبة للخدمة المدنية بحيث تلتزم الوزارات والمؤسسات بالتدرج الطبيعي للعاملين وفق اللوائح والقوانين ويتم التنافس الشريف بين العاملين في الترقي؟
– هل تعتقد بأننا سوف نشاهد في الملاعب مرة أخري مواهب كروية كجكسا والدحيش وعلي قاقرين والدكتور كمال عبدالوهاب؟
– هل تعتقد بأن آذاننا سوف تشنفها أصوات مذيعين كحمدي بدرالدين وحمدي بولاد وأحمد سليمان ضؤ البيت ومذيعات مثل محاسن سيف الدين وليلى المغربي؟
– هل تعتقد بأن العاصمة سوف تعود نظيفة مثل ما كانت عليه في الماضى وسف يتم غسل أرصفتها بالماء أواخر الليل ؟
– هل تعتقد بأن السكة حديد والتي بدأ إنشاء خطوطها عام 1897 م سوف تعود كما كانت تحمل البضائع والركاب بين المدن المختلفة ؟
– هل تعتقد بأن المرتب سوف يكفي لآخر الشهر وح يفضل منو كمان؟
– هل تعتقد بأن شرطي المرور سيترك (حكاية الكمائن والمخالفات) ويعود إلى دوره في تسهيل إنسياب الحركة؟
– هل تعتقد بأن اللحوم في الجزارات سوف تتم تغطيتها بالقماش الابيض النظيف منعاً للحشرات والذباب كما كان يحدث قبل خمسين عام
– هل تعتقد بإنو ح يجي يوم تمرض وتمشي المستشفي يكشفوا عليك ويدوك العلاج بدون ما تدخل أيدك في جيبك؟
-هل تعتقد بأننا سوف نشاهد عبر قنوتنا السودانية برامج مثل تحت الأضواء وفرسان في الميدان وساعة سمر؟
– هل تعتقد بأنك سوف تشاهد ضابط الصحة وهو يسجل زيارة لمنزل جارك وهو يأمره بردم (البلاعة) لما تسببه من خطر على الجيران
– هل تعتقد بأن يعود السوق العربي والأفرنجي لسابق عهدهما ليلا يزدحمان بالمشترين والمتفرجين تحت الأنوار المبهرة
– هل تعتقد أنه سوف سأتي يوماً تمارس فيه أحزابنا السياسية الديمقراطية داخل أوعيتها؟
– هل تعتقد بان الزواج سوف يتسهل لأولادنا وتاني نشوف الصيوانات والحفلات داخل الأحياء زى زمان
– هل تعتقد بإنو ح يجي يوم والخريجين ديل كوووولهم يتوظفوا ويلاقو ليهم شغل؟
– هل تعتقد يان سودانير سوف تعود كما كانت سفريات الشمس المشرقة
– هل تعتقد أن يكون لدينا تداول (سلمي) للسلطة؟
– هل تعتقد أن يختفي المتسولون من أمام العيادات والصيدليات وشارات المرور
– هل تعنقد المواطن سوف يصمد كثيراً امام هذه الهجمة الشرسة في أسعار الضروريات
– هل تعتقد أن تكون لدينا موازنة (ما فيها عجز)؟
كسرة :
إن كنت تعتقد فأعرض نفسك على طبيب (نفسي طبعن) !
كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو) !!

Advertisements

66 تعليق

  1. برنجيييييييييييييية

    1. هل تعتقد انو حركتك دي ظريفة ؟
      الحوش ده انا ما جيتو من الصباح قشيتو ورشيتو !
      ان شاء الله ساهر يلقطك الليلة …

      1. هي لكن ياجنوبي ما لقيتو باااااارد ومرشوش عشان كده أخدت لي تكيه

      2. ههههههههههههههههههههههههههههههههههاااى,,
        والله ما ظريفة !!
        وانا اثنى اقتراح الحبيب المندهش بحتمية التواصل ,, وكمان رقمى 00966555040149

    2. معاك معاك مشترك

      1. ياخوي ما فيش اشتراك يا برنجية يا الثاني زي الطيش

    3. المندهش ,, الفوق دى صورتك صحى؟؟ انا غايتو عملتا ليك ليها One blogger likes this و 100%

      1. ود بوتين
        تحية وشوق لأهل الذوق
        طبعا ياعزيزي هذه ليست صورتي ووضعتها فقط تعبيراً على الإندهاش ولكن شكل صاحبنا ده ما مندهش ده مسطول عديل كده ،، لك مني كل الود
        وكما إجتمعنا على حب هذا الوطن أتمنى أن يتم التعارف بين جميع أعضاء القمردينة ( تليفونات ، فيسبوك ، سكايبي ، الإيميلات الخاصة ) حتى يكون التعارف أحلى وأجمل ووووو ولا رايكم شنو ؟؟ على العموم رقم جوالي لديكم

      2. اخى المندهش ,, دة ما مسطول , دة مخلوع كلو كلو ,, و يسعدنى جدا التواصل معك و جميع الاحبة فى القمردينة ,, احمل التحايا لك …

      3. هههههه .. ياها صورتو زاااتو انا امبارح دي شفتو .
        التواصل دايرنو عِلا يمكن يكون في ناس ما بتحَمل
        التكِفِتْ .
        الايام دي عندكم برد مش ؟ إششششششششضشا( مع فرك اليدين )
        ولآ انت ما في روسيا!كان بقيت هناك ما تبقي غشيم
        البرد بشربولو ما بلبسولو . أحححححح ( مع هز الرأس )

      4. ههههههههههه,,
        خسوسا ابان جضوما ماهلااااااات !
        تراااااح

  2. دي ياجبرا كانت قصص اجدادنا القدماء ولا شنو

  3. عبد الرحمن عثمان | رد

    عندى سوال . ضابط الصحة دة منو زي ضابط الايقاع
    الوظيفة دى مااظن وزير الصحو زاتو متذكرها

  4. البروف العزيز
    هل تعتقد بأنه سيأتي من يخاطبنا ب ( أيها المواطنون الشرفاء )
    القراء الكرام
    هل تعتقدون فيما ذكره البروف أعلاه
    إذن – ألحسو كوعكم
    الرخ والعنقاء والخل الوفي

    1. تعرف يا دهشه بعد الحسو كوعكم دي ما فضل لينا إلا
      يجينا واحد ويقول لينا ( أيها المواطنين البُلهاء )
      عندنا إمام مسجد حلتنا ما كويس يا المندهش
      ( في محلِ نصبٍ مفعولٌ به ) في اجازتي دي لقيت ناس الحلة
      انتفضوا عليه وجابو امام تاني فيوم لاقيتو وقلت ليهو
      وينك يا شيخ .. ما قعد تجي تصلي بالناس ؟ قام ( رفع
      لي حاجبه الشمال مع هز الكتف الايمن ) وقال : هو
      المعفنين ديل الدار يصلي بيهم منو !
      هسع انا خايف الحكومة دي بعد صبرنا ده كله تجي يوم
      ترفع لينا حاجبا الشمال وتقول لينا هو المعفنين ديل
      الدار يحكمن منو !

      1. جنوبي
        هههههههه الإمام ما عندكم لكن
        قلت لي حاجبو ياتو ؟؟؟ ههههاي
        يا اخوي اريتو كان بقو الناس معفنين ديل يا أخوي أجانب عديييل كده وكمان شذاذ آفااااق
        هاهاهاهاهاو

      2. هههههههه – قوية دى و الله يا جنوبى ,, و انتا كنتا بتصلى (وراهو) ياتو وكت تحديدن كدى؟؟؟

      3. يكونوا ناس حلتكم ديل شبعوا منه وعاوزين تجديد هع كع

      4. آجنوبي كلامك معقول كثير يمكن يقولوا المعفنين ديل العاوز يحكمهم منو والله جايز ونقلاهم في مطار الخرطوم كووووووووووولهم واسطول طيارات بس مش من النوع البر\دلب وهاك يا فكيك كل واحد على جهة

    2. ايها المواطنون الشرفاء يعني يرجع نميري

      1. الغلبان أخوي ،،،، تاااااني نميري يعني سوينا شنو ؟؟؟؟
        نريد فقط من يحفظ للوطن والمواطن كرامته وشرفه و عندما يقول أيها المواطنون الشرفاء يقصد فعلاً هذه الكلمة لأن الكلمة حقيقية وتنطبق على الرعية

  5. احمد الله انا حضرت الكلام ده كووولو
    شوارع السوق العربي وشارع الجمهوريه ديل ما لحدي هسسسي قرييب ده في سنة سبعين !
    وحضرت كمال عبد الوهاب و بشري و بشارة والطيب سند وكنا بنجيب ليهم الكوره من ورا القون زمن ال 22 لاعب وكورة واااحده هسع 22 كورة و لاعب واااحد و غفير الاستاد كان اسمو عم موسي !
    غايتو يا انا طولت في الدنيا دي يا الدنيا دي طولت فيني .
    والزكريات صادقه وجميلة مهما تجافينا بنقول حليييلا

    1. قطع شك بتعرف سيف بتاع الطعميه والزلابييه بتاع مدرسه الخرطوم شرق الابتدائيه ،،،، وأكيد كنت بتمشي أبو العباس وكلزيوم يوم الخميس. ،،
      ده الجيل اللي عاش طفولتو بطريقه علميه صحيحه.
      طفوله كلها انسجام ومحبه و طفوله كانت لا تعرف الجهوية والنعرات القبلية ،،،
      الله يجازي اللي كان السبب في تفرقه هذا البلد الحبيب

      1. والنيل الازرق والدور الثاني وكمان تكس طرحه هع

    2. مع انو انا ما عجوز زيك يا جنوبى, الا انى برضو بتذكر كمال وهبة و بشارة و سانتو ,, بس من الاذاعة و التلفزيون عشان كنا صغار وما بنعرف نمشى الاستادات برانا ,, و كمان بنتذكر لمن كانت بصات الاهالى بقرشين و نص, بس كنا بنركب (البرنسات) عشان اولاد عز و كدة,, بس كنا بندفع شلن مش سبعة قروش و نص عشان طلبة .. و اتذكر تماما انو كنا بنوفر من مصروف الاسبوع عشان نفطر مرة فى الاسبوع ب(مرتديلا) من عند عم عوض الله يرحمو …

      1. ههههه قرشين ونص وبرنسات وشلن وما عجوز !
        ياخي بنوفر من المصروف دي برااااها أرشيف ..

      2. والله انا خمسين (ما كشتينه) لكن الكلام دا بتذكروا كله

    3. وكمسنجي البص الهنقاري يصيح نفر ونطلع نفر ونطفع هع

  6. سوف يعود كل شئ إلى سيرته الأولى عندما
    لا يكون هناك كبير أمام القانون
    ويحتكم الجميع للقانون دون محسوبية
    عندها سوف ندرك لماذا قال الرسول صلى الله عليه وسلم
    “لو أن فاطمة بنت محمد سرقت لقطعت يدها”

    1. سلام ياقبيلة،،،،
      الصديق الصدوق طلحة بن سيدأحمد صدقت يا صديقي فسيعود كل شيئ سيرته الأولي، ولكن مش في الأول يجب أن يعود الناس لربهم ويؤوبوا ويتوبوا لبارئهم ويتحللو في الأول من اكل الربا والسحت ويحبوا لإخوانهم ما يحبونه لأنفسهم ، يا اخي الناس دي بقت فازّة ومفزوعة من شنو ما تعرف!!!
      وياصديقي أنت تدري ما ألم بالناس في بلادي فهم يصبحون في رعب ويمسون في خوف، وده كلو منهم ومن عمايلهم، أنانية مفرطة وطمع وجشع وهلع وتكالب علي الدنيا ونسيان الآخرة (كووولهم لا أستثني من ذلك أحد الحكام قبال المحكومين)..وما ينط ليك زول ويقول ليك نحن مالنا وعملنا شنو في الدنيا دي، وأهو الكفار عايشين ومتنعمين، ونحن عيشتنا كلها كد ونكد!!!
      شوفوا يا أصدقائي يا اعزائي إن الله لا يُغير ما بقوم حتي يُغيروا ما بأنفسهم، فغيروا أولا” لتتغير حياتكم وإلا فستدورون في هذه الدوامة، وأعلموا أن الذي بكم ما هو إلا تسليط عليكم بسبب ما إقترفت أيديكم وبعد ده كلو ربنا يعفو عن الكثير، فحاسبوا أنفسكم قبل أن تُحاسبو، وراجعوا قبل أن تُراجعو، وما كل مرة واحد شاكي وآخر باكي وثالث يسأل يا ربي ده من شنو؟؟ وهل من عودة هل؟؟
      العودة ممكنة وقريبة وساهلة بس إنتو بيضو نيّتكم وأخلصوا في أعمالكم…
      أب أحمد وبت وراق يمتنعون…

      1. ود الخلا …… سلام
        كما عهدناك دائماً متعك الله بالصحة والعافية تضع العربة أمام الحصان
        ويحضرني مثل ضُرب لك من قبل وهو أن الإنسان يبدأ الغُسل من الأعلى أي الرأس ومن ثم ينزل بالماء على سائر الجسد
        و هكذا يبدو أننا سنبدأ من حيث بدأنا في النقاشات السابقة هيا يا أبو أحمد ، بت وراق ، جنوبي ، وبقية نجوم الغد

      2. اب احمد وبت وراق وكمان الغلبان لان كيهم حاااااااار

      3. سلام ود الخلا كدي كلامك انعدل لانه كل العالم يبني كل شئ على استراتيجيات واي شئ بدون استراتيجية لا يؤدي الى الهدف حتى جماعتنا الكحيانين المزهجننا ديل كان قالوا بسم الل الوقت اللي حكموا فيهو وضعوا استراتيجيات واضحه ومشو عليها يمكن كان يكون الحال مثل التنمية والعدالة في تركيا اردوغان وكده ديك ما سعوا للتمكين سعوا من اجل تركيا والان هي دائن لاتحاد الاوروبي بدلا ان تكون مديونة من قبلهم بس بدون تمكين والا شنو

    2. طلحة .. نعم صدقت ولكن من الذي يطبق القانون
      الحاكم ام المحكوم ؟
      ومن الذي يعين القضاة ؟
      يا صديقي عندما يكون تعيين القضاة تعيين سياسي
      فالترابه دي في خشمنا .
      هو محمد الليلنا ده زاتو لاعندو فاطنة ولا عندو رقية
      وان جيت تدينو بالحديث ده ح يقولوا ليك الزوجة لم
      تذكر …..
      ودالخلا .. ياخي وين انت ؟ قررربت اغني ليك
      يا الجافين وناسين دوام لينا
      خلو العبره حيرانه في عينينا
      شوقي ليهم ضو نار حن جانا ولينا زار
      جاء في الاثر : اذا رتع الراعي رتعت الرعية
      وسيدنا عمر بن الخطاب رضي الله عنه لمن جابو ليه
      الالماس من مصر وقارن عدد الالماس ولقاه مطابق للمكتوب
      امتدح حاملين الالماس بالامانة والاخلاص وكان قاعد صحابي
      جمب سيدنا عمر وقال ليهو : حفظت فحفظوا ولو رتعت
      لرتعوا .

      يا صديقي الصدوق الرعية في افسد حالاتها كما ذكرت
      وما بدفن راسي في الرملة لكن صلاح الحاكم يختصر الوقت
      والجهد في إصلاح الرعيةز
      عمر بن عبد العزيز لما رأي حال الامة يحتاج لاصلاح فبدأ
      بنفسه اولا ثم بزوجته ثم آل بيت الخلافة ثم نزل بالامر
      الي الرعية ..
      الغريبة يا ودالخلا انا لاقاني حديث عن ابن عباس عن
      النبي صلي الله عليه وسلم قال : صنفان من أمتي اذا
      صلحا صلحت الرعية واذا فسدا فسدت الرعية , العلماء
      والامراء.
      لكن لقيت انو الحديث ده مصنف ضعيف مع انو منطقي !
      هل ده من تسييس الدين ولآ من ادينة السياسة؟
      بعدين كيفماء تكونوا يولي عليكم ده قالوا التفسير
      السائد ده ما صحيح لأنو صلي اله عليه وسلم ولاه الله
      علي افسد مجتمع واصلحه.
      وابوبكر الصديق ولاه الله علي مرتدين وهو
      ابا بكر .. فاعادهم للدين بحد السيف .
      يمين ان كلامكم ده صاح زي مسيلمة داك الا كان
      يحييوا ليهو فرعون يحكمو ! أجي يا الدايرنا
      نتصلح والحاكم يرقص !

      1. لا ازيد يا جنوبي كفيت ووفيت

      2. سلام من تاني،،،
        السمار الكرام جنوبي وطلحة بن سيدأحمد والغلبان وبقية العقد الفريد، أنا ما بعيد منكم أنا منكم، لكني داير الحكاية تمشي صاح وتنجض صاح ما تجوطوها كدا وفي النهاية زي ما دخلنا بي حمد حا نمرق بي خوجلي ونعود لنفس الحلقة المفرغة الليها 57 سنة ولسه تسأل عن المزيد!!!
        يا جماعة الخير النقعد في الواطة دي ونتفق في الأول علي الأسس الصحيحة للتغيير ولمفهومية التغيير وماذا بعد ان يتم ذلك، ولعلم الجميع التغيير قادم لا محالة فدوام الحال من المحال هذه هي سُنة الحياة وطبيعة الكون فكل شيئ لا محالة زائل ويأتي بعده الجديد، (نسأل الله تعالي أن يكون خير وبركة وسلام وامان وإطمئنان) ولذلك لا بد من الإستعداد ومعرفة ميدان وطبيعة المعركة حتي لا نؤخذ في حين غِرة كما نشاهد ونري في دول الربيع التي أصبح فيها خريف مدمر نسأل الله السلامة… هذه هي الأولي!!
        والبداية الصحيحة يا جنوبي تكون بالنفس والنفس أولي من الصاحب ودي الإستراتيجية المفروض نتبعها لو حبينا نتخارج من الدوامة دي، ودايمن نحن نتشاجر في غير معترك ولمن نطالب الناس بالعودة للجذور نُهاجم كأنما اتينا كفرا” وجئنا بما لم يأتي به الأوائل، ولابد من ذلك أي لا بُد مما ليس منه بُد.. هذه هي الثانية…
        أما الثالثة يا صديقي فواقعة، وإن وقعت فكتر البتابت عيب… ولا شنو ؟؟؟؟
        أما صاحبك المندهش فأسكت خليهو مش طلع أي كلام ، خاتي تلفون ولدو الصغير وقال ليكم الدايرني يضرب لي ، يمين التلفون لفة البيت كلو حتي لميت ليك في صاحبك وبعد داك زاغ مني وأداني إسم أشك في أن يكون إسمه الحقيقي، وطلبته وترجيته أن يخبرك برقم تلفوني حتي أستطيع مخابرتك ، ولا هو ولا شمباتي ما ادوني ليهو وحجبوك من عيني ليه يا تري.. حسدوك في حبي ليه يا تري !!
        وصدقني وماك طالبني حليفة يا خليفة فالقلوب عند بعضيها، أو كما يقول الحديث الشريف شواهد…
        تحياتي ولو راجين التغيير من الناس اللافة صينية دي حولين لعيبة الكورة المقددة دي وفنانين الغفلة ديل صدقني سيطول الإنتظار ولا شنو يا سديقي؟؟؟؟؟؟؟؟؟؟؟؟؟

      3. ودالخلا .. يسعد صباحك خير ينعم مساك النور
        إبراء لذمة المندهش فهو اداني رقمك لكن لانشغالي باعمال نهاية السنه لم اتصل بك لأنك دايرلك مهله و سهله ..
        نهاجمك لأنك داير تنجض الكوارع بي نار الشمعه ولحدي ما حلتك تنجض شوف كم دمعة حا تسيل فوق خدود الشمعة !

  7. انا متأكدة من انه فى حاجة من القلتهم ديل ( انه المواطن حيقدر يصمد كثيرا اما هذه الهجمة الشرسة فى اسعار الضروريات) حتحصل وحتستمر الى اجل غير مسمى

  8. هل تعتقد بان السودان يعود كما هو مليون ميل مربع كما كان في السابق اذا كان الرد يمكن يكون كل شي كماكان وكما تريد احلام وبس

    1. مليون ميل مربع ما اظن دا لو ما نقص الباقي

  9. كان صاح كان غلط كان دين كان زندية هي في النهاية كتمت كتمت كتمت كتمت

    1. و اخرة الكتمان دة شنو يا اخوى يا غلبان ؟؟؟

      1. اخرت الكتمان بم بس بم جديدة حقتنا ما بنضيعها زي مارس ابريل

  10. هل تعتقد بأن عقولنا وأفئدتنا باتت تتحمل كل هذه الأمور سيد جبرا ؟؟

    وتالله انها لرحمة الله بنا ما دمنا على قيد عقل وقيد حياة .

    /

    رزقتَ الرضى بالدارين 🙂

    1. وين العقول ووين الافئدة بعدين صحيح نحنا حيييييييييين كدي يعني دا ما كابوس ولا نحنا ميتين

  11. اريتم بالتابا يا يابا
    قلت لي يا جنوبي امامكم طلع فلسطيني
    وانتا الوداك تسالوا

    1. سالتك بالله نون والا الحرف التاني هع ويمكن الامام دا برضه بيقول هي لله هلي لله هع كع

  12. هيييييييي,,,
    سيبو لحم الامام دا !!

    1. اللحم دا والشنو ما عارف دا يمكن امام من قوم ديك هع كع خلاص انا شخصيا خليتو

      1. يا بهية ,,
        آييييييااااا

    2. صحي كلامك علي الاقل هو اتصرف في ما يملك ,
      امبارح ابواق النظام كلها تشيد بلقاء البشير و سلفاكير والتوقيع علي انشاء المنطقة العازلة مع انو الشهر الفات البشير رفض التوقيع علي نفس الاتفاق ده ونفس الابواق دي برضو اشادت بعدم التوقيع !
      هسي الحاصل ده ما رفع حاجب و طقطقت لبان عدييييل

      1. رجعنا تاني للائمة هع كرع كع

  13. وكمان ناس تنقا ويور ونغنى ليهم تنقا تنقا تنقا هلالنا كلو ذى دا ……. ياحليل الكورة وحليل زمنا … لما كانو امهاتنا وحبوباتنا بحضروها وبشجعو كمان …. لااعتقد رجوع الزمن الجميل للاسف.

  14. من يعتقد بكلام البروف الفوق دا قطعا عاوز التجاني الماحي

  15. البروف العزيز لك التحايا والله نحن معشمين في الاكتر من دا ما من جماعه (ياهو دي) عشمنا في الله كبيــــــــــــــــــــــــــــــر

  16. انا لا اعتقد ……………..ز او كما قال عادل امام
    ما خايف المطر تتحاشا الضهاري الراجيا قولة خيرا
    ولا خايف المطر يمشي علي الصحاري تلموا في بشكيرا
    عيال بتجري علي المدارس والفطور نجما بعيد
    بنوت بتجري علي الخطاطيب الخطاطيف البتجرح والعريس نجما بعيد
    الدكاكين التملا تفضي والسماسرا يسمسرو
    البسفو الطين يسفوهو والبحتو الراب يحتو
    البناطلين ليها سستم والقواقين لهيا سستم
    والبنوك الفيها بستم من سويسرا لماليزيا
    بالسفارات والعمارات والخبارات………..
    التحية للمبدع دوما (القدال)
    واستميح استاذنا جبرا والمدونين العجايز منهم والشباب وادعوهم لمعاودة الاطلاع والاستماع لـــ طواقي الخوف

    1. لا فض فوك القدال اوجز الخبث الراكد فيهم

    1. قتلوك انت براك والا القتلك منو يمكن انا طاشئ شبكه

  17. كتلوني ولسه حي مشرك للبرنجية اطمئن وضع في بطنك بطيخه شتوي انا بطلت

    1. والله انا تبتا من 1.1.2013 ما ولعتها والحمد لله وانشاء الله ما نرجع تاني
      مع انو هنا رخيصة اما تبكي ليها مافي

      1. سالتك بالنبي انت وين

  18. لا اعتقد ان ذلك سيحدث وربنا يكون في عوننا ‏

  19. هل تعتقد ان شخص قرا كلامك ده وما ضحك ده اسمو احلام زلوط

    1. زلوط زلوط زلوط زلوط الاسم دا ما غريب علي

  20. (ولعلم الجميع التغيير قادم لا محالة فدوام الحال من المحال)
    ود الخلا
    التفائل ده جاك من وين ؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: