زكاة أسماك

العم العزيز الأاستاذ الفاتح جبرا المحترم
السلام عليكم ورحمة الله تعالى وبركاته وكل عام وأنتم بخير وإن شاء الله السنة دي (واواتك) تعمل شغل كويس وملف خط هيثرو الليهو سنة وشوية عند النائب العام
تعرف أخبارو شنو؟
أستاذي :
أنا إبنك (ع.م) أحمل بكالريوس في الهندسة وكباقي الخريجين المساكين إنتظرت في صف الوظيفة لحدي الصبر قالي انا بكرهك ؛ وجريت جري مارثوني لحدي ماحسيت باني سوف أذهل العالم إذا خشيت في مسابقة جري لأني متاكد ح أكسر أي رقم قياسي عالمي ؛ وبعد الواسطات وكسير التلج وياريس ويابوص وياكومندان ويامدير و؛و؛و؛و في الآخر طلعت كعادة جميع أقراني (البدون ضهر) ولا (تزكيات ولا توصيات) طلعتا بخفي حنين !
طيب أعمل شنو ؟ عشان ما أخش في مجال السوق الكترت مشاكلو وشيكاتو الضاربه وسماسرتو ولصوصو اللي بقو أكتر من الناس الفيها خير ؛ بديت أفكر في عمل يكون حلال مافيهو أي شبهة حرام ولا حتي يجمعني بأولاد الحرام المابعرفو الله والرسول ؛إاخترت مجال صيد الاسماك.
الوالدة ربنا يخليها داخلة ليها في (صندوق) قمتا (حنكتها) أدتني (قريشاتو) وكمان ما قصرت قامت (فكت) ليها غويشة وقمتا بالقروش دي إشتريت ليا (مركبين) بتوعين سمك وباقي أدوات الصيد من (شباك) وخلافه ولميت أولاد اهلي الظروفهم تعبانة ودايرين رزق حلال واتجهنا صوب اقصي شمال السودان ويالبحر جاك زول ؛ في البداية الناس بدت تضحك في فكرتيلكني ما إشتغلت بى زول المهم بعد 15 يوم من العمل الشاق فتح الله لي بشحنة (سمك) ماكنت بحلم بيها ؛ وانا جاي علي العاصمة وفي منطقة خلوية صادفتنا نقطة عبور افتكرت ح أدفع رسوم العبور اللهي 10 جنيه لكن فجأة ظهر واحد وقف قدامي وبعد ما أخد ليهو لفة حول العربية قال لي يا أبو الشباب إنتا شايل سمك (وهو عارف كويس اني شايل سمك وشكل التلاجة ظاهر) قلت ليهوأايوة والله بى نيتي الطيبه افتكرتو عاوز ليهو سمكة سمكايتين قلت زول قاعد في الخلاء ده اكيد مشتهي سمك ؛ فجاءة دخل أيدو في جيبو وقام مطلع ليا ايصال مالي وقال لي في برود شديد : ( 50 الف جنيه) ؛ قلت ليهو: ( 50 بتاعت شنو؟) قال لي : (زكاة )
ماتستغرب يا أستاذ زكااااة ؛ قلت ليهو : (لكن السمك ده حال عليهو الحول متين؟) قال ليا : ( يازول انا موظف ومابعرف شي ) ؛ دحين يا أستاذ جبرا انا واقف في العبور ده وبعد مشاكل وتحانيس أبيت أدفع ال50 دي قلت حتي ولو اخسر الشحنة كلها ؛ عليك الله يااستاذ أسأل ليا شيخ بس مامن السودان يكون من اي دولة تانية حتي ولوالفاتيكان لانو اكيد ح يعرف ويكون ملم بابسط الأحكام في شريعتنا الاسلامية اكتر من الشخص ده قوليهو هل هسه في حالتي دي مفروض يشيلو مني زكاة ؟ وبيحسبوها كيف؟ يعني الشايل طن سمك زي الشايل نص طن ؛ والشايب سمك (بلطي) زي الشايل (كبروس) وللا (قرقور) وانا مستعد ادفع اذا في شيخ افتي ليك هسه ؛ حتي في الحلال عاوزين يحاربوني ؛ رد علي هسه ياجبرا واستشير مشتركينك لانو رواد صفحتك ماحبوك الا عشان وضوحك ودفاعك عن الحق ؛ وارجو عدم ذكر الاسماء ماخوف لكن شئ في نفس يعقوب ؛ وجزاك الله خيرا

الرد :
الإبن العزيز (ع . م) : الثابت أن زكاة السمك 5% لكن مسألة الحول والكمية والنوع وكيفية تقديرهم فعاوزة ليها فتوى لذلك نرفع فتواك لأهل الإختصاص وللإخوة في ديوان الزكاة على وجه الخصوص علهم يردون على أسئلتك .. بس ما بطريقة (سياسة بسمارك الداخلية) !

كسرة :
الزكاة البيربطو ليها في الخلا دي والله ما شايفين ليها اي اثر في مجتمعنا .. وللا شنو يا جماعة ؟

كسرة ثابتة :
أخبار ملف خط هيثرو العند النائب العام شتة(وووو وووو وووو)+(وو)

Advertisements

66 تعليق

    1. محمد كل سنه وانت طيب

    2. برنجيه برائحه السمك هع

    3. مبروك عليك البرنجية وانا مني ليك حجار كله بس اخاف عليك من امراض التدخين

    4. برنجيتك دى دفعوك عليها ضرايب و الا كيرى ساااى؟؟ و الا عندك ضهر,, و على قولة اخوانا المصاروة: اللى عندو ضهر ما ينضربش على بطنو,, اه امال ايه ؟؟!!

  1. الكترااااااااااابله
    برنجيتك مبروكة آ العبيد

    1. الكترابة في البرنجية والا الكترابا في واوات ابو قناية

  2. اخونا الفاتج جبرا سمعنا اشاعات كتيرة عن الفتاوي الناس في الخليج قالو لو عندك اي مشكلة وداير فتوة امشي السودان وفي ايصال مالى في هيئة الافتاء تدفع المبلغ وبدوك الفتوة الدايرا هل الكلام دا صاح ؟؟؟؟

    1. دلوقت فيه فتاوي افرنجي كمان وبكرفته وفيونكه ما ترزيه ياخ

    2. و قيمة الايصال على حسب نوع الفتوى,, يعنى لو عاوز تتزوج الخامسة بدون فك تسجيلات ممكن يجازفوها ليك بس تكتر الفلة شوية!! اما فتاوى الفلوس دى من تحصيل لدفع لتأخير لتأجيل, فدى على كيف كيفك, اصلو البيفهمو فى الحاجات دى كتار جدا, و ممكن صبى مفتى يخلصا ليك !!

  3. ود الضو القبض الجو | رد

    يا بروف مبلغ الخمسين ألف ده مش لو بالدولار يبقي زي الادوهو لبتاع القناة الوهمية يعني يشيلو مننا قروش الزكاة ويدوها لغير مصارفها الححددها الشرع والله يستر مايشيلو زكاة مننا في النفس الطالع ونازل
    استر يا ستار

    1. قربوا فيه خطه بي كده انت ما قاعد تقرا المدونة يظهر انك جديد الكلام دا اتقال قبل كده ودلوقت خايفين البرلمان يسمع بيها ويناقشها ويجزها بتصفيق وفي مقولة اخري بالزغاريد

  4. اذا كانت هذه الجبايات الذكوية تذهب لجيوب العاملين ععليها فدونكم فقه السترة الذي يبح كل شيء

  5. متعك الله بشبابك الأخ (ع . م) وأن يرزقك الحلال ‘ بس كنت عايزه أعرف ال 50 ألف دى يعنى 50 مليون (بالقديم) لأنه على فرض صحة زكاة السمك المبلغ ده غير معقول ..الزكاة ربع العشر فإذا كانت زكاة سمكك 50 مليون السمك كله قيمته كم؟ أفيدونا أفادكم الله.

    1. قديم جديد ما تفرق المهم انها اتاوة اتاوة بس اللي مستغرب ليه علاق ة رجال المرور بالسمك

    2. امممممممم,,والله كلامك دا يا ام ايمن معقول ونرجو من البروف رفع الامر لهيئة الافتاء مع الموضوع نفسه …

  6. جاء في موقع اسلام ويب حول زكاة السمك
    http://audio.islamweb.net/audio/index.php?page=FullContent&audioid=134666
    فالأسماك موجودة في زمن النبي صلى الله عليه وسلم، وكذلك اللؤلؤ يستخرج من البحر، والعنبر يستخرج من البحر، كل ذلك كان معلوماً وما سن فيه رسول الله زكاة.
    وإذا أرجعناه إلى القواعد الأساسية وقلنا: هذا الذي استخرج اللؤلؤ واصطاد السمك وجاء بالعنبر وأقام مزرعة الدواجن، إنه يبيع ويدخل عليه من ثمنها، فيكون ذلك (من طيبات ما كسبتم)، فأثمان هذه المنتجات الحديثة على رأيه سيكون كسباً ونماءً يدخل في ملكه وفي خزينته، فإذا حال عليه الحول زكاه، كما أنه لا تزكى الخضروات ولكن تزكى قيمتها إذا حال عليها الحول، فنقول: كذلك، صاحب البيض والدجاج وصاحب السمك وصاحب العنبر وصاحب اللؤلؤ، إذا اجتمع عنده بعد نفقته نصاب وحال عليه الحول زكى، فيزكي قيمة ما حصل عليه من تلك الأشياء التي لا أصل للزكاة في أعيانها.

  7. الأخوة السمار .. بالأمس شاهدت لقاء بروفسير شمو مع النائب الأول .. وكان فى سؤال فى أخر اللقاء بخصوص تصريحات المسئولين الغير مسئولة وتضاربها وعدم دقتها وكل واحد بيصرح بطريقتو .. اجاب السيد النائب العام انو مسألة التصريحات دي هي من صميم طبيعة مجتمعنا السوداني .ز الكل يستطيع أن يفتي فى أي حاجة وعلشان كده أخونا مولانا السر ما يستغرب عندما يسمع السمعو فى الخليج عن الفتاوي فى السودان وحل المشاكل لانو تصريح النائب الأول يؤكد ذلك .. وده تصريح من الراس الثاني فى البلد أكثر من كده عاوز شنو .. والله أنا بحاول افتي لأخونا ع.م لكن الفتوى شرعية وما في مجال الواحد يدخل على غير اختصاص .. أول حاجة يأخوى كان تجيب صاج وتقعد تشوي السمك .. ولو الراجل مات ما تديه لقمه واحده .. ولو ريالتو سالت بيع ليه السمكه بخمسين ألف وأديه سمكة ثانية قول ليه دي الزكاة بتاعت الشحنة وخليه يتطلب الله ، ثانيا عمرنا ما شفنا زكاة على مال لسة زي ما قال ما مرق عليه الحول .. وكان هي عروض تجارة زكاته بتطلع بمجرد البيع .. والحقيقه .. هي لا زكاة سمك ولا حاجة .. تلقى الراجل ده دفترو زاتو ما عندو علاقة بديوان الزكاة ، وكثير سمعنا انو أغلب محصلي الضرائب والزكاة والرسوم الأخرى بيكونوا طابعين دفاتر على حسابهم وهم فى الأصل لا يعملون مع أي جهة رسمية وزي الراجل ده تقلى واقف ليك فى الخلاء علشان انت تحتار تعمل معاه شنو ،، وليس ببعيد عسكري المرور فى منطقة المايقوما لمن مدير المرور طلب ترقيتو لقوه أصلاً ما عندهم عسكري مرور بيقيف هناك وأن دفتر المخالفات الشغال بيه تم إلغائه من سنتين .. أنا شخصياً لو كنت محل ع.م. كان نزلته فى الراجل ده ضرب بعصاية أو سوط عنج وخليتوا يجري فى الخلاء عريان ،، ولو سألوني أقول ليهم حاول يسرق مني شحنة السمك وافتكرتو من قطاع الطرق عشان كده ضربتو ،، وخليه بقى يثبتوا ان عرف عن شخصيتو أو أبرز أي بطاقة تثبت صلاحيته وتخويله فى تحصيل الزكاه..

  8. اليكم طريقة تحميكم من المحصلين المزيفين — أول حاجة تسألوه المبلغ المطلوب دفعه كم ؟ لتثبت المبلغ وكده عشان بعيدين ما يبقي فى مغالطه … ثانيا أسالوه عن اسمو وقبيلتو وساكين وين … بعد كده يبدأ شغل القطيم .. تسألوه ممكن نشوف بطاقة العمل البتثبت انك شغال فى الحكومة وبالأخص فى الجهة التي سيتم تحصيل الرسوم لها .. تسألوه عن المرسوم أو المنشور الصادر من مجلس الوزراء أو الجهة لتحصيل هذه الرسوم ،، تسالوه ممكن نتأكد من الدفتر الشايلو ده يحمل رقم السنة المالية ولا لا .. يعني كتروا الأسئلة وتقولوا ليه معليش أصلوا أولاد الحرام ما خلوا لأولاد الحلال حاجة .. عمليات النصب دي كترت فى الأونة الأخيرة .. وآخر سؤال وياريت يكون معاكم شاهد لزوم الضرورة .. ياخي بالواضح انت عاوز كم وتفكنا .. وبالطريقة دي والزرزة ممكن نقضي على ظاهرة المحصلين أو المستولين بالشوارع .. ودي ظاهرة يجب أن تقضي عليها الحكومة .. يعني زي الراجل دي يخلوه يصل لحدى مكان بيع السمك وقبل ما يدخل يوزنو السمك وعلى أساس سعر السوق يتم تحديد الزكاة وفى نهاية اليوم لانو ممكن السمك كلوا بما يتباع حتى تكون كل الأمور منضبطة وتقدر الحكومة تقضي على فوضى التحصيل .. والله يكون فى عون الجميع

    1. ابو غسان .. بالله شوف لي ولدنا ده طريق ما يجمعو بأولاد الحرام المابعرفو الله و الرسول عشان درب الصيد ما نفع و صندوق امه ما شفع وحا يصادرو سمكو كان ما دفع

      1. فضل النفس النفس كتمت كتمت كتمت

      2. بس وجتها وجتها يلعب كورة بس مفيش غيرها يلعب كووووورة

    2. افدتنا كده نعرف المحصليين المزيفين بس الحيكومة في الاخر نعمل معاها شنو

      1. الغلبان
        و الله النفس عنده متحصلين. .. بس يومه لسه ما جا. ..الله. يستر .. سلوا الله. العافيه

  9. اولا الزكاة ركن من اركان الاسلام وما عندنا فيها أييي كلام عشان ما نتهم بغير ذلك .
    لكن الزكاة كمان خشم بيوت وكل خشم بيت بي شروطه .
    ولو قلنا علي حالة ولدنا ده انها عروض تجارة فهل انطبقت عليها الشروط ومن متين الزكاة بدفعوها ششنه كدي .
    هو زااتو ولدنا ( ع م ) ده بس وقف تلاجتو دي جمب البحر وفتح بابا وقعد يكورك للسمك السوق السوق السكي , عوضيه , عابدين , حوش السمك وقام جا ناطي جوه وقفل بابو ومشي ?
    ما صرف علي السمك ده أي شئ ?
    انت يا ولدي زاااتك كدي اتأكد الايصال ده مكتوب فيهو نصاب زكاة ولأ في تنوين شدة فوق الصاد و انت ما شفتها !

    1. من حصاد غربتي دفار دفعت ذكاته قبل ان اتهنى بيه هههههه قبل ما يلف العجل لفه واحة ههههههه ووصلت اهلي بعته لقيت نفسي خسران ههههه وهسع كتمت وعاوزاتخارج

    2. يعني يا جنوبي عاوزهم يخلو السمك حول يبقى تركين او فسيخ او ميلوحه بعدين يزكوه يعني يبقى معفن زيهم هع

  10. منقول من موقع إسلام ويب:
    (ونقول: أيها الإخوة! إن من يقول بذلك يفوته الأصل الأساسي إذا قال: إننا نزكي البيض والدجاج والسمك، وهل هناك نصاب للبيض بالعدد أو بالكيل؟ هل هناك نصاب للدجاج بالوزن أم بالحبة؟ وكذلك السمك.
    وإذا قلنا على قولهم بزكاتها فهل نعطي المسكين طبق بيض أو طبقين؟ ماذا يصنع بها؟! إن ادخرها فسدت، وإن سلقها لم يقدر على أن يأكلها! فسيضيع حقه فيها، وكذلك اللحوم والأسماك.
    فهذه الأنواع من الأموال المستحدثة لها نظائرها في الخضروات، وكذلك فالأسماك موجودة في زمن النبي صلى الله عليه وسلم، وكذلك اللؤلؤ يستخرج من البحر، والعنبر يستخرج من البحر، كل ذلك كان معلوماً وما سن فيه رسول الله زكاة.
    وإذا أرجعناه إلى القواعد الأساسية وقلنا: هذا الذي استخرج اللؤلؤ واصطاد السمك وجاء بالعنبر وأقام مزرعة الدواجن، إنه يبيع ويدخل عليه من ثمنها، فيكون ذلك (من طيبات ما كسبتم)، فأثمان هذه المنتجات الحديثة على رأيه سيكون كسباً ونماءً يدخل في ملكه وفي خزينته، فإذا حال عليه الحول زكاه، كما أنه لا تزكى الخضروات ولكن تزكى قيمتها إذا حال عليها الحول، فنقول: كذلك، صاحب البيض والدجاج وصاحب السمك وصاحب العنبر وصاحب اللؤلؤ، إذا اجتمع عنده بعد نفقته نصاب وحال عليه الحول زكى، فيزكي قيمة ما حصل عليه من تلك الأشياء التي لا أصل للزكاة في أعيانها.
    أما قيمتها فكما تقدم لنا: لو أنه استثمر التراب لكان عليه من قيمته الزكاة، وبالله تعالى التوفيق.)
    وهذا رابط الموقع لتعم الفائدة:
    http://audio.islamweb.net/audio/index.php?page=FullContent&audioid=134666

  11. البروف والسمار
    أخونا (ع.م) أدفع وإنت ساكت ، الواطة دي مش حقت الحيكومة والبحر ده مش حق الحيكومة فبالضرورة السمك حق الحيكومة
    ومشوارك لسه طووويل طولاً يجنن لسه حا تدفع لناس الضرائب ولناس المحلية ولناس النفايات ولناس المرور ووووو وخلي الجرسة

    1. آآآآآآلمندهش انحنا زاتنا مش امنا الحكومة على قول البروف والا عاوزين تجهجهوا كمان نسبنا الله

  12. السمار الكرام
    يا أخوانا بسأل من واحد إسمو الطيب أبو قناية وين الزول ده ؟؟
    ما تفقدوهو إمكن يكون ميرود ولا شبكتو طشّت ولا هو زاتو طشّ وخلا البلد
    غايتو في جميع الحالات أكان شبكتو طشّت حنشوف إعلان في صفحة خرج ولم يعد ولو طشّ وخلى البلد حنشوفو مليارديرعائد قريب في الإنتخابات رئيس لنادي الهلال ولا المريخ لكن الخوف يكون ميرود ومهجوم مما رأى فيما لاعين رأت ولا أذن سمعت ولا خطر على قلب بشر …. ويا حمد أب عصاية تجيب لينا الطيب أب قناية

    1. حمد اب عصاية دا منو يلحقانا ويفلقنا

    2. ابو قناية دا يكون زقفوا بيهو (عرشو بيهو)

      1. ليه؟ زاقفين راكوبة انتوا؟؟

  13. عندنا واحد في مدني عندو حمامات في السوق برضو جوهو بتاعين الزكاة ، دايرين زكاة فرضوا عليهو مبلغ 1300(الف وثلاثمائة جنيه) دي اسمها زكاة شنو في الدين ، لاقتكم زكاة خرا في القاموس الدينى ياجماعة افتوني

    1. هههههه ..
      انا كان بكانو اصلي مابدفع خليهم اليجو يصادروهو
      يا مولانا هل تصدق انو عربات الدفار بدفعوهم رسوم نفايات ! مره سألت سواق دفار قت ليهو صحي بدفعوكم نفايات ? قال أيي و الله . قت ليهو ليه ? قال انا خابرو امكن ببعرلهم في الشارع

    2. مش الزكاة من جنس المحصول والا انا غلطان بتاعين الذكاة ديل ياخدو ليهم دش مجاني وكمان كان فيه اإإح ياخدوها ويخلوهو

    3. جنوبى و الغلبان ,, و الله ديل قويات منكم ,, تعرفوا احيانا كتر الغبينة بتولد ابتكارات متل تعليقاتكم دى ,, قبلكم و وحدكم يا ديل !!

      1. وكمان الحمامات في تونس وتونس الخضراء خضراء السجارة سجارة مرة بهنس بهنس واللص لص العجلة عجلة ديم سلك هاك الديم دا

  14. جبرا والسمار سلامات .
    والله ياجماعه غلبتنا عديل كدة ولو خابرين لينا بلد تانية نقبل عليها وننكر سودانيتنا .هى عليك الله حياتنا دى أن بزلونا فيها نحن نوديها وين .أو كما قال الزبير…

    1. قبل ما تكتب كده انا ساعي لكده مع العلم انني كنت خارج البلد من بعدهم بي كم سنة كدي بس لو ربي سهلها تاني الا في صندوق بس ما صندوق برنجي مبروك عليكم البرنجيات

  15. والله حقو يورونا الزكا اوااات كلها و يعملوا لينا ليسته ،، القصه جايطه وفي اختلاسات كثيره جداً في ديوان الزكاه ،،
    غايتو حاله صعبه خلاص لا نثق في مفتيي السودان، خلاص في انعدام ثقه، كتمت كتمت كتمت كتمت كتمت كتمت كتمت كتمت

    1. آالعبيد اللسته كده بتكون طويله اليكتبولنا الما فيهو زكاة شنو

  16. من الغرائب ايضا في هذا الزمن رحت عشان احرر خلو طرف من االزكاة قالو لي لازم تدفع لينا مبلغ ٥٠٠ جنيه تحت الحساب (سمعتو زكاة فيها تحت الحساب)

  17. عام 2010 كنت اعمل مندوب مبيعات في حنوب كردفان المستودع في الدلنج ومنها اوزعها بالدفار لباقي مدن الولاية (مشروبات غازية) كنت بمشي كادفلي 3 او 4 مرات في الاسبوع والله في كل رحلة بدفع زكاة وبدفع ضريبة وبدفع نفايات اي 3 او 4 مرات في الاسبوع حسب الرحلة ….كنت بدفها كاملة وباخد ايصالاتي ……. بعد فترة قالو لي احنا بنخفضا ليك بس تدفع رشوة والله العظيم بالواضح كده لانو خسرانه معانا بطريقتك دي

    1. كتلوني سلامات مدبلة لك ما تفهمها دبل كولا يعني كنت راح تفلس باصحاب الكازوزه يا راجل دا نحنا زات نفسنا رحنا في الكازوزه هع كع

  18. كثرة من الصامتين بالقمردينة الله ما عاجبكم السمك دا

  19. زكاة الأسماك في الشرع :
    طبعاً السمك كغيره من السلع التجارية التي يتعامل فيها التجار بالأسواق فتكون زكاته كزكاة عروض التجارة سواء كان التاجر مشتري أو من أرباب المزارع أو باقي الصيادين ويقاس نصابها بنصاب النقود 2.5% من جملة رأس المال أو مما بقي في يدك بعد تمام السنة القمرية أثنى عشر شهرا من اكتمال النصاب وهو ما يعادل قيمته 85 غراماً من الذهب لما رواه الإمام احمد في مسنده من طريق أبو عبيد عن يونس بن عبيد قال: كتب عمر بن عبد العزيز إلى عامله على عمان : أن لا يأخذ من السمك شيئًا حتى يبلغ مائتي درهم (ما يساوي في ذاك الوقت 85 غراماً ذهبياً) فإذا بلغ مائتي درهم فخذ منه الزكاة (الأموال ص348) ، وقد رُوى ذلك عن أحمد أيضًا (المغنى: 3/28 ، وهذا عين ما ذهب إليه الإمام احمد بن حنبل رضي الله عنه والشافعي في الجديد ومالك .
    أما بخصوص ما روى عن موظف الزكاة أنه أراد 50 جنيه فهذا مبلغ لا يمت للزكاة بصلة لأن النصاب الشرعي = 85 غرام من الذهب في سعر الغرام اليوم 360= 30600 بالضرب في 2.5 % = 765 جنيه وهو الحد الأدنى لمقدار الزكاة فما أقل فهو صدقة أو رشوة ……………

  20. وماذا عن زكاه غسيل الأموال ،، شايف الفول اوتوماتيك في الصفحات الريسيه في الجرايد،،،دي يا مفتتي السودان زكاتها كم،،

    1. يا راجل معقولة في زكاة على الغسالات هع كرع

  21. زكاة حتى على النصارى والاقباط والمايشتري يتفرج قول معاي انا شفتك وين يا محم عمر

  22. يا جماعة الخير اربعة وخمسة بالقمردينة ولا احد يظهر ماله السمك ريحته اتغيرت

  23. الزكاة في الدين بالحول وعندنا باليوم ويوم بيوم نبيع الكمبا

  24. في الكسرة الثانية اكيد البروف بيلعب على ولدنا دا مش ملاحظين كده

  25. فى احدى المرات بجهاز المغتربين طالبوا واحد قبطى ان يدفع الزكاة حتى يدقوا ليو التأشيرة,, قال ليهم انا قبطى مش مسلم و ما على زكاة,, قالوا ليو و الله ما عارفين, يا تدفع يا ما حنأشر ليك,, صاحبنا عمل جوطة كبيرة جدا و مع انو اخرنا كلنا, الا ان الجميع كان مبسوط منو, و فى النهاية ودوهوا عند مكتب الامين العام, و هناك برضو عمل جوطة, و قاليهم بدفع, بس ما تكتبوها لى زكاة, اكتبوها جزية او اتاوة او همبتة او قلع, اى حاجة تانية غيؤ الزكاة !!!
    فى احدى المرات عملت لى دولاب عند نجار فى السجانة, و لما جيت اشيلو قال لى: لا تعال بالليل و معاك قلاب كبير, قلت ليو ليه؟ دة بوكس صغير بشيلو. قال لى و لكن كدة ناس رسوم الانتاج حيوقفوك و يشيلوا منك رسوم الانتاج و من بتاع البوكس و لو جونى البيت كمان حيشيلوا منى,, و فعلا جابوهوا لى بالليل بالقلاب!!!
    مرة محملين عدة بناء فى الدفار و معانا المهندس, وقفونا جماعة قالوا لينا تدفعوا النفايات,, المهندس اتنفض و هاج فيهم قاليهم: الدفار دة ببعر ليكم فى الشارع و الا شنو؟ و حتى اهو عاينوا للشارع, اصلا وسخان, وين نضافتكم ليو عشان تطالبوا بحق النفايات,, اوعوا من قدامى فى الساعة دى قبل ما اتهور و افرغ دة (و اظهر ليهم المسدس الكان رابطو فى نصو) فى رسينكم الغلاد ديل ,, خلى الراجل فيكم يبرانى تانى !!!
    فى احدى المرات فكرت افتح محل بيتزا مع احد زملاء الكفاح الاغترابى, و اثناء التجهيزات و الديكورات اللى عملناها بمزاج من وحى الغربة, وقبل الافتتاح كنا بنولع الانوار للتجربة و الدعاية وكدة,, و ذات مرة زارونا ناس الضرايب و طالبونا بتسديد الضرايب, و قلنا ليهم يا اخوانا نحنا لسة ما فتحنا و ما اشتغلنا زاتو, قالوا لينا ما كل يوم انواركم تقج فى الشارع و طول النهار ناس داخلة و مارقة, قلنا ليهم ديل العمال يا ناس الله, و لكن البيقنع لينا الديك منو؟؟ عموما انا قفلت معاى و صاحبى زااتو كانت قافلة معاو بس خجلان يقول لى, و ما صدق لمن قلتا ليو نبيعو و نطلع باقل الخساير, فاتخارجنا منو بعد ما (عشينا) ناس الضرايب عشان يخفضوا لينا المطلوب!!!

    1. الحبيب فلاديمير,,سلام,,
      والله ام عارف اضحك او ابكى من المواقف السردتها دى ,,
      خيب الله الوالى على السودان ومن شايعه ,,
      لك الله يا وطنى الجريح,,

      1. الوالي وبص الوالي هاك الزحمة دي (ياعمك ديل ولات ديل من فوق لي تحت ديل ولايا مكنكشين في الحكم بالسنون والاظافر وكله ولو الكتمت دي قالت بم على اليمن تلقى الناس مهروله هرولة والمطار مزدحم والفورويل مشققه الدروب ديل عارفين عملوا شنو باسم الدين واقسم ليك الرويحه حاره وراح تشوف جنس شتيت لانه ما فيش علامة صلاة بدون كرش تخيل علامة الصلاة لازمها كرش زي المحيرني علاقة رجال المرور بالسمك شنو يعني كده اثنين علامة الصلاة والكرش ورجال المرور والسمك ولسه اظن كلامي واضح مو داير فهامة من فهامات البروف تسلم صديقي

  26. البروف والاحباب,,,سلام,,
    حقيقة الفاتيكان بكون فيها عدل ونظام احسن من السودان !
    الا قاتل الله الظلم واعوانه ,,,
    لكن حكاية الزكاة دى اصلا همبتة سااااااااى ,, اسه المغتربين بشيلوا منهم ظكاة تسمى (زكاة الراتب) ! ومجازة من مجلس الافتاء الشرعى !
    احححححححححححححححححح

    1. ما بنقول المسيحيه دين بعد الاسلام ومن اتي بغير الاسلام دينا فلن يقبل منه وهو في الاخرة من الخاسرين ولكن اخي الظلم ظلمات ودا من الاسباب التي جعلت للتنصير موطئ قدم في دارفور تخيل في دارفور تاني ارجع تخيل في دارفور حيث اكثر حفظة كتاب الله في دارفور فاهم حاجة اههع ياخي اخخخخخخخخخخ

  27. والبكم هذا المقال الذى سطرته على موقع (سوداننا) قبل عام من الان :-
    الجهاز المسمى (شئون المغتربين) احرى بهم ان يسموه (شئون المخربين),والمخربين هنا عائدة الى العاملين فيه والقائمين علي امره..هو جهاز منذ انشائه عكف وعزم على اهانة المغتربين واذلالهم والتنكيل بهم,,هذا بكل صراحة وشفافية ووضوح,,واتحدى اى شخص يقول بغير هذا..

    ولى معه قصص ومواقف قد تحزن الشجى وتضحك الخلى وتثير حفيظة المغبون وتفرج بعضا من كرب المكروب..

    ساسرد آخر المواقف التى حدثت يوم الاثنين الفائت فى شكل نقاط تسهيلا للسرد وامعانا فى التدقيق :-

    *وصلت المبنى المعنى فى تمام الساعة 7:30 صباحا وهو موعد بدء الدوام الرسمى,لكن لم يتواجد اى من الموظفين بمكانه,فقلنا _انا ومن بكّر معى_ لا باس علها زحمة المواصلات او تأخر الترحيل,لكن بعد قليل بدأت جموعهم تتوافد ويتجمعون فى شكل بؤر صغيرة لتبادل السلامات والقبلات التى تشى بان المتسالمين لم يتقابلا منذ اشهر,لكن تكررت العادة وكانهم كانوا فى اجازة سنوية,,المهم بعد التجمع يبدأ الجمع فى الانسحاب التكتيكى! حيث تخلو الصالة منهم بعد دقائق,وهكذا حتى اعلنت الساعة تمام ال8:30 صباحا ! بعد ذلك نما الى علمنا انهم مضربين عن العمل,طبعا انا انبسطت شديد قلت دى بداية ثورة لاسقاط النظام,,لكن يا فرحة ما تمت قالوا الاضراب عشان المكيفات عطلانة! طبعا الموقف بقى مستفز,,فما كان منى والا انفجرت فى احداهن_طبعا معظمهن نساء_ صائحا: انتى اسه عندك مكيف فى بيتك؟وفرضا انو عندك مكيف بتشغليهو من الساعة 7:30 صباحا؟ ولا دا عشان مال الدولة وسايب عايزة تقلى ادبك؟اسه انتى اضربتى لما زادوا العيش؟؟ طبعا يا جماعة الانفجار دا كان داخلى وكدة! آىييييييي..

    * اها بعد دقائق جا واحد قالوا دا المدير وما اخد معاهن دقيقة ورجع تانى! ولسه مواصلين الاضراب,,المهم جوا ناس الامن واتكلموا معاهم واعتذروا مننا وبعض الموظفين والموظفات ابتدوا العمل,فى واحدة زعلااااااانة قالت :ديل اتخاذلوا ! طبعا هنا ما قدرت اسكت وانفجرت فيها: طيب وكت زادوا السكر انتى ما اتخاذلتى!؟؟ ووكت زادوا الرغيف انتى ما اتخاذلتى؟؟ووكت ووكت وعييييييييييييييييييييييييييييييييييك..بطنى بردت شوية..

    *بعدين البغيظك انهم مصرين يحسسوك بانك مطالب ومديون ليهم! يعنى تقرا (الالتزامات المالية)! انا بس نفسى اعرف البقاها التزامات شنو! وتقرا فى ورقة البرنت( المتاخرات)! مع انك تكون دافع كاااااامل وما عليك اى شئ,ومفروض يكتبوا المبلغ المستحق او اى شئ..

    * فى احد الشبابيك فى لوحة مكتوب عليها كابينة رقم(3),,قلت ليهو اسه دى كابينة ولا كابنيه؟؟

    *وقفنا فى شباك السداد وجا واحد عندو مشكلة وقالوا ليهو ما بحلها ليك الا (موسى) فصاحبنا مشى وجا _الكلام دا الساعة 9 جات_ وقال موسى مافى وموبايلو مقفول,وليهو كم يوم على الحالة دى,,وقررررررب يبكى,,فما كان منى الا ان ترنمت (حليل موسى يا حليل موسى..حليل موسى اللرجال خوسة)..

    *طبعا الببوظ ليك اعصابى فى الضرائب موضوع الزكاة دا,,احيييييييييييييييييييييي انا,,مشيت للمدير وقلت ليهو ياخى الزكاة دى انا لى 8 شهور بس كيف ادفع زكاة!؟ قال لى دى زكاة بالشهر! اى والله بالشهر,, قلت ليهو زكاة الشهر دى من الدين الاسلامى؟؟قال ايوة,, قلت ليهو عندك فتوى؟قال لى :طبعا,,قلت ليهو : وينها؟ قا لى : ما عندى هنا..

    زهجت قلت ليهو لو ما دفعت بتعملوا لى شنو؟قال لى: ما بنديك تاشيرة,,قلت ليهو مفروض تحاربونى حسب معطيات الدين الاسلامى,,قال لى: عدم التاشيرة دا ما حرب ! طبعا الجمت ولميت ضنبى ونزلت دفعت !
    *وقفت قدام الضابط المسئول عن التاشيرة,وانا ورقى مستوفى ودافع وبطاقتى فى يدى ومبتسم,اكان باغتنى ليك: الخدمة الالزامية وينها ؟ فمددتها وانا مبتسم لسه,,قال لى: امشى صورها ! طبعا يادووووب البوغيتة صابتنى وانفجعت! لى سنين من زول يقول لى امشى صور,يا الموظف عندو ماكينة جنبو او بيرسل واحد من المستخدمين يصورها,,وهو ذااااااتو يصور ليها شنو!؟ما شافها وخلاص,وقرببببببت اسال الماكينة دى حقت منو لكن خفت !

    * وانا طالع خلاص بعد استلمت تاشيرتى اشوف ليك صور كتيييييرة معلقة فى الحيط مكتوب عليها (فرحة العائدين لارض الوطن) قلت ديل اكيد ناس ليبيا الكانوا عالقين فى منفذ السلوم ولا المرقوهم من قصف الطائرات,المهم مشيت عليهم اكان القاهم ليك العائدين من متمردى دارفور ! لكن قلت ماهم برضو كانوا مغتربين فى تشاد ! كع..

    -ولك ان تتخيل عزيزى القارئ بهذه الطريقة اين تذهب اموال المغتربين !!!!

    ونلتقى….

    1. اوعك ترجع قبل ما الدفار عجله يلف شالوا زكاتو وقبل ما الحاوية تتفرغ عزلوا الفيها في سوبا الحاويات اوعك ترجع اوعك ترجع اوعك ترجع فكر في اي بلد تلمك اوعك ترجع هنا كتت كتمت يتمكن ترجع بعد بم بتاعت الكتمة هسع اوعك ترجع نصيحة من القلب

      1. بسم الله !
        فى شنو ياااا الغلبان !!؟
        اترحمن واقعد فى الواطا !!

  28. آآآآشمباتي الواطه برضها حقت الحكومة

    1. ههههههههه,,
      لا لا دى حقت الله ,,
      اى والله

  29. اخونا الفاتح لاتستغرب لأنو الحال عادى ….. نحن مشينا فى دعوة اخونا بكنانة لمناسبة زواجه واستعرنا سيارة اخونا لصعوبة تمكنا من إيجار حافلة تجارية إستعرنا سيارته الحافلة الملاكى 11 راكب وإشتركنا فى قيمة الوقود لكن كانت المفاجئة بأن السيارات الحافلات ممنوعة من السير فى الطرقات السريعة مع العلم بأن السيارة مرخصة ومأمنة كمان وسواقنا بررخصة وكمان عامة لكن هذا المنع مشروط بدفعنا مخالفة قانونية قدرها ( خمسون جنيه ) أو نذهب لأستخراج ترخيص بقروش طبعا من إدارة المرور السريع ولكن هم ماشغالين بالمساء لأنو نحن سافرنا مساء الخميس ولو رفضنا طبعا سوف تكون المخالفة 1000 جنيه لأنها تابعة للمرور السريع قدر ماحاججنا إما الدفع أو حجز السيارة وطبعا نحن أسرة واطفال نعمل شنو ؟؟؟؟؟ ندفع طبعا ويكون عادى

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: