حكاية فؤاد

جارى فؤاد ما أن نلتقى حتى يشكو لى الست (زوجته) فهى كما أخبرنى قد أحالت حياته إلى جحيم وحولته إلى (فأر تجارب) .. والقصة عزيزى القارئ أن زوجة صديقنا (فؤاد) مولعة بل مدمنة على مشاهدة (البرامج الطبية) التى تبثها معظم القنوات الفضائية هذه الأيام والتى يستضاف فيها الأخصائيون فى كافة فروع الطب (الأصيل) والطب (البديل) وطب (الأعشاب) والطب الما عارف شنو داك .
ما أن يعلن فى أى حلقة تبثها هذه الفضائيات عن دواء أو (إكتشاف جديد) يعتقد أن فيه شفاء لأى علة كانت حتى تهرع زوجة (فؤاد) لتطبيقه عليه :
– شنو الخيار (الرادماهو) ليا فى الصينية ده ؟
– أسكت ساااكت .. والله الدكتور البجيبوهو فى قناة (الطبية) قال الخيار ده أحسن حاجة للضغط ! وكمان بيقوى الذاكرة وبينعش خلايا المخ !
يقوم (فؤاد) بضرب عدد مقدر من (الخياريات) بناء على نصيحة زوجته ثم بعد أن يصاب بتخمة خيارية (ياخد ليهو نومة) فيصحو وهو يحس ببعض علامات الجوع فيتجه نحو (التلاجة) ويخرج بقية (صينية الخيار) :
– (تمسكها منو) : شنو الشايلو فى أيدك ده !
– ده ما باقى الخيار الفى الصينية . !
– (تسحب منه الصينية) : لا أوعك .. هسة دى الدكتور بتاع قناة (سين بين إن) قال الحبوب الموجوده فى الخيار دى بتعمل حصاوى فى المثانة !!
يقول لى جارى فؤاد ، لم يمر يومان حتى إستيقظت من نومى صباحاً لأجد أمامى ثلاث
زجاجات (حجم عائلى) ممتلئات بالماء وأمامهن كوب :
– إنتى الليلة عازمة ليكى ناس ؟ شنو قزاز (السفن آب) ده ؟
– ده ما (سفن آب) دى مويه عادية ساااكت .. إنتا ما شفتا (الدكتور) بتاع قناة ( الطب البديل) قال شنو؟
– قال شنو؟
– قال ليك مفروض الزول أول ما يصحى من نومو يشرب ليهو تلاته لتر موية عشان (الكلى) بتاعتو (تتسلك) والكبد يقدر يقوم بى مهمتو .. ده غير إنو الموية بتخلى (الصفائح الدموية) تحافظ على سيولتها !
هنا إلتفت إلى صديقى (فؤاد) وسألته :
– أها وشربتا التلاته لتر موية ؟
– (وهو يضحك) : إنتا جنيت والله لو شربتها كان مشيت أحمد شرفى !
– وطيب عملتا شنو ّ
– غايتو شربتا ليا كباية كبايتين .. لكن دى مش المشكلة !
– المشكلة وين ؟
يواصل فؤاد : فى اليوم التالى صحوت من النوم وأنا أحس بالعطش نسبة لسخونة الجو فهرعت نحو التلاجة وأمسكت بإحدى زجاجات المياة (الحجم العائلى) وما أن شاهدتنى حتى صرخت فى قائلة :
– أقيف .. أقيف أوعك تكمل القزازة دى .. عشان الدكتور البجيبوهو فى قناة (خليك معانا) قال شراب الموية الكتير بيؤدي الى انخفاض معدل (المغنيسيوم) في الدم وبالتالي إنخفاض فى دقات القلب وإحتمال الزول تجيهو دوخة ويروح فيها !!
قلت لجارى فؤاد مواسياً :
– ياخى الولية خايفة عليك وحريصة على صحتك وكمان بتثق فى كلام الدكاترة البجيبوهم فى التلفزيونات ديل !
– يا أستاذ ديل مش دكاترة .. فى مبدأ فى الطب بيقول ليك .. (لا طب إلا والمريض حاضر) !
– لكن يا فؤاد ده هسه كلام عام وإرشادات ساااكت
– إرشادات شنو ؟ أنا ما تميت ليك القصة ..
وبدأ فؤاد يكمل القصة ..
أمبارح جيت من الشغل وبعد ما إتغديت ورقدتا .. لقيتا قاعدة تشاهد فى قناة (الطب للجميع) عندهم فقرة إسمها (كيف تتعلم الجراحة فى تلاتة أيام) ، المهم خليتا تتفرج وأنا أخدتنى نومة وبعد مسافة صحيت ليك بى كركبة لقيتا ليك ماسكة سكين المطبخ وواقفة قدامى :
– شنو شلتى ليا الزائده ؟
– زائده شنو؟ أنا عملتا ليك (كبدة فراخ) ما حصلت عشان الدكتور قال بتشيل (السكرى) وتمنع التجلطات
كسرة :
قال لى فؤاد أنه لم يكن يعانى من السكر قبل رؤيته للسكين والهجمة الحصلت ليهو !!
كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)

Advertisements

43 تعليق

    1. برنجيييييييييييييييييييية ،، مشتركة ،،

      1. برضو مشتركة كيتاً في ناس نقط نقط نقط

      2. عاد كيف، هي البرنجيه زاتها ناس الحييكومه ما صاغاروها وقطعوا نفسها زاتو

      3. برنجيييييية مشتركة !
        كية فيك يا المندهش عديييييل كدة !

    2. مرت فؤاد دي ما قالت ليهو يخلي التدخين كيف مبرووووووووووووووووووووه عليك

  1. والله فؤاد ده الله يعينوعلى الست الحريصة الحرص ده ،، ودي مشكلة الثقافة الفضائية والثقافة الإلكترونية المقلعين بيها اليومين ديل .. كل واحد مسك ليه مكرفون وظهر على قناة فضائية يدينا ليك نصيحة ممكن نعمل بيها ونلحق امات طه ،، مرة يجي واحد يقول ليك اشرب شاي وواحد تاني يقول ليك ما تشرب شاي ،، اكل ده وخلي ده .. ولو باريتهم حا تلقى نفسك شايل ليه ورقة مكتوب فيها الممنوعات والمحظورات والمرخص بيها ،، وما تسبتعد يوم تجي تسأل بتاع اللبن أو اللحمة وتقول ليه البهائم دي كانت بتاكل امباز ولّه برسيم ولّه عونكوليب … لا نو حا يكون طلع واحد فى فضائية وعدد مضار بعض الأعلاف البتاكلها البهائم على الانسان
    لابد للناس أن توعى وتعي ما تسمعه وتدور الشغله فى راسها .. لانو حينما يقول الطبيب أو الفكي أو البصير والاسمو شنو داك ما عارفو .. وينصح باستخدام شي واستبعاد شي اخر معدداً المضار والفوائد لا يكون كلامو مؤسس ومستند لبحوث علمية معتمدة من جهات موثوق بها .. ما زمان كان فى الشفخانة بتمشي يدوك سلفا ( ما معاها كير ) لو كان عندك وجع كرعين .. ولو مشيت وقلت ليهم نصريحات المسئولين فى البلد دي ورمت لي فشفاشي برضو حا يدوك سلفا .. فلازم الناس تهتم شوية بصحتها وما تتناقل ما يدور فى الفضائيات ومنتديات الأنترنيت تفادباً للوقوع فى ما لا يحمد عقباه .. على الأقل لو الطبيب البعالجك اداك حاجة غلطت عليك بمكن يكون عندك حق الرد أقصد خق التقاضي .. أهه لو نصيحة الطبيب فى الفضائية غلطت عليك تعمل شنو .. وانصح الأخ فؤاد يصحي من الصباح ويكركب البيت ويوسخوا ويطلع الهدوم من الدولاب ويوسخها ولو لقى طريقة يطلع ليها العدة .. ويخليها تشتغل اليوم كلوا بدل الفراغ القاعدة فيه وتسمع للمنظراتيه ديل

    1. بس يحكي ليها حكاية دق دقك ساكت

  2. ما مشترك .. بس أدونا نفس سااااي لي الله ..!!

    1. اصلاً هي لله هي لله .. ما لاجل نفس قد أتينا .. بس اصح بدري شوية ممكن تلقى ريحتها

      1. قدر ما اتحبرنا طشت البرنجية بس القاهها مرة

    2. هههههههههههههههههههههه,,
      حالتك تحنن العدو يا اب احمد ,,
      هاك النفس دا ,,,

      1. شنو يا ياسين هي برنجية والا بي كرتين توزع فيها كده

  3. السلام عليكم فى السقط ؟ من اين لنا هذا ؟ دى قروشنا و لا جلدن ماهو جلدك جر فوقو الشوك
    Defence budget (Sudan), Defence budget

    Defence spending trends
    Reliable figures are difficult to come by. Oil revenues have enabled Sudan to spend considerable sums on defence in recent years. Analysts have varied widely in estimates of the percentage of GDP being spent in any one year. From 2006 to 2011, defence spending is estimated to have increased from USD500 million to USD1.15 billion, a more than twofold increase.Sudan received funding amounting to USD96,000 in FY2007 for International Military Education and Training (IMET), the first time since 1989 that funding for this programme had been requested for the country in the US budget. After 2007, IMET funding rose steeply, to USD287,000 in 2008. The request for 2011 stands at USD800,000. In 2008 the US president requested USD245.9 million through the Economic Support Fund to support implementation of the Comprehensive Peace Agreement and ensure a full transition to a just peace in Sudan.Sudan has also received funding since 2003 under the Non-proliferation, Anti-terrorism, Demining and Related Programmes (NADR) to provide Mine Risk Education (MRE), to clear mined roads and to develop an indigenous humanitarian de-mining capacity. The NADR estimate for 2010 is USD3.9 million, which was the same figure as the request for 2011, which is slightly less than the USD4 million given in 2009 and the actual figure of USD4.4 million in 2008.

    1. تسلم كوكو بس لو كانت الترجمة على الشريط يستفيد الكثيرون من المعلومة وهي لله هي لله

    2. تسلم يا كوكو للمعلومة

    3. طيب وكت الحكومة عندها مليار و مية و خمسين مليون دولار صرفتة على التجهيز العسكري الزول الرسلوهو يجيب المعدات من سوق الجمعة الفي الصين نسى يجيب رادارات معاهو بدل المهازل البتحصلينا دي و ما كان احسن تصرف على مشاريع استثماريييييييييييييييييييييييييييييييييييييييييييييييييييييييييية حقيقية بدل الرئيس يسرق و النائب و الوزير و الوالي و الضابط و نحن .

      1. امك رجعنا ثاني للنظر هع

      2. يا الشرقاوى ,, أسأل العنبة الرامية فوق بيتنا !!!

      3. يعني عاوزهم يقولوا صرفوه على البلعوم اريتو علقوم سيدي سالم زي تيس ست نفسيه واهو ثقافة بعضها من بعض

  4. فؤاد ده يهتمو بيهو قدر ده وبرضو ما عاجبو !
    لمن في قناة تلفزيون رسمية يجيبو دعاية بتاعت كريم يفتح
    البشرة في تلاتة يوم او إبرة تكبّر الشنو كده والشنو
    كده مابعرفو ! في الحالة دي ناس وزارة الصحة وحماية
    المستهلك يكون موقفم شنو ؟ ولو قلنا اهو قروش دخلت
    للدولة من الدعاية دي طيب مش في قروش ح تمرق من وزارة
    الصحة لعلاج الآثار الجانبية الحا تظهر علي المواطنين
    البيستعملوا الكريم والحقن دي ؟ ولا آآآ الدولة غير
    مسئولة عن علاج المواطنين .
    المندهش .. نقط نقط دي كان قاصد الجنوبيين نحنا كراس
    عربي نوير ساااكت دينكا لا شلك لا .
    وهم القنوات دي وصل واحد قريبنا انو عندو سرطان
    وآخر ما انتهي اليه انو مشي ( الجنادرية ) ضواحي
    الرياض وجلس اربعة اشهر يشرب لبن الابل وبول الابل

    1. الدولة دي غير مسؤولة عن شئ نوهائي العفش داخل البص على مسؤولية صاحبه بس

    2. يا حليلك انت من وزارة الصحة
      قبل فترة مصل السحائي –قالو عالم صيني اكتشفو والحكومة الصينية رفضت ليهو يجربا في الشعب الصيني قام لقي من سماسرتنا الكتار ديل ودفع المعلوم وهاك يا تطعيم لامن ما لحق للناس قالو للاقل من 40 سنة بس —- بعدين يومين كدا طلعوا ناس المقاييسس والمواصفات (بالنظر طبعا) قالو المصل دا ما صالح —وزير الصحة قال الشي دا جا متين والجابوا ذاتو منو
      قال وزارة قال
      هاك الوزارة دي
      عارفين وزير التعليم الياباني استقال ليه —– قال في تلميذ قطف ورده من حديقة عامة
      يعني ما اغتصاب ولا جلد
      اللهم ارحنا منهم وارينا فيهم عظيم عذابك يا كريم

      1. كتلوني ولسه حي
        ياخ إنت ضد حرية البحث العلمي
        يعني ما يجربو المصل ده ويشوفوه كان ( نافع ولا ما نافع ) ويعني شنو لما يموتو 30 مليون في البلد دي ؟ يا أخي المصل ده حيفيد البشرية جمعاء ويكفي أنه حيستفيد منه أكثر من سبعة مليار هم عدد سكان العالم شنو يعني 30 مليون
        زعلتني منك ياخ
        جنوبي
        آآآآي داخلية بنات وكمان الليلة عندنا إفتتاح جامع والإسبوع الجاي عندنا إفتتاح روضة وحضانة ماما أمينة إنت حارقك وين ؟؟ ومن إنجاز لإنجاز عجلة التنمية مااااشة ولن تتوقف

      2. المندهش ..! يجازي محنك …
        وكت عجلة (الترمية) ماشة كده .. سمح انت مندهش مالك ؟
        بالله يا كتلوني ولسه.. يعني الصينيين رغم كترتم دي برضو حكومتم ما متضايقة منهم ؟
        المدينة الجامعية دي لو كان انجاز حكومي وحايسكنوا البنات
        مجان انا اول واحد كنت احتفل بيها وكمان كنت رقصت
        رقبة وشبّلت هناي زاتو . لاكين ده شغل تجاري لانسان
        داير يكسب كسب مادي وتكلفة المشروع ده ح ترجع ليهو
        في خمسة سنة بس ! لأنو 800 طالبة والطالبة ح تدفع 450
        جنيه يعني ال 21 مليون دي ح ترجع في 5 سنة !!
        طالما بنات الشعب ما حايسكنن مجان كم دفع صاحب المشروع
        للشعب مقابل قطعة الارض المميزة دي (؟؟؟؟ ؟؟؟؟ ؟؟؟؟)
        + ( ؟؟)
        لا حارقني ولا حاجة ان شاء الله تفتتحوا دكان برقاوي كمان ..
        ( عليكم النبي برنجية الليلة خلوها ليا )

  5. لبن وعرفنا البول الجابو شنو

    1. “وبول الابل يسميه اهل البادية الوزر وطريقة
      استخدامه بأن يؤخذ مقدار فنجان من بول الناقة
      ويفضل ان تكون بكراً وترعي في البر ثم يخلط مع كأس
      من حليب الناقة ويشرب علي الريق ”
      الكلام ده مقتبس من مقال عن فوائد بول الابل يا
      الغلبان وكمان لقيت انو مذكور في الطب النبوي
      وفي احاديث .
      وبرضو لقيت في تجارب تمت في جامعة ام درمان الاسلامية
      اكدت فوائد بول ولبن الابل ومقدرته علي علاج الامراض
      المستعصية .
      (لاكين خلي بالك كلهم قالوا بول الابل ! ما تمشي
      تشرب ليك بول ( جمل ) وتودي نفسك في داهية )
      فاهمني طبعا .. مُش ؟

      1. يعني ناقة بكر ما (بنتا لبون) هع فهمتني

  6. يمكن التي هع كع كرع

  7. مافي شي غريب اصلأ امنا الحيكومه جربت فينا اى شي الله خلقو ما خلاص نصبر حتي يعرف الصبر انا صبرنا اكتر من فواد زاتو !!!!!!

    1. يا ابراهيم يا ود علوض فؤاد انطبقوا عليهو اثنين ههههه

      1. زواج فؤاد من عتريسه باطل

  8. والله آآلعبيد البرنجية الاخدتها فوق دي الى كان خالطها شي زواج فؤاد من عتريسها باطل هههههه

  9. عوووووووووك آآآآآناس كتمت كتمت كتمت زي آآآناس انا مكتول في بيت العمدة رحم الله الطيب صالح (مين اين اتى هؤلاء)

  10. هات الشريط عشان نأصو ..
    فيكم زول شاف الكلام ده ? بالله لو ما كانت داخلية بنات !
    وسبت إيه للموظفين الزغننين يعملوه !
    ود كجو كنده ده يكبر كدي انا قايلو فتحنا الاندلس تااااني !

  11. يا حليلك انت من وزارة الصحة
    قبل فترة مصل السحائي –قالو عالم صيني اكتشفو والحكومة الصينية رفضت ليهو يجربا في الشعب الصيني قام لقي من سماسرتنا الكتار ديل ودفع المعلوم وهاك يا تطعيم لامن ما لحق للناس قالو للاقل من 40 سنة بس —- بعدين يومين كدا طلعوا ناس المقاييسس والمواصفات (بالنظر طبعا) قالو المصل دا ما صالح —وزير الصحة قال الشي دا جا متين والجابوا ذاتو منو
    قال وزارة قال
    هاك الوزارة دي
    عارفين وزير التعليم الياباني استقال ليه —– قال في تلميذ قطف ورده من حديقة عامة
    يعني ما اغتصاب ولا جلد
    اللهم ارحنا منهم وارينا فيهم عظيم عذابك يا كريم

    1. إسكت . مش الموضوع ما طلعش إغتصاب !
      وانا إفتكرتو إغتصاب و إنت إفتكرتو إغتصاب ده إحنا طلعنا أي كلام ياقدع !!
      كان الله في عون اطفال بلادي .
      والله انا افتكرت الحكومه ح تجيبو في ميدان عقرب و يترجم دون رحمة او شفقه .
      التحرش ده مش ياهو الخلا ناس دولة الشيطان الاعظم يفقدوا الثقه في رئيسهم داك ?
      لا حول ولا قوة الا بالله

      1. يعني يا قنوبي دنتا طلعت اي كلام يا جدع،،،
        ونحنا برضو معاك أوي أوي اصلو نحنا اتكتمنا وكتمت عل خالص يا قنوبي يا خوي

      2. كتمت مين يا عم هو انت فاكرنا لسه إحنا بتوع زمان ننفس لفوق ده احنا بقينا ننفس لتحت ( فسو ) ساااكت زي حصة التسميع زمان , لاكين مرات كان بتجيب نتيجه لأنو الاستاذ كان بخت يدو في نخرتو و يقول لينا الله يقرفكم و يمرق ,
        بس ان شا الله ديل كمان يقرفو !

      3. يخسى عليك يا انت !

    2. اسه عليكم الله سمعتو ليكم مسئول ولا رئيس دوله افتتح ليهو كبرى ولا شارع ولا مراقبه الكترونيه
      تحياتى للشعب الفضل

  12. النوم وجب عشان البرنجية ما تفوتكم وكده
    وبعدين الدنيا خميس واحنا في الغربة والولاد في التربة اقصد في السودان

    1. تصبحوا علي خير

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: