قال أيه : خيرية !

في مثل هذا الوقت من العام الماضي تم إصدار قراراً رئاسياً يقضي بتصفية عدد «22» شركة حكومية، وقد قامت حينها صحيفة (الأحداث) بسؤال الدكتور بابكر محمد التوم، نائب رئيس اللجنة الإقتصادية بالبرلمان (وقتها) عن عدد الشركات الحكومية المتبقية بعد هذه التصفية والذي إجاب بأن الشركات المتبقية ( لايعرف عددها إلا الله) وقد كانت إجابة سيادته مطمئنة فعلى الأقل هنالك جهة ما تعرف أعداد هذه الشركات التى تقوم بالإستثمار فى أموال المسلمين وتنميتها من أجل مجتمع مسلم يرفل فى الرفاهية يتمسك قادته بالشريعه حكماً ومنهاجاً .
الآن وبعد عام من إصدار ذلك القرار (الرئاسي) تم إصدار قرار رئاسي آخر يقضي بالتصرف في إستخصاص ثلاث عشرة شركة وهيئة وتصفية خمس شركات من جملة الشركات الحكومية المتبقية التى ( لايعرف عددها إلا الله) !
ومصداقاً لتصريح الدكتور (أعلاه) فقد جاء في تقرير المراجع العام قبل عدة سنوات بانه لم يتمكن من مراجعة بعض الشركات الحكومية لأنها (رايحة) ولا يعرف لها مقراً أو مكاناً وقد نادينا حينها بأن تستعين الحكومة بالتومة (الوداعية) لما لها من خبرة في معرفة (الرايحة) !

حقاً لقد إستوقفنتني تصريحات بل (تبريرات) الاستاذ “عبد الرحمن نور الدين مصطفى” رئيس اللجنة الفنية للتصرف في مرافق القطاع العام عندما تم سؤاله عن الهدف من وراء هذا القرار الأخير إذ قال :
– إن الهدف من هذا القرار هو توسيع مواعين الملكية الخاصة
– طيب إنتو أساساً ضيقتوها ليه ؟
– وتشجيع القطاع الخاص
– إنتو اساساً (داقرتوهو) ليه؟
– ولأن القطاع الخاص يستخدم الموارد بشكل أفضل
– يعني دى إكتشفتوها هسه ؟
– حتى تكون هنالك منافسة حقيقية بين الشركات لصالح المستهلك والاقتصاد القومي
– وإنتو كنتو ما عارفين يعني؟
– وإيقاف النزيف في ميزانية الدولة
– يا دووووب عرفتو إنو الشركات دي عاملة نزيف؟
– وإيجاد مناخ لاستيعاب أكبر عدد من العمال في مناخ مشجع وبتعاقد مُجزٍ وتحويل صغار المدخرين لمستثمرين !
– وكت عارفين ده كوووووولو كان لزومو شنو تعملو الشركات التي ( لايعرف عددها إلا الله) دي ؟

كما إستوقفتني طبيعة عمل هذه الشركات التي أعلن عنها .. العبدلله يعرف إنو الحكومة ممكن تعمل شركات (للكهرباء) و (للماء) و(للبترول) وكافة السلع (السيادية) لكن أن تقوم الحكومة بإنشاء شركة للإنتاج التلفزيوني (أنهار) وشركة للصرافة (المهاجر) وشركة للصوتيات والمرئيات (أفنان) .. وشركة للإستثمار والخدمات (ميقات) وشركة للخدمات براها (الثنايا) .. فهذا يعني إنو (القصة هايصة) ولا أدل على ذلك أن أحدى الشركات التي شملها القرار هي شركة للبيع بالتقسيط .. يعني الحكومة كملت (واجباتا كووولها) وإشتغلت (دلالية) !!

لعل السؤال الذي يطرأ على الذهن هو عن كيفية إنشاء هذه الشركات؟ ومتى وكيف تقوم وعلى أى أساس ؟ وكيف يتم تخصيص رؤوس أموالها؟ وتعيين مجالس إداراتها ومدرائها بل ومنسوبيها وموظفيها وتحديد مرتباتهم ومخصصاتهم؟ وكيف يتم فتح حساباتها بالبنوك ومن يقوم بمراجعة هذه الحسابات؟

لا أحد بالطبع من المسئولين يستطيع الإجابة على هذه الاسئلة لأنو (ببساطة شديدة) لا توجد قوانين أو لوائح تنظم تأسيس وإنشاء هذه الشركات بدليل أن إحدي هذه الشركات (الحكومية) التي شملها قرار التصفية هي شركة (خيرية) – أي والله- إسمها شركة العون الخيرية !! .. شوفو الجماعة ديل بيحبوا الخير كيف ؟ من حبهم للخير عملوا ليهو (شركة) .. بس السؤال البيطرح نفسو هو هل الشركة دي تأسست تحت قانون الشركات لسنة 1925م أم قانون تنظيم العمل الطوعي لسنة 2006م أم قانون (اللغف) واللهط لسنة 1989م !

كسرة :
قال لي صديقى : شركة انهار .. شركة أفنان .. شركة ميقات .. ما يحيرني حقيقة في موضوع هذه الشركات الحكومية شئ تافه وصغير لكنه جدير بالتأمل والتفكر وهو منو القاعد يقوم بإعطاء إسم لهذه الشركات .. فالمعروف في الحالات العادية أنو (أصحاب الشركات) هم القاعدين يسموها ويختارو ليها إسم .. أها شركات الحكومة دي القاعد يسميها منو ؟
قلت له : ما برضو أصحابها !!

كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)

Advertisements

58 تعليق

    1. ثلاثه برنجيات ورا بعض،،
      عملت لي برونكايتيس

      1. ياخي حرام عليك يا عبيد ياخ !
        علي الطلاق الكيبورد حقي ده مؤتمر وطني

      2. dukd ihjvd; hih dh ldsd hkahx hggi j],l gd; ,ul,lh lfv,; …..hkph jfkh
        ggftilh frd

      3. بس سجمك من امراض التدخين والامراض الفوق بتاعت المقال كده انطبقن عليك اثنين على العموم ابارك لك سهرك واجتهادك ومزيد من البرنجيااااااات

      4. جد كدة ما كويس !!!
        لكن شكلو عندك علاقة بالحقل الطبى (برونكايتيس) !!

    2. عبيد !!!
      كتّرت المحلبية

      1. كتر في المحلبية والبروف كتر لينا من فقع المرارة الاصلا مفقوعة

      2. المحلبية والسرتية والمجموع

      3. دي لذيذه منك بس بعد كده الخوف من
        ال emphysema

  1. شركة ميقات دي البيحرمو منها للشروع في دخول تفاهات المؤتمر الوطني .
    و أفنان دي لتعليم فنون النصب القانوني اما انهار دي فانهار من الاموال ينهلون منها بعد الاحرام و تعلم فنون النصب وشركة المهاجر هي لاصطياد اموال من يحرم من ال ( ميقات )
    و الله أعلم .

    1. تصحيح :
      من لا يحرم من الميقات ( ماقت ليكم مؤتمر وطني )

      1. بحالتك دي وجاي متأخر ….الله يجازي البرنجي والـ LM

      2. آآآآآآآجنوبي اللبيب بالاشارة يفهم والما بيفهم دي حقوا ما يخش قمردينتنا بس لا اعتقد ان ابناء الالهة يحرمون من اي ميقات

      3. يا سديق انا ما معلوم انت فين ….لكن يا هبيبي ما سكر جوال شان هرما قرقر كتير مافي انا كلو معلوم
        اتاريك في حلتنا يا جنوبي وانا من زمان بقول الزول دا انا شفتو وين —- الدوام من 7 لـــــ 4 رايك شنو
        بالمناسبة درحة الحرارة عندنا وصلت +7 انقر احنا وين

      4. بالمناسبة الـ2500 لغوها ما سكر جوال مافي قرقر زيادة
        اتوزع علينا اليوم منشور الغاء مبلغ الـ2500 وللتاكد ادخل موقع مكتب العمل

      5. كتلوني ولسه حي .. سجمكم +7 دي يلبسو ليها شنو ويشربو
        ليها شنو ؟ إششششششششششششششا
        شكلك في الشمال يا جوه تلاجه .. نحنا في الرياض ونكتكت ..
        دخلت موقع مكتب العمل لاكين ما لقيت كلامك ده .. تعرف كل
        العمالة قدمت استقالات عشان كفيلنا التافه داير يحملن المبلغ
        لاكين خلوهو ليك زي نافع يهدد ويتوعد ساااكت ..

    2. هههههههههههههههههههههههههه,,
      حنضل انت ياخ !
      بس افتح تلفونك يا سغيل ,,,,

      1. شمباتي وين انت ؟
        ياخ انا زاتي بدق عليك في رقمك الكلو خمسات ده
        وبديني مغلق .. شفقت عليك يوم سفرك لاكين اولاد
        الحلال طمنوني عليك ..
        بعد 9 بالليل مفتوح عشان كفيل زيادة قرقر انا سكر
        جوال ..

  2. الشركات دي الغرض من انشائها هو تقوية حزب المؤتمر الوطني ، وكانت تدفع كل اموال الحشود والتعبئة في الحرب والسلم ، لكن الجماعة اصحاب النفوس المريضة اثرت على نفسها ان تلهط كل الاموال علما بان شيوخ الفقه سمحوا لهم باخذ القليل من المال في حدود ان تكون لك عمارة من طابقين ،سكن في الارضي وايجار الطابق الاول ، كما سمحوا لهم بعمل مزرعة في اطراف العاصمة لسد الرمق ، لكن الجماعة ضعاف النفوس ، قاموا بفتح شركات في الامارات وماليزيا والصين ، وكمية من العمارات والاراضي والحسابات بالنقد الاجنبي ، وبذلك يكون يادووب دخلوا في الحرام

    1. يا عمك ديل خلوها دلجة

  3. البروف والسمار الكرام
    سمعت والعهدة للراوي ان هناك شركات كتيرة تم العثور عليها وسيصدر قرار جمهوري بخصخصتها في غضون أيام والشركات ( بدون ذكر الأسماء ) تعمل في المجالات الآتية :-
    1- تحويل رصيد..اسكراتشات ..تصليح موبايل تنزيل نغمات
    2-قدر ظروفك..كريمات اصلية ..تفتيح وش ..تطويل شعر …تظبيط جسم
    3- تصوير حفلات …وكيل فنانين.
    4- طباخين للمناسبات …ساوند …تصوير حفلات … تركيب صيوانات وكوش
    5- شركة لترحيل الطالبات والموظفات
    ومباشرة بعد أن يتم خصخصتها سوف يتم خصخصة كل الشعب الفضل وبيعه في سوق الله أكبر

    1. اخي المندهش بدلا من تعديد ما سرقوه انحنا نشوف الما سرقوه شنو فطلت بس حاجات الله الهواء وماء النيل الجاري والله يستر على ماء النيل دي لان سهل يسرقوها والخوف يدخلوا الهواء مع الكهرباء وكدي حاول فكر لي في شئ ما سرقوه لسه انا اديتك اثنين فكر معاي وتحياتي ليك

    2. آآآآ زول انت قايل دي فايته عليهم دي الموية الفي الصفيحة (برد جوفك يا عطشان) بيشيلوا منها تكنو الخبر دا ما واصلك اها قصرت معاك حراااااام ثلاثة بيشيلو منها صفيحه وقطعة ثلج ومحمد احمد يقلعوا منو ااااااااازول كتمت كتمت كتمت الله يستر

  4. ف مثل هزا اليوم من العام 1972 عندما إستقلت دولة الإمارات و جاء الشيخ زايد عليه رحمة الله ليستعين بالإداريين السودانيين، بعدما نصحه البريطانيين بأن أفضل نظام للخدمة المدنية في مستعمراتنا قد تركناهو في السودان :فعليك بالسودانيين فوقع إختياره علي (كمال حمزه كأول رئيس لبلدية أبوظبي.) فقال قولته المأثورة ( يا كمال .. أبغي أبوظبي تصير مثل الخرطوم )
    وبي المناسبه الشركات الاتفرتقت دي ظهرت من جديد وبي اسامي وهميه (شبدان)مثلا …وتعمل ف الحلول المتكامله كمان ..وي

    1. لا وجه للمقارنة الان والله يلعن اللي كان السبب ويلعن اكثر اللحقنا ولحق الخرطوم امات طه

  5. اخوي الفاتح
    الشركات دي عملوها لناس المؤتمر لتمكينهم من الثروه والجاه اصلو معظمهم طالعين من اسر مضروبة جزم ومهما حاولت تقصي امرها حتتعب ساكت وتتعبنا معاك (وانا شخصيا اعرف شركة البيع بالتقسيط والبديرها منو (طبعا كوز كبير) واتباعه المتكوزننين وكيف كانوا قبل الانقاذ وكيف اصبحوا الآن … عليك الله يا ود جبرة ماتوجع قليبنا معاك … وخلينا في كسرتنا وويكتنا (دا كان فضل معانا حاجة نشتريهن )

  6. انتو يا جماعة مسؤولين من الخير وين بت وراق…….
    وبالمرة وين شركات السابحات .. والمغيرات … والصافنات .. وجياد طبعا عارفنها خليناها ليكم … والعاديات لزوم التاصيل وكده… والمعصرات … والمرسلات ….وذمم … ولمم …..والزاكيات …..والنازعات ….والمنظمات ما كلها شركات خيرية … منظمة سند … منظمة كمد …ام الفقرا … ام المؤمنين…. انا السودان …. انا امدرمان ….. انا الدر….
    ياخي فترتونا زاتو
    كسرة: دقيقة اولعها وارجع ليكم

    1. زي البتسأل عن الحاجات البتدخل من الباب للطاق لا جمارك لا يحزمن والله انا غلطان

    2. بعدين سجائر ال ام شنو يا راجل واي نوع من الال ام انواعه كثيره انت قايلوا زي البرنجي حار وبس هع كع وين في الامارات

    3. الحفرة !!؟ وى

      1. حفرتكم ام جردل وقفيل حساسات الحريق بري منكم

  7. كتمت كتمت كتمت كتمت الله لو محمد احمد المسكين بدخل النت كان بمممممممممممم من زمان

  8. قولنا وسوف نقول حتي يعرف القول انا صبرنا علي شي امر من القول ده كلو كلام الطير فى ابو حمد الناس ديل يشفو محل الوجع واين ويشتقلو على كده شنو تخصيص وبيع والخ الواحد لمن تقلبو الشغاله يكوس ليها لى حل مش يبيع فترنا من البيع خلاص!!!!!!!!!

    1. تحياتي ابراهيم اعمل حسابك لا يبعوك انت كمان خلاص ما فضل الا محم احم زاتو يبيعوه

      1. ولو فكروا في بيعنا تجدنا بضاعة مزجاة لا نسوى حتى دراهم المهم خزائنهم يا با

  9. هههههههههههههههه ، ياخي الله يديك العافية ، أحلى حاجة في مقالاتك أنك بدس السم وع العسل ، يعني الواحد ما يعرف يضحك ولا يتمغص من الحكومة الفاشلة دي

    1. العطر في الجنازة (الحنوط) شفت التشاؤم دا هاك الحكومة دي

  10. تقرير المراجع العام 2012م :
    500 مليون جنيه ( يعني بالقديم كم ؟ ) و 5مليون دولار ( دي احسبوها بالسعر الرسمي عشان ما نتحامل عليهم )
    تجاوزات ( اسم الدلع للاختلاس ) في انشاءات سد مروي وتعلية خزان الروصيرص ..
    اكتر من 17 مليون في ديوان الزكاة تحت بند ( في سبيل الله ) .. يا ربي ده منو البيعرف اكتر من الله والرسول واضاف البند ده ؟
    بند العاملين عليها القروش المصروفه عليه غير مطابق لعدد الموظفين الفعلي ( وبرضو القروش المصروفه في البند ده وبند في سبيل الله مافيهم مستندات تفيد بالجهة ولا الاستلام …
    منح رايحة بين وزارة المالية و وزارة التعاون الدولي ( يا ربي اكون شلتها أنا ! ) ما واحد في الاتنين يا شالا بتاع عواسة الكرسة يا شالتا بتو الصغيرة القاعد يرسلا تجيب الخُمارة من الجيران … عرفنا التجنيب في حقنا كمان تجنبو الجايينا من بره !
    يا ريسنا كتّر خيرك فك الدفه وادها غيرك ( رغم انف حاتم الدابي وكلام الاول ما بتحوّل )

    1. يا أبوي ديل كلهم الطيب ود ضحويه هع كع

      1. الغلبان ياخوي ود ضحوية قلع لبس الدين ولبس لبس الهمبتة عشان يثأر لاخوه , وديل قلعوا لبس الهمبتة ولبسوا لبس الدين عشان يسرقوا اخوانهم ..

    2. في سبيل الله قمنا نبتغي رفع اللواء لا لدنيا قد عملنا نحن للدين فداء وهي لله هي لله الله اكبر يا ربي ديل قاصدين شنو

    3. ياقنوبي ياخوي التقرير ده لو صاح معناتو نحنا نكون لينا لجنه تقصي التقرير ولجنه اخري لتقصي اللجنه الاتكونت دي
      و ياانتا من لا يملك قوته لا يملك تقريره

  11. سيد (الرايحة) بفتح خشم البقرة !
    اها اسه (بقرتنا) دى يفتحوا ليها خشمها كيفن وهى (عليلة) ؟؟
    واااااااااااااى

    1. تجارب الحكومة فينا زي حكاية البصيرة ام حمد

    2. آيس بفتحوا ليها خشمها مو حلقها

      1. كتمت شديد ،،، تصبحوا علي خير

    3. سيد الرايحه بفتش خشم البقرة وسيد البقرة بفتش خشم منو وي وي

    4. والله بالشايفنو ده الا كان البقرة هي التجي تفتح خشم سيد الرايحة !!
      كمان شوف المشي ينوم من هسي ده ! خلاص التهابك خف ؟

      1. نحنا سقد سااااااااااااكت آآآآآزول من وين يجي النوم والراس سلوكه كلها مشربكه بكره نعمل شنو نجيب من وين نعافر كيف نتم اليوم يا زول جنس شهلهته انا الحين عرفت ليه ما فيش مظاهرات والناس كلها كاتمه

      2. العبيد داير يتناوم علشان يختف البرنجية ما كا عارفه

      3. وزي ما كنا بنلعب زمان البقرة بقرة الراعي وهم الرعاة ونحن الرعية يعني احنا البقر هع كرع كع

    5. يادكتور انتا افتح خشم البقره وناس الحكومه يحلبوها
      والجايات اكتر من الرايحات ياسيد الرايحه

      1. ههههه هههه ها

      2. جنوبى..
        ههههههههههههههههههههههههههههههههههههههههههههههههههههههه,,والله الا كدة !! التجى تفتح على كيفها…

        قوية…
        حلب ما معانا !! حلب لا

      3. بعد يحلبوها لا تعضيك البقرة كمان هع

  12. يا اخوانا مقال اليوم الاقعال الناقصة ما جاتنا يكون ينقصوها مع الكوميشنات ولا ايه
    16-1-2013

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: