جنس حرفنة

من الكلمات التي كانت متداولة بكثرة في الماضي قبل أن يقل إستخدامها هذه الايام كلمة (حريف) و (حرفنة) يقال لاعب (حريف) أي انه موهوب ويجيد التحكم بالكرة بشكل متميز ويجهجه إن كان مهاجماً (باكات الخصم) كما يقال (نشال حريف) أي بإستطاعته أن يدخل يده في جيبك ويخرجها و(كانو ما حصلت حاجة) ودون أن تحس باي شئ والحرفنة عزيزي القارئ انواع لعل أخطرها هو موضوع هذا المقال وهو الحرفنة في أكل أموال الناس بالباطل وهي (جنس حرفنة) !
ما أن تبدا في إجراءىت معاملتك بعد وصولك إلى الشباك بعد معاناة الوقوف في صف طويل وتقدم أوراقك إلى الموظف حتي يبادرك قائلاً :
– الملف وينو؟
– ملف شنو؟
أمشي للزول القاعد هناك داك وجيب ليك ملف خت فيهو أوراقك دي –
وتذهب إلى (الزول بتاع الملفات) تأخذ منه ملفاً عبارة عن قطعة من الورق المقوى وتضع أوراقك داخلة لتكتشف بأنه يطالبك بمبلغ (عشرة جنيهات) بالتمام والكمال ثمناً له مع انه لا يكلف جنيهاً واحداً .. وبالطبع لا يمكنك ان ترفض لأن (التعليمات واضحة) .. لا يمكن النظر إلى معاملتك بدون ملف ومش اي ملف بس الملف ده) ولأن هذه الخدمة (أم ملف) يحتاج إليها آلاف المواطنين على مدار ايام السنة فانظر عزيزي القارئ (النقاطة دى) شغالة كيف ؟
أرسل لي احدهم يقول بان لديه رخصة قيادة منذ سنوات طويلة وهو يقوم بتجديدها كل عام إلا أنه عندما اراد تجديدها هذا العام طلبت منه الجهات المعنية أن (يدخل كورس) في (أكاديمية المرور) عبارة عن ثلاث محاضرات نظرية (بالشئ الفلاني) وإلا فلن يتم التجديد
– وقلتا ليهم شنو؟
– قلتا ليهم وكت أنا بحتاج محاضرات وما مؤهل إنتو من الأول أديتوني رخصة ليه ؟
.. وبالطبع لا يمكن لهذا المواطن أن يرفض لأن (التعليمات واضحة) .. لا يمكن النظر إلى معاملته بدون ما يدخل الكورس ولأن هذه الخدمة (أم كورس) يحتاج إليها آلاف المواطنين على مدار أيام السنة فانظر عزيزي القارئ (النقاطة دى) شغالة كيف ؟
والوضع هكذا يمكنك وأنت تود أن تقوم بتجديد جواز سفرك أن يسالك الموظف المسئول وهو يقوم بفحص أوراقك :
– وين الشهادة بتاعت الدورة؟
– دورة شنو؟
– الدورة التأهيلية للتعامل مع الطيران والمطارات !
– ما فاهم ..
– دي دورة بيدوا فيها الزول محاضرات .. مما يدخل المطار ويوزن عفشو .. لحدت ما يدخل الطيارة .. يربط الحزام كيف؟ يطلب المضيفة كيف؟ يستخدم وسائل السلامة كيف يملأ الفورم بتاع الدخول كيف .. ولحدت كمان ما ينزل في المطار الماشي ليهو ..
– لكن الحاجات دي كوووولها عارفنها .. أنا بسافر ليا أربعين سنة !
– أربعين خمسين والله دي التعليمات يا استاذ
وبالطبع لا يمكنك ان ترفض لأن (التعليمات واضحة) .. لا يمكن النظر إلى معاملتك بدون ما تدخل (الدورة) ولأن هذه الخدمة (أم دورة) يحتاج إليها آلاف المواطنين على مدار ايام السنة فانظر عزيزي القارئ (النقاطة دى) شغالة كيف ؟
والوضع هكذا يمكنك وأنت في (مستشفيى الولادة) تود أن تقوم بإستخراج (شهادة ميلاد) لمولودك الجديد يسالك موظف (الإخصاء) المسئول :
– دفعتو رسوم الآذان؟
– (في دهشة) : رسوم شنوووووو
– رسوم الآذااااااان
– ما فاهم
– أفهمك .. إنت مش مسلم؟
– أيوه
– وولدك ده ح يكون بإذن الله مسلم
– أكيد
– طيب مش لازم زول ياذن ليهو في اضانو؟
– أيوه أنا اذنتا ليهو في اضانو مما طلعوهو
– لا .. لا ما ينفع .. التعليمات واضحة .. لازم يأذن ليهو مؤذن الحكومة .. أمشي المكتب داااك المكتوب عليهو (مؤذن مواليد) خلي الموظف الهناك داك يأذن ليهو في اضانو وبعد ما تدفع الرسوم جيب ليا الإيصال عشان اطلع ليك شهادة الميلاد !!
كسرة :
توجد أفكار مبتكرة جاهزة للتطبيق … عشان باقي زيتكم يطلع .. الوسطاء يمتنعون !
كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)

Advertisements

65 تعليق

    1. برنجية برائحة الاذن الاخير ده حذرتك من التدخين وعقلك في راسك تعرف خلاصك

    2. داير نفس بس ماعندي برنسيس اقصد ملف

    3. و اللاهى يا العبيد حريف جنس حرفنة ,, 4 مرات على التوالى دى مااا بالغتا فيها عدييل كدة .. وناس الحكومة لمن يتحرفنو عليك, اقلاها بيدوك وصل و الا الملف المبهدل داك, بس انتا يا صاحبى بتجازفا حتى نفس معاك لناس شنباتى مافى !!!!

  1. دي البرنجيه الرابعه علي التوالي والله يستر من أضرار التدخين ودي بالطريقة دي ح تعمل emphysema

    1. عقبال برنجياتك تلحق واوات جبرة فى خط هيثرو

      1. لو لحقت واوات هيثرو هو راح يلحق امات طه دا برنجي يا راجل

    2. شحدت ربى تعمل ليك استرواح فى الصدر !

  2. اليوم العيد الثاني للثوره التونسية وكذلك انتهز هذه الفرصة لتهنئه الأخ النور بعيد ميلاد ابنه الثاني. وكل عام وانتم بخير

  3. يابروف انت معانا ولا مع الجماعة ياخ …… هو فضل فيها زيت ياعبيد ….. غايتو بس الله غالب

    1. ههههههههههههههههههههههههههااى,,,ا
      اديك زيت يا التركى ؟؟
      لوووووووول

    2. زيت زيت زيت زيت يعني black oil

  4. العبيد اممممممم جنس حرفنة !!!!!

    1. حريف مش كده وخاصه مع فروق الوقت

      1. فروق الوقت دا النافعك انا بساهر جنس سهر اريتو سهر عدوينك

    2. المندهش .. ماااا تلخبط بين الحرفنة والانانية ..
      عبيد .. مرات دعاء المحرومين من البرنجية بعمل تضخم في حتات تانية كمان .. آآآآآيا

      1. كلامك صح في علاقه كبيره الرئتين مع الأعضاء التاليه، الغده الكظريه، البروستاتا،العظام،والغده الدرقية ،، ولاننسي الثديين وربنا يكفينا شر التدخين والذي يسبب السرطانات وربنا يشفي الجميع

      2. وي مقدما دي جابت ليها كزرية وبروستاتا يااااااااااااااخ بطل تدخين والا بعدين يقومو يخلعوك مش ديل ديل اصلهم خالعنك ههههه خلعه

  5. بالمناسبة حكومة الانقاذ حازت على جايزة مالية عالمية في مجال استخراج المال من اي انسان بسيط ، اشان كدا السودان بقى مضرب مثل في المحافل الدولية، طبعا اليونانين شعب بتهرب من دفع الضرائب ، بهددوهم بقو ليهم حايجكم نظام صريبي كنظام السودان التحصيلي يستطيع ان يستقطع بدل وجبة كاملة من اي شخص

    1. حازت ايه يا مولانا هي البتوزع الجوائز

  6. انا مندهشة حكاية الملف دي حصلت معاي انا شخصياً مشيت عشان اعمل تاشيرة خروج في الجوازات الضابط قال لي صوري الورق وامشي جيبي ملف ب10 جنيهات ولما حبيت استفسر سكتني وقال دي تعليمات واضحة يا أخت …. الله غالب

  7. الله يسامحك يا أستاذ جبرا ‘ أديت الجماعة أفكار لإنتزاع رسوم مننا ، وزادت علينا الخدمات أمات دفوعات..

    1. ما بيحتاجوا افكار وما بغلبوا حيلة سمعت الشيطان اعياه امر

    2. ومني ليك افكار ايه ديل بفكروا في الهواء هسسسسسسسسس ما يسمعونا

  8. والله العظيم الواحد بقدر ما هو زهجان وقرفان يقوم يقرأ هذه الكتبات ويموت من الضحك
    اوعك يا استاذنا ناس الحكومة يقوموا يطبقوا أفكارك الجديدة على بقية الخدمات التي لارسوم لها ( ولا أظن انها موجودة)

  9. والله مايزعلنى الا تمشى تدفع رسوم تلقا الوصل فيهو كسور وبواقى عشان يعملو بيها رايحين..

    كسرة…

    بختك ياعبيد…. لقيتنى مزحوم 🙂

    1. لو خلوها صم راح تدفعها يا فتك

    2. والله يطبنجه يااخوي الايصالات البتتقطع دي بتكون دافع فيها مبلغ والتوزيعا بتاعتا ف الايصال 50%(نتااغعغل )غايتو كلام لو حاولتا تقراهو الا تكون حاوي

    3. حمد لله على السلامة يا طبنجة ,, حردان و الا كنتا بتطخ فى مكان تانى ؟؟؟

  10. لا والغريبة كمان فى المغتربين الملف بتاع تاشيرة الخروج بى 16 الف !
    وهاك هاك النقيط دا ,,
    هيييييييييق

    1. المفروض تسال لمن تدفع الستاشر ألف جنيه دي بتمشي وين،،غايتو تدفعوا سااكت يالمغتربين

      1. انتو كلكم في المدونه دي معارضه مش كده ؟ كوييس. انا سجلت اسماءكم و ابقوا رجال تعالوا جهاز المغتربين .. اصبروا … تتفلسفوا ساااكت … كلكم مبسووطين و مرطبين اللي بيقبض بالدولار و اللي بالريال و اللا بالاسترليني

      2. معارضة بس ما كلنا بنجي شؤون المغتربين راح تودينا جهاز شؤون الامن هع كرع فيه حد فاضي

      3. ههههههه .. الله يجازي محنك يا عمك تنقو
        ياخ انت زكرتني زمن سمح خلاص..
        عمك تنقو اب عقلا ملحوس
        فكر وقرر يكون جاسوس
        جاتو العازة بالبرطوش وجوه البيت بقي يجري يحوس ..
        تعرف يا تنقو جهاز شئون المغتربين ده مفروض يسموهو
        جهاز سنون المغتربين .. بالله الواحد من يدخل لامن يمرق
        يكون عاضي سنونو ..أحيييييي انا ..

      4. هههههههههههه عمك تنقو والمغتربين ديل بقبضو بجميع العملات ام نحنا بنقبض ف الباعوض والزباب و…..ياعمو معاك قدام والشرك قبض………….اغرب ماف الشرطه السودانيه بتقبض ف السكاري والعرقي (وفي سكاري بقبضو ف العراقي وجري) ويخلو ست العرقي

    2. شمباتي .. 16 الف دي غير رسوم التأشيرة والدمغات مُش ؟ لا وكمان يدفعوك رسوم خدمات مع انك بتشتري الملف والاستمارة ورسوم تأشيرة وتشتري موية الشراب وسندوتش الفطور وتدفع حق تصوير المستندات !! تعرف دي لو عبود ونميري سمعو بيهن كان قالوا للانقاذ والله نحنا زمان البزاغ مننا … ( عارف النكتة دي ؟ لو ما عارفا اتصل احكيها ليك عشان لو حكيتا جبرا ح يطردني ) ..
      عبيد .. اقسم بالله مره انا سألت الموظف البيدي الاستمارات لاكين قبل ما يرد عليا جاني الرد من وراي .. ياخي ده وكت فلسفة يعني بقت علي دي ؟ ادفع وخلصنا ياخ … ( واكتر ما زعلني انو الموظف عاين لي بابتسامة خبيسة خلاص ..)

      1. تصدق يا جنوبي أخوي كان مغترب وجا لوفاه الوالد رحمه الله عليه والكلام ده بالظبط ليهو ستاشر سنه،، المهم مشيت ليهو عشان الإجراءات في المغتربين وطبعا طلبو منو يدفع كميه من القروش ومشينا للمسؤول وقلنا ليهو عشان ظرف الوفاه ولو ممكن يقسطوا ليهو الدفع وطبعا المسؤول وبكل …. قال نجيب ادويه منقذه للحياه من وين ما نحن بنساهم بقروش المغتربين في الادويه دي،،، تعجبت كثيرا لأنني كنت اعمل في ذاك الزمان في مستشفي الشعب وكنا نتشارك مع بعض لشرا الدوا لمرضانا،،،وزي ما بقول الغلبان كتمت ولكننا اول ما كتمت ااثرنا الهجره حيث لا جهاز مغتربين ولا خلافه،،. كتمت كتمت كتمت وتصبحوا علي خير والله المستعان وربنا يسهل الحال

      2. سديقى يا جنوبى اظنى انا الكنتا واقف وراك فى الصف يومداك,, الدنيا حر و الناس عرقانة و انتا بتسأل عن قروش الاستمارة,, اللى زعلنى انو مرات بجى السودان اكتر من مرة, و كل مرة نفس الدوامة العجيبة دى و حرق الاعصاب اياه,, اليوم داك قلتا للضابط بتاع الخدمة الالزامية ياخى انتوا كل مرة تتعبونا كدة, و انتوا عارفين كويس انو واحد مننا حيجى يقضى ليكم خدمة الزامية و الا عسكرية بتاعتكم دى مافى, فطيب ليه ما تريحونا و تريحوا نفسكم و تدفعوها لينا مرة واحدة و خلاس,, فنظر لى و بنفس الابتسامة الخبيسة بتاعت موظف الاستمارات (مادا يده اليمنى يفرك فى السبابة و الابهام) و قالى: اممال (النقاطة) دى نخليها لمنو ؟؟؟!!!

      3. ههههههههههههههههههههههههههه,,احمد الله بى بزاغى !
        بلا اتصال بلا حركات معاك !
        طااااااااااااخ

  11. اكاديمية المرور .. بالله شوفو سماحة الاسم ده !
    اها وبعد التخرج بيدو الناس بكلاريوس قيادة وتخطي ولآ دي للدراسات العليا !!ّ!
    الاكاديمية دي لو تبع المرور تبقي داخلة ضمن قرار تصفية الشركات الحكومية ولو خاصة يبقي ناس المرور بيستغلوا نفوذهم بالزام الناس للذهاب لها اسما وتحديدا .
    انا اشك في انو معظم الجهات الحكومية دي في مصاريفها يكون في بند ملفات لحفظ اوراق المعاملات مع انو اصحاب الملفات هم البيشتروا الملف !
    مره قاعد مع جماعة ونتكلم عن الوضع قام واحد من القاعدين قال انا سمعت من زول انو مكتب الرئاسة بيتصل علي الوزير الفلاني ويقول ليهو نحنا دايرين منك كذا مليار السنة دي وعلي الوزير التاني كذا وكل حسب وزارته وما عندهم شغلة في الوزارة دخلت كم المهم تدفع الشئ المطلوب منها ! قت ليهو اصلو هم مؤجرين ليهو أمجاد ؟ قال لي طيب تقارير المراجع العام دي مافي زول قعد يشتغل بيها ليه ؟ سكت وما قدرت اجاوبو .. قال لي ما الوزارة دافعا الايراد بتاعا …

    1. وممكن دا كله ما تمر عليهو وبتاع المرور ياكل سمك بس هع كع كرع

    2. ياجنوبي (اكاديميه) الكلمه مشتقه من ادفع ميه ع حسب لغة الشرطه المروريه…. وانتا عارف انو ناس المرور والجمارك ماتابعين لي وزاره الداخليه

    3. بس يا اخوان, و الامانة لله انو قدر ما الجكاعة ديل يتحرفنو علينا و ياخدو مننا قروش, الا انهم بيدوك بيها وصل,, حقانيين جدا !!

      1. هههههه .. بس نسو يكتبو في اسفل الوصل الجهة المحصلة
        غير مسئولة عن المبلغ بعد استلام الايصال …
        قبيلك حضرت لقاء مع د. معتصم عبد الرحيم اظنو في
        قناة الخرطوم وطمنا في موضوع اغتصاب الشفع وقال
        انو البلاغ مجرد تحرش والمعلم فكوهو بي كفالة وقال
        الناس دي بتهوّل المواضيع زي الواحد لمن يكون جاري
        وراهو كلب والناس تقول ليهو الاسد جاك وكمان حاول
        يوهمنا بي انو احتمال المعلم ده في نفسه( كديسة)
        يعني كده طمنتنا ما لو بقي كديسة او صقر كل خطر
        علي شُفعنا .. لاكين رجع وطمنا تاني انهم بعد كده حا
        يعملوا كشف للمعلمين قبل التعيين وحا .. وحا وحا
        حاحاحاحاحاهوووش هووش هووش

      2. كشف !!؟
        انا لازم احضر الكشوفات دى !
        لازم لازم ,,

  12. يابروف فعلأ مرت على قصه الفايل ابوعشره وبعد انتهيت شالو مني عجبي لكن نقول سيد الميزانيه المقدوده بفتش خشم الموطن والله في

  13. هوي يا عمك تنقو بطل الحركات دي وخليك معانا بتلحس الكوع ومن لا يلحس معنا فليس منا.

    1. كان مش معانا قول ليهو كتمت والله ليك من قولت بم

  14. سعادة الوريف – البروف الفاتح جبرا
    وجمال ( السمار ) الأكثر أناقة،،،
    ما أكثر ( الهموم ) على جسد الوطن ( الذي ) كان – أو – ما تبقى،،،،،
    ولم يتبقى موضعاً على جسد ( محمد ود أحمد ) – عليه رحمة الله –
    لأني أحمل الهم وأكثر ( كما ) أنتم ( جميعكم )
    دعوت ( نفسي ) أن أكن بين ( أوجعاكم ) رفيقا،،،،!!!
    فـ ( يقين ) دواخلي بأن ( هنا ) ملاذ

    دمت ودام الود
    دمتم ودام الود
    ..
    ..
    ..
    ..
    م/ عبد الرحمن الجعلي

  15. (تلك الايام نتداولها بين الناس) صدق الله العظيم – بس بم الجاية صعبه عييييييييييييييييل كده

    1. ” .. وتلك الايام نداولها بين الناس ” صدق الله العظيم .
      والله يا الغلبان بم الجاية دي بقينا خايفين منها مع
      تنظيم القاعدة الظهر لينا ده والسلفيين البمشو
      يدقوا الصوفية في الذكر ودايرين ينبشو القبور
      ورباطة نافع ومليشيا المانافع وخلايا منو النائمة
      وكتائب بشه الهددنا بيها يوم داك والقبلية الظهرت
      وفلان يوقع ويجي يشجب وعلان يشجب ويجي يوقع ونواب
      برلمان يطالبوا بي زيادة راتب مع انو بداوم يوم
      او يومين في الشهر و .. و .. وياهو ده السودان .

      1. صحي كلامك عمري كله كنت قايل السوريين سحنه واحدة ودم واحد وشكل واحد (يعني لحمتهم معضدده اكثير مننا) حلو لحمتهم دي بس اللام عليها ضمه ياااااااااخ ولان نظامهم بيقول انا او الطوفان شايف الطوفان الحاصل هناك دا رغم اللحمه يعني هنا يحصل شنو ربنا يكذب الشينه بقينا خايفين من التعدد(هع مش التعدد اللي انت عارفه لانه ما عندنا ليهو قدر دا خاص بالمؤتمرجيه بس) وبنتناه عسكري عدييييييييييييل كد زي يا مايو حبيب زي امي وابوي زي اختي واخوي يعني بدل ننتظر وطن حدادي مدادي وما بنبنيهو في الرادي والا الخطب الحماسية بقينا نخاف وثاني ربك يكذب الشينه

  16. كما ورد بخصوص خط هيثرو والظاهر انو ما عند النائب العام فقد ورد هذا الخبر كالاتي
    01-15-2013 09:33 AM
    الخرطوم: رقية الزاكي:

    قال محمد طاهر اوشيك رئيس لجنة النقل والطرق بالبرلمان، إن فقدان خط مطار هيثرو لا يزال يخضع للتحقيقات، وإن اللجان لم تدفع حتى الآن بنتائج حول التحقيقات،

    1. هو وكت لا يزال يخضع للتحقيقات الوداهو البرلمان شنو ؟
      والله الباع الخط ده لو كان عارف انو الخط ده عندو
      حفيد اسمو الفاتح يوسف هيثرو ولايوق كدي اصلو ما
      كان هبشو ..!

      1. والله لو بيعرف انه الفاتح يوسف (جبرا) الا يبعو ليك هو كمان زاتو

    2. يا عمك دي بلد الادهاش يكون مشى زيارة وايجاد مخرج ودبارة علشان يخرج زي الشعرة من العجين يعني يتاولوا فيه اصحاب الامخاخ الكبيرة ولو دا حصل الفاتح جبرا راح يتهم باثارة الفتن وطلعوا كلامه هواء وما بعيد يطالبوهو ببيع بيت الورثه تعويضا عن اشانة السمعه دا لو خلو فيهو باقي عقل وما ودوهو السرايا الصفراء واتهموه بالجنون والتلفيق وهلم جراء (دي بتاعتي مو بتاعت صاحبنا بتاع جناح ام جكو)

      1. يا أخوي الغلبان تصبح علي خير واصلها كاتمه

  17. وفي حرفنه من نوع تاني
    1-الكمساري لمن ينوم بالباقي
    2-الولد لمن ترسلو لي الدكان وينوم بالباقي
    3-الجزار لمن يوزن اللحمه
    4-بتاع الطماطم لمن يعرض الطماطم
    5-الطالب لمن يطلع بخره ف الامتحان او ينظر ف ورقه زميله
    6-………لمن تسرق الموبايل قبال ماتنزل
    7-البنت لمن تتكلم مع حبيبا ف التلفون وابوها يجي خاشي عليها
    و و و …

    1. الطماطم ام عضم دي بقت زي اللحمة يااااااااخ لم نكن نعرف ذلك قبل 1998 كنت بتعزل الدايره من الكوم قسم وجزم

  18. الخوة المغتربين هداكم الله 10 و 15 و 20 سنة اغتراب و بهدلة في جهاز المغتربين ما فكرتو ليه تعملو جنسيات تانية محترمة و كت ربنا رحمكم من الحفرة الاسمها السودان والله كان اولاد اولادكم يدعو ليكم و خلو البلد لي الحرامية الفيها شوية و حايسرقو بعض لانو الماعون حاينشف

    1. بنحب بلدنا قدر
      ما الزول يحب ولدو
      لابدّ تبقي خدُر ايامو بي جَلدو
      ….
      الطير بيصحي فجُر
      كان ما لقي النقدو
      يقطع بحار وجزُر غير رزقو شِن بَعدو
      ..
      زيو الغلابه سُمر
      في حر شموش وقدوا
      تعب السنين المُر يتحالي لو حصدوا
      ..
      اقدارنا مالا كُتُر
      نيرانه ما بَردو
      كل النصدو يتُر حالاً يجي البَعَدو
      ..
      للقال بلدنا فقُر
      قول خيره بي رعدو
      لاكين عوارض الضُر إنقنقتوا وقعدوا
      ..
      صقرين تعاقبوا كُر
      عاقين وماب يلدوا
      حد ما ضروعا تدُر بي خيره ينفردوا
      ” محمد الحسن حِمّيد”

      1. الله عليك وعلى الحبيب (حميد),,
        ح انشرها فى الاسافير يا حبيب …

      2. معك حتى النخاع اخي قنوبي رجعت من سنة وصراحه قربت اصدق كلام الزول الفوق ليك دا الاسموا الشرقاوي ربنا يكون في العود لا ولادة من غير مخاض وكتمت كتمت كتمت والناس وعت كثير والكتمة فيها فايدة جليلة للاجيال القادمة لانه بم حقتها سمحة بالحيل ما بتكون زي اكتوبر او ابريل

  19. اسمعت لو ناديتا حياً ولكن لا حياة لمن تنادي. صحي الأختشو ماتو لكن ناسنا ديل موت مافي عديل يعني …..؟؟؟؟؟؟؟؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: