قرض حسن

العبدلله يبصم بالعشرة ويقسم بكل مقدساته في الدنيا بأنه لم تتم إستباحة للمال العام كما تتم في ظل هذا العهد الرشيد .. إستباحة بالعلن والمفتشر ودون ذرة حياء واحدة وبالقانون ! أيوه القانون الوااااحد ده .. وإلا قولوا لي بربكم كيف يمكننا أن تفهم أو نفسر هذا الخبر الذي أوردته صحيفة الإنتباهة والذي تم نشره في عددها بتاريخ الثلاثاء 22 يناير الحالي يقول الخبر :
طالبت نيابة المال العام السلطة القضائية بإلغاء التسوية التي تمت بينها وبين أحد الموظفين «67 عاماً» أُدين أمام محكمة المال العام يوم الخميس الماضي بسبب أخذه مبلغ «225» ألف جنيه من خزينة السلطة القضائية. وعلمت «الإنتباهة» أن نيابة المال العام مثلت الادعاء، وصدر قرار إدانة من المحكمة للموظف بالسجن ثلاثة أعوام ورد المبلغ لصالح حكومة السودان. وأبلغ مصدر الصحيفة أن نيابة المال العام تفاجأت بتقديم السلطة القضائية تسوية قضت بأن يدفع المدان مبلغ «300» جنيه شهرياً لمدة «40» عاماً، وقبلت محكمة المال العام بها رغم اعتراض نيابة المال العام، وأكد المصدر أن النيابة هي الجهة الوحيدة المختصة بتمثيل المجتمع أمام المحاكم الجنائية وليس الجهة الشاكية «السلطة القضائية»، مؤكداً أن المال مال المجتمع وليس مال السلطة القضائية. وعلمت «الإنتباهة» أن رئيس نيابة المال العام وجه وكيل نيابة المال العام بمخاطبة رئيس القضاء لإلغاء التسوية، مبيناً أنه بعد انقضاء فترة السداد يصبح عمر المدان «107» أعوام. وأشار المصدر إلى أن مثل هذا الإجراء يعتبر دافعاً ومشجعاً على الاعتداء على المال العام، ولفت إلى أن مثل هذا التقسيط لا يتم منحه لأصحاب المشروعات الصغيرة في التمويل الأصغر، وتعود تفاصيل القضية إلى حدوث عجز في الخزينة الرئيسة للسلطة القضائية أثبتته المراجعة الداخلية.
إنتهي الخبر ولم تنته دهشتنا لما آل إليه الأمر في دولة المشروخ الحضاري .. هذه السابقة التي لم يسبقنا عليها أحد لا في الأولين ولا الآخرين توضح تماماً كيف أننا معظم أفراد الشعب السوداني الفضل قد أصبحنا كالأيتام على موائد اللئام فبينما يموت المئات بل الآلاف لعجزهم عن توفير الدواء (يخمش) مثل هذا (اللص المسنود) مئات الملايين فيحكم عليه بالسجن وإسترداد ما أخذه غير أن مخدمه (يظهر ع الخط) مخاطباً (المحكمة) بأنه قد توصل إلى (تسوية) معه في خرق واضح للقانون وللأسف الأسيف لم يكن المخدم إلا (السلطة القضائية) لتكتمل الدهشة في هذا العهد التعيس !!
التسوية من وجهة نظرنا لا غبار عليها (بل كتاحة) وإن كانت فترة سداد (القرض غير الربوي) (واسعة شوية يعني) إلا أننا نحمد لمن قام بها إنو حفظ للمواطن الغلبان (حقو) وقروشو (في الأخير) ح ترجع ليهو وكده ، فقط لدينا عدة ملاحظات لمن تكون في تسويات (في المرات الجاية) :
1- أن تكون عدد سنوات الأقساط حسب المعادلة التالية :
(عمر المختلس لحظة الإختلاس+سنوات الأقساط) = 100 وذلك جتي يحتفل المختلس بعيد ميلاده المية وإنتهاء سداده للأقساط في بروقرام واحد
2- أن تقوم الجهة التي قامت بالتسوية بإلزام المختلس بالتأمين على خياته بحجم المبلغ المختلس (طبعن من القروش اللاغفا) ، وده عشان نضمن للمواطن الغلبان (حقو) وكده
3- أن يتم دفع القسط بقيمة الدولار عند الدفع عشان مفيش حد عارف الجنيه ح يكون قيمتو أيه عام 2053 (أي عند القسط الأخير) !!
4- أن توضع صورة من التسوية في دار الوثائق المركزية
5- أن يكون عنوان المختلس واضحاً ومحدداً .. احمد شرفي .. البكري .. مع توضيح رقم المقبرة !!
كسرة :
بختو لا (قيمة مضافة) لا (دمغات) لا (زكاة) لا (ضرائب) ولا أرباح !!

كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)

60 تعليق

  1. برنجييييييييييييييييية للطيش

    1. معاك الطيش عثمان
      وابصم بال10 انتا اول مره تدخن عشان كده مندهش
      ع العموم مبروكه عليك

      1. هههههههاي أول مرة ؟ منو أنا ؟؟؟

    2. هههههه ايوه انتا
      يالخليتني منتظر وختفتها مني

    3. هههههههههههههههه,,والله يا مندهش كنت عايز اتصل عليك اخمس معاك !
      لكن بى حركتك دى وجعتنى فى قلبى ! احييييييييييييييييييييييييييييييييييييييي ,,
      مباركة يا حبيب ولكل مجتهد نصيب…

    4. مبرووووووووووك آآآآآآآآآلمندهش بس كان تكون برنجية الجميع بمناسبة قفلت المولد ما تقول ما حصلنا الحلاوة حقت المولد الرطلها بقى بالشئ الفلاني وحايجي الزمن الفلاني

      1. يتباركن أيامكم يا الدوك شمباتي والغلبان برنجية بعد الما البروف طلع زيتنا
        وحلاوة المولد يا الغلبان يسمنيّ فيها
        انت دحين السنة الفاتت ما قالوا المولد ده حرام عشان كدي خلينا الحلاوة
        أكلوها انتو و كمان دقوها ،،، وبرضك اشربوها وخللوها

      2. قبلك وحّححححدك يا المندهش , ده كلام شنو الدع تقولو
        ده !!!
        انت ما شفتهم السنة قالو شنو ما خلو قولت حرام
        وبقو يقولو لينا هو زاااتو القال ليكم مولود يوم
        12 ربيع اول منو ؟
        والله يا المندهش انا عمري ده كلو, يوم 12 ربيع ده كنت
        بكتر فيهو من الصلاة علي النبي خلاف باقي الايام هسع
        السنة دي عزيمتي قلت والشيطان لقي فرقتو فيني .
        اسمع بقالة السودانيين الجمبنا الببيعو الكسرة ديك
        عندهم حلاوة مولد جايبنها من السودان تعال عندهم
        وبالمرة اغشانا نتشاوف .

      3. هييييييييييييييي,شوف وانا مافى !!؟
        باااااااااااااااااااااااااااطل

      4. ياجنوبي عليك الله الحقني بعنوان المحل الفيهو حلاوه مولد والله الاولاد وامهم زانفني زنقة كلب في طاحونة

    5. اخوى المندهش دى جازفتها كيفن؟؟ و الا جيت طاير عشان الحكم دة ادهشك و ادهش البروف و الجميع !! بالبركة و الهنا يارب ,, و قالوا اليومين ديل البرد عندكم شديييد,, عشان كدى دى بتدفيك شوية …

  2. انعل ابو البرنجي زاتو ياخ من الصباح راجيها
    ورارد النظر بتاعي شغال …….
    شكلو البرنجي عندكم حجز ما كيف

    1. والله زيك اقوية حارسنها لما يئسنا وقلنا كلاب الليل يا منعت البروف يا عضته يا قبضته هع كرع والله

    2. البرنجي ولا حجز كمان هو طيارة البرنجي سهر وختف بس

    3. قوية ,, رادارك دة اكييد ما كان شغال ,, و لو كان شغال يبقى المسئول عنو اكيد كان بيصلى الضحى عشان كدى ما شافها ,,

  3. البروف الحبيب
    آسف جداً لن أصدق هذا الخبر
    أرجو التحقق منه
    وإذا كانت نكته فهي بالجد مضحكة جداً
    ههههههههاي أحححححح

    1. ههههههااااااااي وعامل لي فيها مندهش !
      صدقني يا المندهش الحركة دي يكون ابليس ذاااتو لامي
      اولاده ويتدردقو من الضحك .
      عليك الله مش ياها نكتة الشايقي القال للزول انا
      قروشك دي اصلي ما ناكرا بس شفت التمرة دي التقوم
      واوووول حصاد ليها بديك قروشك والزول بقي يسوي هه
      هه هه الشايقي قال ليهو آآآي اضحك ماك ضمنت قروشك

      1. جنوبي ..
        إبليس منو ؟ ما تقل لي المسكين داك
        والله ديل حيرو حنانو زاتو
        وكان لي زول الشايقي خليهو يضحك كلها كم سنة كدي ويلم في قريشاتو لكن ده قال ليك ديل ( 40 سنة ) وكتابةً أربعين حول موووووت يا حمار
        غايتو الله يخلف علينا ،،، لكن قبل ما يخلف يجيك واحد ناطي بي مصيبة أكبر ، والله أكبر عليهم جميعاً

      2. آآآآآآآآآجنوبي ابليس ما رحل من زماااااااااااان

  4. والله حاله البلد بقي الاختلاس ده حاجه عاديه امام القلع عينك عينك
    و(القلع )ده بقي ما محدد رجال ولا نسوان بنات ولا اولاد
    والزول ده شفت قلع من ناس القضائيه عديل

  5. الدهشة في الزمن دا بقت صعبة شديد لكن العملية جامدة ومبتكرة

  6. مبروكة يا المهندش،،
    احييي ما بدخن في ال كلينيك.

    1. يا مقداد قلت لي ما بتدخن في الكلينيك ؟؟ ياخي وين حقوق الانسان ؟؟ انحنا بندخن جوه العنايه المكثفه ذاتا
      أل ايه ؟؟ أل كلينيك أل

      1. يا صاحبي والله مشتاقين،، ياخ ضربت ليك تلفون ولي غاندي لاكنو كان في اجتماع يا كان بدخن ،، عليك الله كلمو وادخل في فايبر كدي بعدين لمن ارجع،،

    2. يتباركن أيامك يالعبيد
      قلت لي ما بتدخن في ال كلينك ؟ عشان الأكسجين للمرضى ، و اول امس ماتو أربعة تنفار عشان أكسجين مافي تخيل ؟

    3. (كلينك دا هناك) هنا اول ما تدخل حوش (الهوسبتال) السكلي بضرب عند جيرانك لانه هنا ما بودوك الحته الريحتها ديتول (ان وجد) الا وتكون انت خلااااااااااااص لحقت امات طه لان اي قرش اولى به المعدة عشان تكون وافق على حيلك فياخي ما تقولينا كلنيك تاني اعصابنا بتبوظ هنا العلاج اصبح بلدي والاكل كان التلقى برضه بلدي فهمت حاجة آآآآآآآآآآخوي

  7. يا مثبت العقل والدين ثبتنا ..

    1. يا أخوي جنوبي ، عمك تنقو ده والله فردتي من أيام الثانوي ويعني كان ناس الأمن قبضوني بجيبوهوا معاي،، والله العظيم فردتي فما تستغرب لمن يرد علي تعليقاتي

      1. (غاندي منو آآآآآآآلعبيد) صراحه رائح لي واحد غاندي (وصلحه) واسم صاحبك جميل فيه معنى غميس للحرية

  8. عبيد ياخوي ربنا يديم صداقتكم ومودتكم …
    تعليقي لا علاقة له بكم ..
    كل ما في الامر انني لم استطيع استيعاب هذا الحكم ان جاز تسميته حكما بالله عليك كيف تتبجح الحكومة وتتنطح علي وثيقة الفجر وتولول علي ما جاء فيها من فصل الدين عن الدولة والله ان كان الامر كذلك انا من اشد المؤيدين لفصل الدين عن الدولة حتي لا يساء الي الدين بافعال رجال الدولة امثال هؤلاء .

    1. هاها والله انت كتاب خلاس واحب أسلوبك الساخر يا ظريف

    2. لا آآآآآآآآجنوبي حكم كيفن عاد ما حكم مااا ياهو قدامك حكم بعدين يا عمك نحنا في زمن حكم اب تكو

    3. الحكم دا ما استوعبتوا مفيش مشكلة ابقى ذاكر كويس اها حكم قدو قدو رايك فيهو شنو ما طاخ طاخ طاخ عشان لابسه بنطلون واولادهم (خليها بين قوسين احسن) يمسكو فيهم جايين من السبلوقه سااااااااااااااااااااااكت اريتو كان فيه بنطلون وجوه قسم الجيلي الضابط قايل فيها نيشان عليك امان الله نيشانه العيندو كان عاوزين يشيلوهو منه هع كرع اخير اول

    4. ياجنوبي عليك الله الحقني بعنوان المحل الفيهو حلاوه مولد والله الاولاد وامهم زانفني زنقة كلب في طاحونة

      1. انا ما عارفك انت وين وفي ياتو دولة بس لو بقيت في الرياض امشي شارع غبيره العام معظم محلات المنتوجات السودانية عندهم وبرضو بقالة هاشم جمب حديقة غبيرة وهاشم ده لحدي دقة الدوم وطين البحر عندو !

  9. لا حول ولاقوة الا بالله !
    حسبى الله عليهم واحد واحد ,,,
    لكن معادلتك سمحة يا بروف !! آيييييي

    1. (معادلة ذات النطاقين)

  10. اهلي واحبائي في القمردينة المندهش صاحب البرنجية وقوية ابو ابراهيم والعبيد وعمك تنقو وشمباتي وجنوبي لا داعي ابدا للاستغراب من نقل البروف لما جاء في الانتباهة نحن في زمن حكم اب تكو وحساب ابو الكجك نخلي الاحكام جانبيا وهذا قطرة من بحر لو كل واحد سرد ما لديه من افراد الشعب راح يكون عندنا مش عارف بسموها ايه الياذه الف ليلة وليلة والا شنو بس والله كتمت كتمت كتمت في انتظارك يا بم

  11. كتمت كتمت وبتين: ومنك يا دقين ننفك .. تكون فكت عقدة الدين ..
    عقب سيرة البلد سارت على الدرب العديل والزين
    بعد ها الحال بلا مرسال .. يجو العمال .. يجوز الزراع .. يجو الكداح
    يجو الناس البخبرو شليل .. وشقيش راح
    وقمريتين جناحن دلّ فوق الصاح
    من الغفلة وعساكر الليل .. ولي الدنيا الجديدة جناح
    نتمناها تكون الاخيرة وبيقولوا الثالثة ثابته بعد اكتوبر وابريل لكم كوووووووووووولكم حبي

  12. اسف شنو وبنات شنو ناس كتاااااااار مأكله وعملة منهم ابو النوم تقول لي شنو متقلى منو !!!!
    عطاءت بالجملة لحساب ناس ده غير المذادت المتخصصة لفلان وعرتكان الله في

  13. في بعض البلدان يخدعوك ولكن بالقانون ولكن في بلادي تكون الخدعه باستخدام رجال ال…….
    اللبيب بالاشاره يفهم ،،
    وينك يا غاندي فاتح لينا وقالوا لي جيت بعد غربه طويله في كندا،. الغلبان برضو بسال عنك،،، عمك تنقو كلمت غاندي ولا لسه. ،، غايتو جنس غايتو قال يدفع تلتميه جنيه شهريا ودي يعني خمسين دولار شهريا ولا خمسه دولار انا ما مستوعب القصه وكان خمسه دولارات في الشهر ما تعالوا نعمل ليهو شيرينق،،

    1. اشكر لك اهتمامك آآآآآآآآآلعبيد بس غانديكم ما ياهو غانديني بس طالما هو طرفك يبقى كلنا في الحب شرق غانديني انا درس في روسيا ايام زمان (جامعة لوممبا) او جامعة الشعوب سمها كما شئت يعني اححححححححححمر ما تدخلني تحت عباءته انا ابببببببببببيض شفت ناس زمان كيف واحد ابيض والثاني احمر لكن اصحاب في الانسانية تحياتي ثانية لك

  14. يقول الحسن البصرى : 
إستكثروا من الأصدقاء المؤمنين فإن الرجل منهم يشفع فى قريبه وصديقه،،فإذا رأى الكفار ذلك قالوا : ( فما لنا من شافعين ولا صديق حميم ) اسألكم أخوتكم وصداقتكم ودعاءكم. جمعة طيبة مباركة

    1. دعائي لك خاصة ولاهل القمردينة عامة ولاهل السودان بشكل اعم

  15. اهلي واحبتي بالله بعد الغيبة من البروف الحصلت مش مفروض ينزل باااااااااااااكو

    1. أخي الغلبان شكرًا علي الكلمات الاخويه واهو في البحث عن غانديي وغانديكم ولكن غانديي مشغول خلاس واجتماعاتو كتيره وفاتح لينا

  16. يا حبايب التحية وعيد مولد مبارك عليكم
    الموضوع يا بروف اخطر من خط هيثرو وبستاهل تتعمل ليهو كسرة ثابتة طوال مدة الاقساط (هو نحنا ورانا شنو)
    وعشان نكون علي بينة دايرين نعرف الأطراف المشتركة بالاسم الرباعي وشجرة العايلة عشان الميراث وكدا … وبالمرة نديهم اسم البلد بالكامل لأنو ممكن تحصل تجزئة او اندماجات مستقبلية.

    كسرة بموية:
    يا شباب … الملاحظ تعليقات البرنجية اكتر من ٩٠ في المية من التعليقات عن الموضوع الاصلي … فياريت نقسمهم على الاقل !

    1. العم أب أحمد
      المولد مبارك علينا وعليك
      تصدق ان شجرة العايلة فكرة رهيبة وبرضك شجرة عايلة احفاد ابونا الكبير السودان ،،، غايتو أنا أثني
      بخصوص البرنجية ،، لكن ما كمل الكلام ،، والبروف بيجيب لينا في هجايم أكبر من عقولنا
      قبل ما نفهم الهجيمة كويس تجينا هجيمة تانية ولذلك اقترح ان نُضيفها ( للشعب الفضل المهجوم )

  17. بمناسبة القرض الصيني الذي سال له لعاب حاتم سليمان
    مدير التلفزيون , والذي بموجبه ستحتكر الشركة
    الصينية البث الارضي داخل السودان وتأخذ الشركة
    الصينية من الارباح بواقع 4 دولار عن كل 5 دولار من
    الارباح ودولار وااااحد من الخمسة هو نصيبنا نحنا اهل
    السودان . لا و إيه من الدولار الواااحد ده نسدد
    قيمة القرض . يلا ما علينا دي حاجات يمكن ما بنفهما
    نحن عامة الشذاذ ونخليها للمختصين .
    لكن البنفهمو انو طالما الشركة الصينية محتكرة البث
    فما نستبعد انو نشوف دعايات من شاكلة ” مي هاااو
    بابا كبدة كلب ” ( يعني رسلت ليك كبده كلب مع بابا )
    واعلان تاني يفتتح السفير الصيني اسواق (شنج شان )
    والذي يعتبر اكبر الاسواق في افريقيا والوطن العربي
    لبيع لحوم الكلاب الحية والمذبوحة. واعلان تاني شركة
    ماو للحوم ويجيبو بت ماسكة ليها ( هوت دوك ) وتقول
    هوت دوك لافطار المدرسة وبيرقر الكلاب لزيادة الذكاء
    وبعد كده نخش علي شارع الاربعين ونلقي مشويات بروسلي
    اقاشي كلاب وفي العمارات تلقي مطعم شنقهاي كلاب مندي
    وكلاب علي الفحم , وبعد كده يفتحوا لينا معابد ويجيبو
    لينا الله حقهم داك ( التمثال الشين داك اسمو
    شنو ؟ )
    ينعل ابوكي حكومة بت كلب !!

    1. أخوي جنوبي
      قلت شنو دولار لينا
      والله دي لذيذه
      الدولار ده ما لينا

      1. العبيد
        أدي حنوبي قرشو خلي ينزل ،،
        قال دولار لينا ههههاي

      2. إفتراضاً يا عبيد وقول للمندهش ده بعد المراجع العام
        يثبتو لينا .. هههههههههههه

      3. الظاهرالظاهر يا خوي جنوبي اخونا المندهش مصاقر البرنجيه ومع الاعتذار للأخ أبو احمد

      4. آلعبيد جنوبي قال الكلام بي حسن نية سااااااااااااااااكت كلنا عارفين الدولار الباقي ما لينا

    2. نسيت المرارة والكمونية دانا بحبهم حب هع كع كرع ملعون ابوكي كلبة بنت حكومة

  18. ﻧﺎﻓﻊ: ﻣﻮﻗﻌﻮ ﺍﻟﻔﺠﺮ ﺍﻟﺠﺪﻳﺪ ﺗﺤﺖ
    “ﻛﺮﻋﻴﻨﺎ” ﻭﺍﻟﺒﺎﻗﻴﻦ ﺗﺤﺖ “ﻣﺮﺍﻛﻴﺒﻨﺎ”

    صحيفة الجريدة اليوم السبت ٢٦ يناير ٢٠١٣م
    ,,,,,, بس خلاص …….

    1. أخوي المندهش انت شفت سيف الإسلام
      وعلي ما أظن قطعوا ليهو اصابعو،،، افتكر كدا

    2. والباقين ديل ياهم ناس منو !
      كان كدي اخير نمشي نوقع اقلو نكون ارفع درجه شوية..
      الراجل ده اصلو ما بيفتر من الشتيمه ! هو زاتو مش
      بقولوا المسلم من سلم المسلمون من لسانه ويده مالو
      بزئ ومفتري كده ؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: