دي شغلانة؟

كانت الحياة تسير طبيعية في ذلك الصباح في أحد أزقة المنطقة الصناعية .. أصحاب الورش يقومون بفتح أبوابها .. وكنس ورش المكان .. بعضهم يقوم بإخراج العربات التي تحت الصيانة إلى خارج المحل وبعضهم جلس يرتشف شاي الصباح .. الجميع يقومون بإستقبال يوم جديد .. الحاجة قسمة (ست الشاي) تجلس عل (بنبر) وهي (تهبب) في كانون الشاي بعد ان قامت بترتيب المكان بعناية عندما توقفت أمامها عربة بوكس تحمل لوحات صفراء حكومية ترجل منها شخص يحمل لوحة حديدية كما لوحات (المرور) كتب عليها الرقم 512
– ده شنو يا أولادي؟
– دي حقتك إنتي يا حاجة
– سجمي جبتو ليا شاهد من هسه وقبال ما أموت؟
– يا حاجة قولي خير .. ده ما شاهد .. ده رقمك !
– رقمي ياتو إنتو كل يوم بتدونا رقم؟ قبال يومين ما مشينا عملنا الرقم الوطني القلتوهو ده .. ح تقعدو ترقمو فينا كده لمتين؟
– لا يا حاجة ده رقم تاااني .. ده رقمك إنتي .. كل ست شاي أديناها رقم بتاعا
– وتاعبين روحكم قدر ده ليي؟ حديد وزاوية وخرسانة ما تلبسونا فنايل زي بتاعين الكورة وخلاس
قام العمال في همة ونشاط في حفر حفرة تكفي لتثبيت اللوحة خلف بنبر (حاجة قسمة) مباشرة وأهالوا عليها بعض الخرسانة ثم عادوا ومعهم رئيسهم أدراجهم منطلقين بالبوكس الهيلوكس .
– شنو يا حاجة بقيتي (محطة بص) ونحنا ما عارفين؟
قالها الأسطي (عرمان) وهو يطلب منها كباية قهوته المعهودة فردت عليه وهي تقوم برفع (الكفتيرة) وإصلاح (الفحم)
– والله يا أسطي الناس ديبل بطبقوا فينا جنس نظريات .. قال شنو؟ عاوزين ينظمو الشغلانه هو عليك الله المنظم في البلد دي شنو؟
– والله يا حاجة برضو النظام حلو وبيني وبينك أنا سمعتا إنو الحكومة عاوزه تساعدكن وتنظمكن
– والله يا أسطي أنحنا أكان ما الحياة الصعبة دي ما كنا بنرضى بالمرمطة دي .. لكن الظروف

ما أن قامت حاجة قسمة في صباح اليوم التالي بتجهيز المكان للزبائن من رش (للواطة) وتوزيع للبنابر وإيقاد (للكوانين) حتي توقف بقربها (بوكس) ذو (لوحة صفراء) نزل منه شخصان يرتديان بدل سفاري (بيجية) ويضعان على عينيهما نظارات سوداء قاتمة
– (أحدهما مشيراً للعمال) : نزلو الحاجات بتاعت الحاجة دي
– (الآخر) : إذيك يا حاجة
– أهلاً يا ولدي
– بالله يا حاجة قبل ما تعملي اي حاجة لمي حاجاتك دي كوولها عشان نحنا جبنا ليكي حاجات جديدة غيرها
– (في إندهاش) : جبتوا ليا شنو؟
– جبنا ليكي كفتيرات (إستينلس إستيل) بدل كفتيراتك المكدبة دي .. وجبنا ليكي (شرقرقات) للقهوة .. وكانون بالغاز بدل الفحم الشغالة بيهو ده .. وعلب تختي فيهم الشاي والبن والنعناع وباقي (الدواء) .. وكبابي ما خمج .. الملاعق .. حتى الملاعق دي يا حاجة جبناها ليكي !!
– (وهي تقطع زغرودة أفاقت على إثرها كل المنطقة الصناعية) : الله ينصر دينكم يا ولدي .. والله دي الحكومة وللا بلاش .. والله مما شفتا علامة الصلاة دي في وشوشكم عرفتكم ناس خير سااااكت
– طيب سلموا للحاجة دي .. 2 كفتيرات 3 لتر و 3 كفتيرات لتر ونص .. شرقرقين نص لتر .. كانون غاز شعلتين .. أنبوبة غاز 12 رطل .. دستين ملاعق صغيرة .. دستة طقم علب دواء (يلتفت ناحيتها) نصرف ليكي كم كرسي يا حاجة !
– (في إرتباك) : دستة .. وللا أقول ليك خليهم تلاتة دست
بعد أن تم تسليم الحاجة (قسمة) معداتها وهي في ذهول تقدم أحدهما وهو يحمل دفتراً :
– اها يا حاجة موقعك ده رقمو 512 ودي الحاجات الإستلمتيها جيبي صباعك اليمين ده وابصمي لينا في الحتة دي
– أبصم ليك دي شنو يا ولدي أنا خريجة (الأحفاد) تربية وعلم نفس !
قامت الحاجة (قسمة) ببيع (عدتها القديمة) ودفع قسط جامعة إبنتها الكبري التي تدرس في إحدي جامعات (الفكة) ولسانها يلهج بالشكر لولاة الأمر الذين أعانوها بحسبانها تنتمي للشرائح الضعيفة التي سوف يسالهم عنها الله يوم يفر المرء من أخيه !
بعد أسبوع قبيل المغرب وبعد أن إنتهت حاجة قسمة من (رهق اليوم) وهي تلم في عدتها توقف ذات البوكس الذي يحمل لوحة حكومية صفراء ونزلت منه نفس (الوجوه) ..
– السلام عليكم
– عليكم السلام يا وليداتي
– الشغل ماشي كيف يا حاجة؟
– والله ما بطال .. كانون البوتوجاز ده سهلا علينا شوية
– (وهو يخرج من جيبه دفتراً و ينتزع منه ورقه ) : 115 ألف وأربعمية وعشرين قرش
– (في ذهول) : بتاعت شنو كماااان
– 7 في 3 دست كراسي الكرسي اليوم بي جنيه .. يعني 36 في 7 بي 252 .. وعندك الكانون وأنبوبة العاز اليوم بي 5 جنيه يعني الاسبوع بي 35 جنيه وإتنين كفتيره 3 لتر الكفتيره الواحده بي 2 جنيه في اليوم و…
ترقد الحاجة قسمة في (عنبر الحريم) بمستشفي التجاني الماحي بعد أن فقدت النطق غير أنها تستعين عوضاً عن الحديث بلغة الإشارة فتراها ترفع يدها نحو السماء وهي تمد سبابتها ثم تنزلها بصورة متكررة … وباللجوء إلى متخصص في لغة الإشارة أفاد بأنها تقول (شكيتكم على الله) !!
كسرة :
عشان ما تقولو الفاتح جبرا ده بتاع (موبالغات) القصة دي عملوها ناس محلية (كرري) بس ما جابو (الكبابي والملاعق والكوانين) ..إكتفوا بتأجير الكراسي … (للنساء طبعن) !!!
.. بالله عليكم دي شغلانة ؟

كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)

Advertisements

57 تعليق

  1. برنجيييييييييييييييييييييييييييييييييييييييييييييييييية

    1. هههههههههههههههههههههههههههههههههههه,,,,دى برنجية مافى وقتها !!

      1. صحي ده شنو دفن الليل ده !

      2. دي برنجيييييييية مع مرتبة الشرف ووسام الإنجاز والإعجاز عشان مافي وقتها
        ويا د.العبيد تستاهل كل خير ويبارك الله في أيامك

      3. دى ضحكه يا شمباتى
        دى وقتها ونص
        وتستاهلوا

      4. خالد الحاج…
        سلام ومرحب بيك كتيييير ,,,
        عيبها لى بس ! لا تكون خالد ولد مدنى !!؟
        جنوبى ثرو المندهش…
        استعدوا لانعقاد مجلس البرنجية الاسبوع القادم بمدينتكم العامرة !!

    2. انتو تخلو الدكاتره ف النبطشيه وتلغو ف البرنجي زي الزول الراجي لي مريض يفوق من العمليه
      مبروووووووووكه وصحه وعافيه ع الانفاس البناخدو منكم لكن تاني بنساهر ليها

    3. خطوه عزيزة ويوم موعود
      الخلاك تطرانا شوية
      تسأل فينا وتجي حارتنا
      دابها الليلة الفرحة طرتنا …
      اهلن يا حبيب وسهلن وجاهزين جاهزين لاستقبال
      الحلوين ….
      الله يرحم خالد سيد الاسم( جضما معود علي الكفيت )

      1. حتفرشوا السكة شنوووووو ؟

    4. عليك الله آآآلمندهش ساكي البرنجية طوالي دي شغلانية دي

    5. ابو الزفت يا المندهش ,, دى كلها برنجية ؟؟ انتا خلى بالك مخلوع عدييييل كدة مش مندهش!!
      العبيد ,, فرق التوقيت فرق معاك و الا شنو؟؟

      1. فرق شديد و المندهش زوول ظريف ويستاهلها

  2. البروف العزيز
    كيف ما شغلانه ؟ بالله هو في تاني شغلانة غير الجري ورا النسوان في كل الإتجاهات ومختلف الأهداف

    1. مبروكة وبالجد تستاهلها

    1. أرقام الحسابات يالفاتح لشباب الحوادث

  3. برنجيه جلت

  4. نائب شنو وعام الموضوع فك شوطو وملينا مع ناس المحليه البقو زي السرطان الناس ديل باقي عندهم عجز شديد في المزانيه وكان ما بخاف الكضب او قول ليك شق ولو ما الموت رأجينا اول ليك شرط لازم يعملو كده شهامه كملت قروش الناس ومافي حل غير طباعه قروش جديده يعني مذيد من التضخم وتقول الدولار عمل ٧ جنيه ليه

  5. جيت صادى تاني الدردقان بتاعت الملجه بقت في عطاء وعنقريب سوق الناقه كمان شنو يعني لمن الحيكومه الموقرة توفر كراسي حاجه تقرف بتاعين الصعود جنب الصيد ليه بلد كرش فيل وتقول لي منو وتقولي شنو

  6. استاذ الفاتح لك التحية والتقدير…
    بقدر مانحاول التكهن بنهاية كل موقف مما تروية تكون الحقيقة ‏‏(للاسف الشديد ‏‏) اسوأ من كل التكهنات ‏…
    نتمنى من الله ان تكون تلك بداية النهايه…

  7. حسبنا الله ونعم الوكيل
    وازيدك ف الفن اغنيه ف واحد شغال ف محلية الكلاكلات (يدو مقطوعه) مجنن ستات الشاي
    ويستقل حوجتن يعني بصريح العباره يا………… يا كل يوم يجرجرا بالبوليس ف نص السوق

    1. وده داير يتعظ متين ! لامن يقطعوا ليهو شنو ؟
      الحكومة دي سفيهه في لم القروش وسفيهه في صرفها !!

      1. والله نحنا غلبتنا الحكايه دي لكن بس نرفع يدنا زي الحاجه قسمه وندعو الله انو يلطف بينا من عمايل خلقو فينا وف المساكين من بقيت الشعب الفضل

  8. وانا ارف عسباباتى نحو السماء وابهاماتى اوجها ناحيتهم !
    حسبى الله عليهم ,
    الله لا كسبهم عافية ….

    1. ود مدنى شنو كمان يا شمباتى انا خالد الحاج الخرطوم (الصحافه)

  9. واحد من البلد ديييك | رد

    بارك الله فى حكومتنا الرشيدة التى لم تترك شيئاً الا باعتوه أو أجرته …. و طول الله عمر ولاة أمرنا الشغالين قلع و خلع ….

  10. طبعاً إنت ما بتاع مبالغات يا أستاذ بس بالغ الزمن الذى جعل على رأسنا حكومة نصرف عليها بدل ما تصرف علينا، نعم نصرف عليها نحن ، ضريبة من مرتبنا ، عوائد بلا عائد فلا يوجد مقابلها أى خدمات لا شوارع مريحة لعرباتنا لا إضاءة للأحياء ، والقائمة تطول نفايات رسوم صرف صحى .. وهلم جرا ، اللهم أصلح لنا ديننا الذى هو عصمة أمرنا وأصلح لنا دنيانا التى فيها معاشنا واجعل الحياة زيادة لنا فى كل خير والموت راحة لنا من كل شر .. آمييين

  11. حسبنا الله ونعم الوكيل ولا حولة ولا قوة إلا بالله…بالله ما نقرأه ونشاهده من افعال الصهاينة في الشعب الفلسطيني نحن تجاوزناه زمااااان. الظلم ظلام دامس لابد من ان يأتي يوم الفرج إن شاء الله!

  12. ارقام تلفونات شباب الحوادث وين يا جبرا

  13. حسبي الله ونعم الوكيل حسبي الله ونعم الوكيل حسبي الله ونعم الوكيل

  14. سلام
    البرنجي خيلناهو ….قلنا ليكم….
    والله يا جماعة قبل 3 او 4 شهور كنت في السودان واتلاقينا مع احد الزملاء في الشهداء المغربية كدا قال لي نشرب شاي اقرب ست شاي قعدنا …..بعدين لاحظت الكراسي كلها (ستات الشاي) شكلها موحد ومرقمة … سالنا ست الشاي قالت دي كراسي المحلية بتأجرو لينا بالدسته ولازم عشان يخلوكي تشتغلي تاجري منهم الكراسي
    والله العظيم تلاتة الكلام صح ….. واي زول في الخرطوم ممكن يمشي يجرب
    والدرداقات طبعا الفكرة عمموها …وناس بخصخصو وناس بعممو علي كيفهم
    اللهم ارحنا منهم يا رب العباد

  15. من الخليفه هناي الجاثم علي صدور اهل البلاد
    الي سوزان رايس مندوبة الامريكان
    سلمي تسلمي ..
    نعرض عليك الدخول في الاسلام فإن قبلتي و آمنتي ودخلتي
    في دين الله , طهرناك وزوجناك المجاهد عبد الرحيم ود
    حسين إن هو قبل بهذا .
    والسلام لمن اتبع الهدي
    الله اكبر والعزة للاسلام
    إييييييييه زمن ! ملكة كان حاكما الدنيا كووولها
    في يوم من الايام عرضنا عليها الاسلام هسه حتة بت
    مفعوصة تلحسنا الكوع ونلمع ليها جزمتا بي لسانا !
    هرشوكا ونزل من بغلك البرطاع
    فالح في الكلام يا الراقص الجعجاع

    1. ههههههههههه,
      والله كان عرستوا ليها هبنقة دا تكونا عاقبتوها عقاب شديد خلاس !!

      1. آآآآآآآآآآخوي شمباتي دحين جنوبي دا جنه والا شنو

    2. مشكلتنا آجنوبي دا بيخاف وبيتر من العينهم خدر بس البرطعه والجعجع فوق روسينا نحنا

    3. جنوبي
      هههههه إجازي محنك هههههههاي

    4. ههههه جنوبي المابجننو شنو يا الغلبان !
      طالما انهم ممكن يقعدوا مع جناح الشمال العناد
      والمكابرة والحرابة البقت دي كووولها فوق كم ؟
      قال ياسر ما يقعد معانا قال ..

    5. آآآآآآآجنوبى دى عاد مااااا بالغتا فيها عدييييل كدة و قلبتا فيها هوبة كمان ,, و الله انتا اللى تستاهل برنجية اليوم و كل يوم ,, اضحكتنا اضحك الله سنك (حتى لو بقت برطعة و جعجعة فوق ريسينا ديل – كيتن فى الغلبان) !!

  16. اصدرت محكمة الطفل بامتداد الدرجة التالته بالخرطوم
    حكما باعدام معلم اغتصب تلميذته داخل مكتب الاساتذة
    ويوم الجمعه / ” اخر لحظة ”
    اولا اتمني خروج الناس لتأييد هذا الحكم حتي لا يتبدل
    في مراحل الاستناف ضاغطين بذلك علي كل من تسول له
    نفسه ان يجعل الامر مجرد تحرش جنسي او مرض نفسي .
    واتمني بعد قتله ان تمر الجثة علي كل المدارس وتوضع في
    مكتب الاساتذة مكتب تلو مكتب بحضور كل سائقي الترحيل
    ثالثا اقف احتراما واجلالا لهذا القاضي ..

    1. اوووووبح,,ألنقيف معاك يا حبيب…

    2. و ان شاء الله يوصل هذا الحكم الى مرحلة التنفيذ و بسرعة,, عشان ما بكرة يجينا واحد زى بتاع صاحبنا اللى لغف (القضائية) داك و يخلوهو يقسطها على 40 سنة !!!

      1. آآآآآآآمييييين ..
        او يجينا واحد زي القال المسألة مجرد تحرش والاعلام
        ضخم الموضوع زي الواحد لمن يكون ساكيه كلب ويقولوا
        ليهو الاسد جاري وراك , اها الكلب بقي اسد ولا ما
        بقي يا دكتور معتصم عبد الرحيم ؟

  17. وانا كمان اقيف معاكم تقديرا لهذا القاضي

  18. مدخل : في دور جمعياتنا نحن معشر الرّطانة في بلاد
    الاغتراب بمجرد ان تصدر لجنة الجمعية تحذيرا بنشر اسماء
    الاعضاء المتأخرين عن سداد اشتراكاتهم في لوحة الاعلانات
    بالجمعية الا وتجدنا صغيرا وكبيرا مسارعين بالسداد حتي
    لا يظهر اسمنا في كشف المنبوذين وربما ترسل صورة الكشف
    الي القرية بارض الوطن .
    النص : مُنع السودان من التصويت في الامم المتحدة
    بسبب عدم دفع متأخراته المالية المستحقه لمنظمة
    الامم المتحدة حيث نشرت ذلك الجمعية العامة للامم
    المتحدة علي موقعها في شبكة الانترنت .
    مخرج : ياربي الجمعية العامة دي ح ترسل صورة لي
    عماتي في البلد !! بيبيووووو

    1. جنوبي
      لكن نحنا ما من ( الغارمين ) حنجيب ليهم من وين حق الاشتراك ،،،، معلمين الله

      1. سجمى !
        انت (معلم) يا مندهش !!؟ وى

      2. اوعكم من (المعلمين) و الدروس الخصوصية فى غرف (المعلمين) ,, ما شايفين الاحكام (الاعدامية) الفوق دى !!! مش قصدك كدة يا شنباتى؟؟؟؟

      3. هوووي انت وهو
        أبرا انا واستبرا معلمين شنو كمان
        يعني عِلا نقول ما عندنا التكتح او اباطنا والنجم

      4. آآآآآى كدة, خليك واضح و محدد و صريح ,, مآآآآ قلتوا نوبة !!!! وى

      5. المندهش ثرو فلاديمير ,,
        طلعت ماك (معلم) والله !
        لوووووووووووووووووووووول

  19. الاخوة و الاخوات السمار,, مسوءلين من الخير ان شاء الله ,, مش كان معانا اختنا اسمها (بت وراق)؟؟ و ينها يا ترى, قاطعة موية و نور ,, ان شاء الله ما تكون الملاريا تانى ,, التحايا لكى

    1. ياخوي فلاديمير
      انت المصحيك لي حسه شنو،، قاعد تدرس ولا بتدرس ولا فرق وقت زينا،، تحياتي وحقو تنوم بعد كده لأنو أضرار السهر كتيره واسأل مجرب وما تسال طبيب

  20. يا جماعه تصبحوا علي خير

  21. جاء في الأخبار
    أنحت وزارة الخارجية باللائمة على وزارة المالية؛ لتجاهلها خطاباً رسمياً سبق أن أودعته المالية منذ فترة ليست بالقصيرة يتعلق بسداد فاتورة اشتراك السودان في الأمم المتحدة ما أدى إلى حرمانه من التصويت.
    أخيراً عرفنا مين طفا النور
    بالله عليكم ناس وزارة المالية ديل مش إتلومو

    1. هههههههههههههههه,,,لوم التابا عاد ,,,
      اسه فى داعى لى طفى النور هى قصدى نشر الغسيل الوسخان دا ؟؟
      مججججج , تبيتهم بالله ,,,

  22. […]                                                                                     Byالفاتحجبرا on 28 يناير 2013   منشور هنا https://alfatihgabra.wordpress.com/2013/01/28/%D8%AF%D9%8A-%D8%B4%D8%BA%D9%84%D8%A7%D9%86%D8%A9%D8%9F… […]

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: