وأدوها سوط

في ظل إنعدام وندرة أدوية القلب والضغط والسكري (التي يتعاطها) العبد لله فإنه يحرص كثيرا على عدم سماع الأخبار حتى لا يستمع إلى أحد التصريحات (من اياها) التي يطلقها بعض المسئولين والتي من الممكن أن تنقله إلى الرفيق الأعلى (ذي الترتيب) !
إلا أن الحذر لا يمنع القدر (كما يقولون) إذ أن العبدلله وأثناء تجواله في (النت) وجد تصريحاً للدكنور كرار التهامي الأمين العام لجهاز تنظيم شئون السودانيين العاملين بالخارج يقول فيه إن أن العام الماضي شهد حصول أكثر من 66 ألف علي عقود عمل وأضاف (الدكتور قائلاً) يجب أن نشجع الهجرة ونحول الكم إلي نوع نافع و(كما أضاف سيادته قائلاً) أمامنا تحدي كبير في تحويل هجرة الكفاءات العلمية والخبرات الوطنية إلي هجرة نافعة ومنظمة وأشار إلي عدم ترابط المؤسسات ذات الصلة بالهجرة لتكون هجرة منظمة !
بالله عليكم شوفو جنس الكلام ده ؟ يعني الدولة مش بتشجع الهجرةو وبس كمان عاوزاها تكون خبرة نوعية .. خبراء وعلماء وأساتذة جامعات .. طيب الخرتمية (جامعة) الفتحتوها دي والمعاهد والمؤسسات التعليمية والتأهيلية دي ح تجيبوا ليها كوادر من وين؟ و التمنية (الفالقننا بيها دي) ح تحصل كيف؟ بعد مراكز البحوث تعدم نفاخ النار ؟
ثم بعدين .. هي الدولة دي ما بتشبع؟ ملايين المغتربين ليهم عشرات السنين قاعدين (يوردوا) مليارات الدولارات .. القروش دي كوووولها ما كفاية؟ عشان كمان عاوزين (العلماء يهاجرو) عشان يزيدوها !!
هل يعي السيد الأمين العام لجهاز تنظيم شئون السودانيين العاملين بالخارج خطورة ما يقول وما يفعل ؟ هل يدري ما سوف يصيب هذه البلاد (المسكينة وصابره) من عجز بسبب هجرة هؤلاء العلماء والخبراء ..؟ كيف ترتفع وتيرة التطور الإقتصادي والإجتماعي في بلاد يهاجر علماؤها وما هو المردود الذي سوف يعود على البلاد لقاء ما أنفقته على تعليم وتدريب وتأهيل هؤلاء العلماء !
من سوف يقوم بتدريب وتأهيل الكوادر االازمة التي يفترض ان تسهم في بناء هذا البلد المنكوب ومن سوف يقوم بإعدادهم ..
ثم ألا ترون ما آل إليه حال التعليم الجامعي والدفعات التي تم تخريجها في هذا العهد المأمون وما هي عليه من تأهيل متدني ؟
ألا يعني تشجيعكم لهجرة هذه العقول مزيداً من الإنخفاض والتدني في المستويات التعليمية عندما تتناقص أعداد المؤهلين وذوي الخبرات من أعضاء الهيئة التدريسية نتيجة تناقص عدد المؤهلين منهم بالنسبة لعدد الطلاب في الجامعات والمعاهد والمؤسسات التعليمية ؟
إلا يعني تشجيع هؤلاء العلماء على الهجرة تشجيعاً على قفل مراكز الأبحاث العلمية (بالضبة والمفتاح) في بلد يحتاج إلى الكثير من الجهد حتي يتقدم فكرياً ويتطور علمياً ؟ (إنتو قايلننا اليابان؟)
هم ديل شويتين الناس الإتخرجو من الجامعات (لمن كانت جامعات) خلوهم ياااااخ هو غيرهم في ناس مؤهلين؟
(الحتة الجاية دي من تصريح السيد الأمين العام عاوزة ليها زول شديد وما عيان) .. يقول السيد الأمين العام لا فض فوه : (أمامنا تحدي كبير في تحويل هجرة الكفاءات العلمية والخبرات الوطنية إلي هجرة نافعة ومنظمة) :
ده عزيزي القارئ التحدي الذي يواجه (الدكتور) وحكومته .. أن يحول هجرة الكفاءآت العلمية والخبرات الوطنية إلى هجرة نافعة .. (يا ولد ناولني الحبوب) ..
يا أخي الدكتور هل سألت نفسك وأنت تدلي بهذه التصريحات (التي تفقع المرارة) ما هي الآثار السلبية على واقع التنمية في البلاد وأنتم تشجعون هجرة هذه العقول؟ وعن ضياع الجهود والطاقات الإنتاجية والعلمية لهذه الكفاءات التي تصب في شرايين هذا البلد الذي تكلست شرايينه؟ وإحتياجه لهذه العقول في مجالات الاقتصاد والتعليم والصحة والتخطيط والبحث العلمي و التقانة…الخ.
لقد كنا نعتقد ايها (الدكتور) و(حكومتك) أن التحدي الكبير الذي يواجهكما هو كيف انكما سوف تستطيعان توفير البيئة الملائمة لهولاء العلماء كي ما يقومون بالنهوض بهذا البلد (الصابر المحتسب) ولكن يا عزيزي لا عليك .. خموا خمكم .. أصلو القصة (عايره وأدوها سوط)
كسرة :
بالله آخر زول يطلع من البلد دي يقفل الباب كويس ويسلم المفتاخ لسيد الدكان

كسرة ثابتة :
أخبار ملف خط هيثرو العند النائب العام شنو(وووو وووو وووو)+(ووو) !
كسرة بايخة :
لا تنسوا أن تحتفلوا بالواو الجديدة أيها الشعب الفضل !! بختكم (ح تحتفلوا كتير) في ظل هذا الفساد (المرير) والجلد (التخين) !!

38 تعليق

    1. فضل واحده من البرنجيات

      1. انت في فضلت واحده ولآ فضلت انت براااكا ..
        هاك المفتاح انا ماشي ..

      2. هههههههههههههههههه وتاني ههههههههه

      3. ناس حجار وصيناهم يعملوا بالبرنجي 20 حبة وانا وراك وراك

      4. فضل واحدة من البرنجيات بس عارف اخر واحد راح يفضل من الشعب الفضل اقترحوا اسماء

    2. يا حبة باقى آآآخر حبة فى العلبة,, المفروض بعد دة تروق فى علبك و تدى فيها نفس معاك.. ما سمعتا بالمثل: (البيبرنج) براو بيخنق!!!

  1. بسسسسسسسسسسم الله !
    مش كان في تعليقات ولا انا شفتها وين ولا كنت بحلم ولا
    هو ده زاتو ما انا ؟
    تاني نخلي ردودنا بالنية ولا نعمل كود للردود يعني
    المندهش يقول 89 يقوم شمباتي يقول هههههه 30/6

    1. برنجييييييييييييييييييية
      89
      جنوبي
      يازول تعليقات شنو ؟ قول بسم الله أمش إتبخر ليك بي قرض

      1. هههههههههههههههههههه,,ذكرتنى المساطيل وكود النكات !
        طااااااااااااااااااخ

    2. مالك مكتر علينا المغص آآآآآآلمندهش برضه تسعة وثمانين دي حارة تسعه وثمانين بقيت اكره الرقم الفيهو تسعه وثمانية

    1. احسن الريدة تجي متأخرة والا ما تجي كلو كلو

  2. يا جماعة
    وبعدين !!!!!!
    عبيد أفتح لي الباب أنا برضو ماشي

    1. عبيد اداهم المفتاح من سنه 97

    2. انا لمن جيت ادى المفتاح لسيد الدكان,, لقيتو هو زااااتو ادى مفتاحو للغسال !!!

      1. ياخ المفتاح عند النجار والنجار عاوز فلوس والفلوس عن الامير والامير عاوز عروس والشعب دا ما لو نام كده ياااااااااااااه كتمت يلا يا محمد احمد

    3. انا غلطت ورجعت بس لو لقيت لي فرضه ثاني بس سفر البن

    4. اريد ان اتخيل بعد الشعب الفضل كله يتخارج هم راح يعملوا ايه

  3. في اجتماع رسمي وبحضور خبراء أجانب ذكر السيد الوكيل (هجرة الكوادر بالنسبة لينا كويسة، خليهم يمشوا ودي فرصة يفتحوا لينا وظائف عشان نعين فبها، نحن الجامعات بتخرج لينا 3 ألف سنويا)، بالله شوف المنطق!!!
    عشان كده ما تستغرب يا الفاتح،
    كل العالم يتكلم عن هجرة العقول ونحن نعاين تحت كرعينا ودايرين وظائف للخريجين الجداد!!!!

    1. لسه عندنا خبرا اجانب يكون برضه من الصين

  4. انتو دكنور كرار التهامي دا ما ياهو بتاع نادى الهلال ( طيييييييييييييييييييب )

  5. برنجيييييييييييييية
    هييييييييييييييييييي

    1. حقوق الانسان ..
      هييييييييييي

  6. هذا هو منهجهم منذ 89 والى اخر يوم لهم المنهج يفضى الى افراغ البلد من اى شخص متعلم او غير متعلم هم بامكانهم اعاده الموالين لهم باشاره واحده ومنحهم الحوافز المغريه غير الموالين الباب يفوت جمل …حافظ على صحتك يا بروف

    1. والغربية مش عاوزين يحلفوا القسم يكاد المريب يقول خذوني

  7. يعني انتو دايرين الحكومة دي بس تقعد كده بي صمة
    خشما ! لا يكون عندها انجاز بي توفير 66 الف فرصة
    عمل داخليا ولااااا حتي خارجياً ! اجي يا اولاد امي .
    هي زاتا العقول والكفاءات دي غير تفتح عقول الناس
    وتجيب للحكومة الضغط الحكومة ما لاقيه منهم شئ ..
    .
    .
    .
    يعني ما وريتونا الحصل امبارح ده بي فعل فاعل ولآ
    قضاء وقدر ..؟

    1. هي قاعدة بي صمة خشما ما تراها لي هسع ما شبعت

  8. قبل فترة مشيت المركز الطبي الحديث وقلت بالمرة اسلم علي صديقي وزميل الدراسة البروف ……. اطفال وعندما سالت السكرتير نطط عيونو زي المخلوع وقال لي يا حليلو جاهو عقد بـــ60 ستيييييييييييييييييييين الف ريال سعودي العشرة الف تنطح العشرة وشقة وطبعا الاولاد في المدارس وعييييييييييك .. الزول دا كان بدرس في اكتر من جامعة …زي ناس جبرا ديل…..اها الفضل منو احنا ذاتنا ناس قرايتي راحت ديل مرقنا ..
    والغريبة لسه بحرقو في الجامعات ……….اللهههههههههههههههههههههههه ….ناولني يا مرة الحبوب
    لكن هم عايزين كدا لانو ود جيرانا الما عندو شهادة سودانية والله هسه يحمل شهادة الدكتوراة وبقي خبير وطني في الملكية الفكرية — والمدهش انو مالي الجرايد والقنوات بكل قوة عين …. بعد يومين تلقاهو بقي استاذ مشارك …دا لو ما بقي دي الوقت.
    يا اخونا الحكومة عايزة كدا … يا كوادر انتو اطلعو منها خلو لينا الرجرجة ديل نطبق فيهم نظريات العواسة والسطورة والدفاع بالنظر
    لك الله يا وطني
    اللهم ارحنا منهم يا رب
    اميييييييييييييييييييييييييييييين

  9. عن ” حريات ” عن مصطفي عثمان اسماعيل ( رخي الله جضمه )
    قال : ان الحكومة السودانية انتهت من مشروع قانون
    جديد للاستثمار يمنح مزيدا من الحوافز والضمانات
    للمستثمرين الاجانب ويعالج مشكلة تمليك الاراضي
    السودانية وان القانون يحمي المستثمر من مقاضاة أي
    مواطن سوداني او الطعن في عدم احقية المستثمر في
    الارض او الترخيص حيث جنّب المستثمر الدخول في هذه
    النزاعات لتكون الدولة نفسها هي الخصم امام المواطن
    وتلتزم الدولة بدفع التعويضات او التغريم في حالة
    الحكم ضدها ”
    انتهي
    حلوة في حالة الحكم ضدها دي .. مُش ؟
    لا وفي حاجة تانية انو القانون لا يفرق بين المستثمر
    الاجنبي والمستثمر المحلي !!
    يعني تفضي واطاتك للمستثمر وتشيل ورقك وتمشي تشتكي
    مااا تشتكي للدولة.. تشتكي الدولة !!

    1. يعنى معناها انزل الملم لى كم الف دولار و اخش على ناس الاستثمار بأنى مستثمر و اقعد ابرطع فى اراضى خلق الناس كدة و الا شنو؟؟ ما تفهمونا يا ناس!!! و الله فعلا كتمت يا الغلبان

      1. بس لازم تعمل مستثمر اجنبي (صيني ان شاء الله)

    2. هاك الاستثمار دا فيه مستثمر اجنبي (مصري) باربعة الآف دولار لا غير في كورنيش ديم كلاب بورسودان وقتها كان معي 150 الف دولار ولا استثمرت ولا شئ هع كع كرع لانه انت يا مواطن ما في ليك تشمو قدحه اها بنكوس في المخارجة ثااااااااااني

  10. زمان لمن كانوا بيزوروا المغتربين فى بلاد المهجر بيقولوا ليهم ربنا يرد غربتكم سالمين و غانمين,,, هسة بيقولوا ليهم نتمنى لكم طيب الاقامة و نريدكم ان تكونوا خير سفراء لبلدكم السودان … تابعوا بث حفلة ختام احتفالات اعياد (الاستغلال) من دبى حيث اتحف سيادته الحضور و (براهم) بجنس الكلام دة !!!

  11. اااااااه كتمت كتمت كتمت

  12. عايرة وادوها سوط لا جفلت لا فنجطط

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: