من الخرطوم سلام

القارئ العزيز .. تجدني أتقدم إليك بالإعتذار بداية لتوقفي الأخير عن الكتابة وكنت قد وجدتها فرصة لأخذ قليل من الراحة وأنا أقوم بالإنتقال إلى دار جديدة قديمة هي صحيفة الخرطوم .
في أحد ايام مثل هذا الشهر (فبراير) من العام 1996م بعثت بمقال لصحيفة الخرطوم عبارة عن (سيناريو) بعنوان (الماحي يمزق الفاتورة) وقد كانت حينها (حكاية) تمزيق الفواتير (موضه) لدي المسؤولين فما أن يعتلي حينها مسؤول المنبر خطيباً حتي ترد على لسانه حكاية (سوف نمزق فاتورة الشنو ما عارف) !
كان المقال (السيناريو) يتحدث عن (عم الماحي) ذلك المواطن البسيط الذي أرهقته فاتورة الكهرباء (حالتو مكانش في جمرة ) وقد إحتشد المقال بالمواقف الطريفة والتجارب العديدة التي إهتدي لها (عم الماحي) دون جدوي حتي وصل به الأمر إلى مرحلة تخيير الضيوف قائلاً :
– يا جماعة أجيب ليكم شاي وللا أفتح ليكم النور !!
حضر (عصام) نسيب ( الماحي) المغترب في إجازته السنوية فقام بزيارة شقيقتة ( زوجة الماحي) حيث أشتكت له شقيقته عن الحالة المتأخرة التي وصل إليها (الماحي) فأخبرها بأنه يملك الحل وأخذ يشرح لها كيف ان (الخواجات) قد أفلحوا في إنتاج الكهرباء من أشعة الشمس وانه سوف يقوم فور عودته (للرياض) بإرسال عدد من (الخلايا الشمسية) حتي يستريح (الماحي) ويمزق فاتورة الكهرباء .
تم إستلام الخلايا بعد تخليصها من الجمارك وقام المهندسون بتثبيتها ثم بطلب من عم الماحي قام المهندسون بفصل (العداد) وتسليمه له وقد كان لحظتها منتشيا وفرحا وهو يضع رجله على العداد ( الكاضم) – ككابتن يضع رجله على الكفر – وهو يخاطب المهندس الطالع في (رأس البيت)
– أيوه ده الكلام بعد ده ( كهربت) الحكومة .. ما دايرنا عندنا كهربت ( الله)
فردد الأطفال الواقفون يتابعون الموقف ويشاهدون في حب استطلاع تثبيت الخلايا :
– كل شيء لله . كل شيء لله
مما جعل ( الماحي) يرقص طرباً نشواناً يخاطب الأطفال في حالة ( انعتاق كهربي ) منقطع النظير وهو يشير للمبة :
– اللمبة دي ( ويردد الأطفال خلفه):
– لله
– ثم يتلفت نحو سلك العداد المرمي ويشير إليه قائلاً:
– السلك دا. ( ويجيبه الأطفال)
– لله
– عدادنا دا..
– لله
الأطفال و ( الماحي) في صوت كورالى جماعي
– كل شيء لله،،، كل شيء لله
مر ذلك الشهر و ( الماحي) في نعيم تام وذات يوم مشمس تلقى فيه الشمس بأشعتها الكهربية الحالمة على ( رأس بيت) حاج ( الماحي) دق باب الشارع:
– أيوه مين؟
– العداد .. – عداد الهيئة القومية للكهرباء يا حاج
وفتح حاج ( الماحي) الباب في دهشة عصبية كهربية عارمة قائلاً :
– وأنحنا مالنا ومال الهيئة القومية للكهرباء ؟؟
– كيف يا حاج أنحنا عاوزين نقرأ العداد عشان بعدين نجيب ليكم الفاتورة
– لكن يا ولدي كهربتنا دي ما كهربت الحكومة دي كهربت الله ساكت.
– نحن عارفين أنت قايل الحكومة دي بتاعت منو ؟؟؟

عزيزي القارئ إذا قابلت رجلاً رث الثياب أشعث أغبر هائماً على وجهه في الطرقات وهو يغني تارة (شمعتي الضواية ) وتارة يهتف مجهشاً بالبكاء ( كل شيء لله) فأعلم أنه (الماحي) !

هذا ملخص لذلك المقال (السيناريو) الذي لم أكن أتوقع له رواجاً لولا إتصال إدارة الصحيفة وإبلاغي بأن الباب مفتوحاً لي للكتابة على صفحاتها وقد كانت بدايتي مع الكتابة الراتبة في صفحة كاملة بعنوان (مساحات حرة) إستمرت طيلة وجود الصحيفة بالقاهرة ثم تغير المقال إلى إسم (شبابيك) بعد عودة الصحيفة (للبلاد) .
ثم إنتقلت إلى صحيفة السوداني وتغير المقال إلى (سيناريوهات) تنشر في يوم الجمعة من كل أسبوع مع (شوية إستراحات) بالأخيرة هذه الإستراحات التي تمت تسميتها (ساخر سبيل) عند إلتحاقي بصحيفة الرأي العام التي مكثت بها سبعة أعوام بالتمام والكمال قبل أن يتصل بي إلإخوة في صحيفة الخرطوم (في فبراير برضو) عارضين على الكتابة فيها فكان ردي :
– العرجا لي مراحا !!

تجد السيناريو كاملاً هنا http://www.aburaqa.com/forum/showthread.php?t=2327

كسرة :
أستميحكم عذراً سادتي القراء في إصطحاب الكسرة الثابتة معى وإنتقالها من (الرأي العام) إلى (الخرطوم) والنشوف آخرتا !

كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو) ؟

28 تعليق

  1. كباية قهوة كااااربة …لا للتدخين !!!!

  2. حمدا لله على السلامة للبروف العزيز ومبروك الاطلالة الجديدة القديمة عبر الخرطوم

  3. ﺃﺧﺒﺎﺭ ﻣﻠﻒ ﺧﻂ ﻫﻴﺜﺮﻭ ﺍﻟﻌﻨﺪ ﺍﻟﻨﺎﺋﺐ ﺍﻟﻌﺎﻡ ﺷﻨﻮ

  4. البروف العزيز
    تحية وإحتراما وعوداً حميداً بعد الإجازة وطبعاً كانت برضو هي لله هي لله

  5. رجعنالكم،
    تتمني لك التوفيق في جريدتك الجديده السابقه

  6. عليك الله كلم ناس الحيكومه خليهم يشرطو فاتوره العرس عشان عايزن نعرس والله وما لاقيين طريقه عليك الله

  7. الف مبروك الموقع الجديد واتمنى لك التوفيق فى الخرطوم ومواصلة ابداعاتك
    لى رجاء هام كلم ناس الخرطوم ديل قل لهم نتائج امتحانات الاساس على الابواب
    رجاءا لا يكتبوا كلمة (النابغه) للطلاب الناجحين لانها بترفع الضغط يشوفوا اى كلمه اخرى
    غير (النابغه)

  8. عليك الله كلم ناس الحيكومه خليهم يشرطو فاتوره العرس عشان عايزن نعرس والله وما لاقيين طريقه عليك الله
    اقل حاجه يعملوها لينا حاجات العرس مايفرضو عليها اي رسموم خلونا ننعرس ياخي

  9. البروف العزيز ,, لك جل التحايا و اطيبها منا جميعا متمنين لك دوام النجاح و التوفيق ,, و ان تتواصل ابداعاتك فى الخرطوم كما كانت فى الرأى العام و السودانى و فى أى موقع آخر …

  10. عوداً حميداً وربنا يديك الصحة و العافية :: ومذيد من النجاح و الابداع المتواصل

  11. النائب الملت ده حقو تفك شوطو دحين خمسين سنه تاني برضك زول بعبدك مافي كدى شوف لينا قصه البتاع الباقي بي سبع الف جنيه ده حدها واين دى قصه لازم تكتب عنها والله يقطي عليك من ناس هناي ديك

  12. تصحيح. المات بعبرك واسف لسرعه الكتابه والاخطاء الوارده اعلاه

  13. كل شئ لله فى سبيل الله ,,,
    صفحتنا دى ,, مالها !!؟
    حمدالله على السلامة يابروف …

  14. اعتقد ملف هيثرو ده عاوز ليه مؤتمر دولي لمناقشته ، لانو النائب العام مش نايم ده جلدو ميت عديل ، معقولة ولا حتى تصريح طيلة هذه المدة ،، ممكن الراجل المعاه الملف فى إجازة مفتوحة وقافل عليه الدولاب ولمن يرجع يبقى النائب العام يشوف الحاصل شنو

    1. النايم منو النائب العام والا الموظف والا الدولاب

      1. يالغلبان ما تكتم علشان تخليك صاحي معانا شوية

  15. الاخ جبرا والاخوه الاعزاء
    نتمنى لك التوفيق فى اي موقع
    عايزه اقول ليك حاجه يابروف لو فى طريقه تواصل قصة الماحي طبعا هو جنى لكن مرته مسكت البيت وراهو عايزاك تجنن المرا واولاده بعد لمو ليهم المويه مع الكهربا والنفايات فى الطريق وبى كده تكون بديت مع ناس الخرطوم نفس البدايه الاولى
    كسره
    مازال مسلسل الملاريا والالتهابات مستمر كملنا العسل والقرض والخل والحمدلله على كل حال (الحكومه والامراض ما فضلت فينا فرقه)

    1. مرض الحيكومة ما بداوه دواهو البتر زمان اشراقه سوتها في النميري الان اشراقات ولا حيات لمن تنادي كتمت

  16. بت وراق…
    حمدالله على السلامة وبركة بالطلة ….

  17. الف حمدا للله على السلامة وانت فعلا ساخر سبيل هل ممكن تنشر لى مقالات على اسم عمودك دده من بلاد الغربة

  18. سير سير الجماعة الفوق قايلنها للبشير هع كرع لا والله المقصود البروف العزيز شفاه الله من مرض الحيكومة واكان هنا معانا في القمردينه اليوصفولي انا كمان دوا بس ما يكون فتيل الصبر لاني كملته

  19. اهم حاجة هي الكسرة و انا بقرا المقتل همي تكون الكسرة ما طارت و اختفت عند النائب العام

  20. وااله يا بروف نحن وراك وراك

  21. والله يا بروف نحن وراك وراك

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: