دي السرقة وللا بلاش

نفسي اعرف) .. مقولة يطلقها أهلنا وحبايبنا في شمال الوادي كلما تعذرت عليهم المعرفة وإنعدمت أمامهم (الإجابات) والعبدلله يجد اليوم نفسه يردد ذات المقولة (نفسي اعرف) والسؤال العاوز أعرف إجابتو هو : (من أين أتي هؤلاء) الخواجات الكفار بكل هذه الشفافية ومحاسبة النفس والضمير المتيقظ ؟ ففي كل يوم تحمل لنا الأخبار إستقالة لمسئول (خواجة طبعن) يقوم بتقديم إستقالته فقط لأجل (إتهام) يمس شخصه تتقاصر معه (جلطات) مسؤولينا الـ (بالثابتة) !!
في الأسبوع قبل الماضي إستقالت وزيرة التربية الألمانية، أنيت شوافان، من منصبها ليست لأنها (جنبت قروش الوزارة) وفتحت بها حساباً شخصياً في أحد البنوك .. وليس لأنها أشرفت على بناء عمارات سرعان ما خرت (ساجدة) لخالقها ولا لأنها قامت (في شكل تعاون) بتشغيل زوجها مديراً لمكتبها ولا لأنها سرقت من منزلها ملايين من العملات الصعبة (خليك من الساهلة) ولا لأنها قد قامت بإنشاء شركات يإسمها تتاجر في كل شئ بينما الدستوروالقانون الألماني (طبعن) يمنع ذلك !
هذه الوزيرة (الملحدة) يا سادتي الأماجد فعلت ما هو أبعد من ذلك بكثير إذ تجردت من كل إنسانيتها وتناست في لحظة ضعف أنها لا لدنيا قد عملت فقامت بتسبيب الأذي لغالبية مواطني الشعب الالماني (الفضل) وذلك بنقلها لمادة علمية ونسبتها إلى نفسها دون الإشارة لمصدرها وذلك في أطروحتها لنيل درجة الدكتوراة من جامعة (هينريك هين في دوسولدوف) والتي نالتها قبل نحو ثلاثين عاماً !
والله خواجية (حرامية) وعينك قوية تسرقي ليكي كم صفحة وتنسبيهم لي روحك؟ إنتي ما عارفة السرقة حرام و(القبر قدام)؟ أها بعدين موقفك شنو يوم القيامة وإنتي شايلة (العمارتين) أقصد (الصفحتين) ديل فوق ضهرك؟
أيه الفساد وعدم الضمير ده ؟ ألا تعلمين أنك بفعلتك الشنعاء هذي قد أضريتي بالبلاد شر ضرر وأنك بذلك قد أسهمتي في زيادة نسبة التضخم وإرتفاع سعر الدولار مقابل (الشنو ما عارف) مما يؤثر على مستوى الإنتاج والاستهلاك الشئ الذي من شأنه أن يعيق التنمية الاقتصادية مما يؤثر على مستوى رفاهية الفرد (الألماني) المسحوق؟
ثم ألا ترين انك بفعلتك هذه قد أوصدتي أبواب الإستثمار (بالضبة والمفتاح) مما يضر مصلحة البلاد العليا والسفلي وما بينهما ؟ يعني هسي منو ح يجي يستثمر ليهو في بلد الوزير فيهو بيسرق ليهو (صفحتين)؟
ثم بعدين الشلاقة والتسرع ليكي شنو؟ ما تخلي (نوام الشعب الألماني) يعملو للموضوع (طلب إحاطة) و(إستجواب) وشنو ما بعرف .. ويقوم البرلمان (الألماني طبعن) بمناقشتها وعمل لجان تحقيق وبعدين يحولوها للنائب العام (الألماني طبعن) و (تحتل ليها هناك كم سنة) لحدت ما (كاتب صحفي) في صخيفة (الفرانكفورتر الألمانية) يعمل ليها (كسرة ثابتة) ويقول فيها :
– (أخبار ملف سرقة الوزيرة للصفحتين العند النائب العام حصل فيهو شنوووو) !

كسرة:
قال أيه صفحتين … دي السرقة وللا بلاش !!

كسرة ثابتة :
أخبار ملف خط هيثرو العند النائب العام شنو(وووو وووو وووو)+(وو)؟

39 تعليق

  1. كبايه قهوه مع الصباح

    1. شايفك خليت البرنجى !! دة يعنى بعد ما كملت العلبة ام 10 حبات ديك و الا شنو؟؟ و بعدين القهوة سمحة فى الفنجان يا صاحبى مش فى الكباية !!!

      1. اخي فلادمير العبيد بشرب القهوة بالكباية يا ربي الحاجات الثانية بشربها بي شنو عن الكتمة لو لا القمردينة وبكتبها كلما تيسر (حلوة تيسر دي لانها بتاعت الجماعة) كان بم حصلت فوقي انا ولحقت امات طه

      2. هاها كلامك صح يا فلاديمير فنجان قهوه هههههه ها دي فاتت علي

  2. عماره عمارتين،حجه حجتين،وقف وقفتين،زوجه زوجتين، خط هيثرو هيثروين وكلها لله

  3. برنجية ولا حاجه تانية يا استاذ

    1. برنجي ثاني مافي يا خالد الحاج انت ما شايف الهباب اللي انحنا فيه ده حد ليهو نفس يتكيف حتى العبيد مفروض ميشربش قهوة رايك شنو

      1. خليك عاقل يا الغلبان بلاش العنصرية دى
        ديل لازم تشرب برنجية وقهوه وشنو ما عارف علشان تنسي وتقدر تعيش معاهم

  4. هكذا السرقة ولا بلاش (انت كدا يا استاذ بتاساعد المسئولين عندنا في السرقة والنهب ) ليه تجيب ليهم شمارات طرق اللقف واللهف
    تستحق محاكمة علنية

  5. طبعا دي عندنا اسمها كسرة يا ابو علي

  6. لا لدنيا قد عملنا ( دنيا طلعت تعني الحاجات البسيطة بسيطة!! دي ما بشتغلوا بيها!!! يعني من خط هيثرو ولي فوق)

    1. يعني عاملين في العلالي اخي صبري كله فوق اسمنت فوق خطوط فوق تحت ديل نحنا يا با ويا ريت لو خلونا تحت وبالجزمة (وعلى قول اولاد بمبه بالصرمه القديمة)

  7. الخبر الجديد انو اتضح انو الوزير(ة) عنها جامعة وكم مستشفي كدة ومع ذلك بتدعي انو عتندها وقت للوزارة وكدة عشان العمل في الوزارة مقدس و رسالي ( ارسال مستشفيات الكادحين الا الاطراف عشان حركة المرور وكدة

  8. البروف العزيز
    طبعاً لابد من الإستقالة والخروج ولدينا تجربة يجب ان تدرس في جميع دول العالم
    الشعب كله قدم استقالته من دولته وخرج و باقي الشعب الفضل في مرحلة التسليم والتسلم لعهدته
    كسرة غير ثابتة
    أن يقدم الشعب إستقالته ويسافر خير من أن يقدم الوزراء إستقالاتهم لأن الشعب أخف دماً ومادياً ومعنوياً
    ولا رايكم شنو ؟؟

    1. بس المهم ما يعاكسونا و يعذبونا فى المخارجة بعد الاستقالة,, يعنى ببساطة كدة ممكن يجيك واحد و يقول ليك يا زول عهدنك دى ناقصة, يا تدفع قيمتها (وهى الرسوم والجبايات و الاتاوات و الهمبتات) و الا تقعد معانا هنا,, و طبعا الواحد فينا ممكن يبيع كل العندو و الماعندو عشان يتفكفك من حوش المك دة !!!

      1. المعاكسه حاصله يا فلادمير حاصلة والله وعن قريب نكون في كاودا ونجيهم نشيلهم زنديه كتمت كتمت كتمت

  9. فكرة حلوة بتاعت الاستقالات دي ، بس الخوف من انها تترفض لمزيد من التعذيب والمعاناة للشعب ، ما ده العذاب زااااااتو
    بالأمس قرأت خبر إن وزارة التعليم العام تقول أن التغول على التعليم من غير المؤهلين ، وزي ما قال الناس من الوصل التعليم للمرحلة دي مش انتي ياوزارة ومنو بسياساتو المامعروف جايبها من وين طفش المدرسين المؤهلين والتربويين من هذه المهنة العظيمة مش انتي ياوزارة والله مفروض الوزير ده يخلوه يمر على مدارس البلد كلها ويقيف الطلبة صف وكل واحد يديه كف .. من العملو فى التعليم والمدارس .. وتحويل التعليم إلى شركات من أجل الربح المادي بعيدة عن المحتوى التربوي .. واحسن حاجة يقفلوا الوزارة ويحولوا كل مهامها إلى غرفة التجارة أو وزارة المالية أو ديوان الزكاة والضرائب ، بزنس ولا بلاش

    1. ابو غسان….. تحياتي …
      قلت شنو ؟ تترفض !! كيف يعني ؟
      وزارة الداخلية قالت بتعمل 3000 ( أي نعم والله ) ثلاثة آلاف تأشيرة خروج لغرض العمل ( يومياً )
      دا اسمو التحريض على الإستقالات الجماعية

      1. مش دكتور كرار التهامى قال انو بتواجهنا مشكلة فى تصدير الكفاءات للخارج؟؟ يعنى عاوزين يصدروا الكفاءات بالاول, و بعدين نشوف ناس قريعتى راحت… و العدد بكرة حيكون 6000 و 9000 تأشيرة كمان ,, كان الله فى العون …

  10. يابروف سمعت امبارح انو تمت إحالة كم ملف فساد إلى النائب العام ،، طيب ما يسألهو أول حاجة عن الملفات السابقة والتي من ضمنها ملفك بتاع الكسرة الثابتة حصل فيه شنو ،، هم ما عارفين الراجل مشغول قدر شنو والدليل ما فاضي للملفات القديمة يعني الكوم زيدوا ردوم وخلاص ،، ويشيلو الوزير ويجي واحد جديد أول تصريح يقول ليك الوزارة السابقة تركت لنا تركة مثقلة بالملفات المعارفين الحاصل فيها شنو … أنا غايتو شايف النائب العام ده من شدة الكسل بتاعو حا يؤكد وخاصة انه فى مستوى المسئول الرسمي انو السودانيين كسالى واحسن ليه يشوف ليه صرفه فى الملف إن شاء الله يصدر أمر بأن لا وجه لاقامة دعوى قضائية يعني هي الحاجات الاتسرقت وراحت شوية مقارنة بهذا الخط دي سرقوا أحلام الشباب والأطفال.. عندي سؤال هل الخط ده مدفوع ولا بفاتورة .. كتمت كتمت كتمت

    1. حبيبي دي اسمها احالة الى الارشيف عمرك ما سمعت بيها كتمت كتمت كتمت

      1. الغلبان,, من قبيل قاعد اقرأ فى التعليقات و بعاين لى كتمتك دى لامن قلتا ياربى الزول دة خلى الكتمان و الا شنو؟؟ لكن الحمد لله لقيتك بعافية و لسة بتكتم ,,, عقبال (البم) ان شاء الله , قول امييين

  11. له الله وطنى الجريح ,,,,

    1. يا دكتور مرحلة جريح دى زمااان انتهينا منها الان فى غرفة الانعاش وانت ادرى بغرفة الانعاش يارب سلم

      1. اخي عباس غرفة الانعاش شنو انت الثاني المشرحه الثلاجة اقول ليك من الاخر احمد شرفي ياااااااااااااااخ

  12. المقصه التشق يقول ليك لواء ديك تور مهندس اها ده سرق كم مجلد

    1. لكن يا ابراهيم لواء ديك تور مهندس يسرق ما يسرقش مش مهم دا جااااااااااي من فوووووووووووق بس تحت شوية من الملايكه لا تكفرونا كمان هع كرع كع

  13. الشعب الفضل مقدم الاستقالات الجماعية لكن هل يا ترى تاركينه في حاله جبايات جبايات علشان يتخارج كان التاشيره الجاياه من بره جايه من بيوتهم خلوها على الله والغرقان يتمسك بمخارجة

    1. عندى واحد جاري في الحله شغال في قطر قلت ليهو رسلى فيزا ولا عقد عمل ان نتخارج من البلد دى قال لى خليك قاعد كلها ناشفه قام جاء اجازه من المطار جيب وهاك يا دفع جانى وقال نتخارج سواء ان شاء الله الصومال والله تانى ما بجى الا الجماعه يتخارجوا

      1. قطر وخمسة الآف فرصه ضائعه كل فرصه بتفتح ثلاثه بيوت ياااااااااااااااااااا وزيرة العمل واه يا وطن يدار

  14. انتو عندكم وقت قدر ده تتابعوا اللي بيسرقوا ؟؟ و الله انتو مرتاحين عديييييييييييييييييييييييييييييييل كده … انتو قاعدين وين ؟؟ في السودان ؟؟ و شايفكم بتفتحوا النت طواااااااالي .. شكلكم كده انتو ذاتكم خامنها …هييييييييييييييع

    1. هو اللي بيتسرق يا تنقو عاوز متابعه اطلع من بيتكم يبدأ بك الكمساري وبعدها عد وعد وعد واول فرصه تدخل النت اكتب واكتب واكتب وكتمت وكتمت وكتمت

  15. تعرفوا يا شباب كنت في ليبيا سنة 1992 اول ما وصلت مطار طرابلس اخدنا لينا تاكسي نحن مجموعه .. بس ركبنا كده سواق التاكسي قال حاسبوني .. لسع ما اتحرك .. يازول قول بسم الله يمكن ما نصل زاتو…. قال لا لا ما في ضمان يمكن ما تتدوني قروشي ؟؟ قلنا ليه يا زول ما عندك ثقه للدرجه دي ؟؟ معقوله بس . قال و الله الثقه في محمد بس و محمد مااات
    اسع كمان انتو عاملين فيها طاهرين و غيركم حراميه . تلقاكم انتو زاتكم لاغفين … و الله بقت ثقه مافي الثقه في الرسول و الرسول ماااااااات
    بطلوا حركات و الله انا حالف تاني ما اطلع مظاهرات مع أو ضد …. بس كده اللي بجي مرحب بيه و حسبنا الله و نعم الوكيل

    1. كنك يا راجل عالم جبانات وحليل القرشي شهيدنا الاول

    2. ولكن يا عمك دي اسمها اسكت امشي واليد. يعني تسكت وتلبد وتمشي ودي بيصراحه صرااحه اسمها خواف الاسم رايح مني يا عمك تنقو ودي كانت من اقوال واحد في الاقرونوميا لصالح جعفر يا لمعاويه قرشي

      1. يا عمك تنقو اتذكرت الاسم كحيل
        من أقوال كحيل تسكت تلبد تيمشي أو من نصائحه ، د

    3. ما لاكين يا عمنا تنقو الخوف تبقى عليك حكاية عمنا جحا لمن قالوا ليو (النيران) وصلت بلدك, قال مازات بعيدة عن حلتى, قالوا ليو وصلت حلتك, قال ما مازالت بعيدة عن بيتى, قالوا ليو وصلت بيتك, قال ما زالت بعيدة عن اوضتى, قالوا ليو وصلت اوضتك قال ما زالت بعيدة عن جلابيتى, قالوا ليو وصلت جالبيتك قال ليهم ,,,,,,,,,,,,,,, شنو ما بعرفو داك ,, و اللبيبى بيالاشارتو يفهمو !!!!!!

  16. انتو يا ناس مسعولين من الخير (جنوبي ) وينو؟؟

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: