جابت ليها سجن

كنت ظهر الأمس خارج المنزل حينما رن هاتفي الجوال فسمعت صوت طقلتي الصغيرة تهتف في رعب (يا بابا البوليس جانا في البيت) فقلت لها في دهشة وإرتباك (عاوزين شنو) فأجابتني بيسألوا منك !
قلت في نفسي يا ربي الواحد بقى (يبيع بنقو) وما عارف؟ ثم إتجهت بسرعة بعربتي صوب المنزل وحين وصولي ناولتني طفلتي وهي ترتجف ورقة صفراء مروسة بعبارة (تكليف بالحضور) دعني عزيزي القارئ أقوم بنقل محتوياتها لك :
أمام محكمة جنايات السوق بأم درمان – المنعقدة في جلسة 27/2/2013م – إلى (الإسم) الفاتح جبرا – محل الإفامة : أم درمان بيت المال – حيث أنه قدمت لي شكوى بأنك خالفت المادة 4 من قامون رسوم الخدمات قد أو نظن أنك (إرتكب جريمة) عليه فأنت مكلف بالحضور أمام مولانا (فلان) وإذا لم تحضر في التاريخ المشار إليه بدون عذر مقبول يصدر أمر بإجبارك على الحضور !!
ما أن أتممت قراءة ورقة التكليف هذه حتى إبتسمت فرحاً وبذلك أكون أول (مجرم) في العالم يستدعية القضاء فيبتسم فالعبدلله ينتظر هذه اللحظة بفارق الصبر كما يقولون .. كيف وليه؟ طيب نحكي القصة :
كان ذلك قبل عدة اشهر .. دقت متحصلة رسوم النفايات المنزل فأخرجت لها من جيبى (الستة جنيهات) التي إعتدنا على دفعها إلا أنها قالت لي في عفوية
– (عملوها تمانية جنيه)
– سألتها في إندهاش (العملا منو)
– فأجابتني (ناس الشركة)
– فقلت لها 😦 يعني ناس الشركة ديل يقولو أي مبلغ ونخنا ندفع ؟
لم تجبني بالطبع وحين قمكت برفض إستلام الستة جنيهات قلت لها :
– قولي لى ناس الشركة ديل في زول إسمو (الفاتح جبرا) قال ليكم ما بدفع الزيادة دي)
وذهبت المتحصلة وبقيت منتظراً أن تاتي هذه اللحظة التي أستلم فيها هذه الورقة الصفراء التي جعلت القضاء يستدعيني للمثول أمامه والتي جعلت منى مجرماً يطرق بابه (البوليس) مدخلاً الرعب في قلوب أطفاله .
نعم كنت أنتظر هذه اللحظة عشان نشوف رأي القضاء في هذه المهازل .. يعني أي موظف في شركة النفايات يخت ليهو كباية شاي ويرفع كرعينو في التربيزة ويولع ليهو سيجارة ويقوم يزيد ليهو جنيهين تلاته و(الفاتح جبرا) يدفع؟ وكان ما دفع يرسلوا ليهو البوليس (العديل ده) ويمشي زيو وزى أي (لص) ويقيف قدام القاضى؟ مش بالله بلد (فوضى جد)؟
القانون سادتي الإعزاء (ده لو فضل فيها قانون) كان من المفترض أن يضع هذه الشركة الشاكية (متهمة) وذلك لمخالفتها المادة 8 بند4 من قانون الإجراءآت المالية والمحاسبية لعام 2007 والتي تقرأ (لا يجوز لأي من أجهزة الدولة فرض أو إلغاء أي رسوم أو ضرائب قومية أو إيرادات أخرى إلا بموافقة الوزير وإصدار القانون الخاص بذلك)
فهل تتم زيادة رسوم النفايات الكل يوم زايدة دي بموافقة الوزير وإصدار قانون خاص بيها وللا القصة كوووولها حتة موظف يشيل قلمو (ويزيد) والمواطن الغلبان ده يدفع ؟
وكذلك لمخالفتها للمادة 8 بند 5 من ذات القانون والتي تقرأ (لا يجوز لأي من أجهزة الدولة تحصيل أى أيرادات أو رسوم أو أي متحصلات إلا بموجب النماذج المالية الأصولية الملحقة باللوائح الصادرة بموجب أحكام هذا القانون)
طيب فين هي النماذج المالية الأصولية؟ فين أورنيك 15؟ الإيصالات التي تعطيها هذه الشركة للمواطن يمكن طباعتها في أي مطبعة متواضعة في السوق الشعبي ؟ كيف للمواطن الغلبان أن يعلم بأن هذه القروش القاعد يدفعا ح تمشي خزينة الدولة وليس أي (كرشاً) آخر؟ وكيف نضمن أن هذا المتحصل يتبع للشركة وما (طابع ليهو إيصالات) طالما الإيصال ليس لإيصال 15 ؟
كما جاء في ذات القانون في الفصل السابع باب (بموجبه الأحكام العامة ) في ما يخص الجرائم والعقوبات الفقرة (29)/2/ز أن كل من يقوم تجنيب الإيردات أو تحصيلها بنماذج غير الأصولية يعتبر مرتكباً جريمة ويعاقب بالسجن لمدة لا تجاوز عشر سنوات أو بالغرامة أو بالعقوبتين معاً ..
طيب أهو دي شركة النفايات وبتتحصل الرسوم بنماذج غير أصوليه يلا حاكموها لينا ؟
الشئ الغريب أنو شركة تخالف نصوص القانون بصورة وااااضحة وصريحة تكون شاكية ومواطن يرفض أن يشارك في هذه (الجريمة) يكون (متهم) بالله مش حكاية عجيبة ؟
اليوم بإذن الله تعالى في تمام الساعة الثانية عشر منتصف النهار يقف العبدلله ممثلاً عنكم أمام القضاء وإني لفي شوق شديد لذلك (عشان نشوف البلد دي ماشة كيف) وكده !

كسرة :
كان ما لقيتو المقال الجاي تكون القصة فيها (تربسة) وكده … كمان جابت ليها سجن !!

كسرة ثابتة :
أخبار ملف خط هيثرو العند النائب العام شنو(وووو وووو وووو)+(ووو).

22 تعليق

  1. السلام عليكم اتفضلوا معانا فنجان قهوه

    1. فنجان قهوة في السجن

  2. الليــــــــــــــــــــــــــــــــــــــــــــــله
    انا غايتو بجيب ليك شاي الصباح بي زلابيه كل يوم قصرت معاك

  3. يا دفعة انا ذاتي ابيت ادعغ لكن لسة ما استدعوني – ح احفظ الكلام الفوق دا واقولو للقاضي اذا تم استدعاءي

    1. ان شاء الله قبال ما يستعدوك يا ود المهدي تقول بم براها

  4. مِحن والله يابروف…

    تعرف بتاعين التحصيل ديل زاتم ما مرزقين كلو كلو…
    اعتدنا انو نفايات البيت نشيلا بالعربية نتخلص منها فى مكب يبعد عن المنزل قرابة الكيلو متر ونص من حيث البُعد
    اها فى مرة من المرات صادف انو اتخلصت من النفايات وجيت بنضف فى العربية أُفاجأ بى بتاع التحصيل بيدق فى الباب..
    قلت لى خير ياشيخنا… قال لى رسوم النفايات… قلت ليهو شايف العربية البنضف فيها دى؟ قال لى آى… قلت لى كشحت الوساخة اسى وجات .. دحين تانى لو شُفتك هنا تانى بديك طلقة.. واااضح؟؟ واضح.. زولك اخد بعضو واتخارج…
    بعد فترة قاعد فى البيت الباب المن الناحية التانية دقة… مشيت فتحت ليك الباب الا القا ليك زولى زاااااتو بتاع التحصيل…
    صحبك نظام غير الباب مُفتكر انو حيفتح ليهو زول تانى.. اول ما لقانى دا انا زاتى عيونو زغللت…

    طوالى ابتسم وقال لي: الحاج موجود؟؟ 🙂

    قلت لى تعرف مُشكلتك استعجلت فى سؤالك دا لأنو ممكن اقول ليك موجود واتفضل ادخلك جوة تانى عينك ماتشوف الا النور
    زولك اخد بعضو سريع سريع واتخارج…

    فيابروف انت بتكون مقصود صراحة… بتكون فى اجندات مخفية

    ربنا يعينك

  5. بروف تحياتي
    دي يا بروف ما شغلة خاصة بنفايات دي كسرتك اللي عند النائب العام
    دي ديرين ليها مرقة او قول رف والشغلة ما تنفع الا لما صاحبها بكامل قواه يوافق على نقله الى هناك مقاااااااااااااااااااااااااااااابل ……
    دي بكرة نسمعها منك ده اذا ما جابت ليها سجن.

  6. الأكيده إنو البلد دي بقت مزبله كبيره سواء دفعت ولا لأ .
    قبل 3 أو 4 سنين تقريبا كان فى مسئول عاوز بدفن (خرا) اليونان هنا على إعتبار إنو سماد
    و طبعن دا بعد ما قبض السمينه ..
    الله لا كسيهم

  7. انت ما جايب ليك الهوا الا ملف خط هيثرو ..
    خلي الناس تترزق واعمل نايم اصلو الشعب كلو نايم
    او بالمره اغترب وريح نفسك بلا ضغط بلا سكري

  8. الدكتور مأمون حميده نقل يوم الحمعه الماضيه إلى الأردن بعد إصابته بجلطه فى الدماغ
    هل المعلومه دي أكيده

    1. يا راااجل قووول نقلوا الجلطه بعد ان اصابها …

      1. حلوة وملعوبة آآآآآآآآآجنوبي كالعهد بيك ربي يجلطها عليهم كلهم ويعدمهم نفاخ النار

  9. محكمة جنايات عديييييل ! اصلك انت ابيت تدفع لي بت
    الواسخه ولآ كتلتها ؟
    بعدين يا بروف شوف ليك حيثيات دفاع تانية غير
    اورنيك 15 ده لأنو وزارة الداخلية ووزارة العدل
    الاتنييييين المراجع العام قال عندهم تحصيل مجنّب يعني
    قضيتك دي خسرانه خسرانه وانت دخلت مثلث برمودا
    نفايات .. داخلية … عدل والتلاته حراميه !

  10. البروف العزيز
    يعني الآن جعلوك مجرماً وإحتمال مرتاد سجون ومن أصحاب السوابق ههههههه
    قلوبنا معك

  11. يا اخونا الحقونا
    انت الجماعة جادين سجنوا البروف ده ولا شنو يا التعليق بتاعي من الصباح رجعت الان بيقول انه في انتظار الموافقة يعني بالكسرة كدة الراجل ما موجود او ما اعطينه فرقة عشان يدخل نت يعمل حاجة
    ولا يكون قالوا ليه تقفل الصفحة ؟؟
    لا لا
    الله يكضب الشينة
    لعل ما يكون قول زميلنا المعلق انه البروق وقع في مثلث الموت.

  12. حسبى الله عليهم , وله الله وطنى الجريح ,,
    وقبلك مثُل اخى الاكبر الاستاذ / عادل شمباتى ,,
    لكن القاضى كان ود حلال !
    دحين الله يوقعك فى ود حلال يا بروف ,, اخخخخ

  13. يابروف اديك الذبده زى ماقال اللمبي حاتدفع حاتدفع وبعد داك في غرمه بالعدم السجن شهر ولو القاضي جاملك بديك فرصه برضك عشان تدفع شان كده ادفع واكسب زمنك

    فى حاجه مهمه جدأ الناس ماعارفه الخدمه بتقدمه شركه طيب الشركه انا ماعاوز خدمتها وده المهم فى الموضوع كلو

    يعني بصريح العباره لو عملت شركه بيع بالتقسيط الحكومه تجبر الناس تشترى من قصه والله حكايه تشغال اذهان العباد

  14. تحياتى لك استاذنا الكبير الفاتح وافيدك بان والدى التسعينى فى عمره قد سبقك فى هذا الموقف لرفضه الدفع حيث لا توجد خدمة مقابل هذه الاتاوات

  15. انت بان عليك بقيت تلخبط …. الحكاية عندنا كانت 5 جنيه وبقت ستة وبقت 8 وهسع عشرة لها سنة…. والأسوأ إنو في شركتين للنظافة كل واحدة تقول إنو شارعنا تبعها … ولوما دفعنا ح تجيب البوليس حقها

    1. يا جماعة الخير … البروف دا طيب … ؟؟ ما يكون تربسوهو .. ونحنا قاعدين بجاي نتضاحك !!!

  16. الأستاذ الفاتح جبرا
    كفارة وخفيفة إنشاء الله ،، حيعملوا ليك تسوية بمناسبة إنك كاتب صحفي ويسكتوك بإعتذار لطيف خفيف ده لو ما عزموك فطور … لكن الكلام في محمد أحمد داك اللا بكتب في جرايد ولا في زول جايب خبرو الا خبر جيبو بس ….
    بالأمس دخلت مطار شيكاغو أقصد مطار الخرطوم لزوم توصيل أح الخوان المسافرين وطبعن قطعت التذكرة من البوابة العجيبة جداً أولاً دي بوابات سحرية تخش بي جاي تمرق بالبوابة التانية يدك في جيبك … أكانت التذكرة بي جنيه ،، قاموا جابو شركة غسمها الوثبة وده فعلاً إسم مختار بعناية غريبة .. وثوا علينا ناس الوثبة وعملوا التذكرة بي جنيهين والآن التذكرة لكل ساعة بي 3 جنيهات آي والله 3 جنيهات أهه شفت ليك بوابات زي دي يا تدفع 3 جنيهات يا تقعد جوه والساعة بي 3 جنيهات … والأدهى من كده ما خلو موقف الا داخل البوابات وتلحق تقيف بره يجيبو ليك ناس المرور .. مرور قطاع الوثبة …

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: