في المحكمة

وصلت إلى مباني المحكمة حوالى الساعة الحادية عشر قبل الظهر أي قبل موعد الجلسة بنصف ساعة .. وهي محكمة صغيرة تقع في وسط سوق أم درمان في مكان شديد الإكتظاظ بكل شئ ، قدمت طلب التكليف للباشكاتب الذي قام بقراءته ثم أفادني بأن (القاضي) لم يحضر بعد .. جلست في كنبة من الحديد يجلس عليها بعض من زملائي المتهمين بدأت أقرأ في صحيفة كانت معى لقتل الوقت فجأة وجدت أحدي الفتيات تقف امامي وتتمعن في ثم تسالني إن كنت الأستاذ (جبرا) فلما أجبتها بالإيجاب صافحتني بحرارة ثم أخبرتني بانها (محامية) وقد جاءت للوقوف معي متضامنة دون أتعاب ! شكرتها لحسها الإنساني وطلبت منها أن تعرفني بنفسها فرفضت فقلت في نفسى ما مشكلة سوف أتعرف عليها لاحقاً !
أعطيتها قانون الإجراءات المالية والمحاسبية لعام 2007م الذى كنت قد قمت بطباعته من (النت) وأشرت لها للمواد التي قامت (هيئة نظافة ولاية الخرطوم) بمخالفتها .
دخلت الاستاذه وجلست مع القاضي الذي حضر للتو وبعد دقائق خرجت وأشارت لي بالدخول فدخلت وقمت بإلقاء التحية على القاضي الذي طلب مني سرد الحاصل فقلت له مستهلا :
– يا مولانا القاضي كنت أعتقد أن الدولة سوف تقوم بمكافأتي لرفضي دفع رسوم لم تتم إجازتها ولم يصدر بها قانون كما أن الدولة سوف تكافئني لرفضي المشاركة في جريمة بنص القانون ألا وهي تجنيب الإيرادات والتحصيل خارج الميزانية ودون أورنيك 15 كنت اعتقد ذلك يا مولانا ولكن إذ بالدولة تطلبنى للمثول امام القضاء ..
بعد هذه الرمية (الما بطالة) قمت بسرد ما جاء في المقال السابق وحكيت (القصة كوووولها) وبعد إنتهائي قمت بسؤال مولانا القاضي :
– أليس من حق المواطن يا مولانا أن يمتنع عن دفع أي زيادة في الرسوم إذا لم يطلع على القانون الذي أجيزن بموجبه؟ يعني يجيني أى زول يقول ليا أدفع كذا وأنا أدفع؟
أجابنى القاضي في تهذيب جم :
– طبعاً لا يا أستاذ .. لازم المواطن يشوف القانون ويطلع عليهو؟ ولازم المتحصل إذا في زيادة في الرسوم يكون شايل معاهو صورة من القانون
– طيب يا مولانا انا عاوز قبل ما أدفع اشوف كل القوانين الجات بيها الزيادات دي من أول زيادة لحدت هسه
– نديك يا أستاذ جواب لي ناس الهيئة وتطلع على الحاصل ،وبدأ القاضي في كتابة الخطاب والذي ما أن فرغ منه حتي مددت له نسخة من قانون الإجراءت المالية لعام 2007م التي كنت أحملها معي بالإضافة إلى إيصال مالي يخص الهيئة قأئلا له :
– هذه الهيئة مولانا القاضي تخالف ثلاثة من مواد هذا القانون لأنها تتحصل الرسوم بإيصالات غير اورنيك 15 كما ينص القانون مما يجعلها عرضة للمساءلة
– (أجابنى) : الهيئة لديها تفويض من وزارة المالية لطباعة أيصالات والعمل بها بدلاً عن أورنيك 15
– طيب ممكن يا مولانا أشوف التفويض ده؟
واعطاني مولانا صورة من خطاب يعود تاريخه إلى 1/2/2003م صادر من السيد (محمد الخليفة عثمان) مدير عام وزارة المالية والإقتصاد والقوى العاملة
ينقل فيه موافقة وزارته على طباعة ايصالات الرسوم بالمطابع الحكومية بنمرة متسلسلة وحروف متميزة مع إفادة الوزارة عند طباعة كل طلبية !! (شفتوالشفافية والدقة دي) !!
بعد فراغي من قراءة التفويض قلت للقاضي :
ما أن فرغت من قراءة هذا التفويض المؤرخ 1/2/2013م بينما القانون صادر في 2007م حتي قمت بمخاطبة مولانا :
– يا مولانا انا سمعتا الرئيس البشير (بى أضاني دي) بيقول مافيش مواطن يدفع مليم واحد بدون أورنيك 15 وده الشئ البقولو القانون أها نسمع كلام الرئيس وكلام القانون وللا نسمع كلام زول تاني؟
– والله السيد الرئيس بيقول كلام لكن الناس التحت البينفذو بيعملوا حاجات تانية
– لا يعني أنا أمشى بكلام الرئيس وأمتنع عن دفع الرسوم دي ألا بأورنيك 15 وللا ما أمشي بيهو !!
– ……………………………….

محححححححكمة

القرار :
1- يقوم المتهم (اللى هو أنا) بحمل خطاب من المحكمة ومقابلة السيد مدير هيئة نظافة الخرطوم لإطلاعه على قانونية الزيادات
2- تحديد جلسة يوم 5 مارس 2013م الساعة الثانية عشر ظهراً
كسرة:
الكلام ده سمعتو بييهو (تفويض) يلغي ليهو (قانون) ؟ لا ومش كده وبس التفويض تاريخو 2003م والقانون صادر في 2007م غايتو نصيحتي ليكم يا ناس هيئة نظافة ولاية الخرطوم (في كل الأحوال) تمشوا (المالية) تجهزوا دفاتر أرانيك 15 بتاعتكم من هسه !!
كسرة ثابتة :
أخبار ملف خط هيثرو العند النائب العام شنو(وووو وووو وووو)+(وووو) ؟
بقى شكلها يجنن .. مش كده؟

43 تعليق

  1. والله قول ليهم التسوي كريت في القرض تلقي في جلدا خليهم يشيلو شيلتم

  2. السلام عليكم

  3. برضو نقول في قضاء عادل

  4. شديت محنك يا استاذ قطعتا مصارينا بالضحك ( المصيبة انو بعد دا كلوا تدفع وراسك فوق رقبتك ) وتروح عليك حق المشاوير دي كلها وتطلع مخالف وتروح شمار في في مرقة زي خط هيثروا بتاعك الكسرة دا

  5. طارق أب أحمد | رد

    أمانه ما فى ناساً تعبوا غايتو دى حيكون فيها جنس عكلته
    من هنا أدعو كل الشعب الامازونى الفضل بالإمتناع عن دفع أي هناى لأى بتاع ما لم يبرز الهناياب ديلك تضامناً مع الأستاذ جبرا و قوي الشعب الدافعه
    و زى ما بقول السلاوى (كدى النشوف آخربا شنو)

    1. يا ريت يا اخي طارق كلنا نبقى عكاليت ويا ريت العكلته تجيب ليها عنكبه وحرق لساتك وبم تكون الكتمة انفكت

  6. طارق أب أحمد | رد

    لا حنيك بدون أورنيك
    لا حنيك بدون أورنيك
    لا حنيك بدون أورنيك
    لا حنيك بدون أورنيك
    لا حنيك بدون أورنيك

    1. ياسين شمباتى | رد

      طارق !
      انا فهمتك غلت !
      وى وى وى

      1. شمباتي !! الله يجازيك انا اول كنت فاهم صاح اها
        غلتني معاك !

      2. ياسين شمباتى

        ههههههههههاااى,,ا
        انت اكبر غلتان يا حبيب ,
        كع

  7. كون القاضي يكون ما عارف انو في قانون صدر في 2007م يجُب ما قبله
    دي براها مصيبة كبيرة !!
    السيد محمد الخليفة عثمان ده استن سنة سيئة خلاص غايتو الله يكون في
    عونه من وزرها ووزر من عمل بها ..
    يعني بدل ما القاضي بعد يشوف قانون 2007م الما كان عارفه ده يقوم
    هو يستدعي مدير هيئة ( تحصيل قروش ) نظافة الخرطوم وبين القوسين
    دي عشان دي كل شغلتم بيحصلوا وما بينظفوا ,ويقول ليهو كيف تخالف
    القانون يقوم يقول ليك انت امشي اسألم ؟؟!!
    سجمنا ! يعني السيد الرئيس طلع أيييييي كلام ! والله انا كان بكانو اشيل لي
    بسطونة وامش عليهم .. هو ذاااتو من كُتُر كلامو الناس بقت ما بتركز في
    القعد يقولوا …

    1. طارق أب أحمد | رد

      بسطونة شنو اليشيلا كدى خلى اليشيل رقبتو

      1. ما نحرّشو يمكن تشيل فيهو ويشيل .. لاكين هو صحي ما قالوا
        اكل الهناي بيكتل القلب …

    2. الرئيس منو ليس كل ما يلمع ذهبا (رغم اني لا اؤيد الشموليه بس حليل اب عاج) وكمان ما بحب العنصرية بس الراجل طلع جعلتي

  8. عزيزي البروف الفاتح
    تحية طيبة
    في تقديري هذه ثقافة جديدة يجب أن تسود في مجتمعنا
    وإن كانت تتطلب جهداً خاصاً مع مشكلات الحياة اليومية
    تمنياتي بالتوفيق مع الشكر والتقدير

  9. والله بعد تحيتي البروف الذي أجده مصرا ان يعلم شعبنا معنى ان يكون له حقوقا في هذا الزمن الظالم.. ويبذل في سبيل ذلك الكثير من الجهد والمال والوقت … لا أنسى ان احيي تلك المحامية الأصيلة بت البلد التي قرأت فتفاعلت وحق لنا ان نفخر بها … فهي افضل منا جميعا الذين قرأنا وقلنا البروف اذهب انت وربك فقاتلا أنا هاهنا قاعدون !!
    الجلسة القادمة لابد ان تكون محضورة … وطاقم المحاماة اكبر وقد اعد للأمر أعدادا جيدا … بل والتغطية الإعلامية اللازمة … لتوظيف الامر بصورته الحقيقية … فكلنا يوم ٥ مارس الفاتح جبرا … وكلنا مادام هذا هو الحال متهمون !!!

  10. ياسين شمباتى | رد

    البروف والاحباب….ٍسلام….
    ما ضاع حق وراءه مطالب ,,,
    سر وكن رمزا للحق والعدالة ,,
    حبى وتقديرى..

  11. ياعمنا البلد دى مافيها قانون ادفع ساى دى بلد رئيسا ماعندو كلمة تاعب روحك فوق كم؟

  12. الاخ جبرا والاخوه الاعزاء
    سلامات
    نغيب كم يوم نجي نلقاك بقيت خارج عن القانون ومطلوب امام القضاء
    وعشان نحن مؤمنين بكل ما تقول كلنا يوم 5 سنكون متضامنين ويا فيها ولا ن………
    تموها براكم

  13. والله يا بروف حبشتا لينا قضية راى عام قضية جميلة ياريت كل الشعب الفضل يعرف حقوقو ويعرف كل جنيه بيدفعو ماشى وين ما دفع ساى
    ونحنا عايزين نعرف قروش النظتفة دى ماشة وين وين عربات النفايات الاوساخ مليانة فى الشوارع والله ليا زمن ما سمعت صوت عربيه النفايات لكن ما بينسوا يوم قروشهم

  14. هههههههه والله يا استاذ بعد ده كلوا خائفين يطلعوك مدان وبدل الـ (8) جنيه تدفع رسوم محكمة واتعاب القاضي ووقته الغالي وغيرها من الرسوم الغير مبررة

  15. انا واخوي ملوال
    كل واحد قال
    تلاتة مارس عيد يوم وحدة السودااان
    كلنا اخوااااااان
    مافي شمال بدون جنوب ومافي جنوب بدون شمال
    كلنا اخوان كلنا اخوااااااان
    نميري قال كلام نعيش سوا في سلام
    مافي شمال بدون جنوب ومافي جنوب بدون شمال
    وكلنا اخوان كلنا اخواااااان
    !!!!
    !!!
    !!
    !

    1. آآآآآآآآآآآجنوبي البروف يوم خمسة ما يوم ثلاثة مارس عيد

    2. ياسين شمباتى | رد

      يااااااهـ ,,,
      دا اانت موحداتى بشكل يا جنوبى !
      حليل منقو الفصلو غصب,,,

      1. الفصل على ودنه آآآآآآآآشمباتي فصلوه فصل نفسه باعوه باع نفسه دوامه ما فيش ليها نهاية ولسه ياما في الجراب يا حاوي والله يستر بقت شرق وغرب وجبال نوبة ونيل ازرق ونيل منيل بستين نيله والجاي شنو ما فيش حد عارف وبعد ما خلاااااااااااااص قلنا القبلية راحت والبنات بقن يغنن بي ود الغرب والشنو ما عارف والناس بدأت تنصهر رجعونا للسلطنة الزرقاء على وزن نيل ازرق وعبدلاب وجموعيه وجمع وووووو ويسالوك قبيلتك شنو قبيلتك شنو لما الواحد نسى انه سوداني في المقام الاول يااااااااااااااااخ مراااااااااااارتي ياناس شوفو لينا حلل من البيحصل ده

      2. موحداتي حلوه انا كنت قايله احمر كافر هع كع كرع كلنا كنا موحدين وبنحبه سودان من نوملي لي حلفا

  16. بس لو فيه من البروف 10 الكتمه كان قالت بم وبرضه براوا عليك يا ود جبرا انا ان شاء الله جووووووووووووه المحكمة يوم خمسة وانشاء الله تكون من محكمة السوق الى القصر وتطرشق وتقول بم

  17. سلام للبروف الخارج عن القانون. والاخوه
    عدت الى ارض الوطن من يومين
    واسي قريب راجع البطن طمت و الحكايه ما اورنيك ١٥ بس
    الحكايه اكبر من ١٥ دي بي مراحل
    وعلى قدر ما كنت متابع جميع مقالتك لكن ما كنت متخيل انو حجم الطامه اكبر من ١٥ واكبر من هيثرو و اكبر من جميع تطلعاتنا وامالنا واحلامنا بي. وطن يشرف. في يوم من الايام
    من فساد في الدوله و فساد في الشارع و فساد العمل و فساد في اي حاجه حتي انو بقى فيو انواع. في مصلح و في ساده وفي سفري
    حتى أني يأست…..

    انشاء الله يحرق

    1. اخي ود الفريق زي ما قال ابو امنه حامد طيب الله ثراه يرجعونا محل ما عاوزين ينقذونا انت كمان رجعني محل يئست دي يمكن يكون فيني رمق خلاااااااااااااااااص الجنازة اندفنت

  18. اشد على يد البروف ورغم انه الحاجات العاوزه عكلته كثيره ادعو كل رواد البرنجية المتواجدين في السودان كل واحد يبقى عكليت في حاجة وتنشر بالغازيته الخاصة بنا (القمردينه) يعني واحد يتخصص مرور وواحد مستشفيات وواحد اسواق وواحد وواحد وكل واحد يكتب تطور قضيته في القمردينه انا خلو لي ناس المرور (سريع ونشل بطي)

  19. انا رجل قانوني واظني عجوز كمان …ولو انت عايز تدقق في كل شي يا استاذنا العزيز حتجيب لنفسك هواء والحمد لله جات سليمة والقاضي بقي ود ناس …لكين لو لقيت واحد من الجماعة البتعرفهم وبنعرفه ..ما كنا قرينا هذا المقال وعلي العموم تسلم لينا من كل شر ويظل قلمك سيفا مسلطا علي الظلم والبغي

    1. ياسين شمباتى | رد

      احييك ا استاذ نجيب ,,,
      اشتم فيك عبق الزمن الجميل,,,

    2. فيه القضاء برضه في وفي الله يسترنا ومندخلش محاكم يا مولانا

  20. يابروف نصيحه تاني انا مشيت في الدرب ده حتي الاخر

    وكانت الخاتمه كلاتي
    دفع رسوم النفيات زيدآ ١٥٠ جنيه غرامه بالعدم السجن شهر وبعد دلك تدفع قصب عنك

    1. ياسين شمباتى | رد

      ليييه يا حبيب !!؟
      الهمبتة ما قدر دا كمان ,
      انا اخوى القاضى (عفاهو) من السابق والزمو باللاحق ,
      لكن اخوى رفض برضو !!

      1. قاضي مفتح
        عارف الجاي أصعب
        لكن أخوك شفت خلي الاسجنو عشان يونس البروف
        هههههه

      2. ياسين شمباتى

        ود الفريق…
        ههههههههههههههههههههههه,,,ما شفت شديد لكن مفلس !
        احححححححح

    2. ديل يدفعوك الكهرباء وانت معندكش الماء وبرضه حنفيه مافي زي ما قال عادل امام حق التلفون مع انه معنديش تلفون

  21. كتمت مش راح ندفع كتمت مش راح ندفع كتمت مش راح ندفع

  22. بالمناسبة يا استاذ الفاتح مدير عام المالية الاسبق محمد الخليفة عثمان (حسب اعترافو) مهنتو الاصلية معلم … يعنى قريبة لوظيفة الحسابات لانو يمكن (والله اعلم ) يكون مدرس حساب !

  23. يقول علي الوردي :
    لقد حكم الطغاة هذا البلد أجيالا متعاقبة فاعتاد سكانه بدافع المحافظة على الحياة أن يحترموا الظالم ويحتقروا المظلوم
    أحمدالله يا بروف الجماعة خرجوا عن القاعدة أحترموك أما لو كنت من فئتنا نحن الغبش شذاذ الافاق لكان مصيرك بيت اشباح

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: