في هيئة النظافة

في العاشرة من صباح الأمس الأحد الموافق 3 مارس حملت الخطاب الذي اعطاني أياه السيد القاضى معنوناً إلى السيد / أحمد عبدالرحمن مدير هيئة نظافة الخرطوم .. تعبت كثيراً في معرفة مكان الهيئة لإنعدام أي لافتة تشير ألي وجودها عموما كما يقولون (البيسال ما بيتوه) وبعد سؤال عدد من الميكانيكية والأسطوات إذ ان مباني الهيئة تقع في المنطقة الصناعية .. وجدتها فدلفت إلى داخلها حيث وجدت سكرتير المدير الذي طمأنني بأن المدير موجود وسوف يأتي بعد قليل
وبالفعل لم تمض دقائق حتي جاء المدير وبعد التحية قمت بتسليمه الخطاب وعندما رأيت علامات (التوهان) في وجهة قمت بقص الحكاية عليه وختمتها بأنني قد حضرت لمعاينة القوانين التي أجيزت بها رسوم النفايات .. وكذلك الدفوع القانونية كون أن الهيئة لا تلتزم بالقوانين المالية القاضية بالتحصيل باورنيك 15 .
طيب نجي نشوف السيد المدير قال شنو؟
– شوف يا أستاذ نحنا الأيصالات دي قاعدين نطلبها من وزارة المالية وبيسموها (بديل أورنيك 15) وهسه أهو ده جواب طالبين منهم يدونا 10 دفاتر عشان دفاترنا قربت تخلص
– يعني المالية هي ذاااتا مشاركة في الجريمة دي؟
– ده الحاصل يا استاذ
– طيب القروش الإنتو بتستلموها دي لمن تجمعوها بترسلوها لوزارة المالية وللا بتتصرفوا فيها براكم؟
– والله نحنا في الهيئة ما بنورد القروش دي للمالية ومش نحنا الهيئة الوحيدة البتعمل كده هيئات كتيرة ما بتورد قروشل للمالية !
– طيب ولاية وزارة المالية على المال العام وين؟ وإذا الهيئات والمؤسسات الحكومية الفي البلد كوووولها عملت كده وكل هيئة طلعت ليها دفاتر وفرزت عيشتا قروش البلد دي يعملوا ليها (كنترول كيف)؟ ؟
– والله يا استاذ ده الحاصل !
– طيب هسه إنتو المراجع العام قاعد يراجعكم
– ………………………………………
– على العموم إنتو براكم … معاكم ناس تانين بيعملو كده .. حقو تعرفو إنو التحصيل بدون أورنيك 15 وتوريد المتحصلات دون تباطوء إلى وزارة المالية دي جريمة ويعاقب عليها القانون وأنا لن أدفع ولن أشارك في هذه الجريمة
– يا أستاذ أنحنا قلنا ليك هسي ادفع؟ يا اخي أدفع على راحتك نحنا أصلوا ما بنحب الأمور توصل للقضاء إنتا ممكن تواصل في الموضوع زي ما عايز لكن موضوع المتأخرات ده بنحلو ليك
– يا أستاذ الموضوع ده طلع من أيدي وأصبح موضوع رأي عام وأنا هنا بمثل ألآف المواطنين ..
– (بعد أن طلب لي كباية كركدي) : لو ممكن بس أشوف قوانين
الزيادات التمت في الرسوم دي؟
– جداً (وخرج من المكتب وعاد وهو يحمل عدة أوراق مدبسة)
– ده القانون يا استاذ وهو مجاز من المجلس التشريعي وصادر سنة 2012 ونحنا الزيادة الجات في القانون ده عملناها هسه عام 2013
– يعنى إنتو مما عملتو الهيئة دي زدتو الرسوم مرة واحده اللي هيا بالقانون ده ؟
– أيوه
– لكن الحاصل إنو الزيادات دي تمت أكتر من مرة يعني نحنا مثلاً كنا بندفع ستة جنيه وبعدين بقت تمانية وهسه بقت عشرة
– لا .. الزيادات تمت مرة واحدة
– أنا ما ح اغالطك لكن في ناس من الفئة بتاعتنا هسه بتدفع 10 جنيه .. طيب ممكن تديني صورة من القانون ده؟
– والله مكنة التصوير بتاعتنا بايظة لكن ممكن ترسل ليا أي زول أديهو ليهو بعد ما أصور ليك نسخة
– (وتاني رجع للحكاية) : يا أستاذ موضوع المتأخرات ده ممكن نساويهو ليك !
– تساويهو ليا دي شنو؟ خلي السكرتير بتاعك شايفو فاتح النت يدخل صفحتي على الفيسبوك شوف عدد الناس المتابعة الموضوع ده .. ذاتو عشان تعرفو رأي الناس فيكم وشكاويهم وملاحظاتهم وأكيد القصة دي ح تفيدكم !

كسرة :
موعدنا غداً في المحكمة بإذن الله تعالى
كسرة ثابتة :
أخبار ملف خط هيثرو العند النائب العام شنو(وووو وووو وووو وووو)؟

Advertisements

39 تعليق

  1. مارلبورو يا طارق أب أحمد

    1. برنجيه بدون نضارة القرايه عشان كدا قلبنا بنسون

      1. انت قلت يبسون !
        عشان كدة ما حنبارك ليك !

  2. الساقية لسة مدورة ولسة لسة مدورة ( وعيييك والله انا خايف عليك بس من المغايص وجع القلب ) يا استاذ لازم تعمل احتياطيك من كل العلاجات ( او او تنقا ،، تنقا،،، تنقا)

  3. عزيزي البروف الفاتح
    في البدء شكري وتقديري على تكبدك مشاق كشف حقيقة ما يجري
    في هذه البلاد العجيبة وخصوصاً في مسائل أكل أموال الناس بالباطل
    والفساد الذي ترعاه وتحرسه الدولة بعدم رقابتها وإهمالها لأبسط
    الأمور التي تتعلق بولايتها للمال العام.
    ونأمل أن يكون القضاء عند حسن ظننا به ويسجل موقفاً تاريخياً
    في هذه القضية التي تفضح إحدى صور الفساد المالي

    1. والناس لو تكاتفت بيظهر الكثير كما حصل لود جبره

  4. قصه قصيره
    فى غابر الأزمان كان المثل يقول ( التسوى كريت تلقا فى جلدا )
    ثم أنى زمان آخر، فيه حاكم جائر ، على العباد قاهر ،يسرق ويقتل ثم يرقص و يكورك بصوت جاعر، فإبتلاه الله بمرض فى الحلق غائر، فتغير المثل
    التسوى فى الخلق تلقا فى الحلق

    1. هههههههههههههههههههههاااى,,
      قوية وحامضة يا اب احمد ,,
      النشر مطلوووووب بعد اذنك

  5. هيئة النضافة دي يا كافي البلاء لا عمل يشير لوجودا
    ولااااا حتي يافطه !!!
    مدير الهيئة ده قوااال خلاص ! هسي السعلو عن الهيئات
    التانية منو ؟غايتو الزول ده سجم خشمو , ماااا
    ظنيتو يقعد في بكانو ده تاني ..
    الشغلة طالما جابت ليها وزارة مالية وعااارفه الحاصل
    بكره وزير المالية يقول ليك البرلمان وافق علي كده
    ويقوم يجيك رئيس البرلمان ويقول آآآي اذكر انو علي
    محمود لاقاني في عرس بت هناي وكلمني !!
    يا بروف طالما وزارة العدل ما بتلتزم باورنيك 15
    يبقي علي القانون السلام وللناس المضرّة ..

    1. أنا وأخوي الكاشف….. هاهاهاااااااااااااع

    2. والله يا جنوبي انا بعد انتهي من قراية مقال البروف اول حاجة بعملها بروح التعليقات وافتش لتعليقاتك البتكون دايما تكمله لمقال البروف رايك شنو نفتش ليك جريد ونعمل ليك فيهاعمود ثابت لكن نسميهو شنو؟؟؟؟ نسمع اقتراحاتكم

  6. نحن مستعدين ندفع بدل عشرة عشرين بس ينظفوا لينا البلد من كل وسخ فيها هذا شرطنا الوحيد

  7. والله المآسي والتسيب والألتفاف علي القوانين واللآمبالات وأكل أموال الناس بالأرهاب وبالباطل مسائل جد خطيرة ياشيخ الفاتح. الممارسات من هذا النوع كثييييرة تحس ان كل زول عامل مسؤل عند قوانين بمزاجه. بقينا زي أخواننا (سابقا)الجنوبيين

  8. ايوه ده الكلام الصاح ..

  9. انا واحد من الناس الدفعو عشرة جنيه الشهر الفات ولما سألت الموظفه المتحصله من سبب الزياده رددت بكل برود دي زياده جايه من الوالي ..

  10. أنا وأخوي الكاشف….. هاهاهاااااااااااااع

  11. دقيقـــــة يا هووووي ما تجوطوا ساي ..
    أنا مع زيادة رسوم النفايات لي 71 جنيه … أصلو البلد دي وسخانة وسخ !! 😦
    أستاذ جبرا والسمار العزاز: من بكره نخت إيدينا في إيدين بعض ونجدع بعيد … في اللجة من رأس ميضنة
    ولو كل زول رفض يدفع رسوم من غير أورنيك 15 بكرة البلد دي بتعمر …
    مرحباً بدق الجرس ..

    1. دقى دقى ..
      جيبى حقى..

  12. يا بروف لسع عندك أمل بعد الخبر دا……….
    المباحث : لا نستطيع تفتيش مصانع اللحوم لأنها (محمية من فوق)

  13. الحبيب البروف,,,
    سر وعين الله ترعاك ,
    وفى الفؤاد ترعاك العناية ,,,

  14. يابروف ادفغ بالتي هي احسن لانو القاضي بحاكمك بحكمك ونبقا في غرامه وتلاتله ساي

    1. الحبيب ابراهيم..سلام…
      يدفع (ل) ولا (عن) !!؟ امممممممممم

  15. اخي طه البروف طلع احسن من اب عصاية اه (اب قناية) وما فارقه كثير ابعصايه بعرض واب قنايه نايم والنايم العام من زمان ودقي يا مزيقه اقلاها ود جبرا متابع ليهو موضوع ملك خاص مش خط هيثرو يعني هو الاستدعوهو وهو العاوزين يقلعوا عشرة جنيهو وليهو كم شهر حلقه نشف من الكواريك بس هسع مسك ليهو طرف خيط ملك خاص يعني سيك سيك معلق فيك نشد من ازره ويا ريت كلنا نكون في محكمة السوق بتاع ام درمان ده بس ونحضر محاكمة النظام في جزئية بسيطه ويا ريت كل واحد يبقى عكليت زي ود جبره والعندو قضايا زي دي يكتبها في القمردينه وكان ما عندو حق المحامين والناس الممكن توقف معاهو بس مستنداته ميه ميه الناس في القمردينة تقيف معاهو حتى يتم فضح الموضوع بصوره سافرة لكل الناس وتكتب فيهو كل القمردينات الحلوه ويصل كمان لكل الغازيته الموجودة في البلد واظن المسالة هنا اسهل من مسألة اننا نتابع موضوع مستشفى اطفال وندعمه لانها بالدليل

  16. البشير: نحن مسئولون امام الله سبحانة وتعالى عن أخلاق الشعب السوداني
    هههههههههههههههههههه
    علقا في رقبتو برااااااهو ههههههههه أححححيّ يا بطني
    لكن بصراااحة ما جاب سيرة النفايات

    1. فى حد بجيب سيرة نفسو !!؟
      وى وى وى

      1. في حد يقدر ينسى نفسو !!؟
        وي وي

      2. هووووي يا شمباتي والمندهش مالكم دايرين تجيبو لينا
        الكلام الشين هسي بكرة سلفاكير يقول ليهو الهناي رئيس
        الهنايات !

      3. بريييييي ,,
        اضانى طرشا !ّ!!!

  17. يا جماعه هبر اعتقال البروف دا حقيقه

    1. حقيقة يا ود الفريق لكن وبحمد الله اطلق سراحة

  18. قلت اكتب للتعبير عن المساندة و بس

  19. الاخ الفاتح جبرا
    كنت معجب انا بكتاباتك واصبحت معجبا بصمودك امام
    الباطل ..
    نحن في زمن العجايب يتم فيه اعتقال من يطالب بتطبيق
    القانون ويترك منتهك القانون حراً طليقاً ان جاز
    الوصف لأنه عبداً لنزواته لا حراً مكبلاً بخطاياه لا طليقاً..
    فلتدم لنا حراً أبياً نبراساً يضئ لنا الطريق ..
    اختنا التي اخجلت رجولتنا بت وراق كنتي ارجل منا موقفاً
    لكي الانحناء والتقدير ..

    1. بت وراق ابية وحفية ,,
      لك منى كل احترام وتحية ,,,,

  20. salamat Prof. Al-Fatih
    I like very much your bravery for writing about corrpution in my beloved country sudan really I feel all sorrow God bless you

  21. كتمت كتمت كتمت الكترابه بس البروف ابا يدفع ووصلها القضاء حبسوه آآآآآآآآآآآناس شفتو الجماعة ديل خايفين من القلم المدسي في قمردينة (لا ننكر الخرطوم) اها اكان بقى حرق لساتك في نص شارع الزلط يسوا شنو وي وي وي والله تجب خبرهم في يوم واحد

  22. البشوف شركة النظافة يقول البلد ما فيها كيس حايم ولا ورقة طايرة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: