الأمن … يجرح ويداوي

العبدلله ليهو حوالي اسبوعين عندو (قرفة) وزهجة شديده وإحباط ولما الحاله دي تجيهو بيقوم يقفل عليهو الأوضة بتاعتو وما عاوز مفاهمة مع أي زول .. الدقن تعشعش .. وطفايات السجاير تتملي .. (مع القلب ده) .. ناس البيت عارفين الحتة دي .. وعارفين يتعاملو معاها كيف .
قضية النفايات دي جات مع (القرفة دي) وما عاوز أقول (الفلس ده) وهو بالمناسبة واحد من الاسباب .. وواحدة من اسباب الفلس للمواطن السوداني إنو الحكومة رفعت أيدا من كل شئ ومش كده وبس كمان بتطالبك بدفع حاجات كتيرة .. العتب .. النفايات .. الموية مع الكهرباء .. الشنو مع الما تعرف شنو .. وفي خضم (القرفة دي) جاء للعبدلله (إستدعاء المحكمة) بسبب النفايات .. بوليس لابس رسمي في مسألة (أبلد قانونى) في الدنيا لا يمكن أن يصنفها بانها مسألة جنائية .. (هسه ناس النفايات) ديل كان ما جو شالو النفايات بقدر أشتكيهم (جنائياً) طيب هم يشتكوني جنائياً وأكون (مجرم) ويجرجروني وهم (لا) ليه ؟ لكن طبعن هنا ممكن .. حيث للقوانين (ترزية) و(مكوجية) وغسالين !
الملابسات بتاعت (بلاغ النفايات دي) إنتو عارفنها .. طيب نجي للملابسات بتاعت أخوانا بتوعين الأمن (البجرحوا ويداووا) .
اليوم الساعة أطناشر كان موعد إنعقاد الجلسة بتاعت النفايات بمحكمة النظام العام بسوق أم درمان .. عشان الناس تعرف حقها طلبت من أعضاء المنتديات التي بإسمي أن يقوما بعمل بوسترات تحث المواطنين على عدم الدفع إلا بأورنيك 15 كما يقول القانون وسمعاً وطاعة للسيد رئيس الجمهورية والسيد نائبة (آدم الحاج) وكل المسئولين الذين ما فتئوا يرددون لنا أن عدم التحصيل باورنيك 15 هو جريمة لا تغتفر وإثم عظيم .
اول الواصلين إلى المحكمة تحمل بوستراتها كانت الأخت (بت وراق) والتي لم تعرفني لأول وهلة بسبب (الدقن الأبيض الكث) جلسنا وأنا أرتدي الزي السوداني إضافة للسديري نتحادث في إنتظار أن (يندهنا) حاجب المحكمة
أخذنا نتحدث إنتظاراً للمحكمة وقد تجاوزت الساعة الثانية عشر بقليل وفجأة هجم علينا شباب غلاظ تحسبهم من أقارب (جون سينا) او (هوغ هوجان) على اقل تقدير .. كانوا أربعة .. أمسك احدهم (بالبوسترات اللسه ما فتحناها) والتي كانت تمسك بها الأخت (بت وراق)
– نحنا الأمن جيبوا الورق ده وقوموا يلا معانا !

Advertisements

34 تعليق

  1. برنجيييييييييييييية الفرحة

    1. حررررررررم شففوك البرنجيه دى
      مبروكه عليك و تطفيها بي نفس العافيه

  2. ان شاء الله بت وراق برضها اخلو سبيلها يابروف دون ضرر يذكر …. لكما النحايا
    يالمندهش ماتندهش آآآوي كدة

    1. كيفن ما اندهش وافرح بعودة الحبيب المنتظر يا التركي ؟!

  3. حمدالله على السلامه يا استاذ يا رائع

  4. وباقي الموضوع وين يا بروف … أها اعتقلوه كمان ولا شنو ؟؟؟

    1. يا اب احمد نحن عاوزين الاستاذيعمل لينا كسرة ثابتة تانية ويسميها اخبار اورنيك بتاع ناس النفايات شنو

      1. ياسين شمباتى

        ههههههه..انت !!
        ابرا منك انا..

      2. كده الكسرات بتكثر وبيصبح ابو علي بدل ود جبرا يعني يخلي المقالات وتكون كلها كسرات اه من الكسر دا

    2. و الله يا ابو جبرا انت قرضتها معاهم الي النهاية و مشل الكتاب مهما عملو مهاهم اليد تاكل و القلم يحك … ثبتها كسرة ثابتة اسوة بخط هيثرو علشان تكون ليهم شطة في عيونهم

  5. القرفه الخلتك تنسى الكسره الثابته و المتحركه أبداً ماها هينه
    غايتو قضيتك دى لازم يتكون ليها فريق عمل يمكن نطلع منها بميثاق الفجر القديم أصلو دا البخوف الأوهام ديل
    ،
    أها وحصل شنو مع ناس جون سينا ولا فيها يتبع

    1. اويد مسالة الفجر الجديد او الساطع او اي مسمى يوديهم في ستين داهية انا اثني

  6. بعاتي و ما فاضي | رد

    حمدالله على سلامتك يا بو ناجي

  7. يا الفاتح ياخوي ناس جون سينا ديل في ليهم يوم وليهم رب بقدر عليهم
    نحن من خلفكم نشد من ازركم

  8. والله فعلن الكسره وين الثابته

  9. يا الفاتح إنت ما تحمد ربك أنو عندك أوضة براك ممكن تقفل فيها نفسك لكن الناس اللاحسة الكوع تعمل شنو؟؟؟؟؟؟؟؟؟   Dr. Ammar Mhagoub Mohammed Zaki

    ________________________________

    1. تعمل راكوبة قدام الراكوبة

  10. يجرح دي عارفنها … يداوي دي شنو يا بروف … ثم تانيا وجه المداواة في الكلام القلتو دا شنو … ها ناس ها البروف دا الليلة ما براهو .. لا كسرة والموضوع مبتور … تبقى الاحتمالات كما يلي:
    – اما ان يكون الموقع اتهكر .. والكاتب الكلام واحد من الجونسينات.
    – البروف كتبوهو تعهد وخسموهو بالتقطعو اكان يكتب تاني في ناس الأمن كلام شين.
    – جندوهو معاهم وواعدنو بوزارة .. خاصة في ظل الفلسات التي لازمته طويلا.

    فراي القمردية هنا شنو … يكون ياتو فيهم

    1. ياسين شمباتى | رد

      التخسيمة او التخميسة !!
      اححححح

  11. ياسين شمباتى | رد

    تحية للبروف وللصديقة المهيرة / بت وراق..
    والامن غلبو الثبات !!!

    1. والله بت وراق بت رجال وتساوي عشرة رجال .. ما يتخاف عليها ..وليها التحية والتقدير .. وشرف عظيم ان تكون زميلنا ..

      1. زميلتنا … أكيد .

  12. انا ما عارف مخليينك لحدي هسه كيف ….
    اوعا تكون من الجماعه زاتهم

  13. هيع الجماعة جوك ( اخوان نسيبة ما بقصروا ) شفتا حاجة لسة الغريق قدام ما قلنا ليك اصلك ما بتسمع الكلام اها بدت دابا بدت نهاية وين مو معروفة ( امسك الخشب وجهز نفسك للباقي بس) دي هاية برنجيتك الغلبتنا بيها دي

  14. الاخوان فى القمردين لكم منى التحيه ومشكورين
    لكن زي ما قال اخونا جبرا فى الكسره حقته رغم انها ماظهرت فى القمردينه
    (الناس دى عاوزه تعمل مننا ابطال فى صمة خشمنا )

    1. بت وراق
      صمة خشمك خير من جعجعة كثير من الرجال
      لك التحية والتقدير والإحترام

  15. قولتا ليك ادفع بالتي هي احسن وابيت الله يقطي عليك

  16. سوداني في هيثرو مستني الخط يفتح | رد

    الكسره بختها برانا ،،،،،،، هي اصلوا ما عايزه كسره مفهوما ؟؟؟؟؟؟؟؟؟؟؟؟؟؟؟؟؟؟؟؟؟

  17. البروف والاعزاء

    متعكم الله بالصحة والعافية

    والله انتو طيبين جنس طيبة

    انا متابع المواضيع من الهنايات وقبلو ولحدي النفايات

    يا بروف ماتكون عندك سكري ولا ضغط

    خوفي عليك تروح في حق بسبب ناس القانون ديل

    يا بروف قانون مين يا راجل ماتصدق شعارات القانون السوداني اقوى قانون

    والله والله والله اسال مجرب ولاتسال طبيب وقسما بموضوع وصلت رئيسة التشريع والعدل في البرلمان كآخر حد دا طبعا بعدما غلبني الحيلة من اكبر الوزراء والمسؤولين لاصغرهم

    آمنت واقتنعت بانو القانون في وادي والتطبيق في وادي والمنفذين واصحاب القرار في وديان مختلفة وما يتلموا الا يوم لا ينفع مال ولا جاه ولا سلطان

    نفايت وغيرو وغيارو ؟؟؟؟؟؟؟؟؟؟؟ هم بقو مفكرين في انو يصلو للسماء السابعة ويبسطو العدل في دولة جديدة يعملوها امتداد لدولة السودان الاحن فيهو

    الله يديكم العافية خليكو في الانتو فيهو وركزو معانا

    يا بت وراق عفيت منك بس انتي ماكي وش بهدلة

  18. نسأل الله لنا ولكم الثبات .. بس القصة كده ناقصة .. بعد قالوا ليكم ( جيبو الورق ده ويلا معانا ) الحصل شنو ؟ سلمتو الورق أم لا ومشيتو معاهم ام لا ؟ اذا كانت الإجابة بنعم ، ودوكم وين ، ورجعوكم كيف ؟ اللهم جنبنا الفتن ما ظهر منها وما بطن، اللهم اكفنا شر من لا يخافك.

  19. دعاء الهم والحزن

    ما أصاب عبداُ هم و لا حزن فقال : ” اللهم إني عبدك ابن عبدك ابن أمتك ناصيتي بيدك ماضِ في حكمك ، عدل في قضاؤك أسالك بكل اسم هو لك سميت به نفسك أو أنزلته في كتابك ، أو علمته أحداً من خلقك أو استأثرت به في علم الغيب عندك أن تجعل القرآن ربيع قلبي ، ونور صدري وجلاء حزني وذهاب همي ” . إلا أذهب الله حزنه وهمه وأبدله مكانه 

    فرحاً 

    رواه أحمد وصححها لألباني.لكلم الطيب ص74 

  20. اخونا الكبير جبرا ….. اليوم دخلت ابارك ليك خبر توجيهات رئيس الجمهورية بمعاقبة متسببى بيع خط هيثرو والتى اعتقد نتيجة مجهودك الجبار فى الكسرة الثابتة …. لقيتك بقيت زينا محبط وعندك قرفة ونسيت الكسرة الثابتة وفعلا كما تقول للقوانين (ترزية) و(مكوجية) وغسالين ! الله يكون فى عون السودان

  21. ملاحقة البوسترات وستات الشاي وغيرهم كثير من خلق الله … من قبل ناس الامن … قطعا لا اقصد امن الناس …. سوف يجعل بلا شك كل ما بقي من رقعة الوطن السودان سجنا … بلا سقف….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: