حيطتنا ذااااتا

من طبيعة الإنسان ان يحزن لمفارقة من يألف غير اني اليوم فرح وسعيد غاية السعادة لمفارقة العزيزة الغالية (كسرتي الثابتة) وكل (واو) من (واواتها) اللواتي بلغن ستة عشر .
في الخامسة مساء الأمس هاتفني الأخ رئيس التحرير الأستاذ عادل الباز ينقل لي خبر توجيهات السيد الرئيس بمحاسبة الجهات الضالعة في فقدان السودان لخط هيثرو الجوي وإعادته أو إعادة قيمته .. وما أن إنتهت مكالمة الأخ الباز حتى أنهمرت على هاتفي عشرات الرسائل والمهاتفات تخبرني بالأمر وإنتصار (الكسرة الثابتة) كما قال أحدهم .
سألني أحدهم ذات مرة (لماذا خط هيثرو بالذات) فأجبته لأنه قضية الفساد الوحيده الما عايزه ليها (درس عصر) ولا توجد فيها أي (مخارجات) يعنى القصة ما تقاوي عشان واحد يجي يقول (أنا إستوردتها سليمة وبعدين باظت في التخزين) أو نسبة الفطريات فيها شنو ما بعرف أو معدل النمو الما عارف شنو؟ حق هبوط لناقلنا الوطني وتم بيعه لشركة طيران (معروفة بالإسم) وقاشرة بيهو قدام العالم كوووولو بدون خجلة .. قضية أصغر محقق (تحت التمرين) ما تاخد معاهو يومين .. خطاب من حكومة السودان للشركة (القاشرة بالخط) : الخط ده بتاعنا من ( سنة كم) وخمسين الجابو ليكي منو وعمل ليكي تنازل؟ و(فاكس) من الشركة فيهو صورة العقد و(الإمضاءآت) والمسالة إنتهت !
لكن المسألة تنتهي بالبساطة دي؟ أكيد لا .. (المتورطون) في سرقة القرن هذه يعتمدون على ذاكرة الشعب المهترئة التي أصابها الوهن والإعياء وهي تطارد (قفة الملاح) أو إن شئت (كيس الملاح) وبقية الضرورات التي أصبحت للأسف (تبيح المحظورات) !
شهر شهرين تلاته والموضوع يتنسي .. ربما كان هذا لسان القوم (الما بخجلو) وهم يدخلون إلى خزائنهم وحساباتهم البنكية أموال هذا الشعب البائس الحزين الذي أمسي (يمشي على عجل الحديد) !
وجاءت فكرة (الكسرة الثابتة) لتنسف قاعدة (التناسي) لتزيد واوات التساؤل شهراً أثر شهر ليشاهد المسئولون المتقاعسون عن جلب المتورطين في هذه السرقة المشينة ليشاهدو بأعينهم الزمن الذي يمضى وهم (يغطغطون) على هذا الجرم النكير ! (يعني كسرة ونتيجة حائط) !
كل واو من واوات (الكسرة الثابتة) يمثل شهراً فهلا سال السيد الرئيس من هم أعضاء في لجنة التحقيق هذه فيم أنفقوا من جهد في كل شهر من هذه الواوات ؟ إنها فرصة ليست لتقديم المتورطين للعدالة وفضحهم بل إنها فرصة لمحاسبة المتورطين في (تعطيل العدالة) من أجل إكساب أجهزة الحكم المصداقية لدي المواطنين هذه المصداقية التي كادت أن تروح (شمار في مرقه) بفعل هؤلاء (ده لو ما راحت) !
في شبابي كنت أقتني عربة فلوكسواجن إشتريتها بثلاثمائة جنيه .. يوم أن إشتريتها قررت أن أقشر بها وأزور بها الأقارب (نظام إشتريت لي عربية وكده) فأخبرت الوالد والوالد عليهما رحمة الله أن يجهزوا روحم وقمت بغسيل العربة وتلميعها وعندما جاء العصر والواطة بردت خرجنا وفي أول منعطف (لاوز ليا شافع) فدخلت بالعربة في حيطة الجالوص بتاعت الجيران والتي ما صدقت إذ خرت واقعة فقد كانت فيما يبدو (على الهبشة) !
جات سلامة ولم يصب أحد بأذي .. وحيث أن جيراننا ديل بالذات (بتاعين شبك) فقد خرج أحدهم وهو يحمل ساطوراً والشرر يتطاير من عينيه
– ياخي معليش بس في شافع لاوز ليا !
– (والشرر يتطاير من عينيه)
– يا خي حيطتكم دي مش جالوص؟ أنا ح أبنيها ليكم طوب أحمر
– (والشرر يتطاير من عينيه)
– وأقول ليك حاجة؟ ح أبيضا ليكم بالاسمنت
– (والشرر يتطاير من عينيه)
– وأطرطشا ليكم كمان !
– قال لي وهو يرفع الساطور عاليا : نحنا عايزين حيطتنا ذاااااتا !

السيد الرئيس : قيمتو ما عايزنها .. قروش ما عايزين نحنا عاوزين (حيطتنا ذااااتا ) !!

كسرة :
تاني أي زول يعمل كده وللا كده نعمل ليهو كسرة ثابتة وكده !

كسرة ثابتة :
أخبار تنفيذ توجيهات الرئيس حول فقدان خط هيثرو شنو(و)؟

Advertisements

33 تعليق

  1. ياأستاذ حنحتاج لكسرات كتيره

    1. تحيتي بنت مدني بس كسرة اخير من لا شئ ولو كل صحفي غيور عمل ليهو كسرة في عمودة اقتراحك راح يتحقق والصحف عندنا اكثر من امريكا وبرطانيا وفرنسا ووو وحاولي كده تحسبيها وبسحب صحف الكووووووووووورة البنجليها ثابته دي

  2. أستاذنا الفاتح جبرا متعك الله بالصحة والعافية وجعلك دخرا لهذا البلد

  3. برنجييييييييييييييييييييييييييية
    و الاولى بمناسبة كسرة توجيهات الرئيس

  4. الاخوة السمار
    افساد الذي تعيشه بلادنا هو احد علامات الساعة حيث يكثر الفساد و الهرج و الهرج هو القتل من غير سبب و المطلع على قناة الجزيرة يكفيه ما قلت و لكن هل نستسلم ؟ بالطبع لا و لكني اود العودة الى بعض مقولات اخونا ود الخلا حيث بالامس سمعت حديث قدسي في ما معناه ان الله قال انا الجبار و و ملك الملوك فاذا عبادي اطاعوني النت لهم قلوب ملوكهم و اذا عصوني قسيت عليهم قلوبهم فهل غالبية الشعب السوداني هم من من يطيعون الله الاجابة لا فقد استشرت فينا الكثير من المعاصي و في تقديري اكبرهم اثنين شرك لا يقدر الناس انه شرك حيث يعظمون و يعتقدون في شيوخ النفع و الضر و ربى يسحت كل بركة من اللهفهلا راجعنا انفسنا قليلا و عدنا الى ربنا قليلا و نظرنا الى النتائج فاذا كان هنالك انفراج نسبي فهو الطريق و الله قادر على ان يغير هؤلاء الظلمة بقدرته (قل اللهم مالك الملك تؤتي الملك من تشاء و تنزع عالملك منمن تشاء) ولا يغير الله ما بقوم حتى يغيرو ما بانفسهم.

    1. سلام ياقبيلة،،،
      ينصر دينك ياشرقاوي، حين أبنت وأفصحت بالحقيقة وناصع الكلم حين تواري الآخرون!!
      اللهم أهدي قومي فإنهم لا يعلمون…

      1. معاك ومع شرقاوي اخي ود الخلا بس لسه عند رائي ان الله يزع بالسلطان ما لا يزعه بالرحمن

      2. لافض فوك ياصديقي الغلبان، إن الله ليزع بالسلطان مالايزع بالقرآن، ولكن ماذا تقول إذا كانت الحكاية كما تري، فما هو الحل إذاكان هذا هو الحال؟؟
        الحل هو وأتمني أن تكون أنت ومن معك معي ومع صديقي شرقاوي وليس مع التانين ولا ما ياهو دوت كوم!!
        وعلينا أن نعوووووووووود نحن أولا” للتغيير في أنفسنا ثم نغيير ما بالآخرين..
        ولا رأيكم شنو يا أهلنا؟؟
        جنوبي والمندهش والآخرون دوت كوم ولا خايفين من البسطونة؟؟ ههههه

      3. طااااااااااااااااااخ

  5. مرحب حباب كسراتك (يا أبو على) بس خايفين من الكسرة الجديدة تسير بنفس الخطوات ولما تجمع الفترتين عن الكسرة الأولى والثانية يكونوا واحدين ماتو والباقين دايرين شهود والشهود ذاتهم يكونوا ماتو وآآآآآآآآآآآآآآآآآآآآآآآآآآآآخ

  6. ألف مبروك وانشالله نلقي خطنا الراح تاني وان كان انا ما متفائل

    1. سلام آآآآآآآلعبيد حلوه منك استعمال كلمة انا ما متفائل انا متشاااااااااااااااااااائم عدييييييييييييييييل

  7. مش ممكن الرئيس يقبل بضياع مكتسبات الأمة السودانية
    مافيش حاجة اسمها القيمة إحنا عايزين خطنا

  8. خلونا من دا كلووووووووو والكتمت

  9. عاوزين كسره لسقوط عماره الرباط وكسره لضربه بورسودان وكسره لي ضرب مصنع الخرطوم الاخيره

    الكلام ده بيني وبينك وما تكلم زول

  10. هذا مانقلته صحف اليوم هذا الصباح ..هذا الخبر لم اطالعه بعيونى وحسب ولكن والله طالعته بمزيج عجيب من المشاعر المتضاربة ..الحزن …الرثاء …البكاء …التقيؤ .. نعم صدقونى طالعته بكل هذه المشاعر الحزن على حال بلادى والرثاء لحالنا والبكاء على قيمنا ومدرستنا ومشروعنا والتقيؤ من قيادة لاتحترم شعبها ..هل يعتقدون اننا مثقوبى الذاكرة ام يعتقدون باننا قطيع من الغنم ؟ اين كان الرئيس حينما سرقت سودانير واين كان الرئيس حينما بيع الناقل الوطنى تماما كما تباع الطماطم هذه الايام فى سوق العصر ؟ اين كان رئيسنا الهمام حينما سرت فضيحة خط هيثرو واصبحت حديث المدينة فى دواوينها وطرقاتها وسرادق عزائها ؟ اين كان حامى الامة حينما كانت كل صحف الخرطوم تتحدث عن جريمة سودانير ؟ اين كان المشير المهيب حينما كانت اعمدة الطاهر ساتى وعادل الباز واحمد المصطفى والفاتح جبرا لاتتحدث إلا عن سودانير ومسرحية بيعها البشعة ؟ ما الذى دعا رئيس الجمهورية لان يصحى بعد اكثر من عامين من الجرم المشهود ؟ واين كان وزير النقل كل هذه الفترة ؟ اين كتيبة الطاقم الرئاسى من مساعدين ومستشاريين و .. و ؟ عفوا سيدى الرئيس سعيك مشكور وان كنت صادقا فى المحاسبة فلتحاسب من حجبوا عنك الخبر ومن حالوا بينك وبين الفضيحة …المحاسبة تبدا باقالة طاقم مكتبك ومستشاريك ومن ثم تصل للمجرمين الحقيقين والذين يعرفهم راعى الضان فى البادية …واخيرا لست متشائما ولكن لن يحاسب متورط ولامجرم ولامفسد ولافاسد ولكن موعدنا يوم الحساب الاكبر

  11. الكسره الجايه تكون لعماره الرياض

    1. عمارة الرياض دي كسرتها حاره مع الصيف ده بتولع نار عديل

  12. انتو متفائلين اوى اوى هى كان على خط هيثرو هينه وعيش ياحمار لما تقوم النجيله

  13. مبروك يا بروف … لكن خلينا نسأل … هل الرئيس اول مرة يسمع عن خطا هيثرو والفساد ألفيهو بعد ١٦ شهر من نشرو في الصحافة … دي ذاتا مصيبة في حد ذاتا . ..

    1. يا عمك اب احمد نحاول نلقى ليهو عذر انا مثلا لا اقرأ الجرايد ابدا ابدا ابدا يمكن هو كمان ما عندو بيها شغلة وبقرا جرايد الكورة او هي وهو او الوسيط (ما بقرأ الوسيط علشان السمسره حب لله كده) عشان كده ما تلومو ما هو زي زيك انت قايله عمر دااااااااااك ود الخطاب والا شنو ياخ اخ اخ اخ تحياتي لك

  14. الاخ جبرا والاخوه الاعزاء
    ليس المهم ان يوجه الرئيس بل الاهم هل يتابع تنفيذ قراراته ولا لا
    يعني بالواضح كده ما تخلى كسرتك
    موش هو برضو قال ما في مواطن يدفع الا بيصال 15 ومازال الدفع مستمر

    1. لا فض فوك بت وراق معك 100% ويا ريتها جات على اورنيك خمسة عشر دا ما كثير من القرارات عملوها ليهو حبر في ورق وشربها راجعة يمكن ما عنده مكتب متابعه قالوا هو طيبب ساكت (حاكمنا بي طيبته دي وبس هع )

  15. الحبيب البروف والسمار الاحرار الما عبدو درهم ولا دينار…
    مبارك مبارك النصر المؤزر وعقبال الخلاص الاكبر ,,
    وكية فى الحاقدين الخونة العملاااااااااااااء العارفين نفسهم !!
    ومدونتنا مدونة حرة ,, والكوز يطلع برة ,,, بررررررراااااااااااااااااااااااااااا

    1. احيك اخي ياسين شمباتي وبيني وبينك الكوز ما بيقدر يدخل قمردينتنا لانها فيها روسين (ما جيفه وكده) وهنا الناس فاهم مش ناس قريعتي راحت البلموهم في اللواري والباصات على الساحه الخضراء ويهتفوا زي ما كان اب عاج بيعمل وكل نظام شمولي اي مكان فيه اضاءة لا يستطيعون الدخول اليه احيك مره اخرى رغم اني ليس لي انتماء حزبي زول ساكت غلبان

      1. كوووووووولنا ما عندنا انتماء سياسى يا حبيب ,,,
        لكن الشينة بنعرفها والشيبنين بنعرفهم وبنعرف نقعدهم فى علبهم !
        و سى يا بدوى سى….

  16. سؤالى للبروف ….. كم مرة وجه الرئيس بتعليمات ولم تنزل الى أرض الواقع؟؟؟؟ أعتقد اكثر من واواتك

  17. الحمد الله فهمنا انو (كسرة) المعلم جبرا كانت (بفتح الكاف) … ولكنها إذا بقت مستمرة سوف تؤثر بلا شك على (كسرة) (بكسر اكاف) الناس وعاشهم واخلاقهم ….

  18. بسم الله وكفى .. والصلاة على نبيه المصطفى ..
    سبق وكتبت تعليق حكيت ليك فيه سيناريو المخارجة من موضوع النفايات والسبب حيطتك العالية وحيتجنبوا الإحتكاك بيك عشان الموضوع مايطول وتفضل تكتب عنوكل يوم … واهو خارجوك وما في زول كائن من كان حيدق بابك لقروش النفايات لا ستة ولا ثمانية .. وأتحداك لو جوك تاني أنا بدفعها ليك …

    1. يعني كلنا نعمل كده ايه رايك تحريض منك وتحريض مني الاولى منك الثانية مني يكون حلو لان الكثيرين لا يعرفون القمردينه الهادفه دي وصل لجارك واوصل لجاري والحبل على الجرار لحد ما نقطع دابر الشغلانه دي وكل شغلانه غير قانونية التحريض على الحق لا اعتقد انه جريمه

  19. الأستاذ جبرا
    تعليق تاني بمناسبة قرارات الرئيس ،، هل سمعت بأنو الرئيس أصدر قرار بمنع الجبايات على الطرق ؟؟ هل تم تنفيذه ؟؟
    هل سمعت بخطاب الرئيس في المجلس الوطني السنة الفاتت والذي حدد فيه سعر الدولار الجمركي ب 4.42ج ؟؟؟ هل سمعت بأن الضرايب بتحاسب التجار على الدولار بسعر مختلف ؟؟ وبمنشور رسميييي صادر من المدير التنفيذي لمكتب الأمين العام .. حتى القيمة المضافة بتحاسب التجار بأربع أسعار للدولار … كفاك ولا أديك صورة المنشور ؟؟؟
    عموماً أسأل عن القرار رقم 15/2012 لمكتب الأمين العام للضراييييب .. وفي صورة طرفنا لوداير تطلع عليها ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: