الأمن .. يجرح ويداوي (3) – (3)

دخلنا عبر البوابة الداخلية الزجاجية للمبني الفخيم حيث طلب منا (الأولاد) الدخول إلى أحد المكاتب .. المكتب واسع عليه كراسي جلوس وثيرة ويجلس عليه شاب (لونو فاتح) يرتدي بدلة سفاري (بيج) ما أن رآني حتي (وقف حيلو مبتسماً) قائلاً:
– أهلا بالاستاذ جبرا … وعدد من عبارات الترحيب ثم أشار لنا بالجلوس ملتفتاً إلى (بت وراق) قائلاً لها :
– أهلاً يا أستاذه
– فأجابته بت وراق : ما سلمتا عليا بإسمي ليه ما إنتو بتعرفو أى حاجة
إرتبك الشاب وسألها :
– الأستاذه إسمك منو يا استاذه؟
– فقالت له : (إسمها الحقيقي)
في هذه الاثناء جاء من يطلب مننا هواتفنا الشخصية (للفحص طبعن) ، إستنكرنا ذلك بحجة أن ذلك غير قانونى ولكن (القانون هو ذاااتو وينو) ، حملها شخص وخرج إلى جهة غير معلومة . ثم بعد قليل طلب مني احدهم أن أرافقه فذهب بي إلى مكتب آخر وجدت فيه شاباً في منتص الثلاثينات تقريباً نحيفاً طويل القامة ، حياني بأدب وطلب مني الجلوس فجلست على الكرسي المقابل له :
– يا استاذ أنا عندي مهمة ولازم أقوم بيها
– مافي مشكلة أعمل إجراءاتك ولازم تعرف إنو نحنا ما تجاوزنا القانون
– ممكن أعرف الحاصل شنو يا أستاذ؟
– (حكيت ليهو القصة كووولها)
– كويس إنك أديتني خلفية عن الحاصل .. ممكن بس شوية معلومات .. ثم بدأ يسأل وأجيب ويكتب
– الإسم
– العمر
– المهنة
– المعاك دي منو؟
– كنتو بتعملو في شنو؟
وهنا دخل إلى المكتب شاب خوالي الأربعين من العمر معه بعض الأشخاص .. وقف له الجميع إذ يبدو أنه المسئول حياني قائلا:
– إذيك يا أستاذ يا قامة !
– في قامة بيركبوهو في ضهر البوكسي ويتعاملو معاهو كده ؟
– لم يجب على حديثي ودلف مواصلاً :
– موضوع النفايات ده بيهم كل مواطن لكن يا استاذ إنتا عارف الحاصل في البلد عشان كده الوقفات الإحتجاجية والتجمهرات دي عندنا خط أحمر خاصة منطقة السوق دي يعني لو حصلت أي حاجه ممكن تحصل فوضى لا يمكن السيطرة عليها !
– ياخي أنا لو عاوز اعمل فوضي ومظاهرات أنا عندي 125 ألف شاب رهن إشارتي بس عاوزني أأشر ليهم بصباعي لكن نحنا برضو عندنا فهم إنو ده ما يحصل في الوكت الحالي عشان ما تحصل الفوضى البتتكلم عليها دي .. أنا أولادي ديل أكتر من كل الأحزاب الكرتونية الشايفا دي
– عموما يا استاذ نحنا بس التجمهرات والوقفات الإحتجاجية دي عندنا خط أحمر ّ
– ما مشكلة خلاس نوسع مواعيننا التانية
– خلاس ممكن يا أستاذ تمشوا
ونده على أحدهم قائلاً : رجع الاستاذ بعربيتي !!
وعند خروجنا مررنا على المكتب الذي تم فيه إستجواب (بت وراق) وجدتها تنتظرني .. قام أحدهم بإعطاء (الهواتف) إلى (المسئول) الذي سلمها لنا وخرجنا من المبني وهو يرافقنا إلى ان ركبنا في العربة (الأكسنت) ..
– سألني السائق : نرجعك المحكمة يا استاذ
– لا ودونا محل عربيتي لو سمحتا
في الطريق كانت المكالمات تنهال علي هاتفي للإطمئنان وعلمت حينها أن الخبر قد تناقلته الأسافير !!
كسرة :
(الأولاد الصغار يهينوك) ولمن تجي للمسئولين (يحترموك) ويعملو فيها ما عارفين (الإهانات دي) … سبحان الله !!!!

كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟

8 تعليقات

  1. كسره
    عماره الرياض

  2. يعني بوظت البرنجيه ياعبيد !

    تحيه للاستاذ الهمام الرفيييق بتاع المعتقلات جاتك في كرامتك سامحتك ” كرامه دي بت عم سمايه ”
    والله ضحكتني ياجبروت زعلان من الزجر احمد الله بقت علي كده مع انو متاكد في اكتر من كده ::::: وماجابت خرطوش كارو المويه كان دفعت النفايات والمويه بي مقدم سنه قدام >>>هههههههه نفداك والله

    كسره
    شعورك شنو وبت النفايات جاتك بكره وقالت ليك بابتسامه اهااا كده عجبك ؟!
    كسره تانيه
    اتوقع مواضيعك تاني عن الكوره والابراج …

  3. السلام عليكم
    “المشار تلكنا” ماعوايد البروف يكتب يوم الجمعه لكين مشارو تكار “لزوم تغتيه بالراندوك وكدها”-زيت السمسم بداوي الكعب الاندراوا!!!

  4. اها عاوزين نغير الكسره يابروف

    تحقيق جامعه الرباط الحصل فيه شنو ؟؟؟؟؟؟؟

  5. اااااااااااااناس الكسرة والا الكسرة (هاك حاجات البلاغة دي) ولا الاصفهاني انا شايف انه الكسرة الاساسية في الكسرة بعدين يا جنوبي لا تشرح لصاحبنا ممكن تكون غميسه شوية عليهو مع شوية شمار وكسبرة وكمون وكده وانا كسرتي ما بغيرها كتمت كتمت كتمت كتمت كتمت

  6. وصيتى للبروف عدم ترك الكسرة القديمة لحدى ما ترجع حيطتنا القديمة

  7. الجماعة ديل حتي لما يداوو مداوتم زي دكتور الاسنان
    البيحشي بدون ما يكتل العصب لكن صراحة كبارهم
    بكونوا هم زااتم ما مقتنعين بالبيعملوهو لاكين مجبورين ..
    بالله عليك تمسك لينا في اورنيك 15 ده لمن يكورك عشان
    معظم سبب مشاكلنا بي سبب التحصيل البدون ام اورنيك 15
    ويمكن يقطي لينا عجز الميزانية كمان واقلوا المراجع
    العام يقدر يورينا نحنا اتسرقنا كم !
    الكسرتين ممكن تضمهم في واحده وتبقي
    16و ( ق ت ر ) + و ( ب ت ر ) قبل توجيهات الرئيس
    وبعد توجيهات الرئيس ..
    اتمني انو هواتفكم تكون ما فيها صور خاصة عشان الثعلب
    ده مكاااار تتوقع منو أييييي حاجة !!
    اها وعرفنا الامن ما عجبوا التجمهر الانت عملتو عشان
    تدعم توجيهات السيد الرئيس طيب الرئيس شعورو كان
    شنو تجاه دعمك لي توجيهاتو ؟ ( لالا ما استفهام الاصح
    علامة تعجُّب ) ..

    1. اخي جنوبي دا كلام البروف ( ياخي أنا لو عاوز اعمل فوضي ومظاهرات أنا عندي 125 ألف شاب رهن إشارتي بس عاوزني أأشر ليهم بصباعي لكن نحنا برضو عندنا فهم إنو ده ما يحصل في الوكت الحالي عشان ما تحصل الفوضى البتتكلم عليها دي .. أنا أولادي ديل أكتر من كل الأحزاب الكرتونية الشايفا دي
      – عموما يا استاذ نحنا بس التجمهرات والوقفات الإحتجاجية دي عندنا خط أحمر ) اها رايك شنو ّيكون بداية لتكوين حزب حقيقي مولود من رحم الذين يفهمون وليس حزب هتيفه او شلليات لا تخدم البلد باي شئ وصدقني لو وجد الدعم والمساندة سيكون بعبعا لكل الاحزاب كان ناس جناح ام جكو ما عندهم شئ وما عندهم شباب وكان لي ناس سيدي انسى اصبحوا زي المرارة وبرضه لا عندهم شباب وكان للناس الحمر بمختلف مشاربهم اصبحت دقه قديمه وهوس انتهى حتى في بلاده وكان لي اكثر الناس حداثه يعني ناس الانتباهه وكده فانسى قطع من نفس النسيج ما فيش حد محترف بها او عاوزها يكون حزب حلوه كده وكله قانونين وناس فاهم وطبقه مستنيره ونعمل ونعمل ونعمل حتى نكون شوكه في الخاصرة وبالحق انا اول واحد شوف انت وبقية اهل القمردينه تحياتي مره ثانية

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: