هيثرو تااااني

إحتل خبر توجيهات السيد رئيس الجمهورية بخصوص فقدان خط هيثرو والذي وجه فيها سيادته بمحاسبة الجهات الضالعة في فقدان السودان لخط هيثرو الجوي وإعادته أو إعادة قيمته إحتل الخبر الصفحات الأولي بالصحف كما إحتل صدر النشرات الإعلامية وتناقلته وكالات الأنباء العالمية وأثار كثيراً من التعليقات على المنتديات والمواقع الأسفيرية .
العبدلله توقف كثيرا في عبارة (أو إعادة قيمته) يعني الجماعة الباعو (الخط ده) يرجعو القروش الإستلموها .. العبدلله يعتقد أن الأثر سوف يكون أكثر وقعاً طيباً لدي المواطنين لو أن السيد الرئيس إستخدم كلمة (محاكمة) بدلاً عن (محاسبة) ولو أن الكلمتين تعطيان نفس الدلالات إلا أن القانونيين قد درجوا على إستخدام كلمة (محاسبة) عند النظر في الأخطاء الإدارية والإجرائية وفق اللوائح المنظمة للعمل .. وتكون دائماً جهة الفصل في هذه الأخطاء مجالس يشكلها رؤساء الإدارات المعينة من أجل تطبيق اللوائح على الشخص المحاسب (بفتح السين) والذي غالباً ما يكون قد أهمل في اداء واجبه بشكل أو آخر (يعني كثير الغياب) .. ما قاعد يحترم الرؤساء. ساق عربية المصلحة مشوار خاص .. !
اما مخالفة القانون الجنائي في أي دولة فالآلية التي تتم بها معرفة إن كان الشخص قد خالف القانون أم لا فقد درجوا على تسميتها (محاكمة) والمكان الذي تنعقد فيه (محكمة) !
لست خبيرا قانونياً ولكن من قاموا ببيع هذا الخط قد إرتكبوا أفعلاً يعاقب عليه القانون الجنائي وقد خالفوا كثيرا من مواده ، ولو القصة بقت (شريعةوكده) نشوف هل (العلماء أطال الله أعمارهم) بيشوفوا إنو دي هل دي (سرقة حدية) وللا أقل من النصاب؟
بغض النظر عن الحاجات دي كووولها .. طيب في حالة إنو الشعب السوداني (سيد الخط ده) وافق على إستعادة القروش وإنو الخط راح (في حق الله) طيب هي القروش الإتباع بيها الخط هي ذااااتا كم ؟ ونعرفا كيف؟ لو المال المسروق ده إستلمو زول داخل السودان إحتمال الزول كان يقبضو ويعمل ليهو (الطيارة قامت) يقوم يعترف ويقول أنا أشتريتو من الجماعة ديل بالمبلغ الفلاني .. لكن الإشتروهو خواجات وهم خارج السودان وحتى لو قالوا أشتريناهو بي كده.. نصدقهم كيف؟ أها كيف العمل ؟ نمشي (للتومة الوداعية؟) التومة زمااان قالت قولتها المشهورة (قضية الخط دي أقنعوا منها)
ممكن (واحد ألمعي) يقول ما نسال الجماعة ديل ذاااتم نقول ليهم بعتو الخط ده بى كم ؟ الناس ديل مش مسلمين وعارفين إنو (الكضب حرام) والقبر قدام؟
عموما مسألة الخط إتباع بي كم والبائعين قبضوا كم و(السماسرة قبضوا كم) وتحديد الرقم الحقيقي دي العبدلله يعتقد إنو لا توجد طريقه لمعرفتها والتثبت منها ! وبعدين مش ممكن (الجماعة ديل) يكونو باعوه (كسر) وده مش سعرو الحقيقي ؟ في الحالة دي (الشعب الصابر) ده مش راحت عليهو ملايين الدولارات فرق سعر؟!! أها دي يعملوا فيها شنو؟
طيب نقول مفترضين أفتراضا لا أساس له من الصحة بأنو واحد منهم عندو (ذمة) – أقر وأعترف بالقيمة الحقيقية للصفقة طيب (قروشنا دي) لي هسه بعد ستة سبعة سنين (خاتنها عندهم) بقت كم؟ لو أن البيعة تمت بقيمة 30 مليون دولار (كما يشاع) والقروش دي وضعت كوديعة متراكمة في اي بنك أجنبي بنسبة 17% (مثلاً) ضربوها بتعمل كم؟
إن عدم المطالبة بهذه الفوائد لهي دعوة صريحة لكل مؤتمن على مال أن يلهط أكبر كمية منه ويختفي عن الأنظار لسنوات ثم يعود ليقوم (بإعادته) بعد أن تتم (محاسبته) ويا دار ما دخلك شر !!
إن التعامل (بسرية) في هذه الجريمة وعدم تقديم المتهمين إلى محاكمة علنية يهزم تماماً قاعدة عدلية عامة شدد عليها الإسلام وهي تساوي الجميع أمام القانون فلا يمكن أن تقطع يد (محاسب مدرسة وادي سيدنا) من الكف لإختلاسه 1200 جنيه (بقروش ذلك الوقت) وتتناول إسمة ومحاكمته الصحف ثم يتم (التفاهم) مع هؤلاء اللصوص (من وراء حجاب) !! وكما قال مكارثي (1924) “Not only must Justice be done; it must also be seen to be done.”
ليس فقط يجب إقامة العدالة ولكن أيضاً يجب مشاهدتها وهي تنفذ !
العبدلله يري ان هذا الملف يوضح تماما وبدون أي (لف ودوران) مصداقية (الحكومة) في تعاملها مع الفساد والمفسدين وهو ملف لا يحتمل (أى واوات زيادة) بعد توجيه السيد رئيس الجمهورية كما لا يحتمل (التسويات) فيجب أن يقدم كل من ضلع وولغ في هذا الجرم الشنيع إلى القضاء فوراً في محاكمة علنية يراها كل أفراد هذا الشعب (الفضل) المغلوب على أمره الما عارف يلاقيها من وين وللا من وين !
كسرة :
وأهو منتظرين !!

كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟

Advertisements

49 تعليق

  1. هيثرو القضية اللتي حيرت المحقق كونان بعقله

  2. أخشى على توجيهات السيد الرئيس بخصوص محاسبة الضالعين فى قضية بيع خط هيثرو ، أن تلحق توجيهاته بخصوص زيادة الرواتب التى ما أن أعلن عنها حتى زادت الأسعار ، علماً بأن هذه الزيادة – الطفيفى – فى الرواتب لم تنفذ حتى الآن ، والله يكضب الشينة

  3. ما ضاع حق ورآه مطالب ، لي فوق

  4. قول عرفنا القيمة الحقيقية وصاحبنا رجعها للخزينة .نضمن كيف انو ماتمشي لي واحد زيو بصورة او باخرى (تجنيب مرابحة اختلاس تجاوزات مالية او حتى صرف بذخي مثلا)

  5. السلام عليكم
    ياخ انا عندي سؤال الخط دا راح في عهد اي وزير مواصلات ؟؟؟ الكان سائقها منو الوكت داك ؟؟؟؟

      1. ههههههه,,ختااااااف لكن ,,,

    1. صلاح كرار ولا صلاح قوش وهيييييييييي يكا

  6. و منو الإشترى الخط ( اقصد ياتو خطوط جويه)

  7. 30 مليون لى خط هيثرو ياجماعة الخير مافى زول يشترى منى خط الصحافه زلط

    1. انا حجزت خط الشنقيطي يا ابحمد

    2. سمعنا بي خط 6 وخط 18 وخط الاستواء
      لكن خط 30 مليون ده الا يكون هيثرو (تبا لاكتشافاتي )خط هيثرو وينو اكلو الدودو خط هيثرو وين راح بلعو التمساح (الغريبه انو التمساح هو الحيوان الوحيد الزي لايمكن اخراج لسانو)

      1. تباً لهم (بالإنجليزى)

    3. وبالعربى كمان…
      تفوووووووووووووووووو

      1. وبي لغة الطرش كمان ؟؟؟؟

  8. أكدت لجنة النقل والطرق والاتصالات بالبرلمان ان التحقيقات في قضية بيع خط هيثرو مازالت مستمرة ولم تكتمل حتى الآن وكشفت اللجنة في الوقت ذاته عن عزمها مساءلة وإستفسار وزير النقل والطرق والجسور د. بابكر أحمد نهار عن الخطوة الإستباقية التي قام بها والمتمثلة في إطلاع رئيس الجمهورية على نتائج التحقيق في القضية قبل فراغ اللجنة المكلفة بالتحقيق من مهامها ورفع تقريرها النهائي للوزير .

    وإنتقد رئيس لجنة النقل والطرق والإتصالات بالبرلمان أوشيك محمد احمد ما تناولته اجهزة الاعلام مؤخراً عن محاسبة ومعاقبة المتورطين في ضياع خط هيثرو ، وقال ان التقرير النهائي بشأن القضية لم يرفع لوزير النقل ، مبيناً ان لجنته لديها ممثل في لجنة التحقيق وأنه اكد في اخر تنوير ان التحقيقات الخاصة بالقضية لم تكتمل حتى الآن وأن اللجنة لم ترفع تقريرها النهائي لوزير الطرق .

    صحيفة آخر لحظة
    كسرة
    ياود جبر بعد اعتراف (الشريف ودبدر) بتحمل المسئولية كاملة عن الخط وقبل رفع لجنة التحقيق قرارها )رائك شنووووو؟
    كسرة تانية الكتور يرفع التمام ليه قبل ما تجيه النتيجة زاتوووووو

  9. انت نسيت الوازع الديني يا بروف

  10. يا بروف ما نحن اتفقنا …… دايرين الحيطة زااااااتا

    1. اشد على يك اخي عتباني حيطتنا زااااااااااااتا انشاء الله نمشي فيهو القطر هع كع كرع

  11. نحن دايرين حيطتنا زااااااااتا أو حكم القانون …يا اخواننا انما هلك الذين من قبلكم انهم كانوا ……….؟؟؟ ولا ما في داعي للتغول علي سلطات علماء السلطان.

  12. ياأستاذ جبراء أنا خايفة عليك إنت ذااااااااااااااااااتك

    1. ع لسان الاستاز : ده انا غلبااااااااااااان

  13. حليلك يااخوى جبرة مش ناس البرلمان قالو لسة التحقيقات ما خلصت وعايزين يستدعو نهار…. ياها الدغمسة زاتها…. عجبى!!!!!

  14. سوداني في هيثرو مستني الخط يفتح | رد

    الخوف يبيعوك انت عشان يرتاحوا منك

    1. وهو في حد من الشعب الفضل ما اتباع هااااااااااااع بس يا اخي اللي في هيثرو تقدر تقول فرفرة مذبوح

  15. سلام ياقبيلة،،
    ليس هو مكارثي يا صديقي الذي قال برؤية العدالة وهي تنفذ يا أستاذنا الفاضل جبرا، ولكنه خالق الكون ومدبر الأمر رب العالمين وهو أدري وأعلم بخلقه حينما قال وهو أصدق القائلين جلّ في علاه (وَلْيَشْهَدْ عَذَابَهُمَا طَائِفَةٌ مِّنَ الْمُؤْمِنِينَ)، سورة النور الآية 2

    1. وبهذا يا صديقي تتم فوائد عظيمة لكل الناس بالتطبيق المشهود للعدالة بين العالمين ومنها معرفة المظلوم بالإقتصاص له ورد حقه وفي ذلك طمئانينة له، ومنها ردع ضعاف النفوس من أخذ حقوق الآخرين بغير الحق، وكذلك إشاعة العدل والمساواة وسط الناس فيحيوا ويعيشوا في أمن وطمأنينة طالما أن هنالك عقوبات نافذة وناجزة ورادعة تطبق علي رؤوس الأشهاد..
      قال مكارثي قال!!!

      1. ود الخلا الحسانى الاكبر !
        هههههههههههههه..
        سلامات..
        تغيب وتغيب ويجيبك مكارثى ! عافى منو اب زرد دا ….
        تحياتى…

      2. مكارثى يا راجل
        مكااااارثى
        ياعمى مكارثى إللى كل ما كارثه تحصل يقول ليك دى إبتلاءات

      3. اشد على يدك اخي ود الخلا وكمان مني انا طظ والا (طز) في مكارثي بس عاوزنها شريعة عدييييييييييل كده لكن يا ترى بيقدروا عليها الناس البتكلموا عنها ما غلبتهم عدييييييييييييل كده رغم انها ساهلة وسمحة ولن يشاد الدين احد الا غلبه تحياتي لك ثانية

    2. لا لا يا جماعه في دي انا مع ود الخلا لأنو لمن ربنا يقول
      فكل مكارثي يرجع جحرو !
      اها يا ود الخلا ونعمل شنو مع الحكومة اللابتسمع كلام
      ربنا ولا بتسمع كلام بشر دي ؟
      ليييه ما شهدتنا يوم واااحد عذاب المفسدين ديل ؟

      1. اخي جنوبي نعمل ملتوف ونفتح صدورنا وعندها تقول بم وتروح الكتمت وتجي الشريعه السمحه

  16. حكاية خط هيثرو دي زكريني حلاق الرئيس
    قال ليك الريس كلو ما يمشي يحلق الحلاق يفتح لي موضوع اوكامبو ويقول لي (الحلاق للريس :انتا عارف ياريس اوكامبو ده زول حيوان وزفت كمان
    يوم الريس زهج منو قال لي :انتا مالك كسار تلج كده وزهجتني بي اوكامبو ده كلو مره اوكامبو ده راجل حيوان اوكامبو جبان وشنو شنو كده ماعارف
    الحلاق :ماكده ياريس بس انا لمن اجيب ليك سيرت اوكامبو شعر راسك بقيف وكده بتساعدني ف الحلاقه



    اسي يابروف خط هيثرو ده هتتوزع قروشو دي كيف؟ده لو الحرامي رضا بي انو يرجع القروش زي قروش طريق الانقاز الغربي

    1. انا داير حقي خط ان شاء الله يجيني خط رقيّيييييق وما عافي لي أي زول يستلم
      نصيبي تعويض ..!

    2. تسلمي قوية حلوه وملعوبة بس متل ما قال للحلاق اخاف يكون برضه قال لينا الكلام دا ساكت ما في كلام كثير قالوا وكسروه ليهو عدي زي كانه ما فيش هع والا رايك شنو

  17. حا نرسم ليكم الخط ده ،، ومعاهو خط بنزين ،،، والبفتح خشمو تاني حا نبيع خط الفقر ذاتو ،،؟؟

    1. عليك الله بيعوا لأنوا مشاكله بقت كتيرة وترنا منو عديل كدة

      1. قصدي فترنا وليس ترنا

  18. بالمناسبة يا بروف والأخوة الأحباب
    القضية دي كبيرة (أكتر من كيلو) جدا وأمبارح لعلكم قد قرأتم تعليق عضو البرلمان منو ما عارف الكان ممثل في لجنة التحقيق… مطالبا البرلمان مسائلة (بابكر نهار وزير النقل) انو كيف يطلق تصريحات لرئيس الجمهورية دون أن تكتمل التحقيقات….. وهو زاتو قال ما وقع على تقرير اللجنة….
    يعني يا بروف الكلام دا معناتو
    أهنأ بطول سلامة يا اللهطت قروش الخط…
    انشاء الله يضوي ليك بعدين

    1. يعني راح نعمل من البداية ثاني وكل برلمان واحنا بخير دا نا غلبان

  19. قال ليك الديك و الكلب و الحمار عاملين زيطة شديدة قامو ناس الامن بتاع البلد الامازوني قبضوهم وودوهم للريس الريس سال الكلب:
    الريس: انت يالكلب مالك تنبح النهار كولو
    الكلب: و الله يا ريس زمان كان في كم حرامي بنبح عليهم هسي البلد كولها حرامية بقوم بنبح عليهم كولهم
    الريس: وانت يا الديك مالك تصيح النهار كولو
    الديك: و الله يا ريس قدمتو الزمن بقيت ما عارفو علشان كدة بصيح النهار كولو
    الريس: اها و انت يالحما جاي مالك
    الحمار: و الله ياريس انا زيك كدة ما فاهم اي حاجة

  20. انا صراحه ما عندي غير كتمت كتمت كتمت ولما تقول بم الكل بيتحاكم (وبالشريعة كمان ) يعني تلقى البلد كوووووووووولها بيد واحده بس هع كع كرع

  21. حيكومات تجي .. وحيكومات تغور ..
    تحكُم بالحُجي .. بالدجل الكجُور ..
    ومرة العسكري كسار الجبُور ..
    يوم باسم النبي تحكمك القبور ..
    تعرف يا صبي ..
    مرة تلف تدور .. ولا تقول برِي ..
    أو تحرق بخور ..
    هِم يا الفنجري .. يالجرف الصبور ..
    كل السمتو مات .. باقي على التمور
    وأرضك راقدي بُور ..
    لا تيراب وصل .. لا بابور يدور

  22. الحل اعاده الخط وتقريم من باعه قيمه تشقيله للفتره السابقه زائدارباح المده السابقه ومحاكمه ناجزه ورادعهً

  23. الله الله ربنا الله الله حسبنا – هذا صوت الشعب السوداني

  24. يا استاذ الفاتح الطرق المستمر على الحديد يشكلواز نحن نتمنى ان يستمر الطرق على كل قضايا الفيادز

    1. قضايا الفساد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: