الشرطة : بدون أورنيك ذااااتو

دق جرس الباب .. فتحته .. وجدت أمامي شاب في مقتبل العمر يمسك بيده ورقة ملفوفة .. بعد السلام .. إتفضل .. دخل وجلسنا
– والله يا استاذ أنا من المتابعين لمقالاتك الأخيرة وحثك للناس إنها ما تدفع إلا بأورنيك 15 لكن عاوز أحكي ليك القصة دي
– إتفضل
يوم الأحد الماضي الموافق 10 مارس في الضهر كده كنا واقفين مجموعة من الركشات قدام جامعة الأحفاد في إنتظار (الرزق) فجأتن يا استاذ وقف ليك دفار مليان عساكر .. تلبو من الدفار وكل عسكري دخل ليهو في ركشه
– يا زول أمشي قدام على القسم؟
– في شنو؟
– لمن توصل هناك ح تعرف
ومشينا قسم (الربيع) لقينا القسم مليان ركشات والناس واقفة ، في شنو يا جماعة فالو لينا (لجنة تنظيم ورقابة عمل الركشات) عملت حاجه إسمها (إستيكر) والأستيكر ده بي كم؟ قالوا بواحد وأربعين ألف (عاينو الواحد ده !!)
في اللحظة دي واحد من العساكر (خاطب الجمع) في لهجة آمرة :
– أي زول عندو قروش يجي هنا يعمل الإجراء والناس الما عندها قروش دي تخلي الركشات بتاعتا وتتخارج تمشي تشوف ليها قروش !
لحسن الحظ يا أستاذ القروش كانت معاي مشيت دخلتا على (المساعد)
– عاوز أدفع الرسوم دي وأعمل الإجراء القانوني
– أمشي صور لينا الرخصة وشهادة البحث
مشيت صورت الرخصة وشهادة البحث ودخلتا على (المساعد شرطة) تاني وأديتو ليهم قام دبسهم بالدباسة وجدعهم في الدرج ..
– جيب الواحد والأربعين .. الواحد ده أهم لينا من الأربعين ذاااتا
– هاك دي الواحد وأربعين
بعد ما عداهم وختاهم في (صفيحة مليانه قروش) قمتا سألتو :
– الإيصال وينو؟
– إيصال شنو؟ ما عندنا ليكم إيصالات .. أمشي للزول داك يعمل ليك شهادة
ومشيت للزول القالو ليا المساعد وعمل ليا الشهادة العاملة زي شهادة تخريج الروضة دي ! (وأداني الورقة الكان شايلا) :
إسم المالك – إسم السائق- عنوان المالك- عنوان السائق رقم اللوحة .. وأهم حاجة (سارية المفعول لمدة عام من الإصدار) .. عشان ده دخل سنوي معتبرشوف في كم ركشة في العاصمة بس !!
قال لي والدمعة في عينية :
مش حرام يا أستاذ الورقه دي بي 41 ألف ..والله يا أستاذ القروش دي نحنا بنطلعا لامن روحنا تطلع .. شوف بي بساطة وبالقوة الناس دي تجي تشيلا مننا .. !!
إنتهت المأساة .. بقي أن تعلم أن هذا الشاب لديه بكالريوس تربية جغرافية ولغة إنجليزية ودبلوم في شبكات الكمبيوتر ودبلوم في التحليل الإحصائي ودبلوم في الـGPRS ويعول أسرة مكونة من 7 أفراد !
كدي يا جماعة الخير قبل كل حاجة نسال السيد وزير الداخلية والسيد مدير عام الشرطة (دخل الشرطة بالموضوع ده شنو؟) ؟ إذا ما عندها دخل (تكون مصيبة) وإذا عندها دخل (تكون المصيبة أكبر) لأنها بتشيل قروش بدون ما تدي الناس دي إيصالات .. طيب الشرطة تشوف عاوزه ياتو واحدة في المصيبتين ديل وتتكرم بالرد علينا !!
بالله مش شئ مضحك ومبكي في آن واحد .. ونحن نعلنها حملة من أجل عدم الدفع بأي أيصال آخر ألا أورنيك 15 نقوم نلاقي الشرطة تشيل قروش الناس وبدون إيصال ذاااتو !! لا وكمان لو ما دفعتا يحجزوا الركشة ورزقك ينقطع وأولادك يجوعو وما يلقو البياكلوهو !!
طبعاً الشئ الطبيعي والمفروض يحصل في (حاجه تمس الشرطة زي دي) إنو (المكتب الصحفي) يسلم تقريرو اليومي (عما جاء في الصحف) للسيد مدير عام الشرطة .. يقوم السيد مدير الشرطة يقرا المقال ده ويطلب من مدير مكتبو الإتصال بالصحيفة وأخذ رقم هاتف العبدلله .. ويتصل فيني مدير المكتب يقول ليا السيد مدير عام الشرطة عاوزك في موضوع لو سمحتا تشرفنا بكرة الساعه عشرة صباحا .. وتقوم المدام تصحيني تقول ليا :
– إنتا ما عارف ولدك ده ممتحن .. قوم عشان تراجع معاهو شويه وتوصلو المدرسة !!

كسرة :
الإيصال الما 15 عرفناهو .. كمان بدون إيصال ذاااااتو ؟
كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟

Advertisements

36 تعليق

    1. مبروك البرنجيه و نحنا ما بنقول ليك كهربتنا قطعت لكن لا للتدخين في و قت الدوام و نحنا ناس ليل ساااااااكت

      1. ما حلوة منك يا طارق !!

      2. اشدو ناس ليل بس ما حراميه هع

  1. برنجيه من أمها يا علاء

    1. مبروكة عليك
      ما تكون بس زعلان من عوارتي 🙂

      1. فى ساحات الفرح المعبأ فى شاشة كمبيوتر معطر بأريج جبرا و نفحات ناعمه منكم ،،، الزعل مرفوع لحين ال Log out

      2. كان كدا الله لا جاب ال Log out

  2. معليش يا عمك ،،،حاميها …….
    حامضه يا شمباتى مووووش

    1. احمض من العرقى البايت !!
      هييييق

      1. يا حليل العرقي البايت يا شمباتي !
        هو زااتو بقو ما بيمهلوهو , بقي من القطارة
        وبالاسعاف طوالي !! الناس بقت شفقانه في ائ شئ ..
        عمر بابا + 40 حرامي = 41 !!

      2. ياسين شمباتى

        لا حول ولا قوة الا بالله !!
        دا شنو يا جنوبى !!؟ حااااااااااااااامضة وسمحة !
        هههههههههههههههههههههههههههههههههههااااى

  3. الناس دى فاطره جورج بوش ولا شنو مالم نايمين لى هسى مل فى زول بعبر

  4. والله يا بروف انا بقيت خايف عليك من ناس الضرب المصلح

  5. انت يا استاذ نسيت ناس عبد المنتقم واللجنة العليا للاستحلاب والعصر؟ دي نسخة من الحاضر والجايات اكتر! عش رجبا تري عجبا

  6. بتدعموا الميزانيه من ناس الركشات الشاغلين ليها المشوار (بخمسميه)!!!

    1. بعد دخلت عليها قروش الرقشات كمان الميزانية حتبقي
      عدمانه البركه نهائي لأنو كل بتاع رقشه وهو بيشغل
      ركشته مع كل جرة منفله حيقول بالساحق والماحق والبلاء
      المتلاحق .. ور ور وررررررر …
      هي لاكين ما ما باورنيك 15 بتخش الميزانية ؟

  7. يا سلام يا سلام … داير جواب للخواجة ،، كسرة: الخواجة جاء ممثل لشركة فتحت شغل في السودان ، حسب ما يروج له وزراء الإستثمار في الجولات الخارجية من إن السودان بلد مثالي للإستثمار وكده وتتعب السفارات في عكس وحه مشرق للعمل في السودان يقوم يجي الحالمون ،، البداية جميلة إستقبال وزاري أو بالعدم إداري وبعدين يخش السماسرة وغالباً ما يكونوا موظفين سابقين عارفين الخطوات ..
    والسيناريو يجيبوا للمستثمر واحد من الأقارب وغالباً قرابة درجة أولى يشغلوه مع المستثمر لزوم إستمرار النقاطة ،، يجيك الموظف ناس المحلية ديل لازم نمشي ليهم ندفع رسوم الترخيص ،، ترخيص شنو يازول نحن ماخدين تصديق من الوزير الوزير ذاتو !!! يرد الموظف ده ترخيص ولائي براهو ماعندو علاقة بالتصديق الإتحادي ،، طيب أديهم ،، وبعد يومين يجيك داير حق العوائد وبعد يومين حق اللافتة آي والله حق اللافتة ما عاجبك حيقلعوها ،، ناس النفايات ،، ناس الصرف الصحي ،، ناس التصاديق ،، تصديق : صحافة ومطبوعات ،، تصديق مصنفات فنية ،، تصديق مواصفات ،، تصديق إقامة ،، تصديق حركة ليلية ،، تصديق … تصديق …
    لامن تخلص كل المسميات برضو حيطلعوا ليك إسم جديد لتصديق ..
    والله عادل إمام ما عارف حاجة عن البلد دي …
    أدفع عشان ما يشيلو العدة وياريت كان بفايدة … جهنم ياده

  8. البروف العزيز
    السيد مدير عام الشرطة عاوزك في موضوع لو سمحتا تشرفه بعد تنفيذ توجيهات السيد الرئيس بخصوص ملف خط هيثرو …..

    1. يا عم مفيش حد عاوز حد قلع ساكت وهي كاتمه بس وووووووووووين الناس والله بم واحده كله يروح شمار في مرقه وانطلت داعاية الجماعة على البشر المستحمرين نان البجي منو سجم خشمنا كان السودان دا كووووووووووولووووووو ما فيهو البيجي بس عاوز محمد احمد يركز شوية هم زاتم جوووو من وين (من اي اتى هؤلاء) ووالله على طول صدقوني بم بم بم

    2. اشد على يدك آلمندهش الى المرور الى المرور الى الداخلية (وكمان بدون الجنيه الزايد في الايصالات الماها ارنيك خمستاشر)

  9. الحبيب البروف ,,,,
    صبحك الله بكل خير ,,,,
    والشرطة زى ما قال (سعيد صالح) !! عارفنها طبعا !!!!
    الهى وانت جاهى يلقوها فى سماعاتهم ودماعاتهم….

  10. زماااان بيقولو المضحك المبكي … الآن لا في ضحك لا بكا … كلنا بقينا الكاضم الكاظم

    1. نامل ان نكون كما قال الله تعالى( والكاظمين الغيظ ) بس كمان عشمي بعد بم ما يكون فيه العافين عن الناس

    2. الكاضم الكاضم لي بتين عاد بم بتطلع

  11. و الله لم تتغير قناعاتي يوم واحد في ان البلد تحتضر تحت سكين حزب الحرامية و راسهم الرئيس الراقص

  12. أستاذنا نحنا خايفين عليك من الجماعة الطيبين ديل

    1. عشان ما تخافي عليهو كلنا نبقى جبرا مش لوحده وارجع ثاني لحكاية الحزب يا ناس القمردينة هل من مثني

  13. و ياريت مدير الشرطة يفتي لينا في ايصالات المرور البي 50 جنيه و ما عليها اورنيك 15 في اليومين الفاتو ديل قطعتة واحد مكتوب عليهو المرور بس و ما اورنيك 15 الرجاء الافادة

  14. الشفيع محمد المبارك | رد

    لا للدفع بدون اورنيك 15

  15. لا هيثرو ولا بلو الناس ديل الديرنو بعملو وتوجيهات السيد الريس في خبر كان او اخواتها والفساد قد المصران عديل كده والله المستعان والله يعوضنا في الخط وفى باقي السودان زاتو

    والسلام عليكم ورحمه الله تعالى وبركاته

    1. بعد كلمتينك الحلوين ديل برضه يا اخوي يا ابراهيم عوض ما تدفع الا بارنيك خمستاشر ونشوف اخرتها انا شخصيا من يومين رفضت الدفع لناس النفايات قلت ارنيك خمستاشر والا دفع ما في

  16. اهلنا الطيبين السلام عليكم ورحمة الله وبركاته
    معقولة بس الواحد غاب ليهو فت شهر يجي يلقي الدنيا مقلوبة (يمنية) وبرياني كمان
    الله يكون في عونك يا بلادي ويا استاذ جبرا لك تحياتنا وكان الله معك …… والتحية والتجلة لاختنا بت وراق يا كنداكة القمردينة واخوانا عشاق القمردينة لكم مني اطيب التحايا والي الامام…….
    افضل الجهاد كلمة في وجهة سلطان جائر …. فالحق يعلو ولا يعلي عليه

  17. سلام يا استاذنا والله انا من كنت طفلة صغيرة بسمع انو الشرطة فى خدمة الشعب لكن الشفتوا انو الشرطة بتحب تزل
    الشعب والعساكر كلهم حاقدين وكارهين للشعب وناس ذى ديل تتوقع منهم اى حاجة فى الدنيا والرزق البيقطعوهوا ده هم
    ما جايبين خبروا وناسين انو فى رب بيأخد للمظاليم حقهم فى الدنيا دى قبل الاخرة
    وربنا يكون فى عون الشعب السودانى المسكين ده

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: