قال مخارجة قال

لم اصدق اذني وأنا أستمع لمسئول قناة الشروق وهو يطلب مني أن أتداخل في برنامج المحطة الوسطى مع ضيف البرنامج الشريف عمر بدر الرئيس السابق لمجلس إدارة سودانير والذي تم بيع خط هيثرو أثناء توليه هذا المنصب !
عدم التصديق يأتي بأن الرجل متورط في كل الأحوال فهو المسئول الأول بالشركة فإن كان يعلم ببيع الخط وهو يكتم الشهادة فهذه مصيبة وإن كان لا يعلم فالمصيبة أكبر !
وجاءت الحلقة والتي كان من الواضح فيها أن (أخانا) الشريف يعتريه بعض الإضطراب وعدم التماسك وقد أشرت إلى ذلك في بداية مداخلتي
ورغما من أن الحلقة قد كانت مخصصة لمناقشة (حال) سودانير وخصخصتها وخط هيثرو .. إلا أن (الشريف) قد طاف بنا في فاصل من النكات والحديث عن (سلخ النمل) وسرقة راديو حارس كبري حنتوب .. وطفق يسأل مقدم البرنامج إسئلة (لا في السما وللا في الواطة) من شاكلة (عارف ده هو راجل وللا مرا؟) وقضى معظم زمن البرنامج يتحدث عن حب الإخوة الكوايته لنا وعن (صناديق دعمهم) للشعب السوداني وعن الثروة الحيوانية والسمكية والسكة حديد والمواني البحرية والطرق البرية وإتفاقية إعمار الشرق وقرب يتكلم عن (هلال مريخ) !
في إفادات (الشريف) حول لماذا بيعت الأسهم لشركة عارف وعلاقته بالشركة أفاد (الشريف) بإنو ما عندو علاقة بالشركة وإنو جات براها !! (بالله ده إسمو كلام) .. وفي مكان آخر يفيد بانها قد دخلت منافسة وكان أكبر عطاء هو 40 مليون بينما قدمت هي 115 مليون دولار !
وعندما تم سؤاله عن (هل لشركة عارف تجربه في حقل الطيران) هذا السؤال الذي إجابته هي (يا عندها يا ما عندها) زاغ أخونا (الشريف) من السؤال بان قال انها تمتلك 60 شركة لكن (الشريف) لم يذكر أن كل هذه الشركات ليس بينهما جميعا شركة تعمل في مجال الطيران لا من قريب ولا من بعيد ! )ياخ لو عاوز تشغل ليا سواق في حافلة ح تسألو : إنتا سوقتا ليك حافلة قبل كده (!!
وكلما جات سيرة عارف أخذ (الشريف) في كيل المدح والتناء للشعب الكويتي والحكومة الكويتية ظانا ومتوهماً أن مثل هذا (الكلام المقدد) يصلح أن يكون إجابة للسؤال (على أي اساس جئت بعارف لتكون شريكا للناقل الوطني )؟!
من هنا عزيزي القارئ بدأت الدغمسة (التي إنتهت ببيع الخط) إذ لا يمكن بتاتاً أن يتم عقد شراكة وبيع أسهم ناقل وطني لشركة معرفتها بالطيران كمعرفة العبدلله باللغة التركمانستانية !! ولأن (عارف) لم تكن (تعرف) أي شئ عن صناعة الطيران فقد كان ذلك التخبط الذي دفع ثمنه أبرياء ماتوا في تلك الطائرة (الهكر) التي خدمت عشرين عاماً حسوما و التي إستقدمتها عارف والتي جثت على ركبتيها وهي تهبط من رحلتها القادمة من سوريا في مطار الخرطوم ..
(عارف) لم تكن (تعرف) أى شئ عن صناعة الطيران فقد بلغت خسائر (سودانير) في آخر اعوام (عارف) 56 مليون دولار !! بينما كانت خسائر سودانير قبل قدوم عارف تتراوح بين 10 و 15 مليون في العام !
ونتجاوز (عارف قيت) لنلج إلى دهاليز (الفيحاء قيت) والتي جاءت مشاركة بنسبة 31% باعها لها مجلس الإدارة الذي يترأسه (الشريف) إذ قام مقدم البرنامج بسؤاله : هل انت والعبيد فضل المولي أعضاء في مجلس إدارة الفيحاء؟ (وطوالي قام الشريف شتت الكورة) ولم يجب على هذا السؤال حتى نهاية الحلقة !!
بعد كل الكلام الفوق ده فإن (الشريف) ظل طوال الحلقة يردد (ويضرب على التربيزه) بأنه لا يعلم عن بيع الخط شيئاً وأنه يتحدي وزير النقل الذي صرح بتورط مجلسه في مسالة البيع كما ظل طوال الحلقة يطالب بسرعة تقديم الجناة إلى المحاكمة ..
وبعد الكلام الفوق التاني ده (التحدي وضرب التربيزة والأستعداد للمحاكمة) إذا بأخينا (الشريف) في نهايات الحلقة يخرج من جيبه ورقة وهو يقول (المخارجة أهى) ثم يقرأ بصوت (مترنح) ما معناهو أن عارف مستعدة للتعويض ودفع قروش الخط ( القال إنو لا علم له بإنو إتسرق) …!
كسرة :
ناولني الحبوب بسرعة يا ولد !!!
كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟

Advertisements

53 تعليق

    1. ودي ع اساس انو الموضوع خط جوي طيب hi نق تربيع
      وجيب نفس بس ماتطفيها

  1. ماهو عارف قدمو المفارق بري بري بري برنجييييييييية

    1. ههههههه,,,أقعد انت سويها غنا لمن ختفها الجنا اب رويس دا !!!

    2. سلام آآآآلمندهش حيطتنااااااااااااااااااااا زاااااااااااااااااتا لو جابوها في استفتاء

    3. قدلة يا مولاي حافي حالك في الطريق الشاقي الترام
      من علايل اب روف …
      كر عليك يا جبرا
      مافي اي صينية فاضية
      كسرة ومعاها اعتذار
      واحد قال انو جبرا كان هو السمسار بتاع الخط والحماعة دقسوهو ….ما لاقي الحبة …. عشان كدا قال يا فيها يا نطفيها
      ههههههههههههههههههه
      العهدة علي الراوي
      شر البلية يا اخونا المضحك المبكي

      1. الشاقي الترام بتاع هيثرو

      2. نفس جبرا الحار دا مو نفس سمسار آكتلوني والاداك الشمار ده الا كان عندو دقن هع

  2. ينصر دينك….

  3. الأخ الفاتح الغريب في الأمر الزول ده بس تقول سوبرمان شغال مسؤول اكتر من كم وعشرين سنه حالو مثل حال بقيه السوبرمانات الموجودين ،،،ااال ايه ديموقراطيه اااال،،،قيت واحده دي قيتات كتيره ،كسره واحده دي دشدشات ،،انا غايتو ما عارف دايرين خطنا ودايرين كمان نعرف في المره الجايه اين ذهبت قروش البترول ولماذا وقعت العماره ولماذا اصبح الفساد منتشرا بهذه الصوره ونريد نعمل مقارنه ما بين الحكومات منذ الاستقلال فيما يختص كل بند

    1. لا للمقارنات آآلعبيد هي لله هي لله هي لله

  4. حلوة …..(الشريف) دى

  5. سلام استاذنا العزيز الفاتح جبرا
    مداخلتك كانت جميلة وقوية وكلامك كلو في السليم وثابت والراجل الاسمو ما على مسمي دة اتجهجه وبقى بتلفت ويفتش فى التخارجو.
    كسرة:
    قصة صيوان عرس بنتو دى شنوووووووووووو؟
    شكلها كدة فيها فضيحة تانية.

  6. البروف العزيز
    كنت متوقع تسأل النكرة دا
    ليه ناس الكويت بحبو السودانين شديييد ما زي البلدان التانية ؟! غايتو أنا الشريف مبسوط منى !
    ويا بروف لازم انت تستفيد من بيع المعلومات للجماعة الوهم ديل مش قال ليك
    ( و الله دي معلومات جديدة لازم نستفيد منها في التحقيق) كلو بي تمنو ولا مش كده ؟
    يا ولد إتصل على الإسعاف !!!

    1. آخوي ما عارفين شنو دا دفن الليل اب كراعا بره بس قايلين الشغلانه حا تنوم اهي صحت بس حمسوا الجعلي اليتابع كلامه وتنكتو ليهو جنس دا اكان رقبته تستحمل ولي له سؤال لو لم يكن هناك اي سوء الا مسالة خط هيثرو ما بتدخل النار غايتو انا الغلبان ده بخاف من النار لو عثرة بغلة يا ربي سيدنا عمر كان مكشوف منه وبرسل رسالة (اااااااي كان مكشوف يا سارية الجبل) هع كع كرع الكتمة زادت واريتا الحكومة تركز

    2. ات ماك شايف آلمندهش كثرة اللافتات التي اكل الدهر عليها وشرب المشروع الكويتي للدواجن المشروع الكويتي للخضر المشروع الكويتي للما عارف ايه المالية الدنيا من زمن اب عاج تكون عارف دي برضه فلست بي الكويت هع والا شنو يا عمك شرق البحر كله رموت كنترول قف امامك مطبات كثيرة حدد هويتك اولا قطعنا البحر شرق وعارفين البغلة وين والابريق بتاع منو حتى التبروقه عارفينها بس الما عارف (ما تفتكرها عارف) يقول عدس تقبل مروري اخى المندهش

  7. ههههههههههههههههههههههههه,,الشريف دا اسالوهو من اللغف والمجغميات بس !
    ياخ دا نشف مدنى لمن فى بنوك قفلت !
    تقول لى شنو ؟
    وما بشبع كمان , لمن سووا ليهو وزارة براااااهو من العدم ! وزاااارة الاستثماااااار ,,,
    معا نشكل فولترون ,,,

    1. الغريبة كلهم ما بشبعوا يا ربي من اين اتى هؤلاء

    2. يا زول الـ(فولترون) شكلك جوباوي
      وازيدك من الشعر بيت
      ياسر شمبات

    3. ياخ دا ما فضل ليهو إلا شراب السجاير

      1. الغلبان…
        اتوا من كدة (واشار بيده اشارة ذات مغزى) !!

        كتلوك ولسه حى..
        لع ,, انا من جبرة !

      2. الحبيب طارق….
        هههههههههههههههههههههههههاااى,حامضة منك وفى التمنيات !
        ما ونس ,, ما أُكُل لبان ؟؟

    4. بنوك كده حاجة كانت بتعقدني في العربي ومعاها فوك بس بنوكنا اكبر بنك راسماله لا يتعدى الاربعين مليون دولار تخيل في جيب واحد هع فاهمني صديقي شمباتي (كيف تكون هناك تنمية)

  8. في الحديث النبوي الشريف
    إذا سرق الشريف تركوه

    1. اها كده فهمت يا ابو الشوش اذا سرق فيهم الشريف تركوه اكان كدي اسمي اولادي الشريف واحد والشريف اثنين وهكذا هع كع كرع مع تحياتي ابو الشوش

  9. سلام يا استاذنا …. انا بصراحة ما عارفة اقول شنو البلد دى حالها حيرنا شديد وكل الناس بتاكل فيها ومافى زول
    بيحاسب الناس البتأكل دى لانو ببساطة حاميها هو حراميها وربنا يعينا على الجاى

    1. التغيير يحتاج مع الدعوة والاعانة من الله الى حرق لساتك في نص الزلط مع تحياتي azza

  10. غايتو يالفاتح اخوى السويتا فى الشريف خلتو عكس اسمو
    بالله ده كلام ده
    بسبب صيوان اهدوهو له الكويتين فى عرس بتو يقوم يهدى ليهم خطنا المنحه الملكيه للشعب السودانى
    !!!!!!!!!!!!!!!

  11. إنما أهلك الذين من قبلكم كان إذا سرق فيهم الشريف تركوه وإذا سرق

  12. استاذنا هى بقت على الفيحاء قيت و لا هيثرو بس ، الخطوط البحرية السودانية اسأل قبل الأنقاذ كانت تمتلك كم باخرة و الأن كم .؟
    غايتوا الشريف ده ثعلب كبييير ، الفوق كييييييف القاتلين الدجاجة و خامين بيضها ..

  13. للأسف لم أتمكن من مشاهدة مداخلة البروف من شدة القهر وغليان الدم عندما ذكر هذا الغير شريف بأنه من
    عائلة معروفة بالزهد والتدين وأنهم أولاد ذوات وهلمجرا .. قاعد يمدح في نفسه ساكت لامن كرهت أبو الحلقة
    وإذا كان كما ذكر .. فهل يعقل أن يفعل ما فعله هذا الشخش وليس الشخص إذا كان يحمل او ينتمي الى هذه العائلة
    فحتما لا أجزم ذلك !! فلا بارك الله في من نهب مال وطنه وقوت شعبه وأساء لمن ينتمي اليها !!

  14. والله يا أخونا الفاتح أنا بخترح تفتحو موضوع الخطوط السودانية البحرية
    برضو موضوع مهم وما يقل عن الخطوط السودانية

  15. ما قاعدين يقولوا بسم الله علشان كدا ما بيشبعوا يا جماعه

    1. تقصد منو آآآآآآآآآود البلد الشواطين

  16. حسه عليك الله يا الفاتح جبرا شوف وقارن بين صورتك وصورة ود بدر ، الراجل مندي وشبعان ووشه لامع وانت اغبش ومغبر وشكلك اكبر من ابوه ،،، عرفت وين راحت قروش خط هيثرو؟ انا لو كنت مكان ود بدر ده كنت نطيت ليك جوه التلفون وخنقتك، لكن الراجل من عصرتك ليه ما عرف حتى يبلع ريقه، عجبتني يا ابو الرجال يا ود جبرا

  17. سلام ياقبيلة،،،
    يحكي أنه كان هنالك ملك يولم لضيوفه في صحائف من ذهب، وذات وليمة من ولائمه الفاخرة تلك قام وزيره الأول بسرقة واحدة من تلك الصحائف الذهبية وأخفاه بين طيات ملابسه، ولم يره أحد إلا الملك بنفسه.
    وجاء كبير الخدم يبحث عن الصحفة المفقودة، وبحث كثيرا” حتي كلّ، وسأله الملك عن ماذا يبحث، فرد عليه كبير الخدم بأنه يبحث عن صحيفة من الذهب فقدت في موقع الوليمة، فرد عليه الملك بأنك لن تجدها أبدا”، وتساءل كبير الخدم لماذا؟؟
    فأجابه الملك بأن من أخذها لن يردها أبدا”، وأن من رآه لن يوشي به أبدا”!!!
    وبعد بضعة أيام ظهر الوزير الأول وهو يتمنطق بسيف محلي بمقبض من الذهب الخالص، فغمز له الملك وسأله: أهذه من تلك؟؟ فأجاب الوزير بنعم…

    1. بعني الشريف باع خط هيثرو و إشتري خط الصحافه زلط

      1. هههههههههههههههههههههههه,,
        ركز فى الغامز يا حبيب !!
        لووووووووووول

    2. اااااااااااامك ود الخلا كش ملك

  18. “متورط في كل الأحوال فهو المسئول الأول بالشركة فإن كان يعلم ببيع الخط وهو يكتم الشهادة فهذه مصيبة وإن كان لا يعلم فالمصيبة أكبر ! “””

    يعني انت المسئول وبالتالي انت متهم ومن دوووون دليل كمان ..ايه رايك ! ….الدليل دا تجيبو انت عشان يثبت براءتك ياغبي
    والعوير يقوليك جيبو لي دليل يثبت تورطي وانا بنضم لعمود المصطفي وجبرا عشان نعرف الحقائق ..!!!؟

  19. ع قولت الفنان الشعبي شعبان عبد الرحيم (وعلشان خاطر الكوايته انا مش ح رد عليك و اييييييييييييييييييييييييييييييييي )
    شكلو باع الخط وعمل بيهو شارع زلط للمحبوبه والدليل شارع طابت ……..لكن برضو نناشد السيد الرقييص بي متابعة الخط ومحاكمة المجرمين بس ما يكون بي فقهه الستره لانو ده مال عام

    1. ايوه كده حمسو العارضه اقصد العراضه اقصد العارض هع اقصد يانااااااااااااس الرقيص لا فض فوك قوية

  20. يابروف والله ماعاوز احبطك لكن دحين بحكي ليك القصه الصغيرونه دي
    ١/ واحد مشهور استورد بضاعه ودفع جماركه وبعد دلك اكتشفو الساده فى الجمارك انو ورق البضاعه مضروب قدمو الزول لى محكمه الجمارك وحوكم فى جلسه واحد اى والله واحده بغرامه الف جنيه
    ٢/ العبد لله قدم ورق وطلع مضروب زي الفوق بتاع زولنا الموشهور ده يازول قبض اول حاجه حجز البضاعه من قوله تيت عمل تسويه بالقيمه زايد الرسوم زايد غرامه خمسين في ٪ ١٠٠ وبعد فتح بلاغ مع انو قانون الجمارك لمن يعمل. تسويه خلاص البلاغ انتهي ولي اسي الساقيه مدور ه

    المهم فى الموضوع انو القانون بالنص بقول في حاله عمل تسويه لا يقدم المتهم فى نفس الجريمه للمحاكمه
    يعني الشغاله لا قانون ولا الله قال كلو خارم بارم

    وبعد كانو حاكمو الناس الباعو ديل احلق شنبي الاصلو وقع من كثره الخلع

    بس الله يعينك

    والسلام عليكم ورحمه الله تعالى وبركاته

  21. الأستاذ الفاتح جبرا ،،، المداخلة وضحت جزء من الحقايق لكن يا أستاذ (أفلست شديد ) شنو الجايب ليهو صيوان لي عرس بتو دي !!!! ما عاااادي جداً يجيبو عرف يجيبو الطريفي ما دي طريقتهم … يعني إنت عامل فيها ما (عارف) أكيد ( عارف) …

    1. ماهو عارف قدمو المفااااارق ,,,

  22. الأستاذ الفاتح جبرا ،،
    أرجعك لموضوع النفايات ،، سكتو خلووووك ؟؟؟
    أفيدك بأنني قطعت شجرة في بيتنا لزوم إنها كبرت شديد ولنقل إنه تشذيب ،، وعشان أخلي البلد حضارية شلت الأغصان المقصوصة وطفت بها عشان ألقى برميل نفايات من سوق أمدرمان لمقابر البكري للملازمين وفي النهاية قطعت الكبري ولقيت برميل جنب محافظة بحري …
    فعرفت إنك ما دفعت قروش النفايات قام الجماعة شالو البراميل ووقفو العربات .. أزيدك معلومة سوق أمدرمان به 4 براميل :
    1/ برميل غرب الجزر (شارع الشنقيطي).
    2/ برميل شمال سوق الطواقي القديم (زنكي) الطواقي .. وللأمانة ديل برميلين ما واحد ..
    3/ برميل وسط سوق الأسكلا جنوب الجامع الكبير (من الأسكلا وحلا ) ..
    4/ برميل جنوب البوستة (وسط موقف أمبدة) ..
    إيه رأيك في الحصر ده ؟؟؟ لكن مع الأسف كل البراميل مليانة ومدفقة …
    أدفع يا جبرا ياخي خلي الأمور تمشي !!!!!!

    1. بالمناسبه دى ذاتا
      الأيام المضت كان صفق الشجر بيتساقط بكثره مما دعانا لإستبدال أكياس الوساخه السوداء العاديه بأخرى كبيره ، و لأن الحال فى دولة المشروع الحمارى عال فقد قام أبناء الشمس (الشماشه) بتفريغ الوساخه أمام المنزل و الإستفاده من الكيس الفاضى لجمع زجاجات المياه الغازيه الفاضيه لدفع عجلة تنمية مشروع العرقى لكل مواطن
      و دقى يا أمريكا

    2. النفايات من يوم قضية البروف عندنا في بحري (مو قبلي) باورنيك خمستاشر اها عكلته جابت والا ما جابت وعقبال ناس المروووووووووووووووووووووووور

  23. متورط في كل الأحوال فهو المسئول الأول بالشركة

  24. اخر دبرسة: تاسيس رابطة معجبى الشريف بدر– المقاعد محدودة قبل ان تباع

    ذهبت امس مع احد اصدقائى الى سوق مواشى جدة لشراء خروف سماية و كنا نتحدث فى السيارة عن حلقة قناة الشروق مع الشريف بدر بخصوص بيع خط هيثرو ونحن نترجل من السيارة سالنى صديقى …..يا خى باختصا ر ماذا فعل الرجل….و قبل ان ارد عليه …صا ح احد الخراف باااااااااع بااااااااع باع فقلت له طالما الخروف عارف المفروض الراعى يكون عارف و كلكم راع ……لكن انا حسيت ان الخروف وراه جماعة و عندوا اجندة ….الرجل ما باع… لكن عارف الباع والشبع و قال بااااع… على كل حال……تقديرا لمواقف الرجل فى رفعة المرافق التى تولى ادارتها …ولاية الجزيرة … وزارة الاستثمار…. مشروع الجزيرة و سودانير وحتى نستفيد من هذه الكريزما النادرة قررنا تاسيس رابطة معجبى الشريف ونسبة للظروف المادية الصعبة التى يمر بها معظم الاعضاء فقد اجاز مجلس ادارة الرابطة بيع امتياز تاسيس الرابطة علنا ………………………و مافى واحد يجى بكرة يقول ما………………….. عارف

    1. ما عارف بس العارفه كتمت كتمت كتمت ابو عمر وزي ما عندكم في المملكة الموظف الشامل هنا في دولتنا جمهورية الخرتيت عندنا الحرامي الشامل وبرضه في الشامل في المدارس الاصلا ما فيشا هع كع كرع وكتمت كتمت كتمت

  25. ياريت لو في زول يقدر ينزل لينا الحلقة دي لأنو أنا مالقيت الحلقة الكاملة ،،،

    1. اخي احمد الحلقه بعد دا الا تشوفها (تشمها قدحه) لكن لو رجعت لمقالات البروف تجد الاجابة وااااااااااااضحه خليك صاحي يا خ

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: