ما كنا كويسين

رسالتان وصلتي علي بريدي في نفس اليوم والغريب في الأمر أنهما تتحدثان عن نفس الموضوع مع إختلاف الأمكنة !
الرسالة الأولى (تحرش محلي) :
السلام عليكم .. والله ياعم الفاتح (واسمح لي اقول ليك عمو) ماعارفه زاتو ابدا من وين بس البقدر اقولو إنو نحنا في مشكله حقيقية في مشكله .
انا نشأت في بيئة مسالمه نقيه بسيطه انا وابوي واخواني من ناحيه دراسه كنت متفوقه وممشيه حالي ودخلتا الحياة العمليه اشتغلتا تبع الحكومه لأفاجأ بي حاجة غريبة وهي مسألة التحرش الجنسي .. زميلك في العمل عاوز يتحرش بيك .. رئيسك المباشر عاوز يتحرش بيك .. المدير (ذات نفسو) عاوز يتحرش بيك !!
حاولت اشتغل تبع كم مؤسسه سودانيه خاصه في داخل الانترفيو ومقابله العمل كنت بتعرض لعرض يا اما اقبل اني ابيع شرفي ويشغلوني يا اما انسي الفكره وكنت دايماً ببين اني قوية وبنتهي الموضوع باني بترفض
صبرت واتجهت للعمل في المنظمات الاجنبيه للاسف والحمدلله اموري ماشه وبتعرض بعد مرات لي حاجات زي دي بس برفض بي عين قوية لانو الناس دي بتقدرني لي كفاءتي ما لي حاجه تانية وقررت ابداً ما اشتغل في منظمة حكومية ومنعول ابو المعاش والتامين الصحي
بس بقت المشكله في المواصلات كل يوم انا بتعرض للتحرش بطريقه ما في المواصلات والله ياعمو جبرا انا ماسمحه السماحه ديك وبلبس محترم وكان ركبتا امجاد المرتب بخلص دا غير قصة جارتنا الاختطفا ولد قبل شهر بي امجاد ولمن قبضو بالع حبوب مخدرات) بتاعه هلوسه اسمها اكسسي )
مره كده قلتا إحتمال أنا بتخيل الكلام ده قمتا فتحتا الموضوع مع صاحباتي لقيت عندهم نفس المشكلة الناس يا عمو الفاتح ليه بقت ما بتخاف الله ومهووسه جنسياً كدا ليه؟
ونحنا البنات ديل هينين الاطفال العمرهم عشرة وخمسه وسنتين ديل ذنبهم شنو؟
غايتو أنا دي شخصياً كان عرستا بناتي قبل اولادي من سنتين بعلمهم كراتيه وكونفو وأي عنكبه طوالي كاسوري .. عشان نحنا ماناقصين ازية
وربنا يخليك لينا … وطمنا صحتك كيف ؟
بتك مودة

الرسالة الثانية : (تحرش عالمي)
السلام عليكم يا استاذ
أنا واحدة من المعجبين بمقالاتك والتي أتابعها من خلال موقعك على الفيسبوك ، ما دفعني للكتابة لك شجاعتكم الملاحظة في محاربة الفساد بكل أنواعة والوقوف مع الحق ، القصة التي سوف أرويها لك تتعلق بنوع آخر من الفساد وللأسف من شخص يدعي تمسكه بتعاليم الإسلام والإنتماء لأحدي أحزابه.
القصة عن دكتور طبيب إسمه (……….) كان يعمل مستشاراً في السودان ً قبل أن يحضر إلى المملكة المتحدة ويقيم فيها منذ سنوات ، هذا الشخص يقوم بإغواء وأغراء الفتيات السودانيات اللواتي يعشن في المملكة المتحدة عارضاً عليهن خيارين إما أن يتزوجهن زواجاً سرياً وإما أن يقمن معه علاقة خاصة
وهو في ذلك يستخدم حيلاً وأساليب كثيرة غير آبه بسمعتنا كسودانيين بل غير أبه بكونه ينتمي لتيار إسلامي يتحدث المنتسبون إليه عن مكارم الأخلاق وفضائلها .
لقد حاول هذا الشخص التحرش بصديقة لي لكنها رفضت أي نوع من التقرب والتحدث الشئ الذي جعله يبدأ في مضايقتها وتهديدها بعدم التحدث عن الموضوع لأي شخص كان .
للأسف الشديد يا أستاذي فإن هذا الشخص له مكانته هنا والتي من الممكن أن يستخدمها للضغط على كل من لا تلبي رغباته الدنيئة .
أستاذي :
أرجو منك تعرية هذا الشخص وفضحه وطرح هذا هذا الموضوع بالشكل الذي تراه مناسباَ ، يجب أن ألا يهرب هذا الشخص من جرائمه التي إرتكبها ولا يزال وأضعف الأيمان ان تتم تعريته هذا إن لم يكن هنالك مجالاً لعقابه علي ما فعله .
عفواً يا استاذ : صديقتي الآن تعيش ظروفاً نفسية سيئة وهي خائفة مما يمكن أن يفعله بها هذا الشخص من أذى بعد تهديده لها بعد أن رفضت عرضه الدنئ .
أشكرك يا أستاذ وإذا أردت أي معلومات أخري .. أرسل لي .. تحياتي
إبنتك (س)
كسرة :
حليل مقنع الكاشفات .. نحنا الحصل لينا ده شنو؟ ما كنا كويسين؟
كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟
كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو؟

70 تعليق

    1. من جاكم ود عم الويندوز ده تاني يا عبيد وشمباتي
      تشموها قدحه ..

  1. السلام عليكم

  2. لا حول ولا قوة الا بالله
    دا كلو لاننا ما حاكمين بشرع الله ,,

    1. اجي ! هو نحنا ما حاكمين بشرع الله ؟ سمح حامننا العرقي
      لي شنو ؟

      1. هههههههههههههههههههههههههااااى,
        وانت الحماك ليو منو !!!!؟

      2. للاسف وين الشريعه يا جنوبى وبعدين العرقى ما كويس بيخرب ليك الكلى ومافى زول بيعالجك مع الجماعه ديل يعنى بتموت ساكت احسن ليك حكم الشريعه على روحك ههههه مع التحايا

      3. عشان مضر بالصحة اجنوبي

    2. ابو ايه -اشرف
      مشتاقين ومن زمن ما شفناك
      دا كلو كوم و دا كلو لاننا ما حاكمين بشرع الله !! كوم براها
      عاوز لي فهامات والله ،،،، حد عندو ؟؟

      1. المندهش شوقنا بحر
        بصراحة حاولت اعتزل قراية الاخبار والصحف وحتى كتابات عمنا جبرة لانى خايف يوم اموت من الضغط
        بس ماااااااا بتقدر دى بلدنا نعمل شنو لازم نتابع الاخبار ونشارك لعل الله ان يفرج الهم
        موضوع الشريعه ما داير ليه فهامات منو القال ليك نحن حكمنا بالشريعه قبل كدا وين وبتين

      2. ابو ايه -اشرف
        كلامك دا كلام شنو يازول ؟ سمع أضاني قالوا نحن حاكمين بالشريعة الإسلامية وعندنا مشروع حضاري عشان نحكم العالم دا أجمع ونقود العالم كلو !!!!!
        بس وصلنا لحدي وين في قيادة العالم دا ،،،،، والله ما عارف !!

      3. ما وصلنا ولا حانصل بالطريقة دى لاننا ماشى لى ورا مش لى قدام
        والقال حاكم بالشريعه دا منو والخوف يكون من الجماعه المسفسفين حق الشعب
        والمشروع الحضارى واضح وباين من حالتنا دى

  3. الجوه ديل نتاج المشروع الحضاري الجابوهو لينا الشيوخ
    القبضوا معاهم حريم في نهار رمضان ..
    والبره ده مجاهد ماشي ينشر المشروع في بلاد الكفر !
    غايتو الجوه ديل يا بتي الا الكراتيه زي ما قلتي لاكين
    الزول الفي المملكة المتحده ده راس مالو بلاغ صغيرووني
    في الشرطه يمين يجهجهوه ويجهجهوا حكومتو الجابتو هو قايلم
    بتاعين شريعة بوبار ديك تطبيق كاتم صوت ..

    1. جنوبي يا بتاع الدرر جهاد بره وجوه ههههههههه مش غريبه كلهم زي بعض اتاري الكوز جواه الشيطان

  4. زمان كان المثل بيقول (عش رجبا تري عجبا) يعني بعد كل سنة تظهر حاجة عجيبة لكن الان بقي كل يوم تظهر حاجة عجيبة واليوم التانب تظهر حاجة اعجب – التحرش دا في عالم الكفار لو ثبت الزول او الزولة طوالي يشيل باقي حاجاتو ويتخارج من غير مطرود –
    التحرش الداخلي دا مقدور علية لكن البقي عالمي دا امرو غريب وداير لية دراسة – والدكتور دا ممكن يكون مريض نفسيا وعاوز لية علاج – بعد شوية ح يكون في تحرش من النساء علي الرجال – ربنا يستر

  5. الشباب بقى مقتنع تماماً أنه أي بت بقدر يعمل معاها أي حاجة وأنه الشغل ده بقى ساااهل و جاااهز

    وأسهل من شرب الموية .. لافي وازع ديني و لا أخلاقي .. العلة ما من الرجال فقط حتى البنات

    بقو بنفس الفهم

  6. يا الفاتح زي الزول المريض دا لو نقدر نتوثق من المعلومات المكتوبة دي ممكن نعمل فيهو عمايل ونخليهو يمشي علي العجين ما يلخبطو….
    ودي ياها مشكلة الدقن الشيطانية ماااا بتنقبض

  7. بالله ورونا الدكتور ده منو عشان نعمل حسابنا علي العده ، ده منو اللي في بريطانيا، والله ما سمعنا بيهو كدي افيدونا

    1. هههههههههههههههههههههههههههاااى,
      انت خايف على شنو يا حبيب !!؟
      امممممممممممممممممممم

      1. شمباتي ،،،،
        ويكأنه ذكر ما يخاف عليه ،، ولكن أحسب أنك لم تفهمه جيداً
        ويييييييييكاااااااااااا

      2. بايخييين بياخة
        دا شنو دا ذاتو………………………………..ز
        انا بثني برانامج الكراتيه والكونفو
        حاليا اولادي وبناتي شغاليين تدريب الدنيا ما معروفة

      3. المندهش….
        ههههههههههههههههههههههههههااااى,,
        حبيت استأكد بس ! عشان باكر ما ينكرها زى الشريعة النكروها دى !
        وى وى وى

  8. يا ناس عاينو للجانب الإيجابى فى الموضوع,,,,, الناس ديل خلاس بطلوا يعاينوا فى شورتات لعيبة الكوره بدل الكوره و قبلوا على البنات
    ما قلنا ليكم ديل ما فاضل شراب السجاير

  9. لاحول ولاقوة الابالله العلى العظيم الحصل لينا شنو ياجماعة بعد ماجو الجماعة

  10. من شدة الاندهاش لمن شكيت في المواضيع قلت يكون عاملين شرك للبروف لكن مااظنهم أذكياء للدرجة دي في المواضيع دي لكن مواضيع الاغواء دي ينحتو ليك فيها مخهم جد …. يابتي الفي المملكة اشتكيه وأكيد ح تترفع حصانته ويتحاكم او يرجع بفضيحة والكل يعرف …. هي لندن دي يبيعو فيها خط الطيران وشرف السودان

  11. يا اخوانا البسمع نضميكم دا يقول خلاااااص انتهينا من نضافة البيت وقبلنا على الحوش

    ظاهرة التحرش الجنسي بشكل عام و بالأطفال بشكل خاص بدأت تتفاقم في مجتمعنا بل هي الأقرب لتحولها إلى وباء اجتماعي
    شوفو ما يحدث في المدارس ( بنين وبنات ) والمصائب التي بانت للعيان والمصائب المسكوت عنها
    وبعد ننضف دا نشوف حكاية التحرش بالسيدات الواعيات وعاقلات والقادرات على أن يدافعن باليد أو باللسان
    أأححححححححح

  12. ابو ايه
    من يتق الله يجعل له مخرجا
    ولاحول ولاقوة الا بالله

  13. أستاذنا الفاضل الفاتح جبرا…. القصة الاولي الواحد ممكن يصدقها لآنها حصلت في السودان وحتي نتكلم بصراحة دي ما حاجة جديدة في مجتمعنا وأقولها بكل أسف طبعا… أما القصة التانية اللي حصلت في بريطانيا … شوية حارة كده وما ببتبلع شنو اللي يخلي واحد سوداني وفي بريطانيا يهدد واحده سودانية اِن لم تستجب لرغباته ؟ ما هناك مافي زول بتبلي ليهو علي زول الا بي رضاهو وكده..وبعدين البلد ما بلد قانون ومسألة العدالة شوية كده عندهم اكتر مننا بالرغم انهم كفار حاجة غريبة مش كده؟ علي كل حال الله يعين اختنا صاحبة القصة الاولي ويقويها لاننا اصبحنا وحوش… اما صاحبة القصة التانية فعليها مراجعة حساباتها.. وفي الختام الله يهدي الجميع.

  14. و الله ايهما افضل ايام الحرية و الانفتاح و الاعلام الخضراء في البيوت الكل يعرفها و لا السترة من فوق و الفضايح من تحت …. لعنة الله عليكم يا منافقون

    1. اي مجتمع فيهو شماسه و اولاد ناس
      اولاد الناس ليهم المساجد و الشماسه اعملوا ليهم مؤاخير…و فكونا من مشروع التحرش الحضاري بتاعكم

    2. خضراء ليه انت ما مريخابي والا شنو يا ايمن

  15. اذا أراد الله أن يهلك قرية أو بلدة أمر مسرفيها ليفسقوا فيها حتي يحق عليها الحق ويدمرها. الجماعة ديل باسم التوجه الحضاري والماعارف اسمو ايه لم يدمروا البلد ابدا بل دمروا الأنسان السوداني فهبطت الأخلاق وتضعضعت القيم و …و… كان الله في عون الفضل من الشعب “السوداني”ز أعوذ بالله من غضب الله ولاحولة ولاقوة إلا بالله إنا لله وإنا إليه راجعون حسبنا الله ونعم الوكيل……
    تقول لي أخبار خط هثرو شنو… المسألة يامولانا جاطت نحن في شنو واللا شنو!!!

  16. دا أكيد مخطط كيزانى لكسر عين الشعب و خاصة عنهم (نظام الفيك بدربو)و الدليل (ما ألوولوو) الدليل المدرسين الكيزان الذين يتنقلون من مدرسه إلى أخرى بعد أن (( يقضوا وطرهم )) الله يقطع وطرهم من لغاليغو

  17. طبعا الموضوع لما اكون فيهو جنس مليون كومنت (نصائح و تحسر ع ايام زمان) يااااخ فكونا من مجتمعات الكبت دي. بالجد انتو متوقعين شنو ؟؟
    ضربه ركنيه: انتو الخليفه ما منع العرقي .. امحمد ود احمد بشربوا قدام الناس و لا سال في زول!!
    ….: ياخوي في ناس تخاف الله و ما بتخاف الخليفه
    و ناس تخاف الخليفه و ما تخاف الله
    دحين محمود ود احمد دا لا بخاف الله ..لا بخاف الخليفه
    هسه نتاج المشروع الحضاري ناس لا بتخاف الله و لا الخليفه
    احسن منهم بمليون مره محمود ود احمد اخو اخوان و سيد حاره

  18. نسأل الله السلامه .

  19. التحية ليك يا استاذ الفاتح .. لانك علمت الناس يفضفضوا وما يخافوا .. ودي اكبر جزء من مشاكلنا … قصة الخواف الربى عيالو … وتمسك الناس بيها كمبدأ لعشرات السنين …
    عندي رأى وأن كان متطرف لي زمن بنادي بيه … وهو..
    …. الرجم بالحجارة حتى الموت نهاراً جهاراً لكل مغتصبي الاطفال في السودان ….
    امكن الباقين يخافوا …
    بعدين في انجلترا القانون في صف النساء لدرجة التحيز ولو واحدة اتبلت على واحد ظلم .. البوليس دائماً بيصدقها إلى أن يثبت العكس .. صحي اليدو في الموية ما ذي اليدو في النار .. لكن كده حقوا الزولة تتشجع وتتقدم بشكوى والباقي على الله …
    اما لاخواتنا الفي السودان فالله المستعان .. وربنا يسترهن ويسترنا …

  20. ما كنا كويسين
    حسه كنت بقرا لي في خبر عبيط جنس عباطه
    والخبر انو اتنين متشاكلين في نمره موبايل والنمره قالوا مميزه وبي ميه وحاجه مليون،والله الخبر ده ما يقل عن الفوق،
    اححححي انا .
    حاجه تغيظ ومستفزه للمشاعر
    والله غاظني اكتر من هيثرو

    1. غظتني معاك آآآآآآآلعبيد نمرة هههههههه

  21. يابروف اكبر شبكه دعاره تم القبض عليها في دبي سودانيان اى سودنيات عديل كده بعدين نجي نقول الضقط الاقتصادى والشماعه ديك المهم بناتنا ديل مشكورات والله يعنين

  22. لا حول ولا قوة اللا بالله امنت بالله ربا وبالاسلام دينا وبمحمد نبيا لكن دا شنو دا كتمت كتمت كتمت يلا هما يا رجالة كتمت كتمت كتمت

  23. كنت متوقع حاجات زي دي لكن الليلة إتأكدت ، إنا لله وإنا إليه راجعون ،،،

  24. سلامات يا استاذنا انا بقول ليك ده لسان حالنا نحن البنات فى السودان بنتعرض لمواقف زى دى اكتر من مرة فى اليوم

  25. عزيزي بروف الفاتح
    تكمن مشكلتنا في عدم تطبيق القوانين التي تُجرم هذه الأفعال
    والأهم من ذلك هو ضرورة تثقيق المجتمع وعلى وجه التحديد
    الإناث والأطفال وأولياء الأمور بحقوقهم
    التباكي على الأخلاق وأننا كنا وأصبحنا لا يفيد
    الحل يتمثل في تطبيق القوانين وردع أي مجرم بتعدى على حرمة
    الآخرين

    1. قانون على مين آآآآآآآآآطلحه

  26. يا أخوانا … بصراحة الأسر لها دور كبير … في إحدى سفراتي وأنا عائد إلى السودان سمحت لنا الخطوط بالنزول في أحد الفنادق لطول فترة ال كونيكشن فصادف أن كان هناك شاب وشابة فكنا نحسبهم متزوجين لأنهم نزلوا في نفس الغرفة إلى أنوصلنا مطار الخرطوم ونبهني أحد الأخوة مشيراً إلى الفتاة والتي كان في استقبالها أبوها , أمّا الشاب فكأنّه لا يعرفها … وهما على ما يبدو طلاب..

    1. لو سمحت لى يا اخ خضر دى ما بتمثل البنات السودانيات وما مفروض الحكم علينا يكون من خلال حالة او حتى 100
      حالة زى دى يعنى البنت الانت حكيت عنها دى فى قصادها 1000 بنت ناس ومهذبة وعلى خلق ودين فلو سمحتوا بطلوا
      تحكموا علينا من المنظور ده

      1. الاخ خضر كلامك صاح الموضوع معتمد فى الدور الاول على الاسر وعلى التربيه فى البيوت يعنى حادثة كالتى ذكرتها دى مشكلة تربيه للاسف الشديد ,, اما موضوع عمنا جبرة فهو مجموعه من المتاجرين باعراض بناتنا لاغراض دنيئة لديهم وهولاء يجب معاقيتهم بصورة حازمة ,,, الاخت عزة اكيد بنات الناس ما مقصودات وربنا يستر على جميع بنات المسلمين ويحفظهم والبصلة المعفنة بتعفن شوال كامل وللاسف مجتمعنا بيحكم بقاعدة الجيش الخير يخص والشر يعم ودا اكيد غلط

  27. أعوذ بالله من البحصل دا لكن الحكاية ما للدرجة دي أنا موظفة والحمدلله علي قدر كبير من الجمال لكن مابتحصل لي مضايقات لأني من أول يوم كنت حازمة في التعامل وأبرزتا شخصية غير والحمدلله مالقيت أي تحرش لكن في المواصلات ممكن تحصل وللأسف كتير وخاصا من الأعمام الكبار تخيلو لدرجة بقيت وكل الشابات الفي سني بنحبز في المواصلات يكون جنبنا شاب مش عم للموضوع دا مش لحاجه تانية

    1. هههههههههههههههههههههههههاااى’’
      على الجمال تغار منا ,,

      1. الله يجازي محنك آآآآادريس جماع

  28. استاذ الفاتح..
    تحية واحتراما
    لو سمحت رقم تلفونك لانو الموضوع ما بتحكى .. وخطير ومدعوم بالمستندات

  29. لا جديد عندي بس كتمت كتمت كتمت

  30. والله حال البلد بقي يحير والحكايه دي ما حاصله للبنات ديل بس لكن بقت عامه ع البنات جميعا

    1. الدليل المواصلات العامه ستات الشاى المزيعات واخيرا طالبات الجامعات من قبل الاساتزه سبحان الله

      1. كل كلامك اقوية مبلوع الا ستات الشاي جابتهم الحكومة لشئ في نفس يعقوب

  31. سلام ياقبيلة،،،
    يا أستاذ جبرا متي كنا كويسين وفي أي يوم من الأيام يا أستاذ؟؟
    أصلنا ماكنا كويسين ولن نكون كويسين إذا كانت دي حالتنا المُعاشة يا أستاذ!!
    فإذا كان هناك المئات من الذين يسيئون للآخرين، فمثلا” أفراد من الشرطة يعذبون الأبرياء، وبعض الأطباء يسيئون معاملة المرضى الفقراء، وشريحة من الموظفين يرتشون ويمارسون الغش الخداع والتدليس، وقسم كبير من المواطنين الآخرين يمارسون أمثال فعائلهم الدنيئة هذه هنا أوهناك ولا يطرف لهم جفن، فهل هؤلاء الناس كويسين أو كانو كويسين أو هم متدينون مثلا” وحريصون على أداء الفرائض؟؟ أم هم مرضي؟؟
    إذن فهم ما كويسين ولم يكونوا كذلك يوما”ياصديقي!!!
    ولنسأل أنفسنا هذا السؤال كيف يمكننا أن نكون كويسين ونحن الأكثر تدينا والأكثر انحرافا وفسادا” فى نفس الوقت؟؟
    وأعتقد يا صديقي أن المشكلة أعمق من ذلك، فهل هؤلاء الناس متدينون فعلا عن إيمان صادق؟؟ وهل الكثيرين منهم يمارسون انحرافاتهم هذه بغير أن يؤلمهم ضميرهم الديني، لا أعمم بالطبع، ولكن هنالك متدينون كثيرون يراقبون ضمائرهم فى كل ما يفعلونه وهؤلاء متدينون بالمعنى الصحيح.
    فالمجتمعات يا صحبي تمرض كما يمرض الإنسان، ومجتمعنا يعانى الآن من مرض عُضال ، ألا وهو انفصال العقيدة عن السلوك، وانفصال التدين عن الأخلاق ، وهذا المرض الخطير والمزمن له أسباب متعددة، أولها النظام الاستبدادي الذي يؤدى بالضرورة إلى شيوع الكذب والغش والنفاق، وثانيها إن قراءة الدين المنتشرة الآن فى المجتمع إجرائية أكثر منها سلوكية، بمعنى أنها لا تقدم الدين باعتباره مرادفا للأخلاق وإنما تختصره فى مجموعة إجراءات إذا ما أتمها الإنسان صار متدينا، ويمكننا القول بأن الشكل والعبادات أركان مهمة فى الدين تماما مثل الأخلاق، ولكن التراث الإسلامي حافل بما يؤكد أن الأخلاق أهم عناصر الدين، لكننا لا نفهم ذلك أو لا نريد أن نفهمه.
    فالفضيلة يا أصدقائي تتحقق بطريقتين لاثالث لهما، إما تدين حقيقي مرادف تماما للأخلاق، وإما أخلاق فقط حتى ولو لم تستند إلى الدين.
    إن التدين الحقيقي يجب أن يتطابق مع الأخلاق، وإلا فإن الأخلاق بلا تدين أفضل بكثير من التدين بلا أخلاق!!
    ولا رأيكم شنووووو؟؟؟

    1. ود الخلا بتظهر وتقول كلام ااااااااااااااااه لو قومي يعلمون في الصميم يا دين مع كل توابعه يا سمبلة ساكت تحكمها قوانين صارمه تعطي لكل زي حق حقه

      1. الدين يا صديقي الغلبان جاء متمما” أو مكملا” لمكارم الأخلاق كما جاء في الحديث النبوي عن أبي هريرة ـ رضي الله عنه ـ قال: قال رسول الله ـ صلى الله عليه و سلم ـ: ( إنما بعثت لأتمم صالح الأخلاق )رواه أحمد
        فالأخلاق هي الأساس فإذا إنعدمت أنتهي كل شيئ أو كما قال الشاعر
        إنما الأمم الأخلاق ما بقيت فإن هم ذهبت أخلاقهم ذهبوا

    2. ود الخلا ،،
      ياأخي ،،،،،
      سلمت وسلمت يداك وأناملك ،،،
      في القرآن الكريم
      كلمة المنافقون وردت 8 مرات
      كلمة المنافقين وردت 19 مرة
      كلمة المنافقات وردت 5 مرات
      نافقوا وردت مرتين
      النفاق مرة واحدة
      نفاقاً وردت مرتين
      وفي السودان يا صديقي هذا هو الداء العضال الذي شخصته أنت ( النفاااق )!!!

      1. تسلم ياملك من كل شر، وبالطبع كلنا يعرف هذا هو الداء العُضال الذي إستشري في جسد الوطن وكوووولنا يعرف كيفية العلاج ومن أين سنأتي بالدواء ولكننا … نعم لكننا نحجم عن الإختراق!!!
        لماذا لأننا نتجاهل ونتكاسل وننطوي علي أنفسنا ونقول وأنا مالي، فهناك من هم مكلفون بهذا الأمر فلماذا أشغل نفسي به؟؟
        وننسي أن أمن المجتمع هو أمننا وصلاح المجتمع هو صلاحنا، وفساد المجتمع ينقلب وبالا” علينا ونحن من نكتوي به وأعني بهم جموع الشعب الكادحة وليس السلطان فهم أبعد الناس عن همومنا ومشاكلنا ،،،،،

      2. وجدتها وجدتها توفيق الحكيم وارض النفاق وطالما هنا في حكماء (دكاتره يعني ) طيب (اطباء وصيادله) ينحتوا النافوخ ويسو لينا شئ كمياء ندلقه في موية محطات المياه وبكره نشوف العجب والا شنو آآآآآآآآلمندهش كلو محاولاتنا ما فيش فايده منها الا دي اها عاد انكربو ساكت

  32. رفض نائب رئيس البرلمان هجو قسم السيد تداول النواب في بيان وزارة الإرشاد والأوقاف المقدم للبرلمان أمس (الثلاثاء). وقال هجو إن قضية الأوقاف أمام المراجع العام للمتابعة والمراجعة ولا يمكن التداول حولها. وأحال البيان إلى لجان الشؤون الاجتماعية والعمل والحسبة والمظالم العامة وشدد على إسراعها في تقديم تقرير بشأنه، في وقت حمل فيه وزير الإرشاد والأوقاف د. خليل عبد الله، الوزير السابق للإرشاد والأمين العام المقال مسؤولية تدهور الأوقاف وتبديد أموالها بالخارج. وكشف في بيان وزارته عن عقد موقع بين الأمين العام السابق ووزير الإرشاد يتقاضى بموجبه أمين الأوقاف راتبا شهريا قيمته 60 ألف ريال سعودي، ولفت إلى أن العقد اشترط أن لا يطلع عليه أحد غيرهما، وأشار إلى وجود عقد آخر قيمته 20 ألف جنيه، وقال إن الأمين العام السابق صرف مبلغ 633 ألف ريال بجملة العقود المبرمة معه. ونبه إلى أن القانون السعودي يمنع تحويل أموال الأوقاف إلى الخارج على أن يتم توزيعها داخل السعودية، وكشف عن سعودي يقوم بتجميع أموال الأوقاف السودانية بعد توكيله من قبل وزير الأوقاف السابق، وقال إن الأمين العام المقال قام عقب إيقافه بتأجير وقف (أبي ذر) وتسلم مقدم إيجار قيمته (3) ملايين ريال سعودي وكلف شخصا آخر يدعى «سمير فلاتة» بمباشرة مهامه بالسعودية. وبرأ خليل ساحته من مسؤولية أوقاف السودان بالسعودية (حسب ما جاء بالاهرام انا بره)

    1. اصلو شنو !!!!!

    2. في ديل بالذات انا مع تطبيق حد الشرع عليهم لأنو سرقوا
      وكأنهم مادين لي الله لسانهم !! لو ناس تانين نقول ما عارفين
      كلام الله لاكين ديل عذرهم شنو ؟
      نبارك لي نحنا ولي جبرا بالتطورات الجديدة وفتح البلاغات
      وتحديد الجناة واتصلا من يوم جابو الشريف وكأنهم دايرننا
      نقول ياهو كروف زااتو لاكين كلام الشريف كان فيهو توريه
      انو الباع اكبر منه ..

  33. السمار الكرام ،،،
    بالأمس وأثناء تجوالي بوسط الخرطوم رأيت يوم الحلاقة العالمي والحمد لله طلعت منه سالما بكامل شعري قوايّ العقلية وقد كانت ضربة البداية لهذا المشروع الحضاري الذي سيمتد ويعمم على كل الولايات والمحافظات والشوارع والزنقات
    البروف العزيز ،،،
    لا يفوتني أن أنبهك أنت وجميع أصحاب الصلع بأن هذا مشروع الحلاقة هذا ليست فيه إستثناءات مهما كان وإلا فألزمو بيوتكم وبالنسبة لأصحاب الصلع عير معفيين و سيتم حلق الشنب بدلاً عن شعر الرأس وبعد ذلك سيتم تعميم حلق شنب جميع الشعب الفضل
    المشروع الحضاري دا يا جماعة بقوم على تزكية النفس والتزكية بالشعر الفضل وأحسب ان فوائد الحلق هذه تمنع التحرش بالنساء وبأمنا الحيكومة وكذلك المساواة بين جميع أفراد الشعب الفضل نساءاً ورجالاً
    وبمناسبة التزكية دي ! شفت عربية ديوان الزكاة واقفة بعيد تراقب في الموقف ما عارف الموضوع عندو علاقة ولا صدفة ساي وننتظر من ديوان الزكاة بيان بالتوضيح وبالمرة ( فضلاً وليس أمراً ) ورونا الحصل شنو على موضوع الخمسين ألف دولار بتاعات القناة ؟
    الأخوة جنوبي ، شمباتي ، الغلبان ،،، مفلفلين شعركم كدي أقيفووو بعيد وجروو شخيت وكل جركانا تقعد في بكانا وأنا شخصياً بسنتر الخرطوم تاني ما بجي ،،، وبعند الحلة دي تاني أنا مابجي

    1. يكون بله الغايب قال ليهم الحيشيل الحكم منكم زول شعره
      كتيير !!
      وحات الله قالو فرعون زاااتو بدا كده ولحدي ما وصل مرحلة
      انا ربكم الاعلي .!! اريتني موساكم وتختني امي في النيل
      ويشيلني فرعونكم ويربيني في بيت المره الصغيره …

      1. ههههههههههههههههههههههااااى,,احمد الله شعرى مفلفل وملفلف ,
        لكن جنوبى دا يفلفل شنو !!؟ الله يجبر بى خاطرك يا حبيب ,,
        وى وى وى

      2. واكون انا هارونك يا موسى

  34. جنوبي :: كمل الباقي و تسوقنا الي البحر الاحمر نمشي السعوديه ،و نخلي الجماعه لي سمك القرش و نعيش في سبات::: و مات الشرير البشير و انت بختك امك الصغيره

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: