أيه الأدب ده؟

هل سمع أحدكم بالعيسابي .. سوف يذهب الظن بكم إلى أنه إسم لمحل لبيع الإسبيرات أو الشاورمه أو ود عمارى .. لا هذا ولا ذاك أنه واحد من ناشئة الكتاب كتب مقالاً في إحدي صحف الأمس (السوداني ) مدافعاً عن سارقي خط هيثرو .. ومع أن عنوان المقال هو (هيثرو قيت : الحق يقال) فقد طفقت أبحث عن (الحق) الذي (قاله الكاتب) في ثنايا مقاله ولم أجده وهذه ظاهرة تستدعي التوقف عندها بل العبدلله يعتبرها فتحاً في عالم الصحافة وهي أن يكون المقال بي (لون) والعنوان بتاعو (لون تاني) والزراير والأكمام لون تالت ، وقد إستهل مقاله قائلا (يبدو أن كثيرا من قضايانا أصبحت الإنطباعية والببغاوية تطغى عليها أكثر من الموضوعية والنظرة المجردة للأحداث دون إطلاق أحكام مسبقة لا تستند على دليل واحد وتشكيل الرأي العام اصبح يتم وفق هوى أقلام تمسك بالعصا من النصف وتخوض مع الخائضين) ،
هكذا بضربة لازب يصفنا الفتي (دون تأدب) بالببغاوية والإنطباعية وبتشكيل الراي العام وفق هوانا (المريض طبعا) وهو يصفنا باننا نمسك العصا من النصف ومش كده وبس وكمان نخوض مع الخائضين !
يقول الفتي (الاستاذ الفاتح جبرا تحدث في مداخلته عن كلام إنشاء ومعلومات عامة منقولة من العم قوقل)
والله ما كنا تعلم أننا سوف نحيا إلى زمن يعلم فيه فتية صحافتنا الغيب؟ من أين اتى هذا
الفتي بحقيقة أن كل ما أوردته من معلومات (قال عليها إنشاء !) منقول من الإنترنت؟
ملف مفتوح طيلة هذه السنوات لا يتحصل العبدلله على اي معلومة كانت عنه لا من اشخاص كانوا يعملون بسودانير وقت الحدث ، لا من أي مصادر أخري سوي الإنترنت !! (شفتو الفهم وعلم الغيب)!
ثم يمضي الفتي قائلاً (وظل يخرج بعض الكلمات عن صياغها مردداً لها في سخرية لاذعة مثل – الكويتيون بحبونا- وركز على السخرية أكثر من الموضوعية في تكلف واضح لإضحاك المشاهدين فما معنى أن يقول للرجل (قد أتيت بعارف كأنك أتيت بصيوان لعرس بتك) (ولو مكانك لما ظهرت على التلفزبون) ويتساءل الفتي (هل هذا منطق) !!
يا إبنى كل من شاهد تلك الحلقة قال ما قلت به وهو أن الضيف (كان أحسن ليهو ما يجي من أساسو) نسبة للإضطراب الذي كان بائنا وواضحاً عليه و(اللولوة) التي إستخدمها في فجاجة لا تضاهيها إلا فجاجة مقالك هذا !
وعندما نبهنا الضيف بانه تعامل مع (العام) وكانه (خاص) لم نبهته ولم نفتري عليه بل هي الحقيقة العارية وهو أنه لم يستخدم اللوائح والنظم الإدارية التي تحكم مثل هذه الأشياء .
أما قصة (في تكلف واضح لإضحاك المشاهدين) فليس الامر كان موضع ضحك يا رعاك الله حتى نتكلفه !
ثم يمضي الفتي في (التلميع ) قائلاً (أعتقد أن أهم ما أكده الشريف بردود محترمة غير منجرفه مع الإستفزازات عدم مسئوليته من بعيد أو قريب عن هيثرو قيت ) !!
يقول الفتى ما يقول وهو يعلم تمام العلم أن (ضيف الحلقة) قد كان هو المسئول الأول بسودانير يوم أن بيع الخط فإن كان المسئول الأول في كل منشاة غير مسئول عن ممتلكات منشأته كما يري هذا الفتي فلله الأمر من قبل ومن بعد !
قبيل خاتمة مقاله وبعد أداء (مهمته) يقع الفتي في خطأ ينبئ عن جهله فيما يكتب عنه إذ يقر بإن الدولة قد قبضت ثمن بيع الخط قائلا : (هيثرو على الأقل قد قبضت الدولة ثمنه بغض النظر عن التحفظ في ضياعه أو أبقائه كمعلم تأريخي للسودان) !
يا أبني بدلة وكرافته وصورة تحتل ربع المقال وما عارف إنو المشكلة (الأساسية) إنو القروش ما إتوردت لخزينة السودان .. ألم تقرأ يا بني توجيهات الرئيس بإعادة ثمن الخط .. من أين أتيت بهذه المعلومة المغلوطة والتي يدرك رجل الشارع أنها غير صحيحة ؟ أليس هذا هو الخوض مع الخائضين ذااااتو؟؟
معذرة عزيزي القارئ فقد أقحمتك في شان شخصي كان الأولى لهذه المساحة أن تستغل فيما هو أنفع للناس ولكن ماذا نفعل مع فتية صحافة هذا الزمان الردئ الذين لا يتأدبون مع (الكبار) ولا يحسنون (الألفاظ) ويصفون عمن يدافعون عن حقوقهم بماسكي العصا من النصف ثم للأسف الاسيف (يجهلون عما يكتبون)… قال أيه الدولة قبضت ثمنو .. أمض في طريقك يا بني فربما تصبح يوما رئيسا للتحرير (ما بلد هاملة وكده) !!

كسرة :
قال أيه ببغاوية .. أيه الأدب ده ؟

كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟

54 تعليق

  1. ههههههههههههههههه و الله يا عمو الويندوز خطير لكن

    1. جابت ليها ختف

  2. يا دفعة باقي ليك الزول دا كتب المقال دا من بنات افكارو ولا في زول لازية؟

    1. بنات افكاره اولاد افكاره اولاد ماما دا في وادي والدنيا كلها في وادي عجبا لهؤلاء من اين اتى هولاء

  3. كلام مشابه للمقال دا كان في صفحه سائحون..يااااااخ نحنا بنقول لعيال الحكومه( لا للمخدرات) ..

    1. ملعوبة آآآآآآآآآآ shadow يا ليت قومي يعلمون

  4. والله دي قصه ربك يكون في العون ياستاذ

  5. واحد من البلد ديييك | رد

    سرقوا الخط قلنا امكن ما عرفوا الموضوع بينكشف … الموضوع انعرف قلنا يمكن بيلعبوا على الزمن و عارفين أن ذاكرتنا ضعبفه …. لما الموضوع استمر و اتجدد و اتنوع قلنا الجماعة بيكوسوا فى المخارجه …. لكن يفكوا فينا الشفع … أبداً غير متوقعه !!!

  6. لا أدرى ماذا سيفعل هذا الفتى اليوم بعد أن يقرأ الخبر الذى أوردته خالتو الانتباهة (على وزن العم قوقل) والذى مفاده أنه قد تم توجيه الاتهام رسميا للشريف بدر بالمسئولية الجنائية والادارية وتم رفع الامر للسيد المدعى العام، يعنى الحكاية ليست ببغاوية ولا هى خوض مع الخائضين، وحقك علينا يا أستاذ جبرا.

    1. حلوة خالتو الانتباهه هههههه ملعوبة كبيره دي لا كلام بعد كلام الخالة

  7. الشافع ده اظنو من ذوي القربي !!
    نهدي ليهو اغنية تغريد جبره الشريف زعلان
    مني عشان انا بريد كسرتي ..
    غايتو انا بأعتباري واحد من الملاك حقي دايرو خط
    بس خايف زي ما عارف اشترت سودانير ورجعتا لينا بسعر
    اكبر تقوم ترجع لينا هيثرو زااتو بسعر اكبر
    محاكمة ناس قوش وود ابراهيم فضحت الوزير البكاي
    اللمبي محمد حسين يا ربي محاكمة الشريف حتفضح منو ؟
    الزول ده كلامو يومتا زي الداير يقول حاجه وخايف .

    1. زي الزول بتاع النفايات مش قال ما نحنا برانا المابنورد هيئات كتيره بتعمل كده

    2. دا يكون يا من المؤلفة قلوبهم

  8. هو العيسابي دا كان وين المده دي كلها
    ولا اااااااااااااا ما الكلام دخل الحوش

  9. يا جماعه قولوا لى حمدلله على السلامه لى مده بكابس للدخول للمدونه وابت لى عديل
    اظن فكه الحظر حقى

    1. المهيرة بت وراق
      حمداً لله ألف على السلامة وجيتاً جيتي
      والجابك يجيب عقابك

      1. شكرا ليك يا لمندهش انا دااااايره الجيه لكن كل ما اعلق التعليق ما يظهر نامن قربته اتعقد

  10. يابروف بالله ضيع ليك زمنك مرتين مرة وانت بتقرأ كلامه ومرة وانت بترد عليه أها قول قروش الخط رجعت البرجع لينا حق زمنك منو ….. بت وراق الف حمدا على السلامة مرتين يارمز الجسارة …. ومبروك علينا وعليك

  11. والله ما ضيعت وقتك يااستاذنا ، لانو الكذب والنفاق والدجل ومحاولة التكسب من الافكار الضارة والدفاع عن المفسدين اخطر من المفسدين ، لان هذا الشعب الكريم الذي كان يوصف بالنزاهة والامانة ضاعت كل تلك القيمة الجميلة بواسطة هؤلاء المتكسبين ، ضعاف النفوس ، بتغبيش وعي هذا الشعب ، وردك له كان ضرورة لان هذا المرض العضال اصاب مجموعة من الشباب ، فلنتكاتف جميعا من التخلص من تلك الامراض الفتاكة ، وبكل اسف صارت الصحف السودانية مبتلاء بتلك الامراض

  12. ما ضاع حق وراؤه مطالب و الشريف خلاس طيارتو قامت وراح قى الباى باى
    يا بروف أنسى الأوهام ديل و ركز معانا فى كسره جديده

    1. ما عايزين كسره جديدة الا بعد ما يرجعوا الحيطة ذااااتا

      1. اخي عتباني وكمان بي زبالتها

  13. ما مشكلة خلوا يدخلوه دخلة دخلتين كدا اصلو هو الزمن دا في بلدنا دي العيز يطلع الكفر يقوم يهابش الكبار ومسنود من الكبار برضو ( عايز يبقي رئيس تحرير زي ما قلتوا) وهذه مهازل يا زمانك فامرحي

  14. كلام التركي صاح ميه الميه يابروف ماتضيع زمنك في كلام ماجايب حقو وإنت أعلي قامة من الشفع ديل وبرضو بنعتزر ليك من الكلام الكاتبو الشخص دا في حقك

  15. اها الشريف الما شاف الشرف الليله اصدرو امر قضائي بالقبض عليه النشوفو بدافع ليهو كيف

  16. اهم حاجه عايزين نعرف كسره النفايات وصلت وين

  17. علي بالطلاق الود ده بتكلم صااااح هههههههه
    وفعلا القروش دخلت خزينة الدوله لكن بي طريقه غير رسميه فأصبح مصيرها ومصير ما دخل بي طريقه رسميه وااااحد وهو الجيب الكبير البشيل اي حاجه وقابل للزياده ..

    1. وهدبتنا يا عم شطه الحقني بالفهامه الجيب الكبير دا ما عرفتو

  18. مين العيساوي دا , انا كنت قايلو بتاع فرن الجنب بيتنا

  19. * يـ اخوانا الاستاذ (بينسون ما برنجية)، الف مرة قلنا الكلام دا
    *اها عملتو شنو في موضوع ترشيح الاستاذ جبرا للرئاسة ؟
    *اتحركوا لينا في الموضوع دا

  20. يا استاذ الفاتح انا أتفرج الآن ( الاربعاء الموافق ٢٠ مارس) على قناة الشروق على برنامج المحطة الوسطى الحلقة الثانية فى موضوع خط هيثرو و سودانير و الضيوف ( الشريف ود بدر و السيد ياسين عابدين) الذى اريد قوله أننى أصبت بالرغبة فى التقيؤ من رداءة كلام الضيوف و محاولة تبريرهم للأخطاء و الفساد الذى يتم فى أمر ( الله يرحمها) سودانير!! الله يعينك يا استاذ الفاتح إذا كنت الآن بتشاهد هذا البرنامج !!

    1. اخونا صلاح …. المثل بيقول الرايح فى القيزان ما بروح فى الميزان !!!!!! وتحياتى للجميع

    2. هو لسه في التلفزيوت ما قبضوه مسكين يا بروف جرحروك ساكت في النفايات على صمت خشمك وجبك للناس

  21. بروف دي كارثه السودان اى زول عامل عار( ماتفهمونا غلط ما عارف ديك ) بعدين بصراحه يابروف كونت سخن في حته الصيوان دي لكن عمك فعلأ انو القصه صيوان لانو ما قدر يقول شي وطلع بيش

    عمومأ لو فتحو تحقيق فى سقوط جامعه الرباط وشالو وزير الدفاع عقب الخط ده برجع ولو ماسوى شى غير ده
    يكون
    حسن حمد الحفله انتهت

  22. (ياريت التمر ياريت لو اشيل كل تلات اشر)
    حميد… ذكراك في الخاطر
    و لولا المشقه لطلبنا من عمنا الفاتح مقال كل صباح
    ما احوج المزراع لحصاد التمر
    و ما احوجنا الي حروفك …صاحيه الضمير
    و الي مقال اخر..نحن في انتظار البرنجيه…

    1. وحات الله لو يشيل كل تلاته يوم طالما البشير اب فقره
      ده قاعد ما يخلي لينا فيهو تمرايه .
      ما شفت الشريف امس قفل اللعب كيف ! مش عارف طلعت
      جايه عن طريق اب فقره الغليده ده ؟

      1. ياسين شمباتى

        ههههههههههههههههههههههاااى,,,
        عقد الجلاد غنوا : شيلى منى ,, ختى شيلى ,, بختى اختيييييي ,,,
        واكمل لى شدو : ولا ايام زمان ما كانت تمر ,,
        كان ما لاقاك هوان لا اتغرغر صبر ,,,

  23. امبارح كمان جاب يس قاطعين ( يس عابدين ) وتمت الناقصة , غايتو انا ما استغربت لمن القصة بقت فيها يس قاطعين لانو ما نسينا الحصل في الكهرباء لمن كان مديرها ولا بنك فيصل القرب يلحقوا امات طه في زمن وجيزالا الامير لخقو سريع سريع

  24. السلام عليكم يا جماعة الخير
    اولا : اذا كان بلد فيها (الهندي عز الدين ) بقي رئيس تحرير وياسر ود جيرانا الما عندو شهادة سودانية الان يحمل شادة الدكتوراة في الملكية والفكرية قاعد يبرطع بيها في القنوات والجرايد .. فحري بهذا العيساوي ان يتطاول علي هكذا قامات , ويبدو انه مدفوع الاجر وايضا يحب ان يظهر علي حسابك يا استاذنا وزي ما ذكر احد المعلقين (دا بضيع ليك في زمنك الغالي يا بروف ) فلا تعيره اهتمامك ونحنا ذاتنا ما فاضين لجنس عولقتو دي ,,,, قال هيثرو قيت قال ,,, والله يتلقي ما بفرز الهيثرو من القيت ,,,, والله صحي صحافة وثقافة ناس الهندي ديل ياهو زي دا بس يا اخوانا,
    تانيا : ترحيب حار بالكنداكة بت وراق ونحيك من علي البعد يا العزيزة
    تالتا : شفت لي صورة في الفيسبوك لعساكر بحلقو لواحد في نص الظلط وصحي يا القاعدين جوه الحكومة عاملة حمله حلاقة للشعب السوداني لانو قالو في قمل اسرائيلي دخل البلد باليل بدون انوار والناس كانت بتشاهد في رقيص الرئيس في القصر بمناسبة عيد ميلاد ابو كلام السندكالي….
    واخيرا : والله قربتا اجن لما قريت الخبر انو جمال الوالي بنازع ليهو في واحد عشان شريحة موبايل سوداني وعارفين سعرو بكم 125 مليون جنيه سوداني المليو نينطح ابو المليون ذاتو
    اها حالة زي دي ورونا اجاركم الله نعمل معاها شنو قبال ما نقع نموت بالحسرة —
    بقينا ما عندنا وجيع

    1. عليكم الله الوالي دا ما بخجل من نفسه… المبلغ ده ممكن يفك كربة كم أسرة؟ والله ممكن يدعم بيه كم طالب مشرد؟ ودي كلها ممكن تكون ليه صدقة جارية… اها هسا كان مات الشريحة دي تبقا ليه شنو؟؟؟
      غايتو جنس محن…

      1. الشريحه تبقى ليهو خارج الشبكه

    2. ياخي الوالي غبيان ودي قروشو انا سمع اضاني دي قالو ان السفيه يحجر عليه ما عارف بتنطبق عليهو والا لا؟؟خاصة في دولة الشريعه والنهج الحضاري والما عارف ايه والا ايه والا ايه كتمت

  25. هل من الممكن ان يكون الصراع حول الهويه هو من اسباب الاحتقان السياسي في البلد؟
    انا اقدر تماما ما يكتبه استاذنا الفاتح جبرا و ربنا يحفظو لينا و يحفظ حرصو على البلد الما عندا وجيع دي
    و كتيرين مننا اليله بقو يهتمو لقضايا الفساد و ملفاتو الكتيره بسبب حرص و اهتمام عظيم من الاستاذ … و لفت نظر الكثير من الناس لقضايا تخلت عنها عن الاحزاب و بمجرد جرة قلم و كسره مقال و
    خط هيثرو انعرف لاي سوداني بره وجوه ،
    و بالجد استاذنا قدر و باقتدار لافت انو يرفع من مستوى الوعي لدى الشباب و دي حاجه فاقداها الاحزاب و ما عندا القدره دي
    انا في راي الشخصي ، الفاتح دا كنز وطني
    انا ما ببالغ يا جماعه
    كونو في الزمن دا تلقى زول حريص على المال العام و شجاع و حريف و مقتدر و سااخر كمان …
    ما اظن !!
    المهم الفاتح جبرا عندو تاثيرو و دا حاجه ما فيها شك.
    زول وطني ما فيها شك
    و صحافي مقتدر يعني ما بكتب ساي! بالتالي كتاباتو مسؤله و هادفه و بي كدا انا بفترض انو ممكن اجاوبنا على سؤالي دا؟
    و نحن محتاجين نعرف عن هويتنا زي عن الملفات بتاعت الفساد…
    هل من الممكن ان يكون الصراع حول الهويه هو من اسباب الاحتقان السياسي في البلد؟

  26. الخطاب الان موجه الى دولة الشريعه كتمت كتمت كتمت وينا الشريعه تاني كتمت

  27. الزين نهبوا اموال خط هيثرو تركناهم لله. دا الكلام الحيقولوا امير المؤمنين عمر البشير زى ماقالا فى طريق الانقاز الغربي . وطبعا المعنى واضح جدا شوفوا انو الحرامى الشريف متحدى معناتا فى حرامية كبار اكلوهو معاهو

    1. دا الخوف امير المؤمنين يقوم يقول بس لو المؤمنين ديل في يوم هبوا زي ما هبوا على اللقبله راح ينسوا اخاف ينسو

  28. موضوع هيثرو دا طاااال عديييل وانا قنعت ومافي زول عاوز يحس والتحقيق الوهمي دا ماحيجيب ابدا حاجه وكانك تقول للحرامي احلف وكمان حقق في السرقه يعني حيقول شنو !!!!!!!!!!!!
    اطووو صفحته مع الحفاظ علي الواواااااات
    وشوف لينا مواضيع نجيضه اخري ..شوف لينا موضوع الحلاقات المجاني بالله انا شعري سمح وخايف عليهو هههههه

    1. انا الصلعه تولع نور هههههه وكاتب عليها لا للكيزان ههههه كتمت كتمت كتمت

  29. البعض يريد ان يصعد على اكتاف الكبار … بعض الاسئلة افضل اجابتها السكوت …

    1. ليس لدي الا لا فض فوك يا صديقي Mohammed Adam Eldai Eldai

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: