الحلاقة للجمهور

منذ زمن مضى تأكد لي بأن أى زول مسؤول في البلد دي شغال على كيفو .. فقبل أيام كتبت مقالأ عن الشرطة التي تقوم بعمل (نقابة الركشات) وتحتجز ركشات السائقين حتى تجبرهم على دفعع (إشتراك النقابة) بدون أي قانون يخول لها هذا الإحتجاز ومضايقة الناس في رزقها ..
بالأمس أبت القوات المسلحة إلا أن تحذو حذو الشرطة (وتشتغل على كيفا) حيث إمتلأت الأسافير متناقلة خبراً يقول أن الشرطة العسكرية قد قامت بحملات (حلاقة) لكل من يقومون بتربية وإطالة شعورهم ومع الخبر صورة لأحد الجنود وهو (يحلق) لأحد الشباب وهو جالس على الأرض وهذا بالطبع سلوك لا يسنده قانون البتة كنا نربأ بقواتنا المسلحة أن تقع فيه مهما كان لها من دفوعات .
وبعدين (الشرطة العسكرية) دي تحلق لمنو وتخلي منو؟ بعد أن أصبح آلاف الشباب في مختلف مدن البلاد تائهين يسيرون في هذه الحياة دون (هدف) بعد ان فشلت الدولة تماماً في توظيفهم أو خلق مشروعات لهم (تشغلهم) وتملأ أوقاتهم بدلاً عن الكلام المقدد والممارسات (الفارغة) التى وجدوا أنفسهم فيها !
قبل أشهر مضت ذهبت إلى أحد صوالين الحلاقة لتهذيب ما تبقي في رأسنا من شعيرات .. قال لي الحلاق (إنتظر يا أستاذ شوية لمن أخلص من الزول ده) بعد دقائق إلتفت نحو الزول فوجدته شاب في مقتبل العمر (قاعدين يواسو ليهو في حواجبينو) !!
يجب أن نعترف وأن تعترف القوات المسلحة والبرلمان والشرطة ورئاسة الجمهورية وهيئة علماء السودان اللجان الشعبية والمنسقيات والما بعرفو شنو بأن هؤلاء الشاب ضحية فهم لم يجدو التعليم (الصاح) ولا التربية (الصاح) ولا التوظيف (الصاح أو الما صاح) فخلقوا عالمهم الخاص بهم في ظل هذا الوضع المأساوى الذي يعيشونه ، يجب أن تكون لدي المسؤولين عن هذه الشريحة الشجاعة الكافية لأن يعترفوا جهراً بأن هؤلاء الشباب هم ضحية .. ضحية الفراغ العريض وإنهزام رب الأسرة (أب شنب) وعدم متابعتة للأحوال جراء بحثه المضني لتوفير ضروريات الأسرة في بلد (وصل فيهو ربع البصل 33 ألف جنيه) !!
جاهل من يعتقد بأن المشكلة تكمن في دفار أو دفارين عليهم جنود يحملون أمواس غير معقمة يحلقون بها لجمع من الشباب (بلا قانون) في بلد تتصاعد فيه نسبة الأيدز والعنوسة والأسعار في متوالية هندسية !
وأكثر جهلاً من يظن ان القضاء على مثل هذه الظواهر والسلوكيات يكمن في إزالة (المظهر) وترك الجوهر ؟ وكيف لنا أن ننفي صفة الجهل عن مثل هذه المحاولات إذا علمنا أن معدل نمو شعر الرأس حوالى 1 سنتيمتر في الشهر فذلك يعني أن هذه (الحملات) يجب أن تكون شهرية (إن لم تكن يومية) مما يقتضي تنظيمها بإنشاء (فرع للحلاقة العسكرية) برئاسة (ع . ر. ح) عميد ركن حلاق … وتزويده بادوات الحلاقة من مقصات ومكنات وديتول وفوط وأمواس وبقية (العدة)!
إن معالجة المسببات الأساسية للظواهر غي المنضبطة هو الطريق لإجتثاثها فلا يمكن أن تتوقع أن تتزايد نسبة العنوسة والعزوف عن الزواج إلى هذا الحد المروع ولا تنتشر الدعارة والزواج العرفي وحالات الإغتصاب التي اضحت قراءتها يوميا لا تثير الإنتباه .
إن عدم الإنتباه لقطاع الشباب وتعهده بالرعاية بوضع الخطط المدروسة له لتدريبه وتأهيلة وإيجاد العمل المناسب له هو ما أفرز مثل هذه الظواهر ومحاولة الدولة لإجتثاثها عبر مثل هذه الحملات غير أنه قانوني ويجعلنا أضحوكة أمام العالم فهو شئ غير عملي مثل تلك (النفرة) لحفر ترعتي كنانة والرهد بالكوريك و(القفه) وأبو راسين !
إن ضبط الشارع العام ذو صلة وثيقة وعروة لا تنفصل عن ضبط المال العام ، فلو أننا قمنا بتجميع ما تم (لهطة) من خلال تقارير المراجع العام لأربع وعشرين سنة لكانت هذه الأموال كافية لتشغيل كل ابناء هذه الدولة والدول المجاورة ولإنشغلوا بمهامهم ووظائفهم وآمالهم وأحلامهم بدلاً عن إنشغالهم بتسوية (الحواجبين) ولبس (السيستم) وفلفلة الشعر الذي تتم حلاقته بواسطة قوات الشعب المسلحة التي ليس أحد مهامها (الحلاقة للجمهور) !

كسرة :
العبد لله ضد أي خروقات للقانون حتي وأن كانت تهدف لمصلحة المجتمع لأنو لو كل الناس خرقت القانون مش ح يكون في مجتمع ذااااتو ..

كسرة ثابتة (قديمة) :
أخبار خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟

40 تعليق

    1. والله مبروكه عليك ياويندوز بس مابتكمل الصندوق براك

  1. و الله يا جبرة انا شغال في الشرطة العسكرية في احد دول العالم … بس ما لينا اي حق نتدخل في امور مدنية الا في حالة الحرب او النفير العام منها ننزل مكان الشرطة المدنية “استبدال مؤقت او صلاحيانتا اعلي منهم” و نشتغل معاهم جنب الي جنب في الحماية المدنية

  2. اهو بدل ماتقعد القوات النظامية فى الدفاع بالنظر بس….. اهو تعمل ليها حاجة تانية .

    1. عمك لا مش كده قالوا في قمل اسرائيلي عاوزين ينضفوه ما تظلم الجيش

    2. هههههههههههههههههههههههاااى,حموضة جد

  3. قالوا الشعر الكثيف بشوش على نظام الدفاع بالنظر و بيحمي الناس القاعد تكشف في السما تشوف زي الناس .. ده غير أنه الشعر كل ما خفه كل ما قل أستهلاك الجل و بالتالي توفير قروش الجل في حاجات أفيد … وبرضه كل ما خف الشعر كل ما قل أستهلاك فيتامينات الجسم وبالتالي تخفف الحاجة للتغذية و الموية … ما تخلوكم ناس فقر أنظروا للجوانب الايجابية ..الشعر الكثير هو سبب كل المشاكل الاقتصادية و أصبح مهدد أمني كبير بسبب التشويش البيعمله للكشيفة بتاعين عمك عبد الرحيم هههه

  4. يكونوا دايرين يتسدو الحلاقة القعد يحلقوها ليهم في
    جنوب كردفان وجنوب النيل الازرق ..
    عميد ركن حلاق دي عجبتني .. ولمن يقدر يحلق شعر الحته
    الصعبه ديك يقوم يدوهو رتبة مشير . وي وي ..

    1. ليس لدي غير ويكان اجنوبي يجازي محنك بس بيكون الحته ديك محجوزه للنبي في الترقيه اللي جايه هع كع كرع

    2. آآجنوبى, يعنى هسى أى مشير فى سلاح الحلاقة دة بيكون حلق الحتة الصعبة ديك و الا كيفن ؟؟؟؟؟؟

  5. فعلا الناس دى ما عارفة تعمل شنو …. المال مال الشعب بيضيع فى الفارغة ياريت يكون فى عشرة زيك يا أستاذ كان حال البلد اتغير بالله عليك أكتب وعرى الناس دى فى حاجات كثيرة لازم نضع ليها حل …لك منى كل التحايا و الود

  6. تحليل غلبان شوية يكون الجماعة شامين ريحه الكاكي ولان الناس كرهت كل حاجة مؤتمر على شعبي على جناح ام جكو على تيس ستي نفيسه على احمر على ابيض قالو يطلعو الشرطه العسكريه عشان الناس تكره الكاكي زاتو ويبقى محمد احمد ما عنده قبله لكن محمد احمد قريبا بعد الكتمه دي بيقول بم ولو قالها بعدمهم نفاخ النار بالله شوف ديل من اين اتى هولاء

  7. ما عارف غايتو .. لكن امكن يكون ده برنامج يشغلو بيهو الناس عن امر المصفوفه والتجاوزات ومصير وابي زي العبد لله .. او تكون مجرد خستكات ساي زيها زي غيرها

    1. اخي شطه يكون عاوزين يدخلوا الشعب السوداني كوووووووووووولووووووووووووو الكلية الحربية استعدادا لليهود مش نهج حضاري

  8. يابروف الجيش قاعد بون شغل الحيكومه الرشيده قالت تستفيد منهم ما دام ماقدرو علي الطيلرت دى حقو يشتقو حاجه تفيد البلد وكمان لو عملو كشه للحبشه واجبراهم يعملو اقامات ويكون كل حبشي عندو كفيل يكون تمام التمام

  9. واحد من البلد ديييك | رد

    يا جماعة الكلام ده صاح و لا هظار !!!

    1. صح الصاح كمان,, و اكان شعرك طويل يا تلبد فى البيت بالنهار و تطلع بالليل (زى حزام العربية الالزامى, نربطو بالنهار و نخليو بالليل),, او تلبس ليك عمة و تكربا مزبوووط عشان ما تقع منك, لانو سمعنا تحت تحت كدة حيعملو مباحث الحلاقة المدنية, و يل شغلهم يتحروا عن اللابسين عمم من فئة الشباب !!!!!

  10. ياجماعة إنتوا بالجد جادين في الكلام دا؟

    1. يابت مدني جااااااااااااااادين بس كربي الطرحه كويس

      1. تسلمي بت وراق ويا ريت كلنا ننكرب والمسالة والله ما فايته ليها ثلاثة لساتك قديمة قدام الكباري ما دبابات ولا كلاشنكوفات ولا ولا بس لساتك قديمه تنحرق وبعدها النار ولعت والكتمه تروح

    2. بت مدنى,, الجماعة ديل جادين جدا , بس هى على الاولاد حاليا,, يعنى ما عليكم خوف فى المرحلة الحالية,, بس ما مضمونين متين ممكن يصعدوا الوتيرة و يضيفوا ليها الجنس اللطيف !!!

  11. انتو ياجماعه ما عارقين السر وراء الحلاقه دى شنو الجماعه ديل عايزين يعرقوا تحت شعر الشباب دا في شنو يقال والعهده على الراوي بان هنالك كميات من المتفجرات دخلت البلاد عبر الربيع العربي ودعمتها القنوات ولم تستطيع القوات الامنيه اكتشافها ومتى ساعة الصفر لذلك تبحث الاجهزه الشرطيه عن مكانها تحت الشعور
    كسره
    لو اخوك حلقو ليهو بل شعرك

    1. اختي بت وراق دا جس نبض شوية ازلال معناها في طامه كبيرة جايه الله يكذب الشينه (ممكن صيف العبور للفاشر ونيالا) وبعدين يفصلوه برضه ما نحنا فيران تجارب من اين اتى هؤلاء

  12. لما تضايق مشاعرك
    وينكتم جواك شعورك
    اوع تحلم بالمشاعر
    والشعور سوداء طويله
    امشي للشرطه بتجيرك
    وتحليق ليك شعورك

    1. وبعد تحلق وتبقي مارق
      صُر شعورك في وشيك
      واملا ايديك من حجارك
      وفلّع أي كلب يجيك
      وفلّع الزول البتاوق
      قول لي بكره الدور بجيك
      يا كمان ..
      نفّض هدومك
      وأي زول قال ليك نعيماً ..
      قول لي انعم اللهُ عليك

      1. رايك شنو ياجنوبي نعمل رابطة حلاقين اقصد شعراء المدونه

  13. سناريو الحال بعد الحلاقه

    مواطن ماشي في شارع الله اكبر ده و سرحان
    عسكري الجيش (اسم الدلع جندي):اقيف يا ملكي يا وهم. معاها ضربة في القفا
    المواطن المسكين: اا..ااي في شنو يا جنابو؟
    عسكري البوليس(اسم الدلع جندي):اقعد تحت يا زول. معاها لبيعات في الضهر بخرطوش موية الاسود
    عسكري الجيش (اسم الدلع جندي):ماشي وين. مربي شعرك السمح دة و عامل ليهو جل كمان؟ ارح لجنابو في البوكس هناك. طبعا معاها مسكة من القفا و شلاليت
    البوكس فيهو ملازم جدييييد.
    الملازم: انت ملكي وهم ولا شنو؟ الجماعة ديل الا يحنسوك عشان تجي؟ يا عسكري ناولني العدة دي.
    المواطن: جججنابو ماااافي مشكلة انا بقعد عشااااان يحلللقو لي.
    الملازم: حلاقة شنو يا زول؟ دي ما مضمونة. نحنا دايرين نطهرك عديييييل كده

    1. هههههه قويه يا قويه ..
      يا ربي الحكومه تكون فكرت انها تعمل تصديق تربية شعر ؟

      1. زى بطاقة الخدمة الالزامية بتاعت المغتربين المساكين !!!

    2. قطعت مصاريني آقوية انا اتابع واتابع واتابع قايل فيها ايصال هسسسسس ما في واحد يكلم الحكومة بعدين يبقى فيها ايصالات شعر هع كع كرع

      1. صدقنى يا الغلبان بكرة يمسكونا يحلقوا لينا فى الشوارع و يدفعونا ايصالات (باورنيك 15 كمان) مقابل الحلاقة !!!

      2. الغلبان وفلادمير دي فكره خطيررررره عديل وبت شواطين .. ” ايصالات المظهر العام ” بكره البرلمان حيصفق ليها ويزعرررد
        دي ممكن تصلح اقتصاد البلد في الشهر الاول وحتجيب قروش اكتر من مشروع ” حذاء الدفع المقدم ” “وعداد الهوا” خصوصا البفلفلو شعورم هم ديل اولاد مغتربين يعني بدفعو بالريال.. والاجانب والعندو شعر عاجبو عاوز يربيهو يطلع تصريح تظليل قصدي تصريح “اعفاء للمظهر”شهري وسنوي ونهائي ..والكيزان يستلمو استيراد الامواس ومكنات الحلاقه وكل واحد يكون عندو محل محلين كده لزوم النقاطه ..

        بتاع المرور يوقفك ..ويطنطن ترخيص و1 2 3 حلاقه انت والشباب المعاك ..500 جنيه تدفع ولاتمشي القسم قصدي الحلاق

        شهرين كده والعاصمه تبقي زي المعسكر كلهاا صلع ..

    3. والله انت لذيذ عديل هههههههههههه

      1. والألذَّ لو لقوك حالق , يسألوك عندك إيصال وتقول لبه لأ حلق لي صاحبي… لالالالا … ياعسكري إيصالين حلاقة بدون رخصة وبإهمال

  14. قال ع. ر. ح. إنت قااااااااااااااااااااااصد أنا عااااااااااااااااااااارفك
    (ع)بدال(ر)حيم محمد (ح)سين …..

  15. الدور علي ناس الدفاع المدني…..
    من باب التدخين ضار بالصحة وكدة….
    أيَّ زول/ة بيدخن تتحرك نحوه كتيبة لدحر السيجارة ……

    لكن كمان الشكلة لو فالو دايرين ينظمو حملة ضد السيسسسسسسسسسسسسسسسسسسسستم.

  16. وين اخونا المندهش ياجماعه اووووووووووووووع يكون بيحلقوا ليهو ويطيرو الاندهاشه الى الابد

  17. وجدتها وجدتها (ارشغلبان) انا شامي ريحت كوز جاب امواس بالحاويات وبااااااااااايره هي السر وراء الحلاقة

  18. ههههههههههههههه والله قربتا اموت من الضحك, مما خشيت الجامعة نفسي القى مقال عن الموضوع دا(هو بكون طلع لكن لاني ما بقرا جرايد ولا بحضر تلفيزون ولا ولا … ما لاقني 1 قبلي كدا),
    المهم بقرا لي جبرا دا لي زمن اكتر من سنتين(من منطلق الضحك في تصريحات المسئولين السيوبر ديك و كدا لانو شر البلية ما يضحك بس ما اكتر), لكن الموضوع دا عجبني و كدا فقلتا اخش اشارك.
    انا حاليا طالب في جامعة الخرطوم والموضوع الصراحة كم مرة شغلتو ليو اصحابي في الجامعة.
    ما عارف ليه لكن اللاحظتو انو ناس امدرمان تحديدا اساتذة و خبراء اجانب في الشغلة دي, دا غير طبعا قصص الجامعة الفارغة الكتيرة العارفنها ديت, مع اني ما لفيت في الجامعة وبكون زهجان لمن اكون فيها, لكن برضو شفتا فيها العجب العجاب, و خصوصا ناس السنتر(ناس اداب والبقية الجمبهم ديك) , طبعا لا للعموميات لانو في الكويسين
    لكن الشفتو هناك بطال مرة واحدة. دا في جامعة المفترض انها جميلة و مستحيلة!!! سالت اصحابي قلتا ليهم اذا الخرطوم كدا, الباقي كيف؟ قالوا لي كدا شوف ناس الدبلومات العندك اول, و ما شاء الله اسوا بي مراحل. قالوا لي شفتا ديل؟ بالنسبة لي جامعات التانية شيوخ 3:)
    نقطة جوة الموضوع:
    ياجبرا القصة ما تربية و تعليم ولا شغل ولا اي شي(اي صح هو منعدم وحالة التعليم بالجد بتخوف) لكن كونك تعمل في روحك كدا, انتا بتهين في نفسك قدام الناس بس, 1 يقنعني انو دي دايرة درس عصر كمان!!!
    حاجة تانية لي الشباب الهنا, انا دار افهم, من وين فهم انو الدولة لازم توظف الناس دا جا؟ المحسوبية بالجمبة, اذا ما لقيت شغل دا ببساطة = انك زول ما مؤهل او خشيت قسم ما مرغوب فيو, و في الحالتين انتا المسؤول. ما ممكن تخش الجامعة و تعديها صياعة وبنشات و عنترة و تتخرج بي 3 سنين ريبيت و والباقي كلو ملاحق و تقول ما لقيت شغل, ولا تمشي تخش لي كلية هندسة نووية ولا شي وتجي تقول ما شغلوني. الدنيا حسابات و قرارات, واي زول بتحمل مسؤوليتو.
    في مقولة بتقول it’s not your fault if you were born poor, but it’s yours if you die poor . قيس عليها اي شي, ما غلطك انك ما لقيت تعليم, لكن غلطك انك ما اتعلمتا, و قصص الناس النجحوا و انجزوا رغم معاناتهم مالية الكتب.
    ………يتخيل لي انا طلتعا برة الموضوع لكن المهم كلام و جا في راسي, ما تاخدو علي, لسة طالب وراسي فاضي لانو مافي تعليم =D

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: