وكيل معندوووش ملف

أسمح لي عزيزي القارئ ألا أبارح محطة الإعلان الكارثة لأعقب في هذا المقال عما صرحت به وزيرة تنمية الموارد البشرية إشراقة سيد محمود في مؤتمرها الصحفي الذي عقدته بعد أن (وقع الفاس في الراس) في محاولة منها للقول بأن (الإعلان ده لا شفتو ولا بعرفو) إذ إتهمت مدير الشؤون المالية والإدارية والوكيل المقال وأربعة من أعضاء النقابة الفرعية، اتهمتهم بالوقوف وراء إعلان الوظائف النسائية المثير للجدل العبدلله لم يكن يتوقع من الوزيرة أن (تتلزم ووتتحزم) وتقول ده غلطي وأنا المسئولة عنو .. لانو نحنا خلال 24 سنة (ثانوية عامة) مفيش حد من المسئولين الذين على قمة المسئولية سمعناهو قال الغلط ده مسئوليتي وذلك على الرغم من الكوارث والنوازل والخطوب والعطوب والجيوب !
حتى الشريف ود بدر والذي كان على قمة سودانير وقت أن بيع خط هيثرو قال في إفادته المشهورة أنه غير مسئول عن ضياع الخط وما (عارف) عنو حاجةً !! وهكذا يصبح شعارنا (الحضاري) في هذه الحقبة المتوضئة هو (المسئول غير مسئول) !!
لأن المسئول غير مسئول دعونا نتجاوز مسألة إعلان (تصدير الإناث) المقزز لندلف إلى كارثة أكبر فجرتها السيده الوزيرة بدم بارد إذ صرحت قائلة (إن نتيجة التحقيق مع مدير الشؤون المالية والإدارية بالوزارة كشفت أنه لا علاقة له بالخدمة المدنية وأنه قام بتزوير خطاب انتداب وحصل على ترقيات في ظل غياب دور ديوان شؤون الخدمة حتى بلغ الدرجة الثانية وأنه يصرف لنفسه حافزاً شهرياً من أموال الوزارة يبلغ (26) ألف جنيه غير الرواتب والمخصصات الأخرى، إلى جانب مخالفات فساد مالي وإداري بلغت 14 مخالفة.!! ) !!
عليكم الله جنس الكلام ده حصل قابلكم ؟ أو ممكن يحصل في أي مكان في العالم؟ ووين ؟ في الوزارة التي يتبع لها ديوان شؤون الخدمة (يعني ديوان الست الوزيرة القالت إنو غائب) والذي من مهامه إعداد البيانات والمعلومات والإحصاءات الخاصة بجميع العاملين والاحتفاظ بسجلات خدمة تجتوي على بيانات ومعلومات كل العاملين بالخدمة المدنية القومية .. !! لا وأيه السيدة الوزيرة مناط بديوان شئون الخدمة التابع لوزارتها مراقبة تطبيق سياسات ونظم وقوانين ولوائح وإجراءات الخدمة المدنية القومية على المستوى القومي .. (يقوم يتعين فيها زول بخطاب مزور) !!.
طيب فين اللوائح التي تنظم الإعارة أو الإنتداب ؟ زول لا علاقة له بالخدمة المدنية يعني إسمو ما موجود في أي حته حكومية .. يعني جاي من الشارع .. يقوم يزور خطاب إنتداب .. طوالي تقولو ليهو إتفضل ده مكتبك؟ أين المشارورات والتصديقات والمكاتبات التي تسبق قرار الإعارة أو الإنتداب بين الجهة التي أعارته وبين الوزارة؟ (لاحظ إنو الوظيفة من الوظائف العليا يعني ما كشا مشا) .. طيب مدير شئون الموظفين بالوزارة ما طالب الجهة الأعارتو بالملف بتاعو؟ وإذا ما جاب (خلو طرف) من الجهة الكان فيها طيب إشتغل إزاي؟ خلونا من ده كوووولو، الزول ده صرف مرتبو(كيفن) وعلى أي أساس وإسمو مش موجود عند الحكومة ومش عندو شهادة آخر صرفيه؟
لا ومش كده قال أيه .. إترقي كم ترقية ووصل (المجموعة التانية) طيب الترقية دي بيختوها ليهو وين؟ بيلصقوها في باب المكتب ولا بيختوها ليهو في ملفو (الما موجود) ؟ والمصيبة كما صرحت الست الوزيرة بإنو (فضل ليهو سنتين) ويترقى (وكيل) .. وكيل وزاااارة يا حضرات القضاة والمستشارين … وكيل وزااااارة معندووووش (ملف) !
كسرة :
وديني الحوادث يا ولد !!

أسئلة الجمهور :
1- الزول ده صرف أول مرتب ليهو كيف؟
2- الزول ده إترقى كيف؟
3- الزول ده ليه ما إنكشف طوالى؟
4- هل يمكن لإبليس أن يقوم بالعملية دي؟
5- الوزيرة كانت ساكته ليه؟

الجائزة :
– علبة لبن بدرة مشع
– فرخة من الفراخ (المحمية من فوق)
– زيارة لقبر (المرحوم هيثرو)
– مقطع جلابية من (الأقطان)
– شوال (تقاوي)
– برميل (مبيدات)
– كرتونة (أدوية)
– فرصة (للحج والعمرة)
ولو ده كوووووولو ما عجبك خلاس أسكت (وخليها مستورة) !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو؟

Advertisements

56 تعليق

  1. م
    ا
    ر
    ل
    ب
    و
    ر
    و
    أحسن

    1. اولا مبروكه عليك المارلبورو وشكلك مهربا وليك كم سنه انتا يا ابو معاز وكيل ولا لسه (وكيل ويندوز الغائب

  2. سجم خشمنا يا بروف ودا قعد السنين دي كوووولها كيفن
    انت يا بروف الكلام دا في السودان متأكد ياخوي

  3. كف نف

  4. النصيحة يا بروف نوجه شكر للسيدة الوزيرة لانها كشفت او اعترفت بوجود خطأ ادارى فادح زى دا ,,
    وغيرها سااااااكت وما حاسى بى شئ ,,,
    لكن حكاية الصرف دى عااااااادى ! واسالنى انا الكنت قريب من ادارة ما ,,

  5. امبارح راشد عبد ارحيم في قناة النيل الازرق ، تحدث عن تهويل الفساد في السودان ويجب تحري الدقة حتى لاتتضرر اسر المسئولين نشتكي لمنو ياراشد والبتحرى منو مادام دي وزيرة بتتحدث عن الفساد في مؤتمر صحفي اتقوا الله ياصحفي النفاق والدجل لايمكن ان تكون بصيرتكم معمية لتلك الدرجة اللعينة ، الامراض الاخلاقية في السودان صارت كالسرطان ، وهؤلاء الانتهازين والطفيلين يساهمون في انتشار المرض

  6. مبارح راشد عبد ارحيم في قناة النيل الازرق ، تحدث عن تهويل الفساد في السودان ويجب تحري الدقة حتى لاتتضرر اسر المسئولين نشتكي لمنو ياراشد والبتحرى منو مادام دي وزيرة بتتحدث عن الفساد في مؤتمر صحفي اتقوا الله ياصحفي النفاق والدجل لايمكن ان تكون بصيرتكم معمية لتلك الدرجة اللعينة ، الامراض الاخلاقية في السودان صارت كالسرطان ، وهؤلاء الانتهازين والطفيلين يساهمون في انتشار المرض

  7. دي الكميرا الخفيه ولا شنو.
    يا حليل ايام زمان وناس زمان.هل توقفت حوا السودانيه من إنجاب مسؤولين زي ناس زمان

  8. السلام عليكم
    صحيح في حالات كثيرة في الخدمة المدنية مثل هذه الحالة وما خفي كان اعظم

  9. انا شايفة انه دى حاجة بسيطة بالنسبة للحاصل فى البلد الجميلة دى من 24 سنة .نصبر يا اخواننا نحن ماخلاص المفروض نكون اتعودنا

  10. يابروف مع الإعتذار ليك لكن إنتوا البكشف الفساد بتهاجموا وتقولو ليه إتأخر ولو ماكشف الفساد تقولوا متستر عليهو . في رايي الوزيرة دي مشكورة لأنها كشفت القصة دي وإحتمال إتأخرت لأنها بتجمع في الدلائل والأوراق وكشف الحقائق دي ماهين.

    1. البيكشف وياخد موقف بنقول ليهو كتر خيرك لاكين
      البيكتشف ويسكت ويقول سكت عشان جهات عليا طالبتو
      انو يسكت ده معناه بيلعب صالح ورقو ..
      شكلك ما عرفتي بالموضوع ده الا الليلة الموضوع ده
      قديييم يا بت مدني ولمن ضايقوها في موضوع الاعلان
      وطالبوها تلبس الحجاب اتضايقت ومرقت الفي بطنا ..

      1. والله ياجنوبي صراحة أنا ماعارفة الكلام دا

  11. هي اشراقه دي ذاااتا قبل ما تشتغل وزيرة كانت
    شغالة شنو ؟ وياتو خبره ومؤهلات دي البقتا وزيرة؟
    وشهادات ومؤهلات اخوها البقي مدير مكتبا شنو ؟
    والله المسئولين ديل حيرونا عديييل كده ! يعني هسي
    المعارضه تقول شنو تاني ؟ عاد بعد ده الا المعارضه
    تدافع عن الحكومه شان تبقي معارضه !!

  12. ده كلام شنو يا جبرا كيف يكون زول فى منصب زى ده ماعندوا علاقة بالخدمة المدنية قول كلام معقول

  13. موش يمكن يا بروف الراجل دا ملفه في [المؤتمر الوطني] ودا أكيد لأنه بيكون تعيين سياسي وكدا ،،، وفي بلدنا زي كدا كثير وحصل أيام كنت بالتعليم بالسودان أن أكتشف أحد [مُنظراتي] إمتحانات الشهادة السودانية وهو في الأصل غير معلم!! ! شنو ليك؟

  14. البروف العزيز والسمار الكرام ،،،
    إسمحو لي بأن أقول لكم بأنني والله العظيم بطني طمّت ولا أستطيع أن إستحمل
    ولذلك إسمحوا لي بأن أطرُش على هذه الوزارة بمن فيها
    يييييييييييععععععععععععع

    1. برضو ما بنخليك (vominore) راقد بالهبل صباح ومساء

  15. والله دي قصه

  16. لكن والله يابروف جوائزك في السلك جميلات جدا

    1. البروف نسى يضيف فى الجوائز واحدة تكون من ………رقراقة الوجه بضة الجلد ملساء القدمين ردماء الكعبين .. ناعمة الساقين.. ضخماء الركبتين.. لفاء الفخذين .. ضخمة الذراعين .. هيفاء البطن .. ممشوقة الخصر.. رخصة الكفين.. ناهدة الثديين.. حمراء الخدين.. كحلاء العينين .. زجاء الحاجبين.. لمياء الشفتين.. بلجاء الجبين شماء العزبين .. شنباء الأسنان.. محلوكة الشعر.. عطرة الثغر .. غيراء العنق .. طفلة الملمس.. عطبولة العنق .. عيطموس !

      1. قويه لكن

  17. والله كلام الوزيره ده يحير عديل كده مادام لحاجات دي كلها بتحصل ف وزارتا وهي ماعارفا طيب مدير مكتبا ده رسلوهو السوق ولا الوكيل ده احتمال يكون من بقيت اخوانا ولا اخوها من ابوها …ثانيا كونها عرفت بالكلام ده وما اتخزت اي اجراء ضدو ده حاجه تانيه وبالطريقه دي نمشي نفتش ف ملفاتنا احتمال يكون بايعنها لي جهه ونحنا ماعارفين وعاملين فيها موظفين ساي .احيييييييييييييي انا

    1. الوزيره دي بس ما كلهم في الهواء سواء حتى كبير اخوانو

  18. واحد من البلد ديييييك | رد

    فى شفافية أحسن من كده !!!!!!!!!!!!

  19. الظاهر انوالمستوزرة دى حست بينهايتا قامت اعترفت.ياربي الفريق الامنجى القال محمية من الله عزوجل خبرو شنو
    شالوهو ولاكسير التلج ونفاقو الشديد شفع ليهو عند الحرامية

  20. السلام عليكم ورحمة الله و بركاته جميعا ….. بالله الناس ساكتة على شنو ….. نحن فى الخارج بنرسل أولادنا و بناتنا بعد التخرج و معاهم أعلى الشهادات و بنقول حرام لازم يشتغلوا فى بلدهم و ما يتعبوا زى ما نحنا تعبنا فى الغربة و “الشحططة” …. على رأى الحاجة … وبعد دى كله يقولو ليهم أنتو جاين مع منو .. تبع منو .. ؟؟؟ ولا بشوفو شهاداتهم ولا بيسألوهم من دراستهم … ورجعوا الاولاد أيد ورأ وأيد قدان ” بخفىّ حنين” .. يا عــــــــــــــــــــــالم يا هـــــــــــــــــــــــــــــــــــــــــــــــووو … الكلام دى بيرضى منو … وبعد دى جااااااين يكشفوا أنفسهم بعد ما الفاس وقعت فى الرأس …. خليكم نـــــــــــــــــائمين يا حكومة الدمار الشامل فى العسل لحدى ما تجيكم مصيبة تأخدكم يا رب عن قريب يا ظلمه … (دول الظلم ســــــــــــاعة ودولة الحق الى قيام الســــــــــــــــــــــــــــــــــــــــــــــــاعة)…. لك كل التحايا أستاذنا الفاضل الكريم

  21. انا غررته بكرة ارجع السودان و راسي عديل علي وزارة المالية و معاي جواب تعيين جاهز في وظيفة مدير عام ادارة تجنيب اموال الدولة و للضمان بشيل معاي جواب الترقية الجاية. و هاك يا لغف شمال و يمين و حسابي البنكي جاهز في جزر الهواي. بس شوفو لي مرتين عشان ندبل بيهن لزوم الوجاهات و كده.

    1. آآآآآآطه كان لقيت فيها شئ الغفه فاااااااااااااااااااااااااااضيه جوابك فيش بيش

  22. في برضك عماره الرباط الوقعت وتانى شي في حتي عجز الفساد من سي امر من الفساد زاتو الناس دي نست الله خلاص وحق الماس دى راح والله انا حقي ماعافي كلو كلو واقف خصمأ لهم امام الله عز وجل يوم القيامه

  23. طيب..في موظف وصل لدرجه مدير قسم هندسه مدنيه في مصنع سكر سنار و بعمل محاضرات في جامعه سنار ..لما رجعوا للملف بعد موضوع رشوه (عطاء الاستراحه)..الراجل طلع خريج تربيه جغرافيا..جامعه ام درمان الاسلاميه!! تقول لي الشعب السوداني ما مبدع..لما اكتشفوهو خلاص كان باقي ليهو من المعاش سنتين..المهم مافي زول حاسبوا, ناس المصنع قالوا ليهو للعشره و العيش و الملح البينا : نصحي الصباح بكره تكون اتخارجت و تاني ما نشوفك ..

    1. سلام ياقبيلة،،،
      بالله يا شادونا وشادينا سكر سنار برضو فيهو من عجايب الدنيا ديه نفس الملامح والشبه والمشية زاتها وقدلتو!!
      أحييك وأحي عبرك سكر سنار وناس العيبساب وعمارة الشيخ هجو والشيخ التوم ود بانقا وعريطل والفخيخير والتباخة وماتنسي جبال موية والجبال البيوض،،
      تحياتي ليك يا صديق يا مبدع وأبقي راسلني علي الإيميل korokoro102at gmail.com
      تعرف يا صديقي كتبت ليك الإيميل بالطريقة دي بس إنت قوم بوضع علامة @ مكان الكلمة at لأنو لو كتبت ليك الإيميل عديل كنت حا أكون منتظر الإذن بالنشر من الإدمن،،،،،
      تحياتي مجددا” وفي إنتظار عينيك كملت الصبر كولو!!!!!

      1. ود الخلا مفتش زراعي والا ايه

      2. إيييييييييه!!!!!!!!!!!

      3. تسلم يا اخوي .. و مشكور كتير..و حكايه الايميل مافي داعي ليها مع احترامي لك..نحنا في الصفحه دي مسموح لينا بكشف كل الحقائق و نشر الغسيل القذر..لو عندك اضافه اكتبها هنا عديل و لو عندنا رد ح نتفاعل معاك بكل موضوعيه ..مع احترامي

    2. آآآآآآآآآآآآآآآزول (ظل) مش بركه الما كان دكتور زي بتاع عطبره

  24. عماره الرياض عماره الرياض عماره الرياض
    عشان ما يجئ الوكت وننساها
    انا غايتو كلمت أولادي
    (شاهد علي العصر)

    1. شاهد على العصر ايه كده ما نسيت( الجزيرة )آآآآآآآآآآلعبيد

  25. والله العظيم لو حكمنا ابليس اللعين ما وصلنا لهذه الدرجة من الفساد والانحطاط

  26. ماكنت عارف يا ريتني كنت عارف / واحد honest

  27. الوزراء هم فاضين من السفر والامتيازات والاجتماعات وغيرو من المأرب الشخصية الوزير مفروض يتابع شغل وزراتو يوميا وبنفسو وضبط حركة التقارير ووضع نظام للضبط الداخلي مزود بلبمات حمراء مضيئة في حالة وجود اخطاء وممارسة خاطئة لكن إستشراء الفوضي وعدم الضبط وتغليب المصالح الشخصية هو المشكلة وسيدنا عمر يقول والله لو عثرت شاه ………. ودا النظام المفترض وجوده يعني الوزيرة قدمت اعتراف ضمني بعدم مقدرتها لإدارة شئون وزارتها مش نقول كشفت داك وداك دا شغلها والله غالب

    1. يا عمك دا ما شغل الوزراء زاتو

  28. والله دى بقت حالة ما يعلم بيها الا الله وانا عن نفسى بقيت ما بستغرب من اى حاجة

  29. يا بروف لو انت ما خايف علي نفسك نحنا خايفين عليك …لا تأمن كيد النساء حتي ولو كانت وزيرة…ما بنقول ليك أسكت لكين بنقول ليك ربنا يحفظك

  30. البلد دى الشعب فيها ضائع والحق ضائع والشفافية ضائعة والانسانية ضائعة والعدل ضائع \
    والعدل ضائع الشئ الماضائع الفساد والملطشة ياأخونا الاستاذ الفاضل جبرا

  31. نسيت بالطريقة دى خط هيثرووووووووووو ذاتو ضائع

  32. انت عارف يا أستاذ جبرا مشكلتنا شنو عدم وجود سستم يعنى مافى نظام مافى وصف وظيفى الحكاية عايره ودوها صوت وكمان حكاية الزول المناسب فى المكان الناسب مهمة والبفقع المرارة الدفاع الشديد من ذوى المنفعة

  33. مالك ابو قرفة | رد

    استغفر الله – الدمار الذي حصل في هذه البلاد ما ممكن يتصلح تاني … فساد الذمم … فساد الأخلاق… فساد في فساد حتي اننا صرنا افسد وأفسق من الفساد عشان المؤتمر اللا وطني يحكمنا… بالله مش كان احسن شارون واللا عقار واللا سلفاكير حتي. إنما الأمم الأخلاق ما بقيت فإن هم ذهبت أخلاقهم (بغو وتجبروا وتسلطوا وتهبوا…) يابروف لانريد ان نقلب المواجع اكثر، في عبارة واحدة كما تقول القوي المسمي بامعارضة بل هي المتعارضة! ان لم يذهب هذا النظام لن ولن تستقيم الأمور. وهذا الشعب برضو يستاهل: مالو كان نظام مايو مالو كان نظام عبود… علي الأقل كانوا علي خلق ونزاهة وشرف…اين نحن الآن؟؟؟!!!

  34. اعجبتني الجوائز ..
    ولا جوائز شركة زين ..
    لكن لو في اسأله غير دي ادونا نجاوبا

    1. الاسئلة ما صعبة يا شطه مالك داير تسوى المديده حرقتني

  35. نتجاوز مسألة إعلان (تصدير الإناث) – كلام البروف هههههه – دي في البهايم ممنوعه هع كع كرع كتمت كتمت كتمت

  36. ليهو حق يزور ويترقى … وينهب كمان … ما الحكاية كلها همبتة في همبتة … مجموعة هنباتة جالسين على رؤس النايمين …

  37. يا متخلفين الوزيرة لما استكملت في الموضوع ده ( موضوع مدي الإدارة المزيف) كانت قاصدة الحاصل حسي منك ده يحصل ، يعني ببساطة كده تعوم الموضوع الأساسي ( أكان ما أخاف الكضب كان موضوع الإعلان الخايب داك)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: